ᓂᐅᕕᐊᓴᖃᕐᓂᖅ ᓱᐴᖅᑐᒐᕐᓂᒃ ᐱᕚᓪᓕᕈᑎᐅᔪᓐᓇᖅᑐᖅ ᓄᓇᓕᖕᓂ ᓇᖕᒥᓂᖅ ᐱᓕᕆᐊᖑᔪᓄᑦ, ᓄᓇᕗᑦ ᒪᓕᒐᓕᐅᕐᑎᖏᑦ ᐅᖃᖅᑐᑦ

ᓂᐅᕕᐊᒃᓴᖃᕈᓐᓇᕐᓂᖅ ᑮᓇᐅᔭᓕᐅᕐᓂᒃᑯᑦ ᐱᕙᓪᓕᐊᒍᑎᐅᔪᓐᓇᖅᑐᖅ ᒥᑭᑦᑐᓂᒃ ᓄᓇᓕᖕᓂᑦ ᓇᖕᒥᓂᖅ ᐱᓕᕆᐊᕆᔭᐅᔪᓂᒃ, ᓄᓇᕗᑦ ᒪᓕᒐᓕᐅᕐᑎᖏᑦ ᐅᖃᓚᐅᕐᑐᑦ ᑲᑎᒪᔨᕋᓛ ᐅᖃᓪᓚᑲᑕᒃᑎᓪᓗᒋᑦ ᐱᓇᓱᐊᕈᓯᐅᓚᐅᕐᑐᒥᒃ ᓄᓇᕗᑦ ᒪᓕᒐᓕᕆᕝᕕᐊᓂᒃ.

“ᐃᓱᒪᒋᔪᓐᓇᖅᑕᕋ ᐃᒪᓐᓇ ᐱᕙᓪᓕᐊᔪᓕᕆᓂᐅᔪᓐᓇᕐᓂᖓ ᓄᓇᓕᖕᓂ ᕿᒥᕐᕈᐊᖅᑕᐅᔭᕆᐊᓕᒃ,” ᑮᓇᐅᔭᓕᕆᓂᕐᒧᑦ ᒥᓂᔅᑕ ᔪᐊᔾ ᕼᐃᒃᔅ ᐅᖃᓚᐅᕐᑐᖅ ᑕᓪᓕᕐᒥᖅ, ᒫᑦᓯ 8-ᒥᑦ, ᐅᓇ ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᖅᒧᑦ ᒪᓕᒐᓕᐅᕐᑎ ᔮᓐ ᒪᐃᓐ ᐅᖃᓪᓚᓚᐅᕐᑎᓪᓗᒍ.

ᒪᐃᓐ ᐊᐱᕆᓚᐅᕐᒥᔪᖅ ᐅᑯᐊ ᐱᕙᓪᓕᐊᔪᓕᕆᔨᒃᑯᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᑦ ᐃᑲᔪᕈᒪᓇᔭᕆᐊᒃᓴᖏᓐᓂᒃ ᒥᑭᑦᑐᓂᒃ ᐱᓕᕆᐊᖃᖅᑐᓂᒃ ᐃᓄᖕᓂᒃ, ᒪᑯᓂᖓᐅᙱᖔᖅᑐᖅ ᐊᖏᔪᓂᒃ ᐱᓕᕆᐊᓕᖕᓂᒃ ᓂᑯᕕᖅᑎᒃᑯᑎᒍᑦ (North West Co.) ᐊᒻᒪ ᐃᓚᒌᓴᒃᑯᑦ ᓂᐅᕕᐊᒃᓴᖃᓕᖅᑎᑦᑎᓂᕐᒥᒃ ᓱᐴᖅᑐᒐᕐᓂᒃ.

“ᓄᓇᑕᓐ ᐊᒻᒪ ᑯᐊᐸᒃᑯᑦ ᐊᓯᐊᓂᒃ ᑕᑯᓗᓂ, ᐱᑕᖃᖅᑐᒃᓴᐅᕗᖅ ᐱᓕᕆᐊᖃᕈᒪᓇᕋᔭᖅᑐᓂᒃ ᑕᒪᐅᓇ, ᑭᓯᐊᓂᓕ ᐃᑲᔪᕐᓂᐊᕈᑦᑕ ᑮᓇᐅᔭᓕᐅᕈᑎᐅᓇᓱᒃᑐᒥᑦ, ᑕᐃᒪᓕ ᐱᐅᓂᕐᓴᐅᓇᔭᖅᐳᖅ ᒥᑭᑦᑐᓂᒃ ᐱᓕᕆᐊᓂᒃ ᐃᑲᔪᖅᑐᐃᓗᓂ,” ᒪᐃᓐ ᐅᖃᖅᑐᖅ.

ᕼᐃᒃᔅ ᑭᐅᓚᐅᕐᑐᖅ ᑕᐃᒪᐃᑦᑐᓂᒃ ᐊᐱᖁᑎᓂᒃ ᐃᖅᑲᓇᐃᔭᖅᑎᒋᔭᖏᑦ ᑭᐅᔾᔪᑎᓯᐅᕋᓱᖕᓂᕋᖅᓗᓂᒋᑦ ᐱᖁᔭᓕᕆᓂᒃᑯᑦ ᐱᕙᓪᓕᐊᔪᓕᕆᓂᕐᒥ ᐱᓕᕆᐊᖏᑦᑎᒍᑦ.

ᓄᓇᕗᑦ ᓱᐴᖅᑐᒐᕐᒧᑦ ᐱᖁᔭᖅᔪᐊᖓ, ᐊᓂᒍᖅᑎᑕᐅᓚᐅᕐᑐᖅ ᔫᓂ 2018-ᒥᑦ, ᐱᕕᖃᖅᑎᑦᑎᓯᒪᔪᖅ ᓄᓇᕗᑦ ᒐᕙᒪᒃᑯᑦ ᐱᔪᓐᓇᐅᑎᑖᖅᑎᑦᑎᔪᓐᓇᕐᓗᑎᒃ (ᓚᐃᓴᓐᓯᓂᒃ) ᐃᒻᒥᒃᑯᑦ ᐱᓕᕆᐊᖑᔪᓂᒃ ᓂᐅᕕᐊᒃᓴᖃᕈᒪᔪᓂᒃ.

ᑭᓯᐊᓂᓕ ᓄᓇᕗᑦ ᒐᕙᒪᒃᑯ ᓱᓕ ᐱᖁᔭᒃᓴᓂᒃ ᐱᓕᕆᐊᖃᖅᑐᑦ ᑐᑭᒧᐊᕈᑎᐅᓂᐊᕐᑐᓂᒃ ᐱᔪᓐᓇᐅᑎᑖᖅᑎᑦᑎᓕᕆᓂᕐᒧᑦ. ᐅᖃᓪᓚᖃᑎᖃᕐᓂᐊᖅᑐᑦ ᓄᓇᕗᑦ ᑐᙵᕕᒃᑯᓐᓂᒃ ᐱᓕᕆᕙᓪᓕᐊᑎᓪᓗᒋ ᐊᒻᒪᓗ ᑎᑎᕋᕐᓂᐊᕈᒪᓪᓗᑎᒃ ᓄᓇᕗᑦ ᑐᙵᕕᒃᑯᓐᓄᑦ ᑕᒪᑐᒪ ᒥᒃᓵᓄᑦ, ᕼᒃᔅ ᐅᖃᖅᑐᖅ.

ᑲᖏᖅᖠᓂᖅ ᐅᐊᖕᓇᖓᓄᑦ-ᐃᒡᓗᓕᒑᕐᔪᒃᒧᑦ ᒪᓕᒐᓕᐅᕐᑎ ᑳᑎ ᑕᐅᑐᙱ ᐊᐱᖁᑎᖓᓄᑦ, ᕼᐃᒃᔅ ᐅᖃᓚᐅᕐᑐᖅ ᓱᓕ ᓇᓗᓇᕐᓂᕋᖅᖢᓂᐅᒃ ᐱᓕᕆᐊᖃᓂᐅᔪᖅ ᖃᑯᒍ ᐱᐊᓂᒃᑕᐅᓂᐊᕆᐊᒃᓴᖓᓂᒃ.

“ᑖᒃᑯᐊ ᐱᖁᔭᒃᓴᐃᑦ ᒫᓐᓇ ᐱᓕᕆᐊᖑᓕᕐᑐᑦ. ᖃᖓ ᐱᐊᓂᒐᔭᕐᒪᖔ ᖃᐅᔨᒪᙱᑦᑐᖓ. ᐱᖁᔭᓕᐊᑎᒍᑦ ᑖᑯᓂᖓ ᑕᐃᒪᐃᑎᑦᑎᔪᓐᓇᖅᑎᑦᑎᓯᒪᔪᒍ. ᑕᐃᒪᓕ ᐱᓕᕆᐊᕆᔭᕗᑦ ᐱᖁᔭᒃᓴᐃᑦ,” ᕼᐃᒃᔅ ᐅᖃᖅᑐᖅ.

ᐅᖃᓚᐅᕐᒥᔪᖅ ᓄᓇᕗᑦ ᒐᕙᒪᒃᑯ ᐱᓕᕆᖃᑎᖃᕐᓂᖏᓐᓂᒃ ᒐᕙᒪᑐᖃᒃᑯᓐᓂᒃ ᓂᐅᕕᐊᒃᓴᖃᕈᓐᓇᕐᓂᕐᒥᒃ ᓱᐴᖅᑐᒐᕐᓂᒃ ᓂᕆᔭᒃᓴᐅᔪᓐᓇᖅᑐᓂᒃ.

ᑕᒪᒃᑯᐊ ᐱᖁᑎᑦ ᐃᓚᖃᕋᔭᖅᑐᒃᓴᐅᔪᑦ ᓱᐴᖅᑐᒐᕐᓂᒃ ᐊᕿᑦᑐᓂᒃ ᐅᖁᒻᒥᐊᒐᕐᓂᒃ ᐊᒻᒪ ᐳᕋᐅᓂᔅᓂᒃ. ᒐᕙᒪᑐᖃᒃᑯᑦ ᓱᓕ ᐱᖁᔭᓂᒃ ᑐᓂᓯᔭᕆᐊᖃᕐᒪᑕ ᑕᐃᒪᐃᑦᑐᓄᑦ ᐱᖁᑎᓄᑦ ᐅᓗᕆᐊᒋᓪᓗᒋ ᓱᕈᓰᑦ ᐋᓐᓂᐊᓕᕋᔭᕆᐊᒃᓴᖏᓐᓂᒃ ᓂᕆᓐᓂᕈᑎᒃ.

ᓈᒻᒪᙱᓕᐅᕈᑕᖃᕐᓂᕐᒧ ᑲᓇᑕᒥ ᐊᒥᒐᖅᑎᓯᓂᕐᒥᒃ ᐱᕈᖅᑎᑕᐅᔪᓐᓇᕐᓯᒪᔪᓂᒃ ᓱᐴᖅᑐᒐᒃᓴᓂᒃ, ᓄᓇᕗᒥᑦ ᓯᕗᓪᓕᖅᐹᖅ ᖃᕋᓴᐅᔭᒃᑯᑦ ᓂᐅᕕᕐᕕᐅᔪᓐᓇᖅᑐᖅ, ᑐᕖᑦ.ᑳᒻ (Tweed.com), ᓇᖕᒥᓂᕆᔭᐅᔪᖅ ᑳᓇᐱ ᒍᕉᑦ  ᑯᐊᐳᕇᓴᓄᑦ (Canopy Growth Corp.) ᓯᒥᑦ ᕚᔅ, ᐋᓐᑎᐅᕆᐅᒥ, ᓂᐅᕕᕐᕕᐅᓯᒪᓕᖅᑐᑦ 4.2 ᑭᓗᒍᕌᒻᔅᓂᒃ ᓱᐴᖅᑐᒐᕐᓂᒃ ᑕᐃᒪᙵᑦ ᐅᒃᑑᐱᕆ 17, 2018-ᓗ ᑎᓯᐱᕆ 31, 2018-ᓗ ᐊᑯᓐᓂᖓᓂᒃ, ᓄᓇᕗᑦ ᒐᕙᒪᒃᑯᑦ ᐅᖃᓚᐅᕐᓯᒪᔪᑦ ᔭᓄᐊᕆᐅᓚᐅᕐᑐᒥᑦ.

ᐃᒪᐃᓕᖓᓪᓗᓂ 1,147 ᖃᕋᓴᐅᔭᒃᑯᑦ ᑎᑭᓴᖅᑕᐅᔪᑦ, ᐊᑭᖃᓪᓗᐊᖅᖢᑎᒃ ᒫᓂ $17,000 ᓂᐅᕈᑎᖃᕐᓂᕐᒧᑦ ᑮᓇᐅᔭᓕᐅᕈᑎᓂᒃ.

ᐅᓇ ᐅᖃᐅᓯᖃᖅᑐᖅ ᐊᒥᓱᑦ ᓄᓇᕗᒥᑦ ᓂᐅᕕᖅᐸᒃᑐᑦ ᓱᓕ ᓂᐅᕕᖃᑦᑕᕐᓂᖏᓐᓂᒃ ᑕᒪᐅᓇᒥᐊᖅ ᓂᐅᕕᐊᒃᓴᖃᖅᐸᒃᑐᓂᒃ. ᑐᓴᐅᒪᔾᔪᑎᓕᕆᓂᒃᑯᑦ, ᐅᓄᕐᑐᑦ ᓈᒻᒪᒃᓴᙱᓯᒪᓕᕐᑐᑦ ᐱᑖᕕᒃᑕᖃᙱᓗᐊᕐᓂᖓᓂᒃ ᐱᔪᓐᓇᕐᓯᒪᓕᓵᕐᓂᖓᓂᒃ.

ᑕᒪᐅᓇᓕ, ᕼᐃᒃᔅ ᐅᖃᓚᐅᕐᑐᖅ ᑕᒪᓐᓇ ᐊᓯᙳᑐᐃᓐᓇᕆᐊᖃᕐᓂᖓᓂᒃ ᓂᐅᕕᕐᕕᐅᔪᑦ ᐱᒋᐊᓚᐅᕐᑎᓪᓗᒋᑦ ᓄᓇᕗᒥᑦ.

“ᐃᓱᒪᔪᖓᓕ, ᐅᕙᒃᑯᑦ, ᐱᓕᕆᐊᕆᓵᓕᒍᑎᒃᒍᑦ ᓂᐅᕕᕐᕕᒃᓴᐃᑦ ᐊᑐᐃᓐᓇᐅᓕᕐᓂᖏᓐᓂᒃ ᕿᓚᒥᐅᓂᕐᓴᖅ, ᑕᐃᒪᓕ ᑕᒪᓐᓇ ᐊᒃᑐᐃᓂᖃᕋᔭᖅᑐᖅ ᑕᒪᐅᓇᒥᐊᖅ ᓂᐅᕕᐊᒃᓴᖃᖅᐸᒃᑐᓂᒃ. ᐱᓕᕆᓂᖃᕈᒪᔪᐃᑦ ᑕᒪᓐᓇ ᐱᓕᕆᐊᕆᔭᐅᑲᐅᕐᑐᕐᓗᓂ ᐅᑕᕿᑐᐃᓐᓇᕐᓂᕐᒥᒡᓕ,” ᕼᐃᒃᔅ ᐅᖃᖅᑐᖅ.

ᑕᒪᒃᑯᐊᑦᑕᐅᖅ ᓂᐅᕕᐊᒃᓴᕆᔭᐅᔪᑦ ᐊᑐᐃᓐᓇᐃᑦ ᐅᕙᓂ Tweed.com ᐅᓄᕐᓯᒋᐊᕐᓯᒪᓕᕐᑐᑦ ᐊᔾᔨᒌᙱᑦᑑᑎᑦ ᑎᓯᐱᕆᐅᓚᐅᕐᑐᒥᑦ, ᑕᐃᔅᓱᒪᓂ ᑎᓴᒪᑦ ᑕᓪᓕᒪᓪᓘᓐᓃᑦ ᐊᔾᔨᒌᙱᑦᑐᑦ ᐊᑐᐃᓐᓇᐅᓚᐅᕐᓯᒪᑎᓪᓗᒋᑦ.

ᒫᓐᓇᐅᔪᕐᓕ ᓄᓇᕗᒥᑦ ᖃᕋᓴᐅᔭᒃᑯᑦ ᓱᐴᖅᑐᒐᕐᓂᒃ ᓂᐅᕕᖅᐸᒃᑐ ᑎᑭᓴᐃᔪᓐᓇᕐᒪᑕ 24-ᓂ ᐊᔾᔨᒌᙱᑦᑑᑎᓂᒃ, ᐃᓚᖃᖅᖢᑎᒃ ᓱᐴᖅᑐᒐᒃᓴᓂᒃ, ᐅᕐᓱᓂᒃ, ᐄᔭᒐᓂᒃ ᐊᒻᒪᓗ ᐃᒧᓯᒪᕙᒌᖅᓯᒪᔪᓂᒃ.

ᓄᓇᕗᒥᑦ ᐃᒥᐊᓗᓕᕆᔨᒃᑯᑦ ᐊᒻᒪ ᓱᐴᖅᑐᒐᓕᕆᓂᕐᒧᑦ ᑲᒥᓴᓐ ᐊᑎᓕᐅᓚᐅᕆᕗᑦ ᐱᖃᑎᖓᓂᒃ ᓂᐅᕕᕐᕕᐅᔪᓐᓇᕐᓂᐊᕐᑐᒥᒃ, AgMedica Bioscience Inc. ᐅᕙᓂ ᓵᑕᒻ, ᐋᓐᑎᐅᕆᐅ.

ᒫᓐᓇᒧ ᑎᑭᖢᒍ, AgMedica ᐋᓐᓂᐊᕐᓂᕐᒧᑦ ᓱᐴᖅᑐᒐᓕᕆᔨᐅᓯᒪᔪᑦ, ᑭᓯᐊᓂᓕ ᑭᒃᑯᑐᐃᓐᓇᕐᓄᑦ ᐱᕙᓪᓕᐊᓕᖅᑐᑦ, ᐊᒻᒪᓗ ᐊᑎᓕᐅᖃᑎᖃᓚᐅᕆᓪᓗᑎᒃ ᐅᑯᓂᖓ ᐋᓐᑎᐅᕆᐅ ᓲᐴᖅᑐᒐᓄᑦ ᓂᐅᕕᕐᕕᒃᒥᑦ.

ᑲᒻᐸᓂᐅᔪᖅ ᐅᖃᓚᐅᕐᒥᔪᖅ ᐱᑖᖅᑎᑦᑎᔪᓐᓇᕐᓂᕐᒧᑦ ᐊᖏᕈᑎᖃᓕᕐᓂᖏᓐᓂᒃ 7-ᓂ ᐳᕌᕕᓐᓯᐅᔪᓂᒃ ᐊᒻᒪ ᑎᐅᕆᑑᕆᓂᒃ.

ᑭᓯᐊᓂᓕ AgMedica ᐱᖁᑎᖏᑦ ᐊᑐᐃᓐᓇᐅᙱᑦᑐᑦ ᖃᕋᓴᐅᔭᒃᑯᑦ ᓄᓇᕗᒦᑦᑐᓄᑦ.

“ᓄᓇᕗᒻᒥᐅᑦ ᑐᓴᖅᑎᑕᐅᓂᐊᕐᑐᑦ AgMedica-ᑯᑦ ᖃᕋᓴᐅᔭᒃᑯᑦ ᓂᐅᕕᐊᒃᓴᖃᕈᓐᓇᕐᓯᒍᑎᒃ,” ᓄᓇᕗᒥᑦ ᒐᕙᒪᒃᑯᓐᓄᑦ ᐅᖃᖅᑎᐅᔪᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᓯᐊᓂᓕ ᓄᓇᕗᑦ ᒐᕙᒪᒃᑯᑦ ᓱᓕ ᕿᓂᖅᑐᑦ ᓂᐅᕕᕐᕕᒃᓴᐅᔪᓐᓇᖅᑐᓂᒃ.

“ᐅᑯᐊ NULC ᐱᓕᕆᖃᑎᖃᖅᑐᑦ ᐊᓯᒃᑲᓐᓂᖏᓐᓂᒃ ᓂᐅᕕᕐᕕᒃᓴᐅᔪᓐᓇᖅᑐᓂᒃ ᒪᐅᓇ ᑐᒃᓯᕋᐅᑎᑎᒍᑦ ᐱᓕᕆᔪᒪᓂᕐᒧᑦ, ᓂᐅᕕᐊᒃᓴᖃᖅᑎᑦᑏᓐᓇᕈᒪᓪᓗᑎᒃ ᐊᒻᒪ ᐱᔨᑦᑎᕋᐅᑎᓂᒃ,” ᐅᖃᖅᑎᒋᔭᐅᔪᖅ ᐅᖃᓚᐅᕐᑐᖅ.