ᒥᑭᑦᑐᓂᒃ ᓈᒻᒪᙱᓕᐅᕈᑎᖃᕋᓗᐊᖅᖢᑎᒃ, ᓄᓇᕕᒃᒥ ᓄᑖᖅ ᑐᐊᕕᕐᓇᖅᑐᓄᑦ ᐅᖄᓚᕝᕕᒃ ᐊᔪᙱᑦᑐᖅ: ᐸᓖᓯᑦ

For English version, see Despite hiccups, Nunavik’s new emergency phone system is effective: police

ᓄᓇᕕᒃᒥ ᐸᓖᓯᒃᑯ ᐅᖃᓚᐅᕐᑐᑦ ᓄᓇᕕᒻᒥ ᓄᑖᖅ ᑐᐊᕕᕐᓇᖅᑐᓕᕆᓂᕐᒧᑦ ᐅᖄᓚᕝᕕᒃ ᐊᔪᕈᓐᓃᕐᓂᖓᓂ ᓈᒻᒪᙱᓕᐅᕈᑎᑕᖃᕋᓗᐊᖅᑎᓪᓗᒍ ᓄᓇᖃᖅᑐᓂᒃ.

ᐅᒥᐅᔭᖅᒥᐅᑕᑦ ᓯᕗᓪᓕᖅᐹᖑᓚᐅᕐᑐᑦ ᓄᓇᕕᒻᒥ ᓄᓇᓕᖕᓂ ᐸᓖᓯᓄ ᐅᖄᓚᔪᑦ ᐊᒻᒪᓗ ᐃᑭᑦᑐᓕᕆᓂᕐᒧᑦ ᐅᖄᓚᔪᑦ ᑭᐅᔭᐅᕙᒃᖢᑎᒃ ᐱᓕᕆᔨᓄᑦ ᓴᐃᓐ-ᐃᐅᔅᑕ, ᑯᐸᐃᒃᒥ ᐅᑯᓇᙵᐅᙱᑦᑐᖅ ᓄᓇᓕᖕᓂ ᐸᓖᓯᓄᑦ ᑕᒪᓐᓇ ᐅᑭᐅᖅ ᐱᒋᐊᕐᓯᒪᓕᕐᑎᓪᓗᒍ.

ᑰᔾᔪᐊᕌᐱᒃ ᐃᓚᒋᔭᐅᓕᓚᐅᕐᑐᖅ ᔫᓂᒥ ᐊᒻᒪ ᐳᕕᕐᓂᑐᖅ ᔪᓚᐃ ᕿᑎᐊᓂᒃ. ᑭᖑᓂᐊᒍ ᐃᓄᒃᔪᐊᒃ ᑭᖑᕙᕐᓯᒪᓚᐅᕐᑐᖅ.

ᐅᓇ ᐱᓕᕆᔾᔪᑎᐅᓕᕐᑐᖅ ᐅᖄᓚᕝᕕᐅᕙᒃᖢᓂ 110ᓄ ᑎᑭᑦᑐᓂᒃ ᐅᖄᓚᔪᓂᒃ ᑕᖅᑭᕐᒥᑦ, ᐅᓄᓛᖑᓪᓗᑎᒃ ᐅᖄᓚᔪᑦ 5:00-ᒥ 12:00-ᒧ ᐅᖄᓚᕙᒃᑐᑦ, ᐅᖃᓚᐅᕐᑐᖅ ᓵᓐ ᓛᓐᓯᑐᕇᑦ, ᓄᓇᕕᒻᒥ ᐸᓖᓯᒃᑯᑦ ᐊᖓᔪᖅᑳᖓᑕ ᑐᒡᓕᖓ.

ᐅᖃᐅᓯᖃᕆᐊᕐᑐᓚᐅᕐᓯᒪᔪᖅ ᓯᑎᐱᕆ 12-ᒥ ᑲᑎᒪᔨᓄᑦ ᐅᕙᓂ ᑲᑎᕕᒃ ᓄᓇᓕᓕᒫᑦ ᒐᕙᒪᑯᑦ ᑲᑎᒪᑎᓪᓗᒋᑦ ᑰᔾᔪᐊᖅᒥ.

ᓛᖕᓯᑐᕇᑦ ᐅᖃᓚᐅᕐᑐᖅ ᐸᓖᓯᒃᑯᑦ ᐊᑦᑕᑕᖅᑕᐅᓯᒪᔪᓂᒃ ᓄᓇᓕᖕᓃᑦᑐᑦ ᑲᒪᒋᔭᖃᕆᐊᖃᕈᓐᓃᕐᓂᖏᓐᓂᒃ ᑐᐊᕕᕐᓇᖅᑐᓂᒃ ᐅᖄᓚᔪᓂᒃ ᐊᒻᒪᓗ ᑭᐅᔭᕆᐊᖃᕈᓐᓃᖅᖢᑎᒃ. ᑕᒪᒃᑯᓂᖓ ᑭᐅᑲᑕᒍᓐᓃᕐᓂᖏᑦ “ᐊᖏᔪᒃᑯᑦ ᐊᑐᕐᓂᐅᕗᖅ” ᐸᓖᓯᑦ ᐱᓕᕆᐊᒃᓴᖏᓐᓂᒃ ᐱᓕᕆᐊᖃᕐᓂᕐᓴᐅᔪᓐᓇᕐᓯᓪᓗᑎᒃ, ᐅᖃᕐᑐᖅ.

ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᔮᓐ-ᕗᕌᓐᓱᐊ ᒨᕆᓐ ᑕᒪᑐᒥᖓ ᐊᖏᕈᑎᖃᓚᐅᕐᒥᔪᖅ, ᐅᖃᖅᖢᓂ ᐅᖄᓚᐅᑎᓂᒃ ᑭᐅᕙᖕᓂᕐᒥ ᑲᒪᒋᔭᖃᕈᓐᓃᕐᓂᖏ ᐸᓖᓯᓂᒃ ᖃᓄᐃᑦᑐᓂᒃ ᐅᐸᒍᑎᓂᕐᓴᐅᔾᔪᑎᐅᕙᓕᖅᖢᓂ.

ᐅᑯᐊ ᐊᕕᒃᑐᕐᓯᒪᓂᒃᑯᑦ ᑲᑎᒪᔩᑦ ᐊᖏᕋᓗᐊᖅᖢᑎᒃ ᐃᑲᔪᕈᑎᒋᔭᐅᔪᓂᒃ ᖃᓄᐃᓕᐅᕈᓯᐅᓕᕐᑐᒧᑦ ᐅᖃᒪᐅᕐᒥᔪᑦ ᓄᓇᖃᖅᑐᑦ ᑐᐊᕕᕐᓇᖅᑐᓂᒃ ᐅᖄᓚᒍᑎᖃᕋᓱᒃᑎᓪᓗᒋᑦ ᓈᒻᒪᙱᓕᐅᕈᑎᖃᖃᑦᑕᕐᓂᖏᓐᓂᒃ.

ᐃᓛᓐᓂᒃᑯᑦ ᑭᐅᔨᐅᔪᑦ ᑕᒻᒪᖃᑦᑕᕐᓯᒪᖕᒪᑕ ᐃᓄᐃᑦ ᐊᑎᖏᓐᓂᒃ ᐅᕝᕙᓘᓐᓃᑦ ᐅᖄᓚᔪᓂᒃ ᐊᖅᑯᑎᐅᑉ ᐊᑎᖓᓂᒃ ᑐᓴᕐᕕᐅᔪᒪᕙᒃᖢᑎᒃ ᐊᒻᒪ ᑐᕌᕈᑎᖏᓐᓂᒃ.

ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦᑕ ᐃᒃᓯᕙᐅᑕᐅᑉ ᑐᒡᓕᖓ ᓘᓯ ᑯᒪᕐᓗᒃ, ᐅᒥᐅᔭᖅᒥᐅᑕᖅ, ᐅᖃᓚᐅᕐᑐᖅ ᐊᔪᕐᓇᖃᑦᑕᕐᓂᖓᓂ ᖃᓄᐃᓕᔾᔪᑎᓂᒃ ᐱᓕᕆᐊᕆᔭᐅᔭᕆᐊᒃᓴᖅ ᓄᓇᖓᓂ ᓲᖃᐃᒻᒪ ᓄᓇᖃᖅᑐᑦ ᐃᒡᓗᐃᑦ ᓇᐃᓴᐅᑎᖏᓐᓂᒃ ᐅᕝᕙᓘᓐᓃᑦ ᑐᕌᕈᑎᖏᓐᓂᒃ ᖃᐅᔨᒪᖃᑦᑕᙱᒻᒪᑕ.

“ᐃᓄᐃᑦ ᐅᖄᓚᑲᑕᐃᓐᓇᕆᐊᖃᖃᑦᑕᖅᑐᑦ ᓲᖃᐃᒻᒪ ᓯᕗᓪᓕᕐᒥ ᑐᑭᓯᔭᐅᓯᒪᙱᒻᒪᑕ,” ᐅᖃᕐᑐᖅ.

“ᑕᒪᓐᓇ ᐊᒃᓱᕈᕐᓇᖅᑐᕈᓗᒃ… ᐊᒃᓱᕈᕐᓇᖅᑐᓪᓛᓗᒃ.”

ᓛᖕᓯᑐᕇᑦ ᐅᖃᓚᐅᕐᑐᖅ ᑲᑎᒪᔨᓂᒃ ᐊᒻᒪ ᓄᓇᖃᖅᑐᓂᒃ ᐅᖃᖁᔨᓪᓗᓂ ᑕᒪᓐᓇ ᐱᓕᕆᔾᔪᓯᐅᔪᖅ ᓈᒻᒪᙱᓗᐊᓕᖅᐸᑦ.

“ᑕᒪᕐᒥ ᐅᖄᓚᒍᑎᐅᔪᑦ ᐅᖄᓚᕝᕕᒃᒧᑦ ᓂᐱᓕᐅᖅᑕᐅᕙᓪᓕᐊᖃᑦᑕᕐᒪᑕ, ᑕᐃᒪᓕ ᓈᒻᒪᙱᓕᐅᕈᑎᖃᕐᓂᕈᔅᓯ ᖃᓄᐃᓕᐅᕈᑎᕕᓂᕐᒧᑦ ᐅᕙᑦᑎᓐᓂᒃ ᖃᐅᔨᑎᑦᑎᒋᐊᖃᖅᑐᓯᒃ ᐊᒻᒪ ᐅᖄᓚᕝᕕᒃ ᐱᔪᒪᕝᕕᒋᔪᓐᓇᖅᖢᑎᒃ ᐅᖄᓚᒍᑎᕕᓂᕐᓂᒃ,” ᐅᖃᕐᑐᖅ.

“ᑕᐃᒪᓐᓇ, ᖃᓄᐃᓕᐅᕐᑐᖃᕐᓂᖅᐸᑦ ᓈᒻᒪᙱᓕᐅᕈᑎᐅᓗᓂᓗ ᑕᐃᒪᓕ ᐋᖅᑭᒋᐊᕈᓐᓇᕋᔭᕋᑦᑎᒍᑦ ᐊᒻᒪᓗ ᐊᔪᕈᓐᓃᖅᓴᖅᑎᑦᑎᓂᕐᒧ ᐃᓕᓐᓂᐊᕈᑎᐅᔪᓐᓇᕐᓗᑎᒃ ᐊᒻᒪ ᐱᔨᑦᑎᕋᐅᑎᑦᑎᓐᓂ ᐱᐅᓯᕚᓪᓕᕈᑎᐅᓗᑎᒃ.”

ᒨᕆᓐ ᐅᖃᓚᐅᕐᑐᖅ ᐸᓖᓯᒃᑯᑦ ᑭᐅᔨᐅᔪᓂᒃ ᓄᓇᕕᒃᒥᐅᑦ ᐊᑎᖏᓐᓂᒃ ᖃᐅᔨᒪᕚᓪᓕᕐᓂᐊᕐᒪᑕ ᐅᖃᖃᑎᖃᕈᓐᓇᕐᓂᕐᓴᐅᓗᑎᒡᓗ ᓄᓇᓕᖕᓃᑦᑐᓂᒃ ᐸᓖᓯᓂᒃ.

ᐊᓯᖓᑦᑕᐅᖅ ᓈᒻᒪᙱᓕᐅᕈᑎᒋᔭᐅᔪᖅ ᐅᖃᐅᓯᐅᓚᐅᕐᒥᔪᖅ ᑲᑎᒪᔪᓄᑦ ᐅᓇ ᐃᓄᖕᓂ ᑭᐅᔨᑕᖃᙱᓐᓂᖓᓂᒃ.

ᓛᖕᓯᑐᕇᑦ ᑲᑎᒪᔨᓄᑦ ᐅᖃᓚᐅᕐᑐᖅ ᑭᐅᔨᐅᔪᑦ ᐃᓄᒃᑎᑐᑦ ᑐᑭᓕᐅᕈᑎᓂ ᐊᑐᐃᓐᓇᖃᕐᓂᕋᖅᖢᑎᒃ ᑖᓐᓇᓗ ᑐᑭᓕᐅᕆᑲᐅᑎᒋᔪᓐᓇᕐᓯᓯᒪᓪᓗᓂ.

ᐅᖃᓚᐅᕐᑐᖅ ᐃᓄᖕᓂ ᐱᓇᓱᒃᑐᖃᕐᓯᒪᙱᓐᓂᖓᓂᒃ ᑭᐅᔨᐅᔪᒃᓴᒧᑦ, ᑭᓯᐊᓂᓕ ᐱᓇᓱᒃᓯᒪᔪᑦ ᐱᓕᕆᐊᖃᕈᒪᒧᓂᒃ.

“ᑭᓇᑐᐃᓐᓇᖅ ᖃᐅᔨᒪᒍᓂ ᐃᖅᑲᓇᐃᔭᕈᒪᔪᒥᒃ ᐅᖄᓚᕝᕕᐅᕙᒃᑐᒥᒃ ᑕᐃᒪᓕ ᖃᐅᔨᑎᑕᐅᔪᒪᔪᒍᑦ ᐊᒻᒪ ᐱᓕᕆᖃᑎᖃᕈᓐᓇᖅᖢᑎᒃ ᓴᐃᓐ-ᐃᐅᔅᑕ ᓄᓇᓕᐸᐅᔭᖓᓂᒃ ᑕᐃᑲᓂ ᐱᓕᕆᖃᑕᐅᔪᓐᓇᕐᓗᑎᒃ, ᐱᔪᓐᓇᕐᓯᓯᒪᒃᐸᑕ,” ᐅᖃᕐᑐᖅ.

ᐅᓇ ᓄᑖᖅ ᐱᓕᕆᔾᔪᓯ ᐊᑐᕐᓂᕐᒧᑦ ᐆᒥᖓ ᑕᒫᓂ ᕙᐃᐳ ᐋᒃᑎᒃ ᐃᑭᐊᕿᕕᒃᒥᒃ (Tamaani fibre optic internet), ᑖᓐᓇᓗ ᐊᑦᑕᑕᐅᑎᒋᔭᐅᓪᓗᓂ ᓂᒋᒦᓛᓄᑦ ᓄᓇᓕᖕᓂ ᓄᓇᕕᒃᒥ ᑕᓯᐅᔭᕐᔪᐊᑉ ᓯᒡᔭᖓᓃᑦᑐᓄᑦ.

ᐅᓇ ᕙᐃᐳ ᐋᑉᑎᒃ ᐊᑦᑕᑕᐅᑎ ᐅᑯᓄᖓ ᑎᑭᐅᑎᒃᐸᑦ ᐊᑯᓕᕕᒃ, ᐃᕗᔨᕕᒃ ᐊᒻᒪ ᓴᓪᓗᐃᑦᓄᑦ ᑕᐃᒪᓕ ᑖᒃᑯᐊ ᐊᑦᑕᑕᕐᓯᒪᓕᕋᔭᕐᒥᔪᑦ ᑐᐊᕕᕐᓇᖅᑐᓄᑦ ᑭᐅᔭᐅᕝᕕᒃᒧᑦ, ᓛᖕᓯᑐᕇᑦ ᐅᖃᕐᑐᖅ.

ᓄᓇᕕᒃᒥ ᐸᓖᓯᒃᑯᑦ ᐃᓱᒪᔪᑦ ᑕᒪᕐᒥᒃ 14 ᓄᓇᓖᑦ ᑖᔅᓱᒧᖓ ᐊᑦᑕᑕᖅᑕᐅᔪᓐᓇᓕᕐᓗᑎᒃ, ᑭᓯᐊᓂᓕ, ᑖᓐᓇ ᐱᖁᑎᒃᓴᖅ ᐊᕐᕌᒍᖓᓴᖕᓂ ᑭᓯᐊᓂ ᐱᐊᓂᒃᓴᐅᑕᐃᓐᓇᕐᓂᐊᕐᒪᓐ.

ᓛᖕᓯᑐᕇᑦ ᐅᖃᓚᐅᕐᑐᖅ ᐱᓕᕆᐊᖑᓂᖓᓂᒃ ᖃᐅᔨᓴᖃᑦᑕᕐᓂᐊᕐᓗᑎ ᐊᔾᔨᒌᙱᑦᑑᑎᓂᒃ ᐊᑦᑕᑕᕈᓐᓇᐅᑎᓄᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐅᖓᕙᒦᑦᑐᓄᑦ ᐊᔪᕐᓇᙱᑦᑐᕆᐊᒃᓴᖅ ᐅᖓᕙᒥ ᓄᓇᓖᑦ ᐊᑦᑕᑕᖅᑕᐅᔪᓐᓇᕐᒪᖔᑕ.

“ᑕᐃᒪᓕ ᖃᐅᔨᓴᕐᓂᐊᖅᑐᒍ ᓄᓇᒧᑦ ᖃᓂᓈᕐᓯᒪᔪᓂᒃ ᖁᒻᒧᒃᑎᑕᐅᓯᒪᔪᓂᒃ ᑕᒪᓐᓇ ᐊᔪᕐᓇᙱᑦᑕᕆᐊᒃᓴᖓᓂᒃ,” ᐅᖃᕐᑐᖅ.

“ᐱᓕᕆᔪᒪᒐᑦᑕ ᓈᒻᒪᙱᓕᐅᕈᑎᐅᑐᐃᓐᓇᕆᐊᓕᖕᓂ ᐊᑐᕈᒪᙱᖢᑕ ᐊᒻᒪᓗ ᐅᖄᓚᔪᓂᒃ ᐊᓯᐅᔨᑐᐃᓐᓇᖃᑦᑕᕈᒪᓇᑕ.”