ᒪᕐᕉᒃ ᑎᒍᔭᐅᔫᒃ ᓱᐴᖅᑐᒐᕐᓂᒃ ᓂᐅᕕᐊᒃᓴᖃᑲᑕᖕᓂᕐᒧᑦ ᑰᔾᔪᐊᖅᒥ

For English version, see Pair arrested for drug trafficking in Kuujjuaq

ᑯᐸᐃᒃᒥ ᐸᓖᓯᒃᑯᑦ ᑰᔾᔪᐊᖅᒥ ᑎᒍᓯᓚᐅᕐᑐᑦ ᒪᕐᕉᖕᓂ ᐊᖑᑏᖕᓂ ᐃᓚᒋᔭᐅᔪᓂᒃ ᐅᖃᐅᓯᕆᔭᖓᒍᑦ ᓄᓇᕕᐅᑉ ᐊᓯᐊᓂᒃ ᓱᐴᖅᑐᒐᕐᓂᒃ ᓂᐅᕕᐊᒃᓴᖃᖅᐸᒃᑐᓂᒃ.

ᑐᓴᒐᒃᓴᑎᒍᑦ ᑯᐸᐃᑦ ᐸᓖᓯᖏᑦ ᐅᖃᓚᐅᕐᑐᑦ ᐸᓖᓯᖏᑦ ᐊᒻᒪᓗ ᓄᓇᕕᒃᒥᑦ ᐸᓖᓯᒃᑯᑦ ᑎᒍᓯᓚᐅᕐᓂᕋᖅᖢᑎᒃ ᒪᕐᕉᖕᓂ ᐊᖑᑏᖕᓂ, ᐅᑭᐅᖃᖅᑑᒃ 29 ᐊᒻᒪ 41-ᓂ, ᐊᒻᒪᓗ ᐃᒡᓗᓂ ᑕᓪᓕᒪᓂ ᕿᓂᕐᕕᖃᓚᐅᕐᓯᒪᓪᓗᑎᒃ ᔭᓄᐊᕆ 19-ᒥ.

ᕿᓂᕐᕕᐅᓂᐅᔪᑦ — ᐅᕙᓂ ᑰᔾᔪᐊᖅᒥ ᐊᒻᒪᓗ ᐅᕙᓂ ᓴᐃᓐ-ᒌᐳᕆᐊᓪ-ᑎ-ᐳᕌᓐᑕᓐ, ᑯᐸᐃᒃᒥ — ᐱᖓᓱᓂᒃ ᐃᒡᓗᓂ ᐅᐸᒃᓯᓪᓗᑎᒃ, ᓇᖕᒥᓂᕆᔭᐅᔪᒥ ᐱᓕᕆᐊᖃᕐᕕᒃᒥ ᐊᒻᒪᓗ ᓴᓇᕝᕕᐅᑉ ᓄᓇᓯᐅᑎᖓᓂᒃ.

“ᐅᓇ ᐱᓕᕆᐊᖃᕐᓂᖅ ᓄᖃᖅᑎᑦᑎᓇᓱᖕᓂᕐᒧᑦ ᓱᐴᕐᑐᒐᕐᓂᒃ ᓂᐅᕕᐊᒃᓴᖃᖃᑦᑕᕐᓂᕐᒥᒃ ᑰᔾᔪᐊᖅᒥ, ᐊᒻᒪᓗ ᐱᑖᖅᐸᒃᖢᑎᒃ ᐅᕙᙵᑦ ᒪᓈᑐᕆᒥ,” ᑐᓴᒐᒃᓴᐃᑦ ᐅᖃᕐᓯᒪᓚᐅᕐᑐᑦ, ᑎᑎᕋᕐᓯᒪᓪᓗᓂ ᐅᐃᕖᑐᑦ.

ᖃᐅᔨᓴᖅᑐᐃᑦ ᓱᓕ ᑕᒪᑐᒥᖓ ᐊᒻᒪᓗ ᑎᒍᓯᒃᑲᓐᓂᑐᐃᓐᓇᕆᐊᖃᖅᖢᑎᒃ ᐊᒻᒪ ᕿᓂᒃᑲᓐᓂᑐᐃᓐᓇᕆᐊᖃᖅᖢᑎᒃ, ᐅᖃᕐᓯᒪᓚᐅᕐᑐᖅ. ᐸᓖᓯᒃᑯᑦ ᐅᑯᓂᖓ ᐱᓚᐅᕐᑐᑦ

• 110 ᒍᕌᒻᔅ ᑯᑲᐃᓐ;
• 1.36 ᑭᓗᒍᕌᔅ ᐱᕈᖅᓯᒪᔪᑦ ᓱᐴᖅᑐᒐᕐᓂ;
• 300 ᒥᐊᑕᕙᑕᒦᓐ ᐄᔭᒐᐃᑦ;
• 10 ᒍᕌᒻᔅ ᓯᓗᓯᐱᓐ, ᑕᐅᑐᕈᓘᔭᕐᓇᖅᑐᖅ;
• $21,050 ᑮᓇᐅᔭᓂ ᐊᒻᒪᓗ ᑮᓇᐅᔭᖃᕐᕕᒃᒥ; ᐊᒻᒪ
• ᐴᒃᓴᓂᒃ ᐊᒻᒪ ᑯᑲᐃᓐᒧ ᐴᒃᓴᓂᒃ.

ᐸᓖᓯᒃᑯᑦ ᐅᖃᓚᐅᙱᑦᑐᑦ ᐸᓯᔭᒃᓴᐃᑦ ᐊᑎᖏᓐᓂᒃ ᓲᖃᐃᒻᒪ ᐃᖅᑲᖅᑐᐃᕕᒃᑯᑦ ᐸᓯᔭᒃᓴᙳᖅᑎᑕᐅᙱᒻᒪᑕ ᓱᓕ, ᑯᐸᐃᒃ ᐸᓖᓯᓄᑦ ᐅᖃᖅᑎᒋᔭᐅᔪᖅ ᓵᔭᓐᑦ ᓈᓐᓯ ᕘᓂᐃ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ.

“ᒪᕐᕉᒃ ᐸᓯᔭᒃᓴᐅᔫᒃ ᐊᓂᑎᑕᐅᔪᓐᓇᓚᐅᕐᑐᑦ ᑕᑯᔭᐅᓛᕈᒪᓂᒃᑯᑦ, ᑕᐃᒪᓕ ᓱᓕ ᐃᖅᑲᖅᑐᖅᑕᐅᕝᕕᒃᓴᖓ ᐅᖃᐅᓯᐅᓚᐅᙱᑦᑐᖅ,” ᓵᔭᓐᑦ ᐃᓗᐊᐃᔅ ᒍᓴᑦ ᑎᑎᕋᓚᐅᕐᑐᖅ ᖃᕋᓴᐅᔭᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑖᒃᑯᐊᒃ ᒪᕐᕉᒃ ᐸᓯᔭᒃᓵᒃ ᐸᓯᔭᒃᓴᐅᑎᑕᐅᔫᒃ ᓱᐴᖅᑐᒐᕐᓂᒃ ᓂᐅᕕᐊᒃᓴᖃᕐᓂᕐᒧᑦ ᐊᒻᒪᓗ ᐸᓯᒪᓂᖏᓐᓂᒃ ᓂᐅᕕᐊᒃᓴᐅᓂᐊᖅᑐᓂᒃ, ᐊᒻᒪᓗ ᐊᓯᖏᓐᓂᒃ ᐸᓯᔭᒃᓴᖃᓕᑐᐃᓐᓇᕆᐊᖃᖅᖢᑎᒃ ᐅᕘᓇᑦ ᐱᕈᖅᑐᐃᑦ ᓱᐴᖅᑐᒐᐃᑦ ᒪᓕᒐᖓᒍᑦ ᐊᒻᒪᓗ ᐊᐅᓚᑕᐅᔪᑦ ᐋᖓᔮᕈᑏᑦ ᒪᓕᒐᖓᒍᑦ, ᐸᓖᓯᒃᑯᑦ ᐅᖃᓚᐅᕐᑐᑦ.

ᑎᒍᔭᐅᓚᐅᕐᑐᑦ ᐃᓚᒋᔭᐅᓪᓗᓂ ᑯᐸᐃᒃ ᐸᓖᓯᒃᑯᑦ ᐱᓕᕆᐊᖓᓂᒃ ᒪᑯᓂᖓ ᓱᐴᖅᑐᒐᕐᓂᒃ ᓂᐅᕕᐊᒃᓴᓕᕆᔪᓂᒃ ᑯᐸᐃᒃᒥ ᑕᐃᒪᙵ ᐃᓱᒪᕐᓱᕐᓇᓕᓚᐅᕐᓯᒪᑎᓪᓗᒍ 2018-ᒥ.