ᐱᒡᒍᓴᐅᑎᓂᖅ ᐱᒋᐊᖅᐳᖅ ᐱᖓᓱᑦ ᐊᕐᓇᐃᑦ ᓄᓇᕗᒧᑦ ᓂᕈᐊᒐᒃᓴᐅᔪᑦ

ᑐᕉᑑ ᑲᓇᑕᒥᐅᑕᓂᒃ ᓂᕈᐊᖅᑎᑦᑎᓂᐊᓯᔪᖅ ᓯᑎᐱᕆ 20-ᒥ

ᓘᕋ ᒪᑲᓐᔨ (ᓴᐅᒥᐊᓂᒃ) ᒪᓕᒐᓕᐅᖅᑎᐅᓂᕐᒧᑦ ᓂᕈᐊᒐᒃᓴᐅᔪᖅ ᓯᑎᐱᕆ 20-ᒥ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᐅᓕᖅᐸᑦ ᐅᑯᓄᖓ ᑲᓐᓲᕕᑎᕝ ᐹᑎᑯᓐᓄᑦ (Progressive Conservative). ᐹᑦ ᐊᕐᓇᒃᑲ (ᕿᑎᐊᓃᑦᑐᖅ) ᓕᐳᕈᒃᑯᓐᓄ (Liberal) ᓂᕈᐊᒐᒃᓴᐅᔪᖅ ᐊᒻᒪᓗ ᓘᕆ ᐃᓪᓚᐅᑦ (ᑕᓕᖅᐱᐊᓂ) ᐊᓐᑏᐲᑯᓐᓄᑦ (NDP) ᓂᕈᐊᒐᒃᓴᐅᓪᓗᓂ. (ᐊᔾᔨᙳᐊᖁᑎᒋᔭᐅᔪᑦ)

By ᒥᓚᓂ ᐅᕆᑦᓵᑦ

ᐱᒡᒍᓴᐅᑎᓂᖅ ᐱᒋᐊᖅᐳᖅ ᐊᒻᒪᓗ ᓄᓇᕗᒥᑦ ᐅᑯᐊ ᑲᓐᓲᕕᑎᕝᑯ, ᓕᐳᕈᒃᑯ ᐊᒻᒪᓗ ᐊᓐᑏᐲᒃᑯ ᓂᕈᐊᖅᖢᑎᒃ ᐊᕐᓇᓂᒃ ᑭᒡᒐᖅᑐᐃᒡᔨᒋᓂᐊᖅᑕᖏᓐᓂᒃ ᐅᓇ ᑲᓇᑕᒧ ᐊᖓᔪᖅᑳᑉ ᔮᔅᑎᓐ ᑐᕉᑑ ᓈᑦᑏᖑᔭᐅᑎᓪᓗᒍ ᒪᑐᐃᖅᓯᓚᐅᖅᑎᓪᓗᒍ ᓂᕈᐊᕐᓇᐅᓛᖅᑐᒥᓐ. ᑲᓇᑕᒥᐅᑕᑦ ᓂᕈᐊᕆᐊᕐᑐᓛᖅᑐᑦ ᓯᑎᐱᕆ 20-ᐅᓕᖅᐸᑦ.

ᐊᓐᑏᐲᑯ ᓯᕗᓪᓕᖅᐹᖑᓚᐅᖅᑐᑦ ᓂᕈᐊᒐᓴᙳᖅᑎᑦᑎᓪᓗᑎᒃ ᐱᓇᓱᐊᕈᓯᐅᓚᐅᕐᑐᒥᓐ ᐃᖃᓗᖕᓂ ᓗᐊᐃᔭ ᓘᕆ ᐃᓪᓚᐅᑦᒥ ᓂᕈᐊᒐᒃᓴᐅᓂᐊᕐᓗᓂ.

ᐃᓪᓚᐅᑦ ᐊᓐᑏᐲᑯᓐᓄᑦ ᓂᕈᐊᒐᒃᓴᙳᖅᑎᑕᐅᓚᐅᖅᑐᖅ ᑮᓇᐅᔭᒥ ᐊᑐᖅᖢᑎᒃ ᓂᕈᐊᒐᒃᓴᐅᖃᑎᒋᔭᖓᓗ ᑖᒃᑯᐊᒃ ᓇᓕᒧᒌᖕᓂ ᓂᕈᐊᖅᑕᐅᑎᓪᓗᒋᑦ.

ᐃᓪᓚᐅᑦ ᐃᖃᓗᖕᓂ ᓗᐊᐃᔭᐅᔪᖅ ᐅᑯᓄᖓ ᑭᒡᒐᖅᑐᐃᔪᓄᑦ ᐃᓄᖕᓂ ᐃᖕᒥᖕᓂ ᑕᐃᓯᒪᔪᓂᒃ ᓄᓘᔮᑦ ᓄᓇᖓᓂᒃ ᑲᒪᔨᐅᓂᕋᖅᖢᑎᒃ. ᑖᒃᑯᐊᓕ ᐃᓄᐃᑦ ᓈᒻᒪᒃᓴᖅᓯᒪᙱᒻᒪᑕ ᓄᓘᔮᖕᓂ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃᒥᑦ ᐊᖏᒡᓕᒋᐊᖅᑎᑦᑎᔪᒪᔪᓂᒃ ᐅᕙᓂ ᕿᑭᖅᑖᓘᑉ ᐅᐊᖕᓇᖅᐸᓯᐊᓃᑦᑐᒥᒃ.

ᐊᓐᑏᐲᑯᑦ ᓄᑖᒥ ᑭᒡᒐᖅᑐᐃᔨᑖᕆᐊᖃᓕᓚᐅᕐᒪᑕ ᐅᓇ ᓄᓇᕗᒧᑦ ᒪᓕᒐᓕᐅᖅᑎ ᒪᒥᓛᖅ ᖃᖅᑲᖅ ᒪᐃᒥ ᐅᖃᖅᑎᓪᓗᒍ ᓂᕈᐊᒐᒃᓴᐅᒃᑲᓐᓂᔾᔮᙱᓐᓂᕋᖅᑎᓪᓗᒍ ᓂᕈᐊᖅᑕᐅᕝᕕᒋᓚᐅᕐᓯᒪᔭᖓᓄᑦ 2019-ᖑᑎᓪᓗᒍ.

ᓇᒡᒐᔾᔭᐅᒥ – ᓯᕗᓪᓕᖅᐹᖅ ᐅᓪᓗᖅ ᓂᕈᐊᒐᒃᓴᐅᓂᖅᒧᑦ ᐱᓕᕆᐊᖃᓕᕐᓂᖅ — ᑲᓐᓲᕕᑎᕝᑯᑦ ᑕᐃᓯᓚᐅᖅᑐᑦ ᑲᖏᖅᖠᓂᖅᒥᐅᑕᒥᒃ ᓘᕋ ᒪᑲᓐᔨᒥ ᑭᒡᒐᖅᑐᐃᔨᒋᔭᐅᓂᐊᕐᓗᓂ ᑖᒃᑯᓄᖓ ᐊᒻᒪ ᐅᑯᐊᓕ ᓕᐳᕈᒃᑯᑦ ᓂᕈᐊᖅᖢᑎ ᐃᖃᓗᐃᑦ-ᓂᐊᖁᙴᒧᑦ ᒪᓕᒐᓕᐅᖅᑎᒥᓐ ᐹᑦ ᐊᕐᓇᒃᑲᖅᒥᒃ.

ᒪᑲᓐᔨᐅᑉ ᐊᑎᖓ ᑎᑎᕋᖅᑕᐅᓯᒪᓚᐅᕐᑐᖅ ᑲᓲᕕᑎᕝᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ ᓈᑦᑎᖑᔭᐅᓚᐅᕐᑐᒥᓐ.

ᐹᓪ ᒨᕕ, ᐊᖓᔪᖅᑳᖅ ᑲᓐᓲᕕᑎᕝᑯᓐᓄᑦ ᓂᕈᐊᖅᑕᐅᔾᔪᑎᓕᕆᓂᕐᒧᑦ ᑲᑐᔾᔨᖃᑎᒌᓂᒃ ᓄᓇᕗᒥ ᑐᓴᖅᑎᑦᑎᓚᐅᕐᑐᖅ ᑕᒪᑐᒥᖓ.

2018-ᒥᑦ, ᒪᑲᓐᔨ ᐱᓕᕆᔨᒻᒪᕆᐅᓚᐅᖅᓯᒪᔪᖅ ᐅᓇ ᑲᓇᑕᒥ ᖃᐅᔨᓇᓱᖕᓂᖅ ᔭᒐᓯᒪᔪᓂᒃ ᐃᓄᐊᖅᑕᐅᓯᒪᔪᓂᓪᓗ ᓄᓇᖃᖅᑳᑐᕕᓃᑦ ᐊᕐᓇᐃᑦ ᓂᕕᐊᕐᓵᓪᓗ ᑲᖏᖅᖠᓂᖅᒧᐊᖅᑎᓐᓇᓱᒃᖢᓂᒋ ᐊᒻᒪᓗ ᑖᒃᑯᓄᖓ ᐅᖃᓪᓚᖃᑕᐅᓚᐅᕐᓯᒪᓪᓗᓂ ᖃᐅᔨᓯᒪᓂᑰᓂᖓᓄᑦ.

ᐊᖓᔪᖅᑳᖑᓚᐅᖅᓯᒪᖕᒥᔪᖅ ᑲᖏᖅᖠᓂᖅᒥᒃ ᐊᕐᓇᓄᑦ ᕿᒫᕝᕕᒃᒥᑦ.

ᐊᕐᓇᒃᑲᖅ, ᐱᕈᖅᓴᖅᓯᒪᔪᖅ ᑭᙵᓂᒃ ᐊᒻᒪ ᐸᖕᓂᖅᑑᒥ ᓇᓗᓇᐃᖅᑕᐅᓚᐅᖅᑐᖅ ᓕᐳᕈᒃᑯᓐᓄᑦ ᓂᕈᐊᒐᒃᓴᐅᓂᖓᓂᒃ ᖃᕋᓴᐅᔭᒃᑯᑦ ᑎᑎᕋᖅᑕᐅᓯᒪᔪᒃᑯᑦ ᐃᓚᒋᔭᐅᔪᓄᑦ ᓇᒡᒐᔾᔭᐅᑉ ᐅᓪᓛᖓᓂᒃ.

ᑰᑎ ᑏᓐ, ᐅᖃᖅᑎᒋᔭᐅᔪᖅ ᓕᐳᕈᒃᑯᑦ ᑲᑐᔾᔨᖃᑎᒌᖏᓐᓄᑦ ᓄᓇᕗᒥᑦ ᑭᖑᓂᐊᒍᑦ ᐅᖃᓕᓚᐅᕐᑐᖅ “ᖁᕕᐊᓱᒃᑐᖓ ᐹᑦ ᓇᓗᓇᐃᕈᓐᓇᕋᑦᑎᒍᑦ ᐅᕙᑦᑎᓐᓂ ᑭᒡᒐᖅᑐᐃᔨᐅᓂᐊᕐᓂᖓᓂᒃ,” ᖃᕋᓴᐅᔭᒃᑯᑦ.

ᐊᕐᓇᒃᑲᖅ ᒪᓕᒐᓕᐅᖅᑎᐅᔪᖅ ᐱᒋᐊᖅᓯᒪᓪᓗᓂ 2017-ᒥ ᐊᒻᒪᓗ ᒥᓂᔅᑕᒋᔭᐅᓚᐅᕐᖢᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄ, ᐃᒻᒥᓃᖅᑎᑦᑎᑦᑕᐃᓕᓂᖅᒧᑦ, ᐊᒻᒪᓗ ᐱᓕᕆᐊᖃᖅᓯᒪᓪᓗᓂ ᑕᒪᑐᒥᖓ ᑎᑭᖢᒍ 2018.

ᓯᕗᓂᐊᒍᓪᓕ, ᐊᕐᓇᒃᑲᖅ ᓯᕗᓪᓕᖅᐹᖑᓚᐅᖅᓯᒪᔪᖅ ᑲᒥᓯᓇᒧᑦ ᑐᒡᓕᕆᔭᐅᓪᓗᓂ 2001-ᒥ.

ᖃᖅᑲᐅᑉ ᓯᕗᓂᐊᓂᓪᓕ, ᓕᐳᕈᓪ ᕼᐊᓐᑐ ᑐᑐ ᓄᓇᕗᒧᑦ ᒪᓕᒐᓕᐅᖅᑎᐅᓚᐅᖅᓯᒪᔪᖅ, ᑖᔅᓱᒪᓗ ᓯᕗᓂᐊᓂᒃ ᐅᓇ ᓕᐅᓇ ᐊᒡᓘᒃᑲᖅ ᑭᒡᒐᖅᑐᐃᓪᓗᓂ ᓄᓇᕗᒥᑦ ᒪᓕᒐᓕᕆᕕᒡᔪᐊᕐᒥ ᑲᓐᓱᕕᑎᕝᑯᓐᓃᖢᓂ.

ᐅᑯᐊᓕ ᒍᕇᓐ ᐹᑎᒋᔭᐅᔪᑦ ᑐᓴᖅᑎᑦᑎᓚᐅᙱᑦᑐᑦ ᓄᓇᕗᒥᒃ ᑭᒡᒐᖅᑐᐃᔨᒋᓂᐊᖅᑕᖓᓂᒃ ᐊᐃᑉᐹᑦ ᑎᑭᑎᓪᓗᒍ.

ᓄᓇᕕᒃᒥᓪᓕ, ᐋᖅᑭᒃᓱᖅᐸᓪᓕᐊᖕᒥᔪᑦ. ᐅᓇ ᐸᓛ ᑯᐸᑯᐊ (Bloc Quebecois) ᒪᓕᒐᓕᐅᖅᑎ ᓯᐊᕕ ᐸᕉᐱ ᓂᕈᐊᖅᑕᐅᒃᑲᓐᓂᕋᓱᒃᖢᓂ ᐅᑯᓇᓂ ᐊᐱᑎᐱ-ᔭᐃᒻᔅ ᐸᐃ-ᓄᓇᕕᒃ-ᐄᔭᐅᒧᑦ ᑭᓯᐊᓂᓕ ᓕᐳᕈᒃᑯᓐᓄᑦ ᓂᕈᐊᒐᒃᓴᖅᑕᖃᖅᖢᓂ ᐆᒥᖓ ᓖᔅ ᑭᔅᑕᐱᔅ ᐊᒻᒪᓗ ᑲᓐᓲᕕᑎᕝᑯᓐᓄᑦ ᓯᑏᕝ ᑯᕆᕘ.

Share This Story

(0) Comments

Join the Conversation

Your email address will not be published. Required fields are marked *

*