ᑕᖅᑭᖅ ᐊᓂᒍᖅᑎᓪᓗᒍ ᓄᓇᕗᒥᑦ ᒐᕙᒪᒃᑯᑦ ᐅᖃᕈᓐᓇᙱᑦᑐᑦ ᐃᓐᓇᑐᖃᐃᑦ ᐃᖃᓗᖕᓄᑦ ᖃᑯᒍ ᐅᑎᕈᓐᓇᕐᓂᐊᕐᓂᖏᓐᓂᒃ

ᑕᖅᑭᐅᓚᐅᖅᑐᒥ ᐃᓐᓇᑐᖃᕐᓂᒃ 6-ᓂᒃ ᓅᑎᑦᑎᐊᓪᓚᓚᐅᖅᖢᑎᒃ ᐃᖃᓗᖕᓂ ᐃᓐᓇᑯᕕᒃᒥᓐ, ᓱᓕ ᖃᐅᔨᒪᙱᑦᑐᑦ ᖃᖓ ᐅᕐᓂᐊᕆᐊᒃᓴᖏᓐᓂᒃ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᖅᑎᒋᔭᐅᔪᖅ ᐅᖃᓚᐅᕐᑐᖅ.

ᒪᐃ 8-ᖑᑎᓪᓗᒍ, ᑎᓴᒪᓂᒃ ᐃᓐᓇᑐᖃᕐᓂᒃ ᓄᒃᑎᖅᑕᐅᔪᖃᓚᐅᖅᓯᒪᖕᒪᑦ ᐊᒻᐸᓯ ᕗᐊᔅᑦ ᐃᓐᓇᑐᖃᕐᓄᑦ ᐃᒡᓗᒧᑦ ᐋᑐᕚᒥ ᐊᒻᒪᓗ ᒪᕐᕉᒃ ᐊᓯᐊᓅᖅᑕᐅᓪᓗᑎᒃ ᓄᓇᕗᒥ. ᓄᓇᕗᒦᑎᑕᐅᔫᑉ ᐱᖃᑖ ᐃᓚᖏᓐᓄᐊᖅᑕᐅᓚᐅᖅᖢᓂ.

ᓅᑕᐅᔾᔪᑎᒋᓚᐅᖅᓯᒪᔭᖓᓕ ᐅᓇ ᓄᕙᒡᔪᐊᕐᓇᖅ-19 ᐊᐃᑦᑑᑎᐅᖁᔭᐅᙱᖢᓂ ᑖᒃᑯᓄᖓ ᑖᓐᓇ ᐋᓐᓂᐊᕆᔭᐅᑲᑕᓕᖅᑎᓪᓗᒍ ᐃᖃᓗᖕᓂ ᐅᐱᕐᖔᖅ.

ᔫᓂ 7-ᒥ ᑯᓱᒐᖅ ᑐᓴᒐᒃᓴᓕᐅᖅᑎᓄᑦ ᐅᖃᓚᐅᖅᑐᖅ ᐃᓐᓇᑐᖃᐃᑦ ᐃᖃᓗᖕᓄᑦ ᐅᑎᔾᔮᙱᓐᓂᕋᖅᖢᓂᒋᑦ ᑭᓯᐊᓂ ᐃᓐᓇᒃᑯᕕᒃ ᓴᓇᔭᐅᑲᓐᓂᕐᓂᖓ ᐱᐊᓂᒃᑕᐅᒃᐸᑦ ᐊᒻᒪᓗ ᒐᕙᒪᒃᑯᑦ ᓄᑖᓂᒃ ᐊᐅᓚᑦᑎᔨᒃᓴᖃᓕᕈᑎᒡᓗ ᑖᔅᓱᒥᖓ.

“ᐅᑯᐊ ᓄᑖᑦ ᐊᐅᓚᑦᑎᔨᐅᓂᐊᖅᑐᑦ ᐃᓂᖏᓐᓃᑦᑕᕆᐊᖃᕐᓂᐊᕐᒪᑕ ᐊᒻᒪᓗ ᐃᖅᑲᓇᐃᔭᖅᑎᖏᑦ ᐊᔪᕈᓐᓃᖅᓴᖅᓯᒪᑦᑎᐊᕐᓗᑎᒃ,” ᐅᖃᖅᑐᖅ. “ᑖᒃᑯᐊ ᐃᓂᖃᑦᑎᐊᓚᐅᑲᖕᓂᖏᓐᓂᒃ ᑕᒪᒃᑯᐊ ᐋᖅᑭᒃᓱᑦᑎᐊᓚᐅᕐᓚᕗᑦ ᒫᓐᓇ.”

ᐊᐱᕆᔭᐅᑎᓪᓗᒍ ᑖᒃᑯᐊ ᐃᓐᓇᑐᖃᐃᑦ ᐃᖃᓗᖕᓃᖏᓐᓇᕈᓐᓇᓚᐅᕆᐊᒃᓴᖏᓐᓂᒃ, ᑯᓱᒐᖅ ᐅᖃᓚᐅᕐᑐᖅ “ᐅᓗᕆᐊᓇᙱᑦᑐᒥ ᐃᓂᒃᓴᖃᙱᒻᒪᑕ ᑕᒫᓂ ᒫᓐᓇᐅᔪᖅ,” ᐊᒻᒪᓗ ᐅᑎᕐᕕᒃᓴᖏ ᖃᒡᓕᕙᓪᓕᐊᖏᓐᓇᕐᓂᕋᖅᖢᓂᐅᒃ.

ᒐᕙᒪᒃᑯ ᐱᓕᕆᑎᑦᑎᔾᔪᑎᖃᓚᐅᙱᑦᑐᑦ ᐊᐅᓚᑎᔨᐅᓂᐊᖅᑐᓄᑦ ᐃᓐᓇᒃᑯᕕᖕᒥ ᑖᒃᑯᐊ ᐃᓐᓇᑐᖃᐃᑦ ᓅᑕᐅᑎᓪᓗᒋᑦ, ᓲᖃᐃᒻᒪ ᐊᖏᕈᑎᑎᒍᑦ ᐱᓕᕆᑎᑦᑎᔾᔪᑎᖓ ᐅᑯᓂᖓ ᐸᐃᕆᔩᑦ ᑎᒍᒥᐊᖅᑎᒃᑯᑦ ᐃᓱᓕᓯᒪᓚᐅᖅᓯᒪᖕᒪᑕ ᐱᓇᓱᐊᕈᓯᕐᓂᒃ ᑕᓪᓕᒪᓂᒃ ᓯᕗᓂᐊᒍᑦ.

ᐊᖏᖃᑎᒋᒍᑎᑎᒍᑎ ᐱᓕᕆᔨᒃᓴᐅᓂᐊᖅᑐᒥ ᒫᓐᓇ ᐅᖃᓪᓚᖃᑎᖃᑲᑕᓕᖅᑐᑦ.

“ᓄᓇᕗᒥᑦ ᒐᕙᒪᒃᑯᑦ ᐅᖃᓪᓚᖃᑎᖃᑲᑕᒃᑐᑦ 100 ᐳᓴᓐᑎᒥ ᐃᓄᖕᓂ ᓇᖕᒥᓂᕆᔭᐅᔪᒥᒃ ᑲᒻᐸᓂᒥ ᐱᓕᕆᐊᖃᕈᓐᓇᑦᑎᐊᖅᑐᓂᒃ ᐊᒻᒪᓗ ᑲᒪᒋᔭᖃᕈᓐᓇᑦᑎᐊᖅᑐᓂᒃ ᐃᓐᓇᑐᖃᕐᓂᒃ,” ᑎᑎᕋᓚᐅᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᖅᑎᖓ ᑎᓇᕇ ᓴᒧᕕᐅᓪ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᓴᒧᕕᐅᓪ ᐅᖃᕈᒪᓚᐅᙱᑦᑐᖅ ᑲᒻᐸᓂᐅᑉ ᐊᑎᖓᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓪᓚᖃᑎᒋᔭᖓᓂᒃ.

ᐅᑎᕐᓂᐊᖅᑐᑦ ᖃᔅᓯᐅᓂᐊᕐᓂᖏᑦ ᖃᐅᔨᒪᐅᙱᑦᑐᑦ, ᑖᓐᓇ ᐅᖃᖅᑐᖅ, ᒪᓕᖕᓂᐊᕐᒪᑕ ᖃᓄᖅ ᑲᒪᒋᔭᐅᔾᔪᑎᒋᔭᐅᔭᕆᐊᓕᖕᓂᒃ ᑖᒃᑯᓄᖓ ᐃᓐᓇᑐᖃᕐᓄᑦ.