ᓄᓇᕗᑦ ᐱᒋᐊᓯᕗᑦ ᖃᕋᓴᐅᔭᒃᑰᖓᔪᓂᒃ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕐᓂᕐᒧ ᐅᓂᒃᑳᓕᐅᕐᓂᕐᒥᒃ, ᑭᓯᐊᓂᓕ ᒪᓕᒐᓕᕆᕕᒡᔪᐊᖅ ᓱᒃᑲᐃᑉᐳᖅ ᑕᒪᑐᒧᖓ

“ᓄᓇᕗᑦ ᒪᓕᒋᐊᖃᓕᕐᒪᑦ ᑲᓇᑕᒥ ᐊᑐᖅᑕᐅᕙᒃᑐᓂᒃ”

ᐱᖓᓱᑦ ᑎᓴᒪᓂᒃ ᑯᐃᒃᓯᑖᑉ ᓂᐅᕕᕐᕕᕋᓛᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᓂᒃᑯᑦ ᓱᕋᐅᓯᒪᔪᑦ 2017-ᒥ ᐊᒻᒪ 2018-ᒥᑦ. ᑭᓯᐊᓂᓕ ᑖᒃᑯᐊ ᐅᓂᒃᑳᓕᐊᖑᓂᑯ ᐊᑐᐃᓐᓇᐅᙱᑦᑐᑦ ᑭᒃᑯᑐᐃᓐᓇᕐᓄᑦ ᓄᓇᕗᒥᑦ. (ᐊᔾᔨᓕᐅᕆᔨ ᐃᐊᒪ ᑖᓐᑐ)

By ᓴᐃᕋ ᕌᔾᔪᔅ

For an English version of this story, see Nunavut moves towards online health inspection reports, but legislation lags

ᓄᓇᕗᑦ ᒐᕙᒪᒃᑯ ᐋᓐᓂᐊᖃᕐᓇᙱᑦᑐᓕᕆᔨᖏᑦ ᖃᕋᓴᐅᔭᒃᑰᖓᔪᓂᒃ ᐱᓕᕆᔾᔪᓯᕐᓂ ᓅᓐᓂᐊᓕᕐᒪᑕ ᒪᑯᓄᖓ ᓂᕿᑖᕐᕕᐅᕙᒃᑐᓂᒃ ᖃᐅᔨᓴᕐᓂᕐᒧᑦ ᐅᓂᒃᑳᓕᐅᕈᑎᓂᒃ—ᐃᓚᒋᔭᐅᔪᖅ ᑕᒪᒃᑯᐊ

ᐊᔾᔨ ᖁᓛᓂ ᓴᕿᑎᑦᑎᓯᒪᔪᖅ ᑎᑎᕋᖅᑕᐅᔪᕕᓂᕐᓂᒃ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᓄᑦ ᐅᕙᓂ ᕈᐃᐅᓪ ᑲᓃᑎᐊᓐ ᓖᔾᔭᓐᒥᑦ ᐃᖃᓗᖕᓂ ᐅᒃᑑᐱᕆ 2018-ᖑᑎᓪᓗᒍ.

ᐅᓂᒃᑳᓕᐊᑦ ᐊᑐᐃᓐᓇᐅᔪᓐᓇᕐᓗᑎᒃ ᑭᒃᑯᓕᒫᓄᑦ.

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖃᑦᑕᖅᑐᑦ ᒫᓂ 1,000-ᖏᓐᓂᑦ ᐱᓕᕆᕝᕕᐅᕙᒃᑐᓂ ᓄᓇᕗᒥᑦ ᐊᕐᕌᒍᑕᒫᓐ, ᐃᒪᓐᓇᐅᓂᕐᓴᐅᓪᓗᓂ ᒪᕐᕈᐃᖅᖢᑎᒃ ᐊᕐᕌᒍᒥ. ᐱᓕᕆᕝᕕᐅᕙᒃᑐᑦ ᐋᕿᒃᓱᐃᕙᓪᓕᐊᕙᒃᑐᑦ ᐅᕝᕙᓘᓐᓃᑦ ᓂᐅᕐᕈᑎᖃᖅᐸᒃᑐᑦ ᓂᕿᒥ ᑭᒃᑯᓕᒫᓄᑦ ᖃᐅᔨᓴᖅᑕᐅᖃᑦᑕᕆᐊᖃᕐᒪᑕ, ᒪᑯᓇᙵᑦ ᓂᕆᔭᖅᑐᕐᕕᖕᓂᒃ ᒪᐅᖓ ᐅᔭᕋᒃᓯᐅᕐᕕᖕᓄᑦ, ᐋᓐᓂᐊᕖᑦ ᓂᕆᕝᕕᖏᓐᓂᒡᓗ ᐊᒻᒪ ᐃᓕᓐᓂᐊᕐᕕᒃᒥᑦ ᐅᓪᓛᕈᓐᒥᑕᕐᓇᒥᑦ ᐱᓕᕆᐊᓂᒃ.

ᑭᓯᐊᓂᓕ ᓄᓇᕗᑐᐊᖅ ᑲᓇᑕᒥ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᖏᓐᓂᒃ ᑭᒃᑯᑐᐃᓐᓇᕐᓄᑦ ᓴᕿᑎᑦᑎᓯᒪᖃᑦᑕᙱᒻᒪᑕ.

ᑕᒪᑐᒧᖓ ᐃᓚᒋᔭᐅᒋᓪᓗᓂ ᐅᓇ, ᓄᓇᕗᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᖅᑎᐅᔪᑦ ᐊᑯᓂᐊᓗᒃ ᐊᒡᒐᖕᒥᖕᓄᑦ ᑎᑎᕋᖃᑦᑕᕐᓯᒪᖕᒪᑕ ᐊᒻᒪᓗ ᒪᓕᒃᓯᒪᓇᑎᒃ ᐅᓂᒃᑳᓕᐅᕈᑎᐅᓂᕐᓴᐅᕙᒃᑐᓂᒃ, ᑕᐃᒪᓐᓇᓗ ᐊᔪᕐᓇᓕᖅᐸᒃᖢᓂ ᖃᓄᑎᒋ ᓱᕋᐃᓯᒪᓂᖅᑕᖃᕆᐊᒃᓴᖓᓂᒃ ᐅᕝᕙᓘᓐᓃᑦ ᖃᓄᖅ ᐋᕿᒋᐊᖅᑕᐅᓇᔭᕆᐊᒃᓴᖏᓐᓂᒃ.

ᑕᒪᓐᓇ ᐊᕐᕌᒍ ᐱᒋᐊᓵᕐᓯᒪᑎᓪᓗᒍ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᖅᑎᐅᔪᑦ ᐅᓂᒃᑳᓕᐅᖃᑦᑕᓕᓚᐅᕐᓯᒪᔪᑦ ᓄᑖᒥ ᖃᕋᓴᐅᔭᓄᑦ ᐃᓚᒃᓴᒥ ᑕᐃᔭᐅᔪᖅ ᕼᐃᐊᑦᔾᕼᐋᒃ (Hedgehog).

ᐅᓇ ᐱᓕᕆᔾᔪᑎ ᐋᕿᒃᓱᖅᓯᒪᔪᖅ ᖃᐅᔨᓴᕐᓂᕐᒥ ᒪᓕᒋᐊᓕᖕᓄ ᐊᒻᒪ ᖃᐅᔨᓴᖅᑎᐅᔪᑦ ᑎᑎᕐᓯᖃᑦᑕᕆᐊᖃᖅᖢᑎ ᐊᒻᒪ ᑎᑎᕋᕐᕕᖃᖅᖢᑎᒃ, ᑖᒃᑯᐊᓗ ᖃᕋᓴᐅᔭᒧᐊᑲᐅᑎᒋᔪᓐᓇᖅᖢᑎᒃ. ᐊᒻᒪᓗ ᑎᑎᕋᐅᓯᕆᔭᐅᔪᓂᒃ ᖃᐅᔨᓇᓱᖕᓇᕈᓐᓃᕐᓗᓂ ᖃᓄᐃᓕᖓᖕᒪᖔᖏᓐᓂᒃ.

“ᐅᓇ ᑎᑎᕋᖅᑕᐅᕙᓪᓕᐊᔪᓂᒃ ᑕᑯᔪᓐᓇᕐᓯᒍᑎᒋᔭᕗᑦ ᑕᑯᔪᓐᓇᓚᐅᙱᑕᕋᓗᐊᖅᑕᑦᑎᓐᓂᒃ,” ᐅᖃᖅᑐᖅ ᒥᓯᐅᓪ ᓚᐸᓛᖕᒃ- ᕼᐋᕗᑦ, ᐊᕙᑎᓕᕆᓂᕐᒧᑦ ᐋᓐᓂᐊᖃᖅᑕᐃᓕᓂᕐᒥᑦ ᐱᓕᕆᔨᒻᒪᕆᒃ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᓐᓂᒃ.

“ᑕᒪᐃᓐᓂ ᑕᑯᓪᓗᒍ ᐃᓱᒪᔪᖓ ᐱᓕᕆᐊᑦᑎᓐᓂᒃ ᐱᐅᓯᕚᓪᓕᖅᑎᑦᑎᓂᐊᕐᓂᖓᓂᒃ.”

ᐅᓇ ᔭᓄᐊᕆ 2019-ᒥ ᐅᓂᒃᑳᓕᐊᖑᓂᑯ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᖅᑕᐅᓂᕕᓂᖓᓂ ᓖᔾᔭᓐ, ᒫᓐᓇᓕ ᐋᕿᒃᓱᖅᑕᐅᓯᒪᓪᓗᓂ ᓄᓇᕗᑦ ᒐᕙᒪᒃᑯᑦ ᓄᑖᒧ ᖃᕋᓴᐅᔭᓄᑦ ᐃᓚᒃᓴᖓᒍᑦ, ᕼedgehog.

“ᐱᓕᕆᐊᖃᕐᓯᒪᒐᑦᑕ ᐱᓕᕆᕝᕕᐅᔪᓂ ᐃᒻᒥᒃᑰᖓᑎᓪᖢᒋᑦ”

ᐃᓱᒫᓘᑎᐅᓚᐅᕐᓯᒪᔪᕐᓕ ᓂᕿᓂᒃ ᖃᐅᔨᓴᕐᓂᕐᒧᑦ ᐅᓂᒃᑳᓕᐊᑦ ᐱᔭᐅᔪᓐᓇᙱᓐᓂᖏᑦ, ᐃᓚᖓᒍᑦ, ᓴᖅᑭᑕᐅᓚᐅᕐᓯᒪᕗᖅ 2016-ᒥᑦ ᓰᐲᓰᑯᑦ ᖃᐅᔨᓴᖅᑎᓪᓗᒋᑦ, ᐃᒪᓐᓇ ᑐᓴᐅᒪᔭᕆᐊᖃᕐᓂᒃᑯᑦ ᑐᒃᓯᕋᖅᓗᑎᒃ ᖃᐅᔨᓕᓚᐅᕐᓯᒪᕗᑦ ᐱᖓᓱᓂᒃ ᐊᑕᐅᓯᖅ ᓄᓇᕗᒥᑦ ᓂᕿᓕᕆᔨᐅᕙᒃᑐᓂ ᓱᕋᐃᓯᒪᓂᕋᖅᑕᐅᓚᐅᕐᓯᒪᔪᑦ ᐋᓐᓂᐊᖃᖅᑕᐃᓕᓂᕐᒧᑦ 2014-ᓗ 2015-ᓗ ᐊᑯᓐᓂᖓᓂ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᖃᐅᔨᓕᓚᐅᕐᓯᒪᔪᑦ ᑕᐃᒪᓐᓇ ᐳᓴᓐᑎᑎᒍᑦ ᐊᔾᔨᓪᓗᐊᕆᓚᐅᕐᑕᖓ 2019-ᒥ, ᖃᖓᑦᑎᐊᖑᓂᕐᓴᖅ ᑐᓴᐅᒪᔭᕆᐊᖃᕐᓂᒃᑯᑦ ᐱᔭᐅᓂᑯᓂᒃ ᑕᒪᐃᓐᓂ ᓄᓇᕗᒥᑦ ᓂᕿᓄᑦ ᖃᐅᔨᓴᕈᑎᓂᒃ 2017-ᒧᑦ ᐊᒻᒪ 2018-ᒧᑦ.

ᐊᒥᓱᒻᒪᕆᖕᓂ ᐅᓂᒃᑳᓕᐊᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᑦ ᕿᒥᕐᕈᐊᖅᑕᖏᓐᓂᒃ ᒪᓕᙱᓐᓂᕐᒧᑦ ᓈᒻᒪᙱᓕᐅᕈᑎᖃᙱᑦᑐᑦ ᐆᑐᓇᖅ ᐱᒻᒪᕆᐊᓗᖕᓂ ᓈᒻᒪᙱᓕᐅᕈᑎᖃᖅᑐᕕᓂᕐᒥ ᒪᑐᓯᒪᓕᖅᑐᒥ ᐹᕕᓐ ᑎᐊᓕ, ᐃᒪᓐᓇ ᓂᕿᓕᐅᕐᑎᐅᔪᑦ ᐊᒡᒐᖏᓐᓂᒃ ᐊᓗᐱᕐᓯᕙᖕᓂᖏᓐᓂᒃ ᐊᒻᒪ ᓂᕿᐅᑉ ᖁᓛᒍᑦ ᖁᐃᕐᓱᖃᑦᑕᕐᓂᕐᒧᑦ.

ᑭᓯᐊᓂᓕ ᐅᓂᒃᑳᑦ ᓴᕿᑎᑦᑎᓯᒪᔪᑦ ᓄᓇᕗᒥᑦ ᓂᕿᓕᕆᕝᕖᑦ ᓱᓕ ᐱᓕᕆᐊᖃᕆᐊᖃᕐᓂᖏᓐᓂ ᓴᓗᒪᓂᕐᒥᑦ, ᓂᕿᓂᒃ ᐃᓂᖃᖅᑎᑦᑎᑦᑎᐊᕐᓂᕐᒥᒃ, ᐊᓗᒡᒐᖏᓐᓂᒃ ᐅᐊᓴᖃᑦᑕᕐᓂᕐᒥᒃ ᐊᒻᒪᓗ ᐋᕿᒃᓯᒪᓂᖏᓐᓄᑦ ᐃᓱᒫᓘᑎᓂᒃ.

ᐅᓇ ᑕᑯᓗᒍ ᔪᓚᐃ 2018-ᒥ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎ ᐆᒧᖓ ᑯᐃᒃᓯᑖᑉ ᓂᐅᕕᕐᕕᒃ ᐃᖃᓗᖕᓂ, ᐃᒪᓐᓇ ᓴᕿᑎᑦᑎᒍᑎᐅᓚᐅᕐᑐᖅ ᓈᒻᒪᙱᓕᐅᕆᑎᒐᓚᖕᓂᒃ: ᓇᑎᖏ ᓱᕋᒃᓯᒪᐅᕐᑐᑦ, ᖃᐅᒻᒪᖅᑯᑏᑦ ᒪᑐᖃᙱᑦᑐᑦ ᐊᒻᒪ ᓂᖀᑦ ᓇᑎᕐᒦᑎᑕᐅᔪᑦ ᐱᖁᑎᖃᕐᒥᒐᓂᒃ.

“ᖃᓄᐃᓕᖓᓂᐅᔪᑦ, ᐊᒥᓱᓪᓗ ᐅᖃᐅᓯᐅᖃᑦᑕᐃᓐᓇᕐᓯᒪᓪᓗᑎᒃ ᓯᕗᓂᐊᒍᑦ ᖃᐅᔨᓴᕈᑎᓂᒃ ᐊᕐᕌᒎᑉ ᐃᓗᐊᓂ, ᐱᖁᔭᓂᒃ ᒪᓕᒃᓯᒪᙱᑦᑐᑦ ᐊᒻᒪᓗ ᖁᐊᕐᓵᕐᓇᖅᑎᑦᑎᑐᐃᓐᓇᕆᐊᖃᖅᖢᑎᒃ ᑭᒃᑯᓕᒫᓄᑦ ᐋᓐᓂᐊᖃᖅᑕᐃᓕᓂᒃᑯᑦ ᐊᒻᒪᓗ ᐋᕿᒃᑕᐅᑲᐅᑎᒋᔭᕆᐊᖃᖅᖢᑎᒃ,” ᑎᑎᕋᖅᑕᐅᓯᒪᓂᑯ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᖅᑎᖓᓂ ᐆᒧᖓ ᓂᐅᕕᕐᕕᒃᒧᑦ ᐊᖓᔪᖅᑳᓄᑦ, ᐅᕙᓂ ᐅᓪᓗᖃᖅᖢᓂ ᔪᓚᐃ 11, 2018.

ᐃᓱᒫᓘᑎᐅᔪᑦ ᓇᓗᓇᐃᖅᑕᐅᓯᒪᔪᑦ ᖃᐅᔨᓴᖅᑎᐅᑉ ᐅᓂᒃᑳᖏᓐᓂᒃ ᐃᓱᒪᒋᔭᐅᓗᐊᓚᐅᙱᑦᑐᒃᓴᐅᔪᑦ ᐱᒻᒪᕆᐊᓘᓂᖏᓐᓂᒃ, ᑭᓯᐊᓂᓕ ᓂᐅᕕᕐᐸᒃᑐᑦ ᖃᐅᔨᒪᓇᔭᙱᒻᒪᑕ ᑖᓐᓇ ᐃᖃᓗᖕᓂ ᓂᐅᕕᕐᕕᒃ—ᐊᒻᒪ ᐊᓯᖏᑦ ᑯᐃᒃᓯᑖᑉ ᓂᐅᕕᕐᕕᐅᔪᑦ ᓄᓇᓕᐸᐅᔭᓃᑦᑐᑦ—ᓱᕋᐃᖃᑦᑕᐃᓐᓇᕐᓯᒪᖕᒪᑕ ᐱᖁᔭᓂᒃ ᐅᕙᓃᑦᑐᓂᒃ ᓄᓇᕗᒥᑦ ᐋᓐᓂᐊᖃᖅᑕᐃᓕᓂᕐᒧᑦ ᒪᓕᒐᕐᔪᐊᕐᒥᑦ.

ᑕᐃᒪᐃᒃᑲᓗᐊᕐᑎᓪᓗᒍ, ᓚᐸᓛᖕᒃ-ᕼᐋᕗᑦ ᑐᑭᓯᒋᐊᖅᑎᑦᑎᓚᐅᕐᑐᖅ ᓴᓇᕝᕕᐅᔪᑦ ᒪᓕᙱᑦᑐᑦ ᓄᓇᕗᑦ ᐋᓐᓂᐊᖃᖅᑕᐃᓕᓂᕐᒧᑦ ᐱᖁᔭᖏᓐᓂ ᑕᒪᑐᒧᖓ ᐊᑭᓖᑎᑕᐅᕙᙱᒻᒪᑕ.

“ᒫᓐᓇᐅᔪᖅ, ᐱᓕᕆᐊᖃᖃᑦᑕᕋᑦᑕ ᐱᓕᕆᕝᕕᖕᓂᒃ ᐊᑐᓃᓕᖓᓪᓗᑎᒍᑦ, ᖃᐅᔨᓴᖅᖢᑎᒍᑦ ᒪᓕᒃᓯᒪᔪᑦ ᐊᒻᒪ ᒪᓕᒃᓯᒪᙱᓐᓂᐅᔪᑦ ᐱᖁᑎᒋᔭᐅᔪᓄᑦ” ᐅᖃᖅᑐᖅ.

“ᑭᖑᓂᐊᒍᓪᓗ ᖁᐊᕐᓵᕐᓇᓗᐊᖅᑐᑦ, ᒪᓕᒃᓯᒪᙱᓗᐊᖅᑐᑦ ᐋᕿᒃᑕᐅᑎᓐᓇᓱᖃᑦᑕᖅᑕᕗᑦ ᕿᓚᒥᐅᑎᓐᓇᓱᒃᖢᑎᒍᑦ.”

ᖃᓄᐃᓕᐅᕈᑎᓕᕆᓂᖅ ᐅᑭᐅᕐᑕᖅᑐᕐᒥ ᑐᑭᖃᕐᒪᑕ ᑭᖑᕙᕆᐊᕈᑎᑕᖃᖃᑦᑕᕐᓂᖓᓂᒃ ᓈᒻᒪᙱᓕᐅᕈᑎᓂᒃ ᐋᕿᒃᓱᐃᓇᓱᖕᓂᒃᑯᑦ, ᐱᔾᔪᑎᖃᓗᐊᖅᐸᒃᖢᓂ ᐅᑕᕿᒋᐊᖃᖅᐸᒃᖢᑎᒃ ᐱᓕᕆᔾᔪᑎᒃᓴᓄᑦ ᓄᓇᓕᖕᓄᑦ ᑎᑭᐅᔾᔭᐅᔭᕆᐊᖃᕐᓂᖏᓐᓂᒃ.

“ᐃᒡᓗᕐᔪᐊᒨᖓᔪᑦ ᐊᑯᓂᐅᓂᕐᓴᐅᕙᓂᕐᓴᐅᔪᑦ,” ᐅᖃᖅᑐᖅ.

ᖃᖓᑦᑎᐊᓵᐸᓗᒃ ᖃᐅᔨᓴᖅᑐᐅᒍᑎᐅᔪᑦ ᕈᐃᐅᓪ ᑲᓃᑎᐊᓐ ᓖᔾᔭᐅᑉ ᓂᕿᓕᐅᕐᕕᐊᓂᒃ 2017-ᒥ ᐊᒻᒪ 2018-ᒥ ᓇᓗᓇᐃᒃᑯᑎᐅᕗᖅ ᑕᐃᒪᐃᑦᑐᓄᑦ.

2017-ᒥᑦ ᖃᐅᔨᓴᓐᓂᖅ ᓇᓗᓇᐃᕐᓯᒍᑎᐅᓚᐅᕐᐳᖅ ᓈᒻᒪᙱᓕᐅᕈᑎᐅᔪᓂᒃ ᐱᓕᕆᕝᕕᐅᑉ ᓂᕿᓄᑦ ᐃᓂᖃᕐᕕᖓᓂᒃ ᐊᒻᒪᓗ ᓇᑎᖏᑦ ᓱᕋᒃᓯᒪᐅᕐᓂᖏᓐᓂᒃ. ᑖᒃᑯᐊ ᖃᐅᔨᓴᖅᑎᐅᔪᑦ ᐅᑎᖅᑎᓪᓗᒋᑦ 2018 ᐊᐅᔭᖓᓂ ᖃᐅᔨᓴᕆᐊᒃᑲᓐᓂᖅᖢᑎᒃ ᓖᔾᔭᓐᒥ, ᓇᑎᖅ ᓱᓕ ᓴᓇᔭᐅᔭᕆᐊᖃᕐᓯᒪᓚᐅᕐᐳᖅ; ᓄᑖᙳᕆᐊᖅᑎᑦᑎᓂᕐᒥ ᐋᕿᒃᓱᐃᓯᒪᒐᓗᐊᖅᑎᓪᓗᒋᑦ, ᓴᓇᔭᐅᔪᒃᓴᑦ ᑎᑭᓵᕐᓯᒪᓚᐅᕐᒪᑕ ᐅᒥᐊᕐᔪᐊᒃᑯᑦ ᑖᒃᑯᐊᓗ ᐊᐅᓚᑦᑎᔨᐅᔪᑦ ᓴᓇᔭᒃᓴᒥ ᑎᑭᑦᑏᓪᓗᑎᒃ ᓴᓇᓕᕆᐊᕐᓂᐊᖅᑐᒥᑦ ᑖᓱᒥᖓ.

ᖃᐅᔨᓴᒃᑲᓐᓂᕈᑎᒃᓴᑦ ᕿᒥᕐᕈᐊᕐᓃᓪᓘᓐᓃᑦ ᐋᕿᒃᑕᐅᓇᔭᖅᑐᑦ ᒪᓕᒡᓗᑎᒃ ᖃᓄᖅ ᑐᐊᕕᕐᓇᕐᓂᖃᕐᓂᖓᓄᑦ ᖃᓄᐃᓕᐅᕈᑎ ᐊᒻᒪᓗ ᖃᐅᔨᓴᖅᑏᑦ ᐱᔪᓐᓇᕐᓂᖏᑦᑎᒍᑦ—ᑖᒃᑯᐊᓕ ᐅᕙᓃᑦᑐᑦ ᐃᖃᓗᐃᑦ, ᖃᒪᓂᑦᑐᐊᖅ, ᑲᖏᖅᖠᓂᖅ, ᐸᖕᓂᕐᑑᖅ ᐊᒻᒪ ᐃᖃᓗᒃᑑᑦᑎᐊᕐ—ᓄᓇᓕᖕᓅᕈᓐᓇᕐᓗᓂ.

“ᖃᓄᐃᓕᕈᓘᔭᕆᐊᖃᕐᓯᒪᒐᑦᑕ ᐱᓕᕆᐊᑦᑎᒍᑦ, ᓲᖃᐃᒻᒪ ᓄᓇᓕᖕᓄᐊᕈᓐᓇᙱᓐᓇᑦᑕ ᑕᒪᐃᓄᑦ ᐱᓇᓱᐊᕈᓰᒃ ᒪᕐᕉᒃ ᐱᐊᓂᒃᑳᖓᑎ ᖃᐅᔨᓴᕆᐊᒃᑲᓐᓂᕋᓱᒡᓗᑕ,” ᓚᐸᓛᖕᒃ-ᕼᐋᕗᑦ ᐅᖃᖅᑐᖅ.

ᓈᒻᒪᙱᓕᐅᕈᑎᐅᖏᓐᓇᕐᑐᑦ ᒪᓕᙱᓐᓂᕐᒧᑦ ᐅᑯᓄᙵᓕᕋᔭᖅᑐᑦ ᓄᓇᕗᑦ ᐊᖓᔪᖅᑳᖓᓄᑦ ᐋᓐᓂᐊᖃᖅᑕᐃᓕᓂᕐᒧᑦ, ᐅᖃᖅᑐᖅ, ᐅᖃᒃᑲᓐᓂᖅᖢᓂ ᐱᓕᕆᕝᕕᐅᔪᒥ ᒪᑐᔭᐅᔪᖃᖃᑦᑕᓗᐊᙱᓐᓂᕋᖅᖢᓂᐅᒃ ᓱᕋᐅᓯᒪᓂᕐᒧᑦ ᐱᖁᔭᓂᒃ.

ᖃᐅᔨᓴᖅᑎᐅᔪᓪᓕ ᐃᒪᐃᓕᐅᕈᓐᓇᖅᑐᑦ, ᐃᓱᒪᓕᐅᕆᓗᑎᒃ ᓄᓇᓖᑦ ᓇᖕᒥᓂᖃᕐᓂᕐᒧᑦ ᓚᐃᓴᓐᓂᓵᕈᑎᒥ ᐋᒃᑳᕈᓐᓇᕐᓗᑎᒃ.

ᓈᕕᒌᑐ ᐃᓐ ᑐᔪᕐᒥᕕᖓ ᐊᒻᒪ ᓂᕆᔭᖅᑐᕐᕕᖓ ᓈᒻᒪᙱᓕᐅᕈᑎᕈᓘᔭᕐᓂ ᓱᕋᐃᔾᔪᑎᖃᖅᐳᑦ ᐊᒃᑐᐊᔪᓂᒃ ᓴᓗᒻᒪᙱᓗᐊᕐᓂᕐᒧᑦ ᑕᒪᐃᓐᓂ 2017-ᒥᑦ ᐊᒻᒪ 2018-ᒥᑦ, ᐱᓇᓱᒃᑎᓪᓗᒋᑦ ᓂᕆᔭᒃᓴᓂ ᐱᔭᐅᑲᐅᑎᒋᔪᓐᓇᖅᑐᓂᒃ ᐊᑐᖅᑕᐅᓚᐅᑲᓐᓂᐊᖅᑐᒥ ᐱᔪᓐᓇᐅᑎᒥᒃ.

ᑖᓐᓇ ᐱᓕᕆᕝᕕᐅᔪᖅ ᒪᑐᓕᑕᐃᓐᓇᓚᐅᕐᓯᒪᔪᖅ ᐊᕐᕌᓂ, ᑭᓯᐊᓂᓕ ᓚᐸᓛᖕᒃ-ᕼᐋᕗᑦ ᐅᖃᕈᓐᓇᓚᐅᙱᑦᑐᖅ ᒪᑐᔭᕆᐊᒃᓴᖓᓂ ᐋᓐᓂᐊᖃᖅᑕᐃᓕᓂᕐᒧᑦ ᓱᕋᐃᓯᒪᐃᓐᓇᕐᓂᕐᒧᑦ.

“ᐅᐸᒍᑎᓯᒪᔪᒍᑦ ᐃᓱᒪᓕᐅᕆᔭᖅᑐᖅᖢᑕ ᐊᐅᓚᑦᑎᕕᐅᔪᖅ ᒪᑐᔭᐅᓯᒪᖁᓪᓗᒍ ᐱᓕᕆᐊᖃᕐᓂᖏᓐᓂᒃ ᓈᒻᒪᙱᓕᐅᕈᑎᓂᒃ,” ᐅᖃᖅᑐᖅ.

“ᑭᓯᐊᓂᓕ ᓈᒻᒪᙱᓕᐅᕈᑎᖃᕐᓯᒪᙱᑦᑐᒍᑦ. ᐱᓕᕆᕈᓘᔭᕐᓂᕐᓴᐅᓕᖃᑦᑕᕐᒪᑕ ᐋᕿᒃᓯᓇᓱᒃᖢᑎᒃ.”

“ᓄᓇᕗᑦ ᒪᓕᒋᐊᖃᓕᕐᒪᑦ ᑲᓇᑕᒥ ᐊᑐᖅᑕᐅᕙᒃᑐᓂᒃ”

ᑕᐃᒪᙵᑦ ᓯᕗᓪᓕᖅᐹᑦ ᐅᓂᒃᑳᑦ ᓂᕿᓕᕆᕝᕕᐅᕙᒃᑐᓂ ᓱᕋᐃᓯᒪᓂᐅᔪᑦ ᑐᓴᐅᒪᔭᐅᓕᖅᑎᓪᓗᒋᑦ ᓄᓇᕗᒥᑦ 2016-ᒥ, ᐊᓯᙳᖅᑎᑦᑎᖁᔨᔪᖃᕐᓯᒪᐃᓐᓇᓕᕐᑐᖅ ᓄᓇᕗᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕐᓂᕐᒥᑦ ᐱᓕᕆᔾᔪᓯᖏᓐᓂᒃ, ᐅᓇ ᐱᔭᐅᓗᐊᕐᓗᓂ ᐅᓂᒃᑳᓕᐊᖏᑦ ᑭᒃᑯᓕᒫᓄᑦ ᑕᑯᔭᐅᔪᓐᓇᕐᐸᒡᓗᑎᒃ.

ᐊᕐᕌᒍᓂ ᐊᓂᒍᕐᑐᓂ ᖃᓂᓐᓂᕐᓴᓂᒃ, ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᓚᐃᑦᓯᑑᓐ ᐊᐱᕆᓯᒪᔪᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᑦ ᓄᑖᙳᕆᐊᖅᑎᑦᑎᖁᓪᓗᒋᑦ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐱᖁᔭᕐᔪᐊᖓᓂᒃ, ᐊᒻᒪᓗ ᖃᕋᓴᐅᔭᒃᑯᑦ, ᕿᓂᕐᕕᐅᔪᓐᓇᖅᑐᒥ ᖃᐅᔨᓴᕈᑎᕕᓂᕐᓂᒃ ᐅᓂᒃᑳᓂᒃ.

“ᓄᓇᕗᑦ ᒪᓕᒋᐊᖃᓕᕐᒪᑦ ᑲᓇᑕᒥ ᐊᑐᖅᑕᐅᕙᒃᑐᓂᒃ ᐊᒻᒪᓗ ᖁᐊᕐᓵᕐᓇᙱᑦᑐᒦᑎᑦᑎᓂᕐᒥᒃ ᐊᑐᖅᑎᐅᕙᒃᑐᓂᒃ ᐊᒻᒪᓗ ᐊᑐᕐᕕᐅᔪᒥᓇᕐᓂᕐᓴᐅᔪᓐᓇᓕᕐᓗᑎᒃ,” ᓚᐃᑦᓯᑑᓐ ᐅᖃᖅᑐᖅ.

“ᐅᒃᐱᕈᓱᒃᑭᕗᖓ ᑕᒪᕐᒥ ᐱᓕᕆᕝᕕᐅᕙᒃᑐᑦ ᓴᕿᔮᖅᑎᑦᑎᔪᓐᓇᕐᓗᑎᒃ ᖃᐅᔨᓴᖅᑕᐅᔾᔪᑎᕕᓂᖏᓐᓂᒃ ᑭᖑᓪᓕᖅᐹᖑᔪᓂᒃ, ᑕᐃᒪᐃᖃᑦᑕᕐᓯᒪᖕᒪᑕᓕ ᐊᓯᖏᓐᓂᒃ ᐊᕕᒃᑐᕐᓯᒪᓂᒃᑰᖓᔪᓂᒃ.”

ᑖᓐᓇ ᑐᕌᒐᕆᔭᐅᒧᖅ, ᐅᖃᓚᐅᕐᑐᑦ ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦ, ᓱᓕ ᑎᑭᐅᑎᓯᒪᙱᑲᓗᐊᖅᖢᑎᒃ.

ᓄᓇᕗᒧᑦ ᓄᑖᖅ ᐋᓐᓂᐊᖃᖅᑕᐃᓕᓂᕐᒧᑦ ᐱᖁᔭᕐᔪᐊᖅ ᐊᓂᒍᖅᑎᑕᐅᓚᐅᕐᓯᒪᔪᖅ 2016-ᒥᑦ, ᑭᓯᐊᓂᓕ ᓄᑖᓂ ᐱᖁᔭᕐᓂ ᐊᑐᓕᕆᐊᖃᕐᒪᑕ ᑖᓐᓇ ᐊᑐᓕᒻᒪᕆᓚᐅᖅᑎᓐᓇᒍ. ᐃᓚᖏᑦ ᐱᖁᔭᐃᑦ ᐱᖁᔨᓯᒪᓇᔭᖅᑐᑦ ᓂᕿᓄᑦ ᖃᐅᔨᓴᕐᓂᕐᒥ ᐅᓂᒃᑳᑦ ᑭᒃᑯᑐᐃᓐᓇᕐᓄᑦ ᑕᑯᔭᐅᔪᓐᓇᕐᓗᑎᒃ.

“ᐱᖁᔭᐃᑦ ᐋᕿᒃᓱᖅᑕᐅᕙᓪᓕᐊᖏᓐᓇᖅᑐᑦ,” ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᓯᒪᔪᑦ ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ ᐋᒐᓯ 15-ᒥ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. “ᐱᐊᓂᒃᑕᐅᑐᐊᕐᐸᑕ, ᒪᓕᒐᓕᕆᔨᒧᑦ ᑐᓐᓂᖁᑎᐅᓇᔭᖅᑐᑦ ᑖᓐᓇ ᒪᓕᒐᔪᐊᙳᓚᐅᙱᓐᓂᖓᓂᒃ.”

ᓄᓇᕗᑦ ᒐᕙᒪᒃᑯᑦ ᓇᓗᓇᐃᓚᐅᙱᑦᑐᑦ ᐃᓱᓕᕝᕕᒋᔭᖏᓐᓂᒃ ᑐᓂᓯᓂᕐᒥᒃ ᑖᒃᑯᓂᖓ ᐱᖁᔭᓂᒃ, ᑭᓯᐊᓂᓕ, ᑖᒃᑯᐊᑦᑕᐅᖅ ᐱᖁᔭᐃᑦ ᓱᓕ ᑭᒃᑯᑐᐃᓐᓇᕐᓄᑦ ᓴᕿᑎᑕᐅᓚᐅᙱᑦᑐᑦ.

ᐅᐱᕐᖔᖑᓚᐅᕐᓯᒪᔪᖅ, ᓄᓇᕗᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᓚᐅᕐᓯᒪᔪᖅ ᒪᓕᒐᓕᕆᕕᒧᑦ ᑖᒃᑯᐊ ᐱᓕᕆᕝᕕᐅᔪᑦ ᐱᕕᖃᒃᑲᓐᓂᕆᐊᖃᕐᓂᕋᖅᖢᓂᒋᑦ.

“ᐅᓇ ᐱᓕᕆᓂᖅ ᐱᓕᕆᐊᖑᕙᓪᓕᐊᔪᖅ,” ᐅᖃᓚᐅᕐᑐᖅ ᕕᕝᕗᐊᕆ 2019-ᒥ ᑲᑎᒪᕕᒡᔪᐊᖅᓇᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᐅᓪᓚᔾᔪᑎᖏᓐᓂᒃ ᕿᒥᕐᕈᐊᖅᑎᓪᓗᒋᑦ.

“ᑕᒪᒃᑯᐊ ᖃᐅᔨᓴᕈᑎᐅᓯᒪᔪᑦ ᐱᐊᓂᒃᑕᐅᓯᒪᓇᓱᖕᒪᑕ ᐊᒻᒪᓗ ᐅᓂᒃᑳᓕᐅᕐᓂᖅ ᐊᔾᔨᒌᒃᑐᒃᑯᑦ ᐱᓕᕆᐊᖑᕙᒡᓗᑎᒃ… ᖃᕋᓴᐅᔭᒃᑯᑦ ᐃᓚᒃᓴᖅ ᐃᑲᔪᕈᑎᒻᒪᕆᐅᓂᐊᕐᑐᖅ.”

ᓄᓇᕗᑦ ᑕᒪᒃᑯᓂᖓ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᕕᓂᕐᓂᒃ ᓴᕿᑎᑦᑎᑲᑕᓕᕐᐸᑦ, ᓚᐃᑦᓯᑑᓐ ᓂᕆᐅᒃᑐᖅ ᑭᒃᑯᑐᐃᓐᓇᑦ ᐊᒻᒪ ᐃᒻᒥᒃᑯᑦ ᐱᓕᕆᐊᖃᖅᑐᑦ ᐃᓚᐅᓕᕈᓐᓇᖁᓪᓗᒋᑦ ᐅᓂᒃᑳᓂᒃ ᐋᕿᒃᓱᐃᓇᓱᖕᓂᕐᒥᑦ ᖃᕋᓴᐅᔭᒃᑯᑦ ᐱᓇᓱᒍᑎᑎᒍᑦ.

ᖃᕋᓴᐅᔭᓄᑦ ᐃᓚᒃᑕᖅ ᑕᐃᔭᐅᔪᑦ ‘ᑐᒪᑎ’, ᓇᓗᓇᐃᒃᑯᑎᒋᓗᒍ, ᑭᒃᑯᓕᒫᓂᒃ ᖃᔨᒪᐃᑦᑎᒍᑎᖃᖅᐳᑦ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᓄᑦ ᐅᓂᒃᑳᓂᒃ ᐊᒻᒪᓗ ᓂᕆᔭᖅᑐᕐᕕᐅᕙᒃᑐᑦ ᓇᓗᓇᐃᒃᑯᑎᑖᖅᑎᑉᐸᒃᖢᒋ ᓱᕋᐃᓯᒪᙱᓐᓂᕐᒧᑦ, ᑕᒪᕐᒥᒡᓗ ᐅᖄᓚᐅᑎᕋᓛᒃᑯᑦ ᕿᓂᒐᒃᓴᐅᓪᓗᑎᒃ.

Share This Story

(0) Comments

Join the Conversation

Your email address will not be published. Required fields are marked *

*