ᑎᑕᒃᑎ ᐃᓕᓐᓂᐊᖅᑎᑦᑎᔪᖅ ᐃᓄᒃᑎᑐᑦ ᑎᒃᑖᒃᑎᒍᑦ 22,000-ᓄᑦ ᑖᔅᓱᒥᖓ ᒪᓕᒃᐸᒃᑐᓂᒃ

ᐃᒃᐱᐊᕐᔪᒃᒥᓐ ᐱᕈᖅᓴᖅᓯᒪᔪᖅ ᐸᑭ ᕼᐋᓐ ᓴᖅᑭᑎᑦᑎᓚᐅᕐᑐᖅ The Bee, ᓱᕈᓯᕐᓄᑦ ᐅᖃᓕᒫᒐᖅ ᐃᙱᐅᑎᖓᓂᙶᕐᓯᒪᓪᓗᓂ

ᑎᑕᒃᑎ ᐊᒻᒪ ᑎᑎᕋᖅᑎ ᐅᖃᓕᒫᒐᕐᓂᒃ ᐸᑭ ᕼᐋᓐ ᖃᓄᐃᓕᐅᕈᓐᓇᕐᓂᓂ ᐊᖏᒡᓕᒋᐊᖅᑎᑉᐹ ᐆᒥᖓ ᐃᓚᖃᓕᖅᖢᓂ ᑎᒃᑖᒃᑯᑦ (TikTok) ᑕᕐᕆᔭᒐᒃᓴᓕᕆᓂᕐᒥᒃ ᐃᓕᖅᑯᓯᕐᒥᓂᒃ ᖃᐅᔨᕙᓪᓕᐊᑎᑦᑎᓇᓱᒃᖢᓂ ᐊᒻᒪᓗ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᓇᓱᒃᖢᓂ. (ᐊᔾᔨᙳᐊᖅ ᐅᕙᙵᑦ ᐸᑭ ᕼᐋᓐ)

By ᒥᓚᓂ ᐅᕆᑦᓵᑦ

For an English version of this story, see Musician teaches Inuktitut over TikTok to 22,000 followers

ᐸᑭ ᕼᐋᓐ, ᑎᑕᒃᑎ ᐃᒃᐱᐊᕐᔪᒃᒥᐅᑕᕕᓂᖅ, ᖃᕋᓴᐅᔭᒃᑯᑦ 22,000 ᐅᖓᑖᓂ ᒪᓕᒃᑎᖃᓕᖅᑐᖅ ᑎᒃᑖᒃᑯᑦ, ᑕᕝᕘᓇ ᓴᖅᑭᑎᑦᑎᖃᑦᑕᕐᒪᑦ ᓇᐃᑦᑐᓂᒃ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᑕᕐᕆᔭᒐᒃᓴᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ. ᒫᓐᓇᓕ ᐅᖃᓕᒫᒐᓕᐊᒥᓂᒃ ᓱᕈᓯᕐᓄᑦ ᓴᖅᑭᑎᑦᑎᓵᓚᐅᕐᒥᔪᖅ.

ᐊᕐᕌᒍᑲᓴᐃᑦ ᖁᓕᑦ ᐊᓂᒍᕐᓯᒪᔪᓂ ᕼᐋᓐ ᑕᕐᕆᔭᒐᒃᓴᓂᒃ ᐃᖏᐅᑎᖏᓐᓂᒃ ᓴᕿᑎᑦᑎᖃᑦᑕᓕᓚᐅᕐᓯᒪᔪᖅ ᕙᐃᔅᐳᒃᑯᑦ ᐊᒻᒪᓗ ᔫᑑᑉᑯᑦ, ᐊᒻᒪᓗ ᐃᓄᖕᓂ ᐅᓄᕐᓯᕙᓪᓕᐊᔾᔪᔾᔨᓪᓗᓂ ᐃᓄᒃᑎᑐᑦ ᐃᙱᐅᑎᓂ ᑐᓵᔪᒪᕙᒃᑐᓂᒃ, ᐅᖃᖅᑐᖅ.

“ᐅᓇ ᐱᒋᐊᓚᐅᕐᓯᒪᔪᖅ ᐅᖃᐅᓯᕋ ᐊᓯᐅᑎᑦᑕᐃᓕᒪᓪᓗᒍ ᓲᖃᐃᒻᒪ ᖃᐅᑕᒪᓐ ᐊᑐᖃᑦᑕᒋᓐᓇᒃᑯ,” ᐅᖃᖅᑐᖅ. “ᐃᓄᒃᑎᑐᑦ ᑎᑎᕋᖅᐸᒃᖢᖓ ᐊᒻᒪᓗ ᑕᒪᒃᑯᐊ ᐃᙱᐅᓯᐊᕆᓕᖅᐸᒃᖢᒋᑦ.”

ᐊᕐᕌᓂᓕ ᑎᒃᑖᒃᒥᑦ ᐊᑐᕐᓂᖅᓴᐅᓕᓚᐅᕐᓯᒪᖕᒪᑦ ᐊᒻᒪᓗ ᓴᖅᑭᑎᑦᑎᓕᖅᖢᓂ ᐃᓄᐃᑦ ᐃᓕᖅᑯᓯᖓᓂᒃ ᐊᒻᒪ ᐃᓄᒃᑎᑐᑦ ᐅᖃᐅᓯᕐᓂᒃ ᐊᔪᕈᓐᓃᖅᓴᖅᑎᑦᑎᓪᓗᓂ ᓇᐃᑦᑐᓂᒃ ᑕᕐᕆᔭᒐᒃᓴᓂᒃ ᐊᑐᖅᖢᓂ.

ᖃᖓᑦᑎᐊᓵᖅ “ᐃᓄᒃᑎᑐᑦ ᐅᓪᓗᒥᒧᑦ ᐅᖃᐅᓯᖅ” ᓴᖅᑭᔮᒐᖓ ᐊᔪᕈᓐᓃᖅᓴᕈᑎᐅᔪᖅ ᐅᖃᕆᐅᖅᓴᕐᓂᕐᒥᒃ ᐱᓕᒻᒪᒃᓴᕐᓂᖅᒥᒃ — ᐊᔪᕈᓐᓃᖅᓴᕐᓂᖅᒥᒃ — ᐅᖃᑲᑕᖕᓂᒃᑯᑦ, ᓱᒃᑲᐃᖢᓂ ᐅᖃᖅᖢᓂᐅᒃ, ᐊᕕᒃᑐᖅᐸᓪᓕᐊᓯᒪᓪᓗᓂᒋ ᐅᖃᕐᓯᒪᓂᖏᑦᑎᒍᑦ ᐊᒻᒪᓗ ᐅᖃᓪᓚᐅᓯᒃᑯᑦ ᐅᖃᐅᓯᕆᓪᓗᓂᒋᓪᓗ.

ᑕᕐᕆᔭᒐᕐᓂᒃ ᑎᑎᕋᖅᑕᐅᓯᒪᔪᑦ ᖃᓪᓗᓈᑎᑑᖓᔪᑦ ᐊᒻᒪᓗ ᐃᓄᒃᑎᑐᑦ.

ᐊᓯᖏᑦ ᑕᕐᕆᔭᒐᒃᓴᐃᑦ ᐃᑲᔪᕈᑎᐅᖕᒥᔪᖅ ᑕᐅᑐᒃᑐᓂ ᖃᓄᖅ ᐅᖃᕆᐊᖃᕐᓂᕐᒥᒃ ᐅᖃᐅᓯᕐᓂᒃ ᐃᓄᒃᑎᑐᑦ, ᐆᑐᓇ ‘ᐅᐱᕐᖔᖅ’, ᓲᖃᐃᒻᒪ ᐅᐱᕐᖔᖅᒥ ᑐᑭᖃᖅᖢᓂ.

ᕼᐋᓐ ᐃᒃᐱᐊᕐᔪᒃᒥ ᓄᒃᑎᓚᐅᕐᓯᒪᔪᖅ ᐃᓕᓐᓂᐊᕐᕕᐊᓗᒃᒥ ᐃᓕᓐᓂᐊᕌᓂᒃᑎᓪᓗᒍ ᐊᒻᒪᓗ ᒫᓐᓇ ᓄᓇᖃᖅᖢᓂ ᓴᔅᑳᑦᓱᐊᓐᒥᑦ.

ᐅᖃᓚᐅᕐᑐᖅ ᑕᒪᒃᑯᓂᖓ ᑐᓴᐅᒪᔾᔪᑎᓕᕆᔾᔪᑎᓂᒃ ᐃᑲᔪᕈᑎᖃᖅᖢᓂ ᐊᑐᒻᒪᕆᖕᓂᕋᖅᖢᓂᐅᒃ, ᐃᓱᒪᒋᓪᓗᒍ ᐃᓄᐃᑦ ᐃᓅᓱᒃᑐᑦ ᐅᓄᕐᓂᖏᓐᓂᒃ, ᐊᒻᒪᓗ ᖃᓪᓗᓈᓂ ᐃᓄᐃᑦ ᐊᖏᕐᕋᖏᓐᓂ ᕿᒪᐃᓯᒪᑯᑖᒃᑐᑦ ᐊᕐᕌᒍᒐᓴᒻᒪᕆᖕᓂᒃ ᐅᕝᕙᓘᓐᓃᑦ ᑎᒍᐊᖅᑖᕆᔭᐅᔪᕕᓃᑦ ᐊᒻᒪᓗ ᐱᕈᖅᓴᖅᓯᒪᙱᖢᑎᒃ ᐅᑭᐅᕐᑕᖅᑐᕐᒥ.

“ᐅᕙᓐᓄ ᐅᖃᓪᓚᓕᕌᖓᑕ ᐅᖃᖃᑦᑕᕐᒪᑕ ᑐᓴᓕᒪᓂᕋᐃᓪᓗᑎᒃ ᐅᕝᕙᓘᓐᓃᑦ ᐊᖏᕐᕋᖏᓐᓂᒃ ᐃᖅᑲᐃᔾᔪᑎᒋᓪᓗᒋᑦ, ᑕᐃᒪᓕ ᑕᒪᓐᓇ ᖁᕕᐊᒋᕙᒃᑕᕐᒪ ᐃᓚᖓ.”

ᕼᐋᓐ ᑕᕐᕆᔭᒐᓕᐊᖏᑦ ᑕᑯᔭᐅᕙᖕᒥᔪᑦ ᖃᓪᓗᓈᓄᑦ ᓄᓇᕐᔪᐊᓕᒫᒥᑦ.

“ᐅᔾᔨᕆᓕᓚᐅᕋᒃᑯᑦ ᑕᕝᕘᓇ ᓴᖅᑭᔮᒐᖃᕐᕕᒃᑯᑦ ᓄᓇᕐᔪᐊᒥᐅᑦ, ᐃᒻᒪᖄᓪᓘᓐᓃᑦ ᑲᓇᑕᒥᐅᑕ ᐃᓄᖕᓂ ᖃᐅᔨᒪᙱᓐᓂᖏᓐᓂᒃ, ᑕᒪᓐᓇ ᖃᐅᔨᑳᓪᓚᖕᓇᓚᐅᕐᓯᒪᔪᖅ.”

“ᐅᓇ ᖁᕕᐊᒋᓛᕆᖃᑦᑕᕐᒥᔭᒐ,” ᐅᖃᖅᑐᖅ. “ᖃᐅᔨᑎᑉᐸᓪᓕᐊᓪᓗᒋᑦ ‘ᑕᒫᓃᓐᓂᑦᑎᓐᓂᒃ.’”

ᕼᐋᓐ ᐅᖃᓚᐅᕐᑐᖅ ᑐᓴᐅᒪᔾᔪᑎᓕᕆᓂ ᐃᓄᒃᑎᑐ ᐊᑐᕈᓐᓇᕐᓂᖓᓂᒃ — ᐃᓕᓐᓂᐊᕈᑎᐅᓂᐊᖅᐸᓪᓘᓐᓃᑦ ᐅᕝᕙᓘᓐᓃᑦ ᑭᐱᙳᐃᔭᐅᑎᑐᐃᓐᓇᐅᓂᕐᒧᑦ — ᑕᒪᓐᓇᓗ ᐊᔾᔨᒌᙱᑦᑑᑎᕈᓘᔭᒃᑯᑦ ᓴᖅᑭᑎᑦᑎᔾᔪᑎᐅᔪᓐᓇᖅᖢᓂ.

“ᐅᓄᕈᓘᔭᖅᑐᓂᒃ ᐃᓕᓐᓂᐊᖅᑎᑦᑎᕙᒃᑐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐱᑕᖃᕐᒪᓐ ᓄᓇᕐᔪᐊᒥᓐ.“

“ᐃᓱᒪᒐᒪᓕ ᑕᒪᐅᓇ ᐱᐅᓛᖑᓪᓗᓂ, ᓱᒃᑲᓛᖑᓪᓗᓂ ᐊᒻᒪᓗ ᐊᑲᐅᓛᖑᓪᓗᓂ ᓴᖅᑭᑎᑦᑎᓇᓱᒃᖢᓂ ᑭᒃᑰᓂᑦᑎᓐᓂᒃ.”

ᐃᖃᓗᖕᓂ ᓄᓇᓕᒃ ᐋᓂ ᐳᓴᒥ ᐃᓄᒃᑕᐅᖅ ᓴᖅᑭᔮᖃᑦᑕᖅᓯᒪᔪᖅ ᐃᓄᖕᓅᖓᔪᓂᒃ “ᐆᒪᔾᔪᑎᒃᓴᐃᑦ” ᑕᕐᕆᔭᒐᒃᓴᓂ ᐱᓕᕆᐊᖃᕐᒥᔪᖅ ᑎᒃᑖᒃᑯᑦ ᐊᒻᒪᓗ ᐃᓐᔅᑕᒍᕌᒻᑯᑦ, ᐊᒻᒪᓗ ᐃᓕᓴᕆᔭᐅᔾᔪᑎᖃᖅᖢᓂ ᐊᕐᓇ ᐃᓄᒃ ᐃᓅᓱᒃᑐᖅ ᐊᕐᕌᒍᒧᑦ ᐅᑯᓇᙵᑦ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.

ᑕᓗᕐᔪᐊᕐᒥᐅᑕᖅ ᓚᓂ ᐊᕿᒋᐊᖅ ᐸᓂᒐᔭᒃ ᐅᖃᐅᓯᖃᖃᑦᑕᕐᒥᔪᖅ ᐃᓅᓯᕆᕙᒃᑕᖓᓂᒃ ᓄᓇᐃᓐᓇᕐᒦᖢᑎᒃ ᐅᕘᓇ ᑎᒃᑖᒃᑯᑦ ᐊᒻᒪᓗ ᓴᖅᑭᑎᑦᑎᕙᒃᖢᓂ ᐅᑯᓇᙶᖅᑐᓂᒃ ᐊᔅᑐᕇᓕᐊᒥᑦ, ᐃᐅᕈᑉᒥᑦ ᐊᒻᒪᓗ ᐅᖓᑖᓂ.

ᓄᓇᕕᒃᒥᐅᑕᖅ ᓰᓇ ᓄᕙᓕᖓ ᐅᓄᕈᓘᔭᖅᑐᓂᒃᑕᐅᖅ ᒪᓕᒃᑕᐅᖃᑦᑕᓕᕐᒥᔪᖅ ᓴᖅᑭᔮᕈᓐᓇᐅᑎᒃᑯᑦ ᐊᒻᒪᓗ ᖃᖓᑦᑎᐊᓵᖅ ᑮᓇᐅᔭᓂᒃ ᐱᕈᖅᑎᑦᑎᓚᐅᖅᖢᓂ $285,000 ᖃᓂᒋᔭᖓᓂ ᐅᕘᓇ GoFundMe ᐸᐃᓯᑯᓂᒃ ᓂᐅᕕᕈᓐᓇᐅᑎᒃᓴᓂᒃ ᓱᕈᓯᕐᓄᑦ ᑕᒫᓂ ᓄᓇᖃᖅᑐᓄᑦ.

ᕼᐋᓐ ᐊᒻᒪᑦᑕᐅᖅ ᑐᓴᐅᒪᔾᔪᑎᓕᕆᓂᒃᑯᑦ ᖃᐅᔨᔭᐅᕙᓪᓕᐊᖕᒥᔪᖅ ᐊᒻᒪᓗ ᐊᕐᕌᓂ ᐅᑭᐅᕐᓯᐅᑎᓂᒃ ᐊᓐᓄᕌᓂᒃ ᓄᑕᕋᖅᓯᐅᑎᓂᒃ ᑲᑎᕐᓱᐃᔪᓐᓇᓚᐅᖅᓯᒪᓪᓗᓂ ᐃᒃᐱᐊᕐᔪᒃᒧᐊᕐᓂᐊᖅᑐᓂᒃ, ᑐᓐᓂᖁᑎᒋᔭᐅᓪᓗᑎᒃ ᑲᓇᑕ ᒎᔅᑯᓐᓂᒃ ᑖᔅᓱᒪ ᓴᖅᑭᔮᖅᑎᑕᖓ ᑕᑯᔭᐅᓚᐅᕐᓯᒪᑎᓪᓗᒍ ᑲᓇᑕᒥᐅᑕᖅ ᑕᕐᕆᔭᒐᕐᓄᑦ ᐱᙳᐊᖅᑎᐅᕙᒃᑐᖅ ᐅᕋᐃᐊᓐ ᕆᓂᑦᔅᒧᑦ.

ᕼᐋᓐᔅ ᐅᖃᓕᒫᒐᓕᐊᒥᓂ ᓴᖅᑭᑎᑦᑎᓵᓚᐅᕐᑐᖅ ᓱᕈᓯᕐᓄᑦ ᐅᖃᓕᒫᒐᕐᒥ ᐊᑎᖃᖅᖢᓂ The Bee, ᐃᙱᐅᓯᐊᖓᓂᙶᖅᓯᒪᓪᓗᓂ.

ᐅᓇ The Bee ᖃᓪᓗᓈᑐᑦ ᑎᑎᕋᖅᓯᒪᓪᓗᓂ ᐊᑐᐃᓐᓇᐅᔪᖅ ᐊᒻᒪᓗ ᐃᓄᒃᑎᑐᑦ ᐅᒃᑑᐱᕆᒥ ᓴᖅᑭᓛᖅᖢᓂ, ᑭᓯᐊᓂᓕ ᐊᑐᐃᓐᓇᐅᓕᐊᓂᒃᑐᖅ ᖃᕋᓴᐅᔭᒃᑯᑦ.

ᑖᓐᓇᓗ ᐊᑐᐃᓐᓇᐅᓕᖅᐸᑦ, ᕼᐋᓐ ᐅᖃᓕᒫᓛᖅᑐᖅ ᐃᓕᓐᓂᐊᖅᑐᓄᑦ ᐊᒻᒪ ᐃᙱᖅᐸᒡᓗᓂ ᓴᖅᑭᔮᕈᓐᓇᐅᑎᑎᒍᑦ.

Share This Story

(0) Comments

Join the Conversation

Your email address will not be published. Required fields are marked *

*