ᑰᒑᕐᔪᒃ ᐃᓄᑐᖃᖅ ᑎᑎᕋᖅᐳᖅ ᐱᖓᔪᖓᓐᓂ ᓱᕈᓯᕐᓄᑦ ᐅᖃᓕᒫᒐᐅᔪᒥ

For English version, see Kugaaruk elder publishes third children’s book

ᑰᒑᕐᔪᖕᒥ ᐃᓄᑐᖃᖅ ᓕᕙᐃ ᐃᓪᓗᐃᑦᑐᖅ ᓱᓕ ᐃᖅᑲᐅᒪᕗᖅ ᐊᒥᓱᓂ ᐅᓂᒃᑳᖅᑐᐊᓂ ᐅᖃᐅᔾᔭᐅᓚᐅᕐᓂᖓᓂ ᐱᕈᖅᓴᑎᓪᓗᒍ.

ᐅᖃᓘᑎᒃᑯᑦ ᐅᖃᓗᒡᕕᐅᓪᓗᓂ ᒪᐃ ᓄᙳᐊᓂ, ᐃᓪᓗᐃᑦᑐᖅ, 82, ᐅᖃᓚᐅᖅᐳᖅ ᓄᑖᖑᔪᒥ ᓱᕈᓯᕐᓄᑦ ᐅᖃᓕᒫᒐᓕᐊᖓ, ᐃᓄᒐᕈᓪᓖᑦ, ᑲᔪᓯᓂᐅᕗᖅ ᐊᑯᓂᐅᔪᒥ ᐱᖅᑯᓯᑐᖃᐅᔪᒥ.

ᐅᓂᒃᑳᖅᑐᐊᑦ, ᐅᖃᓚᐅᖅᐳᖅ ᐃᓄᒃᑎᑐᑦ ᑐᓵᔨᑎᒍᑦ, ᑕᐃᔅᓱᒧᙵᓚᐅᖅᐳᑦ ᓯᕗᓕᖏᓪᓕ ᐊᒻᒪ ᐆᒪᑎᑕᐅᖏᓐᓇᓚᐅᖅᐳᑦ ᐅᓂᒃᑳᖅᑐᐊᕐᓂᒃᑯᑦ ᐊᒻᒪ ᐅᓂᒃᑳᖅᑐᐊᒃᑲᓐᓂᖅᐸᒃᖢᑎᒃ ᐱᐅᓯᖃᑎᒌᖑᔪᓄᑦ.

ᐅᑯᐊᖓ, ᔩᓂ ᐃᓪᓗᐃᑦᑐᖅ, ᑐᓵᔨᐅᓚᐅᖅᑐᖅ ᐊᐱᖅᓱᖅᑕᐅᓂᕐᒧᑦ, ᐅᖃᓚᐅᖅᐳᖅ “ᐊᒥᓱᒻᒪᕆᐊᓗᖕᓂ ᐅᓐᓂᒃᑳᖅᑐᐊᒐᒃᓴᖃᖅᐳᖅ”.

ᐃᓄᒐᕈᓪᓖᑦ ᓕᕙᐃ ᐃᓪᓗᐃᑦᑑᑉ ᐱᖓᔪᒋᓪᓗᓂᐅᒃ ᐅᖃᓕᒫᒐᓕᐊᕆᕙᖓ ᐊᒻᒪ ᐅᖁᒪᐃᑦᑑᓇᓂ ᕿᒪᒃᓯᓂᐅᔪᒥ ᓯᕗᓂᐊᓂ ᐱᓕᕆᐊᕆᔭᖏᓐᓂ.

ᓯᕗᓪᓕᖅᐸᐅᔪᓂ ᒪᕐᕉᔪᓂ ᐅᖃᓕᒫᒐᓕᐊᖏᑦ ᑖᕐᓂᖅᓴᐅᔪᓄᑦ ᐅᖃᐅᓯᖃᖅᐳᑦ: ᐊᕼᐃᐊᕼᐃᐊ ᐃᓕᐊᕐᔪᒃ ᐅᓂᒃᑳᖅᑐᐊᖑᕗᖅ ᐃᓄᖕᒥ ᐃᓕᐊᕐᔪᖕᒥ ᐱᕈᖅᓴᔭᐅᔪᒥ ᐊᓈᓇᑦᑎᐊᖓᑕ ᐊᖓᔪᖅᑳᖏᑦ ᐃᓄᐊᖅᑕᐅᓚᐅᖅᑎᓪᓗᒋᑦ, ᑖᓐᓇ ᐊᒪᔪᕐᔪᒃ ᐱᖅᑯᓯᑐᖃᖅᑎᒍᑦ ᐅᓂᒃᑳᖅᑐᐊᖑᕗᖅ ᐊᑖᑕᐅᒧᒥ ᓴᐳᔾᔨᓂᖓᓂ ᐃᕐᓂᖓᓂ ᖃᓪᓗᐱᓪᓗᖕᒥ ᑎᒡᓕᓲᖑᔪᒥ ᓱᕈᓯᕐᓂ.

ᓄᑖᖑᔪᒥ ᐅᖃᓕᒫᒐᓕᐊᖓᓐᓂ, ᐃᓄᒐᕈᓪᓖᑦ — ᐃᓄᒐᕈᓪᓖᑦ ᑕᐃᒎᓯᐊᓂ — ᐅᓂᒃᑳᖅᑐᐊᖑᓪᓗᑎᒃ ᐃᓄᙳᐊᖑᕗᑦ ᓯᖏᑉᓂᕐᒥ ᑕᑭᓂᖅᓴᐅᒐᓛᒃᖢᑎᒃ ᑎᒍᐊᖅᓯᒪᔪᓂ ᐃᓄᖕᒥ ᓄᑲᑉᐱᐊᕐᒥ. ᐅᓂᒃᑳᖅᑐᐊᖅ ᐅᐸᒃᑎᑦᑎᕗᖅ ᐅᖃᓕᒫᖅᑎᐅᔪᒥ ᓇᓐᓄᒐᓱᖕᓂᐅᔪᒧᑦ.

ᒥᑭᒃᑲᓗᐊᖅᖢᓂ, ᐊᖏᓂᖅᓴᒻᒪᕆᐅᕗᖅ ᑎᒍᐊᖅᑎᖏᓐᓂ ᓄᓇᓕᖓᓐᓂ, ᓄᑲᑉᐱᐊᖅ ᐃᓕᑦᑎᔭᒃᓴᖃᕐᔪᐊᖅᐳᖅ ᐱᓕᕆᓂᐅᔪᓂ ᐊᒻᒪ ᐱᔪᓐᓇᕐᔪᐊᕐᓂᐅᔪᓂ ᐃᓄᒐᕈᓪᓖᑦ ᐊᖓᔪᖅᑳᖏᓐᓂ.

ᓕᕙᐃ ᐃᓪᓗᐃᑦᑐᖅ ᓂᐱᓕᐅᕆᕙᓪᓕᐊᓕᓚᐅᖅᐳᖅ ᐅᓂᒃᑳᖅᑐᐊᖑᔪᓂ ᐃᖅᑲᐅᒪᓂᕆᔭᖓᓐᓂ ᐊᕐᕌᒍᑦ ᒪᕐᕉᓕᖅᑐᓂ ᐊᓂᒍᖅᓯᒪᔪᓂ ᐅᐸᒃᑕᐅᒐᒥ ᓃᐅᓪ ᑯᕆᔅᑕᕗᒧᑦ, ᑎᑎᕋᖅᑎᐅᔪᖅ ᐊᒻᒪ ᐊᐅᓚᑦᑎᓪᓗᓂ ᐱᓕᕆᖃᑎᒋᔭᐅᔪᖅ ᐃᓐᕼᐋᐱᑦ ᓯᐊᒻᒪᖅᑎᑦᑎᔨᒃᑯᓐᓂ.

ᑯᕆᔅᑕᕗ ᐃᒃᐱᒍᓱᓚᐅᖅᐳᖅ ᐱᑕᖃᙱᓗᐊᕐᓂᖓᓂ ᓄᓇᓕᖕᓂ ᐅᓂᒃᑳᖅᑐᐊᓂ ᑰᒑᕐᔪᒃ ᐊᕕᒃᑐᖅᓯᒪᓂᐅᔪᒥ, ᐅᖃᐅᓯᐅᓪᓗᓂ ᔩᓂ ᐃᓪᓗᐃᑦᑐᕐᒧᑦ.

ᐅᓂᒃᑳᖅᑐᐊᒥ ᐆᒻᒪᖅᑎᑦᑎᓂᖓᓂ, ᑎᑎᕋᐅᔭᖅᑎ ᔅᑏᕝ ᔭᐃᒻᔅ ᐃᓗᓪᓕᖅᓱᐃᓚᐅᖅᐳᖅ ᐅᖃᓕᒫᒐᕐᒥ ᑎᑎᕋᐅᔭᒐᕐᓂ ᑐᖑᑦᑐᕆᒃᑐᒥ ᕿᓚᖕᓂ ᓴᓂᓕᐊᓂ ᖃᑯᖅᑕᒥ ᐊᐳᒻᒥ ᐊᒻᒪ ᐃᓗᓪᓂᖅᓯᓯᒪᔪᒥ ᐊᐃᓯᑯᓖᖅᑎᑐᑦ ᐃᒡᓗᕕᒐᕐᓂ.

ᐅᓪᓗᖅ ᑖᖅᓯᕙᓪᓕᐊᓕᖅᑎᓪᓗᒍ ᐊᒻᒪ ᐊᓱᐃᓛᒃ ᐅᓐᓄᙳᖅᖢᓂ, ᐳᔪᕐᓂ ᕿᓚᖓᓐᓂ ᑐᓂᓯᕗᖅ ᐅᐃᔾᔮᖅᑐᓂ ᖃᐅᒪᔪᓂ ᐊᖅᓴᕐᓂᓂᑦ.

ᔭᐃᒻᔅ ᑐᓂᔭᐅᓚᐅᖅᐳᖅ ᖃᐅᔨᓴᕐᓂᕐᔪᐊᖑᔪᒥ ᒥᐊᓂᕆᓂᕐᒧᑦ ᑎᑎᕋᐅᔭᒐᖏᓐᓄᑦ, ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ.

“ᐅᑯᓂᖓ ᐱᖅᑯᓯᑐᖃᐅᔪᓂ ᐆᒪᑎᑦᑎᓂᕐᒥ ᐱᒻᒪᕆᕐᔪᐊᖑᕗᖅ,” ᐅᖃᓚᐅᖅᐳᖅ.

ᐅᓇ ᐱᖓᔪᒋᓪᓗᓂᐅᒃ ᐅᖃᓕᒫᒐᓕᐊᕆᖅ ᔭᐃᒻᔅ ᐱᓕᕆᓯᒪᓂᖓᓂ ᑰᒑᕐᔪᖕᒥᙶᖅᑐᒥ. ᐅᖃᓚᐅᖅᐳᖅ ᐊᓕᐊᓇᐃᑦᑎᐊᖅᐳᖅ ᐃᓚᒋᔭᐅᖃᑕᐅᓂᖓᓂ ᓴᖅᑭᑎᑦᑎᓂᕐᒥ ᐅᖃᓕᒫᒐᓕᐊᖑᔪᒥ, “ ᐃᒡᓗᐊᓃᒃᑲᓗᐊᖅᑎᓪᓗᖓ ᓄᓇᕐᔪᐊᒥ,” ᐃᖕᓚᓐᒥ.

ᑎᑎᕋᐅᔭᖅᑎ ᐱᒐᔪᒃᐳᖅ ᐊᑕᐅᓯᕐᒥ ᒪᕐᕉᖕᓂᓪᓘᓐᓃᑦ ᐊᔾᔨᖓᓂ ᐱᔭᕇᖅᓯᒪᔪᓂ ᐅᖃᓕᒫᒐᓂᑦ, ᑐᓂᓯᓚᐅᖅᖢᓂ 7−ᓂ ᐅᑭᐅᓕᖕᒥ ᐸᓂᖓᓄᑦ. ᓇᒃᓴᖅᐸᒃᐸᖓ ᐅᖃᓕᒫᒐᓕᐊᑦ ᐃᓕᓐᓂᐊᕐᕕᖓᓄᑦ ᐃᓕᓐᓂᐊᖃᑎᖏᑦ ᕿᒥᕐᕈᐊᕐᓂᐊᕐᒪᔾᔪᒃ.

ᓕᕙᐃ ᐃᓪᓗᐃᑦᑐᖅ ᐅᖃᓚᐅᖅᐳᖅ ᑭᓇᑐᐃᓐᓇᒥᒃ ᑎᑎᕋᕐᓂᐊᖅᑐᒥ ᐅᑯᓂᖓ ᐅᓂᒃᑳᖅᑐᐊᖑᔪᓂ, ᑎᑎᕋᐃᓐᓇᕐᓂᐊᖅᐸᖏᑦ.

ᐃᓄᒐᕈᓪᓖᑦ ᐊᑐᐃᓐᓇᐅᕗᖅ ᐃᓐᕼᐋᐱᑦ ᓯᐊᒻᒪᖅᑎᑦᑎᔨᒃᑯᑦ ᐃᑭᐊᖅᑭᕕᖓᓐᓂ.