ᒐᕙᒪᑐᖃᒃᑯᑦ ᐱᐅᓯᕚᓪᓕᖅᑎᑦᑎᓂᐊᖅᑐᑦ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ

For an English version of this story, see Feds to clean up Nutrition North

ᑲᓇᑕᐅᑉ ᒐᕙᒪᖓ ᐱᐅᓯᕚᓪᓕᖅᑎᑦᑎᓇᓱᒃᑐᖅ ᐊᒻᒪ ᐋᖅᑭᒃᓱᐃᓇᓱᒃᖢᑎᒃ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥᑦ ᐱᓕᕆᐊᒥᑦ ᐃᓚᒋᐊᖅᖢᒍ ᐃᑲᔫᑎᒃᓴᒃᑲᓐᓂᕐᓂᒃ, ᐱᓕᕆᓂᕐᒧᑦ ᑲᒪᒋᔭᖃᓪᓚᕆᖕᓂᕐᒥᑦ ᐊᒻᒪᓗ ᐃᑲᔫᑎᐅᕙᒃᑐᑦ ᐊᖑᓇᓱᖕᓂᕐᒧᑦ ᐱᓕᕆᐊᓂᒃ, ᓯᕗᓪᓕᖅᐹᒥᑦ ᑎᓯᐱᕆᒥ ᑕᐃᒪᐃᓐᓂᐊᕐᓐᕋᓚᐅᕐᓯᒪᓪᓗᑎᒃ, ᑭᓯᐊᓂᓕ ᐱᒋᐊᕐᓂᐊᖅᖢᓂ ᐅᑭᐅᖅ.

ᐃᑲᕐᕋᐃᑦ ᖃᔅᓯᑦᑎᐊᕈᓘᓕᖅᑎᓪᓗᒋᑦ ᑭᐱᓯᓂᐊᖅᓂᕐᒧ ᑲᓇᑕᐅᑉ ᖁᑦᑎᒃᑐᖓᓂᒃ ᖃᐅᔨᓴᕐᕕᒃᓴᒥ ᐃᖃᓗᒃᑑᑦᑎᐊᕐᒥ, ᐃᕚᓐ ᔫᓐᔅ, ᒪᓕᒐᓕᕆᕕᒡᔪᐊᕐᒥ ᑎᑎᕋᖅᑎ ᒥᓂᔅᑕᒧᑦ ᒐᕙᒪᓕᕆᓂᕐᒧᑦ ᐊᒻᒪ ᐅᑭᐅᕐᑕᖅᑐᕐᒥ ᐱᓕᕆᐊᒃᓴᓄᑦ ᐊᒻᒪᓗ ᑕᐅᕐᓰᖃᑎᒌᖕᓂᕐᒧᑦ, ᐅᕙᓃᓚᐅᕐᑐᖅ ᓘᒃ ᓄᕕᓕᒐᒃ ᐱᙳᐊᕐᕕᒃᒥᑦ ᐱᖓᑦᓯᐅᑎᓪᓗᒍ, ᐋᒐᓯ 21-ᒥ ᑐᓴᖅᑎᑦᑎᔭᖅᑐᖅᖢᓂ ᐊᓯᔾᔨᕈᑎᐅᔪᓂᒃ ᓂᕿᓄᑦ ᐃᑲᔫᑎᐅᕙᒃᑐᓂᒃ ᑖᓐᓇᓗ ᓈᒻᒪᙱᓕᐅᕈᑎᖃᓗᐊᓕᖅᑎᓪᓗᒍ.

ᖃᖓᑦᑎᐊᓵᖅ, ᖃᐅᔨᓴᕈᑎᕕᓃᑦ ᑎᑎᕋᖅᑕᐅᓯᒪᔪᑦ ᐅᕙᓂ ᑲᓇᑕᒥᑦ ᐋᓐᓂᐊᖅᑐᓕᕆᔨᒃᑯᑦ ᑲᑐᔾᔨᖃᑎᒌᑦ ᐅᖃᓕᒫᒐᖓᓂ ᖃᐅᔨᒍᑎᐅᓚᐅᕐᐳᖅ ᓂᕿᓄᑦ ᓈᒻᒪᙱᓕᐅᕈᑎᖃᒃᑲᓐᓂᓕᕐᓂᖏᓐᓂᒃ ᓄᓇᕗᒥᑦ ᐅᕘᓇ ᓂᕿᑦᑎᐊᕙᓕᕆᓂᖅ ᑲᓇᑕᒥ, ᐅᑯᑎᒎᓇᕐᓕ ᑲᑎᑕᐅᕙᓪᓕᐊᓯᒪᔪᓂᒃ ᑲᓇᑕᒥ ᓄᓇᓕᖕᓂ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕈᑎᓂᒃ. ᐱᔾᔪᑎᒋᓂᕋᖅᑕᐅᓚᐅᕐᑐᕐᓕ ᖃᐅᔨᓴᖅᑎᓄᑦ ᑐᕌᖓᑎᑕᐅᓚᐅᕐᓂᖓᓄᑦ ᓱᕈᔭᑦᑐᓂᒃ ᓂᐅᕆᖅᑕᐅᔭᕆᐊᓕᖕᓂᑦ ᓂᕿᓄᑦ ᓂᐅᕕᖅᑕᐅᔪᓐᓇᕐᓂᕐᓴᐅᕙᒃᖢᑎᒡᓗ ᐊᔪᕐᓴᙱᓐᓂᕐᓴᓄᑦ ᐅᑭᐅᕐᑕᖅᑐᕐᒥᐅᓄᑦ—ᐃᑲᔫᑎᖃᕋᓗᐊᕐᐸᑦ ᐅᕝᕙᓘᓐᓃᑦ ᐃᑲᔫᑎᖃᙱᒃᑲᓗᐊᕐᐸᑦ.

ᐃᖃᓗᒃᑑᑦᑎᐊᕐᒥ, ᔫᓐᔅ ᑐᓴᖅᑎᑦᑎᓚᐅᕐᑐᖅ ᐃᓚᒋᐊᕈᑎᒥ ᐃᑲᔫᑎᓂᒃ ᐃᒪᓐᓇ $1 ᑖᓚ ᐊᑕᐅᓯᕐᒧ ᑭᓗᒍᕌᒻᒧᑦ ᐃᓚᖏᓐᓄᑦ ᓱᕈᔭᙱᑦᑐᓄᑦ ᓂᐅᕕᐊᒃᓴᓄᑦ ᑎᑭᑎᑕᐅᓂᑯᓂᒃ ᐅᒥᐊᕐᔪᐊᒃᑯᑦ, ᓯᑲᐅᒃᑯᑦ ᐅᕝᕙᓘᓐᓃᑦ ᐅᑭᐅᒃᑯᑦ ᐊᖅᑯᑎᒋᔭᐅᕙᒃᑐᒃᑯᑦ. ᑕᒪᒃᑯᐊ ᑐᕌᒐᕆᔭᐅᓪᓗᑎᒃ ᐊᑭᑭᓛᖑᓇᔭᖅᑐᑦ ᐱᖁᑎᓂᒃ ᐊᒃᔭᖅᑐᐃᔨᓂ, ᐃᓱᒪᒋᔭᐅᔪᖅ ᐃᑲᑎᒃᓴᖅ ᐊᑐᖅᑕᐅᔪᓐᓇᕐᓂᐊᕐᓂᖓᓂᒃ ᐊᔪᓛᖑᕙᒃᑐᓄᑦ, ᒪᑯᓄᖓᐅᙱᓐᓂᕐᓴᖅ ᐊᑭᑐᓂᕐᓴᓂᒃ ᓂᐅᕕᕈᓐᓇᖅᑐᓂᒃ.

ᐃᑲᔫᑎᖃᖅᑎᑕᐅᔪᑦ ᐃᓚᖃᖅᑐᑦ ᐅᑯᓂᖓ ᒫᑲᕉᓂ, ᐅᕐᓱᒃᓴᖅ, ᓂᐱᔾᔭᐃᒃᑯᑎ, ᐃᓚᒃᓴᐅᑎ, ᐳᑦᑐᖅᓴᐅᑎ, ᐸᓂᖅᑐᑦ ᐲᓂᓰ, ᓚᓐᑎᐅᔅ, ᐲᓂᓰᑦ ᐊᒻᒪ ᐸᓚᐅᒑᒃᓴᖅ.

ᐊᒻᒪᓗᑦᑕᐅᖅ, ᐃᓱᒪᒋᓇᓱᒃᖢᒋᑦ ᐋᓐᓂᐊᖃᖅᑕᐃᓕᓂᕐᑯᑦ ᖃᓄᐃᑦᑕᐃᓕᓂᒃᑯᑦ ᐊᕐᓇᐃᑦ ᐊᒻᒪ ᓂᕕᐊᕐᓵᑦ ᐅᑭᐅᕐᑕᖅᑐᕐᒥ, ᐊᕐᓇᕐᓯᐅᑏᑦ ᐃᑲᔫᑎᖃᖅᑎᑕᐅᓛᖑᓗᑎᒃ ᐊᕐᕌᒍᓕᒫᖅ. ᒫᓐᓇᐅᔪᕐᓕ ᑖᒻᐹᓐᔅ ᐊᑭᖃᕐᒪᑕ $15-ᓗ $20-ᓗ ᐊᑯᓐᓂᖓᓂᒃ ᐃᖃᓗᖕᓂᑦ, ᑕᐅᑐᙳᐊᖅᖢᒍᓕ ᐊᑭᖃᕐᓂᖏᑦ $10 ᑐᖔᓂᑦ ᖃᓪᓗᓈᓂᑦ.

ᐊᖑᓇᓱᒃᑎᓄᑦ ᐃᑲᔪᕈᑎᓄᑦ ᐱᓕᕆᐊᖅ, ᑖᓐᓇᓗ ᑮᓇᐅᔭᖅᑖᖅᑎᑦᑎᒍᑎᐅᓂᐊᕐᓗᓂ ᐊᖑᓇᓱᒃᑎᓂᒃ, ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᐃᑲᔪᕈᑎᖃᖅᑎᑦᑎᒃᑲᓐᓂᕐᓂᐊᕐᑐᑦ ᐅᑭᐅᕐᑕᖅᑐᕐᒥᐅᑦ ᐱᔭᕆᐊᖃᖅᑕᖏᓐᓂᒃ ᒪᑯᓂᖓ ᓂᕿᓪᓚᕆᖕᓄᑦ ᒪᑯᓂᖓᐅᙱᓐᓂᕐᓴᖅ ᓂᐅᕕᕐᕕᖕᒥᙶᖅᑐᓂᒃ.

“ᐱᓕᕆᐊᖃᓕᒫᕐᓂᒃᑯᑦ ᑭᒃᑯᓕᒫᓂᒃ ᐃᓚᐅᑎᑦᑎᓂᕐᒥᑦ, ᐅᑭᐅᕐᑕᖅᑐᕐᒥᐅᑦ ᐅᖃᕐᓯᒪᓂᕐᓴᐅᖃᑦᑕᕐᒪᑕ ᐃᑲᔪᖅᑕᐅᔭᕆᐊᖃᒃᑲᓐᓂᕐᓂᕐᒥᒃ ᐃᓄᒃᓯᐅᑎᓂᒃ ᓂᕿᑖᕋᓱᖕᓂᕐᒧᑦ,” ᐅᖃᖅᑐᖅ ᓄᓇᑦᓯᐊᕐᒧᑦ ᓯᕗᓕᐅᕐᑎᐅᓂᑯ ᐊᒻᒪᓗ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ ᑲᓇᑕᒥ ᑲᑎᒪᔨᒋᔭᐅᔪᓄᑦ ᐃᒃᓯᕙᐅᑕᖅ ᓇᓕ ᑰᐊᓐᓄᐊᔨ ᑐᓴᒐᒃᓴᑎᒍᑦ ᑎᓯᐱᕆᐅᓚᐅᕐᓯᒪᔪᒥᑦ.

“ᑕᐃᒪᓐᓇ ᑐᙵᓱᒃᑎᓗᐊᖅᐸᕗᑦ ᒐᕙᒪᒃᑯᑦ ᐱᓇᓱᖕᓂᐊᕐᓂᖏᑦ ᐊᖑᓇᓱᒃᑎᓄᑦ ᐃᑲᔪᕈᑎᒃᓴᓂᒃ ᒪᑯᐊ ᐊᑭᑐᓗᐊᖅᑐᑦ ᐊᑭᑭᓐᓂᕐᓴᐅᓕᕈᓐᓇᖁᓪᓗᒋᑦ ᐊᒃᑐᐊᔪᑦ ᐊᖑᓇᓱᖕᓂᕐᒧᑦ.”

ᓈᒻᒪᙱᓕᐅᕈᑎᐅᓯᒪᓗᐊᕐᑐᑦ ᒪᑐᒧᖓ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥ, ᐊᒻᒪᓗ 2011-ᖑᑎᓪᓗᒍ ᐊᑐᖅᑕᐅᖔᓕᓚᐅᕐᓯᒪᓪᓗᓂ ᐅᓇᐅᑎᓪᓗᒍ ᓂᕿᓂᒃ ᑎᑭᓴᐃᓂᕐᒧᑦ ᐃᑲᔪᕈᑎ, ᒪᐅᓇ ᓴᕿᔮᙱᓗᐊᕐᓂᖏᓐᓄᑦ ᐊᒻᒪᓗ ᑭᓇ ᑲᒪᒋᔭᖃᒻᒪᕆᒋᐊᒃᓴᖓᓂ ᑭᒃᑯᑦ ᐃᑲᔫᑎᖃᕆᐊᒃᓴᖏᑦᑎᒍᑦ: ᐱᖁᑎᖃᖅᑎᑦᑎᔨ ᐊᒻᒪ ᓂᐅᕕᕐᕕᓕᒃ, ᐅᕝᕙᓘᓐᓃᑦ ᐱᔨᑦᑎᕋᖅᑕᐅᔪᑦ.

ᑕᒪᑐᒥᖓ ᐱᓕᕆᐊᖃᒃᑲᓐᓂᕐᓂᐊᕐᓗᑎᒃ ᐃᒪᐃᖁᔭᐅᓯᒪᔪᑦ ᓂᐅᕕᕈᑎᑦ ᐱᔭᐅᕙᒡᓗᑎᒃ ᓂᐅᕕᖅᑎᓪᓗᒋ ᓴᕿᔮᑐᖃᕐᓗᓂ ᐃᑲᔫᑎᐅᑎᑕᐅᔪᓂᒃ ᓂᕿᑦᑎᐊᕙᓕᕆᓂᖅ ᐅᑭᐅᕐᑕᖅᑐᕐᒥᙶᑐᒥᑦ.

ᐅᓇ ᑐᓇᖅᑎᑦᑎᓂᖅ ᓴᕿᑎᑦᑎᒍᑎᐅᓚᐅᕐᑐᖅ ᐅᑭᐅᕐᑕᖅᑐᕐᒦᑦᑐᒥᑦ ‘ᒪᓕᒋᐊᖃᕐᓂᕐᒧᑦ ᐊᒻᒪ ᕿᒥᕐᕈᐊᕐᓂᕐᒥ ᑲᑎᒪᔨᓂ’ ᑎᒃᑯᐊᖅᑕᐅᓂᑰᓪᓗᑎᒃ ᐅᑯᓇᙵᑦ ᑕᐃᒪᐃᖁᔭᐅᓂᕐᒧᑦ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᒃᑐᓂᒃ ᐊᒻᒪᓗ ᓄᓇᖃᖅᑳᖅᑐᓂᒃ ᐱᓕᕆᖃᑎᒌᒃᑐᓂᒃ, ᑖᒃᑯᐊᓗ ᑭᒡᒐᖅᑐᐃᔨᖃᖅᖢᑎᒃ ᑎᓴᒪᓂᒃ ᐃᓄᐃᑦ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᖕᓂᖔᖅᑐᓂᒃ ᐊᒻᒪᓗ ᐅᑯᓇᙵᑦ ᐃᓄᐃᑦ ᑕᐱᕇᑦ ᑲᓇᑕᒥ.

ᒪᓕᒋᐊᖃᖅᑐᑦ ᐊᒻᒪ ᖃᓄᐃᓕᖓᓂᐅᔭᕆᐊᓖᑦ ᑲᑎᒪᔨᓄᑦ ᓱᓕ ᐱᓕᕆᐊᖑᕙᓪᓕᐊᔪᖅ ᐱᓕᕆᖃᑎᒌᖕᓂᒃ, ᑭᓯᐊᓂᓕ ᑲᑎᒪᔩ ᑲᒪᒋᔭᖃᕐᓂᐊᖅᑐᑦ ᐊᑐᖅᑕᐅᕙᓪᓕᐊᔪᕕᓂᕐᓄᑦ ᖃᐅᔨᓴᕈᑎᓂᒃ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᕐᑕᖅᑐᕐᒥᑦ ᐱᓕᕆᐊᒧᑦ, ᐃᑲᔪᖃᑕᐅᓂᐊᖅᑐᑦ ᕿᒥᕐᕈᐊᕐᓂᕐᒥᑦ ᐊᒻᒪᓗ ᐃᑲᔪᕐᓗᑎᒃ ᒐᕙᒪᒃᑯᓐᓂᒃ ᐋᕿᒃᓱᐃᓂᕐᒥᒃ ᐱᓕᕆᐊᒃᓴᓄᑦ ᑕᒪᑐᒧᖓ ᓈᒻᒪᖕᓂᕐᓴᒥᑦ, ᐱᔾᔪᑎᒋᓗᒍ ᓂᕿᖃᑦᑎᐊᕐᓂᖅ ᓈᒻᒪᙱᓗᐊᖅᐸᖕᓂᖓ ᑲᓇᑕᐅᑉ ᓄᓇᓕᕋᓛᖏᓐᓂᒃ ᐊᒻᒪ ᓄᓇᖃᖅᑳᖅᑐᑦ ᓄᓇᖏᓐᓂᒃ.

ᐃᑲᔪᕈᑎᒃᓴᒃᑲᓐᓃᑦ ᐃᓱᒪᒋᔭᐅᔪᑦ ᒫᓃᓐᓇᔭᕐᓂᖏᓐᓂᒃ $3 ᒥᓕᐊᓐᑕᓚᓂ ᖁᓛᒍᑦ $14 ᒥᓕᐊᓐ ᑖᓚᐃᑦ ᐊᑐᖅᑕᐅᔪᒃᓴᓃᑎᓪᓗᒋᑦ.