ᐸᐅᒃᑑᑎᒃᑯᑦ ᑐᙵᓵᕆᓕᕐᑐᑦ ᒥᖅᓱᖅᑎᓂᒃ ᐃᖅᑲᐅᒪᔾᔪᑎᒃᓴᒥᒃ ᐊᒪᐅᑎᓕᐅᕈᔨᓪᓗᑎᒃ

ᑲᓇᑕᒥ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᑦ ᒥᖅᓱᖅᑎᓂᒃ ᐱᔪᒪᓕᕐᒪᑕ ᓴᓇᓂᐊᕐᑐᓂᒃ ᐊᒪᐅᑎᓂᒃ ᐃᓱᒪᒋᓗᒋᑦ ᐃᓄᐃᑦ ᐊᕐᓇᐃᑦ ᔭᒐᓯᒪᔪᑦ ᐊᒻᒪᓗ ᐃᓄᐊᖅᑕᐅᔪᕕᓃᑦ.

ᐸᐅᒃᑑᑎᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑲᓇᑕᒥ ᖃᖓᑦᑎᐊᓵᖅ ᐱᒋᐊᖅᑎᑦᑎᓚᐅᕐᒪᑕ ‘ᐊᐅᐸᖅᑐᒥ ᐊᒪᐅᑎᓕᐅᕐᓂᕐᒥᒃ’, ᑖᓐᓇᓗ ᐃᑲᔪᕈᑎᖃᖅᑎᑦᑎᓂᐊᖅᖢᓂ ᐊᒪᐅᑎᓕᐅᖅᑐᓄᑦ ᐅᑯᓄᖓ ᑎᓴᒪᓄᑦ ᐊᕕᒃᑐᖅᓯᒪᓂᒃᑯ ᐃᓄᐃᑦ ᓄᓇᖏᓐᓄᑦ; ᓄᓇᕗᑦ, ᓄᓇᕕᒃ, ᓄᓇᑦᓯᐊᕗᑦ ᐊᒻᒪ ᐃᓄᕕᐊᓗᐃᑦ.

“ᐅᖃᐅᓯᖃᖅᑎᓪᓗᑕ ᐃᖅᑲᐅᒪᔾᔪᑎᒃᓴᓕᕆᓂᕐᒥᒃ, ᐊᔾᔨᒌᙱᑦᑑᑎᓂᒃ ᐃᓱᒪᒐᒃᓴᓂ ᐱᓕᕆᐊᖃᓚᐅᕋᑦᑕ,” ᐅᖃᖅᑐᖅ ᐸᐅᒃᑑᑎᒃᑯᑦ ᐊᖓᔪᖅᑳᖓ ᕇᐱᑲ ᑲᓪᓗ. “ᐃᓱᐊᓂᓕ ᐅᓇ ᐊᐅᐸᖅᑐᖅ ᐊᒪᐅᑎ ᑐᑭᖃᓛᖑᓯᒪᖕᒪ. ᑖᓐᓇᓗ ᓇᓗᓇᐃᒃᑯᑎᐅᓕᖅᖢᓂ ᐃᖅᑲᐅᒪᓂᕐᒥᒃ.”

ᐅᓇ ᐊᐅᐸᖅᑐᖅ ᐊᒪᐅᑎ ᐃᓄᖕᓄ ᑐᕌᖓᓗᐊᖅᖢᓂ ᖃᓄᐃᓕᐅᕈᑎ ᐅᕙᙶᖅᓯᒪᓗᐊᖅᖢᓂ ᐊᐅᐸᖅᑐᖅ ᐊᑕᔪᖅ ᐱᓕᕆᐊᒥ (REDress Project), 2011-ᒥᑦ ᑎᑎᕋᐅᔭᒐᖅᑕᐅᓯᒪᔪᒥᙶᖅᑐᖅ ᐆᒧᖓ ᐊᓪᓚᖓᔪᒧᑦ ᑎᑎᕋᐅᔭᖅᑎᒧᑦ ᔭᐃᒥ ᐸᓛᒃᒧᑦ, ᑖᓐᓇᓗ ᑲᑎᑦᑎᓚᐅᕐᓯᒪᖕᒪᑦ 600-ᓂ ᐊᐅᐸᖅᑐᓂᒃ ᐊᑕᔪᓂᒃ ᑲᓇᑕᒥᙶᖅᑐᓂᒃ ᓇᑭᑐᐃᓐᓇᖅ ᐃᓱᒪᒋᓪᓗᒋᑦ ᔭᒐᓯᒪᔪᑦ ᐊᒻᒪ ᐃᓄᐊᖅᑕᐅᔪᕕᓃᑦ ᓄᓇᖃᖅᑳᖅᑐᑦ ᐊᕐᓇᐃᑦ.

ᐅᓇ ᐊᒪᐅᑎ ᐊᕐᓇᓄᑦ ᐃᓄᖕᓄᑦ ᐊᓐᓄᕌᕆᔭᐅᔪᖅ ᓇᓴᖃᖅᖢᓂ ᐊᒻᒪᓗ ᓄᑕᕋᓛᒥ ᐊᒫᕐᕕᖃᖅᖢᓂ. ᐅᓇ ᐊᒪᐅᑎ ᐊᔾᔨᒌᙱᖢᓂ ᓴᓇᔭᐅᕙᒃᑐᖅ ᓇᓃᓐᓂᖏᑦ ᒪᓕᒃᖢᑎᒃ ᐃᓄᐃᑦ ᓄᓇᖓᓂᒃ, ᖃᓪᓗ ᐅᖃᖅᑐᖅ, ᒪᐅᓇ ᐊᒪᐅᑎᐅᑉ ᐊᖏᑎᒋᓂᖓᓂᒃ, ᒪᐅᖓ ᓯᓂᖓ ᐋᖅᑭᒃᑕᐅᓯᒪᓂᖓᓄᑦ ᐊᒻᒪᓗ ᐊᔾᔨᒌᙱᑦᑐᓂᒃ ᐃᓚᐅᕐᓯᒪᓂᖏᑦᑎᒍᑦ ᓲᕐᓗ ᒪᑯᓂᖓ ᓂᒡᔭᖏᓐᓂᒃ ᐅᕝᕙᓘᓐᓃᑦ ᓴᐸᖓᖃᕐᓂᖏᑦᑎᒍᑦ.

ᖃᓄᐃᓕᖓᒐᓗᐊᖅᐸᑦ ᐊᒪᐅᑎ, ᖃᓪᓗ ᐅᖃᓚᐅᕐᑐᖅ ᐅᓇ ᐊᒪᐅᑎ ᓇᓗᓇᐃᒃᑯᑎᓪᓚᕆᐅᖕᒪᓐ ᐃᓄᐃᑦ ᐊᕐᓇᖏᓐᓂᒃ.

“ᐃᓱᒪᒐᑦᑕᓕ ᑕᑯᔭᐅᔭᕌᖓᑕ ᑖᒃᑯᐊ … ᐃᖅᑲᐅᒪᔾᔪᑎᒋᔭᐅᖃᑦᑕᕐᓂᐊᕐᓗᑎᒃ ᐊᕐᓇᓂ ᐃᓅᓯᖃᕈᓐᓃᕐᓂᑯᓂᒃ ᐋᓐᓂᖅᓱᖅᑕᐅᕙᓗᐊᕐᓂᕐᒧᑦ,” ᐅᖃᖅᑐᖅ. “ᐊᒻᒪᓗ ᑕᒪᑦᑕ ᐱᓕᕆᖃᑎᒌᒋᐊᖃᕋᑦᑕ ᐅᓇ ᐋᓐᓂᖅᓱᐃᕆᕙᖕᓂᐊᓗᒃ ᓄᖅᑲᖅᑎᑕᐅᓇᓱᒃᑎᓪᓗᒍ ᓄᓇᒋᔭᑦᑎᓐᓂ ᑕᒪᐃᓐᓂ”.

ᐃᓄᐃᑦ ᒥᕐᓱᖅᑎᐅᔪᑦ ᑲᑐᔾᔨᖃᑎᒌᓪᓘᓐᓃᑦ ᐱᕕᖃᖅᑎᑕᐅᔪᑦ ᓯᑎᐱᕆ 10 ᑎᑭᓐᓇᓱᖕᓂᖓᓂᒃ ᓴᓇᐅᒐᕆᓇᔭᖅᑕᖏᓐᓂᒃ ᑐᓂᓯᓯᒪᖁᔭᐅᓪᓗᑎᒃ. ᐊᒻᒪᓗ ᑖᒃᑯᓇᙵᑦ ᐸᐅᒃᑑᑎᒃᑯᑦ ᓂᕈᐊᕆᔭᖓ ᐊᒪᐅᓯᐅᖅᓯᒪᔭᕆᐊᖃᕐᓂᐊᖅᖢᓂ ᔭᓄᐊᕆ 2022 ᑎᑭᓐᓇᓱᖕᓂᖓᓂᒃ.
ᐸᐅᒃᑑᑎᒃᑯᑦ ᓱᓕ ᐃᓱᒪᓕᐅᕆᐊᓂᙱᑦᑐᑦ ᓇᓂ ᑖᓐᓇ ᐊᐅᐸᖅᑐᖅ ᐊᒪᐅᑎ ᓴᖅᑭᔮᖅᑎᑕᐅᓛᕐᒪᖔᑦ. ᖃᓪᓗ ᐅᖃᓚᐅᕐᑐᖅ ᓄᓇᓕᖕᓂ ᐅᐸᒡᕕᖕᓂ ᓴᖅᑭᔮᖅᑎᑕᐅᓗᑎᒃ, ᐅᕝᕙᓘᓐᓃᑦ ᑖᓐᓇ ᓄᓇᓕᖕᓄᑦ ᓴᖅᑭᔮᖅᑎᑕᐅᑲᑕᒡᓗᓂ ᐊᔾᔨᒌᙱᑦᑐᓂᒃ.

ᐅᓇ ᐊᐅᐸᖅᑐᖅ ᐊᒪᐅᑎ ᐱᓕᕆᐊᒃᓴᖅ ᐃᑲᔫᑎᖃᖅᑎᑕᐅᔾᔪᑎᓕ ᒐᕙᒪᑐᖃᒃᑯᑦ ᐊᐅᓚᔾᔪᑎᒃᓴᓕᕆᓂᖏᑦᑎᒍᑦ ᑐᕌᖓᔪᓂᒃ ᐃᖅᑲᐅᒪᔾᔪᑎᓕᕆᓂᕐᒧᑦ ᐅᑯᓄᖓ ᑲᓇᑕᒥ ᖃᐅᔨᓴ)ᖕᓂ ᔭᒐᓯᒪᔪᓂᒃ ᐊᒻᒪ ᐃᓄᐊᖅᑕᐅᓯᒪᔪᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᖅᓵᓂᒃ.