ᑕᒪᕐᒥ ᐃᒡᓖᑦ ᐃᓐᓇᒃᑯᕕᒃᒥ ᐃᓄᖃᓕᕐᑐᑦ

For an English version of this story, please see: All beds filled at Iqaluit elders home.

ᑕᒪᕐᒥᑦᑎᐊᖅ 7 ᐃᒡᓖᑦ ᐃᖃᓗᐃᑦ ᐃᓐᓇᒃᑯᕕᒃᒥ ᐃᓄᖃᓕᕐᓂᐊᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥ, ᐅᖃᕐᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᓄᓇᕗᒥᑦ ᒪᓕᒐᓕᕆᕕᒡᔪᐊᕐᒥ ᒫᔅᓯ 15-ᖑᑎᓪᓗᒍ.

ᐅᓇ ᐃᓐᓇᒃᑯᕕᑦ ᒪᑐᐃᒃᑲᓐᓂᓚᐅᕐᑐᖅ ᐃᓄᒋᓚᐅᕐᑕᖏᓐᓄᑦ ᕕᕝᕗᐊᕆ ᐱᒋᐊᓕᓵᖅᑎᓪᓗᒍ ᐅᓇ ᓄᕙᒡᔪᐊᕐᓇᖅ-19 ᐋᓐᓂᐊᕆᔭᐅᑲᑕᓕᕐᑎᓪᓗᒍ ᐊᒻᒪᓗ ᓄᑖᙳᕆᐊᖅᑎᑦᑎᔭᕆᐊᖃᕐᓂᖏᓐᓄᑦ ᒪᑐᔭᐅᓚᐅᕐᓯᒪᓚᐅᕐᑎᓪᓗᒍ ᑕᖅᑭᓂᒃ 9-ᓂᒃ.

ᒪᐃᓐ ᐅᖃᓚᐅᕐᑐᖅ ᒫᓐᓇ ᐃᓄᒋᔭᐅᔪᑦ ᐃᓚᖏ ᐅᑎᖅᖢᑎᒃ ᐊᒻᒪ ᓄᑖᓂᒃ ᐃᓐᓇᖃᓕᖅᖢᑎᒃ.

ᒪᐃᖑᑎᓪᓗᖑ 6-ᓂ ᐃᓐᓇᑐᖃᕐᓂᒃ ᓄᒃᑎᖅᑎᓚᐅᕐᓯᒪᔪᑦ, ᑎᓴᒪᑦ ᐊᒻᐸᓯ ᕗᐃᐊᔅᑦ ᐃᓐᓇᑐᖃᒃᑯᕕᒃᒧᑦ ᐋᑐᕚᒥ ᐊᒻᒪ ᒪᕐᕉᒃ ᐊᓯᖏᓐᓄᑦ ᐃᓐᓇᒃᑯᕕᒃᓄᑦ ᓄᓇᕗᒥᑦ.

ᐅᑎᕆᐊᖃᕐᕕᖓᑦ ᑭᖑᕙᕆᐊᖅᑕᐅᓚᐅᕐᓯᒪᖕᒪᑦ ᓄᑖᙳᕆᐊᖅᑕᐅᓕᕐᓂᖓᓄᑦ ᑕᖅᑭᖅ ᐊᓂᒍᖅᑎᓪᓗᒍ ᐋᓐᓂᐊᕕᒡᔪᐊᕐᓇᖃᑲᑕᓕᖅᑎᓪᓗᒋ ᐊᒻᒪᓗ ᓄᑖᒥ ᐊᐅᓚᑦᑎᔨᖃᓕᖅᖢᑎᒃ ᐅᑯᓂᖓ ᐱᒪᒃᓯᕐᕕᒃ ᑯᐊᐳᕇᓴᓐᑯᓐᓂᒃ.

“ᐅᓇ ᐃᓄᖕᓄᑦ ᓇᖕᒥᓂᕆᔭᐅᔪᖅ ᑲᒻᐸᓂ ᖃᐅᔨᒪᔭᐅᑦᑎᐊᓕᕐᑐᖅ ᐊᐅᓚᑦᑎᔪᓐᓇᑦᑎᐊᕐᓂᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖏᓐᓂᒃ ᓄᓇᕗᒥᑦ. ᐃᓱᒪᒐᒪᓕ ᐃᓐᓇᑐᖃᐃᑦ ᑲᕝᕙᓃᑦᑐᑦ ᑲᒪᒋᔭᐅᑦᑎᐊᕐᓂᖏᓐᓂᒃ,” ᒪᐃᓐ ᐅᖃᕐᑐᖅ.

ᒪᐃᓐ ᐅᖃᒃᑲᓐᓂᓚᐅᕐᑐᖅ ᓄᑖᙳᕆᐊᖅᑕᐅᓂᐅᑉ ᒥᒃᓵᓄᑦ ᐅᑯᓂᖓ ᐃᓚᖃᖅᖢᑎᒃ ᓄᑖᙳᕆᐊᖅᑕᐅᓪᓗᓂ ᓂᕿᓕᐅᕐᕕᒃ, ᐊᖏᒡᓕᒋᐊᖅᑕᐅᓪᓗᓂ ᐃᓄᖃᕐᕕᒃ, ᓄᑖᒥ ᐅᖅᑰᓴᐅᑎᖃᓕᖅᖢᑎᒃ ᐊᒻᒪᓗ ᐊᒥᐊᕐᑕᐅᓪᓗᓂ ᑖᒃᑯᐊᓗ ᐱᐅᓯᕚᓪᓕᕈᑎᐅᓇᔭᖅᖢᑎᒃ ᐃᓅᓯᖏᓐᓄᑦ ᑕᕝᕙᓂ ᐃᒡᓗᖃᕐᑐᓂᒃ.

ᑭᓯᐊᓂᓕ ᒪᐃᓐ ᐅᖃᕐᒥᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ “ᒫᓐᓇ ᖁᕝᕙᓯᖕᓂᕐᓴᒃᑯᑦ ᐱᓕᕆᐊᖃᕈᓐᓇᙱᓐᓂᕋᖅᖢᓂᒋᑦ ᓄᓇᕗᒥᑦ” ᐃᓐᓇᒃᑯᕕᓕᕆᓂᒃᑯᑦ.

ᐹᒥᓚ ᒍᕉᔅ, ᒥᓂᔅᑕ ᑲᒪᒋᔭᖃᕐᑐᖅ ᓄᓇᕗᑦ ᐅᑭᐅᕐᑕᖅᑐᕐᒥ ᓯᓚᑦᑐᖅᓴᕐᕕᒃᒥ, ᐅᖃᓚᐅᕐᑐᖅ ᒫᔅᓯ 15-ᒥ ᐅᖃᐅᓯᖏᓐᓂᒃ ᐅᓇ ᐃᓕᓐᓂᐊᕐᕕᐅᑉ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓕᓐᓂᐊᕐᐸᓪᓕᐊᔪᑦ ᐃᓐᓇᑐᖃᕐᓂᒃ ᑲᒪᒋᔭᖃᖅᑎᑕᐅᑲᑕᖕᓂᖏᓐᓂᒃ.

“ᐊᔪᕈᓃᕐᓴᖅᓯᒪᔪᓂᒃ ᐃᓄᖕᓂᒃ ᐊᒻᒪ ᓄᓇᕗᒥᐅᑕᓂᒃ ᓄᓇᓕᖕᓂ ᐱᒻᒪᕆᐊᓘᖕᒪ ᑲᒪᒋᔭᖃᑲᑕᖕᓂᕐᒧᑦ ᐱᓕᕆᐊᖃᕐᓂᒃᑯᑦ,” ᐅᖃᖅᑐᖅ.