ᓄᑖᖅ ᓱᓪᓗᓕᐊᓗᒃ ‘ᐅᓗᕆᐊᓇᙱᑦᑐᒥ, ᓴᓗᒪᔪᒥ ᐃᒪᖃᕐᓇᕐᓂᐊᖅᑐᖅ’ ᐃᕗᔨᕕᒃᒥ

For English version, see New pipeline brings ‘safe, clean drinking water’ to Ivujivik

ᓄᑖᖅ ᐃᒪᖃᕐᕕᒃᓴᖅ ᓱᓪᓗᓕᒃ ᐃᕗᔨᕕᒃᒥ ᐊᑐᖅᑕᐅᔪᓐᓇᕐᓯᔪᖅ, ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᐅᖃᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥᓐ.

ᓴᓇᔭᐅᓂᖓ ᐆᒪ $6.3 ᒥᓕᐊᓐ ᑖᓚᑐᖅᑑᑉ ᓱᓪᓗᓕᒃ ᓄᓇᕕᒃᒥ ᓄᓇᓕᖕᓂ ᐃᓄᖃᖅᑐᒥ ᒫᓂ 400-ᓂ ᐱᐊᓂᒃᑕᐅᕗᖅ ᐊᒻᒪᓗ ᐃᒪᖓ ᖃᐅᔨᓴᖅᑕᐅᑲᑕᒃᖢᓂ ᑲᑎᕕᒃ ᓄᓇᓕᓕᒫᑦ ᓄᓇᓕᖕᓂ ᐱᓕᕆᔨᖏᓐᓂᒃ, ᐅᖃᓚᐅᕐᑐᖅ ᑲᑎᕕᒃᑯᑦ ᓄᓇᓕᓕᒫᑦ ᒐᕙᒪᖓᓄᑦ ᐅᖃᖅᑎᒋᔭᐅᔪᖅ ᑕᓂᔅ ᐋᐸᑦ.

“ᐅᓗᕆᐊᓇᙱᑦᑐᖅ, ᓴᓗᒪᔪᖅ ᐃᒪᖅ ᒫᓐᓇ ᑯᕕᑲᑕᓕᕐᑐᖅ,” ᐅᖃᕐᑐᖅ.

ᐊᕐᕌᓂ ᒪᐃᔭ ᐋᑕᒥ ᖃᓕᖑ ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓄᓇᓖᑦ ᓈᒻᒪᙱᓕᐅᕈᑎᖃᕐᓂᖓ ᓄᖅᑲᕈᑎᐅᓚᐅᕐᓂᖓᓂᒃ ᓱᓪᓗᓕᒃᒥ ᐊᑐᖅᑕᐅᕙᒃᑐᒥᒃ ᐋᓐᓇᓗ ᒥᕐᓗᐊᕈᑎᒧᑦ ᐊᐅᓚᑕᐅᕙᒃᖢᓂ ᐃᒪᖃᕐᕕᖕᒥ ᑕᑭᔪᒥ ᓱᓪᓗᓕᒃᒥᑦ.

“ᒫᓐᓇᓕ ᓄᓇᓯᐅᑎ ᐃᒥᖅᑕᐅᑎ ᐃᒪᐃᓱᖃᑦᑕᕆᐊᖃᕐᒪᑦ,” ᖃᓕᖑ ᐅᖃᓚᐅᕐᓯᒪᔪᖅ ᑕᐃᔅᓱᒪᓂ.

ᔭᓄᐊᕆ 2022-ᒥ ᐃᕗᔨᕕᒃᒥ ᐃᒪᖃᐅᑎᖃᕐᕕᒃ ᓱᕋᓚᐅᕐᓯᒪᖕᒪᑦ ᐱᕋᔭᒃᑕᐅᓚᐅᖅᖢᓂ ᐅᖅᑰᓴᐅᑎᓕᒃ ᓄᓇᓯᐅᑎᖃᕐᕕᒃ ᓄᓇᓖᓪᓗ ᐃᒥᖅᑕᐅᑎᒥ ᑕᕝᕙᓃᑎᑦᑎᕙᒃᖢᑎᒃ.

ᓱᕋᒃᑎᕆᔭᐅᓂᖓ ᓄᓇᓯᐅᑎ ᐃᒥᖅᑕᐅᑎᒋᔭᐅᔪᖅ ᖁᐊᕈᑎᒋᖃᑦᑕᓕᓚᐅᕐᒪᒍ ᐊᒻᒪᓗ ᐊᑯᓂᐊᓗᒃ ᐃᒥᖅᑕᖅᐸᓕᖅᖢᑎᒃ ᓄᓇᓕᖕᓂ ᐊᒻᒪ ᑯᕕᖅᑕᖅᐸᒃᖢᑎᒃ.

ᐊᕐᕌᓂ ᐊᑕᐅᓯᖅ ᓄᓇᖃᖅᑐᖅ ᐅᖃᓚᐅᕐᓯᒪᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑯᕕᑲᐅᑎᒋᔪᓐᓇᐃᓪᓕᓂᖓ ᐊᔪᓕᕐᓂᖓᓄᑦ ᐊᒥᓱᑦ ᐃᓄᐃᑦ ᐅᕕᓂᖕᓂᐊᕈᓐᓇᐃᓪᓕᓚᐅᕐᑐᑦ ᐅᕝᕙᓘᓐᓃᑦ ᖁᕐᕕᖏᓐᓂᒃ ᑯᕕᑎᑦᑎᔪᓐᓇᐃᓪᓕᓗᑎᒃ.

ᓱᓪᓗᓕᐊᓗᒃ ᓴᓇᔭᐅᓕᓚᐅᕐᓯᒪᔪᖅ ᐅᑭᐊᒃᓴᖅ ᐱᒋᐊᓕᖅᑎᓪᓗᒍ ᐊᒻᒪ ᑕᖅᑭᐅᓚᐅᖅᑐᒥ ᐱᐊᓂᒃᑕᐅᓪᓗᓂ.

ᐊᑯᓂᕈᓗ ᐱᓕᕆᐊᖑᓚᐅᕐᒪᑦ. ᐅᓇ ᐱᐊᓂᒃᑕᐅᓂᐊᕋᓱᒋᔭᐅᓚᐅᖅᑑᒐᓗᐊᖅ 2022-ᒥ; ᑭᓯᐊᓂᓕ ᓄᕙᒡᔪᐊᕐᓇᖅ-19 ᐊᒃᓱᕈᕐᓇᕈᓘᔭᖃᑦᑕᓚᐅᕐᑐᖅ ᐊᒻᒪᓗ ᐃᓚᒃᓴᕆᔭᐅᔪᑦ ᑎᑭᓐᓇᓵᖅᐸᒃᖢᑎᒃ, ᐋᐸᑦ ᐅᖃᕐᑐᖅ.

“ᐊᒥᓱᐃᒻᒪᕆᒃᖢᑎᒃ ᓄᑖᙳᕆᐊᖅᑎᑦᑎᔭᕆᐊᖃᓚᐅᕐᑐᑦ ᖃᓄᐃᓕᖓᓂᖓᓂᒃ ᐊᒻᒪᓗ ᓴᓇᔭᐅᓂᐊᕐᓂᖓᒍᑦ ᑖᓐᓇ ᐱᐅᓯᕚᓪᓕᖅᑎᑕᐅᓇᓱᒃᖢᓂ ᐊᒻᒪ ᐱᖁᔭᑎᒎᖓᓇᓱᒃᖢᓂ,” ᐅᖃᕐᑐᖅ.

ᐊᐱᕐᓱᖅᑕᐅᑎᓪᓗᒍ ᐱᓇᓱᐊᕈᓯᐅᓚᐅᕐᑐᒥᑦ ᖃᓕᓯ ᐅᖃᓚᐅᕐᑐᖅ ᐅᓇ ᓄᑖᖅ ᓱᓪᓗᓕᐊᓗᒃ “ᐱᒻᒪᕆᐊᓘᓂᖓᓂᒃ” ᓄᓇᓕᖕᓄᑦ ᐊᒻᒪᓗ ᖃᓂᓐᓂᕐᓴᐅᓪᓗᓂ ᓄᓇᓕᖕᓂ ᑕᐃᑲᙵᓪᓕ ᑰᖕᒥ ᐃᒥᖅᑕᕐᕕᐅᖃᑦᑕᓚᐅᕐᑐᒥ ᐊᒻᒪᓗ ᐊᔪᓇᖅᐸᒃᖢᓂ ᐅᓗᕆᐊᓇᖅᑐᖅᓯᐅᓕᖅᐸᒃᖢᑎᒡᓗ ᐅᑭᐅᒃᑯᑦ ᓯᓚᒧᑦ.

ᑭᓯᐊᓂᓕ, ᖃᓕᖑ ᐅᖃᓚᐅᕐᒥᔪᖅ ᑖᓐᓇ ᓄᑖᖅ ᓱᓪᓗᐊᓗ ᓈᒻᒪᙱᓕᐅᕈᑎᓕᒫᓂ ᐋᖅᑭᒍᑎᐅᔾᔮᙱᓐᓂᕋᖅᖢᓂᐅᒃ ᐃᒪᕐᒥ ᐱᓕᕆᐊᖃᖅᑎᓪᓗᒋᑦ.

ᐅᖃᖅᖢᓂ ᓄᓇᓖᑦ ᐊᖁᑎᖃᒃᑲᓐᓂᕆᐊᖃᕐᓂᖏᓐᓂᒃ ᐊᔪᕈᓐᓃᖅᓯᒪᔪᓂᒃ ᐃᒥᖅᑕᐅᑎᒥ ᑕᐃᒪᓐᓇ ᓄᓇᖃᖅᑐᑦ ᐊᔪᕐᓴᓕᑐᐃᓐᓇᕋᔭᙱᒻᒪᑕ ᐊᖁᑎᑕᖃᙱᓐᓂᕐᒧᑦ.

“ᑕᐃᒪᓐᓇᓕ ᓄᓇᓖᑦ ᐱᔪᒪᔭᓕᒫᖏᓐᓂᒃ ᐱᔪᓐᓇᙱᓐᓇᑦᑕ. ᓲᕐᓗ ᐃᓕᓐᓂᐊᕐᕕᒃ ᐊᒻᒪ ᐋᓐᓂᐊᕕᒃ ᒪᑐᔭᐅᔪᒪᖃᑦᑕᕐᒪᑦ ᑯᕕᖅᑕᐅᑎᑕᖃᕈᓐᓃᕌᖓᑦ ᐅᕝᕙᓘᓐᓃᑦ ᐃᒥᖅᑕᐅᑎᑕᖃᖅᑎᓐᓇᒍ,” ᖃᓕᖑ ᐅᖃᕐᑐᖅ.

“ᓈᒻᒪᙱᓕᐅᕈᑎᐅᓕᔭᒻᒪ ᐊᖏᒡᓕᕙᓪᓕᐊᔭᓪᖢᓂ.”

ᖃᓛᖅᑎᑕᐅᖁᔭᐅᓕᖃᑦᑕᕐᒪᑕ ᐃᕗᔨᕕᒃᒥᑦ ᐊᒻᒪᓗ ᖃᓕᖑ ᐅᖃᖅᖢᓂ ᐊᒃᓱᕈᕈᑎᖃᖃᑦᑕᕐᓂᖏᓐᓂᒃᑕᐅᖅ ᐃᒪᖅ ᐃᓚᔭᐅᔭᕆᐊᖃᖅᑎᓪᓗᒍ ᑯᓘᕇᓐᒥ.

ᑭᓯᐊᓂᓕ, “ᓱᓪᓗᓕᒃ ᐊᑐᕈᓐᓇᕐᓯᕙᓪᓕᐊᖕᖕᒪᑦ” ᓈᒻᒪᒋᓕᐅᕈᑎᓪᓗ ᐅᓄᕈᓐᓃᕐᔫᒥᓪᓗᑎᒃ, ᐅᖃᕐᑐᖅ.

“ᑕᐃᒪᓕ ᐊᔪᙲᓐᓇᖁᓐᓇᖅᑐᖅ. ᑕᐅᑐᒃᖢᒍᓕ ᐱᐅᓯᕚᓪᓕᒻᒪᕆᒃᑐ ᐊᕐᕌᓂᐅᓚᐅᕐᑐᒥᓐ.”