ᒥᑦᑎᒪᑕᓕᒃᒥ ᐃᓐᓇᐅᓛᖑᓚᐅᕐᑐᖅ ᐃᖅᑲᐅᒪᔭᐅᔪᖅ ᐱᒻᒪᕆᐊᓘᓚᐅᕐᓂᖓᓂᒃ, ᓇᒡᓕᒍᓱᒃᑲᐅᓪᓗᓂ ᐊᒻᒪᓗ ᐃᒻᒥᓂᑐᐊᖅ ᐃᓱᒪᒋᔪᓐᓇᙱᖢᓂ

ᓖᑎᐊ ᖃᔮᖅ ᓄᓇᓕᕋᓛᓃᓕᖅᑎᓪᓗᒍ ᐅᒥᖕᒪᓕᐅᑉ ᓂᒋᖅᐸᓯᐊᓂᒃ 1951-ᒥ, ᐱᓕᕆᐊᖃᓚᐅᕐᓯᒪᔪᖅ ᖁᕕᐊᒋᔭᒥᓂᒃ — ᒥᕐᓱᖃᑦᑕᖅᖢᓂ ᐸᓖᓯᓄᑦ ᐋᓐᓄᕌᕆᔭᐅᓂᐊᖅᑐᓂᒃ ᑕᐃᑲᓃᑦᑐᓂᒃ ᐊᒻᒪᓗ ᐅᐃᖓᑕ ᑖᓐᓇ ᐸᓖᓯᐅᖃᑕᐅᓪᓗᓂ.

ᑐᓄᓂᖅᒧᑦ ᒪᓕᒐᓕᐅᖅᑎ ᑕᐃᕕᑦ ᖃᒪᓂᖅ ᐃᖅᑲᐅᒪᔾᔪᑎᖃᓚᐅᕐᑐᖅ ᖃᔮᑉ ᐃᓅᓯᕆᓚᐅᕐᑕᖓᓂ ᖃᖓᑦᑎᐊᓵᖅ ᓄᓇᕗᒥᑦ ᒪᓕᒐᓕᕆᕕᒡᔪᐊᕐᒥ. ᒥᕐᓱᖅᑎᒻᒪᕆᐅᓚᐅᕐᓯᒪᖕᒪᑦ ᐊᕐᕌᒍᒐᓴᖕᓂ ᐅᕙᓂ ᒍᕆᒡ ᕼᐋᐳ ᐸᓖᓯᒃᑯᓐᓂᒃ ᐊᐅᓱᐃᑦᑑ ᖃᓂᒋᔭᖓᓂᒃ.

ᖃᔮᖅ ᐃᓅᔪᓐᓃᓚᐅᕐᒪᓐ ᔫᓂ 28-ᖑᑎᓪᓗᒍ ᓯᕝᕕᐊᕐᒥᓂ ᓱᕋᒍᔾᔨᐊᓪᓚᓚᐅᖅᖢᓂ ᐅᕙᓂ ᑲᒪᒋᔭᐅᓪᓗᓂ ᐊᒻᐸᓯ ᕗᐃᐊᔅ ᐃᓐᓇᕐᓄᑦ ᑲᒪᒋᔭᐅᕝᕕᒃᒥᑦ ᐋᑐᕚᒥ, ᐅᖃᓚᐅᕐᑐᖅ ᒫᑕ ᖃᔮᖅ, ᓄᑲᖅᖠᖅᐹᖅ 11-ᓂ ᓖᑎᐊᑉ ᕿᑐᕐᖓᖏᓐᓂᒃ.

ᐊᕐᕌᒍᖃᓕᖅᖢᓂ 18-ᓂ ᓖᑎᐊ ᐅᐃᑖᓚᐅᕐᓯᒪᔪᖅ ᓛᔭᕉᓯ ᖃᔮᖅᒥ, ᑖᓐᓇᓗ ᐸᓕᓯᐅᖃᑕᐅᓪᓗᓂ ᐊᕐᕋᒍᑦ 30 ᑐᖏᑦᑎᐊᖓᓂᒃ.

ᒫᑕ ᐅᖃᓚᐅᕐᑐᖅ ᐊᓈᓇᖓ ᐊᒻᒪ ᐊᑖᑕᖓ ᓅᓚᐅᕐᓯᒪᖕᒪᑎᒃ ᐅᕗᖓ ᒍᕆᒡ ᕼᐋᐳᒧᑦ, ᑭᓯᐊᓂᓕ ᒐᕙᒪᑐᖃᒃᑯᓐᓄᑦ ᐃᓱᒪᒋᔭᐅᓚᐅᙱᑦᑐᖅ ᐊᓯᐊᓄᑦ ᓅᑕᐅᓯᒪᓂᐅᓂᖓᓂᒃ ᓲᖃᐃᒻᒪ ᓛᓴᕉᓯᐅᑉ ᐃᖅᑲᓇᐃᔮᖓᓅᖓᓂᖓᓄᑦ.

“ᑕᑉᐹᓂ ᑖᒃᑯᐊ ᐃᓄᑑᑦᑎᐊᓚᐅᕐᓯᒪᔪ: ᐊᑕᐅᓯᑦ ᐃᓚᒌᑦ ᐊᒻᒪ ᒪᕐᕉᒃ ᐸᓖᓰᒃ,” ᒫᑕ ᐅᖃᖅᑐᖅ. “ᐊᒻᒪᓗ ᐸᕐᓇᒃᓯᒪᔭᕆᐊᖃᓚᐅᕐᓯᒪᓪᓗᑎᒃ ᐃᓄᖕᓄᑦ ᓅᑕᐅᓕᒑᔪᓄᑦ.”

ᓖᑎᐊ ᑐᒃᑐᓂ ᐊᓐᓄᕌᓕᐅᖃᑦᑕᓚᐅᕐᓯᒪᔪᖅ ᐸᓖᓯᒃᑯᓐᓂᒃ, ᒥᑭᑦᑐᕈᓗᖕᒥᓪᓗ ᐊᑭᓕᖅᑕᐅᕙᒃᖢᓂ ᐊᒻᒪᓗ ᐅᐃᒥᓂᒃ ᕿᑐᕐᖓᖏᓐᓂᒡᓗ ᐊᓐᓄᕌᓕᐅᕆᐊᖃᖅᐸᒃᖢᓂ, ᖃᒪᓂᖅ ᐅᖃᓚᐅᕐᑐᖅ, ᐊᒻᒪᓗ ᓂᕿᓕᐅᕈᔾᔨᕙᒃᖢᓂ ᐃᓄᖕᓂ ᑕᒪᐅᙵᖅᑎᑕᐅᔪᓂᒃ ᖁᑦᑎᒃᑐᖅᒧᑦ.

“ᓖᑎᐊ ᐃᓚᒥᑎᑐᑦ ᐃᑲᔪᕆᐊᖃᓚᐅᕐᓯᒪᔭᖏᑦ ᑲᒪᒋᔭᐅᑎᑦᑎᐊᖅᖢᓂᒋᓪᓗ,” ᒫᑕ ᐅᖃᖅᑐᖅ.

ᑖᒃᑯᐊ ᖃᔮᒃᑯᑦ ᐃᓚᒌᑦ ᒥᑦᑎᒪᑕᓕᒃᒧᑦ ᐅᑎᓚᐅᕐᓯᒪᔪᑦ 1960-ᒥᑦ, ᒫᑕ ᐅᖃᖅᑐᖅ, ᐊᒻᒪᓗ ᓕᑎᐊ ᓄᓇᒌᓐᓇᓕᖅᖢᓂᐅᒃ ᑭᓯᐊᓂ ᐋᑐᕚᒧᑦ ᕕᕝᕗᐊᕆ 2017-ᒥ ᓄᒃᑎᖅᑕᐅᑎᓪᓗᒍ.

ᓖᑎᐊ ᐃᓅᓚᐅᕐᓯᒪᔪᖅ ᐅᓱᐊᓗᒃᒥ, ᐸᖕᓂᖅᑑᑉ ᖃᓂᒋᔭᖓᓂᒃ, ᑎᓯᐱᕆ ᐃᓱᓕᑉᐸᓪᓕᐊᓕᖅᑎᓪᓗᒍ ᒫᓂ 1922 ᒥᒃᓵᓂᒃ — ᑕᐃᒪᓕ 98-ᖑᓕᖅᖢᓂ ᐃᓅᔪᓐᓃᓚᐅᕐᓯᒪᔪᖅ.

“ᑕᐃᔅᓱᒪᓂ, ᒐᕙᒪᒃᑯᑦ ᐃᓅᓕᕐᓯᒪᓂᕐᒧᑦ ᓇᓗᓇᐃᒃᑯᑎᓂ ᐱᑖᖅᑎᑦᑎᑲᑕᓕᖅᑎᓪᓗᒋᑦ, ᐃᓄᖕᓂᓪᓗ ᐊᑎᓕᐅᕆᑲᑕᓕᖅᑎᓪᓗᒋᑦ, ᐅᓄᖅᑐᑦ ᓇᓚᐅᑦᑖᖃᑦᑕᓚᐅᕐᓯᒪᖕᒪᑕ ᐊᕐᕌᒍᓂᒃ, ᑕᖅᑭᓂᒃ ᐊᒻᒪ ᐅᓪᓗᕐᓂ ᐃᓅᕝᕕᒋᔭᖏᓐᓂᒃ,” ᒫᑕ ᐅᖃᖅᑐᖅ.

ᑭᓯᐊᓂ ᒫᑕ ᐅᖃᓚᐅᕐᑐᖅ ᓄᑕᕋᐅᖃᑎᒋᓚᐅᕐᓯᒪᔭᖓ ᓖᑎᐊ ᐅᓇ ᐃᓐᓇᑐᖃᐅᓕᖅᑐᖅ ᖄᐱᒃ ᐊᑕᒍᑦᓯᐊᖅ, ᑖᓐᓇᓗ 100-ᓂ ᐅᑭᐅᖃᓕᕋᒥ ᖁᕕᐊᓲᑎᖃᓚᐅᕐᓯᒪᓪᓗᓂ 2020-ᒥᑦ, ᐅᖃᓚᐅᕐᓯᒪᖕᒪᑦ ᓖᑎᐊᒎ ᑖᔅᓱᒪᙵᑦ ᐊᖓᔪᒃᖠᐅᕌᕐᔪᖕᓂᕋᓚᐅᖅᓯᒪᓪᓗᓂᐅᒃ.

ᓖᑎᐊ ᖃᐅᔨᒪᓚᐅᙱᑦᑐᖅ ᐊᑖᑕᖓᓂᒃ, ᐃᓅᔪᓐᓃᓚᐅᕐᓯᒪᓂᖓᓄᑦ ᓱᓕ ᐃᓐᓇᐅᓗᐊᖅᑎᓐᓇᒍ, ᐊᒻᒪᓗ ᓂᖏᐅᖓᑕ ᐱᑖᕆᓚᐅᕐᓯᒪᓪᓗᓂᐅᒃ ᑎᒍᐊᖅᑖᕆᓪᓗᓂᐅᒃ ᐃᓅᓱᒃᑑᓕᖅᑎᓪᓗᒍ, ᒫᑕ ᐅᖃᖅᑐᖅ.

ᒫᑕ ᐃᖅᑲᐅᒪᔪᖅ ᐊᓈᓇᖓ ᐅᖃᓪᓗᕆᓚᐅᕐᓂᖓᓂᒃ, ᐃᒻᒥᓂᑐᐊᕐᓗ ᐃᓱᒪᒋᔪᓐᓇᙱᖢᓂ, ᐃᓕᕋᓇᖅᖢᓂ ᐊᒻᒪ ᓇᒡᓕᒍᓱᒃᑲᐅᓪᓗᓂ — ᑕᒪᒃᑯᐊᓗ ᖃᓄᐃᒋᔪᓐᓃᕐᓯᒪᓪᓗᓂᖏᑦ ᑕᐃᒪᐃᔾᔪᑎᖏᑦ.

ᓱᐴᖅᑐᖅᐸᓚᐅᙱᑦᑐᑦ, ᐃᒥᐊᓗᒃᐸᙱᖢᑎᒃ, ᐅᖃᕐᓂᕐᓗᒃᑐᖃᖅᐸᙱᖢᓂ ᐅᕝᕙᓘᓐᓃᑦ ᑎᕝᕕᐊᕐᑕᖅᑐᖃᕆᐊᖃᙱᖢᓂ ᖃᔮᒃᑯᑦ ᐃᒡᓗᖓᓂᒃ ᒫᑕ ᐱᕈᖅᓴᖅᐸᓪᓕᐊᑎᓪᓗᒍ. ᐊᐅᔭᐅᓕᕌᖓ ᖃᐅᒪᑦᑎᐊᖅᖢᓂ ᒥᑦᑎᒪᑕᓕᒃᒥ, ᒫᑕ ᖃᑕᙳᑎᖏᓪᓗ ᐃᒡᓗᒦᑦᑕᕆᐊᖃᓕᖅᐸᒃᖢᑎᒃ ᓯᓂᖕᓇᖅᓯᔭᕌᖓ ᐊᒻᒪᓗ ᑐᓵᕙᒃᖢᑎᒃ ᐊᓯᖏᓐᓂᒃ ᓱᕈᓯᕐᓂ ᐱᙳᐊᑲᑕᒃᑐᓂ ᓯᓚᒥ.

“ᖃᓄᖅ ᐋᖅᑭᒃᓯᒪᑎᑦᑎᓇᓱᕕᒡᔪᐊᓚᐅᕐᓯᒪᖕᒪᑦ ᐊᒻᒪᓗ ᑕᐃᒪᓐᓇ ᓱᕈᓯᖏᓐᓂᒃ ᐃᓕᖁᓯᖃᖁᔨᓪᓗᓂ,” ᒫᑕ ᐅᖃᖅᑐᖅ.

“ᐊᒻᒪᓗ ᑐᓵᙱᓴᐅᔭᕈᓗᒡᓗᓂ ᐸᑎᒃᑕᐅᕌᓪᓚᖕᓇᖅᖢᓂ.”

ᓖᑎᐊ ᓄᓇᓕᖕᓂ ᐱᓕᕆᕈᓘᔭᖃᑦᑕᓚᐅᕐᓯᒪᔪᖅ, ᓈᑦᑎᖑᔭᒃᑯᑦ ᐊᔪᕆᕐᓱᐃᕙᒃᖢᓂ ᓱᕈᓯᕐᓂ ᒥᑦᑎᒪᑕᓕᒃᒥ ᐊᕐᕌᒍᒐᓴᒻᒪᕆᖕᓂᒃ ᐊᒻᒪᓗ ᒥᕐᓱᕆᐅᖅᓴᖅᑎᑦᑎᕙᒃᖢᓂ.

“ᐅᐸᒍᑎᖃᑦᑕᓚᐅᕐᓯᒪᔪᖅ ᖃᓄᐃᓕᐅᕈᑎᓕᒫᓂᒃ. ᑐᙵᓇᕈᓘᔭᓚᐅᕐᓯᒪᖕᒪᑦ ᐊᒻᒪᓗ ᓇᒧᙵᐅᕈᓘᔭᖅᐸᒃᖢᓂ ᐅᖃᓪᓚᖃᑎᖃᑲᑕᒃᖢᓂ ᐃᓄᖕᓂ,” ᒫᑕ ᐅᖃᖅᑐᖅ.

ᐅᐸᒐᓱᒃᑕᖓᓄᐊᕋᓱᒡᓗᓂ ᐃᑲᔪᖅᑕᐅᔪᒪᒍᓂ ᐊᖁᑲᑕᒃᑐᑦ ᖃᐅᔨᒪᓚᐅᕐᑐᑦ ᓄᖅᑲᖅᑎᑕᐅᓂᐊᕐᓂᖏᓐᓂᒃ ᐃᑭᒪᔪᒪᓗᓂ.

“ᓄᖅᑲᖅᑎᑦᑎᖃᑦᑕᓚᐅᕐᒪ ᓄᓇᓯᐅᑎᒦᒃᑯᕕᑦ, ᑎᓴᒪᓕᖕᒥᓪᓘᓐᓃᑦ ᓱᕈᓯᖅᑕᖃᐅᕋᓗᐊᖅᐸᑦ,” ᒫᑕ ᐅᖃᖅᑐᖅ ᐃᒡᓚᖅᓯᓪᓗᓂ. “ᓄᖅᑲᖅᑎᑉᐹᑎ ᐃᑭᐊᓪᓚᒃᐸᒃᖢᓂ.”

ᒫᑕᒧᓪᓕ, ᐊᓈᓇᖓ ᓴᙱᔪᐊᓘᓚᐅᕐᑐᖅ ᐱᓕᕆᐊᖏᑦᑎᒍ ᐊᑐᕈᒥᓇᖅᖢᓂ, ᑖᔅᓱᒧᖓᑐᐊᖑᙱᑦᑐᖅ ᑭᓯᐊᓂᓕ ᑕᒪᐃᓐᓄᓕᒫᖅ ᐃᓄᖕᓄᑦ.

ᓖᑎᐊ ᐃᓚᖏᓐᓂᒃ ᐃᓅᔪᓐᓃᖅᑐᖃᐅᕐᓯᒪᔪᖅ, ᒫᑕ ᐅᖃᖅᑐᖅ. ᐅᐃᖓ ᐃᓅᔪᓐᓃᓚᐅᕐᓯᒪᓪᓗᓂ ᐆᒻᒪᓯᕆᑳᓪᓚᒃᖢᓂ ᐊᒻᒪᓗ 7-ᓂ 11-ᓂᙶᖅᑐᓂᒃ ᕿᑐᕐᖐᖅᓯᒪᓪᓗᓂ ᐱᕐᕈᓗᐊᕿᓯᒪᓂᕐᒧᑦ ᐃᓚᖓᓪᓗ ᐃᓄᐊᖅᑕᐅᓯᒪᓂᕐᒧᑦ, ᖃᖓᑕᓲᒃᑯᑦ ᑲᑕᖃᑕᐅᓂᕐᒧᑦ, ᕿᕿᑦᑐᒧᑦ ᐊᒻᒪᓗ ᐃᓕᓐᓂᐊᕆᐊᖅᕕᓕᖅᓯᒪᓂᑰᓂᕐᒧᑦ ᓈᒻᒪᙱᓕᐅᕈᑎᓄᑦ. ᑭᓯᐊᓂᓕ ᓄᖅᑲᑐᐃᓐᓇᓚᐅᙱᑦᑐᖅ.

“ᐃᓅᓂᕐᒥᒃ ᓇᓗᓇᐃᒃᑯᑎᑦᑎᐊᕙᐅᓚᐅᕐᑐᖅ, ᐊᓯᐅᔨᓯᒪᕐᔪᐊᖅᖢᓂ ᓱᓕ ᓴᙱᔫᖏᓐᓇᖅᖢᓂ.”

ᒫᑕ ᐅᖃᓚᐅᕐᑐᖅ. “ᐊᒻᒪᓗ ᐃᓄᐃᑦ ᑖᔅᓱᒥᖓ ᑕᑯᔪᑦ ᖃᐅᔨᒪᓚᐅᕐᑐᑦ ᐊᓯᐅᔨᔭᖏᓐᓂ ᖄᖏᐅᑎᔪᓐᓇᕐᓂᖏᓐᓂᒃ ᖃᐅᔨᒪᒐᒥᒃ ᑖᓐᓇ ᐊᓯᐅᔨᓯᒪᒻᒪᕆᖕᓂᖓᓂᒃ ᐊᒻᒪ ᐃᓕᑦᑎᔪᓐᓇᓚᐅᖅᖢᑎᒃ.”

ᓖᑎᐊ ᐃᓚᖃᐅᕐᑐᖅ ᓄᓇᕗᓕᒫᒥᒃ, ᐱᓗᐊᖅᑐᒥᑦ ᕿᑭᖅᑖᓗᒃᒥᓐ ᐊᒻᒪ ᖄᓈᖅ, ᖃᓛᖡᑦ ᓄᓇᖓᓂᒃ.

ᐅᑯᓂᖓ ᕿᒪᐃᓚᐅᕐᑐᖅ ᕿᑐᕐᖓᖏᓐᓂᒃ, ᒨᓯᓯ ᖃᔮᖅ, ᒫᑕ ᖃᔮᖅ, ᐄᐳᕈᓪ ᖃᔮᖅ-ᐱᑦᓯᐅᓛᖅ ᐊᒻᒪ ᑳᒪᓐ ᖃᔮᖅ; ᑎᒍᐊᖓᓗ ᐃᕐᓂᖓ, ᓵᓕ ᐃᓄᐊᕋᖅ; ᑎᒍᐊᖏ ᐃᕐᖑᑕᖏᑦ, ᒍᐊᑎ ᖃᔮᖅ, ᐃᐅᕋᓐ ᐱᑦᓯᐅᓛᖅ ᐊᒻᒪ ᔩᓇ ᖁᒪᖔᐱᒃ.

“ᐃᓚᒌᖕᓂᖅ ᐊᒃᓱᐊᓗᒃ ᐱᒻᒪᕆᐅᒋᓚᐅᕐᒪᒍ.”