ᒐᕙᒪᑐᖃᒃᑯᑦ ᓕᐳᕈᖏᑦ ᓴᖅᑭᑎᑦᑎᕗᑦ ᓄᑖᒥ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓄᑦ ᒪᓕᒐᕐᒥᒃ
ᒪᓕᒐᖅ C-15 ᐋᖅᑭᒃᓱᖅᑕᐅᓚᐅᕐᑐᖅ ᐅᖃᖃᑎᖃᓚᐅᕐᑎᓪᓗᒋᑦ ᓄᓇᖃᖅᑳᖅᑐᓂᒃ ᑲᑐᔾᔨᖃᑎᒌᓂᒃ ᐃᓚᒋᔭᐅᓪᓗᑎᒃ ᐃᓄᐃᑦ ᑕᐱᕇᑦ ᑲᓇᑕᒥ
“The support of the Mastercard Foundation will allow Inuit the space, time and resources to determine how best to lead and plan for a new reality of higher education in Inuit Nunangat,” ITK president Natan Obed said of ITK’s new partnership. (File photo)
For an English version of this story, see Federal Liberals table new Indigenous rights bill
ᓕᐳᕈᓪ ᒐᕙᒪᒃᑯ ᓴᖅᑭᑎᑦᑎᓚᐅᕐᑐᑦ ᒪᓕᒐᕐᒥ ᑎᓯᐱᕆ 3-ᒥ ᐅᖃᕐᓯᒪᔪᒥ ᐅᑯᐊ ᒐᕙᒪᑐᖃᒃᑯᑦ ᒪᓕᒐᖓ ᒪᓕᒃᑎᑕᐅᓕᕐᓂᐊᕐᓗᓂ ᔫᓇᐃᑕᑦ ᓇᐃᓴᓐᑯ ᐅᖃᖅᑕᖏᓐᓂᒃ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ.
“ᖁᕕᐊᓱᒻᒪᕆᒃᐳᖓ ᒪᐅᖓ ᑎᑭᐅᑎᓯᒪᒐᑦᑕ,” ᐅᖃᖅᑐᖅ ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐅᖃᐅᓯᖃᖅᖢᓂ ᓯᕗᓪᓕᕐᐹᒥ ᐅᖃᓕᒫᖅᑕᐅᓂᖓᓂᒃ ᒪᓕᒐᖅ C-15, ᒪᓕᒐᖅ ᐃᓱᒪᒋᔭᖃᕐᓂᕐᒥᒃ ᔫᓇᐃᑕᑦ ᓇᐃᓴᓐᑲ ᐅᖃᖅᑕᖏᓐᓂᒃ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ.
ᓯᕗᓂᐊᒍᑦ ᒪᓕᒐᐅᔪᖅ ᐃᓕᓴᕐᓯᓯᒪᓂᕐᒧᑦ ᐅᖃᐅᓯᕐᒥᓐ, ᓴᖅᑭᑕᐅᓚᐅᕐᓯᒪᔪᖅ ᐃᒻᒥᒃᑰᕐᑐᒥ ᐃᓚᒋᔭᐅᔪᒧᑦ ᒪᓕᒐᓕᐊᖑᓪᓗᓂ ᐆᒧᖓ ᐊᓐᑏᐲᑯᓐᓄᑦ ᒪᓕᒐᓕᐅᕐᑎᒧᑦ ᕉᒥᐅ ᓵᒐᓈᔅ 2016-ᖑᑎᓪᓗᒍ ᑭᓯᐊᓂᓕ ᐊᑐᕈᓐᓃᑐᐃᓐᓇᓚᐅᕐᓯᒪᔪᖅ ᓴᓇᑦᒥ ᐱᓕᕆᐊᖑᑎᓪᓗᒍ 2019-ᒥᑦ ᓲᖃᐃᒻᒪ ᒪᓕᒐᓕᕆᕕᒡᔪᐊᕐᒥ ᐊᓂᒍᕐᑎᑕᐅᓚᐅᕐᓯᒪᙱᒻᒪᓐ ᓂᕈᐊᕐᓇᐅᑉ ᓯᕗᓂᐊᒍᑦ ᑕᕝᕙᓂᑦᑕᐃᓐᓇᖅ ᐊᕐᕌᒍᒥ.
ᑲᓇᑕᐅᑉ ᒐᕙᒪᖏ ᐊᑐᓕᓚᐅᕐᑐᑦ ᑖᓐᓇ ᓯᕗᓂᐊᒍᑦ ᒪᓕᒐᓕᐊᖑᓂᑯ ᑐᙵᕕᒋᔭᐅᓕᕐᖢᓂ ᓄᑖᒥ ᐱᖁᔭᓕᐅᕐᓂᐊᕐᓗᑎᒃ, ᐅᖃᖃᑎᖃᓚᐅᕐᓗᑎᒃ “ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᑎᒍᒥᐊᖅᑎᓂᒃ ᐊᒻᒪ ᑲᑐᔾᔨᖃᑎᒌᓂᒃ,” ᐅᕘᓇᓕ ᒪᓕᒐᖅ ᕿᒥᕐᕈᐊᕐᑕᐅᓂᐊᖓᒍᑦ ᑐᓂᔭᐅᓯᒪᔪᓂᒃ ᒐᕙᒪᑐᖃᒃᑯᓐᓂ.
ᐅᓇ ᕿᒥᕐᕈᐊᕈᑎᐅᔪᖅ ᐅᖃᕐᓯᒪᔪᖅ ᐅᓇ ᒪᓕᒐᖅ ᒪᓕᒃᓯᒪᓂᐊᕐᓂᕋᖅᖢᓂ ᐅᖃᕐᑕᐅᔪᕕᓂᖕᓂᒃ ᐃᒪᓐᓇ “ᓄᓇᕐᔪᐊᒥ ᑭᒃᑯᓕᒫᑦ ᐱᔪᓐᓇᐅᑎᖏᑦ ᐃᑲᔪᕈᑎᐅᓗᑎᒃ ᑲᓇᑕᒥ ᒪᓕᒐᖅ ᐊᑐᓕᕐᑎᑕᐅᓂᐊᕐᓂᖓᒍᑦ.”
ᐱᖁᔭᖅ ᒪᓕᒐᓕᐅᕐᑎᓂᒃ ᖃᓄᐃᓕᐅᕈᑎᒃᓴᓂᒃ ᐸᕐᓇᐅᓯᐅᕈᑎᐅᔭᕆᐊᖃᕐᓂᐊᕐᑐᖅ, ᐅᖃᖃᑎᖃᓚᐅᕐᓗᑎᒃ ᓄᓇᖃᖅᑳᖅᑐᑦ ᑲᑐᔾᔨᖃᑎᒌᖏᓐᓂᒃ, ᑖᒃᑯᐊ ᒐᕙᒪᑐᖃᒃᑯᑦ ᒪᓕᒐᖏᑦ ᒪᓕᒃᑲᓗᐊᕆᒃᓴᖏᓐᓂᒃ ᐅᖃᖅᑕᐅᓯᒪᔪᒥᓐ.
ᔫᓇᐃᑕᑦ ᓇᐃᓴᓐᑯᑦ ᐅᖃᖅᑕᖏᑦ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ (UNDRIP) ᐊᑐᓕᕐᑎᑕᐅᓚᐅᕐᓯᒪᔪᖅ ᔫᓇᐃᑕᑦ ᓇᐃᓴᓐᑯᓐᓄᑦ 2007-ᒥᑦ ᓄᓇᕐᔪᐊᒥᑦ ᐱᓕᕆᒍᑎᓄᑦ ᐆᒪᓇᓱᖕᓂᒃᑯᑦ, ᐃᓅᓯᖃᑦᑎᐊᕋᓱᖕᓂᕐᒧᑦ ᐊᒻᒪᓗ ᖃᓄᐃᑎᑦᑕᐃᓕᓂᕐᒥᒃ ᓄᓇᖃᖅᑳᖅᑐᓂᒃ ᓄᓇᕐᔪᐊᓕᒫᒥᑦ, ᐅᑯᐊ ᔫᓇᐃᑕᑦ ᓇᐃᓴᓐᔅ ᖃᕋᓴᐅᔭᒃᑯᑦ ᓴᖅᑭᔮᒐᖓ ᐅᖃᕐᓯᒪᔪᖅ.
ᖃᓄᐃᓕᐅᕐᓂᐊᕐᓂᕐᒧᑦ ᐸᕐᓇᐅᑎ ᐋᖅᑭᒃᓱᖅᑕᐅᔭᕆᐊᖃᕐᑐᖅ ᐊᕐᕌᒍᑦ ᐱᖓᓱᑦ ᐃᓗᐊᓂ ᑖᓐᓇ ᒪᓕᒐᖅ ᐊᑐᓕᕐᑎᑕᐅᓚᐅᕐᑎᓪᓗᒍ. ᖃᓄᐃᓕᐅᕐᓂᐊᕐᓂᕐᒧᑦ ᐸᕐᓇᐅᑎ ᓴᖅᑭᑕᐅᔭᕆᐊᖃᕐᓂᐊᕐᒥᔪᖅ ᒪᓕᒐᓕᕆᕕᒡᔪᐊᕐᒥ ᐊᒻᒪᓗ ᑭᒃᑯᓕᒫᓄᑦ ᑐᓴᐅᒪᔭᐅᓕᕐᑎᑕᐅᓗᓂ.
ᓄᓇᕗᒧᑦ ᓴᓂᑐ, ᑕᓂᔅ ᐹᑐᓴᓐ, ᐅᖃᓚᐅᕐᑐᖅ ᑖᔅᓱᒥᖓ ᒪᓕᒐᕐᒥᒃ C-15 ᐊᑐᕈᑎᖃᕐᓂᐊᕋᓱᒋᔭᖓ ᑭᓯᐊᓂ ᑲᒪᒋᑦᑎᐊᕆᐊᖃᕐᓗᓂ.
“ᐅᓇ ᐱᒻᒪᕆᐊᓗᒃ ᒪᓕᒐᖅ ᓄᓇᕗᒧᑦ,” ᐅᖃᖅᑐᖅ.
ᑖᔅᓱᒥᖓ ᒪᓕᒐᕐᒥ ᑕᑯᔪᓐᓇᒪᐅᕐᓂᖓᓄᑦ ᓴᖅᑭᑕᐅᓚᐅᕐᑎᓪᓗᒍ, ᐹᑐᓴᓐ ᐅᖃᓚᐅᕐᑐᖅ ᐱᐅᓯᕚᓪᓕᕈᑎᓂᒃ ᑕᑯᓯᒪᓂᕋᖅᖢᓂ ᐅᕙᓃᓐᓂᑯᓂᒃ ᒪᓕᒐᖅ C-262.
ᐅᔾᔨᕆᓗᐊᕐᓂᕋᓚᐅᕐᑕᖓᓗ ᐅᓇ ᐊᕐᕌᒍᓂ ᐱᖓᓱᓂᒃ ᐱᓕᕆᐊᖃᕈᓐᓇᕐᓂᐅᔪᖅ.
ᑐᑭᓯᑎᑕᐅᒃᑲᓐᓂᕈᒪᔪᕐᓕ ᓇᓕᐊᒃ ᐱᒻᒪᕆᐅᓛᖑᓂᐊᕐᓂᖓᓂᒃ — ᐃᓱᒪᓕᐊᕆᔭᐅᔪᑦ ᐃᖅᑲᖅᑐᐃᕕᒡᔪᐊᕐᒥ ᑲᓇᑕᒥ, ᓄᓇᕗᒥᑦ ᓄᓇᑖᕐᓂᕐᒧᑦ ᐊᖏᕈᑏᑦ, ᐅᕝᕙᓘᓐᓃᑦ ᒪᓕᒐᖅ C-15.
“ᑕᐃᒪᑐᖅ ᓴᓂᑐ ᐹᑐᓴᓐ ᑖᔅᓱᒥᖓ ᒪᓕᒐᕐᒥᒃ ᐃᑲᔪᕐᓂᐊᕐᐳᖅ,” ᐅᐱᐊᑦ ᐅᖃᖅᑐᖅ. ᐅᖃᖅᖢᓂ ᓴᓂᑑᑉ ᐃᓱᒫᓘᑎᒋᓚᐅᕐᑕᖏᓐᓄᑦ ᐱᖁᔭᐅᖁᔭᐅᓕᕐᓯᒪᔪᓂ ᑭᖑᕙᕈᑎᐅᓯᒪᓂᑰᖕᒪᓐ ᐊᒻᒪ ᐊᓯᐅᑐᐃᓐᓇᖅᖢᓂ ᐱᖁᔨᕗᖔᕈᑎᒍᑦ.
“ᐅᓄᕈᓘᔭᕐᑐᑦ ᓄᓇᑖᕈᑎᓅᖓᔪᑦ ᓂᓪᓕᕈᑎᐅᓯᒪᙱᒻᒪᑕ,” ᐅᐱᐊᑦ ᐅᖃᖅᑐᖅ.
ᐅᒥᐊᑦ ᐅᖃᓚᐅᕐᒥᔪᖅ ᐅᓇ ᒪᓕᕋᖅ C-15 ᐱᕕᖃᕈᑎᐅᓂᐊᕐᑐᖅ “ᒫᓐᓇ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓂᒃ ᐊᑐᓕᕐᑎᑦᑎᓂᕐᒥᒃ ᐅᕙᓂ ᑲᓇᑕᒥ ᐊᒃᓱᕈᓐᓇᕐᓂᕐᓴᒃᑰᖓᔪᒃᑯᑦ.”
ᓲᕐᓗ ᐃᒪᓐᓇ, ᐃᓚᖓ ᐱᔪᓐᓇᖅᑎᑦᑎᓇᔭᕐᑐᑦ ᐃᓄᒋᐊᒃᑑᑎᓂᒃ ᐊᑕᐅᓯᕐᒥᓪᓘᓐᓃᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᓱᕋᐃᓯᒪᓂᖏᓐᓂᒃ ᓴᖅᑭᑎᑦᑎᔪᓐᓇᕐᓗᑎ ᑎᒥᒋᔭᐅᔪᒥ ᑖᒃᑯᐊᓗ ᓈᒻᒪᙱᓕᐅᕈᑎᒋᔭᐅᒧᓂᒃ ᐋᖅᑭᒃᓱᐃᔨᐅᑎᓪᓗᒋᑦ. ᑕᐃᒪᓕ ᐃᒪᐃᓕᖓᑐᐃᓐᓇᖅᑰᔨᓇᔭᕐᒥ ᑭᒃᑯᓕᒫᑦ ᐱᔪᓐᓇᐅᑎᖏᓐᓄᑦ ᐃᓱᒪᓕᐅᕆᔨᐅᓂᕐᒥᒃ, ᐱᓗᐊᖅᑐᓂᒃ ᓄᓇᖃᖅᑳᖅᑐᓄᑦ.
ᐅᐱᐊᑦ ᐅᖃᓚᐅᕐᑐᖅ ᒪᓕᒐᖅ ᐱᓕᕆᐊᕆᔭᐅᑲᐅᕐᑐᖁᔭᖓ ᒪᓕᒐᓕᕆᔨᕐᔪᐊᑎᒍ ᐊᒻᒪ ᓴᓂᑐᑯᑎᒍᑦ, ᒐᕙᒪᑐᖃᒃᑯᑦ ᓂᕈᐊᒐᒃᓴᖃᓕᓚᐅᙱᓐᓂᖏᓐᓂᒃ. ᐅᖃᖅᖢᓂ ᐱᓕᕆᐊᒃᓴᖓᓕ ᐋᔩᖃᑲᑕᖕᓂᕐᒥᒃ ᒪᓕᒐᓕᕆᔨᕐᔪᐊᓂᒃ ᐊᒻᒪ ᓴᓂᑐᓂ ᑖᔅᓱᒥᖓ ᐃᑲᔪᕐᑐᐃᖁᔨᓗᓂ.
(0) Comments