ᓄᓇᕕᖕᒥ ᑎᑕᒃᑎ ᐄᑐᐊ ᔅᓅᐹᓪ ᕿᒥᕐᕈᕗᖅ ᑎᓴᒪᖓᓐᓂ ᓂᔾᔮᑎᑦᑎᓕᐊᖓᓂ

ᐃᓅᕗᖓ ᓯᓅᐸ ᐃᓚᖃᕐᓂᐊᖅᐳᖅ 10−ᓂ ᐃᙱᐅᓯᓂᒃ ᑭᐅᔪᒥ ᐊᔾᔨᒌᙱᕈᔮᖅᑐᓂ ᐊᑲᐅᙱᓕᐅᕈᑕᐅᔪᓂ

ᐄᑐᐊ ᔅᓅᐹᓪ ᐱᙳᐊᖅᐳᖅ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐅᓪᓗᖓᓂ 2017−ᒥ ᒪᓐᑐᕆᐋᓪᒥ. ᓴᖅᑭᑎᑦᑎᓂᐊᖅᐳᖅ ᑎᓴᒪᖓᓐᓂ ᓂᔾᔮᑎᑦᑎᓕᐊᖓᓂ, ᐃᓅᕗᖓ ᓯᓅᐸ, ᖃᖓᑦᑎᐊᑯᓗᒃ. (ᐊᔾᔨᓕᐅᖅᑕᐅᔪᖅ ᐃᐊᑦ ᒪᕈᔭᒪᒧᑦ)

By ᑕᐃᕕᑦ ᓛᒃᕼᐄᑦᒧᑦ

For English version, see Nunavik musician Etua Snowball previews fourth album

ᓄᓇᕕᖕᒥ ᐃᙱᖅᑎ-ᐃᙱᐅᓯᐊᖅᑎ ᐄᑐᐊ ᔅᓅᐹᓪ ᐅᖃᖅᐳᖅ ᓂᔾᔭᑎᑦᑎᓕᓕᐊᖏᑦ ᐃᖏᕐᕋᓂᐅᓯᒪᕗᑦ ᒫᓐᓇᒧᑦ ᑎᑭᖦᖢᒍ, ᓯᕗᓪᓕᖅᐹᖓᓂ ᓯᓚᐃᓚᐅᖅᐳᖅ ᒪᑉᕈᖓᓄᑦ ᐱᖓᔪᖓᓐᓄᓪᓗ ᕿᒥᕐᕈᓂᐅᓚᐅᖅᐳᑦ ᓄᓇᕐᔪᐊᒥ ᐊᒻᒪ ᑭᓇᐅᓂᖓᓂ.

ᑎᓴᒪᖓᓐᓂ ᓂᔾᔮᑎᑦᑎᓕᓕᐊᖓ, ᐃᓅᕗᖓ ᓯᓅᐸ, ᕿᓚᒻᒥᐅᔪᒥ ᓴᖅᑭᑕᐅᓛᕋᓱᒋᔭᖓ, ᐃᓚᖃᕐᓂᐊᖅᐳᖅ 10−ᓂ ᐃᙱᐅᓯᓂᑦ, ᑎᓴᒪᑦ ᐃᓄᒃᑎᑑᖅᖢᑎᒃ.

ᓂᔾᔮᑎᑦᑎᓕᓕᐊᖓ ᐱᔾᔪᑎᖃᕐᓂᐊᖅᐳᖅ ᐃᓕᓴᖅᓯᓂᖓᓂ ᑭᓇᐅᓂᖓᓂ ᐃᓅᓪᓗᓂ ᐊᒻᒪᓗ “ᑲᓱᖃᑎᖃᕐᓂᕐᒥ [ᐃᓄᐃᑦ] ᐊᑐᖅᐸᓚᐅᖅᑕᖏᓐᓂ ᐊᒻᒪ ᐃᓄᑐᖃᑦᑎᓐᓂ … ᐊᒻᒪᓗ ᐅᖃᐅᓯᖃᕐᓂᕐᒥ ᑭᓱᑦ ᐊᔾᔨᒌᙱᑎᑕᐅᓂᐅᔪᓂ ᐊᑐᖅᐸᒃᑕᑦᑎᓐᓂ ᐃᓅᓪᓗᑕ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᓂᔾᔮᑎᑦᑎᓕᓕᐊᖓᑕ ᑕᐃᒎᓯᖓᑕ ᐅᖃᐅᓯᖅ, ᐃᓅᕗᖓ, ᑐᑭᖃᖅᐳᖅ “ᐃᓅᕗᖓ, ᐆᒪᕗᖓ,” ᐊᒻᒪ ᐃᙱᐅᓯᐅᕗᖅ ᓂᔾᔮᑎᑦᑎᓕᓕᐊᖓᓂ.

ᔅᓅᐹᓪ ᐃᙱᖅᑎᐅᓛᖑᓪᓗᓂ ᐊᒻᒪ rhythm ᑯᑭᑦᑕᐹᕐᒥ, ᑎᑕᒃᑎᐅᖃᑕᐅᔪᑦ ᐃᓚᖏᑦ ᐃᓚᖃᖅᐳᑦ ᕌᑉ ᒪᒃᑖᓄᑦ ᑯᑭᑦᑕᐹᖅᑎᐅᓪᓗᓂ ᐊᒻᒪ ᓴᖅᑭᑎᑦᑎᔨᐅᔪᖅ, ᐹᑐᕆᒃ ᐸᓛᖕᒃ ᖃᑎᑐᔪᒥ ᑯᑭᑦᑕᐹᕐᒥ, ᑖᓐ ᓕᒎᓪᑦ ᕿᓚᐅᑎᓂᑦ, ᕌᐳᑦ ᔅᑖᒡ ᐱᐊᓇᑎᑦᑎᔨ ᐊᒻᒪ ᔮᔅᒥᓐ ᑉᓚᐃᔪᓪ ᑐᓄᐊᓂ ᐃᙱᖅᑎᐅᓪᓗᓂ.

ᐸᐸᑦᑏᓐᓇᕐᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂ ᐃᒻᒥᓄᑦ−ᐅᔾᔨᕈᓱᓕᕐᓂᖓᓂ ᐊᒻᒪ ᐃᒃᐱᒍᓱᑦᑎᐊᕐᓂᕐᒥ ᐊᕙᑎᒥ, ᔅᓅᐹᓪ, ᑰᒡᔪᐊᕐᒥᐅᑕᐅᔪᖅ ᐊᒻᒪ ᐱᕈᖅᓴᓯᒪᓪᓗᓂ ᓄᓇᕕᖕᒥ, ᐅᖃᓚᐅᖅᐳᖅ ᐅᖃᐅᓯᕆᔭᐅᔪᑦ ᓂᔾᔮᑎᑦᑎᓕᓕᐊᖓ ᑭᐅᓂᖓᓂ ᐊᔾᔨᒌᙱᑦᑑᑕᐅᕗᑦ.

ᑭᓯᐊᓂ, ᐃᓚᒋᐊᖅᓯᓚᐅᖅᐳᖅ, ᐅᖃᐅᓯᖃᓲᖑᒋᕗᖅ ᐱᕐᔪᐊᖑᓂᐅᔪᓂ ᐅᖃᐅᓯᖃᖅᑐᓂ, ᓲᕐᓗ ᐅᓇᑕᕐᓂᕐᒥ ᐅᐃᕆᓯᒪᓂᐅᔪᓂ ᐊᒻᒪ ᖃᓄᖅ ᐅᑯᐊ ᐊᒃᓱᕈᕈᑕᐅᔪᑦ ᓵᙵᔭᐅᔪᓐᓇᕐᓂᖏᓐᓂ, ᑐᓴᖅᑕᐅᔪᓐᓇᖅᑐᒥ ᐃᙱᐅᓯᒥᕐ, ᑕᓗᕈᒃᑯᑎᓂᖅ.

ᓂᔾᔮᑎᑦᑎᓕᓕᐊᖓ ᐅᖃᐅᓯᖃᓲᖑᒋᕗᖅ ᐃᓕᖅᑯᓰᑦ ᐊᒻᒪ ᐃᑦᑕᕐᓂᓴᐃᑦ ᐸᐸᑕᐅᕙᖕᓂᖏᓐᓂ, ᔅᓅᐹᓪ ᐅᖃᓚᐅᖅᐳᖅ ᐃᒃᐱᒍᓱᓚᐅᕐᓂᖓᓂ ᐊᓯᐅᔨᓂᖓᓂ ᐃᓚᖓᓐᓂ ᐃᒪᐃᑦᑐᒐᓚᖕᓄᑦ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᐊᑐᖅᑕᐅᒐᔪᒃᑐᓂ ᖃᓪᓗᓈᑎᑐᑦ.

“ᐊᓯᐅᔨᔭᓐᓇᕋᑦᑕ ᖃᓄᖅ ᐱᕈᖅᓴᕙᓚᐅᕐᓂᑦᑎᓐᓂ, ᖃᓄᖅ ᐃᓕᓐᓂᐊᖅᑎᑕᐅᕙᓚᐅᕐᓂᑦᑎᓐᓂ,” ᐅᖃᓚᐅᖅᐳᖅ.

ᑭᓯᐊᓂ, ᓂᔾᔮᑎᑦᑎᓕᓕᐊᖓ ᐃᓂᒃᓴᖃᕆᕗᖅ ᐅᖃᐅᓯᐅᓂᐅᔪᓂ ᓲᕐᓗ ᓇᒡᓕᒍᓱᖕᓂᐅᔪᒥ, ᑕᑯᒃᓴᐅᑎᑕᐅᔪᒥ ᐃᙱᐅᓯᒥᒃ ᑐᑭᖃᙱᑦᑐᒥ.

ᐱᒋᐊᕐᓂᖓᓂ ᑐᓴᕐᓈᓕᐅᕐᓂᕐᒥ ᐱᒋᐊᓚᐅᖅᐳᖅ 90-ᖏᓐᓂ ᕿᑎᖅᐸᓯᐊᓂ, ᓴᓂᓕᖓ ᐊᒻᒪ ᐃᓕᓴᐃᔨᖓ ᑐᓵᒐᒥᐅᒃ ᐃᙱᖅᑎᓪᓗᒍ ᐊᒻᒪ ᐅᖃᐅᔾᔨᓪᓗᓂ ᔅᓅᐹᓪᒥ ᓂᐱᓕᐅᕆᔭᕆᐊᖃᕐᓂᖓᓂ ᐃᙱᖅᑕᖏᓐᓂ. ᑐᕌᖅᑎᑦᑎᓚᐅᖅᐳᖅ ᓯᕗᓪᓕᖅᐹᒥ ᓂᔾᔮᑎᑦᑎᓕᓕᐊᖓᓂ ᓄᓇᒐ, 1995−ᒥ.

ᐱᖓᔪᖓᓐᓂ ᓂᔾᔮᑎᑦᑎᓕᓕᐊᖓ, ᐃᓕᖅᑯᓯᒧᖅ ᖁᒃᓴᓪᓚᒃᑎᑦᑎᓂᐅᔪᖅ, ᐊᑦᑎᖅᑕᐅᓚᐅᖅᐳᖅ ᐱᐅᓛᖑᔪᒥ Rock-ᒥ ᓂᐱᓕᐅᖅᓯᒪᔪᒥ 2012−ᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓂᕈᐊᒐᕆᔭᐅᔪᒥ ᑐᓴᕐᓈᕈᑎᓕᐅᕐᓂᕐᒥ ᓵᓚᖃᐅᓯᐊᖑᔪᒥᑦ.

ᐱᕈᖅᓴᑎᓪᓗᒍ, ᔅᓅᐹᓪ ᐅᖃᓚᐅᖅᐳᖅ, ᑎᑕᖕᓂᕐᒧᑦ ᑲᔪᖏᖅᓴᐃᔾᔪᑎᒋᓚᐅᖅᑕᖏᓐᓂ ᐃᓄᖕᓂ ᑎᑕᒃᑎᐅᔪᓂ ᐊᒻᒪ ᐃᙱᖅᑎᓂ ᓲᕐᓗ ᓵᓕ ᐋᑕᒻᔅ, ᐊᒻᒪᓗᑦᑕᐅᖅ ᑐᓴᕐᓈᕈᑎᓕᐅᕐᓂᕐᒥ ᓈᓚᒃᐸᓚᐅᖅᑕᖏᓐᓂ ᓈᓚᐅᑎᒃᑯᑦ.

ᒪᒃᑯᒃᑎᓪᓗᒍ, ᐊᐅᔾᓚᐅᔾᔨᖃᑦᑕᓚᐅᖅᐳᖅ ᐳᓚᕋᖅᑐᓂ ᓄᓇᕕᒃᑯᑦ ᐊᒻᒪ ᐱᓕᕆᓂᐅᔪᒥ, ᐅᖃᓚᐅᖅᐳᖅ, ᑕᑯᒃᓴᐅᑎᑕᐅᓂᖃᓚᐅᖅᐳᖅ ᐊᔾᔨᒌᙱᕈᓘᔭᖅᑐᓂ ᑐᓴᕐᓈᕈᑎᓕᐅᕐᓂᕐᒥ.

“ᐹᖅᓯᕙᓚᐅᖅᐳᖓ ᖃᓄᐃᑦᑐᑐᐃᓐᓇᑦᑎᐊᓂ ᐃᓄᖕᓂ ᐱᕈᖅᓴᑎᓪᓗᖓ, ᑕᐃᒫᒃ ᐅᕙᓐᓂ ᑲᔪᖏᖅᓴᐃᓚᐅᖅᐳᖅ ᐊᒥᓱᓄᑦ ᐊᔾᔨᒌᙱᕈᓘᔭᖅᑐᓂ [ᓂᐱᐅᔪᓂ],” ᔅᓅᐹᓪ ᐅᖃᓚᐅᖅᐳᖅ.

ᐊᔾᔨᒌᙱᕈᓘᔭᖅᑐᒥ ᑎᑕᖕᓂᐅᔪᒥ ᐊᑐᕐᓂᑯᖏᓐᓂ ᐃᒻᒥᓂᒃ ᑕᑯᒃᓴᐅᑎᑦᑎᕗᖅ ᖃᔅᓯᒐᓚᖕᓄᑦ ᐱᓕᕆᓂᐅᔪᓄᑦ ᐊᑐᖅᐸᒃᑕᖓᓐᓂ ᑎᓴᒪᖓᓐᓂ ᓂᔾᔮᑎᑦᑎᓕᓕᐊᖓᓂ, rock, reggae, funk−ᖑᒍᓂ ᐅᕝᕙᓘᓐᓃᑦ ᐊᓯᐊᓂᒃ ᐊᔾᔨᐅᙱᑦᑐᒥ.

“ᕿᓂᕐᓂᕐᒥ ᖃᓄᐃᑦᑑᓂᖏᓐᓂ ᖃᓄᐃᓕᖓᓂᐅᔪᒥ ᐅᕙᓐᓄᑦ ᐱᐅᕗᖅ,” ᐅᖃᓚᐅᖅᐳᖅ.

ᑕᐃᒪᐃᒐᔪᒃᑐᒥ, ᔅᓅᐹᓪ ᑐᕌᖓᓂᖅᓴᐅᕗᖅ rock ᐅᕝᕙᓘᓐᓃᑦ easy rock ᐃᙱᐅᓯᓂᒃ ᑭᓯᐊᓂ ᐃᓚᓕᐅᔾᔨᓯᒪᒋᕗᖅ ᐊᓯᖏᓐᓂ ᑭᓱᑐᐃᓐᓇᓂ.

ᑎᑎᕌᓂᒃᑳᖓᒥ ᐃᙱᐅᓯᒧᑦ ᐊᒻᒪ ᑯᑭᑦᑕᐹᕐᒧᑦ, ᐊᒥᐊᒃᑯᖓ ᐃᓕᑦᑎᐊᓲᖑᕗᖅ, ᐅᖃᓚᐅᖅᐳᖅ.

ᑭᓯᐊᓂ ᑐᓴᕐᓈᕈᑎᓕᐅᕐᓂᕐᒥ ᓄᖅᑲᔾᔮᙱᓚᖅ ᔅᓅᐹᓪᒧᑦ.

ᑎᑎᕋᐃᓐᓇᐅᔭᕐᓂᐊᖅᑐᖓ [ᑐᓴᕐᓈᕈᑎᓕᐅᕐᓂᕐᒥ],”ᐅᖃᓚᐅᖅᐳᖅ.

ᐅᖃᐅᓯᖃᒃᓴᖃᑐᐊᕌᖓᑦ ᑐᓴᖅᑕᐅᔭᕆᐊᖃᖅᑐᒥ ᐅᕝᕙᓘᓐᓃᑦ ᓴᓇᔭᐅᓂᖓᓂ ᐃᙱᐅᓯᒧᑦ, ᔅᓅᐹᓪ ᐅᖃᓚᐅᖅᐳᖅ, ᑲᔪᖏᖅᓴᖅᑕᐅᖏᓐᓇᐅᔭᕐᓂᐊᖅᐳᖅ ᑎᑎᕋᕐᓂᕐᒥ ᐃᙱᐅᓯᓂᑦ ᑐᑭᖃᖅᑐᓂ.

“ᑕᓪᓕᒪᖓᓐᓂ [ᓂᔾᔮᑎᑦᑎᓕᓕᐊᒥ] ᓴᖅᑭᑎᑦᑎᓛᖅᑐᒃᓴᐅᔪᖓ,” ᐅᖃᓚᐅᖅᐳᖅ.

Share This Story

(0) Comments

Join the Conversation

Your email address will not be published. Required fields are marked *

*