ᑲᓇᑕᐅᑉ ᐅᑭᐅᕐᑕᖅᑐᖓᓂᑦ, ᑕᕆᐅᑉ ᓯᑯᖏᑦ ᐊᑦᑎᖕᓂᖅᐹᖑᒻᒪᑕ ᒫᓐᓇ

“ᑕᕿᓕᒫᕐᒥᑦ ᑭᖑᕙᕐᓯᒪᑐᐃᓐᓇᕆᐊᖃᖅᑐᒍᑦ ᖃᓄᐃᓕᖓᔭᕆᐊᖃᕐᓂᖓᓄᑦ ᐊᕐᕌᒎᔪᒥᑦ’

“ᖁᐊᖅᐸᓪᓕᐊᓂᖓ ᑭᖑᕙᒻᒪᕆᒃᑐᐊᓗᒃ ᑕᒪᑐᒪᓂ ᐊᕐᕌᒎᔪᖅ,” ᐅᖃᖅᑐᖅ ᐅᖅᓱᖅᑑᕐᒥᐅᑕᖅ ᕗᐃᓕ ᐊᒡᓘᒃᑲᖅ, ᐆᒥᖓ ᐊᔾᔨᓕᐅᕆᓂᑯ ᐅᒃᑑᐱᕆ 18-ᒥ. “ᓱᓕ ᐅᒥᐊᕐᑐᕐᓇᖅᑐᖅ ᓄᓇᐃᓐᓇᒧᑦ, ᑕᐃᒪᐃᑉᐸᙱᒃᑲᓗᐊᕐᒪᑦ ᐅᖅᓱᖅᑑᖅᒥᑦ. ᑕᑯᓚᐅᕐᓯᒪᙱᑕᕋ ᓯᑯᖓᙱᑦᑐᖅ ᑕᐃᒪᐃᓕᖅᑎᓪᓗᒍ ᐃᓅᓯᓕᒫᓐᓂᑦ.” (ᐊᔾᔨᓕᐅᕆᔨ ᕗᐃᓕ ᐊᒡᓘᒃᑲᖅ)

By ᑕᔅᑎᓐ ᐸᑖ

For an English version of this story, see Across Arctic Canada, sea ice levels are again at record lows

ᐅᒃᑑᐱᕆᐅᓚᐅᕐᓯᒪᔪᒥᑦ, ᐅᓇ ᔫᑕ ᓴᕐᐱᓇᒃ ᐃᒡᓗᓕᖕᒥᐅᑕᖅ ᓇᑦᑎᕋᓱᒋᐊᓕᕋᒥᑦ ᓯᑭᑑᒃᑰᕆᐊᖃᓚᐅᕐᒃᓯᒪᔪᖅ. ᑕᐃᒪᓐᓇᑦᑕᐃᓐᓇ ᐱᓇᓱᒃᑎᓪᓗᒍ ᐊᕐᕌᒍᙳᖅᑎᓪᓗᒍ, ᐅᒥᐊᕐᑐᕆᐊᖃᓚᐅᕐᑐᖅ.

ᓄᓇᕗᒥᑦ ᐊᒻᒪ ᐊᓯᖏᓐᓂᑦ ᐅᑭᐅᕐᑕᖅᑐᕐᒥᑦ, ᑕᐃᒪᓐᓇᑦᑕᐃᓐᓇᐅᒋᕗᖅ.

“ᐅᓇ ᖁᐊᕐᓇᓵᕐᓂᖓ ᑕᑯᔭᕆᐅᖅᑕᕋ ᐃᓅᓯᓕᒫᓐᓂᑦ,” ᐅᖃᖅᑐᖅ ᕗᐃᓕ ᐊᒡᓘᒃᑲᖅ, ᐅᖅᓱᖅᑑᕐᒥᐅᑕᐅᔪᖅ ᐊᕐᕌᒍᑲᓴᖕᓂᑦ 40-ᒥᒃ.

ᓱᓕᔪᖅ.

ᐅᒃᑐᐱᕆ 15-ᖑᓚᐅᕐᑐᒥᑦ ᑕᕆᐅᒥᑦ ᓯᑰᑉ ᐃᒡᔪᓂᖏᑦ ᒫᓃᓚᐅᕐᑐᑦ 5.118 ᒥᓕᐊᓐ ᓯᑯᐃᐊ ᑭᓛᒥᑕᔅ, ᐊᑦᑎᖕᓂᖅᐹᖑᓯᒪᓪᓗᓂ ᑎᑎᕋᐅᓯᐅᕙᓪᓕᐊᖃᑦᑕᓕᖅᑎᓪᓗᒋ 1968-ᒥᑦ.

“ᒪᓕᒃᖢᓂ ᓇᓃᕐᓂᕐᒥᑦ, ᑕᖅᑭᓕᒫᖅ ᑕᐃᒪᐃᑐᐃᓐᓇᕆᐊᖃᖅᑐᒍᑦ ᑭᖑᕙᓯᒡᓗᑕ ᐊᕐᕌᓂᐅᓚᐅᕐᑐᒥᓐ,” ᐅᖃᖅᑐᖅ ᔨᐅᔅ ᓛᒋ, ᓯᖁᒥᑦ ᖃᐅᔨᓴᖅᑎᐅᕙᒃᑐᖅ ᓄᓇᓕᕆᓂᕐᒧᑦ ᐱᔨᑦᑎᕋᐅᑎᑎᒍᑦ ᑲᓇᑕᒥ.

ᑭᓯᐊᓂᓕ ᐅᓇ ᓯᕗᓪᓕᖅᐸᐅᙱᑦᑐᖅ ᐊᕐᕌᒎᔪᒥᑦ ᓯᑰ ᐊᑦᑎᓗᐊᕐᓂᖓ.

ᐄᐳᕈᒥᑦ ᓯᑯᖃᖏᓐᓂᖅᐹᖑᓚᐅᕆᕗᖅ ᑎᑎᕋᖅᑕᐅᕙᓪᓕᐊᓯᒪᔪᓂᒃ.

ᐅᓇ ᑎᑭᑎᓪᓗᒍ ᐅᒃᑑᐱᕆ 15, ᓯᑰᑉ ᐃᔾᔪᑎᒋᓂᖏ ᑲᑕᒃᓯᒪᓂᕐᓴᐅᓚᐅᕐᑐᑦ 2012-ᒥᓪᓕ, ᑕᐃᔅᓱᒪᓂ ᐊᑦᑎᕐᓂᖅᐹᖑᓚᐅᕐᓯᒪᓪᓗᓂ. (ᓇᓗᓇᐃᒃᑯᑎ ᐅᑯᓇᙵᑦ NSIDC)

ᑖᔅᓱᒪ ᑭᖑᓂᐊᒍᑦ ᔪᓚᐃ ᑎᑎᕋᖅᑕᐅᕙᓪᓕᐊᕙᖕᓂᒃᑯᑦ ᐱᓛᖑᓚᐅᕆᕗᖅ.

ᐋᒐᓯᒥ, ᓯᑯᖃᕈᓐᓃᖅᐸᓪᓕᐊᓂᖅ ᓱᒃᑲᐃᒡᓕᕚᓪᓕᓚᐅᕐᓯᒪᕗᖅ.

“ᓇᓕᒧᖃᓚᐅᕐᑐᒍᑦ ᐊᐃᑉᐸᕆᔭᓪᓗᑕ ᐊᑦᑎᓛᖑᔪᒥᑦ (ᓯᑯᖃᕐᓂᒃᑯᑦ) 2007-ᒥᑦ ᐊᒻᒪ 2016-ᒥ, ᑭᓯᐊᓂᓕ ᖁᕝᕙᓯᖕᓂᕐᓴᐅᓪᓗᓂ 2012-ᒥᑦ,” ᐅᖃᖅᑐᖅ ᕗᐊᑐ ᒪᐃᐅ, ᖃᐅᔨᓴᖅᑎᐅᓕᒪᓂᕐᓴᖅ ᐅᕙᓂ ᑲᓇᑕᒥ ᐊᑐᑎᓄᑦ ᐊᒻᒪ ᓂᓇᖕᓂ ᐱᓕᕆᕝᕕᖕᒥᑦ.

“ᑭᓯᐊᓂᓕ ᐊᑦᑎᖕᓂᕐᓴᒦᑦᑐᒍᑦ 2012 ᐊᑦᑎᖕᓂᕆᓚᐅᕐᓯᒪᔭᖏᓐᓂᒃ ᑕᐃᒪᐃᓕᖅᑎᓪᓗᒍ ᓲᖃᐃᒻᒪ ᓱᒃᑲᐃᖢᓂ ᖁᐊᖅᐸᓪᓕᐊᓂᖓᓄᑦ—2012 ᐅᑎᑲᐅᕐᑐᓚᐅᕐᑐᖅ ᐃᓕᖁᓯᐊᓄᑦ, ᑭᓯᐊᓂᓕ ᐅᑭᐅᖅ ᓱᖅᑲᐃᑦᑐᖅ ᓯᑯᖃᓕᕐᓂᖓ.”

ᑕᕆᐅᑉ ᓯᑯᖃᕈᓐᓇᕐᓂᖓ ᒪᓕᒃᓯᒪᖕᒪᑦ ᓯᓚᐅᑉ ᐅᖅᑰᓂᖓᓂᒃ.

“ᐃᒪᖅᑕᖃᕈᓂ ᓯᑯᖃᙱᑦᑐᒥ ᐊᒻᒪ ᐅᖅᑰᓂᐅᔪᖅ ᓂᒡᓚᓱᖕᓂᕐᓴᐅᒍᓂ ᐃᒪᕐᒥ, ᑕᐃᒪᓕ ᓯᓚᐅᑉ ᐅᖅᑰᓂᖓ ᓯᓚᐃᓐᓇᕐᒦᒃᑲᓗᐊᖅᑎᓪᓗᒍ ᓂᒡᓚᖅᐹᓪᓕᕋᔭᖅᑐᖅ ᐊᒻᒪ ᐃᒪᖅ ᓂᒡᓚᖅᐹᓪᓕᓕᕐᒥᓗᓂ ᖁᐊᖅᐸᓵᓕᕐᓗᓂᓘᓐᓃᑦ,” ᐅᖃᖅᑐᖅ ᓛᓐᒋ.

ᑭᓯᐊᓂᓕ ᐅᑭᐅᕐᑕᖅᑑᑉ ᐅᖅᑰᓂᖓ ᐅᒃᑑᕕᕆᒥ ᓂᒡᓗᓱᙱᑦᑐᐊᓘᖕᒪᑦ, ᐅᖅᑰᑎᒋᓂᖃᒻᒪᕆᒃᖢᓂ ᑕᖅᑭᐅᕋᑖᖅᑐᓂᒃ 6-ᓂᒃ.

“ᐊᐅᔭᒻᒪᕆᐅᓚᐅᕐᒪᑦ ᐊᐅᔭᖅ,” ᐅᖃᖅᑐᖅ ᒪᐃᐅ.

ᐄᐳᕈᒥ ᐱᒋᐊᖅᖢᓂ, ᑕᖅᑭᑕᒫᓐ ᐱᖓᔪᒋᔭᐅᖏᓐᓇᓚᐅᖅᐳᖅ ᐅᖅᑰᓛᖑᖃᑕᐅᔪᓂᒃ—ᐅᑭᐅᕐᑕᖅᑑᓪᓕ ᐅᖅᑰᓂᕆᕙᒃᑕᖓᒍᑦ—ᑎᑎᕋᖅᑕᐅᓯᒪᔪᒃᑯᑦ, ᐅᓇᐊ ᒪᐃ ᐊᒻᒪ ᐋᒐᓯ ᖁᑦᑎᖕᓂᖅᐹᒦᖢᑎᒃ.

ᐆᒧᖓᓕ ᒪᐊᐅᒧᑦ, ᑕᐃᒪᐃᓐᓂᖓᓄᑦ, ᓯᑯᖃᖏᕕᒡᔪᐊᓚᐅᕐᑐᖅ ᐊᐅᔭᓕᒫᖅ ᑕᒪᒃᑯᐊ ᐅᖅᑰᓂᕐᒥ ᓄᖅᑲᖅᑎᑦᑎᔭᒻᒪᑕ ᐊᒻᒪ ᐅᖅᑰᓯᒻᒪᕆᓚᐅᑲᒃᖢᓂ.

ᓯᑰᑉ ᐃᓱᖃᕐᓂᖓ ᓯᑎᐱᕆ 1979-ᒥ ᐊᒻᒪ ᓯᑎᐱᕆ 2012-ᒥ. (ᐊᔾᔨᙳᐊᖅ ᐅᑯᓇᙵᑦ UNEP)

ᑕᒪᑐᒪᓂ ᐊᕐᕌᒍᒥ ᖃᓄᐃᓕᐅᕐᓂᐅᔪᖅ ᐊᖏᓂᕐᓴᒃᑲᓐᓂᕐᒥᑦ ᓴᖅᑭᒍᑎᐅᓂᐊᕐᑐᖅ.

“ᒪᑯᑎᒎᓇᖅ ᓯᓚᕐᔪᐊᑉ ᐅᖅᑰᓯᕙᓪᓕᕐᓂᖓᓄᑦ ᒪᑯᓇᙵᑦ ᐃᓄᖕᓂ ᐊᑐᖅᑕᐅᕙᓪᓕᐊᔪᓂᙶᖅᑐᓂᒃ ᓄᓇᓯᐅᑎᓂᒃ, ᑕᑯᓯᒪᕗᒍᑦ ᒥᒃᖠᕚᓪᓕᖅᑐᓂ ᓯᑰᑉ ᐃᔾᔪᓂᖏᓐᓂᒃ 1979-ᒥᐅᓚᐅᕐᓯᒪᔪᒥᑦ,” ᐅᖃᖅᑐᖅ ᐸᔅᑳᓪ ᐸᑑᔨ, ᑐᑭᒧᐊᖅᑎᑦᑎᔨ ᐅᑯᓄᖓ GRID-Geneva, ᑐᓴᒐᒃᓴᓕᐊᒃᑯᑦ ᓴᖅᑭᑕᐅᓂᑯᓂᒃ ᔫᓇᐃᑕᑦ ᓇᐃᓴᓐᔅᑯᑦ ᐊᕙᑎᓕᕆᓂᕐᒧᑦ ᐱᓕᕆᐊᖏᑦᑎᒍᑦ (UNEP).

ᐆᑐᓇᕐᓕ ᒫᓐᓇ ᖃᓄᐃᓕᐅᕈᓯᐅᓕᕐᑐᒥᑦ ᑕᒪᑐᒪᓂ ᐊᕐᕌᒍᒥ ᐅᑭᐅᕐᑕᖅᑐᕐᒥᑦ, ᒥᒃᖠᕚᓪᓕᐊᔪᑦ ᓯᑯᐃ ᐱᕚᓪᓕᕈᑎᒋᓯᒪᕙᖓᑦ ᐅᑭᐅᕐᑕᖅᑐᕐᒥ ᐅᖅᑰᓯᕙᓪᓕᐊᓂᕐᒧᑦ ᐊᕐᕌᒍᒐᓴᐅᓕᖅᑐᓂᒃ.

ᐅᑯᑎᒎᓇᕐᓕ ᑐᓴᒐᒃᓴᓕᐊᑎᒍᑦ, “ᓯᓚᐅᑉ ᐅᖅᑰᓂᖓ ᖁᕝᕙᖅᐹᓪᓕᖅᐳᖅ ᒪᐅᖓ 0.5°C ᐊᕐᕌᒍᑦ ᖁᓕᓂᒃ 1982-ᓗ 2017-ᓗ ᐊᑲᓐᓂᖓᓂᒃ, ᐱᔾᔪᑎᖃᓗᐊᖅᖢᓂ ᓯᕿᓂᕐᒥᙶᖅᑐᖅ ᐃᒃᐱᖕᓇᓗᐊᓕᕐᓂᖓᓄᑦ ᓯᖁᖃᕈᓐᓃᖅᐸᓪᓕᐊᓕᓚᐅᕐᓂᖓᓂᒃ 1979-ᒥᑦ. ᐅᓇ ᒪᕐᕈᐃᖅᖢᓂ ᓱᑲᓕᓂᕐᓴᒻᒪᕆᒃ ᓄᓇᕐᔪᐊᒥᑦ ᐊᑐᖅᐸᒃᓂᕐᒥᑦ.”

ᐅᓇ ᐊᐅᔭᐅᔪᖅ ᐊᔾᔨᐅᔪᑑᓯᒪᙱᓚᖅ.

ᐊᕐᕌᒍᒥ ᐊᕐᕌᒍᒧᑦ ᑕᐃᒪᐃᖃᑦᑕᐃᓐᓇᓂᖅ ᑲᔪᓯᒐᓗᐊᖅᑎᓪᓗᒍ, ᓯᑯᖃᕐᓂᖅ ᒫᓐᓇ ᐅᑎᖅᐸᓪᓕᐊᓕᕆᕗᖅ.

“ᓯᑯ ᖁᐊᖅᐸᓪᓕᐊᓕᑕᐃᓐᓇᕐᒪᑦ,” ᐅᖃᖅᑐᖅ. ᐊᒡᓘᒃᑲᖅ.

ᐅᓪᓗᓂ ᖁᓕᓂ, ᑕᐃᒪᙵᓂᑦ ᐅᒃᑑᐱᕆ 20-ᐅᓚᐅᕐᑎᓪᓗᒍ, ᑕᕆᐅᑉ ᓯᑯᖓ ᐊᖏᒡᓕᕚᓪᓕᓚᐅᕐᑐᖅ ᒪᐅᖓᐸᓗᒃ 1.5 ᒥᓕᐊᓐ ᓯᑯᐃᐊ ᑭᓛᒥᑕᓂᒃ, ᐃᓚᒋᔭᐅᓪᓗᓂ ᐃᒪᖅ ᐅᖅᓱᖅᑑᑉ ᖃᓂᒋᔭᖓᓃᑦᑐᖅ.

ᒫᓐᓇᑎᑐᑦ ᖁᐊᖅᐸᓪᓕᐊᓂᖅ ᑲᔪᓯᒍᓂ, 2019 ᖁᕝᕙᓯᖕᓂᕐᓴᐅᒃᑲᓐᓂᑐᐃᓐᓇᕆᐊᓕᒃ 2012-ᒥᐅᓚᐅᕐᑐᓂᒃ.

 

Share This Story

(0) Comments

Join the Conversation

Your email address will not be published. Required fields are marked *

*


Protected with IP Blacklist CloudIP Blacklist Cloud