ᑐᓴᒐᒃᓴᓕᐅᖃᑦᑕᕐᓂᑯᑦ ᐃᓚᖏᑦ 2021 ᐊᕐᕌᒍᒥ

ᐃᓚᖏᑦ ᖃᐅᔨᒪᔭᐅᕐᔪᐊᖅᑐᑦ ᐃᓄᐃᑦ ᐊᒻᒪ ᐃᓚᖏᑦ ᐃᓄᑐᐃᓐᓇᐃᑦ ᐱᓕᕆᕈᓘᔭᕐᓯᒪᔪᑦ ᐅᔾᔨᕐᓇᓗᐊᓚᐅᕐᑐᑦ ᐊᕐᕌᒎᕋᑖᖅᑐᒥᓐ

ᐊᓐᑏᐲᑯᓐᓄᑦ ᒪᓕᒐᓕᕆᔨᕐᔪᐊᓄᑦ ᐃᓚᒋᔭᐅᓂᑯ ᒪᒥᓛᖅ ᖃᖅᑲᖅ ᓄᓇᑦᓯᐊᕐᒥ
ᐱᕙᓪᓕᐊᔪᒃᑯᑦ ᑐᓴᒐᒃᓴᓕᐅᕈᑎᐅᓛᖑᓚᐅᕐᑐᖅ ᐊᕐᕌᒎᕋᑖᖅᑐᒥᑦ. (ᐊᔾᔨᓕᐅᕆᔨ ᒫᑕᓕᓐ ᕼᐊᐅᕕᑦ)

By ᑰᕆ ᓚᐅᕌᒃ

For an English version of this story, see Honourable mentions for Newsmaker of 2021

ᐅᓂᒃᑳᓕᐊᖑᓂᑯ ᐅᑯᓂᖓ ᓄᓘᔮᑦ ᓄᓇᖓᓂᒃ ᓴᐳᓐᓂᐊᖅᑎᓂᒃ ᓄᓘᔮᖕᓂᑦ ᓴᕕᕋᔭᒃᓴᒥᒃ ᐅᔭᕋᒃᓯᐅᖅᕕᒃᒥᑦ ᐅᐸᒃᑕᐅᑦᑕᐃᓕᑎᓪᓗᒋ ᑲᓇᑕᒥᐅᑕᓂ ᑕᐅᑐᒃᑕᐅᓗᐊᓚᐅᕐᓯᒪᔪᑦ ᐱᓇᓱᐊᕈᓰᖕᓂ ᒪᕐᕉᖕᓂᒃ. ᐅᔾᔨᕐᓇᓗᐊᓚᐅᕐᓯᒪᔪᖅ ᐊᕐᕌᓂᒃ ᑐᓴᑳᓪᓚᖕᓇᖅᑐᖃᑲᑕᑦᑎᓪᓗᒍ, ᐱᒃᑯᓇᖃᑦᑕᖅᑐᓂᒃ ᐊᒻᒪᓗ ᓈᒻᒪᒃᓴᕐᓇᙱᑦᑐᓂᒃ ᑐᓴᒐᒃᓴᓕᐊᕆᔭᐅᔪᓂᒃ, ᑕᐃᒪᐃᓐᓂᖓᓄᑦ ᓄᓇᑦᓯᐊᒥ ᐱᕙᓪᓕᐊᔪᑦ ᓂᕈᐊᓚᐅᕐᑐᑦ ᑖᔅᓱᒥᖓ ᑐᓴᒐᒃᓴᓕᐊᕆᔭᐅᔪᓂᒃ ᐱᓛᖑᓂᖓᓂᒃ 2021ᒥ.

ᑭᓯᐊᓂᓕ ᐊᓯᖏᓐᓂᒃᑕᐅᖅ ᑐᓴᒐᒃᓴᓕᐅᖃᑦᑕᓚᐅᕐᒥᔪᑦ 2021ᒥ. ᐅᕝᕙᐅᑯᐊ ᐅᖃᐅᓯᐅᖃᑦᑕᓚᐅᕐᑐᑦ ᐃᓱᒪᓇᕐᑐᐃᑦ.

ᒪᒥᓛᖅ ᖃᖅᑲᖅ – ᓄᓇᕗᒧᑦ ᒪᓕᒐᓕᕆᔨᕐᔪᐊᓄᑦ ᐃᓚᒋᔭᐅᓚᐅᕐᓯᒪᔪᖅ ᖃᓄᐃᓕᐅᕈᓘᔭᖃᑦᑕᓚᐅᕐᒥᔪᖅ ᐊᕐᕌᓂᐅᕋᑖᕐᑐᖅ, ᒪᓕᒐᓕᕆᔨᐅᓂᒃᑯᑦ ᐊᒻᒪ ᐃᒻᒥᒃᑰᖓᔪᓂᒃ. ᐅᔾᔨᕈᓱᓕᖅᑎᑦᑎᓚᐅᕐᓯᒪᔪᖅ ᐆᒥᖓ “ᐱᐅᙱᓗᐊᖅᑐᐊᓗᖕᓂᒃ” ᐃᒡᓗᒋᔭᐅᕙᒃᑐᓂᒃ ᓄᓇᕗᒥ ᐅᓂᒃᑳᓕᐅᖅᑎᓪᓗᒍ ᑖᓐᓇᓗ ᐱᒻᒪᕆᐅᓛᖑᓚᐅᕐᓯᒪᓪᓗᓂ ᐊᕐᕌᒎᖕᓂᒃ ᒪᓕᒐᓕᕆᔨᐅᓂᖓᓂᒃ. ᑭᓯᐊᓂᓕᑦᑕᐅᖅ ᑭᐅᓗᒍᑎᖃᓚᐅᕐᓯᒪᓪᓗᓂ ᓕᐳᕈᒃᑯᓐᓄᑦ ᒪᓕᒐᓕᐅᖅᑎᒥ ᓛᐸᑐᐊᒥᐅᑕᒥᒃ ᐃᕚᓐ ᔫᓐᔅᒥᒃ, ᑖᔅᓱᒥᖓ ᓇᓗᓇᐃᖅᓯᖁᔨᑎᓪᓗᒍ “ᐃᓅᓂᖓᓂᒃ.”

ᖃᖅᑲᖅ ᐊᓐᑏᒌᑯᓐᓄᑦ ᓂᕈᐊᒐᒃᓴᐅᒃᑲᓐᓂᕈᓐᓇᓚᐅᕐᑐᖅ ᐊᐃᑉᐸᖓᓂᒃ, ᑭᓯᐊᓂᓕ ᐱᓇᓱᐊᕈᓰᑦ ᐅᓄᓗᐊᙱᑦᑐ ᐅᖃᓕᓚᐅᕐᓯᒪᔪᖅ ᓂᕈᐊᒐᒃᓴᐅᔾᔮᙱᓐᓂᖓᓂᒃ ᓂᕈᐊᕐᓇᐅᓕᕐᐸᑦ. ᑭᖑᓪᓕᖅᐹᒥᒃ ᐅᖃᓪᓚᒃᑎᓪᓗᒍ ᒪᓕᒐᓕᕆᕕᒡᔪᐊᒥᒃ ᐋᑐᕚᒥ ᐅᔾᔨᕈᓱᓕᕐᑎᑦᑎᓚᐅᕐᓯᒪᖕᒥᔪᖅ ᓄᓇᖃᖅᑳᖅᑐᓂᒃ ᒪᓕᒐᓕᕆᔨᐅᖃᑕᐅᔪᓂᒃ, ᐅᖃᖅᖢᓂ ᑐᙵᓱᓚᐅᕐᓯᒪᙱᓐᓂᖓᓂᒃ ᐊᒻᒪᓗ ᒪᓕᒐᓕᕆᕕᒡᔪᐊᒧᑦ ᓴᐳᒻᓐᓂᐊᖅᑎᓄᑦ ᖃᐅᔨᔭᐅᓇᓱᒻᒪᕆᓚᐅᕐᓯᒪᓪᓗᓂ.

ᓘᒃᑖᖅ ᒪᐃᑯᓪ ᐹᑐᓴᓐ – ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᐊᖓᔪᖅᑳᕆᔭᐅᔪᖅ ᓄᓇᕗᒥᑦ ᖃᐅᔨᒪᔭᐅᓂᕐᓴᐅᓕᓚᐅᕐᓯᒪᕗᖅ ᓄᕙᒡᔪᐊᕐᓇᖅ-19ᒥ ᐋᓐᓂᐊᖅᑖᖅᑕᐃᓕᒪᑎᑦᑎᓂᕐᒧᑦ 2021ᒥ. ᑖᓐᓇ ᐊᒻᒪ ᑕᐃᔅᓱᒪᓂ ᓯᕗᓕᐅᕐᑎᐅᓚᐅᖅᑐᖅ ᔫ ᓴᕕᑲᑖᑦ ᑐᓴᒐᒃᓴᓂᒃ ᐅᖃᐅᓯᖃᑲᑕᓚᐅᕐᓯᒪᖕᒪᑎᑦ ᐅᐱᕐᙶᖑᓚᐅᕐᑐᖅ ᖃᓄᐃᑉᐸᓪᓕᐊᔾᔪᑎᖓᓂᒃ ᐋᓐᓂᐊᕕᒡᔪᐊᕐᓇᖅ ᐊᒻᒪᓗ ᓄᓇᕗᒻᒥᐅᓂᒃ ᖃᓄᐃᓕᐅᖁᔨᑲᑕᒃᐸᒃᖢᑎᒃ ᐊᐃᑦᑐᖅᓯᑦᑕᐃᓕᓂᕐᒧ. ᐊᕐᕌᓂ ᐅᖓᓪᓕᐅᓚᐅᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᔾᔨᕆᔭᐅᕙᓗᐊᓚᐅᙱᑦᑐᑦ ᐱᔨᑦᑎᕋᖅᑎᐅᓪᓗᑎᒃ ᑭᒃᑯᓕᒫᓂᒃ ᑭᓯᐊᓂᓕ ᑕᐃᒪᙵᑦ ᓄᕙᒡᔪᐊᕐᓇᖅ-19 ᐱᑕᖃᓕᕐᒪ ᐅᔾᔨᕐᓇᓛᖑᑲᑕᓕᕐᑐᑦ ᑕᐃᒪᓐᓇᓗ ᐹᑐᓴᓐ ᐊᑎᖓ ᖃᐅᔨᒪᔭᐅᓂᕐᓴᐅᓕᖅᖢᓂ ᑭᒃᑯᓕᒫᓄᑦ.

ᐃᖃᓗᐃᑦ ᒪᐃᔭᖓ ᑭᐊᓂ ᐱᐊᓪ – ᐃᖃᓗᖕᓂ ᐊᒃᓱᕈᕐᓇᖅᑐᖅᓯᐅᑲᑕᖃᑦᑕᓚᐅᕐᒪᑕ 2021ᒥ. ᐄᐳᕈᒥ ᐱᒋᐊᖅᖢᓂ ᒪᕐᕉᖕᓂ ᑕᖅᑮᖕᓂᒃ ᓄᕙᒡᔪᐊᕐᓇᖅ-19 ᓄᓇᓕᐸᐅᔭᓂᒃ ᐋᓐᓂᐊᕆᔭᐅᓕᕐᑎᓪᓗᒍ ᒪᑐᔾᔪᑎᐅᓕᓚᐅᕐᓯᒪᖕᒪᑦ ᓄᓇᓕᖕᓄᑦ. ᐅᒃᑑᐱᕆᒥ ᓄᓇᓕᐸᐅᔭᐃᑦ ᓈᒻᒪᙱᓕᐅᕈᑎᖃᓚᐅᕐᒥᔪᖅ ᐃᒪᖃᕐᕕᖓ ᐅᖅᓱᐊᓗᖃᕐᓂᖓ ᖃᐅᔨᔭᐅᑎᓪᓗᒍ ᐃᖃᓗᖕᒥᐅᓂᒃ ᑕᖅᑮᖕᓂᒃ ᒪᕐᕉᖕᓂ ᐃᒪᖃᕐᕕᖏᓐᓂᒃ ᐃᒥᖅᑎᑕᐅᑦᑕᐃᓕᑎᓪᓗᒋᑦ ᐃᒡᓗᖏᓐᓂ.

ᐱᐊᓪ ᐃᓚᐅᓚᐅᕐᒥᔪᖅ ᑮᓇᐅᔭᓂᒃ ᐱᕈᖅᑎᑦᑎᓇᓱᒃᑐᓂᒃ CHEO-ᒧ ᓱᕈᓯᕐᓄᑦ ᐋᓐᓂᐊᕕᐊᓗᒃᒧᑦ ᐋᑐᕚᒥ, ᓄᔭᐃᔭᖅᖢᓂ ᑕᒪᕐᒥᑦᑎᐊᖅ ᐊᒻᒪᓗ ᑕᐃᒪᐃᓕᐅᕈᑎᒋᓪᓗᓂᐅᒃ ᓲᖃᐃᒻᒪ ᑖᓐᓇ ᐋᓐᓂᐊᕕᐊᓗᒃ ᐱᔨᑦᑎᕋᖃᑦᑕᕐᒥᖕᒪᑦ ᐃᖃᓗᖕᒥᐅᓂᒃ ᐊᒻᒪ ᓄᓇᕗᒻᒥᐅᓂᒃ.

ᒐᕙᓇ ᔭᓄᕈᓪ ᒥᐊᓕ ᓴᐃᒪᓐ – ᖃᐅᔨᒪᔭᐅᑦᑎᐊᖅᑐᖅ ᐃᓄᒃ ᓯᕗᓕᐅᖅᑎᐅᕙᒃᑐᖅ ᑰᔾᔪᐊᕐᒥᐅᑕᖅ ᓴᐃᒪᓐ ᓂᕈᐊᕆᔭᐅᓚᐅᕐᓯᒪᖕᒪᑦ ᓈᒻᒪᓈᖅᖢᓂ ᑲᓇᑕᒥ ᓴᐳᔾᔨᓯᒪᓂᕐᒥᒃ ᓈᒻᒪᙱᓕᐅᕈᑎᐅᓯᒪᔪᓄᑦ ᐅᓇ ᔫᓕ ᐸᐃᔭᑦ ᐃᓇᖏᖅᑕᖓ ᓄᖅᑲᓚᐅᕐᓯᒪᑎᓪᓗᒍ.

ᓈᒻᒪᓈᕐᓯᒪᓚᐅᕐᑐᖅ ᑲᓇᑕᒧᑦ ᓯᕗᓪᓕᖅᐹᒥᒃ ᓄᓇᖃᖅᑳᖅᑐᒥᒃ ᒐᕙᓇ ᔭᓄᕈᖃᓕᕐᓂᖓ. ᑲᓇᑕᒥᐅᑕ ᑐᓴᑲᑕᓕᓚᐅᕐᓯᒪᖕᒪᑕ ᐅᓄᕐᑐᒻᒪᕆᐊᓗᖕᓂ ᓄᓇᖃᖅᑳᖅᑐ ᓱᕈᓰ ᐃᓗᕕᖏᓐᓂᒃ ᓇᓂᓯᑲᑕᓕᖅᑎᓪᓗᒍ ᐃᓕᓐᓂᐊᕆᐊᕐᕕᕕᓃᑦ ᐃᓂᒋᕙᓚᐅᖅᑕᖏᓐᓂᒃ. ᑕᕝᕙᓂ ᐊᕐᕌᒍᒥ ᐅᓇ “ᒪᒥᓴᕐᓂᖅ” ᑭᒃᑯᓕᒫᓄᑦ ᐅᖃᐅᓯᐅᑲᑕᒃᑎᓪᓗᒍ, ᓴᐃᒪᓐ ᑕᒪᑐᒨᓇ ᐊᐅᓚᑦᑎᔪᒥᓇᑦᑎᐊᓚᐅᕐᑐᖅ.

ᐸᐅᓗᓯ ᐊᕿᐊᕈᖅ – ᐃᖅᑲᓇᐃᔮᖓᓂ ᓄᖅᑲᖅᖢᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᖓᔪᖅᑳᖑᓂᕐᒥᒃ, ᐊᖓᔪᖅᑳᓪᓚᕆᐅᓐᓇᖅᑐᒥᒃ ᓄᓇᕗᒥᑦ ᓂᕈᐊᒐᒃᓴᐅᓂᐊᓗᐊᒧᑦ ᒪᓕᒐᓕᕆᔨᐅᓂᕐᒧᑦ ᓄᓇᕗᒥᑦ. ᓂᕈᐊᖅᑕᐅᓚᐅᕐᓯᒪᔪᖅ. ᐊᒻᒪᓗ ᐱᓇᓱᓕᓚᐅᕐᓯᒪᓪᓗᓂ ᔫ ᓴᕕᑲᑖᖅ ᐃᓂᒋᕋᑖᓚᐅᕐᑕᖓᓂ ᐊᒻᒪᓗ ᓵᓚᖃᕆᓪᓗᓂ ᑖᔅᓱᒥᖓ ᐊᒻᒪ ᖁᐊᓴ ᑯᓱᒐᖅᒥᒃ ᐆᒧᖓ ᓄᓇᕗᒥᑦ ᒐᕙᒪᒃᑯᓐᓄᑦ ᐱᓕᕆᐊᒻᒪᕆᐅᕙᒃᑐᖅ ᐊᒻᒪ ᓵᓚᒃᓴᕆᓪᓗᓂ.

ᓘᕆ ᐃᓪᓚᐅᖅ – ᐃᖃᓗᖕᓂ ᓗᐊᐃᔭ 2021ᒥ ᐱᒋᐊᕈᑎᖃᓚᐅᕐᓯᒪᔪᖅ ᓗᐊᐃᔭᒋᔭᐅᓪᓗᓂ ᓄᓘᔮᑦ ᓄᓇᖓᓂᒃ. ᓴᐳᓐᓂᐊᖅᑎᓄᑦ – ᓄᓇᑦᓯᐊᒥ ᐱᕙᓪᓕᐊᔪᓄᑦ ᑐᓴᒐᒃᓴᓕᐊᓂᒃ ᐱᓛᖑᓚᐅᖅᖢᓂ ᐊᕐᕌᒎᕋᑖᕐᑐᒥ – ᐊᒻᒪᓗ ᑭᖑᓂᐊᒍᑦ ᓄᓇᕗᒥᐅᓕᒫᓂᒃ ᑭᒡᒐᖅᑐᐃᔨᙳᖅᖢᓂ ᒪᓕᒐᓕᕆᕕᒡᔪᐊᕐᒥᒃ. ᐃᓪᓚᐅᖅ ᓂᕈᐊᕐᑕᐅᓚᐅᕐᒪᑦ ᓯᑎᐱᕆᐅᑎᓪᓗᒍ ᒐᕙᒪᑐᖃᒃᑯᑦ ᓂᕈᐊᕐᓇᖃᓕᖅᑎᓪᓗᒋᑦ. ᐊᓐᑏᐲᑯᓐᓄᑦ ᓂᕈᐊᒐᒃᓴᐅᓕᓚᐅᕐᓯᒪᔪᖅ ᓇᓚᐅᑦᑖᕐᓂᒃᑯᑦ ᓂᕈᐊᒐᒃᓴᐅᖃᑕᐅᔪᒪᔪᕐᓗ.

ᐃᓪᓚᐅᖅ ᒪᓕᒐᓕᕆᔨᕐᔪᐊᖑᓂᕐᒥᓂᒃ ᐅᔾᔨᕆᔭᐅᒻᒪᕆᓕᓚᐅᕐᑐᖅ ᐊᓐᑏᐲᑯᓐᓄᑦ, ᑖᒃᑯᓄᖓ ᓄᓇᖃᖅᑳᖅᑐᓕᕆᓂᕐᒥᒃ ᐱᓕᕆᐊᖃᖅᑐᓂᒃ ᖃᐅᔨᒪᔨᑕᕆᔭᐅᓂᐊᕐᓗᓂ, ᐃᓄᒃᑎᑐᑦ ᐅᖃᓪᓚᒃᖢᓂ ᒪᓕᒐᓕᕆᕕᒡᔪᐊᕐᒥᒃ ᐊᒻᒪᓗ ᓕᐳᕈᓪ ᒐᕙᒪᒃᑯᓐᓂᒃ ᐱᓕᕆᐊᖃᓕᖁᔨᓪᓗᓂ ᐅᑭᐅᕐᑕᖅᑐᕐᒥ ᐃᒡᓗᓕᕆᓂᕐᒥᒃ.

ᔫᓴ ᑕᒃᐹᓂ – ᐅᓂᒃᑳᓕᐊᖑᔪᓂᒃ ᐊᒻᒪ ᖁᕕᐊᓇᕐᑐᒥᒃ ᐅᑯᓇᙵ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᒪᓕᒐᓕᕆᔨᓂᙶᓚᐅᙱᑦᑐᖅ. ᔫᓴᕝ ᑕᒃᐹᓂ, 13-ᓂ ᐅᑭᐅᓕᒃ ᐃᖃᓗᖕᓂ ᓄᓇᖃᖅᑐᖅ ᐸᐃᓯᑯᕕᓂᕐᓂᒃ ᓱᕋᒃᓯᒪᔪᓂᒃ ᓴᓇᖃᑦᑕᖅᖢᓂ ᖁᕕᐊᒋᓪᓗᓂᐅᒃ ᐊᒻᒪᓗ ᐋᖅᑭᒃᑳᖓᒥᒋᑦ ᓱᕈᓯᕐᓄᑦ ᐱᔭᐅᑎᓕᖅᐸᒃᖢᓂᒋᑦ. ᐅᖃᓕᒫᖃᑦᑕᖅᑐᑦ ᑖᔅᓱᒥᖓ ᑐᓴᕐᓂᕈᓱᑦᑎᐊᓚᐅᕐᑐᑦ ᓈᒻᒪᙱᓕᐅᕈᑎᕈᓘᔭᖅᑕᖃᖅᐸᒃᑎᓪᓗᒍ ᐊᕐᕌᒎᓵᖅᑐᒥᒃ.

ᓰᓇ ᓄᕙᓕᙵ – ᑎᒃᑖᒃ (TikTok) 2021ᒥ ᑕᑯᔭᐅᖃᑦᑕᕈᓘᔭᓕᓚᐅᕐᒥᖕᒪᑦ ᐊᒻᒪᓗ ᐅᓇ ᓄᓇᕕᒻᒥᐅᑕᖅ ᑎᑕᒃᑎ ᑕᑯᔭᐅᖃᑦᑕᒻᒪᕆᓕᓚᐅᖅᖢᓂ ᑐᓴᐅᒪᔾᔪᑎᓕᕆᓂᒃᑯᑦ. ᓄᓇᕕᒻᒥᐅᑕ ᑎᑕᒃᑎ 1.6 ᒥᓕᐊᓐᓄᑦ ᓴᖅᑭᔮᒐᕆᔭᖏᑦ ᑕᑯᔭᐅᖃᑦᑕᓚᐅᕐᑐᑦ ᐅᖃᐅᓯᖃᑲᑕᖅᖢᓂ ᐃᓄᐃᑦ ᐃᓕᖅᑯᓯᖏᓐᓂᒃ. ᑕᐃᒪᓐᓇᓗ ᑕᑯᔭᐅᖃᑦᑕᕐᓂᖓᓂᒃ ᐊᑐᖅᖢᓂ ᑮᓇᐅᔭᓂᒃ ᐱᕈᕐᓴᐃᓕᓚᐅᕐᓯᒪᔪᖅ ᐅᕘᓇ GoFundMe ᐊᒻᒪᓗ ᑲᑎᑦᑎᔪᓐᓇᓚᐅᕐᓯᒪᓪᓗᓂ $300,000-ᓂ ᐸᐃᓯᑯᖅᑖᕈᑎᒃᓴᓂᒃ ᓱᕈᓯᓕᒫᓄᑦ ᐳᕕᕐᓂᖅᑑᒥ. ᖃᓄᐃᓕᐅᕈᑎᖓ ᐃᓚᒋᔭᐅᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᓂᒃᑳᓕᐊᕆᔭᐅᔪᓂᒃ 2021ᒥ ᐃᓄᖕᓂᒃ – ᐱᓗᐊᖅᑐᒥᓐ ᐊᕐᓇᓂᒃ – ᐊᓂᒍᐃᔪᓐᓇᑦᑎᐊᖅᑐᓂᒃ ᑐᓴᐅᒪᔾᔪᑎᓕᕆᓂᒃᑯᑦ ᐊᑐᖢᑎᒃ ᐅᖃᐅᓯᖏᓐᓂᒃ ᑐᑭᓯᔪᓐᓇᖅᓯᑎᑦᑎᓂᕐᒥᒃ, ᐃᓕᖅᑯᓯᖏᓐᓂᒃ ᐊᒻᒪ ᐊᑐᖅᑕᐅᖃᑦᑕᐃᓐᓇᖅᐸᒃᑐᓂᒃ.

Share This Story

(0) Comments

Join the Conversation

Your email address will not be published. Required fields are marked *

*