ᐸᓖᓯᒃᑯᑦ ᐃᓕᓐᓂᐊᕐᑐᒃᓴᓂᒃ ᐱᓇᓱᒃᐸᓪᓕᐊᔪᑦ ᐃᓄᖕᓂ ᐊᔪᕈᓐᓃᕐᓴᖅᑎᑦᑎᓂᕐᒧᑦ

ᐸᓖᓯᒃᑯᑦ ᐊᔪᕈᓐᓃᕐᓴᖅᑎᑦᑎᓂᕐᒧᑦ ᐱᓕᕆᐊᒃᓴᖓ ᑐᕌᖓᔪᖅ ᐃᓄᖕᓂ ᐸᓖᓯᒃᑯᓐᓂ ᐃᓚᐅᑎᑦᑎᓂᕐᒧᑦ ᐱᒋᐊᕐᓂᐊᓕᕐᑐᖅ ᑲᖏᖅᖠᓂᕐᒥᑦ.

ᐅᓇ ᑕᖅᑭᓂ ᑎᓴᒪᓂ ᐃᑲᔫᓯᐊᑎᒍᑦ ᐊᔪᕈᓐᓃᕐᓴᕈᑎ, ᐱᒋᐊᕐᓂᐊᖅᖢᓂ ᔭᓄᐊᕆ 25-ᒥᑦ, ᐸᕐᓇᒍᑎᒃᓴᖅ ᐃᓕᓐᓂᐊᕐᓂᐊᕈᒪᔪᓄᑦ ᑕᖅᑭᓂᒃ 6-ᓂᒃ ᐃᓕᓐᓂᐊᒐᒃᓴᓂᒃ ᐅᕆᔭᐃᓇᒥᓐ.

ᐅᓇ ᐃᓕᓐᓂᐊᒐᒃᓴᖅ ᐊᐃᑉᐸᕆᓕᕐᑕᖓᓂᒃ ᐱᒋᐊᖅᑕᐅᒃᑲᓐᓂᕐᑐᖅ. ᐋᖅᑭᒃᓱᕐᓯᒪᔪᖅ ᐃᓄᖕᓂ ᐸᓖᓯᑕᖃᕐᓂᕐᓴᐅᓗᓂ ᒪᑯᐊ ᑐᓗᕐᑕᕐᕕᐅᔭᑦᑐᑦ ᓄᓇᖃᖅᑐᓂᒃ ᐸᓖᓯᒃᑯᓐᓄᑦ ᐱᑕᖃᙱᓐᓂᕐᓴᐅᓕᖁᓪᓗᒍ, ᐸᓖᓯᒃᑯᑦ ᐅᖃᓚᐅᕐᓯᒪᔪᑦ ᔭᓄᐊᕆ 4-ᒥᑦ ᑐᓴᒐᒃᓴᓕᐅᖅᖢᑎᒃ.

ᐃᓕᓐᓂᐊᕋᔭᕐᒥᔪᑦ ᐅᖃᐅᓯᓕᕆᓂᕐᒥᑦ ᐊᒻᒪ ᓇᐃᓴᐅᓯᕆᓂᕐᒥᑦ, ᐃᓚᖏᓐᓂᒃ ᐸᓖᓯᐅᓗᓂ ᐊᔪᙱᑦᑕᕆᐊᓕᖕᓂᒃ ᐊᒻᒪ ᑲᑎᒪᓂᒃᑯᑦ ᐱᓕᕆᐊᖃᕐᐸᒡᓗᑎᒃ ᐃᓱᒪᒃᑯᑦ ᖃᓄᐃᑦᑕᐃᓕᓂᕐᒧᑦ ᐱᓕᕆᐊᒃᓴᓂᒃ ᐊᒻᒪ ᐱᓕᕆᐊᒃᓴᓂᒃ ᐱᓕᕆᐊᖃᕈᓐᓇᕐᓂᕐᒥᒃ.

ᐊᔪᕈᓐᓃᕐᓴᕈᑎᒃᓴᑦ ᐃᓚᖃᕐᓂᐊᕐᒥᔪᑦ ᐃᓐᓇᑐᖃᕐᓂᒃ ᐃᓚᐅᑎᑦᑎᕙᒡᓗᑎᒃ ᐊᒻᒪ ᓄᓇᐃᓐᓇᕐᒧᙵᐅᖃᑦᑕᕐᓗᑎᒃ, ᐅᖃᓚᐅᕐᑐᖅ ᐸᓖᓯ ᑕᐃᕕᑦ ᐊᒡᓘᑲᖅ.

ᐸᓖᓯᒃᑯᓐᓄᑦ ᐱᒋᐊᕐᓂᐊᕐᓂᕐᒧᑦ ᖃᐅᔨᓴᕈᑎᐅᕙᒃᑐᑦ “ᑐᓗᖅᑕᕈᑎᒻᒪᕆᐅᖕᒪᑕ ᓄᓇᕗᒻᒥᐅᓄᑦ” ᐊᒻᒪᓗ ᓇᐃᓴᐅᓯᕆᓂᖅ ᐊᒻᒪ ᐅᖃᐅᓯᓕᕆᓂᕐᒥᑦ ᐃᓕᓐᓂᐊᕐᓯᒪᓂᖏᑦ ᐊᓂᒍᐃᒍᑎᒋᔪᓐᓇᕐᓂᕐᓴᐅᓂᐊᖅᖢᓂᔾᔪᒃ, ᐅᖃᖅᑐᖅ.

7-ᓂ ᐃᓕᓐᓂᐊᕐᓚᐅᕐᑐᓂᒃ ᐊᕐᕌᓂ 6 ᐊᓂᒍᐃᓚᐅᕐᓯᒪᔪᑦ ᖃᐅᔨᓴᖅᑕᐅᒍᑎᖏᓐᓂᒃ, ᐅᖃᖅᑐᖅ ᐊᒡᓘᒃᑲᖅ. ᐸᓖᓯᒃᑯᑦ ᐃᓱᒪᖕᒪᑕ ᖁᓕᓂᒃ ᐃᓕᓐᓂᐊᖅᑐᓂᒃ ᐸᓖᓯᙳᖅᑎᑦᑎᔪᒪᓪᓗᑎᒃ, ᐅᖃᖅᑐᖅ.

ᓯᕗᓪᓕᖅ ᐃᓕᓐᓂᐊᕈᑎ ᒪᑐᔭᕆᐊᖃᓕᓚᐅᕐᓯᒪᖕᒪᑦ ᒫᔅᓯᐅᓚᐅᕐᓯᒪᔪᒥᒃ ᓄᕙᒡᔪᐊᕐᓇᖅ-19 ᐱᔾᔪᑎᐅᓪᓗᓂ, ᑭᓯᐊᓂᓕ ᒫᓐᓇ ᐃᓕᓐᓂᐊᕈᑎᒃᓴᑦ ᐋᖅᑭᒃᓯᒪᓕᕐᑐᑦ ᒪᓕᒋᐊᓕᖕᓂᒃ ᐃᓚᖏ ᒪᓕᓕᖅᖢᑎᒃ ᐊᒻᒪ ᐊᒃᑐᖅᑕᐅᔪᒥᓇᕈᓐᓃᖅᖢᑎᒃ ᐋᓐᓂᐊᕕᒡᔪᐊᕐᓇᒧᑦ, ᑐᓴᒐᒃᓴᓕᐊᑎᒍᑦ ᐅᖃᕐᓯᒪᓚᐅᕐᑐᑦ.

ᑕᒪᓐᓇ ᐱᓕᕆᐊᒃᓴᖅ ᐊᐅᓚᑕᐅᓂᐊᕐᓗᓂ, ᐸᓖᓯᒃᑯᑦ ᐱᓕᕆᖃᑎᖃᓕᓚᐅᕐᑐᑦ ᓄᓇᕗᑦ ᐃᓄᓕᕆᔨᒃᑯᓐᓂᒃ ᐊᒻᒪ ᒪᑭᒋᐊᖅᑕ ᐃᓄᖕᓂ ᐊᔪᕈᓐᓃᖅᓴᖅᑐᓕᕆᔨᒃᑯᓐᓂᒃ, ᑖᓐᓇᓕ ᐊᐅᓚᑕᐅᓪᓗᓂ ᓄᓇᕗᑦ ᑐᙵᕕᒃᑯᓐᓂᒃ.

ᒪᑭᒋᐊᖅᑕ ᐃᑲᔫᑎᒃᓴᖃᖅᑎᑦᑎᔨᐅᔪᖅ ᐅᑯᑎᒎᓇᖅ $175 ᒥᓕᐊᓐ ᑖᓚᓂ ᐃᑲᔫᑎᒃᓴᓂᒃ ᒪᐃ 2015-ᒥᑦ ᐱᔭᐅᓂᑯᕕᓂᕐᓂᒃ ᐅᕘᓇ $255.5 ᒥᓕᐊᓐ ᑖᓚᓂ ᐊᖏᕈᑎᑎᒍᑦ ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᖅᑎᑦᑎᑎᓪᓗᒋᑦ 2006-ᒥᑦ ᑮᓇᐅᔭᖅᑖᕕᓂᖏᓐᓂᒃ.

ᐃᖅᑲᖅᑐᐃᕕᒃᑰᖅᑎᑦᑎᓂᖅ ᐱᔾᔪᑎᖃᕈᑎᐅᓚᐅᕐᑐᖅ ᐅᑯᐊ ᒐᕙᒪᑐᖃᒃᑯᑦ ᐱᓕᕆᓯᒪᙱᓗᐊᕐᓂᖏᓐᓂᒃ ᐃᓄᖕᓂ ᐃᖅᑲᓇᐃᔭᓕᖅᑎᑦᑎᓯᒪᙱᓗᐊᕐᓂᖏᓐᓂᒃ ᐅᑯᓇᓂ ᓄᓇᕗᑦ ᒐᕙᒪᒃᑯᓐᓂᒃ.

ᐊᒡᓘᒃᑲᖅ ᐅᖃᓚᐅᕐᑐᖅ ᑖᓐᓇ ᐱᓕᕆᐊᒃᓴᖅ ᐱᓇᓱᐊᖅᑕᐅᓯᒪᓂᖓᓂ ᐃᓄᖕᓂ ᐸᓖᓯᑕᖃᕆᐊᖃᕐᓂᖓᓂᒃ ᓄᓇᕗᒥᑦ ᐊᒻᒪᓗ ᐸᓖᓯᒃᑯᑎᒍᑦ ᑭᒡᒐᖅᑐᐃᔪᓐᓇᖅᑐᓂᒃ.

ᐱᓇᓱᖕᓂᐊᕐᓗᓂ, ᐃᓕᓐᓂᐊᕐᕕᐊᓗᖕᒥ ᐊᓂᒍᐃᓯᒪᓂᕐᒧᑦ ᓇᓗᓇᐃᒃᑯᑎᖃᕆᐊᖃᖅᖢᑎᒃ, ᐱᕋᔭᒃᓯᒪᙱᓪᓗᑎᒃ ᐊᒻᒪᓗ ᐃᓄᑦᑎᐊᕙᐅᓗᑎᒃ.