ᓄᑖᖅ ᐃᓄᐃᑦ ᐃᑲᔪᖅᑕᐅᔾᔪᑎᖏᓐᓄᑦ ᐊᖏᖃᑎᒌᒍᑎ ᐱᒻᒪᕆᐅᕗᖅ ᓄᓘᔮᖕᓂ ᐅᔭᕋᒃᓯᐅᕐᕕᐅᑉ ᓯᕗᓂᒃᓴᖓᓄᑦ, ᐹᕕᓐᓛᓐᑯᑦ ᐅᖃᖅᑐᑦ
“ᐹᕕᓐᓛᓐᑯ ᐅᑕᖅᑭᔪᓐᓇᙱᒻᒪᑕ ᓄᕙᒡᔪᐊᕐᓇᐅᑉ ᓄᖑᓐᓂᐊᕐᓂᖓᓂ ᐅᓇ ᐱᓕᕆᓂᖅ 2 ᐋᖏᖅᑕᐅᓂᒃᓴᖓᓄᑦ”
ᐹᕕᓐᓛᓐᑯᑦ ᐊᖓᔪᖅᑳᖅ ᐊᐅᓚᑦᑎᔨᖓ ᐅᖃᓚᐅᕐᑐᖅ ᐅᓇ ᓄᑖᖅ ᐃᓄᐃᑦ ᐃᓚᐅᑎᑕᐅᓂᖏᓐᓄᑦ ᐊᖏᕈᑎ (Inuit Certainty Agreement) ᐊᑎᓕᐅᖅᑕᐅᓂᑯ ᑲᒻᐸᓂᒧᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐱᒻᒪᕆᐅᓂᖓᓂ ᓄᓘᔮᖕᓂ ᐅᔭᕋᒃᓯᐅᕐᕕᒃ ᐊᓂᒍᐃᑦᑎᐊᕐᓂᐊᕐᓂᖓᓄᑦ. (ᐊᔾᔨᙳᐊᖅ ᐅᑯᓇᙵᑦ ᐹᕕᓐᓛᓐ)
For an English version of this story, see New Inuit benefit agreement crucial for future of Mary River mine, says Baffinland
ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕈᒃᓯᐅᕐᕕᐅᑉ ᐊᖓᔪᖅᑳᖓ ᐊᐅᓚᑦᑎᔨ ᐳᕋᐃᐊᓐ ᐸᓂ ᐅᖃᓚᐅᕐᑐᖅ ᐅᖃᖃᑎᒌᓚᐅᕐᓂᖏᓐᓂᒃ ᑖᒃᑯᐊ ᐅᔭᕋᒃᓯᐅᕐᕕᒃᑯᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑎᑎᕋᖅᐸᓪᓕᐊᑎᓪᓗᒋᑦ ᖃᖓᑦᑎᐊᓵᖅ ᐊᑎᓕᐅᖅᑕᐅᓚᐅᕐᑐᒥᑦ ᐃᓄᐃᑦ ᐃᓚᐅᑎᑕᐅᓂᖏᓐᓄᑦ ᐊᖏᕈᑎᓂ, ᑖᓐᓇᓗ ᐊᖏᖃᑎᒌᒍᑎᐅᓯᒪᓪᓗᓂ ᑕᒪᐃᓐᓄᑦ ᐱᓕᕆᐊᖃᖅᑐᓄᑦ.
ᓄᑖᖅ ᑲᑐᔾᔭᐅᓯᒪᓂᒃᑯᑦ ᐱᕚᓪᓕᕈᑎᒃᓴᓄᑦ ᐊᖏᖃᑎᒌᒍᑎ, ᑕᐃᔭᐅᔪᖅ ᐃᓄᐃᑦ ᓇᓗᓇᐃᖅᑕᐅᓯᒪᓂᖏᓐᓄᒃ ᐊᖏᕈᑎᑦ (Inuit Certainty Agreement), ᓇᓗᓇᐃᔭᐃᓯᒪᕗᖅ ᑮᓇᐅᔭᖅᑖᕈᑎᐅᓂᐊᖅᑐᓂᒃ ᓄᓇᓕᖕᓄᑦ ᐊᒃᑐᖅᑕᐅᓯᒪᔪᓂᒃ ᓄᓘᔮᖕᓂᑦ ᐅᔭᕋᒃᓯᐅᕐᕕᖕᒧᑦ, ᐃᓄᐃᑦ ᑲᒪᒋᔭᖃᕐᓂᖏᑦ ᐱᓕᕆᐊᒥᓐ ᐊᒻᒪᓗ ᐊᖏᒡᓕᒋᐊᕐᓯᒪᓂᐅᔪᖅ ᐱᓕᕆᐊᒃᓴᐅᓂᐊᖅᑐᓂ ᓄᓇᓕᖕᓂ ᐊᒃᑐᖅᑕᐅᑐᓯᒪᔪᓂᒃ.
ᐸᐅᓗᓯ ᐊᕿᐊᕈᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖓᔪᖅᑳᖓ, ᐅᖃᓚᐅᕐᑐᖅ ᐅᓇ ᓄᑖᖅ ᐊᖏᖃᑎᒌᒍᑎ “ᐃᓄᖕᓂᑦ ᐊᐅᓚᑎᑦᑎᓂᕐᓴᐅᑎᑦᑎᓂᐊᕐᑐᖅ.”
ᐅᔾᔨᕐᓇᓗᐊᖅᑐᑦ ᐊᖏᖃᑎᒌᒍᑎᓂ ᐅᑯᐊ ᐃᓄᖕᓄᑦ ᐊᐅᓚᑕᐅᔪᖅ ᐊᕙᑎᒋᔭᒥ ᖃᐅᔨᓴᖃᑦᑕᕐᓂᖅ, ᐊᖏᒡᓕᒋᐊᖅᑕᐅᒃᑲᓐᓂᖅᑐᑦ ᐊᖑᓇᓱᒍᑎᓄᑦ ᐃᑲᔫᑎᒃᓴᑦ, ᐊᖏᒡᓕᒋᐊᖅᑕᐅᔪᑦ ᑮᓇᐅᔭᓕᐅᕐᓂᕐᒧᑦ ᐊᑭᓕᐅᑎᒃᓴᑦ, ᐊᒻᒪᓗ ᑮᓇᐅᔭᑎᒍᑦ ᐃᑲᔪᕈᑎᒃᓴᓂ ᐸᐃᕆᕝᕕᒃᓴᓕᐅᕐᓂᕐᒧᑦ ᑖᒃᑯᓇᓂ ᓄᓇᓕᖕᓂ ᐊᒃᑐᖅᑕᐅᓯᒪᓗᐊᕐᑐᓂᒃ.
ᐊᒥᓱᑦ ᑮᓇᐅᔭᕐᓴᖅᑖᕈᑎᒃᓴᐃᑦ ᐃᓄᖕᓄᑦ ᓇᓗᓇᐃᕐᑕᐅᓯᒪᔪᑦ ᑕᕝᕙᓂ ᓄᑖᒥ ᐊᖏᖃᑎᒌᒍᑎᒥ ᐅᑯᑎᒎᓇᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪ ᐹᕕᓐᓛᓐᑯ ᒪᓕᒐᔭᖅᑐᖅ ᓄᓘᔮᑦ ᐅᔭᕋᒃᓯᐅᕐᕕᐅᑉ ᐱᓕᕆᓂᖅ 2 ᐊᖏᖅᑕᐅᒍᓂ ᑭᓯᐊᓂ, ᐅᖃᖅᑐᖅ ᐱᐊᓂ.
“ᐹᕕᓐᓛᓐᑯᑦ ᑮᓇᐅᔭᖃᕆᐊᖃᕐᓂᐊᕐᒪᑕ ᐅᕙᙵᑦ ᐱᓕᕆᓂᖅ 2 ᐱᓕᕆᐊᖑᓕᕈᓂ ᑕᒪᒃᑯᐊ ᐃᑲᔫᑎᒃᓴᑦ ᓴᖅᑭᑉᐸᓪᓕᐊᓕᖁᓪᓗᒋᑦ,” ᐱᐊᓂ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
ᐅᕙᓂ ᐱᓕᕆᓂᖅ 2 ᑐᒃᓯᕋᐅᑎᒥ, ᐹᕕᓐᓛᓐᑯᑦ ᐊᖏᒡᓕᒋᐊᖅᑎᑦᑎᔪᒪᔪᑦ ᓄᓘᔮᖕᓂ ᓴᖅᑭᑕᐅᕙᓪᓕᐊᕙᒃᑐᓂᒃ ᒫᙵᑦ 6 ᒥᓕᐊᓐ ᑖᓐᔅᓂᒃ 12 ᒥᓕᐊᓐ ᑕᓐᔅᓄᑦ ᓴᕕᕋᔭᒃᓴᒥᑦ ᐊᕐᕌᒍᒧᑦ. ᐅᓇ ᐊᖏᒡᓕᒋᐊᖅᑕᐅᓂᐊᖅᑐᖅ ᐅᔭᕋᒃᓯᐅᕐᕕᒃ ᐱᔨᑦᑎᕋᖅᑕᐅᓇᔭᖅᑐᖅ 110 ᑭᓛᒥᑕᓂ ᑕᑭᓂᓕᖕᒧᑦ ᓄᓇᓯᐅᑎᑯᑖᑉ ᐊᖅᑯᑎᖓᓄᑦ ᓄᓘᔮᖕᓂᑦ ᓄᓘᔮᑦ ᕿᙳᐊᓄᑦ ᐊᒻᒪᓗ ᐅᒥᐊᕐᔪᐊᓂ 176-ᖏᕐᓱᖅᑐᓂ ᐃᖏᕐᕋᕝᕕᐅᖃᑦᑕᕋᔭᖅᖢᓂ ᐊᐅᔭᑕᒪᓐ.
“ᒫᓐᓇ ᐊᐅᓚᑕᑦᑎᒍᑦ ᑕᐃᒪᓐᓇᑎᒋ ᐃᑲᔫᑎᒃᓴᓂᒃ ᑐᓂᓯᔪᓐᓇᕋᔭᙱᓐᓇᑦᑕ. ᑕᒪᒃᑯᐊ ᐊᑭᒃᓴᐅᓇᔭᖅᑐᑦ … ᒫᓐᓇ ᐃᑲᔫᑎᒃᓴᓄᑦ ᓈᒻᒪᙱᓗᐊᕐᒪᑕ ᒪᓂᒪᔭᑦᑎᓐᓄᑦ ᐅᕙᓂ ᐃᓄᐃᑦ ᓇᓗᓇᐃᕐᑕᐅᓯᒪᓂᖏᓐᓄᑦ ᐊᖏᕈᑎᓂᒃ,” ᐱᐊᓂ ᐅᖃᖅᑐᖅ.
ᐱᐊᓂ ᐅᖃᓚᐅᕐᑐᖅ ᐅᓇ 172-ᓂ ᒪᒃᐱᒐᓕᖅ ᐃᓄᐃᑦ ᓇᓗᓇᐃᕐᑕᐅᓯᒪᓂᖏᓐᓄᑦ ᐊᖏᕈᑎ ᐊᕐᕌᒍᒐᓴᖕᓂ ᐋᖅᑭᒃᓱᖅᑕᐅᓯᒪᓂᖓᓂᒃ, ᑭᓯᐊᓂᓕ ᐋᖅᑭᒃᓱᖅᑕᐅᓕᓚᐅᕐᑐᑦ ᓄᓇᓖᑦ ᑲᑎᒪᖃᑎᖃᓚᐅᕐᑎᓪᓗᒋᑦ ᐹᕕᓐᓛᓐᑯᓐᓂᒃ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᕕᕝᕗᐊᕆᐅᑎᓪᓗᒍ.
ᐱᐊᓂ ᐅᖃᓚᐅᕐᒥᔪᖅ ᑖᒃᑯᐊ ᐱᓕᕆᔪᑦ ᐊᖏᖃᑎᒌᓚᐅᕐᓂᖏᓐᓂᒃ ᐊᕙᑎᒋᔭᒥ ᓴᐳᔾᔨᓯᒪᔭᕆᐊᖃᕐᓂᖅ ᐱᒻᒪᕆᐅᓛᖑᓂᖓᓂᒃ ᑕᕝᕙᓂ ᐊᖏᕈᑎᓂ.
“ᓇᓗᓇᐃᕐᓯᑦᑎᐊᕆᐊᖃᕋᑦᑕ ᐃᓄᐃᑦ ᐃᓚᐅᓂᐊᕐᓂᖏᓐᓂᒃ ᖃᐅᔨᓴᖃᑦᑕᕐᓂᕐᒥᓐ ᐊᒃᑐᐃᒍᑎᓂᒃ ᐊᒃᑐᐊᔪᓂᒃ ᐱᓕᕆᐊᒧᑦ ᐊᒻᒪᓗ ᐅᖃᕈᓐᓇᕐᕕᖃᕐᓗᑎᒃ ᐊᐅᓚᑦᑎᒍᑎᐅᓂᐊᕐᑐᓂᒃ ᐊᒻᒪᓗ ᖃᓄᖅ ᐱᓕᕆᐊᖃᕋᔭᕐᓂᑦᑎᓐᓂᒃ ᐊᒃᑐᐃᒍᑎᐅᑐᐃᓐᓇᕆᐊᖃᖅᑐᑦ,” ᐱᐊᓂ ᐅᖃᖅᑐᖅ.
“ᐃᓱᒪᔪᖓᓕ ᑮᓇᐅᔭᓕᕆᓂᒃᑯᑦ ᐅᕙᓂ ᐃᓄᐃᑦ ᓇᓗᓇᐃᕐᑕᐅᓯᒪᓂᖏᓐᓄᑦ ᐊᖏᕈᑎᓂ, ᐅᔾᔨᕐᓇᕋᓗᐊᖅᖢᓂ, ᒥᑭᓐᓂᐅᖕᒪᑦ ᑕᒪᐃᓐᓂᓕᒫᖅ ᑕᐅᑐᒃᖢᒋᑦ ᓴᐳᑎᓯᒪᓇᓱᖕᓂᒃᑯ ᐊᒻᒪᓗ ᐊᔪᕈᓐᓃᖅᓴᖅᑎᑦᑎᕙᖕᓂᕐᒧᑦ ᐊᒻᒪ ᐃᖅᑲᓇᐃᔭᓕᕈᓐᓇᖅᑎᑦᑎᓂᕐᒧᑦ.”
ᓄᕕᐱᕆ 2019-ᒥᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᕕᒡᔪᐊᖅᑎᑦᑎᑎᓪᓗᒋᑦ ᐹᕕᓐᓛᓐ ᐱᓕᕆᓂᖅ 2 ᑐᒃᓯᕋᐅᑎᖏᓐᓄᑦ ᓄᓘᔮᖕᓄᑦ, ᓄᖅᑲᑳᓪᓚᓚᐅᕐᓯᒪᖕᒪᑕ ᐅᖃᕈᓐᓇᕐᕕᖃᕈᒪᓯᒪᔪᑦ ᐃᓚᖏᑦ, ᐃᓚᒋᔭᐅᓪᓗᑎᒃ ᒥᑦᑎᒪᑕᓕᒃᒥᑦ ᐊᖑᓇᓱᒃᑎᒃᑯ ᑲᑎᒪᔨᖏᑦ, ᐃᓱᒫᓘᑎᖏᓐᓂᒃ ᐅᖃᓪᓚᑲᑕᓕᖅᑎᓪᓗᒋᑦ ᐱᓕᕆᐊᖑᔫᑉ ᐊᕙᑎᒋᔭᖓᑕ ᒥᒃᓵᓄᑦ ᐊᒻᒪᓗ ᓄᓇᓕᖕᓂ ᑐᓴᑲᑕᒐᓱᙱᓗᐊᕐᓂᖏᓐᓂᒃ.
ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᐅᔪᑦ ᐊᒻᒪᓗ ᑲᑎᒪᕕᒡᔪᐊᕐᓇᐅᑉ ᓯᕗᓂᐊᒍᑦ ᑲᑎᒪᓂᒃᓴᐃᑦ ᐋᖅᑭᒃᑕᐅᓚᐅᕐᓯᒪᔪᑦ ᐱᒋᐊᕐᓂᐊᕐᓗᑎᒃ ᒫᑦᓯᒥ, ᐊᒻᒪ ᑭᖑᓂᐊᒍᑦ ᐄᐳᕈᒥ, ᑭᓯᐊᓂᓕ ᓄᖅᑲᖅᑎᑕᐅᑦᑎᐊᒻᒪᕆᖅᖢᓂ ᐱᔾᔪᑎᐅᓪᓗᓂ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ.
ᐱᐊᓂ ᐊᒻᒪ ᐊᕿᐊᕈᖅ ᐅᖃᓚᐅᕐᑑᑦ ᑕᐃᒪᙵᓂ ᑖᒃᑯᐊ ᐱᓕᕆᐊᖃᖅᑐᑦ ᑲᑎᖃᑎᒌᒍᓐᓇᓕᓚᐅᕐᓂᖏᓐᓂᒃ ᓄᓇᓕᖕᓂ ᐊᒻᒪ ᐋᖅᑭᒃᓱᐃᔪᓐᓇᕐᓯᓪᓗᑎᒃ ᐆᒥᖓ ᐃᓄᐃᑦ ᓇᓗᓇᐃᕐᑕᐅᓯᒪᓂᖏᓐᓄᑦ ᐊᖏᕈᑎᓂᒃ.
“ᐊᔪᕈᓐᓃᒻᒪᕆᓚᐅᕐᐳᒍ ᐅᖄᓚᐅᑎᒃᑯᑦ ᑲᑎᒪᑲᑕᖃᑦᑕᕐᓂᕐᒥᓐ ᐊᒻᒪᓗ ᔫᒻ ᐊᒻᒪᓗ ᑕᒪᓐᓇ ᓄᖃᕈᑎᐅᓚᐅᙱᑦᑐᖅ ᐱᓕᕆᕙᓪᓕᐊᓂᕐᒧᑦ. ᐃᒻᒪᖄᓪᓘᓐᓃᑦ, ᑕᒪᓐᓇ ᐃᓂᖃᕐᕕᐅᔪᓐᓇᓚᐅᕐᑐᖅ ᐱᓕᕆᕙᓪᓕᐊᓂᕐᒧᑦ. ᐃᒪᓐᓇᐅᓇᔭᓚᐅᕐᖢᑕ ᐅᑕᕿᓗᑕ ᐊᒻᒪ ᑲᑎᖃᑎᒌᖕᒪᕆᒡᓗᑕ ᐅᐸᒍᑎᓗᑕ, ᑭᓯᐊᓂᓕ ᓄᕙᒡᔪᐊᕐᓇᒧᑦ ᑐᑭᓯᐅᒪᓚᐅᕐᐳᒍᑦ ᑕᒪᓐᓇ ᐱᒻᒪᕆᐅᓂᖓᓄᑦ ᐱᐊᓂᒋᐊᖃᓚᐅᕐᓂᖓᓂᒃ,” ᐱᐊᓂ ᐅᖃᖅᑐᖅ.
ᑭᓯᐊᓂᓕ ᐋᓐᓂᐊᕕᒡᔪᐊᕐᓇᖅ ᓱᓕᐅᑎᓪᓗᒍ, ᐱᐊᓂ ᐅᖃᓚᐅᕐᑐᖅ ᑭᖑᓪᓕᖅᐹᖅ ᑐᓴᖅᑎᑦᑎᓂᕐᒧᑦ ᑲᑎᒪᓂᖅ ᐆᒧᖓ ᐱᓕᕆᓂᖅ 2-ᒧᑦ ᐱᐊᓂᒃᑕᐅᓵᓕᖁᓪᓗᓂᐅᒃ.
“ᐹᕕᓐᓛᓐᑯᑦ ᐅᑕᖅᑭᔪᓐᓴᙱᒻᒪᑕ ᐃᓱᓕᓐᓂᐊᕐᓂᖓᓂᒃ ᓄᕙᒡᔪᐊᕐᓇᖅ ᐅᓇ ᐱᓕᕆᓂᖅ 2 ᐊᖏᖅᑕᐅᓂᐊᕐᓂᖓᓂᒃ,” ᐱᐊᓂ ᐅᖃᖅᑐᖅ.
“ᑕᐃᒪᐃᓕᐊᓪᓚᓚᐅᖅᖢᖓ, ᐃᓱᒪᔪᒍᓪᓕ ᐱᒻᒪᕆᐅᓂᖓᓂᒃ ᐃᓄᐃᑦ ᑕᒪᑐᒧᖓ ᐅᖃᖃᑕᐅᔪᓐᓇᕐᓗᑎᒃ ᐱᓕᕆᓂᕐᒥ ᐊᒻᒪᓗ ᓇᓗᓇᐃᕐᓯᑦᑎᐊᕐᓗᑎᒃ ᐃᓱᒪᒋᔭᖏᓐᓂᒃ ᐊᒻᒪᓗ ᑕᒪᓐᓇ ᑐᓴᖅᑕᐅᓗᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ…. ᐅᑯᐊ ᐃᓄᐃᑦ ᓇᓗᓇᐃᕐᑕᐅᓯᒪᓂᖏᓐᓄᑦ ᐊᖏᕈᑎ ᓄᓇᓕᖕᓅᖅᑕᐅᓯᒪᓕᕐᒪᑕ ᖃᐅᔨᒍᑎᒋᕙᕋ ᐱᓕᕆᖃᑎᒌᑦᑎᐊᕈᑦᑕ ᐊᒻᒪ ᐊᓯᑦᑕ ᐃᓱᒪᒋᔭᖏᓐᓂᒃ ᐃᓱᒪᒋᔭᖃᕈᓐᓇᕐᓗᑕ ᑕᐃᒪᓕ ᑖᓐᓇ ᑲᑎᒪᕕᒡᔪᐊᕐᓇᒥ ᐱᓕᕆᐊᖑᔪᓐᓇᕋᔭᖅᑐᖅ.”
ᑭᐅᕋᓐ ᑲᔅᑕᓗ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑲᑎᒪᔩᑦ ᐋᖅᑭᒃᓱᐃᕙᓪᓕᐊᓂᖏᓐᓂᒃ “ᖃᓄᐃᓕᐅᖅᐸᓪᓕᐊᓂᕐᒧᑦ ᑐᑭᒧᐊᕈᑎᒃᓴᓂᒃ” ᑭᖑᓪᓕᕐᒥ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᐅᓂᐊᖅᑐᓄᑦ ᐊᒻᒪᓗ ᑲᑎᒪᕕᒡᔪᐊᕐᓇᐅᑉ ᓯᕗᓂᐊᓂ ᑲᑎᒪᓂᕐᒥ. ᐅᑯᐊ ᑐᑭᒧᐊᕈᑎ ᑐᓂᔭᐅᓪᓗᐊᖅᑐᑦ ᔪᓚᐃᒥ, ᐅᖃᓚᐅᕐᑐᖅ.
ᑲᔅᑕᓗ ᐅᖃᓚᐅᕐᒥᔪᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᖃᐅᔨᒪᓂᕋᖅᖢᓂᒋᑦ ᐆᒥᖓ ᐃᓄᐃᑦ ᓇᓗᓇᐃᕐᑕᐅᓯᒪᓂᖏᓐᓄᑦ ᐊᖏᕈᑎᓂᒃ ᑭᓯᐊᓂᓕ ᐊᒃᑐᖅᑕᐅᓯᒪᙱᓐᓂᕋᖅᑕᖏᑦ.
“ᐅᓇ ᓇᓗᓇᐃᕈᑎ ᐅᖃᓪᓚᖃᑎᖃᖃᕐᓯᒪᓂᖏᓐᓂᒃ,” ᑲᔅᑕᓗ ᐅᖃᖅᑐᖅ.
ᒥᑦᑎᒪᑕᓕᖕᒥᑦ ᐊᖑᓇᓱᒃᑎᒃᑯᑦ ᑭᐅᓚᐅᙱᑦᑐᑦ ᓄᓇᑦᓯᐊᕐᒥ ᐱᕙᓪᓕᐊᔪᑦ ᑖᒃᑯᓂᖓ ᑐᓴᕈᒪᑎᓪᓗᒋ.
(0) Comments