ᓄᓇᕗᑦ ᐊᓂᑎᑦᑎᕗᑦ 23-ᓂ ᑎᒍᔭᐅᓯᒪᔪᓂᒃ ᐱᔾᔪᑎᒋᔭᐅᓪᓗᓂ ᐋᓐᓂᐊᕕᒡᔪᐊᕐᓇᖅ

“ᐅᓗᕆᐊᓇᙱᑉᐸᑕ ᐊᓂᑎᑦᑕᕆᐊᒃᓴᖅ ᑖᒃᑯᐊ ᐃᓄᐃᑦ, ᖃᓄᐃᒻᒪᓪᓕ ᑎᒍᔭᐅᓐᓂᕐᐸᑦ ᓯᕗᓪᓕᕐᒥ?”

ᐅᓇ ᑎᑭᖢᒍ ᐄᐳᕈᓪ 1, 23 ᑎᒍᔭᐅᓯᒪᔪᑦ ᓄᓇᕗᒥᐅᑕ ᐊᓂᑎᑕᐅᓚᐅᕐᑐᑦ ᐃᓚᒋᔭᐅᓪᓗᓂ ᓄᕙᒡᔪᐊᕐᓇᖅ-19-ᒥ ᐊᐃᑦᑐᖅᑕᐅᑦᑕᐃᓕᓂᕐᒧᑦ, ᐃᓚᒋᔭᐅᓪᓗᑎᒃ ᕿᑭᖅᑖᓗᖕᒥᑦ ᐃᑲᔪᖅᑕᐅᕝᕕᒃ, ᐅᕙᓂ ᐊᔾᔨᖃᖅᑐᖅ. ᑕᒪᓐᓇ ᖃᓄᐃᓕᐅᕐᓂᖅ ᐱᒻᒪᕆᐅᒐᓗᐊᕐᑎᓪᓗᒍ, ᐅᓇ ᐃᓱᒪᒋᔭᐅᖃᑦᑕᕐᒪ ᖃᓄᐃᒻᒪ ᐃᓄᐃᑦ ᑎᒍᔭᐅᓐᓂᕐᐸᑦ ᓯᕗᓪᓕᕐᒥ, ᐊᖓᔪᖅᑳᖅ ᐊᐅᓚᑦᑎᔨ ᓄᓇᕗᒥᑦ ᒪᓕᒐᓕᕆᔨᒃᑯᓐᓄᑦ. (ᐊᔾᔨᙳᐊᖁᑎᒋᔭᐅᔪᖅ)

By ᐃᐊᒪ ᑐᕌᓐᑐ

For an English version of this story, see Nunavut has released 23 inmates since April 1 due to the COVID-19 pandemic

ᐄᐳᕈᓪ 1-ᒥ 23 ᑎᒍᔭᐅᓯᒪᔪᑦ ᐊᓂᑎᑕᐅᓚᐅᕐᑐᑦ ᓄᓇᕗᑦ ᐃᑲᔪᖅᑕᐅᕝᕕᖏᓐᓂ ᐃᓚᒋᔭᐃᓪᓗᓂ ᓄᕙᒡᔪᐊᕐᓇᖅ-19-ᒧᑦ ᐊᐃᑦᑐᖅᑕᐅᑦᑕᐃᓕᓂᕐᒧᑦ.

ᐅᑯᑎᒎᓇᕐᓕ ᓄᓇᕗᑦ ᒪᓕᒐᓕᕆᔨᖏᑦᑎᒍᑦ, ᐅᑯᐊ ᑎᒍᔭᐅᓯᒪᔪᓕᕆᔨᒃᑯᑦ “ᕿᒥᕐᕈᐊᓚᐅᕐᒪᑕ ᑎᒍᔭᐅᓯᒪᔪᑦ ᐅᓄᕐᓂᖏᓐᓂᒃ ᐊᒻᒪ ᐊᓂᑎᑦᑎᓪᓗᑎᒃ ᐊᓂᑎᑕᐅᓵᓕᒍᓐᓇᖅᑐᓂᒃ.”

ᑲᑎᖢᑎᒃ 12 ᐃᖃᖅᑐᐃᕕᒃᑯᑦ ᑎᒍᔭᐅᓯᒪᔭᕆᐊᖃᖅᑐᑦ ᐊᓂᑎᑕᐅᓚᐅᕐᑐᑦ ᐱᓕᕆᐊᕆᔭᐅᔪᑎᒍᑦ, ᐊᒻᒪᓗ 11-ᑲᓐᓃ ᑎᒍᔭᐅᓯᒪᔪᑦ ᐊᓂᑎᑕᐅᓪᓗᑎᒃ ᐊᑭᓖᒋᐊᖃᕐᓂᒃᑯᑦ ᐱᓕᕆᐊᖑᓛᑐᐃᓐᓇᕐᓗᑎᒃ ᕿᒥᕐᕈᐊᕐᓂᒃᑯ “ᖃᓄᖅ ᐅᓄᕐᑎᒋᖕᒪᖔᑦ ᐅᑕᖅᑭᔪᑦ ᐃᖃᖅᑐᖅᑕᐅᕝᕕᒃᓴᖏᓐᓂᒃ ᐊᓄᓪᓚᒃᓰᕕᑦᑎᓐᓂ,” ᒪᓕᒐᓕᕆᔨᐅᔪᑦ ᐅᖃᕐᓯᒪᓚᐅᕐᑐᑦ ᑎᑎᖃᑎᒍᑦ.

“ᒪᓕᒐᓕᕆᔨᒃᑯᑦ ᐱᓕᕆᐊᖃᕐᓯᒪᖕᒪᑕ ᓇᓗᓇᐃᔭᐃᓇᓱᒃᖢᑎᒃ ᐊᓂᑎᑕᐅᓵᓕᒍᓐᓇᖅᑐᓂᒃ ᐊᒻᒪᓗ ᖁᐊᕐᓵᕐᓇᙱᓐᓂᕐᓴᐅᓂᖏᑦᑎᒍᑦ ᐊᒻᒪᓗ ᐊᓂᑎᑕᐅᓪᓗᑎᒃ ᐃᓂᖃᕐᓂᕐᓴᐅᖁᓪᓗᒍ ᕿᑭᖅᑖᓗᖕᒥ ᐃᑲᔪᖅᑕᐅᕕᒃ,” ᓯᑏᕙᓐ ᒫᓐᓱᓪ, ᓄᓇᕗᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᑦᑕ ᑐᒡᓕᖓ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᐅᑯᐊ 23 ᐊᓂᑎᑕᐅᔪᑦ ᐱᔾᔪᑎᒋᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᓕᕆᓂᐅᓚᐅᕐᑐᖅ ᒫᑦᓯ 18-ᒥ ᐱᔾᔪᑎᐅᓪᓗᓂ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ. ᑭᖑᓂᐊᒍᓪᓕ ᐄᐳᕈᓪ 1 ᐊᓂᑎᑕᐅᔪᕕᓃᑦ ᐊᓂᑎᑕᐅᔭᕆᐊᖃᓕᕐᓂᕐᒨᖓᓚᐅᕐᑐᑦ, ᒪᓕᒐᓕᕆᔨᒃᑯᑦ ᐅᖃᓚᐅᕐᑐᑦ.

ᐱᒋᐊᕐᖢᓂ ᒫᑦᓯ 16, ᓄᓇᕗᒥᑦ ᑎᒍᔭᐅᓯᒪᔪᑦ ᑲᑎᓘᑎᒃ 144-ᖑᓚᐅᕐᑐᑦ. ᒪᐃ 6-ᒥᑦ, ᑲᑎᖢᑎᒃ 116-ᖑᓪᓗᑎᒃ.

ᐊᓯᖏᓐᓂᒃ ᐱᓕᕆᐊᖑᓚᐅᕐᒥᔪᑦ ᐊᐃᑦᑐᖅᑕᐅᑦᑕᐃᓕᓂᕐᒧᑦ ᓄᕙᒡᔪᐊᕐᓇᖅ-19-ᒧ ᐳᓛᕐᓇᕈᓐᓃᕐᖢᑎᒃ ᓄᓇᕗᒥᑦ ᐊᓄᒡᓚᒃᓰᕖᑦ; ᐃᓕᐅᖅᑲᐃᓪᓗᑎᒃ ᐊᒡᒐᓄᑦ ᓴᓗᒻᒪᕐᓴᐅᑎᒃᓴᓂᒃ ᐃᓄᖃᓗᐊᖃᑦᑕᖅᑐᓂᒃ; ᑐᓂᐅᖃᐃᓪᓗᑎᒃ ᐊᒡᒑᓂᒃ, ᖃᓂᕐᒧᑦ ᒪᑐᐊᕈᑎᒃᓴᓂᒃ, ᑮᓇᕐᒧᑦ ᑕᓗᐊᕈᑎᓂᒃ ᐊᒻᒪ gowns; ᓂᕆᔭᒃᓴᓂ ᐱᑖᕐᑐᕐᓂᕐᓴᐅᓪᓗᑎᒃ; ᐊᒻᒪᓗ ᓴᓗᒻᒪᕐᓴᐃᓂᕐᒧᑦ ᐊᑐᖅᑕᐅᔭᕆᐊᖃᖅᑐᓂᒃ.

“ᐃᓂᒃᓴᓕᐅᕐᓯᒪᓕᕐᑐᒍ ᐃᓚᖏᓐᓂ ᐃᓂᒋᔭᐅᔪᓂ ᓴᓗᒻᒪᕐᓴᖅᑕᐅᒃᑲᓐᓂᕈᓐᓇᕐᓂᐊᕐᒪ ᐊᒻᒪᓗ ᐅᖓᓯᒌᒃᑎᑦᑎᑲᑕᖕᓂᕐᓴᐅᓗᑎᒃ,” ᒫᓐᓱᓪ ᐅᖃᖅᑐᖅ.

ᒪᓕᒐᓕᕆᔨᒃᑯᑦ ᓇᓗᓇᐃᕐᓯᓪᓚᕆᒍᓐᓇᓚᐅᙱᑦᑐᑦ ᖃᓄᖅ ᐸᕐᓇᐅᑎᓕᐅᕐᓯᒪᖕᒪᖔᑦ ᓇᓕᐊᒃ ᐋᓐᓂᐊᖅᑖᕐᓂᕈᓂ ᓄᕙᒡᔪᐊᕐᓇᖅ-19-ᒥᑦ ᑖᒃᑯᓇᓂ ᐃᑲᔪᖅᑕᐅᕕᖕᓂ.

“ᐱᔾᔪᑎᖃᖅᖢᑕ ᓇᐅᑦᑎᖅᓱᕐᓂᒃᑯᑦ ᖁᐊᕐᓵᕐᓇᕈᑎᐅᓇᔭᖅᑐᓂᒃ ᐃᑲᔪᖅᑕᐅᕝᕕᑎᒍᑦ, ᑕᐃᒪᓕ ᑐᓂᓯᔪᓐᓇᙱᓐᓇᑦᑕ ᓇᓗᓇᐃᔭᕐᓯᒪᔪᑦ ᐊᑐᓂ ᐃᑲᔪᖅᑕᐅᕝᕖᑦ ᐸᕐᓇᐅᑎᖏᓐᓂᒃ,” ᒪᓕᒐᓕᕆᔨᒃᑯᑦ ᐅᖃᓚᐅᕐᑐᑦ.

ᐋᓐᓂᐊᕕᒡᔪᐊᕐᓇᐅᓂᖓᓂᒡᓗ ᑎᒍᔭᐅᓯᒪᔪᑦ ᐅᖃᓗᖃᑦᑕᕈᓐᓇᖅᑎᑕᐅᔪᑦ ᓄᓇᓕᖕᓄᑦ ᐊᒻᒪ ᐅᖓᓯᒃᑐᒧᑦ, ᒫᓐᓱᓪ ᐅᖃᓚᐅᕐᒥᔪᖅ.

ᑎᒍᔭᐅᓯᒪᔪ ᐃᑲᔪᖅᑕᐅᕕᖕᒧᐊᖅᐸᓪᓕᐊᔪᑦ ᓄᓇᕗᒥᑦ ᐋᓐᓂᐊᓯᐅᕐᑎᒧ ᖃᐅᔨᓴᖅᑕᐅᖃᑦᑕᖅᑐᑦ ᓄᕙᒡᔪᐊᕐᓇᖅ-19-ᒥ. ᑕᒪᒃᑯᐊᓗ ᑎᒍᔭᐅᕙᓪᓕᐊᔪᑦ ᒫᓐᓇ ᐅᓪᓗᓂ 14-ᓂ ᐃᓄᑑᓐᓇᖅᑐᒦᑎᑕᐅᓕᖃᑦᑕᖅᑐᑦ ᑕᐃᑯᙵᑐᐊᕌᖓᑕ.

ᑕᒪᒃᑯᐊ ᑎᒍᔭᐅᓵᖅᑐᕕᓃᑦ ᐅᓪᓗᓂ 14-ᓂ ᐃᓄᑑᓐᓇᖅᑐᒦᒃᑲᓗᐊᖅᑎᓪᓗᒋ, ᑕᒪᓐᓇ ᐃᓄᑑᓐᓇᖅᑐᒦᓐᓂᖅ ᐃᓄᑑᓪᓚᕆᖕᓂᐅᙱᑦᑐᖅ, ᒫᓐᓱᓪ ᐅᖃᖅᑐᖅ.

“ᑎᒍᔭᐅᓯᒪᔪᓂ ᑲᑎᑎᑕᐅᑦᑕᐃᓕᔪᑦ ᑭᓯᐊᓂᓕ ᐃᖅᑲᓇᐃᔭᖅᑎᓂᒃ ᑕᑯᔭᐅᖃᑦᑕᐃᓐᓇᖅᑐᑦ. ᑕᓚᕖᓴᒥ ᑕᐅᑐᒍᓐᓇᖅᖢᑎᒃ, ᐊᑐᐃᓐᓇᖃᑦᑎᐊᖅᖢᑎᒃ ᐅᖄᓚᐅᑎᒥ. ᑕᒧᓗᒐᒃᓴᖅᑕᖃᐃᓐᓇᖅᐸᖕᒥᔪᖅ… ᐱᒻᒪᕆᐅᕗᖅ ᓄᓇᕗᒥᑦ ᑐᑭᓯᓯᒪᒍᑎ ᐅᓇ ᐅᓪᓗᓂ 14-ᓂ ᐃᓄᑑᒋᐊᖃᕐᓂᖅ ᐃᓄᑑᓪᓚᕆᖕᓂᐅᙱᓐᓂᖓᓂᒃ,” ᒫᓐᓱᓪ ᐅᖃᖅᑐᖅ.

ᔭᔅᑎᓐ ᐱᓯ, ᐃᓕᓐᓂᐊᖅᑎᑦᑎᔨᒻᒪᕆᒃ ᐱᕋᔭᒃᑐᓕᕆᓂᕐᒥᒃ ᔫᓂᕘᓯᑎᒥ ᐋᑐᕚᒥ, ᖃᐅᔨᓴᕐᓯᒪᖕᒪᑦ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖃᖅᑐᓂ ᐃᑲᔪᖅᑕᐅᕝᕕᖕᓂ ᑲᓇᑕᓕᒫᒥ ᑕᐃᒪᙵᑦ ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᕐᑎᓪᓗᒍ.

“ᐅᕙᓂᓕ ᔮᓕᐊᑦ ᐃᑲᔪᖅᑕᐅᕕᒃ ᐊᕐᓇᓄᑦ, 51 ᑎᒍᔭᐅᓯᒪᔪᑦ ᐊᒻᒪ 49 ᐃᖅᑲᓇᐃᔭᖅᑎᐅᔪᑦ ᓄᕙᒡᔪᐊᕐᓇᖅ-19-ᒥ ᐋᓐᓂᐊᖅᑖᓚᐅᕐᑐᑦ…ᐃᓚᖏᑦ ᐳᕌᕕᓐᓯᐅᔪᑦ ᐊᒻᒪ ᑎᐅᕆᑑᕆᐅᔪᑦ ᑕᒪᑐᒥᖓ ᐱᒻᒪᕆᔭᖃᒻᒪᕆᖕᒪᑕ ᐊᒻᒪᓗ ᐊᓯᐊᒍᑦ ᐱᓕᕆᐊᖃᒻᒪᕆᓕᕐᖢᑎᒃ. ᑲᓇᑕᒥ ᑎᒍᔭᐅᓯᒪᔪᓂᒃ 5,000 ᑐᖏᑦᑎᐊᖓᓂ ᐊᓂᑎᑦᑎᓯᒪᓕᖅᑐᒍᑦ ᑕᐃᒪᙵᑦ ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᕐᑎᓪᓗᒍ,” ᐱᓯ ᐅᖃᖅᑐᖅ.

ᑭᓯᐊᓂᓕ ᓄᕙᒡᔪᐊᕐᓇᖅ-19 ᖁᐊᕐᓵᕐᓇᕐᒪᑦ ᐊᐃᑦᑑᑎᐅᓇᔭᕐᓂᖓ ᑲᓇᑕᐃ ᐃᑲᔪᖅᑕᐅᕝᕕᖏᓐᓂᒃ, ᐅᖃᕐᒥᔪᖅ ᐱᓯ.

“ᑮᒍᔾᔨᓯᒪᓂᖅ ᐊᒻᒪ ᐃᓂᒋᔭᐅᔪᑦ ᓈᒻᒪᙱᓗᐊᕐᑎᓪᓗᒋ ᐊᑲᐅᙱᓕᐅᕈᑎᓂᒃ ᐱᒋᐊᓕᕈᑎᐅᔭᒻᒪᑦ ᐊᓄᒡᓚᒃᓰᕕᖕᓂᒃ,” ᐅᖃᖅᑐᖅ.

ᐱᓯ ᐅᖃᓚᐅᕐᒥᔪᖅ ᐅᒃᐱᕈᓱᖕᓂᕋᖅᖢᓂ ᐅᓇ ᐋᓐᓂᐊᕕᒡᔪᐊᕐᓇᖅ ᓴᖅᑭᑎᑦᑎᓯᒪᓂᖓᓂ ᒪᑯᐊ ᓄᕙᒡᔪᐊᕐᓇᖅ-19-ᒥ ᐊᐃᑦᑐᖅᑕᐅᓴᕋᐃᓐᓂᕐᓴᐅᓂᖏᓐᓂᒃ ᓇᓗᓇᐃᕐᑕᐅᓯᒫᓂᓕᕐᓂᖏᓐᓂᒃ, ᒪᑯᑎᑐᓇᖅ ᐊᑯᓂᐊᓗᒃ ᑲᒪᒋᔭᐅᔭᕆᐊᖃᕐᕖᑦ ᐊᒻᒪ ᐃᑲᔪᖅᑕᐅᕕᐅᔪᑦ.

“ᐃᓱᒪᔪᖓ ᐅᓇ ᐋᓐᓂᐊᕕᒡᔪᐊᕐᓇᖅ ᐃᒪᐃᓕᒍᑎᐅᓂᖓᓂ … ᑮᓇᑦᑎᓐᓄ ᐃᒋᑕᐅᓪᓗᓂ ᐊᒻᒪᓗ ᑕᒪᒃᑯᐊ ᐃᓄᐃᑦ ᐊᐃᑦᑐᖅᑕᐅᑐᐃᓐᓇᕆᐊᓖᑦ ᓄᕙᒡᔪᐊᕐᓇᖅ-19-ᒧ ᒫᓐᓇ ᒪᓂᓯᒪᑐᐃᓐᓇᖅᖢᑎ ᐃᓅᖃᑎᒌᒃᑎᑦᑎᓂᕐᒧᑦ ᐋᖅᑭᒃᓯᒪᔭᑦᑎᓐᓄᑦ,” ᐱᓯ ᐅᖃᖅᑐᖅ.

ᐱᐊᓐᓴᓐ ᑲᐅᕙᓐ, ᐊᖓᔪᖅᑳᖅ ᐊᐅᓚᑦᑎᔨ ᓄᓇᕗᒥᑦ ᒪᓕᒐᓕᕆᓂᕐᒧᑦ ᐃᑲᔪᖅᑎᓄᑦ, ᐅᖃᓚᐅᕐᑐᖅ ᒪᑯᐊ ᐊᓂᑎᑦᑎᓵᓕᑎᑦᑎᓂᖅ ᐊᒻᒪ ᐊᓂᑎᑦᑎᔪᓐᓇᕐᓂᖅ ᐅᑕᕿᓂᐊᕐᓗᑎᒃ ᐃᖃᖅᑐᖅᑕᐅᕝᕕᒃᓴᖏᓐᓂ ᐱᓕᕆᐊᖑᕙᓪᓕᐊᑎᓪᓗᒋᑦ, ᓱᓕ ᑕᒪᐅᓇ ᐊᐱᖅᑯᑎᒃᓴᖅᑕᖃᐅᕆᕗᖅ.

“ᐃᓚᖓᓪᓕ, “ᐅᓗᕆᐊᓇᙱᑉᐸᑕ ᐊᓂᑎᑦᑕᕆᐊᒃᓴᖅ ᑖᒃᑯᐊ ᐃᓄᐃᑦ, ᖃᓄᐃᒻᒪᓪᓕ ᑎᒍᔭᐅᓐᓂᕐᐸᑦ ᓯᕗᓪᓕᕐᒥ? ᐊᕐᕌᒍᒐᓴᐅᓕᕐᑐᓂᒃ, ᑕᒪᓐᓇ ᐋᖅᑭᒃᓱᖅᐸᓪᓕᐊᓯᒪᒐᑦᑎᒍᑦ ᑕᒪᒃᑯᐊ ᐃᓄᐃᑦ ᑎᒍᔭᐅᓯᒪᔭᕆᐊᖃᖅᑐᑦ ᐃᓱᓕᑦᑎᑎᑉᐸᒃᖢᑎᒍᑦ ᐊᒻᒪ ᑎᒍᔭᐅᓯᒪᑎᑦᑎᕙᒃᖢᑕ ᐃᖃᖅᑐᖅᑕᐅᔭᕆᐊᓕᖕᓂᒃ ᐊᒻᒪᓗ ᑕᒪᓐᓇ ᓴᖅᑭᑎᑦᑎᓯᒪᓪᓗᓂ ᑕᒪᓐᓇ ᑕᐃᒪᐃᑦᑕᕆᐊᖃᙱᓐᓂᖓᓂᒃ,” ᑲᐅᕙᓐ ᐅᖃᖅᑐᖅ.

ᑲᐅᕙᓐ ᐅᖃᓚᐅᕐᑐᖅ ᖃᖓᑦᑎᐊᓵᖅ ᐊᓂᑎᑕᐅᔪᑦ ᐱᔾᔪᑎᖃᙱᑦᑐᑦ ᒪᓕᒐᖅ ᐊᓯᙳᕐᓂᖓᓂᒃ, ᑕᐃᒪᓐᓇᓗ ᖃᐅᔨᓴᒃᑲᓐᓂᕆᐊᖃᖅᖢᑎᒃ ᖃᓄᐃᒻᒪ ᑖᒃᑯᐊ ᓯᕗᓂᒃᑲᓐᓂᐊᓂᒃ ᐊᓂᑎᑕᐅᓚᐅᙱᓐᓂᖏᓐᓂᒃ.

“ᒪᓕᒐᖅ ᐊᑐᖅᑕᐅᓚᐅᕐᑐᖅ ᐊᑐᖅᑕᐅᔭᕆᐊᖃᕐᓂᖓᒍᑦ. ᐊᒻᒪᓗ ᐃᓱᒪᔪᖓ ᑕᒪᓐᓇ ᐃᓱᒪᒋᔭᐅᔭᕆᐊᖃᕐᓂᐊᕐᓂᖓᓂ ᐋᓐᓂᐊᕕᒡᔪᐊᕐᓇᖅ ᐊᓂᒍᖅᐸᑦ, ᑕᐃᒪᐃᙱᒃᑯᑦᑕ, ᑕᑯᓕᕐᓂᐊᕋᑦᑕ ᐃᖃᖅᑐᖅᑕᐅᕝᕕᒃᓴᖏᓐᓂ ᐅᑕᕿᔪᑦ ᐅᓄᕐᓯᓇᔭᕐᒪᑕ,” ᐅᖃᖅᑐᖅ.

ᑲᐅᕙᓐ ᐅᖃᓚᐅᕐᑐᖅ ᐃᓱᒪᒐᓗᐊᕐᓂᕋᖅᖢᓂ ᓄᕙᒡᔪᐊᕐᓇᖅ-19-ᒧᑦ ᐋᓐᓂᐊᕕᒡᔪᐊᕐᓇᒧᑦ ᖃᓄᐃᓕᐅᕈᑎᐅᔪᑦ ᐊᓯᔾᔨᕈᑎᓄᑦ ᐊᑐᖃᑦᑕᐃᓐᓇᕈᒪᓂᕐᒥᒃ, ᑲᓇᑕᒥ ᒪᓕᒐᓕᕆᓂᖅ ᒪᓕᒃᓯᒪᓗᐊᕐᒪᑦ ᐱᒻᒪᕆᐅᒋᔭᐅᓂᑯᓂᒃ ᓄᑕᐅᙱᓗᐊᓕᕐᑐᓂᒃ ᒫᓐᓇᐅᓕᖅᑐᒧᑦ.

“ᐊᑐᖃᑦᑕᕋᑦᑕ ᓱᓕ ᖃᓄᐃᓕᐅᕈᓯᕕᓂᕐᓂᒃ ᐊᒻᒪ ᐅᒃᐱᕆᔭᐅᓯᒪᔪᓂᒃ ᐊᕐᕌᒍᑦ 100 ᐅᖓᑖᓂ ᐋᖅᑭᒃᑕᐅᓂᑯᓂᒃ ᐊᒻᒪᓗ ᐊᑐᖅᐸᒃᖢᑎᒍᑦ ᐃᓱᒪᓇᑕ ᒫᓐᓇᓕᓴᕐᓂᒃ ᖃᓄᐃᓕᐅᕈᑎᐅᓕᕐᑐᓂᒃ ᓲᖃᐃᒻᒪ ᐃᓱᒪᒐᑦᑕ ᐊᓯᙳᖅᑎᑦᑎᓂᖅ ᖁᐊᕐᓵᕐᓇᕐᓂᕐᓴᐅᓇᔭᕆᐊᒃᓴᖓᓂᒃ ᐅᒃᐱᕆᔭᐅᓯᒪᔪᓂᒃ. ᑭᓯᐊᓂᓕ ᐃᓄᖕᓄ ᐅᓄᕐᓂᕐᓴᓄᑦ ᓈᒻᒪᒋᔭᐅᓂᕐᓴ ᖁᐊᕐᓵᕆᔭᕗᑦ ᐃᓱᒪᒋᙱᓗᐊᕋᑦᑎᒍᑦ,” ᑲᐅᕙᓐ ᐅᖃᖅᑐᖅ.

ᐅᓇ ᐋᓐᓂᐊᕕᒡᔪᐊᕐᓇᐅᔪᖅ ᒫᓐᓇ ᓄᓇᕗᒥᑦ ᒪᓕᒐᓕᕆᓂᒃᑯᑦ ᐊᒃᑐᐃᓂᖃᖅᖢᓂ ᒫᓐᓇᓕᓴᓄᑦ ᐋᖅᑭᒋᐊᖃᓕᕐᓂᕐᒥᑦ, ᐊᒻᒪ ᑕᒪᐅᖓ ᐊᐱᖅᑯᑎᒃᓴᖅᑕᖃᕆᕗᖅ ᓯᕗᓂᒃᓴᒥᑦ ᒪᓕᒐᓕᕆᓂᕐᒥ ᓄᓇᕗᒥᑦ, ᐅᖃᖅᑐᖅ.

“ᐃᒪᓐᓇᐅᙱᑦᑐᖅ, “ᖃᓄᖅ ᐸᕐᓇᒃᓯᒪᔪᓐᓇᕐᓂᕐᓴᐅᕕᑕ ᐋᓐᓂᐊᕕᒡᔪᐊᕐᓇᒧᑦ?’ ᐃᒪᓐᓇᓕ ᑭᓯᐊᓂ, ‘ᐱᔨᑦᑎᕋᖅᐱᑎᒍ ᐃᓄᐃᑦ ᓄᓇᑦᑎᓐᓂ ᐊᒻᒪᓗ ᐃᓄᐃᑦ ᒪᓕᒐᓕᕆᓂᒃᑯᑦ ᐃᑲᔪᖅᑕᐅᔭᕆᐊᖃᖅᑐᑦ ᐅᓗᕆᐊᓇᙱᑦᑐᒃᑯᑦ ᐊᒻᒪ ᐊᔾᔨᒌᒃᑎᑦᑎᓂᒃᑯ?’ ᐊᒻᒪᓗ ᐃᓱᒪᔪᖓ ᑕᒪᓐᓇ ᐊᓯᐅᔨᓂᑰᒋᐊᒃᓴᑦᑎᓐᓂᑦ. ᑭᓯᐊᓂᓕ ᑕᒪᑐᒧᖓ ᐅᑎᖅᑎᖁᓐᓇᖅᑐᖅ… ᑭᓯᐊᓂᓕ ᐃᓱᒪᒋᒋᐊᖃᕋᑦᑎᒍᑦ ᑎᒍᔭᐅᓯᒪᔪᑦ. ᐋᓐᓂᐊᕕᒡᔪᐊᕐᓇᒧᑦ ᐃᓱᒪᒋᔭᐅᓕᑐᐃᓐᓇᙱᓪᓗᑎᒃ,” ᑲᐅᕙᓐ ᐅᖃᖅᑐᖅ.

Share This Story

(0) Comments

Join the Conversation

Your email address will not be published. Required fields are marked *

*