ᑯᐃᓐ ᑭᒡᒐᖅᑐᖅᑎᖓᑕ ᐅᖃᓪᓚᕕᒥᓂᑦ ᐅᖃᐅᓯᖏᑦ “ᐊᕐᕌᓂ ᐅᖃᐅᓯᐅᓚᐅᖅᑐᑦ ᐊᔾᔨᑐᐃᓐᓇᕆᓚᐅᕐᒪᒋᑦ,” ᐅᖃᖅᓱᓂ ᓄᓇᕕᒃᒧᑦ ᒥᓂᔅᑕᕆᔭᐅᔪᖅ ᓯᐅᓪᕕ ᐸᕉᐱ

ᐳᓛᒃ ᑯᐃᐸᒃᑯᐊ ᒥᓂᔅᑕᖓᑦ ᖁᕝᕙᖅᑎᑦᑎᒋᐊᕐᒥᔪᖅ ᒥᐊᕆ ᓴᐃᒪᓐ ᐅᖃᓪᓚᒍᖕᓇᕐᓂᖓᓂᒃ ᐱᖓᓱᓂᒃ ᐅᖃᕈᓯᖅᑎᒍᑦ ᐅᖃᓪᓚᒃᓱᓂ

ᓯᐅᓪᕕ ᐸᕉᐱ, ᐳᓛᒃ ᑯᐃᐸᒃᑯᐊ ᒥᓂᔅᑕᖓᑦ ᐊᐱᑎᐱ-ᐸᐃ-ᔭᐃᒻᔅ-ᓄᓇᕕᒃ-ᐄᔪ-ᑯᓐᓄᑦ, ᓄᓇᑦᓯᐊᖅᒥ ᐱᕙᓪᓕᐊᔪᓄᑦ ᐅᖃᐅᔾᔨᓚᐅᕐᐳᖅ ᒍᐃᒍᐃᑎᑐᑦ ᐊᐱᖅᓱᖅᑕᐅᒐᒥ ᐱᔾᔪᑎᒋᓪᓗᒍ ᑕᕝᕙᓂ ᐅᑭᐅᑦᑎᓐᓂ ᑯᐃᓐ ᑭᒡᒐᖅᑐᖅᑎᖓᑕ ᐅᖃᓪᓚᐅᓯᕆᓚᐅᖅᑕᖏᑦ ᐅᖃᖅᓱᓂ “ᐊᕐᕌᓂ ᐅᖃᐅᓯᐅᓚᐅᖅᑐᑦ ᐊᔾᔨᑐᐃᓐᓇᕆᓚᐅᕐᒪᒋᑦ.” (File photo)

By ᔨᐊᕝ ᐱᓕᑦᑎᐄ

For an English version of this story, see Throne speech offered ‘nothing more than last year,’ says Nunavik MP Sylvie Bérubé

ᓯᐅᓪᕕ ᐸᕉᐱ, ᒥᓂᔅᑕᕆᐅᔪᖅ ᐊᐱᑎᐱ-ᐸᐃ-ᔭᐃᒻᔅ-ᓄᓇᕕᒃ-ᐄᔪ-ᑯᓐᓄᑦ, ᐱᓇᓱᐊᕈᓯᐅᓚᐅᖅᑐᒥ ᑯᐃᓐ ᑭᒡᒐᖅᑐᖅᑎᖓᑕ ᐅᖃᓪᓚᕕᒥᓂᑦ ᐅᖃᐅᓯᕆᔭᖏᑦ ᒥᑭᑦᑐᒻᒪᕆᖕᒥᒃ ᑭᓯᐊᓂ ᓄᑖᓂᒃ ᐱᔾᔪᑎᖃᓚᐅᕐᒪᑕ ᐃᓱᒪᒋᓪᓗᒋᑦ ᓯᕗᕐᖓᓂ ᐅᖃᓪᓚᐅᓯᕆᔭᐅᓚᐅᖅᑐᑦ ᒐᕙᒪᒃᑯᑦ ᑲᑎᒪᕕᒡᔪᐊᕐᕕᖓᓂᑦ.

ᐳᓛᒃ ᑯᐃᐸᒃᑯᐊ-ᑯᓐᓄᑦ ᐃᓚᒋᔭᐅᔪᖅ ᓂᕈᐊᖅᑕᐅᓯᒪᓕᒃᑲᓐᓂᓚᐅᕐᑐᖅ ᑐᒡᓕᒋᔭᖓᓂᒃ ᓯᑦᑎᐱᕆᐅᑎᓪᓗᒍ, ᐅᖃᐅᓯᖃᓚᐅᕐᐳᖅ ᓄᓇᑦᓯᐊᕐᒥ ᐱᕙᓪᓕᐊᔪᑦ ᑐᓴᒐᒃᓴᓕᕆᔨᖏᓐᓄᑦ ᓕᐳᕈᓪ ᒐᕙᒪᖓᑕ ᐅᖃᐅᓯᒃᓴᖏᑦ ᐱᑕᖃᓚᐅᖖᒋᒻᒪᑕ ᓄᑖᓂᒃ ᒪᓕᒐᖁᑎᐅᓕᕈᓐᓇᖅᑐᓄᑦ ᐃᓱᒪᒋᔭᐅᓕᖅᓯᒪᔪᓂᒃ ᐱᓕᕆᐊᕆᔭᐅᓕᖁᓪᓗᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐅᑭᐅᖅᑕᖅᑐᒥᐅᓂ ᐃᒡᓗᑭᒃᓴᓗᐊᕐᓂᕐᓄᑦ ᑐᐊᕕᐅᕐᓇᖅᓯᓯᒪᔪᓄᑦ, ᐃᓱᒪᒃᑯᑦ ᐋᓐᓂᐊᖃᓕᖅᑕᐃᓕᒪᓂᕐᒧᑦ ᐊᒻᒪᓗ ᖁᑭᐅᑎᓂᒃ ᐊᑐᖅᓱᑎᒃ ᐋᓐᓂᖅᑎᕆᓂᐅᕙᒃᑐᓄᑦ ᑐᕌᖓᔪᑦ.

“ᐊᕐᕌᓂ ᐅᖃᓪᓚᐅᓯᕆᔭᐅᓚᐅᖅᑐᑦ ᐃᓚᒋᐊᖅᑕᐅᓯᒪᓂᖃᓚᐅᖖᒋᒻᒪᑕ ᑕᐃᒪ ᐱᓕᕆᓂᖃᖅᑎᓪᓗᑕ ᓂᕈᐊᖅᖠᓂᖃᖅᑎᑦᓯᓂᐊᓵᖅᑎᓪᓗᒋᑦ,” ᐅᖃᓚᐅᕐᐳᖅ ᒍᐃᒍᐃᑎᑐᑦ ᐊᐱᖅᓱᖅᑕᐅᒐᒥ. “ᑲᔪᓯᑎᑦᑎᓯᒪᓚᐅᕋᑦᑕ ᐱᒻᒪᕆᐅᑎᐅᓪᓗᑎᒃ ᑎᑎᖅᑲᖁᑎᓂᒃ ᐊᒻᒪᓗ ᐱᒻᒪᕆᐅᑎᐅᓪᓗᑎᒃ ᒪᓕᒐᖁᑎᒃᓴᓂᒃ ᑲᔪᓯᑎᑕᐅᓯᒪᔭᕆᐊᖃᖅᑕᑦᑎᓐᓂᒃ, ᑕᒪᒃᑯᐊᓗ ᓄᖅᑲᖅᑎᑕᐅᓯᒪᓕᓚᐅᕐᒪᑕ.”

ᑕᒪᑐᒪᓂ ᒐᕙᒪᒃᑯᑦ ᑲᑎᒪᕕᒡᔪᐊᕐᕕᖓᓂ ᑲᑎᒪᔾᔪᑎᐅᔪᓂ, ᐸᕉᐱ ᓄᑖᒧᑦ ᐳᓛᒃ ᑯᐃᐸᒃᑯᐊ-ᑯᓐᓄᑦ ᐱᓕᕆᐊᖃᖅᑎᒋᔭᐅᓕᕐᓂᕐᒥᓄᑦ ᖃᕿᐊᒃᓯᔨᒋᔭᐅᓕᕐᒪᑦ ᐃᓚᒌᖑᔪᓄᑦ, ᓱᕈᓯᓕᕆᓂᕐᓄᑦ ᐊᒻᒪᓗ ᐃᓅᓯᓕᕆᓂᕐᒥ ᐱᕙᓪᓕᐊᔪᓕᕆᓂᐅᔪᓄᑦ. ᓂᕈᐊᖅᖠᓂᐅᑉ ᓯᕗᕐᖓᓂ, ᐃᒃᓯᕙᐅᑕᕆᔭᐅᔪᒧᑦ ᑐᖓᓕᕆᔭᐅᓚᐅᕐᐳᖅ ᓄᓇᖃᖅᑳᕐᓯᒪᔪᓕᕆᔨᒃᑯᑦ ᐊᒻᒪᓗ ᐅᑭᐅᖅᑕᖅᑐᒥᐅᓕᕆᔨᒃᑯᑦ ᑲᑎᒪᔨᕋᓛᖏᓂ.

ᐸᕉᐱ ᐅᖃᓚᐅᕐᐳᖅ ᓱᓕ ᐱᓕᕆᐊᒃᓴᕆᔭᒥᓂᒃ ᑭᒡᒐᖅᑐᕐᑕᒥᓄᑦ ᑕᒪᐃᓐᓄᑦ ᓄᓇᖃᖅᑳᕐᓯᒪᔪᐃᑦ ᓄᓇᓕᒋᔭᖏᓄᑦ ᑲᔪᓯᑎᑦᑎᓂᐊᕋᒥ, ᐊᖏᓂᖅᐸᐅᔪᒥᒃ ᑭᒡᒐᖅᑐᕐᕕᒋᔭᒥᓂ ᑯᐃᐸᒃᒥ ᐊᒻᒪᓗ ᐱᖓᔪᕆᓪᓗᒍ ᐊᖏᓂᖅᐸᐅᖃᑕᐅᔪᒥ ᑲᓇᑕᒥ.

“ᒐᕙᒪᒃᑯᑦ ᑲᑎᒪᕕᒡᔪᐊᕐᕕᖓᓂ ᒐᕙᒪᓕᕆᔨᐅᓪᓗᑕ ᐱᓕᕆᐊᒃᓴᖃᕋᑦᑕ ᐃᓄᖁᑎᕗᑦ ᐊᒻᒪᓗ ᐃᒡᒐᖅᑐᖅᑕᕗᑦ ᖃᓄᐃᖖᒋᑦᓯᐊᖅᑎᑕᐅᔭᕆᐊᖃᕐᓂᖏᓐᓄᑦ” ᐅᖃᖅᓱᓂ. “ᐅᖃᖃᑎᒋᔭᕆᐊᖅ ᐊᔪᕐᓇᖅᑑᕙᒃᑲᓗᐊᖅᑎᓪᓗᒍ,  ᐱᒻᒪᕆᐅᓗᐊᕐᒪᑦ ᐃᓄᖏᑦ ᑯᐃᐸᒃ ᑕᖅᕋᖓᓂ ᐊᒻᒪᓗ ᓄᓇᕕᖕᒥ ᖃᐅᔨᒪᔭᕆᐊᖃᕐᓂᖏᑦ ᑭᒡᒐᖅᑐᕐᑎᐅᓂᓐᓂᒃ ᖃᐅᔨᒪᑦᑎᐊᕐᓂᖏᑕ ᐊᒻᒪᓗ ᖃᖓᑐᐃᓐᓇᖅ ᐊᓪᓚᕕᑦᑎᓐᓄᑦ ᕕᐊᓪᑐᐊᕐᒥ ᖃᐅᔨᑎᑦᑎᖃᑦᑕᕈᓐᓇᕐᒪᑕ.”

ᐅᖃᖅᑕᐅᓚᐅᖅᑐᑦ ᑯᐃᓐ ᑭᒡᒐᖅᑐᖅᑎᖓᓂᑦ ᓈᒻᒪᒋᔭᐅᓯᒪᖖᒋᒃᑲᓗᐊᖅᑎᓪᓗᒋᑦ, ᓇᓗᓇᐃᕆᐊᕐᓗᒍ ᒐᕙᒪᐅᔪᑦ ᐱᓕᕆᐊᒃᓴᕆᓂᐊᖅᑕᖏᓂᒃ ᑲᑎᒪᓂᖃᓕᕐᒥᒃᐸᑕ, ᐸᕉᐱ ᖁᕝᕙᖅᑎᑦᑎᒋᐊᕐᓂᖃᓚᐅᕐᐳᖅ ᑯᐃᓐ ᑭᒡᒐᖅᑐᖅᑎᖓᑕ ᒥᐊᕆ ᓴᐃᒪᓐ ᐅᖃᓪᓚᒍᓐᓇᓚᐅᕐᓂᖓᓂᒃ ᒍᐃᒍᐃᑎᑐᑦ, ᐃᓚᖃᖅᓱᒍ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ. ᓴᐃᒪᓐ ᓯᕗᓪᓕᕐᒥᒃ ᑎᓕᔭᐅᓯᒪᓕᓚᐅᕐᓂᖓ ᓈᒻᒪᒋᔭᐅᓚᐅᖖᒋᒻᒪᑦ ᐊᒥᓱᑦ ᑯᐃᐸᖕᒥᐅᓂᑦ ᐱᔾᔪᑎᒋᓪᓗᒍ ᐅᖃᓚᐅᕐᓂᖓᓂᒃ ᒍᐃᒍᐃᑎᑐᑦ ᓱᕈᓯᐅᓪᓗᓂ ᐃᓕᓐᓂᐊᖅᓯᒪᖖᒋᓐᓂᒥᓂᒃ, ᐃᓚᒋᔭᐅᖃᑕᐅᑎᓪᓗᒍ ᑲᓇᑕᒥ ᒪᕐᕈᐃᖑᓪᓗᑎᒃ ᐃᓕᑕᕆᔭᐅᓯᒪᓪᓗᑎᒃ ᐅᖃᐅᓯᕆᔭᐅᕙᒃᑐᓂᑦ.

ᒫᓐᓇᓵᖑᓚᐅᖅᑐᒥ ᑭᒃᑯᑐᐃᓐᓇᓄᑦ ᐅᖃᓪᓚᒋᐊᖅᓯᒪᖃᑦᑕᓚᐅᕐᓂᕐᒥᓂ, ᓴᐃᒪ ᐅᖃᓪᓚᖃᑦᑕᓚᐅᕐᒪᑦ ᐊᑐᖅᓱᓂ ᐱᖓᓱᓂᒃ ᐅᖃᐅᓯᕐᓂᒃ, ᐃᓚᖃᖃᑦᑕᖅᓯᒪᔪᓂᒃ ᐊᒥᓲᓂᖅᓴᐅᓪᓗᒋᑦ ᒍᐃᒍᐃᑎᑑᖅᓱᓂ ᑕᖅᑭᐅᓯᒪᓕᖅᑐᓂ, ᓇᓗᓇᐃᒃᑯᑕᐅᓕᖅᑐᒧᑦ ᐅᖃᓚᐅᖅᓯᒪᓂᖓᓄᑦ ᐅᖃᐅᓯᐅᕐᒥᒃ ᐃᓕᑦᓯᓯᒪᓕᕐᓂᐊᕋᒥ.

“ᒥᓯᔅ ᓴᐃᒪᓐ ᑲᑉᐱᐊᓱᖕᓂᖃᓚᐅᖖᒋᒻᒪᑦ ᒍᐃᒍᐃᑎᑐᑦ ᐅᖃᓪᓚᓕᕋᒥ ᐱᔾᔪᑎᒋᓪᓗᒍ ᐃᓕᓐᓂᐊᕈᑎᒋᓚᐅᖅᓯᒪᖖᒋᒻᒪᒍ,” ᐸᕉᐱ ᐅᖃᖅᓱᓂ. “ᐅᖃᐅᓯᑦᑎᐊᕙᐅᒻᒪᑦ, ᑭᓯᐊᓂᓗ ᐃᓕᓐᓇᓱᒋᐊᒥᒃ ᐊᔪᕐᓇᖅᑑᓪᓗᓂ, ᑕᒪᓐᓇᓗ ᐱᔾᔪᑎᒋᓪᓗᒍ ᑐᑭᓯᓇᑦᑎᐊᕐᒪᑦ ᐅᖃᖃᑦᑕᓕᕈᓐᓇᕐᓂᖓ ᒫᓐᓇᑲᐅᑎᒋᐅᓂᐊᖖᒋᒻᒪᑦ.”

Share This Story

(0) Comments