ᒫᑦᓯ 3-ᒥᑦ ᓄᓇᕗᑦ ᒐᕙᒪᒃᑯ ᓴᖅᑭᑎᑦᑎᓚᐅᕐᒪᑕ ᓇᓗᓇᐃᔭᕐᓯᒪᔪᓂᒃ ᐸᕐᓇᐅᑎᓂᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᐅᓄᕐᓯᕚᓪᓕᕐᓂᐊᕐᓂᖏᓐᓄᑦ ᓴᓇᕝᕕᖏᓐᓂᒃ ᐊᒻᒪ ᐱᓕᕆᕝᕕᒋᕙᒃᑕᖏᓐᓂᒃ.
ᓄᓇᕗᑦ ᒐᕙᒪᒃᑯᑦ ᑐᕌᒐᖃᖅᐳᑦ 58 ᐳᓴᓐᑎᖏᑦ ᐃᓄᐃᑦ ᐃᖅᑲᓇᐃᔭᓕᕐᓂᐊᕐᓗᑎᒃ 2023 ᑎᑭᒐᓱᖕᓂᖓᓂᒃ
ᑎᑎᖃᑦ ᑐᓐᓂᖁᑎᐅᔪᑦ ᐃᓗᓕᖃᖅᑐᑦ ᓄᓇᕗᒥᑦ ᓄᓇᑖᕐᓂᕐᒧᑦ ᐊᑐᖅᑕᐅᔭᕆᐊᖃᖅᑐᓂᒃ
For an English version of this story, see Nunavut government aims for 58 per cent Inuit employment by 2023
ᓄᓇᕗᑦ ᒐᕙᒪᒃᑯ ᐱᓕᕆᕙᓪᓕᐊᓂᐊᕐᑐᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᔪᑦ ᐅᓄᕐᓯᕚᓪᓕᖅᑎᑕᐅᓇᓱᒡᓗᑎᒃ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔮᖏᓐᓄ ᐊᕐᕌᒍᒐᓴᖕᓂᒃ, ᐅᖃᕐᓯᒪᔪᑦ ᓄᓇᕗᒥᑦ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᖏᓐᓄᑦ ᐸᕐᓇᐅᑎᖏ, ᓴᖅᑭᑕᐅᓚᐅᕐᑐᑦ ᒫᑦᓯ 3-ᒥᑦ.
ᑕᐃᒪᐃᓐᓂᐊᕐᓗᑎᒃ ᐱᒋᐊᕋᔭᕐᑐᑦ ᐃᓄᖕᓂ ᐃᖅᑲᓇᐃᔭᓕᖅᑎᑦᑎᓯᒪᓗᑎᒃ 58 ᐳᓴᑎᖏᓐᓂᒃ 2023 ᑎᑭᒐᓱᖕᓂᖓᓂᒃ, ᐅᓄᕐᓯᕚᓪᓕᕐᑐᖅ ᐅᓪᓗᒥ 50-ᐳᓴᓐᑎᒋᔭᐅᔪᒥ.
ᐸᕐᓇᐅᑎᒋᔭᐅᔪᑦ ᐊᒻᒪ ᑎᑭᐅᑎᓇᓱᖕᒥᔪᑦ 55 ᐳᓴᓐᑎᖏᓐᓂᒃ ᐃᓄᐃᑦ ᐃᖅᑲᓇᔭᓕᕐᓗᑎᒃ ᓄᓇᕗᑦ ᒐᕙᒪᒃᑯᑦ ᒐᕙᒪᓕᕆᓂᕐᒧᑦ ᐃᖅᑲᓇᐃᔮᓂᒃ ᑎᑭᒐᓱᖕᓂᖓᓂᒃ 2023, ᖁᕝᕙᖅᐹᓪᓕᕐᓯᒪᓪᓗᒥ ᐅᓪᓗᒥᒧ ᐋᖅᑭᒃᑕᐅᓯᒪᔪᓂᒃ 43 ᐳᓴᓐᑎᓂᒃ.
ᑖᓐᓇ ᐊᒻᒪ ᐊᓯᖏᑦ ᐃᖅᑲᓇᐃᔭᓕᖅᑎᑦᑎᓂᕐᒧ ᑐᕌᒐᕆᔭᐅᔪᑦ, ᐃᓚᖃᖅᖢᑎᒃ ᐃᖅᑲᓇᐃᔭᕋᔭᖅᑐᑦ ᖃᔅᓯᐅᓂᖏᓐᓂᒃ ᖃᓄᐃᓕᐅᕈᑎᐅᓯᒪᓂᖏᑦ ᐊᒻᒪᓗ ᐃᓕᓐᓂᐊᕐᓯᒪᓂᕐᒧ ᖃᓄᐃᓕᖓᓂᐅᔪᑦ ᑎᑎᕋᐅᓯᐅᓯᒪᔪᑦ ᐅᓪᓗᕐᒧᑦ ᑎᑎᕋᖅᑕᐅᓯᒪᔪᓂ ᑐᓐᓂᖅᑯᑎᐅᓂᑯᑦ ᐅᑯᐊ ᓄᓇᕗᑦ ᒐᕙᒪᒃᑯᑦ ᐊᑐᕆᐊᖃᕐᓯᒪᔭᖏᓐᓄᑦ ᐋᑎᑯᓪ 23-ᒥᑦ ᐅᕙᓂ ᓄᓇᕗᒥᑦ ᐊᖏᕈᑎᓂᒃ.
ᖁᐊᓴ ᑯᓱᒐᖅ, ᒥᓂᔅᑕᒋᔭᐅᔪᖅ ᓄᑖᒥ ᒪᓕᒐᓕᕆᓂᒃᑰᖓᔪᒥ ᐃᖅᑲᓇᐃᔮᒃᓴᓕᕆᔨᒃᑯᓐᓂᒃ, ᓴᖅᑭᑎᑦᑎᓚᐅᕐᑐᖅ ᑲᑎᕐᓱᖅᑕᐅᓯᒪᔪᓂᒃ ᐸᕐᓇᐅᑎᓂᒃ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᒃᓴᖏᓐᓄᑦ ᒪᓕᒐᓕᕆᕝᕕᖕᒧᑦ, ᐅᖃᖅᖢᓂ ᓄᓇᕗᑦ ᒐᕙᒪᒃᑯᑦ ᓯᕗᓪᓕᐅᑎᑕᐅᖃᑦᑕᕐᓂᐊᕐᓂᖏᓐᓂᒃ ᐃᓄᐃᑦ ᐃᖅᑲᓇᐃᔮᖅᑖᕐᕕᒋᓇᓱᒃᑕᖏᓐᓂᒃ.
“ᐃᓄᐃᑦ ᐃᖅᑲᓇᐃᔭᕐᕕᒋᔪᒪᓛᖓᑦ”
“ᐅᑯᐊ ᐃᓄᖕᓂᒃ ᐃᖅᑲᓇᐃᔭᓕᖅᑎᑦᑎᓂᕐᒧᑦ ᐸᕐᓇᐅᑎ ᓴᖅᑭᑎᑦᑎᓯᒪᔪᑦ ᐱᓇᓱᐊᕐᓂᑦᑎᓐᓂᒃ ᐃᓄᖕᓄᑦ ᐃᖅᑲᓇᐃᔭᕐᕕᒋᔭᐅᔪᒪᓛᖑᓗᑕ ᓄᓇᕗᒥᑦ ᐊᒻᒪᓗ ᑐᙵᕕᓪᓚᕆᐅᓪᓗᓂ ᒐᕙᒪᒃᑯᑦ ᐱᓇᓱᐊᒐᖏᓐᓄᑦ, ᑯᓱᒐᖅ ᐅᖃᓚᐅᕐᑐᖅ ᒥᓂᔅᑕᐅᓂᕐᒧᑦ ᐅᖃᓪᓚᒃᑎᓪᓗᒍ ᒫᑦᓯ 3-ᒥᑦ.
ᐅᑯᐊ ᑎᑎᖃᑦ ᐃᓚᖃᖅᑐᑦ ᐱᒋᐊᕈᑎᓪᓚᕆᖕᒥᑦ ᐃᓄᖕᓂ ᐃᖅᑲᓇᐃᔭᓕᖅᑎᑦᑎᓂᕐᒧᑦ ᐸᕐᓇᐅᑎᓂᒃ ᑕᒪᐃᓐᓄ ᐊᑐᓂ ᐱᓕᕆᕝᕕᒋᔭᐅᔪᓂᒃ ᒐᕙᒪᒃᑯᓐᓂᒃ ᐊᒻᒪᓗ ᓄᓇᕗᑦ ᓯᓚᑦᑐᕐᓴᖅᕕᒃᒧᑦ, ᓄᓇᕗᑦ ᐃᒡᓗᓕᕆᔨᕐᔪᐊᓄᑦ ᐊᒻᒪᓗ ᖁᓪᓗᖅ ᐆᒻᒪᖁᑎᓕᕆᔨᒃᑯᓐᓄᑦ.
ᐅᑯᐊ ᓄᓇᕗᑦ ᒐᕙᒪᒃᑯ ᑲᑎᕐᓱᐃᓯᒪᓕᕋᓗᐊᖅᖢᑎᒃ ᑕᐃᒪᐃᑦᑐᓄᑦ ᐸᕐᓇᐅᓂᒃ ᐊᕐᕌᒍᒐᓴᐅᓕᕐᑐᓂᒃ, ᐅᓇ ᓯᕗᓪᓕᖅᐹᖅ ᓄᓇᕗᑦ ᒐᕙᒪᒃᑯᑦ ᐋᖅᑭᒃᓯᓚᐅᕐᑐᑦ ᐊᑐᓂ ᐱᓕᕆᕝᕕᐅᔪᑦ ᖃᔅᓯᓂᒃ ᐃᓄᖕᓂ ᐃᖅᑲᓇᐃᔭᖅᑎᖃᕆᐊᖃᕐᓂᖏᓐᓂᒃ.
ᓄᓇᕗᑦ ᒐᕙᒪᒃᑯ ᑐᕌᒐᖓ ᐱᓕᕆᐊᖃᕈᒪᔪᑦ ᓱᒃᑲᐃᑦᑐᒥᑦ ᐱᓕᕆᐊᖑᕙᓪᓕᐊᓗᑎᒃ ᐃᓄᐃᑦ ᐃᖅᑲᓇᐃᔭᕆᐅᖃᕐᓂᖓᓄᑦ ᑕᒪᓐᓇ ᑭᓯᐊᓂ ᑎᑭᐅᑎᒃᐸᑦ ᐃᓄᐃᑦ ᐅᓄᕐᓂᖏᓐᓄᑦ ᐋᖅᑭᒃᓯᒪᓂᕐᒧᑦ—ᒫᓂ 85 ᐳᓴᓐᑎᖏᓐᓄᑦ.
85 ᐳᓴᓐᑎᖏ ᑎᑭᒐᓱᒡᓗᒍ ᐊᑯᓂᕈᓘᓂᐊᕐᑐᖅ
ᑭᓯᐊᓂᓕ ᐅᖃᓚᐅᕐᑐᑦ ᐊᕐᕌᒍᒐᓴᖕᓂ ᑭᓯᐊᓂ ᑕᐃᒪᐃᓕᕋᔭᕐᓂᖓᓂᒃ.
“ᐃᓱᒪᔪᒍ ᐱᓕᕆᕙᓪᓕᐊᓂᖅ ᐃᓄᖕᓂ ᑭᒡᒐᖅᑐᐃᔨᖃᕐᓂᕐᓴᐅᓕᕋᓱᖕᓂ ᐊᑯᓂᕈᓗᒃ ᐱᓕᕆᐊᖑᓂᐊᕐᓂᖓᓂᒃ,” ᓄᓇᕗᑦ ᒐᕙᒪᒃᑯᑦ ᐸᕐᓇᐅᑎᓪᓚᕆᖏᑦ ᐅᖃᕐᓯᓗᒪᔪᑦ.
“ᐊᕐᕌᒍᒐᓴᖕᓂ ᑭᓯᐊᓂ ᓈᒻᒪᒃᑐᓂ ᓄᓇᕗᑦ ᐃᓄᖏ ᐃᓕᓐᓂᐊᕈᓐᓇᓯᓇᔭᖅᑐᑦ ᐃᖅᑲᓇᐃᔮᓪᓚᕆᖕᓄᑦ ᐊᔪᕈᓐᓃᕐᓯᒪᓪᓚᕆᖕᓂᕐᒨᖓᔪᓄᑦ ᑖᒃᑯᐊᓗ ᓄᓇᕗᑦ ᒐᕙᒪᒃᑯᑦ ᐃᓂᒃᓴᖃᐅᖅᖢᑎᒃ ᑕᒪᒃᑯᓄᖓ, ᓲᕐᓗ ᒪᑯᓂᖓ ᐃᓕᓐᓂᐊᖅᑎᑦᑎᓂᕐᒧᑦ ᐅᕝᕙᓘᓐᓃᑦ ᐋᓐᓂᐊᕐᓯᐅᖅᑎᐅᔪᓐᓇᕐᓂᕐᒧᑦ.”
ᑕᒪᓐᓇ ᑕᐃᒪᐃᑦᑐᖅ ᐃᖅᑲᓇᐃᔮᓄᑦ ᖃᐅᔨᓴᕈᑎᒋᔭᖏ ᓴᖅᑭᑎᑦᑎᓯᒪᖕᒪᑦ ᐃᓄᐃᑦ ᐃᖅᑲᓇᐃᔭᖅᑐᑦ ᓄᓇᕗᑦ ᒐᕙᒪᒃᑯᓐᓄᑦ ᐊᑦᑎᓛᖑᓂᖏᓐᓂᒃ ᐃᒪᐃᑦᑕᕆᐊᖃᕐᓂᖓᓄᑦ—ᒪᓕᒐᖅᑎᒍᑦ—ᓯᓚᑦᑐᕐᓴᕐᕕᐊᓗᖕᒥᑦ ᐸᐃᑉᐹᖅᑖᕐᓯᒪᓗᑎᒃ ᐊᒻᒪ ᐃᖅᑲᓇᐃᔮᒥᑦ ᐱᓕᕆᐊᖃᓕᒪᓗᓂ.
ᑕᒪᒃᑯᐊᓕ ᐱᖁᔭᖅᑎᒍᑦ ᐊᔪᕈᓐᓃᕐᓯᒪᓂᕐᓯᒪᓂᕐᒧᒋᐊᓕᖕᓄᑦ ᒪᑯᑎᑐᓇᖅ ᐋᓐᓂᐊᓯᐅᕐᑎᐅᓂᕐᒧᑦ, ᐱᓕᕆᔾᔪᑎᒃᓴᓕᕆᓂᕐᒧᑦ ᐊᒻᒪ ᐃᓕᓴᐃᓂᕐᒧᑦ.
ᑖᒃᑯᓇᓂᓗ, ᐱᕈᖅᐸᓪᓕᐊᒍᑎᐅᙱᓛᖑᔪᖅ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᖏᓐᓄᑦ ᐅᕘᓇ ᐋᓐᓂᐊᖃᖅᑕᐃᓕᓂᕐᒧᑦ ᐱᓕᕆᐊᓄᑦ.
ᐸᕐᓇᐅᑎᓪᓚᕆᒋᔭᐅᔪᑦ ᐅᖃᕐᓯᒪᔪᑦ ᐊᕐᕌᒍᓂ ᖃᓂᓐᓂᕐᓴᓂᒃ ᐅᓄᕐᓂᕐᓴᐃᑦ ᐃᓄᐃᑦ ᓄᓇᕗᒥᑦ ᐃᓕᓐᓂᐊᕐᓯᒪᓂᕐᓴᐅᓕᕐᓂᖏᓐᓂᒃ, ᑭᓯᐊᓂᓕ ᓱᓕ ᓱᒃᑲᐃᓗᐊᖅᖢᑎᒃ.
“ᐃᓕᓐᓂᐊᕐᓂᒃᑯᑦ ᓄᓇᕗᒥᑦ ᐃᓄᐃᑦ ᖁᕝᕙᖅᐸᓪᓕᐊᔪᑦ, ᑭᓯᐊᓂᓕ, ᐃᓄᐃᑦ ᐃᓕᓐᓂᐊᕌᓂᒃᓯᒪᔪᑦ ᐃᓕᓐᓂᐊᕐᕕᐊᓘᑉ ᐅᖓᑖᓄᑦ ᓱᓕ ᓈᒻᒪᙱᓗᐊᕐᒪᑕ ᐱᔭᐅᓯᒪᔭᕆᐊᖃᖅᑐᓂᒃ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᐊᓯᖏᓐᓂᒃ ᐃᖅᑲᓇᐃᔭᖅᑎᑦᑎᔨᐅᔪᓂᒃ ᓄᓇᕗᒥᑦ.”
ᐱᓕᕆᕝᕕᐅᕙᓪᓕᐊᓛᖑᔪᓪᓕ ᐃᖅᑲᓇᐃᔮᒃᓴᑦ ᐊᔪᕈᓐᓃᕐᓴᕐᓇᖅᑐᑦ ᐃᖅᑲᓇᐃᔭᓯᓐᓈᑦ ᐃᓕᓐᓂᐊᒃᑲᓐᓂᕐᓯᒪᙱᒃᑲᓗᐊᕐᓗᓂ ᐅᕝᕙᓘᓐᓃᑦ ᐃᓕᓐᓂᐊᒃᑲᓐᓂᓗᐊᕆᐊᖃᕐᓇᙱᑦᑐᓂᒃ.
“ᐊᒥᓱᑦ ᐃᖅᑲᓇᐃᔮᒃᓴᑦ ᐃᓕᓐᓂᐊᕌᓂᑐᐊᕐᓗᓂ ᐃᖅᑲᓇᐃᔮᖑᔪᓐᓇᕐᒪᑕ ᐅᕝᕙᓘᓐᓃᑦ ᐃᓕᓐᓂᐊᕐᓯᒪᓪᓚᕆᙱᒃᑲᓗᐊᕐᓗᓂ,” ᐸᕐᓇᐅᑎᑦ ᐅᖃᕐᓯᒪᔪᑦ.
ᐃᓄᐃᑦ ᐃᖅᑲᓇᐃᔭᖅᑐᑦ ᐅᓄᕐᓂᕐᓴᑦ ᐃᖃᓗᐃᑦ ᓯᓚᑖᓂ
ᐊᒻᒪᓗ ᐃᓄᐃᑦ ᐃᖅᑲᓇᐃᔭᖅᑐᑦᐅᓄᕐᓂᕐᓴᐅᓪᓗᑎᒃ ᐃᖃᓗᐃᑦ ᓯᓚᑖᓃᑦᑐᓂᒃ ᓄᓇᓕᖕᓂᑦ.
“ᐅᕙᙵᑦ ᓯᑎᐱᕆ 2019-ᒥᑦ, ᐃᓄᐃᑦ ᐃᖅᑲᓇᐃᔭᖅᑐᑦ 70 ᐳᓴᓐᑎᒧ ᑎᑭᓯᒪᓚᐅᕐᑐᑦ ᐅᖓᑖᓄᓪᓘᓐᓃᑦ ᓇᑉᐸᓪᓗᐊᖏᓐᓂᒃ ᓄᓇᓕᓕᒫᓂᒃ. ᐃᓄᐃᑦ ᐃᖅᑲᓇᐃᔭᖅᑐᑦ 34 ᐳᓴᓐᑎᖏᓐᓃᑦᑐᑦ ᐃᖃᓗᖕᓂᑦ,” ᐅᓂᒃᑳᑦ ᐅᖃᕐᓯᒪᔪᑦ.
ᐊᑕᐅᓯᕐᓕ ᐊᒃᑕᐃᒍᑎᐅᔪᖅ ᐃᓄᐃᑦ ᐃᖅᑲᓇᐃᔭᕈᓐᓇᕐᓂᖏᓐᓄᑦ ᐅᓇ ᐊᐅᓪᓚᖃᑦᑕᕆᐊᖃᕐᓂᖅ—ᐱᔪᒪᖃᑦᑕᕐᓂᖅ ᐅᕝᕙᓘᓐᓃᑦ ᐊᔪᖏᓐᓂᖅ ᐊᓯᐊᓄᑦ ᓄᓇᓕᖕᓄᑦ ᓄᒃᑎᕆᐊᒃᓴᖅ ᐃᖅᑲᓇᐃᔮᒧᑦ. ᓄᓇᕗᒥᑦ, ᐅᓄᕐᓂᕐᓴᐃᑦ ᐃᓄᐃᑦ ᐊᐅᓪᓚᖃᑦᑕᙱᒻᒪᑕ ᐃᖅᑲᓇᐃᔭᕆᐊᖅᖢᑎᒃ.
“2011-ᓗ 2016-ᓗ ᐊᑯᓐᓂᖓᓂᒃ 93 ᐳᓴᓐᑎᐅᔪᑦ ᐃᓄᐃᑦ ᓄᓇᕗᒥᑦ ᓄᒃᑎᓚᐅᙱᑦᑐᑦ ᓄᓇᖏᓐᓂᒃ. ᐃᓄᐃᑦ ᐃᖅᑲᓇᐃᔭᖅᑐᓂᒃ ᓄᓇᕗᑦ ᒐᕙᒪᒃᑯᓐᓄᑎ ᓄᓇᖃᖅᑐᑦ ᓄᓇᕗᒥᑦ, 81 ᐳᓴᓐᑎᐅᔪᑦ ᓄᓇᖏᓐᓂᒃ ᐃᖅᑲᓇᐃᔭᖃᑦᑕᖅᑐᑦ ᐊᒻᒪ ᑖᒃᑯᓇᙵᑦ 81 ᐳᓴᓐᑎᐅᔪᑦ ᓄᒃᑎᓚᐅᕐᓯᒪᙱᑦᑐᑦ ᒐᕙᒪᒃᑯᑦ ᐃᖅᑲᓇᐃᔮᖏᓐᓄᑦ.”
ᓄᑖᖅᑕᖃᙱᑦᑐᑦ ᐅᕙᓂ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᖏᓐᓄᑦ ᐸᕐᓇᐅᑎᓂᒃ
ᓄᑖᖅᑕᖃᙱᑦᑐᖅ ᖃᓄᐃᓕᐅᕈᑎᐅᓇᔭᖅᑐᓂᒃ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᖏᓐᓄᑦ ᐸᕐᓇᐅᑎᓂᒃ, ᑖᓐᓇᓗ ᐅᖃᐅᓯᖅ “IEPs”-ᓂᒃ ᐅᖃᐅᓯᐅᕙᒃᖢᓂ ᒪᓕᒐᓕᕆᔨᐸᓗᖕᓄᑦ.
ᓄᓇᕗᑦ ᒐᕙᒪᒃᑯᑦ ᐱᓕᕆᐊᖃᖅᑐᑦ ᑖᒃᑯᓂᖓ ᑕᐃᒪᙵᓂ 1999-ᒥᑦ, ᐊᒻᒪᓗ ᓄᓇᕗᒥᑦ ᐊᑐᓕᖅᑎᑦᑎᓂᕐᒧᑦ ᑲᒥᓴᓐᑯᑦ ᐸᕐᓇᐃᓚᐅᕐᓯᒪᔪᑦ ᐃᓄᐃᑦ ᐃᖅᑲᓇᐃᔭᓕᖅᑎᑕᐅᓂᒃᓴᖏᓐᓂᒃ ᐊᒻᒪ ᐊᔪᕈᓐᓃᕐᓴᕈᑎᓄᑦ ᐸᕐᓇᐅᑎᓂᒃ ᓄᓇᕗᑦ ᐱᒋᐊᓚᐅᕐᓯᒪᑎᓐᓇᒍ.
ᓄᓇᕗᒥᑦ ᐊᑐᓕᖅᑎᑦᑎᓂᕐᒧᑦ ᑲᒥᓴᓐᑯᑦ ᐱᓕᕆᓂᖓ ᓅᑎᑦᑎᒍᑎᐅᓚᐅᕐᓯᒪᔪᖅ 789 ᐃᓄᖕᓂ ᐃᖅᑲᓇᐃᔭᖅᑐᓂᒃ ᓄᓇᑦᓯᐊᕐᒧᑦ ᐅᕗᖓ ᓄᓇᕗᑦ ᒐᕙᒪᒃᑯᓐᓄᑦ 1999 ᓯᕗᓂᐊᒍᑦ, ᐊᒻᒪᓗ ᐃᖅᑲᓇᐃᔭᖅᑎᑦᑎᓕᖅᖢᑎᒃ 41-ᓂᒃ ᐃᓄᖕᓂ ᐅᕙᓂ ᑲᒥᓯᓇᐅᑲᐃᓐᓇᖅᑑᑉ ᑎᑎᕋᕐᕕᖓᓂᒃ, ᑖᒃᑯᐊᓕ ᓅᑎᑦᑎᕙᓪᓕᐊᓂᕐᒧᑦ ᐱᓕᕆᐊᖃᓚᐅᕐᓯᒪᔪᑦ 1997-ᒥᑦ 1999-ᒧᑦ.
ᐅᓇ ᓴᖅᑭᑎᑦᑎᒍᑎᐅᓚᐅᕐᓯᒪᔪᖅ ᐃᓄᐃᑦ ᐃᖅᑲᓇᐃᔭᓕᕐᓂᖏᓐᓂᒃ ᒫᓃᖢᑎᒃ 44 ᐳᓴᓐᑎᖏᓐᓂᒃ ᐱᒋᐊᓕᓵᖅᑐᓄᑦ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪᓗ ᑖᒃᑯᐊ ᐅᓄᕐᓯᕚᓪᓕᓚᐅᕐᓯᒪᓪᓗᑎᒃ 52 ᐳᓴᓐᑎᒧᑦ 2009-ᒥᑦ ᐊᒻᒪ ᑲᑕᒃᑲᓐᓂᕐᖢᑎᒃ 50 ᐳᓴᓐᑎᒧᑦ 2012-ᒥᑦ, ᐊᒻᒪᓗ ᑕᒫᓃᖏᓐᓇᓕᖅᖢᑎᒃ ᒫᓐᓇᒧᑦ.
ᑭᖑᓂᐊᒍᓪᓕ, ᐃᓄᐃᑦ ᐃᖅᑲᓇᐃᔭᖅᑐᑦ ᓄᓇᕗᑦ ᒐᕙᒪᒃᑯᓐᓄᑦ 918-ᖑᓚᐅᕐᑐᑦ ᒫᑦᓯ 2000-ᒥᑦ ᐊᒻᒪᓗ 1,843-ᖑᓕᕐᖢᑎᒃ ᑎᓯᐱᕆ 2019-ᒥᑦ.
ᑭᓯᐊᓂᑦᑕᐅᖅ ᒐᕙᒪᒃᑯᑦ ᐊᖏᓂᖓ ᐱᕈᓚᐅᕐᒥᔪᖅ, ᑕᐃᒪᓕ ᐃᓄᐃᑦ ᐃᖅᑲᓇᐃᔭᕐᓂᖏᑦ 50 ᐳᓴᓐᑎᒦᓯᒪᕗᑦ 2012-ᒥ ᐱᒋᐊᖅᖢᓂ.
ᒫᓐᓇᐅᔪᖅ ᐃᖅᑲᓇᐃᔭᖅᑎᑦᑎᓂᕐᒧᑦ ᐸᕐᓇᐅᑎᑦ ᓴᖅᑭᓕᕐᒥᔪᑦ ᓲᖃᐃᒻᒪ 2015-ᒥᑦ ᓄᓇᕗᒧᑦ ᐊᖏᕈᑎᑦ ᐋᖅᑭᒍᑎᐅᓚᐅᕐᓯᒪᖕᒪᑦ ᐱᓕᐊᓐ ᑖᓚᑐᖅᑐᓂᒃ ᐃᖃᖅᑐᐃᕕᒃᑰᖅᑎᑦᑎᒍᑎᓂᒃ ᓄᓇᕗᑦ ᑐᙵᕕᒃᑯᑦ ᐱᒋᐊᓚᐅᕐᓯᒪᔭᖏᓐᓂᒃ 2006-ᒥᑦ.
ᐅᓇ ᐊᖏᕈᑎ ᐅᖃᕐᓯᒪᓚᐅᕐᒪᑦ ᐋᑐᕚᒥᐅᑦ ᓈᒻᒪᒃᑐᒥᑦ ᓄᓇᕗᒥᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓂᒃ ᖃᐅᔨᓴᖁᔭᐅᓪᓗᑎᒃ, ᑖᓐᓇᓗ ᐋᖅᑭᒃᓱᐃᒍᑎᐅᓕᓚᐅᕐᓯᒪᓪᓗᓂ ᐊᑐᓂ ᐱᓕᕆᕝᕕᐅᔪᑦ ᐸᕐᓇᐅᑎᖏᓐᓂᒃ ᓴᖅᑭᑕᐅᓚᐅᕐᑐᓂᒃ ᒫᑦᓯ 3-ᒥᑦ.
“2015 ᐊᖏᕈᑎᑦ ᓯᕗᓂᐊᓂᒃ, ᑎᑎᕋᕐᓯᒪᔪᖅᑕᖃᑦᑎᐊᓚᐅᙱᒻᒪᑦ ᓄᓇᕗᒥᑦ ᐃᖅᑲᓇᐃᔭᖅᑐᓂᒃ ᓇᓗᓇᐃᔭᕐᓯᒪᔪᓂᒃ ᐊᓯᖏᓐᓂᒃ ᐅᑯᐊ ᑲᓇᑕᒥ ᓇᐃᓴᐃᔩᑦ ᑎᑎᕋᕐᓯᒪᕙᒃᑕᖏᓐᓂᒃ,” ᐃᖅᑲᓇᐃᔭᓕᖅᑎᑦᑎᓂᕐᒧᑦ ᐸᕐᓇᐅᑎᑦ ᐅᖃᕐᓯᒪᖕᒥᔪᑦ.
(0) Comments