ᓄᑖᖅ ᐃᓄᒃᓯᐅᑎᓂᒃ ᓂᕿᓕᕆᕝᕕᒃᓴᖅ ᑕᓗᕐᔪᐊᕐᒥ ᐱᒋᐊᖅᑕᐅᓂᐊᓕᕐᑐᖅ

ᐅᓇ ᓄᑖᖅ ᓂᕿᓕᕆᕝᕕᒃᓴᖅ ᑐᕌᒐᖃᕐᓂᐊᕐᑐᖅ ᒪᑯᓂᖓ ᐃᓄᒃᓯᐅᑎᓂᒃ ᑐᒃᑐᓂᒃ ᐊᒻᒪ ᕿᓚᓗᒐᕐᓂᒃ ᐊᑐᐃᓐᓇᐅᑎᑦᑎᓂᕐᓴᐅᓗᑎᒃ ᑕᓗᕐᔪᐊᕐᒥᐅᓄᑦ, ᐅᓇ ᐱᓕᕆᐊᒥᒃ ᐱᒋᐊᖅᑎᑦᑎᓇᓱᒃᑐᖅ ᐅᖃᓚᐅᕐᑐᖅ.

ᔨᒥ ᐅᓕᑲᑖᓕᒃ, ᐊᐅᓚᑦᑎᔨ ᑕᓗᕐᔪᐊᓂ ᐊᖑᓇᓱᒃᑐᓕᕆᔨᒃᑯᓐᓄᑦ, ᓇᓗᓇᐃᕐᓯᓚᐅᕐᑐᖅ ᐱᓕᕆᐊᒃᓴᒥᒃ ᐱᒋᐊᓕᕈᑎᐅᓂᐊᕐᓂᖓᓂᒃ ᐃᓄᐃᑦ ᓂᕿᖏᓐᓂᒃ ᐱᒋᐊᕈᑎᖃᕐᓗᑎᒃ ᑮᓇᐅᔭᓕᐅᕈᑎᐅᓕᕐᓂᐊᕐᓗᓂ ᓄᓇᓕᖕᓄᑦ.

ᐅᓕᑲᑖᑉ ᐱᓕᕆᐊᖓ, ᓂᕿᕼᐊᖁᑦ, ᐃᓄᒃᑐᑦ “ᓂᕿᒃᓴᕗᑦ”, ᓵᓚᒃᓴᐅᓯᐊᓚᐅᕐᓯᒪᖕᒪᑦ $451,000 ᐅᕘᓇ ᐅᑭᐅᕐᑕᖅᑐᕐᒥ ᐊᑐᕈᒥᓇᕐᑐᓕᕆᓂᕐᒧᑦ ᓵᓚᒃᓴᐅᓯᐊᕐᒥᒃ, ᑐᓴᖅᑎᑦᑎᒍᑎᐅᓚᐅᕐᓯᒪᔪᖅ ᕕᕝᕗᐊᕆ 19-ᒥ.

“ᓲᕐᓗ ᓱᓕ ᓯᓐᓇᒃᑐᖅᑐᒍᑦ,” ᐅᖃᖅᑐᖅ. “ᐊᒃᓱᐊᓗᒃ ᖁᕝᕙᖅᐹᓪᓪᓕᕐᓇᓚᐅᕐᑐᖅ ᓄᓇᑦᑎᓐᓄᑦ ᓵᓚᒃᓴᐅᓯᐊᖅᑖᕋᑦᑕ.”

ᑮᓇᐅᔭᖅ ᓄᑖᒧᑦ ᐱᓕᕆᕝᕕᒃᓴᒧᑦ ᐊᑐᖅᑕᐅᓂᐊᕐᑐᖅ, ᑭᖑᓂᐊᒍᓪᓕ ᐋᖅᑭᒃᓯᓂᐊᖅᖢᑎᒃ ᐊᑐᒃᑲᓐᓂᕈᓐᓇᖅᑐᓕᕆᓂᒃᑯᑦ ᐊᖑᓇᓱᒍᑎᓕᕆᓂᕐᒥᒃ ᐊᒻᒪ ᓂᕿᓕᕆᕝᐅᓂᐊᖅᑐᒥᒃ ᐊᔾᔨᒌᙱᑦᑐᓂᒃ.

ᒪᑐᐃᕈᓂ, ᐃᓄᐃᑦ ᓂᐅᕕᕈᓐᓇᓕᕐᓂᐊᖅᑐᑦ ᑐᒃᑐᓂᒃ ᐋᖅᑭᒃᓱᕐᓯᒪᔪᓂᒃ ᐃᒧᓯᒪᔪᓂᒃ ᐅᑯᓇᙵᑦ ᓂᐅᕕᙱᖔᕐᓗᑎᒃ ᓂᐅᕕᕐᕕᖕᓂᑦ ᐲᕝᒥᒃ, ᐅᓕᑲᑖᖅ ᐅᖃᓚᐅᕐᑐᖅ.

ᐅᖃᕐᓯᒪᔪᖅ ᓂᕆᐅᖕᓂᕋᕆᓪᓗᓂ ᐅᓇ ᐱᓕᕆᐊᖑᔪᖅ ᐃᑲᔪᕈᑎᐅᓂᐊᕐᓂᖓᓂᒃ ᐃᓕᖁᓯᒃᑯᑦ ᖃᐅᔨᒪᔭᐅᔪᓂᒃ ᐃᓕᓐᓂᐊᕈᑎᐅᓗᓂ ᐊᒻᒪ ᐃᓄᖕᓂ ᓄᓇᐃᓐᓇᕐᒦᑎᑦᑎᓂᕐᓴᐅᓗᓂ ᐊᔪᕈᓐᓃᕐᓴᖅᑎᑕᐅᓗᑎᒃ ᓂᕿᓕᕆᓂᕐᒥᒃ.

“ᐅᓇ ᐊᓯᐅᕙᓪᓕᐊᓯᒪᖕᒪᑦ ᐊᕐᕌᒍᓂ ᐊᓂᒍᖅᐸᓪᓕᐊᔪᓂᒃ, ᐊᒻᒪᓗ ᐅᑎᕈᒪᓪᓗᑕ ᑕᒪᒃᑯᐊ ᐱᒋᐊᕐᕕᒋᔭᕕᓂᖏᓐᓄᑦ,” ᐅᖃᖅᑐᖅ ᐅᓕᑲᑖᓕᒃ.

ᒫᓐᓇ ᓇᓗᓇᕐᑐᖅ ᑖᓐᓇ ᓂᕿᓕᕆᕝᕕᒃᓴᖅ ᖃᔅᓯᓂᒃ ᐃᖅᑲᓇᐃᔭᖅᑎᑦᑎᓇᔭᕆᐊᒃᓴᖓᓂᒃ, ᑭᓯᐊᓂᓕ ᐅᓕᑲᑖᓕ ᐃᓱᒪᔪᖅ ᒫᓂ 6-ᓂᒃ 10-ᓄᑦ, ᐊᒻᒪᓗ ᐅᖃᖅᖢᓂ “ᐃᓄᐃᑦ ᐱᓕᕆᔪᒻᒪᒻᒪᕆᒃᑐᑦ.”

ᕕᓐᓴᓐ ᓚ’ᐊᕈ, ᐃᓚᒋᔭᐅᔪᖅ ᓂᕿᕼᐊᖁᓐᓄᑦ, ᐅᖃᓚᐅᕐᑐᖅ ᐃᓄᐃᑦ ᐃᓕᓐᓂᐊᖅᑎᑕᐅᓂᐊᕐᓂᖏᓐᓂᒃ ᐃᖅᑲᓇᐃᔮᒃᓴᓄᑦ ᐊᒃᑐᐊᔪᓂᒃ ᒪᐅᖓ ᐃᓂᖃᕐᕕᓕᕆᓂᕐᒥᒃ, ᓂᐅᕐᕈᑎᓕᕆᓂᕐᒥᒃ, ᐊᔾᔭᖅᑕᐅᖃᑦᑕᖅᑐᓕᕆᓂᕐᒥᒃ, ᐊᐅᓚᑦᑎᓂᕐᒥᒃ ᐊᒻᒪ ᓂᐅᕕᐊᒃᓴᓕᐅᕋᓱᑲᑕᖕᓂᕐᒥᒃ.

ᐱᓕᕆᕝᕕᐅᓂᐊᕐᑐᖅ ᓴᓇᓯᒪᕙᒌᕐᓯᒪᔪᒥ ᐃᒡᓗᒦᓐᓂᕐᑐᖅ, ᐅᖃᖅᑐᖅ, ᑭᓯᐊᓂᓕ ᑖᒃᑯᐊ ᐱᓕᕆᔨᐅᔪᑦ ᐊᔪᕈᓐᓃᕐᓯᒪᓕᕈᑎᒃ ᐊᒻᒪᓗ ᑮᓇᐅᔭᓕᐅᕐᓇᖅᑐᒥ ᐸᕐᓇᐅᓯᐅᕈᓐᓇᕐᓯᒍᑎᒃ ᐃᓄᐃᑦ ᓂᕿᖏᓐᓄᑦ, ᑐᕌᒐᕆᔭᐅᓂᐊᕐᑐᕐᓕ ᐊᖏᓂᕐᓴᒥᒃ ᐱᓕᕆᕝᕕᓕᐅᕐᓗᑎᒃ.

ᐅᕙᓂ ᐊᕕᒃᑐᐃᕕᒃᓴᒥ ᐊᒻᒪ ᐴᖃᐃᕕᒃᓴᒥᑦ, ᑭᓪᓘᑎᑕᖃᕐᓂᐊᕐᑐᖅ, ᓂᕿᓄ ᐊᕿᓕᓴᕈᑎᓂᒃ, ᐴᖅᑲᐃᒍᑎᒥ ᒥᓪᓗᐊᖅᐸᓪᓕᐊᔪᒥᒃ, ᐅᖁᔭᙱᑦᑐᓂᒃ ᓂᕿᓕᕆᕝᕕᖃᕐᓗᑎᒃ ᐊᒻᒪ ᐅᐊᓴᕐᕕᖃᕐᓗᑎᒃ ᐊᒻᒪᓗ ᖁᐊᒃᑯᕕᖃᕐᓗᑎᒃ, ᐅᖃᓚᐅᕐᑐᖅ ᓚ’ᐊᕈ

ᑕᒪᒃᑯᓂᖓ ᐱᖁᑎᖃᕐᓗᑎᒃ, ᐃᖅᑲᓇᐃᔭᖅᑎᐅᔪᑦ ᐃᓗᐃᑦᑐᓂ ᓂᕿᓕᕆᕙᓪᓕᐊᓕᖃᑦᑕᕋᔭᕐᑐᑦ ᐊᒻᒪ ᐆᑦᑎᑐᐃᓐᓇᕆᐊᖃᓕᕐᓯᒪᔪᓂᒃ ᒪᑯᓂᖓ ᑐᒃᑐᓂ, ᐅᒥᖕᒪᓂ, ᓇᑦᑎᕐᓂ, ᑐᓕᒫᓂᒃ, ᐊᕿᓕᕐᓯᒪᔪᑦ ᓂᕿᓂᒃ, ᐃᖃᓗᖕᓂ ᓵᑦᑑᔭᒐᒃᓴᑦ ᐊᒻᒪ ᐊᓯᖏ ᐅᓄᕈᓘᔭᖅᑐᓂᒃ.

ᐳᕌᓐᑕᓐ ᓚᕗᐊᕋᔅᑦ ᐱᓕᕆᓕᒪᓂᕐᓴᖅ ᐅᑭᐅᕐᑕᖅᑐᕐᒥ ᐆᒪᔪᓕᕆᓂᕐᒥᒃ ᐅᑯᓄᖓ ᓄᓇᕐᔪᐊᒥ ᐆᒪᔪᓕᕆᔨᕐᔪᐊᒃᑯᓐᓄᑦ ᑲᓇᑕᒥ (WWF Canada) ᐊᒻᒪᓗ ᐊᖓᔪᖅᑳᖑᖃᑕᐅᓪᓗᓂ ᐆᒥᖓ ᓂᕿᕼᐊᖁᑦᑯᓐᓄᑦ.

“ᐃᓄᐃᑦ ᐅᐱᒍᓱᑦᑎᐊᕐᒪᑕ ᔨᒥᒥᒃ,” ᐅᖃᖅᑐᖅ. “ᓲᖃᐃᒻᒪ ᑖᓐᓇ ᐱᓕᕆᖃᑎᖃᐃᓐᓇᕐᒪᑦ ᐊᖑᓇᓱᒃᑐᓕᕆᔨᓂᒃ ᐊᒻᒪ ᐃᓐᓇᑐᖃᕐᓂᒃ ᑖᓐᓇ ᐊᑐᓕᖅᑎᓐᓇᓱᒃᖢᓂᐅᒃ.”

ᓚᕗᐊᕋᔅᑦ ᐅᖃᓚᐅᕐᒥᔪᖅ ᐅᓇ ᓂᕿᕼᐊᖁᑦ ᐸᕐᓇᐅᑎᒋᔭᐅᔪᓂᒃ ᐊᑐᖅᑕᐅᔪᒪᔪᒥᒃ ᐆᒥᖓ ᐊᕕᖅᑑᖅ ᐃᓄᖕᓄᑦ ᓴᐳᔾᔭᐅᓯᒪᕝᕕᒋᔭᐅᔪᒧᑦ ᐊᒻᒪ ᐃᓂᖃᕐᕕᐅᔪᒧᑦ ᑕᓗᕐᔪᐊᑉ ᖃᓂᒋᔭᖓᓂ ᓈᒻᒪᒃᑎᐊᕐᑐᖅ ᐸᕐᓇᐅᑎᖏᓐᓄᑦ. ᐅᓇ 90,000 ᑭᓚᒦᑕᓂ ᐊᖏᓂᖃᕋᔭᖅᖢᓂ — ᐊᖏᓂᕐᓴᒻᒪᕆᒃᖢᓂ ᓂᐅ ᐳᕋᓐᔅᕗᐃᒃᒥᑦ.

ᐅᓇ ᓂᕿᓕᕆᕝᕕᒃᓴᖅ ᐊᑐᓕᕈᓐᓇᕐᒥᔪᖅ ᐃᓄᒃᓯᐅᑎᓂᒃ ᑐᙵᕕᖃᖅᑐᒥᒃ ᑮᓇᐅᔭᓕᐅᕈᑎᒃᓴᓕᐅᕈᑎᐅᓗᓂ, ᑖᔅᓱᒪᓕ ᓚᕗᐊᕋᔅᑦ ᐅᒃᐱᕆᔭᖓ ᓈᒻᒪᒐᔭᕐᓂᖓᓂᒃ ᐊᓯᖏᓐᓂ ᑮᓇᐅᔭᓕᐅᕈᑎᐅᔪᓐᓇᕐᑐᓂᒡᓕ, ᓲᕐᓗ ᐆᑐᓇ ᐅᔭᕋᒃᓯᐅᕐᕕᒃᑎᑐᑦ, ᑕᒪᒃᑯᐊᓗ ᓱᕋᒃᑎᕆᓕᖅᐸᒃᖢᑎᒃ ᓄᓇᒥ ᐊᒻᒪᓗ ᓂᕿᒋᔭᐅᕙᒃᑐᓂᒃ ᐱᐅᔪᓐᓃᕈᑎᔭᓪᖢᑎᒃ.

ᐅᓇ ᐃᓱᐊᖅᑐᕐᕕᐅᑉ ᑲᖏᖅᖢᖓ ᐃᓕᓴᕆᔭᐅᓯᒪᔪᖅ ᓴᐳᔾᔭᐅᓯᒪᕝᕕᐅᓂᖓᓂ ᐊᑯᓂᐊᓗᒃ ᐱᓕᕆᐊᖑᓇᔭᕐᓂᖓᓂᒃ, ᓚᕗᐊᕋᔅᑦ ᐅᖃᖅᑐᖅ, ᑭᓯᐊᓂᓕ ᓴᐳᔾᔨᓯᒪᓂᕐᒧᑦ ᖃᓄᐃᓕᐅᕈᑎᐅᔪᖅ ᐱᕙᓪᓕᐊᓂᕐᓴᐅᓕᕐᒪᑕ.

ᐅᖃᓚᐅᕐᑐᖅ ᑐᕌᒐᕆᔭᐅᔪᕐᓕ ᐅᓇ ᓴᐳᔾᔭᐅᓯᒪᔪᖅ ᐃᓚᒋᐊᖅᑎᑦᑎᒍᑎᐅᓂᐊᕐᓗᓂ ᐃᖅᑲᓇᐃᔮᒃᓴᓂᒃ ᓄᓇᓕᖕᓄᑦ, ᒪᐅᓇ ᐱᓕᕆᐊᓂᒃ ᓴᖅᑭᑎᑦᑎᓂᕐᒥᒃ ᑲᒪᔨᐅᓂᐊᕐᑐᓂᒃ ᐊᒻᒪᓗ ᐆᒪᔪᓕᕆᔨᒃᑯᓐᓂᒃ.