ᓄᑖᖅ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᒃᓴᖅ ᒪᑐᐃᖅᐳᖅ ᐅᐃᓂᐱᐊᒡᒥ

For English version, see New medical boarding centre opens in Winnipeg

ᓄᑖᖑᔪᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑐᔪᕐᒥᕕᒃᓴᒥ ᑭᕙᓪᓕᕐᒥ ᐋᓐᓂᐊᕕᓕᐊᖅᑐᓄᑦ ᐊᐅᓪᓛᖅᑎᐅᔪᓄᑦ ᒪᑐᐃᓚᐅᖅᐳᖅ ᐅᐃᓂᐱᐊᒡᒥ ᐱᓇᓱᐊᕈᓯᐅᓚᐅᖅᑐᒥ.

“ᐅᓪᓗᒥ ᐱᒻᒪᕆᐅᓪᓗᓂ ᐅᓪᓘᕗᖅ ᖁᕕᐊᓱᒍᑎᖃᕐᓂᕐᒥ ᐆᒥᖓ ᓄᑖᖑᔪᒥ ᐃᒡᓗᕐᔪᐊᒥ ᐃᓄᖁᑎᑦᑎᓐᓄᑦ,” ᐅᖃᓚᐅᖅᐳᖅ ᑏᓅ ᐳᕉᔅ, ᐃᒃᓯᕙᐅᑕᐅᔪᖅ ᑲᑎᒪᔨᓄᑦ ᓴᒃᑰᑉ ᐱᕈᐃᔭᖏᓐᓂ ᐊᐅᓚᑦᑎᔨᖏᓐᓄᑦ, ᐅᒃᑐᐱᕆ 5−ᒥ ᑐᓴᒐᒃᓴᓕᐊᖑᔪᒥ.

ᓴᒃᑯ ᓇᖕᒥᓂᖃᖅᐳᖅ ᐅᖂᑕᖅ ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᖓᓂ.

“ᐊᑎᖅ ᐅᖂᑕᖅ, ᐃᓄᒃᑎᑐᑦ, ᑐᑭᖃᖅᐳᖅ ᐅᖅᑯᐊᖑᓂᐅᔪᒥ, ᐃᓂᐅᔪᒥ ᑕᖃᐃᖅᓯᕐᕕᒃᓴᖅ ᐊᒻᒪ ᐅᖅᑰᔪᓐᓇᕐᓂᕐᒥ,” ᐳᕉᔅ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐊᒻᒪ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖑᔪᓂ ᐊᖓᔪᖅᑳᖓ ᑯᓄ ᑕᑦᑐᐃᓂ ᐃᓚᐅᖃᑕᐅᓚᐅᖅᐳᑦ ᐳᕉᔅᒥ ᐅᒃᑐᐱᕆ 4−ᒥ ᑭᐱᓯᓂᕐᒥ ᓯᓂᒃᓴᒥ ᒪᑐᐃᖅᓯᓪᓚᕆᖕᓂᕐᒧᑦ ᑐᔪᕐᒥᕕᐅᔪᒥ.

ᐅᓄᕐᓂᖅᓴᐅᔪᓂ 200−ᓂ ᐃᓄᖕᓂ ᐅᐸᓚᐅᖅᐳᑦ ᖁᕕᐊᓱᒍᑎᖃᕐᓂᕐᒧᑦ ᖃᓄᐃᓐᓂᐅᔪᒥ.

ᐃᒡᓗᕐᔪᐊᖅ ᐃᓂᒋᔭᐅᔪᕕᓂᐅᔪᒦᑉᐳᖅ Clarion ᑐᔪᕐᒥᕕᖓᓂ, ᓴᒃᑯ ᐱᕈᐃᔭᖏᓐᓂ ᓂᐅᕕᓚᐅᖅᑕᖓᓐᓂ ᒪᐃᒥ.

ᑐᔪᕐᒥᕕᒃ ᓴᖑᑎᑕᐅᓚᐅᖅᐳᖅ ᐃᒡᓗᖃᖅᑎᑦᑎᓂᕐᒥ ᐋᓐᓂᐊᕕᓕᐊᖅᑐᓄᑦ ᐅᓂᒃᓯᒪᔪᓄᑦ, ᐃᑲᔪᖅᓱᐃᔨᐅᔪᓄᑦ ᐃᖅᑲᓇᐃᔭᖅᑎᓄᑦ ᐊᒻᒪ ᐃᓗᐊᕈᑎᒃᓴᖏᓐᓄᑦ ᑕᒪᒃᑭᑦ ᐊᑕᐅᓯᕐᒥ ᐃᒡᓗᒥ.

ᐃᓚᖃᕐᓂᐊᖅᐳᖅ ᐱᔨᑦᑎᕋᕐᓂᐅᔪᓂ ᓲᕐᓗ ᒥᑦᑕᕐᕕᖕᒥ ᐊᐃᒃᓯᕐᓂᕐᒧᑦ, ᓂᕆᔭᒃᓴᓂ, ᐃᓕᖅᑯᓯᒧᑦ ᐃᓂᒃᓴᐅᔪᓂ ᐊᒻᒪ ᐅᓯᑲᑦᑕᕐᓂᐅᔪᒥ ᐋᓐᓂᐊᕕᓕᐊᖅᑐᓄᑦ ᐅᐸᒃᑕᐅᕕᒃᓴᓄᑦ.

ᐋᓐᓂᐊᕕᓕᐊᖅᑐᓄᑦ ᑐᔪᕐᒥᕕᐅᓚᐅᖅᑐᖅ, ᑭᕙᓪᓕᕐᒥ ᐃᓄᖕᓄᑦ ᐱᓕᕆᕝᕕᒃ, ᐊᐅᓚᑕᐅᓯᒪᕗᖅ ᐊᕐᕌᒍᓄᑦ 20−ᓄᑦ. ᐊᑐᖅᓯᒪᕗᖅ ᖄᖏᐅᑎᓯᒪᓂᐅᔪᒥ ᑐᔪᕐᒥᕕᐅᔪᓐᓇᖅᑐᓂ ᐊᐅᓪᓛᖅᑎᐅᔪᓄᑦ ᑐᑭᖃᓚᐅᖅᑐᒥ ᐃᓚᖏᑦ ᑐᔪᕐᒥᕕᖕᒦᑦᑕᕆᐊᖃᕐᓂᖏᓐᓂ ᓄᓇᓕᐸᐅᔭᓕᒫᒥ.

ᓄᑖᖅ ᐃᓂᐅᔪᖅ 139−ᓂ ᐃᒡᓗᕈᓯᖃᖅᐳᖅ ᐊᒻᒪ 40,000 ᑭᑉᐹᕆᒃᑐᓂ ᐃᓯᒐᓪᓗᐊᓂ ᐃᖅᑲᓇᐃᔭᖅᑎᓄᑦ ᑎᑎᕋᕐᕕᓂ ᐃᓂᒃᓴᓂ ᐊᒻᒪ ᖃᓄᐃᓕᐅᕐᓂᕐᒧᑦ ᐃᓂᐅᔪᓂ.

“ᐊᐅᓪᓛᕐᓂᕐᒧᑦ ᐋᓐᓂᐊᕕᓕᐊᖅᑐᓄᑦ ᐱᔨᑦᑎᕋᕐᓂᕐᒥ ᐊᒃᓱᕈᕐᓇᖅᖢᓂ ᐊᒻᒪ ᐊᒃᓱᕈᕐᓇᕐᓂᐅᕙᒃᐳᖅ ᐃᓚᒌᖑᔪᓄᑦ ᐊᒻᒪ ᐅᓇ ᐱᐅᕐᔪᐊᖅᑐᖅ ᐃᒡᓗᕐᔪᐊᖅ ᐱᐅᓂᖅᓴᐅᔪᒥ ᑭᐅᒪᓂᐊᖅᐳᖅ ᐱᔭᕆᐊᖃᕐᓂᐅᔪᓄᑦ ᑭᕙᓪᓕᕐᒥᐅᓄᑦ,” ᑕᑦᑐᐃᓂ ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ.