ᓄᓇᕗᑦ ᒐᕙᒪᖓ ᐱᓕᕆᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᓯᙳᖅᑎᑦᑎᓂᕐᒥᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᖅᒥᑦ

For an English version of this story, see Nunavut government will work with Inuit orgs on changes to Indigenous languages bill

ᓄᓇᕗᑦ ᒐᕙᒪᒃᑯᑦ ᐅᖃᖅᑐᑦ ᐱᓕᕆᖃᑎᖃᕐᓂᐊᕐᓂᖏᓐᓂᒃ ᐃᓄᐃᑦ ᑲᑐᔾᔨᖃᑎᒌᖏᒻᒥᒃ ᐋᑐᕚᒥᑦ ᑎᓕᐅᕆᒃᑲᓐᓂᕐᑎᓪᓗᒋᑦ ᐋᕿᒋᐊᕈᑎᒃᓴᓂᒃ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᖅᔪᐊᖏᓐᓂᒃ.

ᒐᕙᒪᑐᖃᒃᑯᑦ ᓕᐳᕈᓪ ᒐᕙᒪᖓ ᓴᕿᑎᑦᑎᓚᐅᕐᑐᑦ ᐊᑯᓂᐊᓗᒃ ᐅᑕᕿᔭᐅᔪᒥᒃ ᐱᖁᔭᕐᔪᐊᖅ C-91 ᕕᕝᕗᐊᕆ 5-ᒥ, ᐅᖃᐅᓯᐅᓯᒪᔪᖅ ᐱᓕᕆᖃᑎᒌᖕᓂᒃᑯᑦ ᓄᓇᖃᖅᑳᖅᑐᓂᒃ ᐱᕙᓪᓕᐊᒍᑎᐅᓂᖓᓂᒃ.

ᑭᓯᐊᓂᓕ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᖅᑐᑦ ᓄᑖᖅ ᐱᖁᔭᖅ ᐅᖃᐅᓯᖃᙱᓐᓂᕋᖅᖢᒍ ᐃᓱᒫᓘᑎᓂᒃ ᓇᓗᓇᐃᕐᓯᒪᔭᖏᓐᓂᒃ; ᐱᓗᐊᕐᑐᒥ, ᐃᒻᒥᒃᑰᖓᔪᖅ ᐃᓚᒋᔭᐅᔪᒃᓴᖅ ᐱᔾᔪᑎᓕᒃ ᐃᓄᒃᑐᑦ ᐊᒻᒪ ᐃᓕᓴᕆᔭᐅᓯᒪᓗᓂ ᐃᓄᒃᑐᑦ ᐅᖃᐅᓯᒻᒪᕆᐅᓂᖓᓂ ᐃᓄᐃᑦ ᓄᓇᖓᓂ.

ᓄᓇᕗᑦ ᒐᕙᒪᒃᑯᑦ ᐱᔪᓐᓇᕐᓂᖏᓐᓂᒃ ᐊᑐᓚᐅᙱᒻᒪᑕ ᑖᔅᓱᒧᖓ ᓄᑖᒧᑦ ᐱᖁᔭᒃᓴᒧᑦ, ᑭᓯᐊᓂ ᐅᓇ ᐊᒡᒍᒧᑦ ᒪᓕᒐᓕᐅᕐᑎ ᐹᓪ ᖁᐊᓴ ᐊᐱᕆᖕᒪᑦ ᐱᖓᑦᓯᖅ, ᕕᕝᕗᐊᕆ 27-ᒥᑦ, ᐊᐱᕐᓱᕐᓇᐅᑎᓪᓗᒍ.

“ᑕᒪᓐᓇ ᒪᓕᒃᓯᒪᑎᒐᓱᒃᑲᑦᑎᒍᑦ ᖃᓄᖅ ᐅᕙᑦᑎᓐᓂ ᐊᒃᑐᐃᒍᑎᖃᓂᐊᕐᓂᖓᓄᑦ,” ᐅᖃᐅᓯᕐᓄᑦ ᒥᓂᔅ ᑕᐃᕕᑦ ᔪᐊᓇᓯ ᐅᖃᓚᐅᕐᑐᖅ ᒪᓕᒐᓕᕆᕕᒃᒦᑦᑐᓂᒃ.

“ᐊᑐᕐᓯᒪᒐᑦᑕ ᓄᓇᕗᑦ ᐱᖁᔭᕐᔪᐊᖏᓐᓂᒃ ᐅᖃᐅᓯᓕᕆᓂᕐᒧᑦ ᓇᓗᓇᐃᒃᑯᑎᒋᓪᓗᑎᒍᑦ ᒐᕙᒪᑐᖃᒃᑯᓐᓄᑦ ᐱᓕᕆᐊᖃᓕᕈᑎᒃ ᐱᖁᔭᕐᔪᐊᖅᒥᑦ ᓄᓇᖃᖅᑳᖅᑐᑦ ᐅᖃᐅᓯᖏᓐᓂᒃ,” ᐅᖃᖅᑐᖅ.

“ᐃᓄᒃᑎᑐᑦ ᐃᓚᓕᐅᔾᔭᐅᖁᒐᑦᑎᒍᑦ ᒪᓕᒐᕐᔪᐊᖅᒧᑦ ᐊᒻᒪᓗ ᐃᓱᒪᓪᓗᑕ ᐱᓕᕆᖃᑎᖃᕐᓂᐊᕐᓂᕐᒥᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᓄᒃᑎᑐᑦ ᐅᖃᐅᓯᖅ ᒪᓕᒐᕐᔪᐊᒃᑯᑦ ᐃᓕᓴᕆᔭᐅᓯᒪᓕᕐᓗᓂ ᒐᕙᒪᑐᖃᑯᓐᓂ.”

ᔪᐊᓇᓯ ᐅᖃᕐᒥᔪᖅ ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᕐᓂᐊᕈᒪᓂᖏᓐᓂᒃ ᓄᓇᕗᑦ ᑐᙵᕕᒃᑯᓐᓂ ᑖᓐᓇ ᐱᖁᔭᕐᔪᐊᖅ ᕿᒥᕐᕈᐊᖅᑕᐅᒃᑲᓐᓂᕐᑎᓪᓗᒍ.

ᖃᓄᐃᓕᖓᓂᐊᕐᓂᕐᒧᑦ ᐸᐃᑉᐹᓂᒃ ᓴᖅᑭᑕᐅᔪᓂᒃ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖓᑦ ᒐᕙᒪᑐᖃᒃᑯᓐᓄᑦ ᐅᖃᓚᐅᕐᑐᑦ ᐱᖁᔭᕐᔪᐊᖅ ᐃᓚᖃᕐᓗᓂ ᐋᑐᕚ ᐱᔭᕆᐊᖃᕐᓂᖏᓐᓂᒃ ᐃᑲᔫᑎᑖᖅᑎᑦᑎᖃᑦᑕᕐᓂᕐᒥᒃ ᐃᓄᒃᑐᑦ ᐱᓕᕆᐊᓄᑦ ᐃᓄᐃᑦ ᓄᓇᖓᓂᒃ, ᒪᐅᓇ ᐊᕐᕌᒍᒐᓴᖕᓄᑦ ᐃᑲᔫᑎᒃᓴᓄᑦ ᐊᖏᕈᑎᑎᒍᑦ ᐊᐅᓚᑕᐅᓗᓂ ᐊᕕᒃᑐᖅᓯᒪᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᓐᓂ.

ᐃᓄᐃᑦ ᑕᐱᕇᑦ ᑲᓇᑕᒥ ᓂᕆᐅᖕᒪᑕ ᑐᓂᔭᐅᖃᑦᑕᕋᔭᕐᓂᕐᒥᒃ ᐃᑲᔫᑎᒃᓴᓂᒃ ᐊᒻᒪ ᐊᑑᑎᒃᓴᖏᓐᓂᒃ ᒐᕙᒪᑐᖃᒃᑯᓐᓂ ᐃᓕᓴᕆᔭᐅᓯᒪᓂᖓᓄᑦ ᐅᖃᐅᓯᓪᓚᕆᐅᓂᖓᓂᒃ ᐅᓄᙱᓐᓂᕐᓴᓃᑦᑐᓄᑦ, ᐅᑯᑎᑐᓇᓯ ᖃᓪᓗᓈᑎᑐᑦ ᑯᐸᐃᒃᒥᑦ ᐅᕝᕙᓘᓐᓃᑦ ᐅᐃᕖᑐᑦ ᓄᓇᓕᖕᓂᑦ ᑯᐸᐃᒃ ᓯᓚᑖᓃᖑᑦᑐᓂᒃ.

ᒐᕙᒪᑐᖃᒃᑯᑦ ᐃᑦᑕᕐᓂᓴᓕᕆᓂᕐᒧᑦ ᒥᓂᔅᑕ ᐹᑉᓗ ᕋᑐᕇᒐᔅ ᐱᓕᕆᖃᑎᖃᕋᓱᒻᒪᕆᒃᑐᖅ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᓱᒫᓘᑎᖏᑦ ᐋᕿᒃᑕᐅᔪᓐᓇᖁᓪᓗᒋ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ ᐱᖁᔭᕐᔪᐊᖅᒥᑦ.

ᖃᓄᐃᓕᐅᕐᓂᖓᒍᓪᓕ, ᑲᑎᒪᔨᕋᓛᑦ ᑲᓇᑕᒥ ᐃᑦᑕᕐᓂᓴᓕᕆᓂᕐᒧᑦ ᐃᖅᑲᖅᑐᐃᕕᒃᑯᑦ ᑕᒪᑐᒥᖓ ᐱᖁᔭᕐᔪᐊᒃᓴᒥᑦ ᐱᓕᕆᐊᖃᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥᑦ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑲᑎᒪᔪᓄᑦ ᐅᖃᓪᓚᓚᐅᕐᑐᖅ ᐊᐃᑉᐹᓂ, ᕕᕝᕗᐊᕆ 26-ᒥᑦ, ᓴᕿᑎᑦᑎᒃᑲᓐᓂᖅᖢᓂ ᐃᑲᔫᑎᒃᓴᑎᒍᑦ ᓈᒻᒪᙱᓕᐅᕈᑎᓂᒃ ᐅᑯᑎᒎᓇᖅ ᐅᐃᕖᑐᑦ ᐊᒻᒪ ᐃᓄᒃᑐᑦ ᐅᖃᐅᓯᕐᓄᑦ ᓄᓇᕗᒥᑦ.

ᓄᓇᕗᓕᒫᒥᑦ, ᐅᐃᕖᑐᑦ ᐅᖃᐅᓯᕐᒧᑦ ᐱᓕᕆᐊᒃᓴᑦ ᐃᑲᔫᑎᑖᕈᑎᐅᕙᖕᒪᑕ 40 ᐳᓴᓐᑎᒥᑦ ᖁᑦᑎᖕᓂᕐᓴᒥᑦ ᐃᓄᒋᐊᑎᒍᑦ ᐃᓄᒃᑑᕐᓂᕐᒥᒡᓕ, ᑰᑦᑎᖅ ᐅᖃᖅᑐᖅ.

“ᖃᐃᕗᖓ ᐅᔾᔨᕐᓱᑦᑎᐊᕈᑎᒃᓴᖃᖅᖢᖓ—ᐃᓄᒃᑐᑦ ᐊᓯᐅᔨᔭᐅᓕᕐᒪᑦ. 1 ᐳᓴᓐᑎ ᐊᕐᕌᒍᒥᑦ ᓄᓇᕗᒥᑦ,” ᐅᖃᖅᑐᖅ ᑲᑎᒪᔪᓄᑦ.

“ᐱᒻᒪᕆᐊᓘᖕᒪᑦ ᐃᓄᐃᑦ ᐅᖃᐅᓯᖏᑦ ᐃᑲᔪᖅᑕᐅᔭᕆᐊᖃᕐᓂᖏᑦ ᐊᒻᒪ ᐃᑲᔫᑎᑖᕐᐸᒡᓗᑎᒃ ᓈᒻᒪᓈᕐᓯᒪᔪᓂᒃ ᐊᒻᒪ ᓇᓕᒧᒌᒍᑎᐅᔪᓐᓇᖅᑐᓂᒃ ᐃᓄᐃᑦ ᓄᓇᖓᓂ.”