ᑲᑎᒪᔩᑦ ᓂᕈᐊᓚᐅᕐᑐᑦ ᐊᑐᖅᑕᐅᓇᔭᖅᑐᒥᒃ ᐊᑯᓂᕈᓗᒃ ᐃᒪᖃᕐᓂᕐᒥᒃ

For English version, see Iqaluit councillors recommend long-term solution to supplement water supply

ᐃᖃᓗᐃᑦ ᓄᓇᓕᐸᐅᔭᓄᑦ ᑲᑎᒪᔨᕋᓛᑦ ᐃᓱᒪᓕᐅᕆᕗᑦ ᓄᓇᓕᐸᐅᔭᐃᑦ ᐃᒥᖅᑖᖃᑦᑕᕐᓗᑎᒃ ᐊᑎᖃᙱᑦᑐᒥᒃ ᑕᓯᕐᒥ ᐃᒪᖃᕐᕕᖓ ᐃᒪᖃᖅᑎᓐᓇᓱᒡᓗᒍ

ᑲᑎᒪᔩᑦ ᐊᖏᓚᐅᕐᑐᑦ ᑖᔅᓱᒥᖓ ᓂᕈᐊᖅᖢᑎᒃ ᐋᒐᓯ 26-ᒥ ᐱᓕᕆᔾᔪᑎᓕᕆᓂᕐᒧᑦ ᐊᒻᒪ ᐱᓕᕆᐊᒃᓴᓄᑦ ᑲᑎᒪᔩᑦ ᑲᑎᒪᑎᓪᓗᒋᑦ. ᑲᑎᒪᔨᕋᓛᑦ ᐃᓱᒪᓕᐊᕆᓂᑯᖏᑦ ᓱᓕ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᐊᖏᖅᑕᐅᔭᕆᐊᖃᖅᑐᑦ.

ᒪᐃᔭ ᑭᐊᓂ ᐱᐊᓪ ᐊᒻᒪ ᑲᑎᒪᔩᑦ ᕉᒪᓐ ᓯᑏᕙᓐᓴᓐ, ᑭᒻᐳᓕ ᓯᒥᑦ, ᐅᑲᓕᖅ ᑰᓕ ᐊᒻᒪ ᓴᐃᒪᓐ ᓇᑖᖅ ᐅᐸᒍᑎᓯᒪᓚᐅᕐᑐᑦ ᓂᕈᐊᖅᑎᓪᓗᒋᑦ.

ᐃᓱᒪᓕᐊᕆᔭᐅᔪᑦ ᓴᖅᑭᑕᐅᓕᓚᐅᕐᑐᖅ ᐅᑯᐊ ᓯᑖᓐᑕᒃ ᐃᒡᓗᒃᓴᓂᒃ ᑎᑎᕋᐅᔭᖅᑎᑦ (Stantec Architecture Ltd.) ᖃᓄᐃᓕᐅᕈᑎᐅᔪᓐᓇᖅᑐᓂᒃ ᓴᖅᑭᑎᑦᑎᓚᐅᕐᓯᒪᓪᓗᑎᒃ ᔫᓂᐅᓚᐅᕐᑐᒥ ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᐃᒥᖃᕐᓂᕐᒥᒃ. ᐅᑯᐊ ᖃᓄᐃᓕᐅᕈᑎᐅᔪᓐᓇᖅᑐᑦ ᐅᑯᐊᖑᓇᐅᕐᑐᑦ ᐃᒪᕐᒥᒃ ᒥᕐᓗᐊᖅᓯᕙᓪᓗᑎᒃ ᐊᑎᖃᙱᑦᑐᒥᒃ ᑕᓯᕐᒥᒃ, ᑖᓐᓇᓗ ᑰᒃᐸᓪᓕᐊᕙᒃᖢᓂ ᓂᐊᖁᙴ ᑰᖓᓄ; ᐅᕝᕙᓘᓐᓃᑦ ᓯᐊᕕᐊ ᒍᕆᓄᓪ ᑰᖕᒥ ᒥᕐᓗᐊᖅᐸᒡᓗᑎᒃ.

ᑲᑎᒪᔩᑦ ᐳᓪᓚᒃᓴᐃᔪᓐᓇᓚᐅᕐᑐᑦ ᓇᓕᐊᓐᓂᒃ ᐃᒪᖅᑖᕈᓐᓇᕐᓗᑎᒃ ᐊᕐᕌᒍᙳᕌᖓᑦ ᐅᕝᕙᓘᓐᓃᑦ ᐊᕐᕌᒍᓕᒫᖅ, ᐊᒻᒪᓗ ᓂᕈᐊᖔᖅᖢᑎᒃ ᐊᕐᕌᒍᙳᕌᖓᑦ ᐱᓕᕆᐊᕆᔭᐅᔪᓐᓇᖅᑐᒥᒃ ᐅᕙᙵᑦ ᐊᑎᖃᙱᑦᑐᒥᒃ ᑕᓯᕐᒥ.

ᓄᓇᓕᐸᐅᔭᐃᑦ ᐃᒪᖅᑖᖃᑦᑕᕐᒪᑕ ᑕᓯᖅ ᔨᐅᕈᑏᓐᒥ, ᐃᒻᒥᖅᐸᓪᓕᐊᖏᓐᓇᐅᔭᕐᑐᖅ ᐃᒪᖃᕐᕕᒃ. ᐊᕐᕌᒎᓕᖅᑐᓂᒡᓕ ᐊᑐᓵᕐᓂᑯᓂᒃ, ᐃᒪᖃᑲᑕᑦᑎᐊᒋᒻᒪᑦ ᑕᓯᖅ, ᑕᐃᒪᓐᓇᓗ ᓄᓇᓕᐸᐅᔭᐃᑦ ᒥᓪᓗᐊᖅᓯᔭᕆᐊᖃᖅᐸᒃᖢᑎᒃ ᓂᐊᖁᙴᑉ ᑰᖓᓂᒃ ᐊᒻᒪᓗ ᐊᑎᖃᙱᑦᑐᒥᒃ ᑕᓯᕐᒥ.

ᓄᓇᓕᐸᐅᔭᐃᑦ ᒥᓪᓗᐊᑲᑕᓕᓚᐅᖅᑐᑦ ᐃᒪᕐᒥ ᓂᐊᖁᙴᑉ ᑰᖓᓂ 2018 ᐊᐅᔭᖓᓂᒃ.

ᓲᒪᓐ ᒎᔅ, ᓄᓇᓕᐸᐅᔭᐃᑦ ᑐᑭᒧᐊᖅᑎᑦᑎᔨᖓ ᐱᓕᕆᔾᔪᑎᓕᕆᓂᕐᒧᑦ ᐊᒻᒪ ᑮᓇᐅᔭᖅᑐᔪᓂᒃ ᐸᕐᓇᐅᓯᐅᕐᓂᕐᒧᑦ, ᐃᓱᒪᓕᐅᕆᓪᓗᓂ ᑲᑎᒪᔨ ᐱᐅᓂᖅᐹᖑᓇᔭᕐᓂᖓᓂᒃ ᓄᓇᓕᐸᐅᔭᐃᑦ ᐃᒥᖅᑖᖃᑦᑕᖅᐸᑕ ᐊᑎᖃᙱᑦᑐᒥᒃ ᑕᓯᕐᒥ ᐊᐅᔭᒃᑯᑦ, ᐃᒪᓐᓇᐅᙱᖔᖅᑐᖅ ᐊᕐᕌᒍᓕᒫᖅ ᐃᒻᒥᖅᐸᓪᓕᐊᖏᓐᓇᐅᔭᕐᓂᕐᒥᒃ, ᐅᖃᖅᖢᓂ ᐊᑭᑐᓂᕐᓴᐅᓇᔭᕐᓂᖓᓂᒃ ᐊᐅᓚᑕᐅᓂᖓ ᐊᒻᒪᓗ ᑲᒪᒋᔭᐅᔭᕆᐊᖃᕐᓂᖓ ᐊᕐᕌᒎ ᐃᓗᐊᓂᓕᒫᖅ ᐱᓕᕆᐊᖑᒃᐸᑦ.

ᒎᔅ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᓂᐅᕕᕈᓐᓇᕐᓂᕋᖅᖢᓂᒋᑦ ᐊᒻᒪ ᐱᓕᕆᕝᕕᒃᓴᒥ ᓴᓇᓗᑎᒃ ᐊᕐᕌᒍ, ᑭᓯᐊᓂᓕ ᐸᕐᓇᐅᑏᑦ ᐋᖅᑭᒃᑕᐅᓯᒪᔪᖅ ᐅᖃᕐᓯᒪᖕᒪᑕ ᐱᐊᓂᒃᑕᐅᔭᕆᐊᖃᕐᓂᖓᓂᒃ 2024 ᑎᑭᓐᓇᓱᖕᓂᖓᓂᒃ. ᑖᓐᓇᓕ ᐃᓚᖃᕋᔭᕐᑐᖅ ᐊᖅᑯᑎᓕᐅᕐᓗᑎᒃ ᐊᑎᖃᙱᑦᑐᒧᑦ ᑕᓯᕐᒧᑦ ᐊᒻᒪᓗ ᒥᓪᓗᐊᕐᕕᒃᓴᐅᖃᑦᑕᕐᓂᐊᖅᑐᒥ ᓴᓇᓗᑎᒃ.

ᐅᓇ ᐱᓕᕆᐊᒃᓴᖅ ᐊᑕᐅᓰᖅᑕᐅᑐᐃᓐᓇᕐᓗᓂ ᑮᓇᐅᔭᓂᒃ ᐊᑐᕈᑎᐅᓇᔭᖅᑐᖅ ᒫᓂ $5.5 ᒥᓕᐊᓐ ᑖᓚᓂ ᐊᐅᔭᒃᑯᑦ ᐊᐅᓚᑕᐅᓂᐊᕐᓗᓂ ᐅᕝᕙᓘᓐᓃᑦ $7.6 ᒥᓕᐊᓐ ᑖᓚᓂ ᐊᕐᕌᒎᑉ ᐃᓗᐊᓂᓕᒫᖅ ᐊᐅᓚᑕᐅᓂᖓᓄᑦ.

ᐃᖃᓗᐃᑦ ᐊᒪᕈᖅ ᐊᖑᓇᓱᒃᑐᓕᕆᔨᖏᑦ ᓈᒻᒪᒃᓴᙱᓪᓚᕆᖕᒪᑕ ᐅᓇ ᓯᐊᕕᐊ ᒍᕆᓄᓪᑯᒃ ᐃᒥᖅᑖᕐᕕᐅᖁᔭᐅᓇᓂ ᓲᖃᐃᒻᒪ ᐃᓕᖅᑯᓯᒃᑯᑦ ᐱᓕᕆᕝᕕᐅᖃᑦᑕᕐᒪᓐ.

ᑭᓯᐊᓂᓕ ᑲᑎᒪᔨᐅᖃᑕᐅᔪᑦ, ᐃᓚᒋᔭᐅᓪᓗᑎᒃ ᓇᑖᖅ, ᓯᑏᕙᓐᓴᓐ ᐊᒻᒪ ᐱᐊᓪ ᐊᐱᕆᓚᐅᕐᑐᑦ ᑖᓐᓇ ᑰᒃ ᐱᐅᓂᕐᓴᐅᓇᔭᙱᒻᒪᖔᑦ.

ᓯᑏᕙᓐᓴᓐ ᐅᖃᓚᐅᕐᑐᖅ ᐃᓱᒫᓘᑎᖃᕐᓂᕋᖅᖢᓂ ᖃᓄᖅ ᐅᓇ ᐊᑎᖃᙱᑦᑐᖅ ᑕᓯᖅ ᐊᑯᓂᕈᓗ ᐃᒥᖅᑕᕐᕕᐅᔪᓐᓇᕐᒪᖔᑦ ᐊᒻᒪᓗ ᑖᓐᓇ ᑕᓯᖅ ᐃᒻᒥᖅᐸᓪᓕᐊᕙᖕᒪᖔᑦ ᐃᒻᒥᓂᒃ.

“ᑲᑉᐱᐊᓇᕈᔪᖕᒪᑦ ᐃᓱᒪᓕᐅᕆᓇᓱᒃᖢᓂ … ᒪᑯᓄᖓ ᖃᐅᔨᒫᓂᙱᓗᐊᖅᑕᑦᑎᓐᓄᑦ ᐃᒪᕐᒥ ᓈᒻᒪᒐᔭᕆᐊᒃᓴᖓᓂᒃ,” ᐅᖃᕐᑐᖅ.

ᓯᑖᓐᑕᒃᑯᑦ ᑭᒡᒐᖅᑐᐃᔨᖏᑦ ᑲᑎᒪᔨᓄᑦ ᐅᖃᕐᓯᒪᔪᑦ ᑭᖑᓂᑦᑎᓐᓂᒃ ᐃᒪᖅᑖᖅᐸᓪᓕᐊᓂᖅ ᐊᑎᖃᙱᑦᑐᒥᒃ ᑕᓯᕐᒥ ᐅᑯᐊ ᓄᓇᓕᐸᐅᔭᐃᑦ ᒫᓐᓇ ᐊᑐᖃᑦᑕᕐᒪᑕ 80 ᐳᓴᓐᑎᖓᓂᒃ ᐃᒪᕐᒥ ᑕᓯᖅ ᔨᐅᕈᑏᓐᒥ ᐅᑭᐅᖅ ᐊᓂᒍᕌᖓᑦ.

ᒐᕙᒪᑐᖃᒃᑯᑦ ᑐᓂᓯᓇᔭᕐᒥᔪᑦ $214 ᒥᓕᐊᓐ ᑖᓚᓂ ᓴᓇᔭᐅᓂᐊᖅᑐᒥᒃ ᐃᒪᖃᕐᕕᒃᓴᒃᑲᓐᓂᐅᓂᐊᖅᑐᒥᒃ ᓄᓇᓕᐸᐅᔭᓂ ᐃᖃᓗᖕᓂ, ᐃᓚᒋᔭᐅᓪᓗᓂ ᐊᓯᒃᑲᓐᓂᖏᓐᓂᒃ ᐱᐅᓯᕚᓪᓕᕈᑎᒃᓴᓄᑦ ᓄᓇᓕᐸᐅᔭᐃᑦ ᐃᒪᖃᕈᑎᖓᓂᒃ. ᐅᓇ ᑮᓇᐅᔭᖅ ᐅᖃᐅᓯᐅᓚᐅᕐᓯᒪᔪᖅ ᐄᐳᕈᒥ.

ᐊᐃᒥ ᕿᐊᒍᔅᒪ, ᓄᓇᓕᐸᐅᔭᓄᑦ ᐊᖓᔪᖅᑳᖅ ᐊᐅᓚᑦᑎᔨ, ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐱᓕᕆᐊᖃᕐᓂᖏᓐᓂᒃᑕᐅᖅ ᐃᒪᐅᑉ ᐊᖅᑯᑎᖏᓐᓂᒃ ᓴᐳᔾᔨᓯᒪᓇᓱᖕᓂᕐᒧᑦ ᒪᓕᒐᕐᓂᒃ ᐃᓄᐃᑦ ᖃᒧᑕᐅᔭᒃᑯᑦ ᐃᖏᕐᕋᕝᕕᖃᖃᑦᑕᔾᔮᙱᒻᒪᑕ ᓄᓇᓕᐸᐅᔭᐃᑦ ᐃᒪᖃᕐᕕᖓᒍᑦ ᐅᕝᕙᓘᓐᓃᑦ ᕿᒻᒦᑦ ᐊᓇᖃᑦᑕᖁᔭᐅᙱᓐᓂᖏᓐᓂᒃ ᑕᒫᓂ.