ᐃᓄᒃᑎᑐᑦ Sep 4, 2019 – 2:30 pm EDT

ᓄᓇᕗᑦ ᒐᕙᒪᖓᑦ ᑐᓂᓯᕗᖅ ᐋᓐᓂᐊᕐᕕᓕᐊᕐᓂᕐᒧᑦ, ᐱᓕᕆᐊᒧᑦ, ᐱᖁᑎᓄᑦ ᐱᓕᕆᐊᖃᕐᓂᐊᕐᓂᒥᒃ ᑲᑎᓯᒪᓕᖅᑐᓄᑦ ᖃᖓᑕᓲᓄᑦ

ᓵᓚᒃᓴᖅᑐᑦ $100 ᒥᓕᐊᓐᑖᓚᑐᖅᑐᒥᑦ ᐅᑯᐊ ᑳᒻ ᐃᐅ ᐊᒻᒪ ᑲᓃᑎᐊᓐ ᓄᐊᑦ

ᒪᓕᒋᐊᓕᒃᑎᒍᑦ ᓄᑖᒥ ᐱᓕᕆᑎᑦᑎᓂᐅᓕᖅᑐᒥᓐ ᓄᓇᕗᑦ ᒐᕙᒪᒃᑯᓐᓂ ᐋᓐᓂᐊᕐᕕᓕᐊᕐᓂᕐᒧᑦ ᐊᒻᒪ ᐱᓕᕆᐊᒧᑦ ᐊᐅᓪᓚᕈᑎᓄᑦ, ᐊᒻᒪᓗ ᖃᖓᑕᓲᒃᑯᑦ ᐅᓯᔭᒃᓴᓄᑦ, ᑲᓃᑎᐊᓐ ᓄᐊᑦ ᐱᔨᑦᑎᕋᖃᑦᑕᕐᓂᐊᖅᑐᖅ ᕿᑭᖅᑖᓗᒃᒥᑦ ᐊᒻᒪ ᕿᑎᕐᒥᐅᓂᒃ ᐊᒻᒪᓗ ᐃᖃᓗᐃᑦ-ᐋᑐᕚᒨᖃᑦᑕᕐᓂᖅ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

By ᔭᐃᓐ ᔪᐊᔾ

For an English version of this story, see Nunavut government awards medical, duty cargo contract to merged airline

ᒪᕐᕉᒃ ᖃᖓᑕᓲᓕᕆᔩᑦ ᑐᓂᔭᐅᕘᒃ ᓄᓇᕗᑦ ᒐᕙᒪᒃᑯᑦ ᓄᑖᖅ ᐊᖏᕈᑎᒋᓕᖅᑕᖏᓐᓂᑦ ᐋᓐᓂᐊᕐᕕᓕᐊᕐᓂᕐᒧᑦ ᐊᒻᒪ ᐱᓕᕆᐊᒧᑦ ᑲᒪᒋᔭᖃᕐᓂᕐᒥ, ᐊᒻᒪᓗ ᐅᓯᖃᑦᑕᕈᓐᓇᕐᓂᕐᒧᑦ ᐱᖁᑎᓂᒃ: ᑳᒻ ᐃᐅ ᐃᓐᑐᓈᓴᓄᓪ LP ᐊᒻᒪ ᑲᓃᑎᐊᓐ ᓄᐊᑦ ᐃᖕᒃ., ᒫᓐᓇ ᑲᑎᖃᑎᖃᓕᖅᑐᖅ ᕘᔅᑦ ᐃᐅᑯᓐᓂ.

ᓄᓇᕗᑦ ᒐᕙᒪᒃᑯᑦ ᑐᓴᖅᑎᑦᑎᓚᐅᕐᐳᑦ ᐱᓕᕆᑎᑦᑎᓂᕐᒧᑦ ᑐᓂᓯᓚᐅᕐᓂᖏᓐᓂᒃ, ᐊᑭᖃᓪᓗᐊᖅᑐᒥ ᒫᓂ $100 ᒥᓕᐊᓐ ᑖᓚᓂᒃ ᑲᑎᖢᑎᒃ, ᑕᓪᓕᕐᒥᐅᓚᐅᕐᑐᒥᓐ, ᐋᒐᓯ 23, ᐱᓇᓱᐊᕈᓯᕐᒥ ᓄᖑᓐᓂᐊᓵᕐᓂᐊᕐᓂᖏᓐᓂᒃ ᐱᓕᕆᑎᑦᑎᓂᐅᓂᑯᑦ.

ᐱᓕᕆᑎᑦᑎᓂᐅᔪᑦ ᑕᑭᑎᒋᓂᖃᖅᑐᑦ ᐊᕐᕌᒍᓂ ᐱᖓᓱᓂᒃ ᒪᕐᔭᕉᖕᓂ ᓄᑖᙳᕆᐅᕈᑎᖃᕈᓐᓇᖅᖢᑎᒃ, ᐊᕐᕌᒎᖕᓄ ᒪᕐᕉᖕᓄᑦ, ᐊᒻᒪ ᐊᑕᐅᓯᕐᒧᑦ ᐊᕐᕌᒍᒧ.

“ᑲᑎᖢᑎᒃ ᐊᑯᓂᐅᑎᒋᓇᔭᖅᑐᖅ ᐆᒥᖓ ᐃᓕᕆᑎᑦᑎᓂᕐᒥᒃ 6 (3+2+1=6) ᐊᕐᕌᒍᐃᑦ,” ᓄᓇᕗᑦ ᒐᕙᒪᒃᑯᑦ ᓇᓗᓇᐃᓚᐅᕐᑐᑦ ᑐᓴᖅᑎᑦᑎᑎᓪᓗᒋᑦ ᐱᓕᕆᓂᐊᖅᑐᒥᑦ.

ᐱᔪᒪᓂᖅ ᑐᒃᓯᕋᐅᑎᓂ ᓴᖅᑭᑕᐅᓚᐅᕐᑎᓪᓗᒍ ᔭᓄᐊᕆᐅᓚᐅᕐᑐᒥᓐ, ᓄᓇᕗᑦ ᒐᕙᒪᒃᑯᑦ ᐊᑭᑦᑐᕋᐅᑎᒍᑎᓂᒃ ᐃᓚᐅᕐᓯᒪᔪᑦ ᐳᕌᑦᓕ ᐃᐅᑯᓐᓂᒃ ᐊᒻᒪ ᕘᔅᑦ ᐃᐅ, ᑳᒻ ᐃᐅ ᐃᓐᑐᓈᓴᓄᓪ, ᑲᓃᑎᐊᓐ ᓄᐊᑦ ᐊᒻᒪ ᓄᐊᑦ ᓯᑖ ᐃᐅ, ᓄᓇᕗᑦ ᒐᕙᒪᒃᑯᑦ ᐅᖃᓚᐅᕐᑐᑦ ᐋᒐᓯ 23-ᒥ.

ᐱᓕᕆᑎᑦᑎᓂᒃᑯᓪᓕ, ᑳᒻ ᐃᐅ ᖃᖓᑕᕙᒃᑐᓂᒃ ᑭᕙᓪᓕᕐᒧᑦ ᐊᒻᒪ ᑭᕙᓪᓕᕐᒥ ᐱᔨᑦᑎᕋᕐᓂᐊᖅᑐᑦ, ᐃᓚᐅᓪᓗᑎᒃ ᑲᖏᖅᖠᓂᖅ, ᐅᐃᓂᐱᒡ ᐊᒻᒪ ᓴᓂᑭᓗᐊᖅ.

ᑲᓃᑎᐊᓐ ᓄᐊᑦ ᐱᔨᑦᑎᕋᕐᓂᐊᕐᑐᖅ ᕿᑭᖅᑖᓗᒃᒥᐅᓂᒃ ᐊᒻᒪ ᕿᑎᕐᒥᐅᓂᒃ, ᐊᒻᒪᓗ ᐅᑯᓂᖓ: ᐃᖃᓗᐃᑦ-ᐋᑐᕚ ᐊᒻᒪ ᐃᖃᓗᐃᑦ-ᑲᖏᖅᖠᓂᖅ-ᔭᓗᓇᐃ-ᐊᑦᒪᓐᑕᓐ.

ᑕᐃᒪᙵᑦ ᐱᔪᒪᔾᔪᑎᑦ ᑐᒃᓯᕋᐅᑎᓂᒃ ᐱᔭᐅᓚᐅᖅᑎᓪᓗᒋᑦ, ᑲᓃᑎᐊᓐ ᓄᐊᑦ ᐊᒻᒪ ᕘᔅ ᐃᐅ ᑲᔪᓯᓚᐅᕐᐳᑦ ᑲᑎᓐᓂᕐᒥᒃ, ᑲᓇᑕᒥ ᐃᖏᕐᕋᔾᔪᑎᓕᕆᔨᒃᑯᓐᓄᑦ ᐊᖏᖅᑕᐅᓚᐅᕐᓯᒪᓪᓗᑎᒃ ᔫᓂᐅᓚᐅᕐᑐᒥᓐ.

ᑲᑎᓯᒪᓕᖅᑑᒃ ᖃᖓᑕᓲᒃ ᐊᑎᖃᖅᑎᑕᐅᓂᐊᖅᑐᑦ ᑲᓃᑎᐊᓐ ᓄᐊᑦᒥ, ᑭᓯᐊᓂ ᕘᔅᑦ ᐃᐅ ᑕᕐᓴᖓᓄ ᐃᓄᓱᒐᙳᐊᕐᒥ ᑕᕐᓴᖃᕐᓂᐊᖅᖢᑎᒃ.

“ᑲᓃᑎᐊᓐ ᓄᐊᑦ ᑐᓂᔭᐅᓚᐅᕐᒪᑦ ᐱᓕᕆᔾᔪᑎᒃᓴᐃᑦ ᐃᓚᖓᓄᑦ ᒪᐅᖓ ᕿᑭᖅᑕᓂ ᐊᒻᒪ ᕿᑎᕐᒥᐅᓂᒃ ᐊᑭᑦᑐᕋᐅᑎᓕᕆᓂᒻᒪᕆᒃᑯᑦ,” ᕘᔅᑦ ᐃᐅᑯᓐᓂ ᐅᖃᖅᑐᖃᓚᐅᕐᑐᖅ, ᓇᒡᓯᐅᔾᔭᐅᔪᒥᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᑭᒡᒐᖅᑐᐃᔪᒥ ᑲᑎᒪᓯᓕᖅᑑᖕᓂᒃ ᖃᖓᑕᓲᓕᕆᔨᓂᒃ.

“ᖁᕕᐊᓱᒃᐳᒍᑦ ᐱᔨᑦᑎᕋᕈᓐᓇᕐᓂᐊᕐᓂᑦᑎᓐᓂ ᑲᑎᓯᒪᓕᕐᓗᑕ, ᓈᒻᒪᖕᓂᕐᓴᐅᓕᕐᑎᓪᓗᒍ ᐱᐅᓂᖅᐹᒃᑯᑦ ᐱᔨᑦᑎᕋᕈᑎ ᓄᓇᕗᑦ ᒐᕙᒪᒃᑯᓐᓄᑦ ᐊᒻᒪᓗ ᓄᓇᓕᖕᓂ ᕿᑭᖅᑕᓂ ᐊᒻᒪ ᕿᑎᕐᒥᐅᓃᑦᑐᓂᒃ.”

ᐱᓕᕆᑎᑦᑎᓂᐅᔪᑦ ᐃᓚᖃᕐᒥᔪᑦ ᑭᒃᑯᑐᐃᓐᓇᕐᓂ ᐃᖏᕐᕋᔪᒪᔪᓅᖓᔪᓂᒃ, ᑖᒃᑯᓂᖓ ᖃᖓᑕᓲᓕᕆᔨᓂᒃ ᐳᓴᓐᑎᑎᒍᑦ ᐃᒃᓯᕙᐅᑕᒃᓴᓂ ᐊᑐᐃᓐᓇᐅᑎᑦᑎᕙᒡᓗᑎᒃ ᑭᒃᑯᑐᐃᓐᓇᕐᓄᑦ ᐊᑭᖃᖅᑐᓂᒃ ᐃᑭᒪᓂᕐᒧᑦ.