ᓄᓇᕗᑦ ᐃᓚᖓ ᓂᒡᓚᓱᙱᓐᓂᕐᓴᐅᓂᐊᕐᑐᖅ ᑭᓯᐊᓂ ᐊᐳᑎᖃᕐᓂᕐᓴᐅᓗᓂ

For English version, see Parts of Nunavut to see milder winter with more snow, Environment Canada says

ᓄᓇᕗᒥᑦ ᐱᖓᔪᖓᓐᓂᒃ ᐊᐅᔭᒃᑯᑦ ᐅᖅᑰᓛᖑᓚᐅᕐᑎᓪᓗᒍ ᐊᕐᕌᒍᑦ 75 ᐃᓗᐊᓂ, ᐊᒻᒪᓗ ᐅᑭᐊᒃᓵᖅ ᓂᒡᓚᓱᓗᐊᙱᖢᓂ, ᐊᕙᑎᓕᕆᔨᒃᑯᑦ ᑲᓇᑕᒥ ᐃᓱᒪᔪᑦ ᑕᒪᑐᒪᓂ ᓂᒡᓚᓱᙱᓐᓂᕐᓴᐅᓗᓂ ᐅᑭᐅᖅ ᐱᒋᐊᕐᓂᐊᕐᓗᓂ ᓇᑉᐸᓪᓗᐊᖓᓄᑦ ᓄᓇᕗᓕᒫᐸᓗᖕᒥᓐ.

“ᐅᖃᕈᑦᑕ ‘ᐅᖅᑰᖑᓂᕐᓴᐅᓂᐊᕐᓂᖓᓂᒃ ᐃᓕᖅᑯᓯᕆᕙᒃᑕᖓᓂᒃ’, ᑕᐃᒪᓕ ᒫᓂ 1 ᐅᕝᕙᓘᓐᓃᑦ 2 ᑎᒍᕇᔅᒥ ᐅᖅᑰᓂᕐᓴᐅᓂᐊᕐᒪᑦ, ᑭᓯᐊᓂᓕ ᑕᒪᓐᓇ ᐅᓪᓗᓂ 60-ᓂ 90-ᓄ ᑕᐃᒪᐃᑉᐸᑦ, ᐅᔾᔨᕐᓇᕋᔭᒻᒪᕆᒃᑐᖅ.” ᐅᖃᕐᑐᖅ ᑕᐃᕕᑦ ᕕᓕᑉᔅ, ᓯᓚᓐᓂᐊᖅᑎ ᐊᕙᑎᓕᕆᔨᒃᑯᓐᓂ ᑲᓇᑕᒥ, ᐅᖄᓚᐅᑎᒃᑯᑦ ᐊᐱᖅᓱᖅᑕᐅᑎᓪᓗᒍ ᑎᓯᐱᕆ 1ᒥ.

ᒪᑯᐊᓕ ᐱᕐᓯᑲᑕᓚᐅᑲᒃᑐᑦ? ᕕᓕᑉᔅ ᐅᖃᓚᐅᕐᑐᖅ ᐅᖅᑰᑲᑕᖕᓂᕐᓴᐅᓂᖓ ᐅᑭᐊᒃᓵᖅ ᐱᔾᔪᑎᐅᓂᖓᓂᒃ ᐊᒻᒪᓗ ᐅᖅᑰᓂᕐᓴᖅ ᐊᐳᑎᖃᕐᓂᕐᓴᐅᔾᔪᑎᐅᓂᐊᖅᖢᓂ.

ᐅᑯᓇᓂ ᓄᓇᕗᑦ ᑲᓇᖕᓇᖅᐸᓯᐊᓂᒃ — ᐃᖃᓗᐃᑦ ᐊᒻᒪ ᕿᑭᖅᑖᓘᑉ ᐃᓚᖓ — ᓄᓇᕕᒃᓗ, ᐊᕙᑎᓕᕆᔨᒃᑯᑦ ᑲᓇᑕᒥ ᐅᖃᕐᓯᒪᔪᑦ ᓯᓚᐅᑉ ᓂᒡᓚᓱᖕᓂᖓ ᑎᓯᐱᕆᒥ ᕕᕝᕗᐊᒧᑦ ᐅᖅᑰᖑᓂᕐᓴᐅᓂᐊᕐᓂᖓᓂᑦ ᐃᓕᖁᓯᕆᕙᒃᑕᖓᓂᓪᓕ. ᐃᖃᓗᐃᑦ ᓂᒡᓚᓱᖕᓂᕆᕙᒃᑕᖓ ᒫᓃᖃᑦᑕᕐᒪᑦ ᖁᒃᑎᖕᓂᖃᖅᖢᓂᒃ -18C ᐊᒻᒪ ᐊᑦᑎᓂᖓ ᒫᓃᑉᐸᒃᖢᓂ -26C.

ᕿᑎᐊᓃᖢᓂ ᓄᓇᑦᓯᐊᕐᓗ, ᑕᒫᓂᓗ ᓂᒡᓚᓱᖕᓂᕐᓴᐅᓂᐊᖅᖢᓂ ᐅᑭᐅᖅ, ᓄᓇᕗᑦ ᐱᖓᖕᓇᖓᓃᑦᑐᑦ ᐅᑯᐊ ᖃᒪᓂᑦᑐᐊᖅ, ᑲᖏᖅᖠᓂᖅ ᐊᒻᒪᓗ ᐊᕐᕕᐊᑦ ᓯᓚᖓ ᓱᖁᓯᕐᓯᒪᓗᐊᔾᔮᙱᑦᑐᖅ. ᐊᕐᕕᐊᑦ ᓯᓚᖓ ᐅᑭᐅᒃᑯᑦ ᒫᓃᖃᑦᑕᕐᒪᑦ -22 ᑎᒍᕇᔅ ᐊᒻᒪᓗ ᐊᑦᑎᓛᒃᑯᑦ ᒫᓂ -27 ᑎᒍᕇᔅᖑᕙᒃᖢᓂ.

ᐃᒪᓐᓇᐅᓂᕐᓴᐅᕙᒃᖢᓂ, ᓄᓇᕗᒧᑦ ᓇᓗᓇᐃᕐᓯᓯᒪᖕᒪᑕ ᐅᓪᓗᓂ 130ᓂ -20 C ᐊᑖᓃᖃᑦᑕᕐᑐᖅ ᐊᕐᕌᒍᒥ, ᑭᓯᐊᓂᓕ ᐊᕐᕌᒎᓕᖅᑑᖕᓂᒃ ᒪᕐᕉᖕᓂ, ᓄᓇᕗᑦ ᓇᓗᓇᐃᕐᓯᓯᒪᔪᖅ ᐅᓪᓗᓂ 100ᓂ ᑕᐃᒪᓐᓇ ᓂᒡᓚᓱᒃᑐᒦᑦᑐᑦ 2021ᒥ ᐊᒻᒪᓗ ᐅᓪᓗᓂᒃ 96ᓂ 2020ᖑᑎᓪᓗᒍ.

ᑕᐃᒪᓕ ᐊᕙᑎᓕᕆᔨᒃᑯᑦ ᑲᓇᑕᒥ ᐃᓱᒪᔪᑦ ᐅᑭᐅᑉ ᓇᑉᐸᖓᑕ ᓯᕗᓪᓕᖏᑦ ᓂᒡᓚᓱᙱᓐᓂᕐᓴᐅᓂᐊᕋᓱᒋᔭᐅᓪᓗᓂ ᑭᓯᐊᓂ ᐊᐳᑎᖃᕐᓂᕐᓴᐅᓗᓂ, ᐱᕐᓯᖃᑦᑕᕐᓂᕐᓴᐅᓗᓂ ᐊᒻᒪᓗ ᐊᓄᕌᕐᓂᕐᓴᐅᕙᒡᓗᓂ, ᐊᒻᒪᓗ ᑭᖑᓪᓕᕐᓂ ᑕᖅᑭᓂᒃ ᓯᓚᐅᑉ ᐃᓕᖅᑯᓯᕆᕙᒃᑕᖓᓃᓐᓂᕐᓴᐅᓂᐊᖅᖢᓂ.

ᕕᓕᑉᔅ ᐅᖃᓚᐅᕐᑐᖅ 93 ᐳᓴᓐᑎᖏᑦ ᑲᓇᑕᒥᐅᑕᑦ ᖃᐅᔨᓇᓱᖃᑦᑕᕐᒃᓂᕋᖅᖢᓂᒋᑦ ᓯᓚ ᖃᓄᐃᓕᖓᓂᐊᕐᒪᖔᑦ ᖃᐅᑕᒫᓐ, ᐅᖃᓚᐅᕐᑐᖅ ᓯᓚᐅ ᖃᓄᐃᓕᖓᓂᐊᕐᓂᖓ ᓇᓚᐅᑦᑖᖅᑕᐅᑐᐃᓐᓇᖃᑦᑕᕐᓂᕋᖅᖢᓂᐅᒃ ᐃᓕᓐᓂᐊᕐᓯᒪᓂᒃᑯᑦ.

“ᓯᓚ ᖃᓄᐃᓕᖓᓂᐊᕐᓂᖓᓂ ᓇᓚᐅᑉᐸᓪᓕᐊᓂᕐᓴᐅᕙᓕᕐᑐᑦ ᑭᓯᐊᓂᓕ ᐱᓕᕆᐊᕆᔭᐅᓂᖓ ᖃᐅᔨᓴᖅᑕᐅᓂᖓᒍᑦ ᐊᒃᓱᕈᕈᑎᐅᕙᖕᒥᔪᖅ,” ᐅᖃᕐᑐᖅ.