ᐸᐅᒃᑑᑎᑦ ᐊᖓᔪᖅᑳᖓ ᐃᖅᑲᐅᒪᕗᖅ ‘ᐊᓕᐊᓇᖅᑐᒥ ᐃᒃᐱᒍᓱᖕᓂᐅᔪᒥ ᕿᒫᑎᓪᓗᒋᑦ ᔭᓗᓇᐃᕝᒥ

For English version, see Pauktuutit presidents recalls ‘eerie’ feeling fleeing Yellowknife

ᔨᐊᕆ ᓵᑉ ᐅᖃᓚᐅᖅᐳᖅ “ᐊᓕᐊᓇᓚᐅᖅᐳᖅ” ᐊᖁᖦᖢᓂ ᕿᕐᓂᖅᑖᓗᖕᒥ ᐃᓱᖅᑐᐊᓗᖕᒥ ᐳᔪᕐᔪᐊᖑᔪᒥ ᓇᐹᖅᑐᓂ ᐃᑭᑦᑐᐊᓗᖕᓂ Enterprise, ᓄᓇᑦᓯᐊᑉ ᖃᓂᒋᔭᖓᓂ, ᐃᒻᒥᓂᒃ ᐊᒻᒪ ᐃᓚᖏᑦ ᕿᒫᑎᓪᓗᒋᑦ ᔭᓗᓇᐃᕝᒥ ᐊᒻᒪ ᑐᕌᖅᖢᑎᒃ ᐊᑦᑕᓇᙱᑦᑐᒧᑦ ᐋᓪᐴᑕᒧᑦ ᑕᖅᑭᐅᓚᐅᖅᑐᒥ.

“ᐳᔪᖅ ᐃᓱᖅᑐᐊᓘᓚᐅᖅᐳᖅ ᐃᑭᑦᑐᒥ,” ᐅᖃᓚᐅᖅᐳᖅ.

“ᓯᕿᓂᖅ ᑕᑯᔪᓐᓇᓚᐅᙱᑕᑦ. ᕿᕐᓂᓚᐅᖅᐳᖅ.”

ᓵᑉ, ᔭᓗᓇᐃᕝᒥᐅᑕᐅᔪᖅ, ᕿᒫᓚᐅᖅᐳᖅ ᓄᓇᑦᓯᐊᕐᒥ ᐊᖓᔪᖅᑳᖃᕐᕕᖓᓂ ᓄᓇᓯᐅᑎᒃᑯᑦ ᐊᒻᒪ ᒫᓐᓇ ᓚᑑᒃ, ᐋᓪᐴᑕᒦᓕᖅᐳᑦ ᐃᐊᑦᒪᓐᑕᓐ ᓯᓚᑎᑦᑎᐊᖓᓂ.

ᓵᑉ ᐊᖓᔪᖅᑳᖑᕗᖅ ᐸᐅᒃᑑᑎᑦ ᐃᓄᖕᓂ ᐊᕐᓇᓄᑦ ᑲᓇᑕᒥ, ᑮᓇᐅᔭᓕᐅᕋᓱᐊᙱᑦᑐᒥ ᐱᓕᕆᔾᔪᔾᔨᔨᐅᔪᓂ ᑭᒡᒐᖅᑐᐃᕙᒃᑐᓂ ᐃᓄᖕᓂ ᐊᕐᓇᓂ ᑲᓇᑕᒥ. ᐅᖅᓱᖅᑑᕐᒥᐅᑕᓪᓚᕆᐅᓪᓗᓂ, ᐊᑕᐅᓯᐅᕗᖅ ᐊᒥᓱᓂ ᓄᓇᕗᒻᒥ ᐃᓄᖕᓂ ᕿᓛᓚᐅᖅᑐᓂ ᔭᓗᓇᐃᕝᒥ ᓇᐹᖅᑐᓂ ᐃᑭᑦᑐᐊᓗᖕᓂ ᖃᓂᒡᓕᕙᓪᓕᐊᑎᓪᓗᒍ ᓄᓇᓕᐸᐅᔭᒧᑦ 20,000−ᐸᓗᖕᓂ ᐃᓄᖃᖅᑐᓂ.

ᓄᓇᕗᒻᒥᐅᑦ ᔭᓗᓇᐃᕝᒥᐅᑕᐅᔪᓂ ᓇᒦᕈᓘᔭᖅᐳᑦ ᕿᒫᓯᒪᔪᓂ ᐃᓂᐅᔪᓄᑦ ᐋᓪᐴᑕᒥ.

ᐊᐅᓪᓚᖅᖢᑎᒃ ᐅᓐᓄᓴᖓᓂ ᐋᒍᔅᑎ 16−ᒥ, ᓵᑉ ᐊᐅᓪᓚᓚᐅᖅᐳᖅ ᕿᒫᖁᔭᐅᓪᓚᕆᖕᓂᐅᔪᒥ ᑐᓂᔭᐅᓚᐅᙱᑎᓪᓗᒍ ᐅᓐᓄᒃᑲᓐᓂᖓᓂ.

ᐸᐅᒃᑑᑎᑦ ᐊᖓᔪᖅᑳᖓ ᔨᐊᕆ ᓵᑉ, ᑕᑯᒃᓴᐅᔪᖅ ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓᓐᓂ, ᐊᑕᐅᓯᐅᕗᖅ ᐊᒥᓱᓂ ᓄᓇᕗᒻᒥ ᐃᓄᖕᓂ ᕿᒫᑎᑕᐅᓚᐅᖅᑐᓂ ᔭᓗᓇᐃᕝ ᐃᓂᖓᓂ ᑕᖅᑭᐅᓚᐅᖅᑐᒥ ᓇᐹᖅᑐᓂ ᐃᑭᑦᑐᐊᓗᖕᓂ ᖃᓂᒡᓕᑎᓪᓗᒍ ᓄᓇᑦᓯᐊᕐᒥ ᐊᖓᔪᖅᑳᖃᕐᕕᖓᓄᑦ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓᓐᓂ ᒫᑕᓕᓐ ᕼᐊᐅᕕᑦᒧᑦ)

ᓵᑉ ᐊᒻᒪ ᐊᔭᖓ ᐱᓕᕆᖃᑎᒌᓚᐅᖅᐳᑦ ᐊᓂᓂᕐᒧᑦ, ᐊᑐᓂ ᐊᖁᖦᖢᑎᒃ ᖃᔅᓯᒐᓚᖕᓂ ᐃᓚᖏᓐᓂ ᓇᖕᒥᓂᖅ ᐊᖁᖦᖢᑎᒃ.

ᐃᖏᕐᕋᓚᐅᖅᐳᑦ 1,500-ᑲᓴᖕᒥ ᑭᓛᒥᑐᓂ ᐊᐅᓪᓛᕐᓂᐅᔪᒥ, ᑎᑭᖦᖢᑎᒃ ᓚᑑᒃ ᑐᔪᕐᒥᕕᖓᓄᑦ ᐋᒍᔅᑎ 17−ᒥ ᐊᑕᐅᓯᕐᒥ ᒪᕐᕈᖕᓂᓪᓘᓐᓃᑦ ᐃᑲᕐᕋᓂ ᓯᕗᓂᐊᓂ “ᐅᓄᖅᑐᒻᒪᕆᐊᓗᖕᓂ ᐃᓄᖕᓂ ᑎᑭᑦᑐᓄᑦ.”

ᑕᐃᒪᙵᓂ, ᐃᓅᓯᖅ ᐅᐃᒪᓇᕈᓘᔭᖅᓯᒪᕗᖅ ᓵᑉᒧᑦ ᐊᒻᒪ ᐊᓯᖏᓐᓄᑦ ᕿᒫᓯᒪᔪᓄᑦ.

ᐅᖃᓚᐅᖅᐳᖅ ᓯᕗᓪᓕᐅᔪᒥ ᒐᕙᒪᒃᑯᑦ — ᐋᓪᐴᑕ ᐅᕝᕙᓘᓐᓃᑦ ᓄᓇᑦᓯᐊᖅ, ᖃᐅᔨᒪᓗᐊᙱᑦᑐᖅ — ᐊᖏᖅᓯᒪᓂᖃᓚᐅᕋᓗᐊᖅᐳᑦ ᐊᑭᓖᓂᕐᒥ ᑕᒪᒃᑭᓂ ᓂᕆᓂᐅᔪᓂ ᑭᓯᐊᓂ ᒫᓐᓇ ᐊᑎᓖᕗᑦ ᐊᑭᖓᓂ ᒪᕐᕉᔪᓂ ᓂᕆᓂᐅᔪᓂ ᐊᑐᓂ ᐅᓪᓗᕐᒥ ᕿᒫᓯᒪᔪᓄᑦ.

ᒫᓐᓇ, ᐅᖃᓚᐅᖅᐳᖅ, ᐃᑲᔪᖅᐳᖅ ᓄᓇᕗᒻᒥᐅᖃᑎᒥᓂᒃ ᐃᓄᖕᓂ ᕿᒫᑎᑕᐅᓯᒪᔪᓂ ᑕᑕᑎᕆᓂᖏᓐᓂ ᑕᑕᑎᕆᐊᓕᖕᓂ ᑮᓇᐅᔭᖃᖅᑎᑕᐅᓂᕐᒧᑦ ᓄᓇᕗᒻᒥ ᑐᙵᕕᒃᑯᓐᓂ, ᐊᑐᐃᓐᓇᖃᖅᑎᑦᑎᔪᒥ $1,000−ᓂ ᐊᑐᓂ ᓄᓇᕗᒻᒥ ᐃᓄᖕᓂ ᐃᒡᓗᒥᐅᖃᑎᒌᖑᔪᓂ ᐊᒃᑐᖅᑕᐅᓯᒪᔪᓂ ᓇᐹᖅᑐᓂ ᐃᑭᑦᑐᐊᓗᖕᓂ.

ᓵᑉ ᐅᖃᓚᐅᖅᐳᖅ Expo Centre ᐃᐊᑦᒪᓐᑕᓐᒥ “ᐃᑲᔪᕐᔪᐊᖅᓯᒪᕗᑦ” ᑐᓂᓯᓂᕐᒥ ᐃᑲᔪᖅᓱᐃᓂᐅᔪᒥ ᐃᓄᖕᓄᑦ ᕿᒫᓚᐅᖅᑐᓄᑦ ᓇᐹᖅᑐᓂ ᐃᑭᑦᑐᐊᓗᖕᓂ. ᐅᖃᓚᐅᖅᐳᖅ ᐃᒻᒥᓂᒃ ᐊᒻᒪ ᐃᓚᖏᑦ ᖃᓄᐃᙱᓚᑦ.

“ᓂᕿᑖᕐᓂᐊᖅᐳᒍᑦ, ᐃᓂᑖᕐᓂᐊᖅᐳᒍᑦ ᓯᓂᒡᕕᒃᓴᑦᑎᓐᓂ, ᐊᒻᒪ ᐊᑦᑕᓇᖅᑐᒦᙱᓚᒍᑦ,” ᐅᖃᓚᐅᖅᐳᖅ.

ᑭᓯᐊᓂ, ᑐᓴᖅᓯᒪᕗᖅ ᐊᓯᖏᓐᓂ ᕿᒫᓯᒪᔪᓄᑦ ᐱᓕᕆᕝᕕᐅᔪᓂ, ᓲᕐᓗ ᑕᐃᓐᓇ ᕚᓕᕕᐅ, ᐋᓪᐴᑕᒥ ᐊᐅᓚᓂᖃᖅᓯᒪᙱᓚᖅ ᑕᐃᒪᐃᓐᓂᐅᔪᒥ ᐱᐅᓂᖓᓂ.

ᖃᐅᔨᒪᙱᓐᓂᐅᔪᒥ ᓇᐹᖅᑐᓂ ᐃᑭᑦᑐᐊᓗᖕᓂ ᑎᑭᐅᑎᑐᐃᓐᓇᕆᐊᖃᕐᓂᖓᓂ ᔭᓗᓇᐃᕝᒧᑦ, ᓵᑉ ᐅᖃᓚᐅᖅᐳᖅ ᑐᓴᓚᐅᖅᐳᖅ ᐃᓚᖏᑦ ᐃᓄᐃᑦ ᐊᖏᕐᕋᕈᒪᓕᕐᓂᖏᓐᓂ.

ᐃᑭᑦᑐᐊᓗᒃ ᓄᖅᑲᖓᑎᑕᐅᓯᒪᕗᖅ 15 ᑭᓛᒥᑐᐸᓗᖕᓂ ᔭᓗᓇᐃᕝᒥ ᑕᐃᒪᙵᓂ ᕿᒫᑎᑕᐅᓂᐅᓚᐅᖅᑐᒥ.

“ᐃᓄᐃᑦ ᕿᓄᖓᕙᓪᓕᐊᕗᑦ,” ᐅᖃᓚᐅᖅᐳᖅ.

ᒫᓐᓇᐅᔪᒥ, ᐊᒃᓱᕈᕐᓂᐅᔪᒥ ᐃᑲᔪᕋᓱᖕᓂᕐᒧᑦ, ᐃᓚᖏᓐᓂ ᑕᓇᐃᓂ ᓯᕗᓕᐅᖅᑎᐅᔪᓂ ᐋᖅᑭᒃᓱᐃᕗᑦ ᐊᑭᖃᙱᑦᑐᒥ ᖁᙱᐊᕐᓂᐅᔪᒥ ᕿᒫᓯᒪᔪᓄᑦ River Cree ᐃᒡᓗᖁᑎᖓᓐᓂ ᐃᐊᑦᒪᓐᑕᓐᒥ. ᓵᑉ ᖃᐅᔨᒪᕗᖅ ᖃᔅᓯᐊᕐᔪᖕᓂ ᐃᓄᖕᓂ ᑲᑕᔾᔭᖅᑎᐅᔪᓂ ᓄᓇᓕᖕᓃᑦᑐᓂ ᐊᒻᒪ ᐃᓚᐅᑎᑦᑎᓇᓱᐊᖅᐳᖅ ᖁᙱᐊᖅᑕᐅᓂᕐᒥ.

ᐊᒃᑐᐃᓂᐅᔪᒥ ᔭᓗᓇᐃᕝᒥ ᓇᐹᖅᑐᓂ ᐃᑭᑦᑐᐊᓗᖕᓂ ᐱᖃᕐᓂᖓᓂ ᐃᓄᖕᓄᑦ, ᐅᖃᓚᐅᖅᐳᖅ “ᑕᑯᒃᓴᐅᑎᑦᑎᓂᐊᖅᐳᖅ ᑲᑎᙵᓂᑦᑎᐊᖑᔪᒥ ᐃᓗᑐᓂᖓᓗ ᐃᓄᐃᑦ ᐃᒃᐱᒋᔭᖃᕐᓂᖏᓐᓂ ᔭᓗᓇᐃᕝᒥ.”

ᓄᓇᕗᒻᒥ ᒐᕙᒪᒃᑯᑦ ᐅᖃᐅᓯᖃᓚᐅᖅᐳᖅ ᐋᒍᔅᑎ 23−ᒥ ᑐᓂᓯᓂᐊᕐᓂᖏᓐᓂ $250,000−ᓂ United Way ᓄᓇᑦᓯᐊᕐᒧᑦ ᑐᐊᕕᕐᓇᖅᑐᒥ ᑭᐅᓂᐅᔪᒥ ᑮᓇᐅᔭᖃᖅᑎᑕᐅᓂᖓᓄᑦ.

ᐅᖃᖅᑎᐅᔪᒥ ᑕᐃᔅᓱᒧᖓ ᐱᓕᕆᔾᔪᔾᔨᔨᐅᔪᓄᑦ ᐅᖃᐅᔾᔨᓚᐅᖅᐳᑦ CBC−ᑐᓐᓂ ᐱᓇᓱᐊᕈᓯᐅᓚᐅᖅᑐᒥ “ᑮᓇᐅᔭᖁᑎᒋᕙᒃᑕᖏᑦ ᐃᓗᓕᖃᕈᓐᓃᕐᓂᖓᓂ” ᐃᑲᔪᖅᓱᐃᓇᓱᐊᖅᑎᓪᓗᒍ ᓄᓇᑦᓯᐊᕐᒥᐅᑕᓂ ᐊᒃᑐᖅᑕᐅᓯᒪᔪᓄᑦ ᓇᐹᖅᑐᓂ ᐃᑭᑦᑐᐊᓗᖕᓂ.

ᓇᐹᖅᑐᓂ ᐃᑭᑦᑐᐊᓗᖕᓂ ᑲᔪᓰᓐᓇᖅᑎᓪᓗᒍ, ᐋᓐᓂᐊᕕᓕᐊᖅᑐᓄᑦ ᐊᐅᓪᓛᕐᓂᐅᔪᒥ ᕿᑎᕐᒥᐅᓂ ᐊᕕᒃᑐᖅᓯᒪᓂᐅᔪᒥ ᑕᒪᒃᑭᑦ ᐊᒃᑐᖅᑕᐅᓂᖃᕐᓂᐊᖅᐳᖅ, ᓵᑉ ᐅᖃᓚᐅᖅᐳᖅ.

“ᑭᓱᓕᒫᑦ ᔭᓗᓇᐃᕝᑎᒎᓲᖑᕗᑦ,” ᐅᖃᓚᐅᖅᐳᖅ.

ᑲᓇᐃᑎᐊᓐ ᓄᐊᑦ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐱᔾᔪᑎᖃᖅᑐᒥ ᓇᐹᖅᑐᓂ ᐃᑭᑦᑐᐊᓗᖕᓂ, ᐅᓯᔭᐅᓂᐅᔪᓂ ᐊᐅᓚᑕᐅᓂᖓᓂ ᐃᖏᕐᕋᒐᔪᒃᑐᒥ ᔭᓗᓇᐃᕝᒥ ᐊᐅᓚᑕᐅᖔᓕᖅᐳᑦ ᐃᐊᑦᒪᓐᑕᓐᒥ.

ᐋᖅᑭᐅᒪᑎᑦᑎᓇᓱᐊᕐᓂᕐᒥ ᐋᖅᑭᒃᑕᐅᓯᒪᔪᓂ ᐱᔨᑦᑎᕋᕐᓂᐅᔪᒥ, ᕿᓚᒻᒥᐅᔪᒥ ᐊᖅᑯᑎᒋᔭᐅᔪᓂ ᐋᖅᑭᒃᑕᐅᓯᒪᔪᖃᓕᖅᐳᖅ ᐃᖃᓗᖕᓂ, ᐃᖃᓗᒃᑑᑦᑎᐊᖅ ᐊᒻᒪ ᐃᓅᕕᖕᒧᑦ.

ᖃᖓᑕᓲᓂ ᓄᖅᑲᖅᑎᑕᐅᓯᒪᓂᐅᔪᓂ ᑕᐃᑯᖓ ᐊᒻᒪ ᔭᓗᓇᐃᕝᒥ ᐊᐅᓪᓚᕐᓂᕐᒧᑦ ᐱᔾᔪᑎᖃᖅᑐᒥ ᓇᐹᖅᑐᓂ ᐃᑭᑦᑐᐊᓗᖕᓂ ᐊᒃᑐᐃᓯᒪᒋᕗᖅ ᓄᓇᕗᒻᒥ ᐃᓕᓐᓂᐊᖅᑎᐅᔪᓂ ᐊᑐᖅᐸᒃᑐᓂ ᓄᓇᕗᒻᒥ ᑮᓇᐅᔭᑎᒍᑦ ᐃᑲᔪᖅᓱᐃᓂᐅᔪᒥ, ᖃᐅᔨᒪᔭᐅᔪᒥ FANS−ᒥ.

ᒫᑎᐅ ᐃᓚᓱᕕᒃᔅ, ᑐᑭᒧᐊᒃᑎᑦᑎᔨ ᐱᓕᕆᖃᑕᐅᔪᓂ ᐃᓚᐅᑎᑦᑎᓂᕐᒥ ᐃᓕᓐᓂᐊᖅᑐᓕᕆᔨᒃᑯᓐᓂ, ᐅᖃᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ ᐱᓕᕆᖃᑎᖃᖅᓯᒪᕗᑦ ᐃᓕᓐᓂᐊᖅᑎᓂ ᖃᖓᑦᑕᐅᑎᖏᓐᓂ ᐋᖅᑭᒋᐊᖅᑕᐅᒃᑲᓐᓂᕐᓂᖓᓂ, ᐃᓚᒋᐊᖅᓯᓪᓗᓂ ᐊᐅᓪᓛᕐᓂᖅ ᕿᑎᕐᒥᐅᑎᒍᑦ ᒪᑐᐃᖓᓂᒃᑲᓐᓂᕐᓂᖓᓂ.

ᐃᓚᓱᕕᒃᔅ ᐅᖃᓚᐅᖅᐳᖅ ᐃᓕᓐᓂᐊᖅᑏᑦ ᓱᓕ ᑕᑕᑎᕆᔭᕆᐊᓕᖕᓂ FANS ᐊᐅᓪᓛᕐᓂᕐᒧᑦ ᑐᒃᓯᕋᐅᑎᖏᓐᓂ ᐱᓕᕆᓪᓗᐊᖅᐳᑦ ᕿᓚᒻᒥᐅᓛᖑᔪᒥ.