ᐹᕙᓐᓛᓐᑯᑦ ᐱᓂᐊᕐᓂᕋᖅᑕᖏᑦ ᒥᑭᓗᐊᖅᑐᑦ, ᑭᖑᕙᓗᐊᖅᑐᑦ, ᓈᒻᒪᒃᓴᙱᑦᑐᑦ ᐅᖃᖅᑐᑦ

ᐅᔭᕋᒃᓯᐅᖅᕕᒃ ᐅᖃᖅᑐᖅ ᐃᓱᒫᓘᑎᒋᔭᐅᔪᓂᒃ ᐱᓕᕆᐊᖃᕋᓱᖕᓂᖏᓐᓂᒃ ᓄᓘᔮᑦ ᐊᖏᒡᓕᒋᐊᖅᑕᐅᓂᖓᓄᑦ ᐸᕐᓇᐅᑎᖏᓐᓂᒃ

ᐅᓪᓗᕆᐊᖅ ᕼᐋᓐᓴᓐ, ᕿᑎᐊᓃᑦᑐᖅ, ᐹᕙᓐᓛᓐᑯᑦ ᐊᖓᔪᖅᑳᖓᑕ ᑐᒡᓕᖓ ᓄᓇᓕᖕᓂᒃ ᐊᒻᒪ ᖃᓄᐃᓕᐅᕈᑎᒃᓴᓄᑦ ᐱᕙᓪᓕᐊᔪᓕᕆᓂᖅᒧᑦ. ᐅᖃᓚᐅᕐᑐᖅ ᑲᒻᐸᓂᐅᔪᑦ “ᑲᔪᓯᔭᕆᐊᖃᕐᓂᖏᓐᓂᒃ ᖃᓄᐃᓕᐅᖁᔭᐅᓂᒃᑯᑦ ᐊᒻᒪᓗ ᓇᓗᓇᙱᑦᑐᓂᒃ ᐃᓄᖕᓂ ᖃᐅᔨᒪᑎᑦᑎᓗᑎᒃ ᑐᓵᓂᑦᑎᓐᓂᒃ ᐊᒻᒪᓗ ᐃᓱᒫᓘᑎᖏᑦ ᐱᓕᕆᐊᖃᕐᓂᑦᑎᓐᓂᒃ.” (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᖅᑎᐅᓂᖅᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᖅᑎ

For an English version of this story, see Baffinland’s new commitments too little, too late, critics say

ᐹᕙᓐᓛᓐ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃ ᓴᖅᑭᑦᑎᓚᐅᕐᒪᑕ ᓄᑖᓂᒃ ᖃᓄᐃᓕᐅᕈᑎᒃᓴᕆᓂᐊᖅᑕᖏᓐᓂᒃ ᐅᑯᓄᖓ ᓄᓇᓕᖕᓄᑦ ᓄᓘᔮᖕᓂ ᐅᔭᕋᒃᓯᐅᖅᕕᒃᒧᑦ ᖃᓂᒃᓴᖅᑐᓄᑦ, ᑖᓐᓇ ᑐᒃᓯᕋᕈᑎᒋᓯᒪᔭᖓ ᐊᖏᒡᓕᒋᐊᖅᑎᑦᑎᓂᖅᒥᒃ ᐊᖏᖅᑕᐅᒃᐸᑦ, ᑭᓯᐊᓂᓕ ᓈᒻᒪᒃᓴᙱᑦᑐᑦ ᐅᖃᖅᑐᑦ ᓈᒻᒪᙱᓗᐊᕐᓂᕋᖅᖢᒍ.

ᐋᓐᑎᐅᕆᒥ ᑐᙵᕕᓕᒃ ᐅᔭᕋᒃᓯᐅᖅᕕᒃ ᓴᓇᔪᒪᖕᒪᑕ 110 ᑭᓛᒥᑕᒥ ᑕᑭᓂᓕᖕᒥᑦ ᓄᓇᓯᐅᑎᑯᑖᒧᑦ ᐊᖅᑯᑎᒃᓴᒥᒃ ᓄᓘᔮᖕᓂᑦ ᐅᔭᕋᒃᓯᐅᖅᕕᒃᒥᑦ ᐅᕗᖓ ᓄᓘᔮᑦ ᕿᙳᐊᓄᑦ, ᓴᕕᕋᔭᒃᓴᖅ ᐊᖏᒡᓕᒋᐊᖅᑕᐅᓗᓂ ᐅᓯᔭᐅᖃᑦᑕᕋᔭᖅᑐᖅ ᒪᐅᓇ ᑕᓪᓗᕈᑎᐅᑉ ᐃᒪᖓᒍᑦ ᑕᕆᐅᖅᒥᐅᑕᓂᒃ ᓴᐳᔾᔨᓯᒪᕝᕕᒃᑯᑦ ᐊᒻᒪᓗ ᑐᓚᒃᑕᖅᕕᓕᐅᒃᑲᓐᓂᕐᓗᑎᒃ. ᐅᓇ ᑐᒃᓯᕋᐅᑎ ᐱᔾᔪᑎᒋᔭᐅᓚᐅᖅᑐᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᑐᓴᐅᒪᑎᑦᑎᓂᖅᒧᑦ ᑲᑎᒪᓂᖓᓄᑦ ᐱᒋᐊᓚᐅᖅᑐᒥᓐ ᐱᓇᓱᐊᕈᓯᐅᓚᐅᖅᑐᒥᓐ ᐃᖃᓗᖕᓂᑦ.

ᐹᕙᓐᓛᓐᑯ ᐱᓂᐊᖅᓂᕋᖅᓯᒪᖕᒪᑕ ᐃᒻᒥᒃᑰᖓᔪᒃᑯᑦ ᖃᐅᔨᓴᖅᑎᑦᑎᓂᐊᕐᓗᑎᒃ ᐳᔪᖅ ᓯᐊᕐᒥᔭᓗᐊᖅᓂᖓᓂᒃ ᐅᔭᕋᒃᓯᐅᖅᕕᐅᑉ ᐱᓕᕆᐊᖏᓐᓄᑦ, ᖃᓄᕐᓗ ᑲᒻᐸᓂ ᐱᓕᕆᐊᖃᕐᓂᐊᖅᓂᖓᓂᒃ ᐊᕙᑎᒋᔭᒧᑦ ᐃᓱᒫᓘᑎᒋᔭᐅᔪᓂᒃ ᑖᓐᓇ ᐊᖏᒡᓕᒋᐊᖅᑎᑦᑎᔪᒪᓂᖅ ᑲᔪᓯᖁᔭᐅᓂᐊᖅᐸᑦ.

ᐊᒻᒪᓗ ᑐᒃᓯᕋᕈᑎᐅᓯᒪᓂᑯ ᓴᕕᕋᔭᒃᓴᓂᒃ ᐅᓯᑲᖅᑕᕐᕕᐅᖃᑦᑕᕐᓂᐊᖅᓂᖓ ᐅᓄᕈᓐᓃᖅᑎᑕᐅᕚᓪᓕᕐᓗᓂ 168-ᓄᑦ ᐅᕙᙵᑦ ᑐᒃᓯᕋᕈᑎᕕᓂᖓᓂᒃ 174-ᒥᑦ, ᐊᒻᒪᓗ ᐅᒥᐊᖅᔪᐊᒃᑰᖅᑎᑦᑎᖃᑦᑕᕋᔭᖅᖢᑎᒃ ᔪᓚᐃ 15-ᒥᑦ ᐅᒃᑑᐱᕆ   31-ᒧᑦ, ᓇᓗᓇᖅᖢᓂ ᓄᕕᐱᕆ 15-ᒧᑦ ᑎᑭᖃᑦᑕᕋᔭᕆᐊᒃᓴᖓᓂᒃ ᒪᓕᒡᓗᑎᒃ ᓯᑯ ᖃᓄᐃᓕᖓᓂᖓᓄᑦ ᐊᒻᒪᓗ ᖃᐅᔨᓇᓱᓚᐅᖅᑎᓪᓗᒋᑦ ᒥᑦᑎᒪᑕᓕᒃᒥᑦ ᐊᖑᓇᓱᒃᑐᓕᕆᔨᒃᑯᓐᓄᑦ.

ᐊᓯᖏᓐᓂᒃᑕᐅᖅ ᐱᓂᐊᖅᓂᕋᖅᓯᒪᔭᖏᓐᓂᒃ, ᑲᒻᐸᓂ 6-ᓂ ᐃᖅᑲᓇᐃᔮᓪᓚᕆᖕᓂᒃ ᓴᖅᑭᑎᑦᑎᓂᐊᖅᖢᑎᒃ ᐃᒃᐱᐊᕐᔪᒃᒥᑦ, ᑲᖏᖅᑐᒑᐱᖕᒥᑦ, ᐃᒡᓗᓕᒃᒥᑦ ᐊᒻᒪ ᓴᓂᕋᔭᒃᒥᑦ – ᐊᒻᒪᓗ 8-ᓂ ᒥᑦᑎᒪᑕᓕᒃᒥᑦ – ᑲᑎᓪᓗᑎᒃ 32 ᐃᖅᑲᓇᐃᔮᒃᓴᓪᓚᕇᑦ.

“ᑕᒪᒃᑯᐊ ᐱᓂᐊᖅᓂᕋᖅᓯᒪᔭᖏᑦ ᐋᖅᑭᒃᓱᖅᑕᐅᓯᒪᔪᑦ ᑐᓴᖅᓯᒪᔭᑦᑎᓐᓂᒃ ᓄᓇᓕᖕᓂᑦ,” ᐅᖃᖅᑐᖅ ᐅᓪᓗᕆᐊᖅ ᕼᐋᓐᓴᓐ, ᐹᕙᓐᓛᓐᑯᑦ ᐊᖓᔪᖅᑳᖓᑕ ᑐᒡᓕᖓ ᓄᓇᓕᖕᓂᑦ ᐊᒻᒪ ᖃᓄᐃᓕᐅᕈᑎᒃᓴᓕᕆᓂᖅᒧᑦ ᐱᕙᓪᓕᐊᔪᓕᕆᓂᖅᒧᑦ, ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᐃᒡᓗᓕᒃ ᒪᐃᔭᖓ ᒨᓕᓐ ᕋᓰᓄᔅ ᐅᖃᓚᐅᖅᑐᖅ ᑖᒃᑯᐊ ᑲᒻᐸᓂᐅᔪ ᐅᓄᙱᓐᓂᖅᓴᒃᑲᓐᓂᕐᓂᒃ ᐊᐅᓪᓚᖅᑎᑦᑎᖃᑦᑕᖁᔨᓪᓗᓂ ᐊᕐᕌᒍᒥᑦ, ᐊᒻᒪᓗ ᖃᓄᐃᓕᐅᕐᓂᖅᑕᖃᒃᑲᓐᓂᕆᐊᖃᕐᓂᖓᓂᒃ ᐃᖅᑲᓇᐃᔭᖅᑎᓂᒃ ᐃᑲᔪᕈᑎᒃᓴᓄᑦ, ᓲᕐᓗ ᒪᐅᓇ ᐃᒡᓗᖃᖅᑎᑦᑎᓂᒃᑯᑦ.

“ᐃᓱᒪᒐᒪ ᐃᒡᓗᓕᐅᕐᓂᖅ ᐊᒻᒪ ᐃᖅᑲᓇᐃᔮᖃᖅᑎᑦᑎᓂᖅ ᓄᓇᓕᖕᓂ ᐊᔪᕐᓇᙱᓐᓇᔭᕐᓂᖓᓂᒃ, ᐊᒻᒪᓗ ᑕᒪᓐᓇ ᐃᓱᒪᒋᔭᐅᓪᓗᐊᓚᐅᖅᓯᒪᔪᖅ ᐱᒋᐊᓕᓵᕐᓂᖏᓐᓂᒃ,” ᕋᓰᓄᔅ ᐅᖃᖅᑐᖅ, ᐅᖃᒃᑲᓐᓂᖅᖢᓂ ᐃᖅᑲᓇᐃᔮᒃᓴᑦ ᓱᓕ ᐋᖅᑭᒃᑕᐅᕌᓂᒃᓯᒪᙱᓐᓂᕋᖅᖢᓂᒋᑦ, ᑭᓯᐊᓂᓕ ᐃᓚᖃᕈᒥᒋᓪᓗᓂᒋᑦ ᑎᑎᕋᖅᕕᖕᒥᑦ ᐊᐅᓚᑦᑎᔨᒥᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᒪᔨᐅᓂᐊᖅᑐᒥᒃ.

“ᐃᓱᒪᓪᓚᕆᒃᑐᖓᓕ ᐹᕙᓐᓛᓐᑯᑦ ᐱᓇᓱᓪᓚᕆᖕᓂᖏᓐᓂᒃ, ᑭᓯᐊᓂᓕ ᒫᓐᓇ ᑭᖑᕙᕐᓯᒪᓗᐊᓕᕐᒪᑕ ᖃᓄᐃᓕᐅᕐᓂᖏᑦᑎᒍᑦ,” ᐅᖃᖅᑐᖅ.

ᕼᐋᓐᓴᓐ ᐅᖃᓚᐅᖅᑐᖅ ᐹᕙᓐᓛᓐᑯᑦ ᑐᒃᓯᕋᕈᑎᖏᓐᓂᒃ ᐊᓯᙳᖅᑎᑦᑎᖃᑦᑕᖅᓯᒪᓂᕋᖅᖢᓂᒋᑦ ᓄᓇᓖᑦ ᐱᔪᒪᔭᖏᓐᓄᑦ ᐊᒻᒪᓗ ᑲᔪᓯᓂᐊᖅᓂᕋᖅᖢᓂᒃ ᐃᓄᖕᓂᒃ ᐱᓕᕆᖃᑎᖃᕐᓂᖅᒥᒃ.

“ᐅᓇ ᓴᖅᑭᑎᑦᑎᓯᒪᔪᖅ ᑐᓵᖃᑦᑕᖅᓯᒪᓂᑦᑎᓐᓂᒃ, ᐊᒻᒪᓗ ᖃᓄᐃᓕᔪᓐᓇᕐᓂᑦᑎᓐᓂᒃ ᑕᒪᒃᑯᐊ ᐃᓱᒫᓘᑎᐅᔪᑦ ᐱᓕᕆᐊᕆᓇᓱᒃᖢᒋᑦ,” ᐅᖃᖅᑐᖅ ᕼᐋᓐᓴᓐ.

ᑖᒃᑯᐊ ᑲᒻᐸᓂᐅᔪᑦ ᐅᓄᕐᓯᕙᓪᓕᐊᑎᑦᑎᕙᓪᓕᐊᓂᐊᖅᑐᑦ ᐅᒥᐊᖅᔪᐊᒃᑰᑦᑎᑕᖏᓐᓂᒃ ᐊᕐᕌᒍᑦ ᑎᓴᒪᑦ ᐃᓗᐊᒍᑦ ᐊᒻᒪ ᐱᐅᓂᖅᓴᒃᑯᑦ ᖃᐅᔨᓴᖅᐸᓪᓕᐊᓗᑎᒃ ᐊᒃᑐᐃᒍᑎᐅᔪᓂᒃ, ᑕᐃᒪᓐᓇ ᕼᐋᒪᓚᒃᑯᓐᓂᒃ ᒥᑦᑎᒪᑕᓕᒃᒥᑦ ᐱᖁᔭᐅᓂᖏᓐᓄᑦ.

ᐅᑯᐊ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑐᓴᐅᒪᑎᑦᑎᓂᖅᒧᑦ ᑲᑎᒪᑎᑦᑎᓂᖓᓂᒃ ᐆᒧᖓ ᐹᕙᓐᓛᓐᑯᑦ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᐸᖕᓇᐅᑎᖏᓐᓂᒃ ᐄᐳᕈᓪ 14-ᒥᑦ, ᒥᑦᑎᒪᑕᓕᒃᒧᑦ ᒪᐃᔭᖓ ᔮᓱᐊ ᐋᕆᐊᒃ ᐅᖃᓚᐅᖅᑐᖅ ᑖᒃᑯᐊ ᑲᒻᐸᓂᐅᔪᑦ ᐅᓄᕐᓯᒋᐊᖅᑎᑦᑎᕙᓪᓕᐊᔾᔪᑎᒋᔪᒪᓂᖓ ᑐᑭᖃᙱᓐᓂᖓᓂᒃ ᕼᐋᒻᒪᓚᒃᑯᑦ ᐃᑲᔪᕆᐊᒃᓴᖏᓐᓂᒃ ᐊᖏᒡᓕᒋᐊᖅᑎᑦᑎᔪᒪᓂᖅᒥᒃ.

ᓄᓇᕗᒻᒥᑦ ᐊᕙᑎᕆᔨᒃᑯᑦ ᑲᑎᒪᔨᖏᑦ ᒪᑐᓯᓚᐅᖅᑐᑦ ᑲᑎᒪᓂᖅᒥᒃ ᐊᒻᒪᓗ ᐊᖏᕐᕋᐅᑎᑦᑎᓪᓗᑎᒃ ᑲᑎᒪᔪᓂᒃ ᐱᓇᓱᐊᕈᓯᐅᓚᐅᖅᑐᒥᓐ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᑐᓴᖅᑎᑦᑎᑎᓪᓗᒋᑦ ᓄᕙᒡᔪᐊᕐᓇᖅ-19 ᐱᑕᖃᕐᓂᕋᐃᑎᓪᓗᒋᑦ ᓄᓇᓕᐸᐅᔭᓂᑦ.

ᓱᓕ ᐋᖅᑭᒃᓯᓚᐅᙱᑦᑐᑦ ᖃᑯᒍ ᑭᖑᓪᓕᖅᒥᑦ ᑲᑎᒪᓂᖅ ᑲᔪᓯᓂᐊᕆᐊᒃᓴᖓᓂᒃ.

 

Share This Story

(0) Comments

Join the Conversation

Your email address will not be published. Required fields are marked *

*