ᒐᕙᒪᑐᖃᒃᑯᑦ ᐱᖓᓱᓂᒃ ᐋᓐᓂᐊᓯᐅᖅᑎᓂᒃ ᑕᒪᐅᖓᖅᑎᑦᑎᓂᐊᖅᑐᑦ ᓄᓇᕗᒥᑦ ᐋᓐᓂᐊᓯᐅᖅᑎᖃᙱᓗᐊᖅᑐᓄᑦ
9-ᓂ ᖃᐅᔨᓴᑲᑕᖃᑦᑕᕐᓂᐊᖅᑐᓂᒃ ᐊᐃᑦᑐᖅᑕᐅᑐᐃᓐᓇᕆᐊᓕᖕᓂ ᑕᒪᐅᙵᖅᑐᖃᕐᓂᐊᕐᒪᙵ ᓇᐃᓴᐃᔨᒃᑯᓐᓂ ᑲᓇᑕᒥ ᑕᒪᑐᒧᖓ ᐃᑲᔪᕐᓂᐊᖅᑐᓂᒃ
ᓄᓇᕗᑦ ᓯᕗᓕᐅᕐᑎᖓ ᐸᐅᓗᓯ ᐊᕿᐊᕈᖅ ᐅᖃᓪᓚᖃᑎᖃᖅᖢᓂ ᐊᓯᖏᓐᓂᒃ ᑲᓇᑕᒥ ᓯᕗᓕᐅᕐᑎᓂᒃ ᐊᒻᒪᓗ ᐳᕋᐃᒻ ᒥᓂᔅᑕ ᑐᕉᑑᒥ ᑕᒪᓐᓇ ᑕᖅᑭᖅ ᐱᒋᐊᓕᓵᖅᑎᒪᑎᓪᓗᒍ, ᑕᕝᕙᓂ ᒐᕙᒪᑐᖃᒃᑯᓐᓂᒃ ᓄᓇᕗᑦ ᐃᑲᔪᖅᑕᐅᖁᓚᐅᕐᓯᒪᔭᖓ ᒫᓐᓇ ᓄᕙᒡᔪᐊᕐᓇᖅ-19 ᐋᓐᓂᐊᕆᔭᐅᑲᑕᒃᑑᑉ ᒥᒃᓵᓄᑦ. ᑕᒪᑐᒧᖓ ᒐᕙᒪᑐᖃᒃᑯᑦ ᐱᖓᓱᓂᒃ ᐋᓐᓂᐊᓯᐅᖅᑎᓂᒃ ᐱᓕᕆᑎᑦᑎᓂᐊᖅᖢᑎᒃ ᐊᒻᒪᓗ 9-ᓂ ᖃᐅᔨᓴᑲᑕᖃᑦᑕᕐᓂᐊᖅᑐᓂᒃ ᐊᐃᑦᑐᖅᑕᐅᑐᐃᓐᓇᕆᐊᓕᖕᓂᒃ. (ᐊᔾᔨᙳᐊᖅ ᐅᕙᙵᑦ ᓯᒪ ᓴᕼᐊ ᔨᕆ)
For an English version of this story, see Feds sending 3 nurses to help fill Nunavut vacancies
ᒐᕙᒪᑐᖃᒃᑯᑦ ᐱᖓᓱᓂ (3) ᐋᓐᓂᐊᓯᐅᖅᑎᓂᒃ ᓄᓇᕗᒧᐊᖅᑎᑦᑎᓂᐊᖅᑐᑦ ᐊᒻᒪ 9-ᓂᒃ ᖃᐅᔨᓴᑲᑕᖃᑦᑕᕐᓂᐊᖅᑐᓂᒃ ᐊᐃᑦᑐᖅᑕᐅᑐᐃᓐᓇᕆᐊᓕᖕᓂ ᐃᑲᔪᕈᑎᐅᓗᑎᒃ ᐊᒥᒐᖅᓯᑲᑕᖕᓂᖏᓐᓂᒃ ᐃᖅᑲᓇᐃᔭᖅᑎᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᒥᑦ.
ᓄᑖᑦ ᐃᖅᑲᓇᐃᔭᖅᑎᐅᓂᐊᕐᑐᑦ ᐃᓚᒋᔭᐅᔪᑦ ᒐᕙᒪᑐᖃᒃᑯᑦ ᑭᐅᔾᔪᑎᒋᔭᖓᓂᒃ ᓯᕗᓕᐅᖅᑎᑦ ᐸᐅᓗᓯ ᐊᕿᐊᕉᑉ ᐱᔪᒪᔾᔪᑎᒋᓚᐅᕐᑕᖓᓂᒃ ᐃᑲᔪᖅᑕᐅᔪᒪᓂᕐᒥᒃ ᑲᒪᒋᔭᖃᕐᓂᒃᑯᑦ ᓄᓇᒡᕙᔪᐊᕐᓇᖅ-19-ᒥ ᐋᓐᓂᐊᖃᓕᕐᑐᓂᒃ ᓄᓇᕗᒥᒃ. ᑐᒃᓯᕋᐅᓯᐅᓚᐅᕐᓯᒪᖕᒪᑦ ᐳᕋᐃᒻ ᒥᓂᔅ ᔭᔅᑎᓐ ᑐᕉᑑᒧᑦ ᔭᓄᐊᕆ 10-ᖑᑎᓪᓗᒍ.
ᐋᓐᓂᐊᓯᐅᖅᑎᑦ ᐱᓕᕆᓕᒪᔪᑦ ᓄᓇᕗᒥᑦ, ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐅᖃᓚᐅᕐᑐᖅ ᑐᓴᒐᒃᓴᓂᒃ ᑐᓴᖅᑎᑦᑎᑎᓪᓗᒋᑦ ᔭᓄᐊᕆ 18-ᒥ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᔮᓐ ᒪᐃᓐ ᐅᖃᓚᐅᕐᑐᖅ ᐱᓕᕆᕝᕕᒋᔭᖓ ᖃᓄᐃᓕᖓᓂᐊᕐᒪᖔᑕ ᓱᓕ ᐋᖅᑭᒃᓱᐃᓂᕋᖅᖢᓂᒋᑦ ᓲᕐᓗ ᓇᓕᐊᓐᓄᑦ ᓄᓇᓕᖕᓅᕐᓂᐊᕐᒪᖔᑕ ᓄᑖᑦ ᐋᓐᓂᐊᓯᐅᕐᑎᑦ ᐊᒻᒪ ᖃᑯᒍ ᐱᒋᐊᓛᕐᒪᖔᑕ.
“ᐊᒃᓱᐊᓗᒃ ᐋᓐᓂᐊᓯᐅᖅᑎᑕᖃᒃᑲᓐᓂᕆᐊᖃᕐᒪᑕ ᐅᓄᕐᑐᑦ ᓄᓇᓖᑦ ᓄᓇᕗᒥᑦ ᑕᐃᒪᓕ ᐱᓕᕆᐊᖃᖅᑎᑕᐅᓂᐊᖅᑐᑦ ᐃᓄᖃᙱᔾᔪᑎᐅᔪᓂᒃ ᒫᓐᓇ,” ᒪᐃᓐ ᐅᖃᖅᑐᖅ.
ᐅᖃᓚᐅᙱᑦᑐᖅ ᓇᓕᐊᑦ ᓄᓇᓖᑦ ᐱᔭᕆᐊᖃᓛᙳᖕᒪᖔᑕ ᐋᓐᓂᐊᓯᐅᖅᑎᓂᒃ, ᑭᓯᐊᓂᓕ ᐅᖃᓚᐅᕐᑐᖅ ᒫᓐᓇ ᖁᓖᑦ (10) ᐋᓐᓂᐊᕖᑦ ᑭᓯᐊᓂ ᑐᐊᕕᕐᓇᖅᑐᓂᒃ ᐱᔨᑦᑎᕋᕈᓐᓇᓕᕐᒪᑕ ᐃᖅᑲᓇᐃᔭᖅᑎᖃᙱᓗᐊᕐᓂᕐᒧᑦ.
“ᐅᓇ ᓇᓗᓇᐃᕐᓯᓯᒪᔾᔪᑎ ᓱᓕ ᐋᓐᓂᐊᓯᐅᖅᑎᑖᒃᑲᓐᓂᕆᐊᖃᕐᓂᖏᓐᓂᒃ,” ᐅᖃᖅᑐᖅ.
ᑎᓇᕇ ᓴᒧᕕᐊᓪ, ᐅᖃᓪᓚᑦᑎᒋᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ, ᐅᖃᓚᐅᕐᑐᖅ ᔭᓄᐊᕆ 7-ᒥ 30-ᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓄᖃᙱᑦᑐᓂᒃ ᐃᖅᑲᓇᐃᔮᒃᓴᖃᕐᓂᕋᖅᖢᓂᐅᒃ ᓄᓇᕗᒥᑦ.
9-ᖑᔪᑦ ᖃᐅᔨᓴᖃᑦᑕᕐᓂᐊᖅᑐᑦ ᐊᐃᑦᑐᖅᑕᐅᑐᐃᓐᓇᕆᐊᓕᖕᓂᒃ ᓇᐃᓴᐃᔨᒃᑯᑦ ᑲᓇᑕᒥ ᐃᖅᑲᓇᐃᔭᖅᑎᖏᓐᓂᒃ ᐊᒻᒪᓗ ᐱᓕᕆᓂᐊᖅᖢᑎᒃ ᓄᓇᕗᑦ ᓯᓚᑖᓃᓪᓗᑎᒃ, ᒪᐃᓐ ᐅᖃᖅᑐᖅ.
(0) Comments