ᐋᓇ ᓛᒻ ᓂᕈᐊᒐᒃᓴᐅᖃᑕᐅᔪᖅ ᑲᓇᑕᒥ ᑕᒃᑯᓐᓇᒐᒃᓴᓂᒃ ᐃᓕᓴᕆᔭᐅᔾᔪᑎᓄᑦ

ᐱᓇᓱᐊᕈᓯ ᐊᓂᒍᐊᓂᙱᑎᓪᓗᒍ ᖃᐅᔨᓚᐅᖅᖢᓂ ᓂᕈᐊᒐᒃᓴᐅᓂᖓᓂᒃ ᐊᐃᑉᐸᖓᓂ ᑲᓇᑕᒥ ᑕᕐᕆᔭᒐᕐᓄᑦ ᐃᓕᓴᕆᔭᐅᔪᑎᒧᑦ, ᐅᓇ ᐃᖃᓗᖕᓂ ᓄᓇᖃᖅᑐᖅ ᐋᓇ ᓛᒻ ᐅᖃᓚᐅᖅᑐᖅ ᓱᓕ ᑐᓴᖅᑎᑕᐅᓂᖓ ᐃᒃᐱᒋᐸᓂᙱᓐᓂᕋᖅᖢᓂᐅᒃ.

“ᓱᓕ ᑕᒪᓐᓇ ᐃᒃᐱᒋᐊᓂᒍᓐᓇᙱᑕᕋ,” ᐅᖃᖅᑐᖅ. “ᓱᓕ ᑕᒪᓐᓇ ᖁᒃᓴᓪᓚᒃᓯᒪᓂᕋ ᐃᒃᐱᖕᓇᖅᑐᖅ.”

ᓛᒻ ᐅᖃᓚᐅᖅᑐᖅ ᓂᕈᐊᒐᒃᓴᐅᖃᑕᐅᑎᓪᓗᒍ ᐱᙳᐊᖃᑕᐅᓂᖓᓂᒃ ᐅᑯᓇᓂ ᒍᕆᔅᓕᔅ (Grizzlies) 2019-ᒥᑦ ᑕᒻᒪᖅᑕᐅᓇᓱᒋᓚᐅᖅᓯᒪᔭᖓ ᐊᒻᒪᓕ ᓂᕆᐅᙱᖢᓂ ᑕᐃᒪᓐᓇᐃᒃᑲᓐᓂᕋᔭᕆᐊᒃᓴᖅ. ᒫᓐᓇᓕ ᓂᕆᐅᑐᐃᓐᓇᓕᖅᑐᖅ ᐃᓕᓴᕆᔭᐅᔾᔪᑎᒥᒃ ᐱᙳᐊᖅᑎᐅᕙᒃᑐᖅ ᐋᓇ ᓛᒻ ᓂᕈᐊᒐᒃᓴᐅᖃᑕᐅᓕᖅᐳᖅ ᑲᓇᑕᒥ ᑕᑯᓐᓇᒐᒃᓴᓂᒃ ᐃᓕᓴᕆᔭᐅᔾᔪᑎᓄᑦ ᐆᒧᖓ ᐱᐅᓂᖅᐹᖅ ᐱᙳᐊᖅᑎᒥ ᐃᑲᔪᖅᑐᐃᓪᓗᓂ ᖁᙱᐊᖅᑕᐅᔪᒥᑦ ᐱᙳᐊᖅᑕᖓᓄᑦ ᑐᕆᒃᔅᑐᒧᑦ (Trickster).

ᑕᓚᕕᓴᓐᑯᑦ ᓴᖅᑭᔮᖅᑐᑦ ᒪᓕᒃᐸᓪᓕᐊᔪᑦ ᑕᑯᓐᓇᒐᒃᓴᐅᓛᕆᔭᐅᔪᒥᒃ, ᔨᐅᕆᑦᒥᒃ, ᑖᓐᓇ ᐊᒃᓱᕈᖅᑎᓪᓗᒍ ᐃᓚᖏᓐᓂᒃ ᑲᑎᓯᒪᑎᑦᑎᐊᒐᓱᒃᖢᓂ. ᓄᓇᖃᖅᑐᑐᖃᖅ ᐃᓅᓱᒃᑐᖅ ᖃᓄᐃᓕᓯᔭᓐᓂᖓ ᓴᖅᑭᑉᐸᓪᓕᐊᓯᕗᑦ ᑕᑯᑎᓪᓗᒍ ᓛᒻ ᐱᙳᐊᖅᑕᖓᓂᒃ, ᓱᕈᓯᖅ ᐸᖅᑭᔭᐅᔪᖅ ᓄᒃᑎᓵᕐᓂᑯᙳᐊᖅ ᐃᒡᓗᒧᑦ ᐊᑭᑦᑎᐊᖓᓃᑦᑐᒧᑦ. ᕿᓂᙳᐊᖅᖢᓂ ᐊᓈᓇᓪᓚᑖᖓᓂᒃ.

“ᒫᓐᓇᐅᔪᕐᓕ ᐃᒃᐱᒋᕙᓵᖅᑕᕋ ᐊᕿᐊᕈᒃᑯ,” ᓛᒻ ᐅᖃᖅᑐᖅ ᑭᖑᓪᓕᖅᐹᖓᓂ ᓂᕈᐊᒐᒃᓴᐅᓂᖓᓄᑦ. “ᐅᓇ ᓇᓗᓇᐃᒃᑯᑎᑦᑎᐊᖅ ᐅᕙᓐᓂ ᓇᓗᖅᑯᑎᑎᓪᓗᖓ ᐱᙳᐊᕈᓐᓇᕐᓂᓐᓂᒃ ᐅᕝᕙᓘᓐᓃᑦ ᐊᔪᙱᓐᓂᕆᔭᓐᓂᒃ.”

ᒍᕆᔅᓕᔅ ᐱᙳᐊᖅᕕᒋᐊᓪᓚᓚᐅᖅᖢᓂᐅᒃ, ᑕᕐᕆᔭᒐᒃᓴᖅ ᓚᑯᕌᔅᒥᓐ ᐃᓄᐃᑦ ᐃᓅᓱᒃᑐᑦ ᐱᙳᐊᖅᑎᙳᐊᑦ, ᓄᓇᕗᒥᑦ ᐋᖅᑭᒃᓱᖅᑕᐅᓂᑯᕕᓂᖅ ᐃᓅᓱᒃᑐᑦ ᐃᒻᒥᓃᓗᐊᖃᑦᑕᕐᓂᖏᓐᓂᒃ ᖁᒡᓗᖅᑑᒥᓐ, ᐱᐊᓂᒃᑎᓪᓗᒍ, ᓛᒻ ᐅᖃᓚᐅᖅᑐᖅ ᐱᙳᐊᖃᑕᐅᒃᑲᓐᓂᕋᔭᕆᐊᒃᓴᖓᓂᒃ ᐃᓱᒪᓚᐅᙱᓐᓂᕋᖅᖢᓂ.

“ᐱᕈᖅᓴᖅᖢᖓ ᐃᖃᓗᖕᓂᑦ, ᐱᕕᑕᖃᓗᐊᕐᓇᙱᒻᒪᑦ ᖁᙱᐊᖅᑕᐅᓂᕐᒨᖓᔪᓂᒃ ᐱᓕᕆᐊᒃᓴᓂᒃ, ᑕᐃᒪᐃᓐᓂᖓᓄᓪᓗ ᐅᕙᓐᓂ ᐃᓱᒪᓗᐊᖅᑎᑦᑕᐃᓕᒪᓪᓗᖓ ᑕᒪᑐᒥᖓ … ᐅᕙᓐᓂᓪᓘᓐᓃᑦ ᑕᐃᒪᐃᒃᑲᓐᓂᕆᐊᒃᓴᖅ ᐃᓱᒪᑦᑕᐃᓕᒪᓚᐅᖅᑐᖓ.”

ᓛᒻ ᐃᓕᓐᓂᐊᕐᕕᐊᓗᖕᒥᑦ ᐊᓂᒍᐃᑎᓪᓗᒍ ᓯᓚᑦᑐᕐᓴᖅᕕᒡᔪᐊᒥ ᐋᑐᕚᒥᑦ ᐃᓕᓐᓂᐊᕆᐊᒃᑲᓐᓂᓕᓚᐅᖅᓯᒪᔪᖅ ᐱᕙᓪᓕᐊᓂᕐᒧᑦ ᐃᓕᓐᓂᐊᒃᑲᓐᓂᕋᓱᒃᖢᓂ.

ᓯᓚᑦᑐᕐᓴᖅᕕᒡᔪᖅᐊᒥᒃ ᐃᓕᓐᓂᐊᓚᐅᖅᖢᓂ ᐊᕐᕌᒍᒥ ᑕᑯᓕᓚᐅᖅᓯᒪᖕᒪᑦ ᑐᕆᒃᔅᑐᒧᑦ ᐱᙳᐊᖅᑎᒃᓴᓂᒃ ᐱᔪᒪᔪᓂᒃ, ᓄᑖᖅ ᓴᖅᑭᔮᒐᒃᓴᖅ ᓰᐲᓰᑯᓐᓂᒃ, ᐊᒻᒪᓗ ᐃᓱᒪᓕᐅᕆᓚᐅᕐᓯᒪᓪᓗᓂ ᑭᖑᓪᓕᖅᐹᖓᓂᒃ ᐱᓇᓱᒍᒪᓪᓗᓂ ᓴᐃᕋᙳᐊᖑᓂᐊᕐᓗᓂ.

ᒪᕐᕈᐃᖅᖢᓂ ᐱᓇᓱᖁᔭᐅᒃᑲᓐᓂᓚᐅᖅᖢᓂ ᑐᓴᖅᑎᑕᐅᓕᓚᐅᖅᓯᒪᔪᖅ.

“ᖃᕋᓴᐅᔭᒃᑯᑦ ᑎᑎᖃᖅᑖᖅᖢᖓ ᐃᒪᐃᓕᖓᓪᓗᓂ, ‘ᓴᐃᕋᐅᔪᑎᑦ,’ ᖁᕝᕕᐅᓕᕈᔪᒃᖢᖓ ᐃᒪᓐᓇᐅᓚᐅᕐᑐᖅ, ‘ᐆᑮ, ᐱᙳᐊᒃᑲᓐᓂᕐᓂᐊᓕᕆᕗᖓ.”

ᓛᒻ ᐅᖃᓚᐅᖅᑐᖅ ᐱᖑᐊᖅᑕᖓᓄᑦ ᐊᒃᑐᐃᓯᒪᑲᐅᑎᒋᓚᐅᕐᓂᖓᓂᒃ ᐱᒋᐊᕐᓂᖓᓂᒃ.

“ᐃᓱᒫᓘᑎᖃᙱᑦᑐᖅ ᐃᓱᒪᒋᔭᐅᓯᒪᔪᑐᖃᕐᓂᒃ ᓄᓇᖃᖅᑳᖅᓯᒪᔪᑦ ᖃᓄᐃᑦᑑᓇᓱᒋᔭᐅᓂᖏᓐᓂᒃ, ᐊᒻᒪᓗ ᐊᕐᓇᖅ ᓄᓇᖃᖅᑐᑐᖃᖅ ᖃᓄᐃᓕᖓᔭᕆᐊᖃᕐᓂᖓᓂᒃ … ᐱᙳᐊᖅᖢᒍ ᐅᕙᓐᓄᑦ ᓴᙱᒃᑎᕚᓪᓕᕈᑎᒋᓚᐅᖅᑕᕋ ᐊᒻᒪᓗ ᐃᒃᐱᒌᓐᓇᖅᖢᒍ ᐆᒻᒪᑎᒃᑯᑦ ᒫᓇᒧᑦ.”

ᐱᖓᔪᒋᓕᖅᑕᖓᓂᓕ ᓯᓚᑦᑐᖅᓴᕐᕕᓗᒡᔪᐊᒥ, ᓛᒻ ᐃᓕᓐᓂᐊᕐᓇᒥ ᐊᑕᐅᓯᕐᒥ ᐃᓕᓐᓂᐊᓚᐅᙱᑦᑐᖅ ᓯᕗᓪᓕᖅᐹᒥ ᓴᓇᓕᖅᑎᓪᓗᒋᑦ ᑐᕆᒃᓯᑐᒥᒃ (Trickster) ᓄᐊᑦ ᐸᐃᒥᑦ — ᐊᔾᔨᒋᙱᓪᓚᕆᒃᑕᖓ ᑕᕐᕆᔭᒐᒃᓴᓕᐅᖅᑎᓪᓗᒍ ᒍᕆᔅᓕᒥᑦ, ᐅᖃᖅᑐᖅ.

“ᐃᒡᓗᑯᓗᖃᖅᖢᖓ ᐊᒻᒪᓗ ᐱᓕᕆᔪᒪᒻᒪᕆᒃᖢᖓ … ᓲᕐᓗ ᐃᖃᓗᖕᓂᙶᖅᖢᖓ ᕼᐋᓕᕗᑦᒧᐊᖅᑐᖓ.”

ᓛᒻ ᐃᓚᒋᔭᐅᔪᖅ ᑕᓪᓕᒪᓂᒃ ᐊᕐᓇᓂᒃ ᓂᕈᐊᒐᒃᓴᓂᒃ ᐱᐅᓂᖅᐹᖅ ᐱᙳᐊᖅᑎᒥ ᐃᑲᔪᖅᑐᐃᓂᕐᒧᑦ ᐃᓕᓴᕆᔭᐅᔾᔪᑎᒥᒃ, ᑖᒃᑯᐊᓗ ᑕᓪᓕᒪᓂᒃ ᑎᓴᒪᑦ ᓄᓇᖃᖅᑐᑐᖃᐅᓪᓗᑎᒃ.

“ᐃᓱᒪᓚᐅᖅᓯᒪᙱᑦᑐᖓ ᐱᖑᐊᖅᑎᐅᓂᐊᕆᐊᒃᓴᖅ ᐱᕈᖅᓴᓪᓗᖓ, ᓲᖃᐃᒻᒪ ᑕᑯᕙᓚᐅᙱᓐᓇᑦᑕ ᓄᓇᖃᖅᑐᑐᖃᕐᓂᒃ ᐊᕐᓇᓂᒃ ᓴᖅᑭᔮᖅᑎᑕᐅᕙᒃᑐᓃᑦᑐᓂᒃ … ᑕᒪᑐᒧᖓᓕ ᐊᔾᔨᓯᓛᕆᕙᓚᐅᖅᑕᕋ ᐅᓇ ᑑᕋ ᑕ ᐊᒃᔅᐳᓘᕈ,” ᓛᒻ ᐅᖃᖅᑐᖅ ᐃᒡᓚᖅᓯᓪᓗᓂ.

“ᑕᑯᓪᓗᓂ ᐅᓄᕈᓘᔭᖅᑐᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᑕᕐᕆᔭᒐᒃᓴᓕᐊᕆᔭᐅᔪᓂᒃ ᐊᒻᒪᓗ ᑕᓚᕖᓴᓐᑯᑦ ᓴᖅᑭᔮᖅᑐᒃᓴᓂᒃ … ᐊᒃᓱᐊᓗᒃ ᐱᒻᒪᕆᐅᕚᓪᓕᕈᑎᐅᓐᓇᖅᑐᖅ, ᑕᐃᒪᑐᖅ ᐊᓯᖏᑦ ᐃᓅᓱᒃᑐᑦ ᓄᓇᖃᖅᑳᖅᑐᑦ ᑕᒪᑐᒥᖓ ᑕᑯᓕ.”

ᑕᕐᕆᔭᒐᒃᓴᓕᐅᕐᓂᖅ ᓱᒃᑲᐃᒡᓕᕚᓪᓕᖅᑎᓪᓗᒍ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᒧᑦ, ᓛᒻ ᐅᖃᓚᐅᖅᑐᖅ ᐊᓯᖓᓂᒃ ᕿᓂᕐᓂᕋᖅᖢᓂ ᑕᑯᔭᒐᐅᓂᒃᑰᖓᔪᒥᒃ.

“ᖃᐅᔨᓕᓚᐅᕋᒪ ᓱᖓᐅᔭᓂᒃ ᐱᓕᕆᐊᖃᖅᖢᖓ ᖁᕕᐊᒋᔭᕋ … ᐊᒃᓱᐊᓗᒃ ᖃᓄᐃᓕᐅᕈᓘᔭᕐᓇᖅᑐᖅ.”

ᑖᓐᓇᑦᑕᐅᖅ ᐱᙳᐊᖅᑎᐅᔪᖅ ᓄᓇᓕᖕᓄᑦ ᐃᑲᔪᖃᑦᑕᖅᓯᒪᔪᖅ ᐊᕐᕌᒎᓕᖅᑐᒥᓐ.

“ᒫᓐᓇᐅᔪᖅ ᖃᓄᐃᓐᓂᑦᑎᓐᓂᑦ ᐅᔾᔨᕈᓱᑦᑎᐊᕐᓇᕐᒪᑦ, ᓲᕐᓗ ᒪᐅᓇ ᐃᑲᔪᖅᑕᐅᓯᒪᓂᑦᑎᒍᑦ ᐊᒻᒪᓗ ᐊᔾᔨᐅᙱᔾᔪᑎᒋᕙᒃᑕᑦᑎᓐᓂᒃ,” ᐅᖃᖅᑐᖅ ᓛᒻ. “ᖃᐅᔨᓯᒪᔭᕆᐊᖃᕋᑦᑕ ᐱᓕᕆᔪᓐᓇᕐᓂᑦᑎᓐᓂᒃ ᐊᒻᒪ ᐃᑲᔪᖅᑐᐃᔪᓐᓇᕐᓂᖅᒥᒃ ᐊᓯᑦᑎᓐᓂᒃ.”

ᐃᓕᓐᓂᐊᖅᑎᑦᑎᖃᑦᑕᖅᓯᒪᔪᖅ ᐅᕘᓇ Connected North (ᐅᑭᐅᕐᑕᖅᑐᕐᒥ ᑲᑎᖃᒌᓯᒪᓂᖅ), ᓴᖅᑭᔮᒐᖅ ᐃᓕᓐᓂᐊᕈᑎᒃᓴᖅ ᐊᒃᑐᐊᓕᕈᑎ ᓄᓇᖃᖅᑳᖅᑐᑦ ᐱᔪᓐᓇᖅᓯᒪᔭᖏᓐᓂᒃ ᐅᑯᓄᖓ ᐅᑭᐅᕐᑕᖅᑐᕐᒥ ᐃᓅᓱᒃᑐᓄᑦ.

ᐊᑕᐅᓰᖅᖢᓂ ᐃᓕᓐᓂᐊᖅᑎᑦᑎᓪᓗᓂ ᖃᓄᖅ ᐃᓚᐅᓕᕈᓐᓇᕐᓂᖅᒥᒃ ᑕᑯᔭᒐᒃᓴᓕᕆᓂᖅᒧᑦ ᐊᒻᒪ ᐊᓯᐊᓂ ᓇᖕᒥᓂᖅ ᑲᒪᒋᔪᓐᓇᕐᓂᖅᒥᒃ ᐅᑭᐅᕐᑕᖅᑐᕐᒦᓪᓗᓂ, ᐃᓱᒪᓕᕆᓂᕐᒧᑦ ᐃᑲᔪᕈᑎᒃᓴᓪᓗ ᐱᑕᖃᓗᐊᙱᖢᑎᒃ.

ᓛᒻ ᓱᓕ ᐋᓐᑎᐅᕆᐅᒦᑦᑐᖅ ᐊᒻᒪᓗ ᐃᖃᓗᒃᓄᑦ ᐅᑎᕈᓐᓇᙱᓯᒪᓪᓗᓂ ᐊᖓᔪᖅᑳᖏᓐᓄᑦ ᐊᒻᒪ ᖃᑕᖑᑎᖏᓐᓄᑦ ᑕᐃᒪᙵᓂᒃ ᑎᓯᐱᕆᐅᓚᐅᖅᑐᒥᓐ.

“ᐊᖏᕐᕋᖅᓯᒪᙱᖢᓂ ᐊᒃᓱᕈᕈᓘᔭᕐᓇᖅᑐᖅ,” ᐅᖃᖅᑐᖅ.

ᐅᖓᓯᒋᖕᓂᕐᒧᑦ ᓛᒻ ᖁᙱᐊᕈᓐᓇᓚᐅᖅᓯᒪᙱᑦᑐᖅ ᑐᕆᒃᔅᑐ ᓴᖅᑭᔮᓕᖅᑎᓪᓗᒋ ᐃᓚᖏᓐᓂ ᐅᐸᒃᓯᒪᓗᓂ, ᑭᓯᐊᓂᓕ ᑎᑎᕋᖃᑦᑕᐅᑎᖃᑦᑕᖅᑐᑦ ᑕᕐᕆᔭᒐᒃᓴᐅᑉ ᖃᓄᐃᑉᐸᓪᓕᐊᓂᖓᓂᒃ ᕙᐃᔅᐳᒃᑯᑦ, ᐅᖃᖅᑐᖅ. ᖁᙱᐊᕈᓐᓇᖅᓯᓚᐅᖅᓯᒪᔪᑦ ᐅᓄᙱᑦᑑᒐᓗᐊᓂᒃ ᓴᖅᑭᔮᒐᓂᒃ ᐊᖏᕐᕋᓚᐅᑲᒃᑎᓪᓗᒍ ᖁᕕᐊᓱᒃᕕᒃᒥᑦ.

ᐅᓇ ᑐᕆᒃᔅᑐ ᓯᕗᓪᓕᖅᐹᒥᒃ ᓴᖅᑭᔮᕐᓇᖅ ᐱᐊᓂᒃᑎᓪᓗᒍ — ᓴᓇᔭᐅᓯᒪᔪᖅ ᐄᑕᓐ ᐅᕌᐱᓐᓴᓐ ᐅᓂᒃᑳᓕᐊᕆᓯᒪᔭᖓᓂᒃ Son of a Trickster — ᓄᑖᙳᕆᐊᖅᑕᐅᓚᐅᖅᓯᒪᙱᑦᑐᖅ ᐊᐃᑉᐸᖓᓂᒃ ᓴᖅᑭᔮᕐᓇᒥᒃ ᑐᓴᓚᐅᖅᑎᓪᓗᒋᑦ ᑐᑭᒧᐊᖅᑎᒋᔭᐅᔪᖅ ᓄᓇᖃᖅᑐᑐᖃᐅᙱᓐᓂᖓᓂᒃ ᑕᐃᒪᐃᑦᑑᓂᕌᓚᓚᐅᖅᑎᓪᓗᒍ.

“ᐅᓇ ᑐᕆᒃᔅᑐ ᖃᓄᐃᓕᐅᕈᑎᓄᑦ ᐊᓯᖏᓐᓄᑦ ᑕᐅᖅᓰᒍᑎᒋᔾᔮᙱᒻᒪᕆᒃᑕᕋ,” ᐅᖃᖅᑐᖅ ᓛᒻ, ᑖᓐᓇᓗ ᑲᔪᓯᓕᕐᑐᖅ ᑕᑯᓐᓇᒐᒃᓴᐅᓂᕐᒧᑦ ᐱᓇᓱᐊᕐᓂᖅᒥᒃ ᐊᒻᒪᓗ ᐃᓕᓐᓂᐊᕈᑎᖏᓐᓂᒃ ᐱᐊᓂᒃᓯᓇᓱᒃᖢᓂ.

ᑲᓇᑕᒥᑦ ᑕᑯᓐᓇᒐᒃᓴᓂᒃ ᐃᓕᓴᕆᔭᐅᔾᔪᑎᓕᕆᓂᖅ ᓴᖅᑭᔮᑲᐅᑎᒋᑎᑕᐅᓂᐊᖅᑐᖅ ᒪᐃ 17-ᒥᑦ 20-ᒧᑦ.