ᓄᓇᕗᑦ ᒥᓂᔅᑕ ᐊᑎᓕᐅᕌᓂᒃᐳᖅ ᐊᑎᖏᓐᓂᒃ ᐊᓯᔾᔨᕈᒪᓯᒪᔪᓂᒃ ᒪᕐᕉᖕᓂ ᓄᓇᓕᖕᓄᑦ

ᒪᕐᕉᒃ ᓄᓇᕗᒥᑦ ᓄᓇᓖᒃ ᐊᑎᑐᖃᖏᓐᓂᒃ ᐊᑎᖅᑖᓪᓚᕆᖕᓂᐊᓕᕐᐴᒃ, ᓄᓇᕗᒥᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕᖓ ᑐᓴᖅᑎᑦᑎᓚᐅᕐᑐᖅ ᕕᕗᐊᕆ 27-ᒥᑦ.

ᖁᐊᓴ ᑯᓱᒐᖅ ᐅᖃᓚᐅᕐᑐᖅ ᒪᓕᒐᓕᕆᔨᕐᔪᐊᓄᑦ ᐊᑎᓕᐅᖃᐅᓂᖓᓂᒃ ᐅᓪᓛᖑᔪᖅ ᐅᑯᐊ ᑲᐃᑉ ᑐᐊᓴᑦ ᐊᑎᖓ ᐊᓯᙳᕐᓂᖓᓂᒃ ᐆᒧᖓ ᑭᙵᐃᑦ ᐊᒻᒪ ᕼᐋ ᐲᑦᔅ ᐊᓯᙳᕐᖢᓂ ᐆᒧᖓ ᓴᓂᕋᔭᒃ.

“ᖁᔭᓕᕗᖓ ᐱᕕᖃᖅᑎᑕᐅᓂᓐᓂᒃ ᐱᓕᕆᖃᑎᓐᓄᑦ ᐅᖃᕈᒪᓪᓗᖓ ᐅᓪᓛᒃᑲᓐᓂᐅᔪᖅ ᐊᑎᓕᐅᖃᐅᓂᓐᓂ ᑎᑎᖃᓂᒃ ᒪᕐᕉᖕᓄᑦ ᓄᓇᓖᖕᓄ ᓄᓇᕗᒥᑦ, ᐱᔪᓐᓇᕐᓯᑎᖢᒋ ᐊᑎᑐᖃᖏᓐᓂᒃ ᐊᑎᖃᕐᓂᐊᓕᕐᓗᑎᒃ,” ᑯᓱᒐᖅ ᐅᖃᓚᐅᕐᑐᖅ ᐸᑦᑕᒃᑐᖅᑕᐅᓪᓗᓂ ᒪᓕᒐᓕᐅᕐᑎᓄᑦ.

ᐅᕘᓇ ᓄᓇᕗᒥᑦ ᕼᐋᒻᒪᓚᒃᑯᑦ ᒪᓕᒐᕐᔪᐊᖓᒍᑦ, ᕼᐋᒻᒪᓚᒃᑯᓐᓄᑦ ᑲᑎᒪᔩᑦ ᑐᒃᓯᕋᐅᓯᐅᕈᓐᓇᕐᒪᑕ ᐊᑎᕐᒥ ᐊᓯᙳᖅᑎᑦᑎᔪᒪᓂᕐᒥ ᐆᒧᖓ ᒥᓂᔅᑕᒧᑦ ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂ ᐱᔨᑦᑎᕋᐅᑎᓕᕆᔨᓄᑦ.

ᑕᒪᐃᓐᓂ ᕼᐋ ᐲᑦᔅ ᐊᒻᒪ ᑲᐃᑉ ᑐᐊᓴᑦ ᓂᕈᐊᖅᑎᑦᑎᓚᐅᕐᓯᒪᖕᒪᑕ 2019 ᐅᑭᐅᖓᓂ ᐊᑎᑐᖃᖏᓐᓂᒃ ᐃᓄᒃᑐᑦ ᐊᑎᖃᕈᒪᓂᕐᒥ.

“ᒫᓐᓇᒥ ᐱᒋᐊᕐᓗᓂ, ᕼᐋ ᐲᑦᔅ ᑕᐃᔭᐅᖃᑦᑕᕐᓂᐊᓕᕐᑐᖅ ᓴᓂᕋᔭᒃ ᐊᒻᒪᓗ ᑲᐃᑉ ᑐᐊᓴᑦᖑᓂᕋᖅᑕᐅᓚᐅᕐᑐᖅ ᐅᓪᓛᕐᓂᑦ ᑕᐃᔭᐅᖃᑦᑕᕐᓂᐊᓕᕐᖢᓂ ᐃᒪᓐᓇ ᑭᙵᐃᑦ. ᐱᓕᕆᖃᑎᒃᑳ, ᖁᕕᐊᓱᖃᑎᒋᓚᐅᕐᓚᕗᑦ ᓄᓇᓖᑦ ᓴᓂᕋᔭᒃ ᐊᒻᒪ ᑭᙵᐃᑦ,” ᑯᓱᒐᖅ ᐅᖃᖅᑐᖅ.

ᔪᐃᓕ ᖃᐃᕐᓂᖅ, ᓴᓂᕋᔭᐅᑉ ᒪᓕᒐᓕᐅᕐᑎᖓ ᐅᖃᓪᓚᓚᐅᕐᓯᒪᖕᒪᑦ ᒪᓕᒐᓕᕆᕕᒡᔪᐊᒥ ᕕᕗᐊᕆ 20-ᒥᑦ ᐊᐱᕈᓪᓗᓂ ᑯᓱᒐᕐᒥ ᐊᑎᕐᒥ ᐊᓯᙳᖅᑎᑕᐅᓇᓱᒃᑐᖅ ᖃᓄᐃᑕᐅᓯᒪᓕᕐᒪᖔᑦ.

ᒫᓂ 41 ᐳᓴᓐᑎᐅᔪᑦ ᓂᕈᐊᓚᐅᕐᓯᒪᖕᒪᑕ ᐆᒥᖓ ᑭᙵᐃᑦ ᓂᕈᐊᕐᓇᖅᑎᓪᓗᒍ ᑕᐃᑲᓂ, ᐅᓇᓕ ᖃᐃᕐᓂᖅ ᐅᖃᖅᖢᓂ 2/3 ᓄᓇᓕᖕᓂᑦ ᓂᕈᐊᓚᐅᕐᓂᕋᕐᖢᓂᒋᑦ ᓴᓂᕋᔭᒃᒥᑦ.

ᓄᓇᕗᑦ ᑐᙵᕕᒃ ᑎᒥᖓ ᓄᓇᓕᖕᓂ ᓄᓇᕗᒦᑦᑐᓂᒃ ᖃᓪᓗᓈᑐᑦ ᐊᑎᖃᖅᑐᑦ ᐃᓱᒪᒃᓴᖅᓯᐅᖁᔨᓚᐅᕐᓯᒪᖕᒪᑕ ᐃᓄᒃᑐᑦ ᐊᑎᑐᖃᖏᓐᓂᒃ ᐅᑎᖅᑎᑦᑎᔪᒪᓇᔭᕆᐊᒃᓴᖏᓐᓂᒃ.

ᓄᓇᓖᑦ ᖃᓪᓗᓈᑐᑦ ᐊᑎᖃᖅᑐᑦ ᓱᓕ ᐅᑯᐊᖑᔪᑦ:

• Cambridge Bay (ᐃᖃᓗᒃᑑᑦᑎᐊᖅ)
• Gjoa Haven (ᐅᖅᓱᖅᑑᖅ)
• Baker Lake (ᖃᒪᓂᑦᑐᐊᖅ)
• Chesterfield Inlet (ᐃᒡᓗᓕᒑᕐᔪᒃ)
• Rankin Inlet (ᑲᖏᖅᖠᓂᖅ)
• Whale Cove (ᑎᑭᕋᕐᔪᐊᖅ)
• Coral Harbour (ᓴᓪᓕᖅ)
• Clyde River (ᑲᖏᖅᑐᒑᐱᒃ)
• Pond Inlet (ᒥᑦᑎᒪᑕᓕᒃ)
• Arctic Bay (ᐃᒃᐱᐊᕐᔪᒃ ᐅᕝᕙᓘᓐᓃᑦ ᑐᓄᓂᕈᓯᖅ)
• Grise Fiord (ᐊᐅᓱᐃᑦᑐᖅ)
• Resolute Bay (ᖃᐅᓱᐃᑦᑐᖅ)