ᑲᓇᑕᒥ ᐃᓄᐃᒃ ᐊᖓᔪᖅᑳᖓ ᐃᑲᔪᕐᓂᐊᖅᑐᖅ ᑭᖑᓪᓕᕐᒥ ᓂᕈᐊᓕᕐᐸᑕ ᒐᕙᓇ ᔭᓄᕈᒥᑦ

ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐱᓕᕆᖃᑕᐅᒻᒪᕆᖕᓂᐊᕐᑐᖅ ᓂᕈᐊᕋᓱᒃᑐᓂᒃ ᑲᓇᑕᒥᒃ ᑭᖑᓪᓕᕐᒥ ᒐᕙᓇ ᔭᓄᕉᓂᐊᕐᒥᒃ.

ᑕᐃᒪᐃᔾᔪᑎᖃᕐᓂᐊᕐᑐᖅ ᐃᓚᒋᔭᐅᓂᐊᕐᒪᑦ ᖃᐅᔨᓇᓱᒃᑎᓂᒃ ᓂᕈᐊᒐᒃᓴᐅᓂᐊᕐᑐᓂᒃ ᐱᓕᕆᐊᖃᖅᑐᓂᒃ ᑲᓇᑕᐅᑉ ᐊᖓᔪᖅᑳᖓᓄᑦ ᑐᓂᔭᐅᓂᐊᕐᑐᓂᒃ.

ᑕᒥᓂᒃ ᓚᐸᓛᖕᒃ, ᒐᕙᒪᑐᖃᒃᑯᑦ ᒐᕙᒪᓕᕆᔨᐅᖃᑎᒌᓄᑦ ᒥᓂᔅᑕ, ᑐᓴᖅᑎᑦᑎᓚᐅᕐᑐᖅ ᑖᒃᑯᓂᐊ ᐱᓕᕆᓂᐊᖅᑐᓂᒃ ᐋᖅᑭᒃᓯᓚᐅᕐᓯᒪᓂᖏᓐᓂᒃ ᒫᔅᓯ 12-ᒥᑦ.

ᐅᐱᐊᑦ, ᓇᐃᓐ ᓄᓇᑦᓯᐊᕗᑦᒥᐅᑕᕕᓂᖅ, ᓄᓇᖃᖅᑳᖅᑐᓂᙶᖅᑐᑐᐊᖅ ᑖᒃᑯᓇᓂ ᖃᐅᔨᓇᓱᒃᑎᐅᓂᐊᕐᑐᓂᒃ.

ᑖᓐᓇ ᐃᓄᐃᑦ ᑕᐱᕇᑦ ᑲᓇᑕᒧᑦ ᐊᖓᔪᖅᑳᖑᓯᒪᔪᖅ ᑕᐃᒪᙵᑦ 2015-ᖑᓚᐅᕐᓯᒪᔪᒥᒃ ᐊᒻᒪ ᐊᐃᑉᐸᖓᓂ ᓂᕈᐊᖅᑕᐅᓚᐅᕐᓂᖓᒍᑦ ᐊᖓᔪᖅᑳᖑᓂᖓ ᓇᑉᐸᕈᖅᑐᖅ ᓂᕈᐊᖅᑕᐅᒃᑲᓐᓂᓚᐅᕐᓯᒪᑎᓪᓗᒍ 2018-ᒥᑦ.

2015 ᓯᕗᓂᐊᓂ, ᐅᐱᐊᑦ ᐃᖅᑲᓇᐃᔭᓚᐅᕐᓯᒪᔪᖅ ᐊᕐᕌᒍᓂ ᖁᓕᓂᒃ ᑐᑭᒧᐊᖅᑎᑦᑎᔨᐅᓪᓗᓂ ᐃᓄᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᓕᕆᕝᕕᖕᒥᑦ ᓄᓇᕗᑦ ᑐᙵᕕᒃᑯᑦ ᐃᖃᓗᖕᓂ ᑎᑎᕋᕐᕕᖓᓂᒃ.

ᒐᕙᓇ ᔭᓄᕉᕋᑖᓚᐅᕐᑐᖅ, ᔫᓕ ᐸᐃᔭᑦ, ᐃᖅᑲᓇᐃᔮᖓᓂᒃ ᓄᖅᑲᓚᐅᕐᓯᒪᖕᒪᑦ ᔭᓄᐊᕆ 21-ᒥᑦ, ᐅᓂᒃᑲᐅᓯᐅᑲᑕᓚᐅᕐᑎᓪᓗᒍ ᑖᓐᓇ ᐊᐅᓚᑦᑎᔨᖏᓐᓄᓪᓗ ᐊᖓᔪᖅᑳᖅ, ᐊᓴᓐᑕ ᑎ ᓗᕋᓐᔪ, ᐊᖓᔪᖅᑳᖑᓚᐅᕐᓂᖏᓐᓂ ᖁᕕᐊᓇᙱᓗᐊᕐᑐᐊᓗᒃᑯᑦ ᐃᖅᑲᓇᐃᔭᖅᑎᓄᑦ.

ᓚᐸᓛᖕᒃ ᐃᒃᓯᕙᐅᑕᐅᖃᑕᐅᓂᐊᕐᑐᖅ ᖃᐅᔨᓇᓱᖕᓂᕐᒧᑦ ᐱᓕᕆᖃᑎᒌᖕᓂᐊᕐᑐᓂᒃ ᐱᖃᑎᖃᕐᓗᓂ ᔮᓂᔅ ᓱᕋᑦ, ᑖᓐᓇᓕ ᐃᖅᑲᓇᐃᔮᖃᖅᖢᓂ ᖁᑦᑎᓛᒥ ᒐᕙᒪᑐᖃᒃᑯᑦ ᑎᑎᕋᖅᑎᓂᒃ ᐅᕙᓂ ᐳᕆᕕ ᑲᑎᒪᔨᕐᔪᐊᓄᑦ.

ᐊᓯᖏᑦ ᐃᓚᒋᔭᐅᔪᑦ ᑖᒃᑯᓇᓂ ᐅᑯᐊᖑᔪᑦ:

• ᑖᓂᐅᓪ ᔪᑐᕋᔅ, ᐊᔪᕆᕐᓱᐃᔨᒋᔭᐅᔪᖅ ᔫᓂᕘᓯᑎᒥ ᒪᓐᑐᕆᐊᒥ.
• ᔫᑎᑦ ᓚᐅᕌᒃ, ᐃᒃᓯᕙᐅᑕᖅ ᐸᐸᑦᑎᔨᓂᒃ ᑲᓇᑕᒥ ᐆᒪᔪᓂᒃ ᑕᑯᔭᒐᕋᕐᕕᒃᒧᑦ ᐊᒻᒪ ᑎᑎᕋᖅᑎᐅᓂᑰᓪᓗᓂ ᒐᕙᓇ ᔭᓄᕈᒧᑦ.
• ᓱᕈᒪᑐᕋ ᓴᓇᑕᓂ, ᐃᒃᓯᕙᐅᑕᐅᑲᐃᓐᓇᕐᑐᖅ ᑲᓇᑕᒥ ᑎᑎᖅᑲᒃᑯᕕᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᒫᓐᓇ ᐊᒻᒪ ᐃᓚᒋᔭᐅᓚᐅᕐᓯᒪᓪᓗᓂ ᐊᔾᔨᒌᙱᑦᑑᑎᓂᒃ ᐱᓕᕆᕝᕕᖕᓄᑦ ᑲᑎᒪᔨᓄᑦ.

ᑐᓴᖅᑎᑦᑎᒍᑎ ᐅᖃᕐᓯᒪᒋᔭᐅᓚᐅᕐᑐᖅ ᓚᐸᓛᖕᒃ ᐱᓕᕆᐊᖃᑲᐅᖅᑐᖁᓂᖏᓐᓂᒃ ᑖᒃᑯᐊ ᐱᓕᕆᔨᐅᓂᐊᖅᑐᑦ.

“ᐃᓕᓴᕐᓯᓯᒪᓪᓗᑎᒃ ᐊᔾᔨᐅᙱᓐᓂᖓᓂᒃ ᖃᓄᐃᓕᖓᒍᑎᐅᔪᖅ ᐊᒻᒪᓗ ᑐᑭᓯᓯᒪᓪᓗᑎᒃ ᐅᓇ ᒐᕙᓇ ᔭᓄᕈᒧᑦ ᐃᓂᐅᕙᒃᑐᖅ ᐃᓄᖃᕆᐊᖃᕐᓂᖓᓂᒃ ᓇᐅᒃᑯᕈᓘᔭᖅ ᑕᐅᑐᒃᓯᒪᓂᒃᑯᑦ, ᐃᓚᒋᔭᐅᔪᑦ ᖃᐅᔨᓇᓱᖕᓂᕐᒧᑦ ᐊᖏᖃᑎᒌᓚᐅᑐᑦ ᑕᒪᑐᒥᖓ ᐱᓕᕆᐊᖃᑲᐅᕐᑐᕐᓂᐊᕐᓂᕋᖅᖢᑎᒃ,” ᓚᐸᓛᖕᒃ ᐅᖃᕐᓯᒪᓚᐅᕐᑐᖅ ᑐᓴᒐᒃᓴᓕᐊᓂᒃ.

ᒐᕙᓇ ᔭᓄᕈ ᑭᒡᒐᖅᑐᐃᔨᐅᖕᒪᑦ ᑲᓇᑕᐅᑉ ᐊᖓᔪᖅᑳᖃᕐᓂᖓᓂᒃ, ᑯᐃᓐ ᐃᓕᓴᐱ II, ᐊᒻᒪᓗ ᐱᓕᕆᐊᖃᖅᐸᒃᖢᓂ ᑯᐃᓐ ᐱᓕᕆᐊᒃᓴᖏᓐᓂᒃ ᑲᓇᑕᒥ, ᒪᑯᓂᖓ ᐊᖏᖅᑎᑦᑎᔨᐅᓪᓗᓂ ᒪᓕᒐᒃᓴᓂᒃ ᒪᓕᒐᓕᕆᕕᒡᔪᐊᒥᑦ ᐋᖅᑭᒃᑕᐅᕙᒃᑐᓂᒃ.

ᑕᐃᒪᙵᓪᓕ ᐸᐃᔭᑦ ᐱᓕᕆᐊᖃᕈᓐᓃᓚᐅᕐᑎᓪᓗᒍ ᐅᓇ ᐅᕆᑦᓱᑦ ᕗᐊᒡᓄ, ᐊᖓᔪᖅᑳᖅ ᐃᖅᑲᖅᑐᐃᕕᒡᔪᐊᒧᑦ ᑲᓇᑕᒥ, ᑖᔅᓱᒪ ᒐᕙᓇ ᔭᓄᕉᑉ ᐱᓕᕆᐊᖏᓐᓂᒃ ᐱᓕᕆᐊᖃᑲᑕᓚᐅᑲᒃᑐᖅ.