ᓄᓇᕗᑦ ᐱᐅᓯᕚᓪᓕᖅᑎᑦᑎᔪᒪᔪᑦ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᖅᑕᐅᒍᑏᑦ ᕿᓚᒥᐅᓂᕐᓴᐅᓕᕐᓗᑎᒃ

ᐱᓕᕆᓂᒃᓴᖅ ᕿᑭᖅᑖᓗᖕᒥᐅᓂᒃ ᖃᐅᔨᓴᕈᑎᐅᔪᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᕿᑭᖅᑕᓂ ᐋᓐᓂᐊᕕᐊᓗᖕᒥ

ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᑐᓴᖅᑎᑦᑎᓚᐅᕐᑐᖅ ᐱᓕᕆᐊᒃᓴᐅᓂᐊᕐᑐᒥᑦ ᓄᕙᒡᔪᐊᕐᓇᖅ-19-ᒥᑦ ᖃᐅᔨᓴᖃᑦᑕᕐᓂᕐᒥᒃ ᐅᓄᕐᓯᕚᓪᓕᖅᑎᑦᑎᓂᐊᕐᓂᕋᐃᓪᓗᓂ ᓄᓇᕗᒥᑦ. ᐱᓕᕆᔾᔪᑎᐅᒍᓐᓇᐃᓐᓇᖅᑐᒥ ᖃᐅᔨᓴᕈᑎᒃᓴᒥ ᐱᑕᖃᓕᕐᐸᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᒃᑯᑦ ᖃᓱᓂᕐᓴᐅᓕᑐᐃᓐᓇᕆᐊᖃᖅᑐᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒦᒐᓐ ᑎᐅᓕᖕ
ᓄᓇᓕᖕᓂ ᑐᓴᒐᒃᓴᓕᕆᓂᕐᒧᑦ ᐱᓕᕆᐊᓄᑦ ᑐᓴᒐᒃᓴᓕᐅᕐᑎ

For an English version of this story, see Nunavut aims to improve turnaround time for COVID-19 tests

ᓄᓇᕗᑦ ᒐᕙᒪᒃᑯᑦ ᐱᓕᕆᐊᒃᓴᒥ ᐱᒋᐊᖅᑎᑦᑎᓂᐊᓕᕐᑐᑦ ᓱᒃᑲᓂᕐᓴᐅᔪᓐᓇᖅᑐᒥᒃ ᓄᕙᒡᔪᐊᕐᓇᖅ-19 ᖃᐅᔨᓴᖅᑕᐅᔾᔪᑎᒋᖃᑦᑕᖅᑕᖏᓐᓂᒃ ᓄᓇᕗᒥᑦ.

ᓄᓇᓕᖕᓂ ᖃᓂᒃᑯᑦ ᖃᐅᔨᓴᖅᑕᐅᒍᑏᑦ ᕿᑭᖅᑖᓗᖕᒥ ᕿᑭᖅᑕᓂ ᐋᓐᓂᐊᕕᐊᓗᖕᒧᑦ ᐊᐅᓪᓚᖅᑎᑕᐅᖃᑦᑕᕐᓂᐊᕐᑐᑦ ᖃᐅᔨᓴᕐᕕᖓᓄᑦ ᖃᐅᔨᓴᖅᑕᐅᖃᑦᑕᕐᓂᐊᕐᒪᑕ. ᑐᕌᒐᕆᔭᐅᓇᓱᒃᑐᕐᓗ ᖃᐅᔨᓴᖅᑕᐅᔾᔪᑎᐅᔪᓂᒃ ᖃᐅᔨᔪᓐᓇᕐᓯᓗᑎᒃ ᐅᓪᓗᑦ ᑕᓪᓕᒪᑦ ᐃᓗᐊᓂ.

“ᐅᓄᕐᓯᕚᓪᓕᕐᓗᑎᒃ ᓄᓇᕗᒥᑦ ᖃᐅᔨᓴᑲᑕᖕᓂᖏᑦ, ᐃᓚᖃᕐᓗᒍ ᕿᓚᒥᐅᓂᕐᓴᖅ ᖃᐅᔨᓴᖅᑕᐅᒍᑏᑦ ᐱᓕᕆᐊᖑᕙᒡᓗᑎᒃ ᖃᐅᔨᔭᐅᓵᓕᓂᕐᓴᐅᕙᒡᓗᑎᒃ ᑖᒃᑯᐊ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᐊᖏᑦᑎᒎᖓᓗᓂ ᐊᒻᒪ ᐱᐅᓯᕚᓪᓕᖅᑎᓪᓗᒍ ᖃᓄᐃᓕᐅᕈᑎᒋᓇᔭᖅᑕᕗᑦ ᐋᓐᓂᐊᖅᑖᖅᑐᖃᕐᓂᖅᐸᑦ,” ᐅᖃᖅᑐᖅ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒥᑦ ᐊᖓᔪᖅᑳᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᑐᓴᒐᒃᓴᓕᐅᕐᑎᓪᓗᒋᑦ ᓯᑎᐱᕆ 8-ᒥᑦ.

ᓄᓇᕗᑦ ᒐᕙᒪᒃᑯᑦ ᐱᓕᕆᓯᒪᔪᑦ ᓄᕙᒡᔪᐊᕐᓇᖅ-19-ᒧᑦ ᖃᐅᔨᓴᕈᑎᓕᕆᓂᕐᒥᒃ ᐊᖏᒡᓕᕚᓪᓕᖅᑎᓐᓇᓱᒃᖢᒍ ᓄᓇᕗᒥᑦ ᑕᐃᒪᙵᑦ ᐋᓐᓂᐊᕕᒡᔪᐊᕐᓇᖅ ᑐᓴᕐᓇᓕᓚᐅᕐᓯᒪᖕᒪᑦ ᐅᐱᕐᙶᖑᓚᐅᕐᑐᖅ. ᐃᖃᓗᖕᓂᑦ ᒪᕐᕉᖕᓂ ᖃᐅᔨᓴᕈᑎᓂᒃ ᐋᖅᑭᒃᓯᓯᒪᓕᕐᑐᑦ ᐊᒻᒪ ᐊᑐᖅᑕᐅᓕᖅᖢᑎᒃ—ᐃᒪᐃᑦᑐᓂᒃ GeneXpert ᐊᒻᒪᓗ BioFire.

ᑲᖏᖅᖠᓂᕐᒥᑦᑕᐅᖅ GeneXpert ᖃᐅᔨᓴᕈᑎᖃᕐᒥᔪᑦ ᐊᒻᒪᓗ ᐹᑐᓴᓐ ᐅᖃᓚᐅᕐᖢᓂ ᐅᓇ BioFire ᖃᐅᔨᓴᕈᑎ ᐊᑐᖅᑕᐅᓕᓪᓗᐊᖅᖢᓂ “ᐃᒻᒪᖄᑦ ᐱᓇᓱᐊᕈᓯᐅᓂᐊᕐᑐᒥᓐ.”

ᓄᓇᕗᑦ ᒐᕙᒪᒃᑯᑦ ᐱᓕᕆᓕᖅᑎᑦᑎᓚᐅᕐᑐᑦ ᐅᑭᐅᕐᑕᖅᑐᕐᒦᑦᑐᒥ ᑲᒻᐸᓂᒥ ᑕᐃᔭᐅᔪᖅ BBE Expediting “ᖃᐅᔨᒪᓂᐊᕐᓗᑎᒃ ᐊᒻᒪ ᐱᓕᕆᐊᕆᔭᐅᑎᑦᑎᕙᒡᓗᑎᒃ ᖃᐅᔨᓴᖅᑕᐅᔪᒃᓴᓂᒃ,” ᐹᑐᓴᓐ ᐅᖃᖅᑐᖅ. ᖃᓂᕐᒧ ᖃᐅᔨᓴᕈᑎᐅᐅᔪᑦ ᐃᖃᓗᖕᓄᑦ ᐊᐅᓪᓚᖅᑎᑕᐅᕙᒡᓗᑎᒃ ᖃᖓᑕᓲᒃᑯᑦ ᐅᕝᕙᓘᓐᓃᑦ ᓵᑕᒥ ᐋᖅᑭᒃᓯᓗᑎᒃ ᐊᐃᒃᖠᖅᑎᑦᑎᕙᒡᓗᑎᒃ.

“ᑲᒻᐸᓂᑕᖃᕐᒪᑦ ᖃᖓᑕᓲᖃᖅᖢᑎᒃ ᐅᑕᕿᑐᐃᓐᓇᖅᑐᒥᒃ ᓄᓇᓕᖕᓄᑦ ᐊᐃᒃᖠᕈᑎᐅᓇᔭᖅᖢᓂ ᑕᒪᒃᑯᓂᖓ ᖃᐅᔨᓴᖅᑕᐅᒍᑎᓂᒃ ᐋᓐᓂᐊᕕᖕᓂᑦ,” ᐹᑐᓴᓐ ᐅᖃᖅᑐᖅ.

ᐋᒃᑲᐃ, ᐱᖓᓲᖕᒪᑕ ᑲᒻᐸᓂᐅᔪᑦ: ᑲᓃᑎᐊᓐ ᓄᐊᑦ, ᑭᕙᓪᓕᖅ ᐃᐅ ᐊᒻᒪ ᐸᓄᕋᒪ ᐊᐃᕕᐃᓴᓐ.

ᐃᓄᖕᓂ ᐱᓕᕆᔨᑕᖃᖅᖢᑎᒃ ᓄᓇᓕᖕᓂ ᒥᑦᑕᕐᕕᓕᐊᕈᔾᔨᓯᒃᓴᓂᒃ ᖃᐅᔨᓴᖅᑕᐅᒍᑎᓂᒃ, ᐊᒻᒪᓗ ᐃᖃᓗᖕᓂ ᐊᐃᒃᖠᖅᑎᒃᓴᓂᒃ ᖃᐅᔨᓴᕐᕕᓕᐊᕈᔾᔨᓂᐊᖅᑐᓂᒃ.

“ᑖᓐᓇ ᖃᓄᐃᓕᐅᕈᑎᒃᓴᖅ ᐋᖅᑭᒃᑎᐊᓚᐅᕐᑎᓪᓗᒍ ᐊᒻᒪ ᐊᑐᕐᑕᐅᓕᕐᓗᓂ ᑕᐃᒪᓕ ᑕᐃᒪᓐᓇᑦᑕᐃᓐᓇᖅ ᐱᓕᕆᓕᕋᔭᖅᑐᒍᑦ ᑲᖏᖅᖠᓂᕐᒥᒃ,” ᐹᑐᓴᓐ ᐅᖃᖅᑐᖅ.

ᐅᓇ ᑐᕌᒐᖃᕋᓱᒃᑐᖅ “ᐱᓕᕆᐊᖏᑦᑎᒍᑦ ᐊᔪᙱᓐᓂᕐᓴᐅᔪᓐᓇᕐᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐊᒻᒪᓗ ᐱᐅᓯᕚᓪᓕᕐᓗᓂ ᖃᓄᐃᓕᐅᕈᑎᒋᓇᔭᖅᑕᕗᑦ ᐋᓐᓂᐊᕕᒡᔪᐊᕐᓇᖅᑕᖃᓕᕐᓂᕈᓂ,” ᐹᑐᓴᓐ ᐅᖃᖅᑐᖅ.

ᐅᓇ ᐃᓚᖃᖅᑐᖅ ᐊᓯᙳᖅᑎᑦᑎᒋᐊᖃᕐᓂᕐᒥᒃ ᐃᓚᖏᓐᓂᒃ ᓄᓇᕗᒻᒥᐅᓂᒃ ᐃᓄᑑᓐᓇᖅᑐᒦᑎᑕᐅᔭᕆᐊᖃᕐᓂᖏᓐᓂᒃ ᐅᓪᓗᕐᓂᒃ 14-ᓂᒃ ᑐᔪᕐᒥᕕᒃᒥᑦ ᖃᓪᓗᓈᑦ ᓄᓇᖓᓂᑦ ᓄᓇᕗᒧᐊᓚᐅᙱᓐᓂᖏᓐᓂᒃ.

ᐊᑐᕈᓐᓇᑦᑎᐊᖅᑐᒥᑦ ᐊᒻᒪ ᐱᓕᕆᔾᔪᓯᐅᔪᓐᓇᑦᑎᐊᖅᑐᒥ ᖃᐅᔨᓴᖃᑦᑕᕐᓂᕐᒥᒃ ᓄᓇᓕᖕᓃᑦᑐᖃᓕᕋᓗᐊᖅᐸᑦ ᑕᒪᐃᓐᓂᒃ ᓄᓇᕗᒥᑦ, ᐹᑐᓴᓐ ᐅᖃᓚᐅᕐᑐᖅ ᐃᓄᐃᑦ ᓄᓇᕗᓕᐊᕐᓂᐊᖅᑐᑦ ᓱᓕ ᐃᓄᑑᓐᓇᖅᑐᒦᑦᑕᕆᐊᖃᕐᓂᐊᕐᑐᑦ ᐊᒻᒪ ᓄᓇᕗᒧᑦ ᑎᑭᓚᐅᕐᑎᓪᓗᒋᑦ.

“ᑕᒪᓐᓇ ᐊᑐᖅᑕᐅᔭᕆᐊᖃᕐᓂᐊᖅᑐᖅ ᐊᑯᓂᕈᓗᒃ,” ᐅᖃᖅᑐᖅ.

ᐊᓯᖏᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᖃᓄᐃᓕᐅᕈᑎᐅᔪᑦ ᐊᓯᙳᑐᐃᓐᓇᕆᐊᖃᖅᑐᑦ ᖃᐅᔨᓴᑲᑕᒍᓐᓇᕐᓂᕐᓴᐅᓕᕐᐸᑕ ᓄᓇᕗᒥᑦ, ᐅᕘᓇ ᐅᓄᕐᓂᕐᓴᐅᔪᓐᓇᓕᕐᓗᑎᒃ ᑲᑎᕐᖓᔪᑦ ᐊᒻᒪᓗ ᐱᙳᐊᕈᓯᐅᕙᒃᑐᓪᓗ ᒫᓐᓇ ᐃᓱᖃᖅᑎᑕᐅᖕᒪᑕ ᐊᖏᓂᖏᑦᑎᒍᑦ ᐊᒻᒪ ᐃᓄᒋᐊᒍᓐᓇᕐᓂᖏᑦᑎᒍᑦ.

ᓄᓇᕗᑦ ᒪᕐᕉᖕᓂᒃ GeneXpert ᐱᓕᕆᔾᔪᑎᖃᕐᒪᑕ ᐊᑐᖅᑕᐅᑲᑕᓕᕐᑐᓂᒃ ᑕᐃᒪᙵᓂᑦ ᔫᓃᐅᓚᐅᕐᑐᒥᓐ, ᑭᓯᐊᓂᓕ, ᑖᒃᑯᓄᖓ ᐃᓚᒃᓴᑦ (cartridges) ᐊᒥᒐᖅᓯᑲᑕᖕᒪᑕ ᓄᓇᕐᔪᐊᓕᒫᒥᒃ. ᑕᐃᒪᐃᓐᓂᖓᓄᑦ ᓄᓇᕗᑦ ᒐᕙᒪᒃᑯ ᐱᓕᕆᓯᒪᔪᑦ ᐆᒥᖓ BioFire ᐱᓕᕆᔾᔪᑎᓂᒃ ᐊᑐᓕᖅᑎᑦᑎᓇᓱᖕᓂᕐᒥᒃ ᐃᖃᓗᖕᓂᑦ ᐊᒻᒪ ᑲᖏᖅᖠᓂᕐᒥᒃ.

ᐅᑯᐊ ᖃᐅᔨᓴᕈᑎᐅᔪᑦ ᓱᓕ ᐊᑐᓪᓚᕆᖕᓂᖏᓐᓂᒃ ᓇᓗᓇᐃᖅᑕᐅᔭᕆᐊᖃᖅᑐᑦ. ᑕᐃᒪᐃᑦᑐᓐᓇᕐᓂᐊᕐᓗᑎᒃ ᖃᐅᔨᓴᓚᐅᕐᓗᑎᒃ 15-ᓂᒃ ᓄᕙᒡᔪᐊᕐᓇᖅ-19-ᒥᒃ ᐋᓐᓂᐊᓕᖕᓂᒃ, ᐹᑐᓴᓐ ᐅᖃᖅᑐᖅ. ᑕᒪᓐᓇᓗ ᖃᐅᔨᔭᐅᔪᓐᓇᕋᔭᖅᖢᓂ ᐋᓐᓂᐊᕕᒡᔪᐊᕐᓇᑕᖃᓕᓚᐅᙱᓐᓂᖓᓂᒃ, ᑕᐃᒪᓕ ᐅᖃᖅᑐᖅ ᓄᓇᕗᑦ ᑐᓂᔭᐅᒃᐸᑕ ᓇᓗᓇᐃᖅᑕᐅᓯᒪᔪᓂᒃ ᓄᕙᒡᔪᐊᕐᓇᒥᒃ ᐋᓐᓂᐊᖅᑐᓂᙶᖅᑐᓂᒃ ᖃᐅᔨᔪᓐᓇᓕᕋᔭᖅᑐᑦ.

ᒫᓐᓇᐅᔪᕐᓕ, ᑖᒃᑯᐊ ᖃᐅᔨᓴᕈᑎᐅᔪᑦ ᓴᖅᑭᑎᑦᑎᔪᓐᓇᕈᓂ ᐋᓐᓂᐊᖃᖅᑐᒥ ᓇᓗᓇᐃᕐᓯᒍᑎᒃᑯᑦ, ᑖᓐᓇ ᖃᐅᔨᓴᖅᑕᐅᔪᖅ ᖃᓪᓗᓈᑦ ᓄᓇᖓᓄᑦ ᐊᐅᓪᓚᖅᑎᑕᐅᒋᐊᖃᕋᔭᕐᒥᔪᖅ ᓇᓗᓇᐃᖅᑕᐅᑦᑎᐊᕈᓐᓇᕐᓂᐊᕐᒪᑦ. ᑭᓯᐊᓂᓕ ᐹᑐᓴᓐ ᐅᖃᖅᑐᖅ ᓄᓇᕗᒥᑦ ᖃᐅᔨᒍᑎᒃ ᐋᓐᓂᐊᖃᖅᑐᒥᑦ, “ᑕᐃᒪᓕ ᐱᓕᕆᐊᖃᕋᔭᖅᐳᒍᑦ ᑖᓐᓇ ᐱᒋᐊᕐᕕᒋᓗᒍ.”

ᐹᑐᓴᓐ ᐅᖃᓚᐅᕐᑐᖅ ᖃᐅᔨᒪᙱᓐᓂᕋᖅᖢᓂ ᖃᔅᓯᓂᒃ ᑮᓇᐅᔭᓂᒃ ᓴᓂᕐᕙᐃᓯᒪᖕᒪᖔᑕ ᑖᔅᓱᒧᖓ ᐱᓕᕆᓂᕐᒧᑦ. ᔪᐊᔾ ᕼᐃᒃᔅ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᑮᓇᐅᔭᓕᕆᓂᕐᒧᑦ ᒥᓂᔅᑕ, ᐅᖃᓚᐅᕐᑐᖅ ᓇᓗᓇᙱᓐᓂᕐᓴᐅᓇᔭᕐᓂᖓᓂᒃ ᑖᒃᑯᐊ ᐱᓕᕆᐊᒃᓴᐃᑦ ᐱᒋᐊᖅᑕᐅᓯᒪᓕᕐᐸᑕ.

ᐹᑐᓴᓐ ᐅᖃᒃᑲᓐᓂᓚᐅᕐᑐᖅ ᖃᐅᔨᓴᖃᑦᑕᕐᓂᖅ ᓄᕙᒡᔪᐊᕐᓇᖅ-19-ᒥ ᖃᐅᔨᓴᕐᓂᖅ ᐊᑐᕈᓐᓇᕐᓂᖓᓂᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓚᒋᓗᒍ ᓄᓇᕗᒧᑦ ᑎᑭᑎᑦᑎᙱᓐᓂᕐᓴᐅᒍᑎᐅᓗᓂ ᐋᓐᓂᐊᕐᓇᒥᒃ.

ᐅᓇ ᐃᓚᖃᖅᑐᖅ ᐃᓄᑑᑎᑦᑎᕙᖕᓂᕐᒥᒃ ᓄᓇᕗᑦ ᓯᓚᑖᓃᓐᓂᑯᓂᒃ, ᐋᓐᓂᐊᖅᑐᓂᒃ ᐃᖅᑲᓇᐃᔭᖅᑎᑦᑎᙱᓪᓗᑎᒃ, ᐃᓄᒋᐊᒍᓐᓇᖅᑐᓂᒃ ᐋᖅᑭᒃᓯᓯᒪᓗᑎᒃ, ᐊᒻᒪᓗ ᐊᒡᒐᖏᓐᓂᒃ ᐅᐊᓴᔪᖕᓂᕐᓴᐅᓗᑎᒃ.

Share This Story

(0) Comments

Join the Conversation

Your email address will not be published. Required fields are marked *

*