ᓄᓇᕕᒧᑦ ᓄᑖᖅ ᒪᓕᒐᓕᐅᖅᑎ ᐅᖃᖅᑐᖅ ᐱᓇᓱᖕᓂᐊᕐᓂᕋᖅᖢᓂ ᐃᒡᓗᓄᑦ ᑮᓇᐅᔭᓂᒃ, ᐊᑐᓕᖅᑎᑕᐅᓗᓂ UNDRIP (ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᐅᑎᖃᓕᖅᑎᑦᑎᓂᖏᓐᓄᑦ ᓄᓇᖃᖅᑳᖅᑐᓂᒃ)

ᒪᓕᒐᓕᐅᕐᑎᓄᑦ ᐃᓚᒋᔭᐅᔪᖅ ᓯᐅᕕ ᐸᕉᐱ ᓵᓚᒃᓴᓚᐅᕐᒪᓐ ᐅᑯᓄᖓᐊᐱᑎᐱ-ᔭᐃᒻ ᐸᐃ-ᓄᓇᕕᒃ-ᐄᔭᐅᒧᑦ ᓂᕈᐊᒐᒃᓴᐅᓂᕐᒧᑦ ᐅᑭᐊᒃᓵᖅ ᒐᕙᒪᑐᖃᒃᑯᓄᑦ ᓂᕈᐊᕐᓇᐅᑎᓪᓗᒍ ᓂᕈᐊᖅᑕᐅᓪᓗᓂ 37.7 ᐳᓴᓐᑎᒥ ᓂᕈᐊᖅᑕᐅᓂᒃᑯᑦ.

ᐅᑯᐊ ᐸᓛᒃ ᑯᐸᑯᐊ ᒪᓕᒐᓕᐅᕐᑎᓄᑦ ᐃᓚᒋᔭᐅᔪᑦ ᐅᐃᕖᑐᑦ ᐅᖃᖃᑦᑕᕐᓂᕐᓴᐅᑎᓪᓗᒋᑦ, ᐅᖃᓚᐅᕐᑐᖅ ᕿᓂᕐᓂᕋᖅᖢᓂ ᐃᓄᒃᑎᑐᑦ ᑐᓵᔨᒥ ᐱᓕᕆᖃᑎᒋᓂᐊᖅᖅᑕᖓᓂᒃ.

“ᑐᑭᓯᓇᑦᑎᐊᖅᑐᒥᑦ ᐅᖃᐅᓯᖃᖃᑦᑕᕈᒪᒐᒪ ᐱᔭᐅᔭᕆᐊᓕᖕᓄᑦ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ,” ᐅᖃᖅᑐᖅ.

ᒫᓐᓇᒧᑦ, ᐸᕉᐱ ᐅᖃᓚᐅᕐᑐᖅ ᒫᕐᕉᖕᓂ ᐱᒻᒪᕆᐊᓘᖕᓂᒃ ᐱᔭᕆᐊᖃᖅᑐᓂᒃ ᑐᐊᕕᕐᓇᖅᑐᓂ ᓄᓇᕕᒻᒥ ᖃᐅᔨᒪᓂᕋᖅᖢᓂ ᐅᑯᓂᖓ ᐋᓐᓂᐊᖃᕐᓇᙱᑦᑐᓕᕆᓂᖅ ᐊᒻᒪ ᐃᒡᓗᓕᕆᓂᖅ.

ᐋᓐᓂᐊᖃᕐᓇᙱᑦᑐᓕᕆᓂᖅ ᐳᕌᕕᓐᓯᑰᕋᓗᐊᕐᑎᓪᓗᒍ, ᑭᓯᐊᓂᓕ ᒐᕙᒪᑐᖃᒃᑯᓐᓂᑦ ᐃᑲᔫᓯᐊᖅᑖᕈᑎᐅᕙᒃᑐᖅ, ᐅᖃᖅᑐᖅ ᐸᕉᐱ.

ᐊᖏᒡᓕᒋᐊᕈᓐᓇᕐᓂᐊᖁᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔫᑎᑖᕆᕙᒃᑕᖓᑦ, ᒐᕙᒪᑐᖃᒃᑯᑦ ᐃᓱᒪᖏᔭᖃᕆᐊᖃᖅᑐᖅ ᖃᓄᖅ ᐊᕕᒃᑐᐃᖃᑦᑕᕐᓂᖏᓐᓂᒃ ᑐᓂᔭᒃᓴᖏᓐᓂᒃ.

ᐸᕉᐱ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖃᕐᓯᒪᔪᑦ ᐊᕐᕌᒍᑦ 30 ᐅᖓᑖᓂᑦ.

ᐸᓛᒃ ᑯᐸᑯᐊᑯᑦ ᓂᕈᐊᒐᒃᓴᐅᓇᓱᒃᑎᓪᓗᒋᑦ, ᑖᒃᑯᐊ ᐅᖃᓚᐅᕐᓯᒪᔪᑦ ᐳᕌᕕᓐᓯᐅᔪᑦ ᐃᒡᓗᑖᕆᐊᖃᕐᓂᖓᓂᒃ 10,000 ᐃᒡᓗᓂ ᐊᕐᕌᒍᑦ ᖁᓕᑦ ᐃᓗᐊᓂ. ᑕᒪᑐᒧᖓᓕ ᐸᕉᐱ ᐅᖃᐅᓯᖃᑲᑕᖕᓂᕋᓕᖅᑐᖅ, ᐃᒡᓗᒃᓴᐅᓇᔭᖅᑐᓂᒃ ᐊᔾᔨᒌᙱᑦᑑᑎᓂᒃ ᖃᓄᐃᓕᖓᓂᒃᓴᖏᓐᓂᒃ ᑎᑎᕋᐅᔭᖁᔨᓪᓗᓂ.

“ᐅᑯᐊ ᒐᕙᒪᒋᓕᖅᑕᕗᑦ ᓕᐳᕈᑯᑦ ᓯᕗᒧᒃᐸᓪᓕᐊᖁᒍᑦᑎᒍᑦ, ᑕᐃᒪᓕ ᐅᕙᒍᑦ ᐋᕿᒍᑎᒃᓴᖅᓯᐅᕆᐊᖃᕋᑦᑕ,” ᐸᕉᐱ ᐅᖃᖅᑐᖅ.

ᐅᓇ ᓄᑖᖅ ᒪᓕᒐᓕᐅᕐᑎᐅᓕᕐᑐᖅ ᑕᑯᔭᐅᓕᒪᙱᑦᑑᒐᓗᐊᖅ ᓄᓇᕕᒃᒥᑦ, ᑭᓯᐊᓂᓕ ᐅᐸᒍᑎᓛᕈᒪᔪᖅ ᑭᖑᓪᓕᕐᒥ ᐊᕐᕋᒍᓕᒫᕐᓯᐅᑎᓄᑦ ᑲᑎᒪᓕᕐᐸᑕ ᒪᑭᕕᒃᑯᑦ, ᑲᑎᒪᓛᖅᖢᑎᒃ ᒫᔅᓯᐅᓕᕐᐸᑦ.

ᓂᕈᐊᖅᑕᐅᓚᐅᕐᑎᓪᓗᒍ ᐸᕉᐱ, ᒪᑭᕕᒃᑯᑦ ᐊᖓᔪᖅᑳᖃ ᓵᓕ ᕗᐊᑦ ᑐᓴᒐᒃᓴᓕᐅᓚᐅᕐᑐᖅ ᑐᙵᓱᒃᑎᑦᑎᓪᓗᓂ ᐸᕉᐱᒥ ᓄᓇᕕᒃᒧᑦ ᐳᓛᖁᔨᓪᓗᓂ ᐊᔪᕈᓐᓃᑐᐊᕈᓂ.

“ᓂᕆᐅᒃᐳᖓ ᑲᑎᖃᑎᒋᓂᐊᕐᓂᓐᓂ, ᐊᒻᒪᓗ ᐃᑲᔪᖅᑐᐃᓂᖓ ᑐᙵᓱᒃᑎᖢᑎᒍᑦ ᐱᓕᕆᐊᕆᓇᓱᒃᑕᑦᑎᓐᓂᑦ ᓇᖕᒥᓂᖅ ᐱᓇᓱᐊᒐᖃᕐᓂᕐᒥ ᐃᑲᔪᖅᑐᐃᓂᖓᓄᑦ ᐊᒻᒪᓗ ᒪᑯᓄᖓ ᐊᑐᓕᖅᑎᑦᑎᓂᕐᒥᒃ ᐆᒥᖓ ᔫᓇᐃᑕᑦ ᓇᐃᓴᓐ ᐱᔪᓐᓇᐅᑎᖃᓕᖅᑎᑦᑎᓂᖏᑦ ᓄᓇᖃᖅᑳᖅᑐᓂᒃ,” ᕗᐊᑦ ᐅᖃᖅᑐᖅ.

ᐅᖃᓪᓚᖃᑎᖃᑎᖃᖃᑦᑕᕐᓗᓂ ᐃᓄᐃᑦ ᓯᕗᓕᐅᕐᑎᖏᓐᓂᒃ ᐃᑲᔫᑎᖃᕋᔭᖅᑐᖅ ᐱᓕᕆᐊᖓᒍᑦ ᐃᑲᔪᕈᓐᓇᕐᓗᓂ ᒪᑭᕕᒃᑯᑦ ᐱᓕᕆᐊᕆᓇᓱᒃᑕᖓᒍᑦ ᓇᖕᒥᓂᖅ ᐱᓇᓱᐊᒐᖃᕐᓂᕐᒥᑦ.

ᐸᕉᐱ ᐃᑲᔪᖅᑐᐃᑦᑎᐊᖅᑐᖅ ᒪᓕᒐᕐᔪᐊᖅ C-262-ᒥ, ᑖᓐᓇ ᑲᓇᑕᐅᑉ ᒪᓕᒐᕐᔪᐊᖓᓂ ᒪᓕᒃᓯᒪᓕᖅᑎᑦᑎᒍᑎᐅᓇᔭᕐᑐᖅ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᐅᑎᖃᓕᖅᑎᑦᑎᓂᖏᓐᓄᑦ ᓄᓇᖃᖅᑳᖅᑐᓂᒃ.

ᒪᕐᕉᖕᓂ ᐊᔾᔨᒌᙱᑦᑑᖕᓂ ᒪᓕᒐᕐᔪᐊᖑᓇᔭᖅᑐᓂᒃ ᐃᓇᖏᖅᑕᖓᑕ, ᐋᓐᑏᐲᑯᓐᓄᑦ ᒪᓕᒐᓕᐅᕐᑎ ᕉᒥᐅ ᓵᒐᓈᔅ. ᑖᓐᓇ ᓴᕿᑕᐅᓂᑰᓪᓗᓂ 2018-ᒥ, ᒪᓕᒐᕐᔪᐊᖅ C-262 ᓄᖅᑲᖓᑎᑕᐅᓚᐅᕐᓯᒪᔪᖅ ᑲᓐᓲᕕᑎᕝ ᓴᓂᑐᓄ ᐅᐱᙶᖅ ᑭᓯᐊᓂᓕ ᓕᐳᕈᓪ ᒐᕙᒪᒃᑯᓐᓄᑦ ᑭᒡᒐᖅᑐᐃᔨ ᓴᓂᑐᑯᑦ ᑲᑎᒪᕕᐊᓂᒃ, ᓴᓂᑐ ᐲᑕ ᕼᐋᑐ, ᐅᖃᓚᐅᕐᓯᒪᔪᖅ ᓂᕈᐊᖅᑕᐅᒃᑲᓐᓂᕈᓂ ᐅᑯᐊ ᓕᐳᕈᓪ ᒐᕙᒪᒃᑯᑦ ᒪᓕᒐᕐᒥᒃ ᐊᑐᓕᖅᑎᑦᑎᒋᐊᖃᓛᕐᓂᖏᓐᓂᒃ.

“ᐱᒻᒪᕆᐅᕗᖅ ᐅᕙᓐᓄᑦ ᑲᔪᓯᓗᖓ ᐱᓕᕆᐊᖃᕐᓂᕐᒥᒃ ᒪᓕᒐᖅ C-262-ᒥ ᒪᓕᓕᖅᑎᓪᓗᒋᑦ ᑲᓇᑕᒥ ᒪᓕᒐᕐᔪᐊᑦ ᓄᓇᕐᔪᐊᒥ ᑲᑐᔾᔨᖃᑎᒌᑦ ᐱᔪᓐᓇᐅᑎᖃᓕᖅᑎᑦᑎᓂᖏᓐᓄᑦ ᓄᓇᖃᖅᑳᖅᑐᑦ ᐊᒻᒪ ᐱᓕᕆᐊᕆᓚᐅᕐᑕᖓ ᐃᓇᖏᖅᑕᒪ ᕉᒥᐅ ᑳᒐᓈᔅ,” ᐸᕉᐱ ᐅᖃᖅᑐᖅ.

“ᑲᔪᓯᓂᐊᕐᑐᖓ ᐃᑲᔪᖅᑐᐃᓗᖓ ᑖᔅᓱᒥᖓ ᐱᓕᕆᐊᒥᒃ ᐊᒻᒪ ᐃᑲᔪᕈᒪᓯᒪᓪᓗᒍ ᕉᒥᐅ ᓯᕗᓂᑦᑎᓐᓂᒃ ᖃᓄᐃᓕᐅᕈᑎᒃᓴᑎᒍᑦ. ᓈᒻᒪᙱᒻᒪᑦ ᑲᓇᑕ ᑖᔅᓱᒥᖓ ᐋᖅᑭᒃᓯᓯᒪᙱᓐᓂᖏᓐᓂᒃ 2020 ᑎᑭᙱᓐᓂᖓᓂᒃ.”