ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᐃᓱᒪᒋᔭᖃᓕᕐᐳᑦ ᓇᖕᒥᓂᖅ ᒐᕙᒪᖃᕐᓂᕐᒧᑦ ᖃᓄᐃᓕᐅᕈᑎᒃᓴᒃᑲᓐᓂᕐᓂᒃ

‘ᑕᒪᑐᒥᖓ ᐱᓇᓱᒋᐊᖃᖅᑐᒍᑦ,’ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᐊᖓᔪᖅᑳᖅ ᐸᐅᓗᓯ ᐊᕿᐊᕈᖅ

ᓄᓇᕗᑦ ᑐᙵᕕᒃ ᑲᑎᒪᔨᖏᑦ ᐅᖃᐅᓯᖃᕐᐳᑦ ᐅᖃᐅᓯᖃᕈᒪᓪᓗᑎᒃ ᓇᖕᒥᓂᖅ ᒐᕙᒪᖃᕐᓂᒃᑯᑦ ᐊᑐᖅᑕᐅᖔᕈᓐᓇᖅᑐᓂᒃ ᓄᓇᕗᒥᑦ ᐃᓄᖕᓄᑦ ᒫᔅᓯ 17-ᒥᑦ, ᑲᑎᒪᑎᓪᓗᒋᑦ ᖃᒪᓂᑦᑐᐊᕐᒥ. (ᐊᔾᔨᙳᐊᕐᒥᙶᖅᓯᒪᔪᖅ ᓄᓇᕗᑦ ᑐᙵᕕᒃ ᓴᖅᑭᔮᑲᐅᑎᒋᑎᓪᓗᒋᑦ)

By ᔭᐃᓐ ᔪᐊᔾ

For an English version of this story, see Nunavut Tunngavik Inc. board considers self-government options

ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏ ᐅᖃᕐᑐᑦ ᕿᒥᕐᕈᐊᕈᒪᓂᕋᖅᖢᑎᒃ ᐱᕕᖃᕐᓂᕐᓴᐅᔪᓐᓇᓂᕐᒥᒃ ᓇᖕᒥᓂᖅ ᒐᕙᒪᖃᕐᓂᕐᒥᒃ ᓄᓇᕗᑦ ᐃᓄᖏᓐᓄᑦ.

ᖃᓄᖅ ᑕᐃᒪᐃᓕᐅᕐᓂᐊᕆᐊᒃᓴᖅ ᐅᖃᐅᓯᐅᓕᓚᐅᕐᓯᒪᔪᖅ ᒫᔅᓯ 17-ᒥ ᓄᓇᕗᑦ ᑐᙵᕕᒃᑯᑦ ᑲᑎᒪᑎᓪᓗᒋᑦ ᖃᒪᓂᑦᑐᐊᕐᒥ, ᐅᓄᕈᓘᔭᕐᑐᑦ ᑲᑎᒪᔨᐅᔪᑦ ᓈᒻᒪᒃᓴᕐᓯᒪᙱᖢᑎᒃ ᓄᓇᕗᑦ ᒐᕙᒪᒃᑯᓐᓂᒃ ᐊᒻᒪᓗ ᐅᓄᙱᓗᐊᖅᑐᓂᒃ ᐃᓄᖕᓂ ᐊᐅᓚᑦᑎᓂᒃᑯᑦ ᐃᖅᑲᓇᐃᔭᖅᑎᖃᕐᓂᖏᓐᓂᒃ.

ᑯᓄᒃ ᐃᓅᑎᖅ, ᓄᓇᕗᑦ ᑐᙵᕕᒃᑯᑦ ᑐᑭᒧᐊᖅᑎᑦᑎᔨᖓ ᓇᖕᒥᓂᖅ ᐱᓇᓱᓕᕐᓂᕐᒧᑦ, ᓴᖅᑭᑎᑦᑎᓚᐅᕐᑐᖅ ᐅᓂᒃᑳᓂᒃ ᑕᒪᐅᖔᖓᔪᓂᒃ. ᐅᖃᓚᐅᕐᑐᖅ ᓄᓇᕗᒥᑦ ᓇᖕᒥᓂᖅ ᒐᕙᒪᖃᕐᓂᖅ ᐊᓯᙳᖅᑎᑦᑎᓇᔭᙱᓐᓂᖓᓂᒃ ᑭᒃᑯᓕᒫᓄᑦ ᒐᕙᒪᓕᕆᓂᐅᔪᓂᒃ ᐊᒻᒪᓗ ᓄᓇᕗᒧᑦ ᓯᕗᓕᐅᕐᑎᐅᔪᑦ ᓄᓇᕗᒥᐅᑕᓂᒃ ᑭᒡᒐᖅᑐᐃᖏᓐᓇᕋᔭᖅᖢᑎᒃ.

“ᐃᓄᐃᑦ ᓇᖕᒥᓂᖅ ᒐᕙᒪᖃᕐᓂᖓ ᐱᕈᖅᐸᓪᓕᐊᑎᑕᐅᓇᔭᕐᑐᖅ ᒪᑯᑎᒎᓇᖅ ᐃᓄᐃᑦ ᒐᕙᒪᓕᕆᓂᖏᑦᑎᒍᑦ ᒫᓐᓇ ᐱᑖᖅᑳᓂᒃᑐᒃᑯᑦ, ᐅᑯᑎᒎᓈᖓᓂᕐᓴᐅᓗᑎᒃ ᓄᓇᖃᕐᓂᕐᒧᑦ ᐊᖏᕈᑎᑎᒍᑦ ᑲᑐᔾᔨᖃᑎᒌᑎᒍᑦ,” ᐅᓂᒃᑳᖏ ᐅᖃᕐᓯᒪᔪᑦ.

ᑭᓯᐊᓂᓕ ᑖᒃᑯᐊ ᐃᓄᐃᑦ ᓇᖕᒥᓂᖅ ᒐᕙᒪᖓᑦ ᐱᖃᕆᐊᖃᕋᔭᖅᑐᑦ ᐅᑯᐊ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᐅᑎᑦᑎᒍᑎᒃ ᐱᓕᕆᕝᕕᐅᓇᔭᖅᑐᓂᒃ “ᐃᓄᖕᓄᑦ ᐱᔨᑦᑎᕋᐅᑎᓕᕆᔪᓐᓇᕐᓂᖅᓴᓂᒃ ᐊᒻᒪ ᐃᓄᖕᓄᑦ ᐱᔭᐅᔪᒪᔪᓄᑦ ᑐᕌᖓᓂᕐᓴᓂᒃ.”

ᐊᓯᐊᒎᕈᑎᐅᔪᓐᓇᖅᑐᑦ ᓯᕗᒧᑦ ᐱᕙᓪᓕᐊᓂᕐᒧᑦ ᐃᓚᖃᕐᒥᔪᑦ ᐋᔩᖃᑎᖃᕐᓂᕐᒥᒃ ᓄᓇᕗᒥᑦ ᒐᕙᒪᒃᑯᓐᓂᒃ ᐋᖅᑭᒃᓯᖁᓗᒋᑦ “ᒐᕙᒪᐅᖃᑎᒌᖕᓂᒃᑯᑦ ᐱᔨᑦᑎᕋᐅᑎᓄᑦ ᐊᖏᕈᑎᓂᒃ,” ᐅᖃᖅᑐᖅ.

ᑕᐃᒪᐃᑦᑐᒃᑯᓪᓕ ᐊᖏᕈᑎᑎᒍᑦ, ᓄᓇᕗᑦ ᑐᙵᕕᒃᑯᑦ ᑲᒪᒋᔭᖃᖔᓕᕋᔭᕐᑐᑦ ᐃᓄᓕᕆᓂᒃᑯᑦ ᐱᓕᕆᐊᒃᓴᓂᒃ ᒪᑯᑎᑐᓇᖅ ᐃᓕᓐᓂᐊᖅᑐᓕᕆᓂᕐᒥᒃ ᐃᓄᖕᓄᑦ ᓄᓇᕗᒥᑦ.

ᐊᓯᒃᑲᓐᓂᖓᓕ ᐊᓯᐊᒎᕈᑎᐅᔪᓐᓇᕋᔭᖅᑐᖅ ᐋᖅᑭᒃᓱᐃᓗᑎᒃ ᐃᓄᖕᓅᖓᔪᓂᒃ ᐱᓕᕆᐊᒃᓴᓂᒃ ᐊᒻᒪ ᐱᔨᑦᑎᕋᐅᑎᓂᒃ ᓄᓇᕗᑦ ᒐᕙᒪᒃᑯᑦ ᐱᓕᕆᐊᖏᑦᑎᒎᖓᙱᑦᑐᓂᒃ.

ᐅᕝᕙᓘᓐᓃᑦ ᓄᓇᕗᑦ ᑐᙵᕕᒃᑯᑦ ᐊᐱᕆᓗᑎᒃ ᒐᕙᒪᑐᖃᒃᑯᓐᓂᒃ ᐱᓇᓱᒍᒪᓂᕐᒥᒃ ᐱᓪᓚᕆᐅᓂᐊᖅᑐᒥᒃ ᓇᖕᒥᓂᖅ ᒐᕙᒪᖃᕐᓂᕐᒧᑦ ᐊᖏᕈᑎᓂᒃ, ᑖᓐᓇᓗ ᐊᕐᕌᒍᓂ 20-ᓂ ᐱᓕᕆᐊᖑᓇᔭᖅᑐᒃᓴᐅᓪᓗᓂ.

ᐸᐅᓗᓯ ᐊᕿᐊᕈᖅ, ᐊᖓᔪᖅᑳᖅ ᕿᑭᑦᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᐅᖃᓚᐅᕐᑐᖅ ᑕᒪᒃᑯᓂᖓ ᖃᐅᔨᓇᓱᖕᓂᖅ ᐊᑐᕈᑎᖃᓚᐅᕐᓂᖓᓂᒃ.

“ᑕᒪᑐᒥᖓ ᐱᓇᓱᒋᐊᖃᕋᑦᑕ,” ᐅᖃᓚᐅᕐᑐᖅ ᑐᓵᕌᓂᒃᑎᓪᓗᒍ ᐅᓂᒃᑳᓕᐊᕆᔭᐅᔪᓂᒃ.

ᐃᓅᑎᖅ ᐅᖃᐅᓯᖃᓚᐅᕐᒥᔪᖅ ᖃᓄᖅ ᒪᑭᕕᒃᑯᑦ ᐋᖅᑭᒃᓯᓯᒪᓂᖏᓐᓂᒃ ᐃᓄᐃᑦ ᐱᓇᓱᒍᑎᖏᓐᓂᒃ ᓇᖕᒥᓂᖅ ᒐᕙᒪᖃᓕᕐᓂᕐᒧᑦ ᐊᐅᓚᑕᐅᔪᓐᓇᕋᔭᕐᓗᓂ ᓴᓂᑦᑎᐊᖓᒍᑦ ᐊᕕᒃᑐᕐᓯᒪᓂᒃᑯᑦ ᑭᒃᑯᓕᒫᓂᒃ ᒐᕙᒪᓕᕆᓂᕐᒧᑦ.

“ᑲᓇᑕᒥ ᓂᕈᐊᕐᓯᒪᓂᕐᓴᐅᒐᓗᐊᖅᖢᑎᒃ ᑭᒃᑯᓕᒫᓄᑦ ᒐᕙᒪᓕᕆᓂᕐᒥᓐ, ᒐᕙᒪᑐᖃᒃᑯᑦ ᐊᑐᐊᒐᖏᑦ ᐊᒻᒪ ᒪᓕᒐᖏᑦ ᐃᓚᐅᙱᑎᑦᑎᓯᒪᙱᒻᒪᑕ ᐅᑯᓂᖓ ᐃᓄᐃᑦ ᓇᖕᒥᓂᖅ ᒐᕙᒪᖃᕈᒪᓕᕋᔭᕆᐊᒃᓴᖏᓐᓂᒃ ᓄᓇᕗᒥᑦ,” ᐃᓅᑎᖅ ᐅᖃᖅᑐᖅ.

ᓄᓇᕗᒥᑦ ᒐᕙᒪᒃᑯᑦ ᐊᔪᕋᔭᕐᒪᑕ ᐊᑐᖅᑎᑦᑎᑦᑕᐃᓕᓂᕐᒥᒃ ᐃᓄᖕᓂ ᓄᓇᕗᒦᑦᑐᓂᒃ ᐱᓇᓱᒃᑎᓪᓗᒋᑦ ᐅᕘᓈᖅᑐᒥᒃ ᐃᓚᖓ 35-ᒦᑦᑐᒥᒃ ᓇᖕᒥᓂᖅ ᒐᕙᒪᖃᓕᕐᓂᕐᒧᑦ ᐱᓕᕆᐊᖃᖅᐸᓪᓕᐊᓂᕐᒥᒃ, ᐅᖃᖅᖢᓂ.

ᐃᓚᖓ 35 ᐃᓚᒋᔭᐅᖕᒪᑦ ᑲᓇᑕᒥ ᒪᓕᒐᖅᔪᐊᒥᑦ ᐃᓕᓴᖅᓯᓯᒪᓂᕐᒥᒃ ᐊᒻᒪ ᓇᓗᓇᐃᖅᓯᓯᒪᓂᕐᒥᒃ ᓄᓇᖃᖅᑳᖅᑐᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᔪᓐᓇᐅᑎᖃᕐᓂᖏᓐᓂᒃ ᓇᖕᒥᓂᖅ ᒐᕙᒪᖃᓕᕈᒪᓂᕐᒧᑦ.

ᑭᓯᐊᓂᓕ ᓄᓇᕗᒥᑦ ᒐᕙᒪᒃᑯᓐᓂ ᐃᓚᐅᑎᑦᑎᓂᐊᕐᓗᓂ ᑕᐃᒪᓕ ᐅᖃᖃᑎᖃᑲᑕᕆᐊᖃᕋᔭᕐᒥᖕᒪᑕ ᒐᕙᒪᑐᖃᒃᑯᓐᓂ, ᐅᖃᖅᑐᖅ.

ᐊᒻᒪᓗ ᓇᖕᒥᓂᖅ ᒐᕙᒪᖃᕈᒪᓕᕐᓂᖅ ᐱᔭᐅᓇᓱᓪᓚᕆᓕᖅᐸᑦ ᐅᑯᑎᒎᓇᖅ ᓄᓇᕗᒧᑦ ᐊᖏᕈᑎᑎᒍᑦ, ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐃᓚᐅᔭᕆᐊᖃᓕᕋᔭᖅᑐᒃᓴᐅᓕᕋᔭᕐᒪᑕ.

ᖃᓄᐃᓕᖓᒐᓗᐊᖅᐸᑦ, ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᑦ ᓄᖅᑲᖅᑎᑦᑎᔪᓐᓇᕋᔭᙱᓐᓂᖏᓐᓂᒃ ᓇᖕᒥᓂᖅ ᒐᕙᒪᖃᕋᓱᓕᕐᓂᕐᒥᒃ.

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓ ᑯᓄ ᑕᑦᑐᐃᓂ ᐅᖃᓚᐅᖅᑐᖅ “ᐃᓚᐅᑦᑎᐊᒻᒪᕆᖕᓂᕋᖅᖢᓂ ᐱᓇᓱᐊᒐᕆᔭᐅᔪᒪᔪᒥᒃ.”

ᖃᓄᐃᓕᐅᖁᔨᒍᑎᑎᒍᑦ, ᑲᑎᒪᔨᐅᔪᑦ ᐅᖃᓚᐅᕐᑐᑦ ᓄᓇᕗᑦ ᑐᙵᕕᒃᑯᑦ ᕿᒥᕐᕈᐊᒃᑲᓐᓂᖁᔭᐅᓪᓗᑎᒃ ᓇᖕᒥᓂᖅ ᒐᕙᒪᖃᓕᕐᓂᕐᒥᒃ ᑭᖑᓪᓕᕐᒧᑦ ᐊᕐᕌᒍᒧᑦ ᑲᑎᒪᕕᒡᔪᐊᕐᓇᐅᓂᐊᖅᑐᒧᑦ.

 

Share This Story

(0) Comments

Join the Conversation

Your email address will not be published. Required fields are marked *

*