ᓄᓇᕗᑦ ᓄᑖᒥᑦ ᓇᓄᕐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᖃᓕᕐᒪᑕ: ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ (NWMB)

“ᐱᓕᕆᓂᐊᕋᑦᑕ ᐊᔪᙱᑕᑦᑎᓐᓂᒃ ᑕᒪᓐᓇ ᑕᐃᒪᐃᓕᖓᓕᖁᓗᒍ ᓇᓐᓄᒐᓱᖕᓇᓚᐅᙱᓐᓂᖓᓂᒃ”

ᓄᓇᕗᒥᑦ ᓄᑖᖅ ᓇᓄᕐᓂ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ ᐋᖅᑭᒃᓯᓯᒪᔪᖅ ᓇᓕᒧᒌᖕᓂᒃ ᐊᖑᓴᓪᓗᖕᓂᒃ ᐊᕐᓇᒡᓗᖕᓂᒡᓗ ᓇᓐᓄᒍᓐᓇᕐᓗᑎᒃ ᑕᒪᐃᓐᓂ ᓄᓇᕗᒦᑦᑐᓂᒃ ᓇᓄᕐᓂᒃ, ᐅᖃᓚᐅᕐᑐᑦ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ. (ᐊᔾᔨᓕᐅᕆᔨ ᔭᐃᓐ ᔪᐊᔾ)

By ᔭᐃᓐ ᔪᐊᔾ

For an English version of this story, see Nunavut has a new polar bear management plan: NWMB

ᐃᖃᓗᒃᑑᑦᑎᐊᖅ—ᓄᓇᕗᑦ ᒐᕙᒪᒃᑯᑦ ᐊᖏᖅᑐᑦ ᓄᑖᒥᒃ ᓇᓄᕐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ.

ᐅᓇ ᑐᓴᒐᒃᓴᕆᔭᐅᓚᐅᕐᑐᖅ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐃᓚᒋᔭᐅᔪᓂᒃ ᕿᑎᕐᒥᐅᓂᒃ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᑲᑎᒪᕕᒡᔪᐊᖅᑎᓪᓗᒋᑦ ᐃᖃᓗᒃᑑᑦᑎᐊᕐᒥ ᐱᓇᓱᐊᕈᓯᐅᓚᐅᕐᑐᒥᓐ.

ᐱᒋᐊᓕᓵᕈᑎᒋᔭᐅᔪᖅ ᐆᒧᖓ ᓄᑖᒧᑦ ᓇᓄᕐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ ᐅᓇ ᓇᓕᒧᒌᒃᑐᓂᒃ ᐊᖑᓴᓪᓗᖕᓂ ᐊᒻᒪ ᐊᕐᓇᕐᓗᖕᓂᒃ ᓇᓐᓄᒐᓱᖕᓂᖅ ᓄᓇᕗᒥᑦ ᓇᓄᕐᓂᒃ, ᐅᓇ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔩᑦ ᐃᒃᓯᕙᐅᑕᖓᑦ ᑖᓐ ᓲᓴᒃ, ᐅᖃᓚᐅᕐᑐᖅ ᑲᑎᒪᔭᖅᑐᖅᓯᒪᔪᓄᑦ.

ᑲᑎᒪᓂᖅ ᐃᖃᓗᒃᑑᑦᑎᐊᕐᒥ ᓯᕗᓪᓕᖅᐹᖑᔪᖅ ᐱᖓᓱᓂᒃ ᐊᕕᒃᑐᕐᓯᒪᓂᒃᑯᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔩᑦ ᑲᑎᒪᕕᒡᔪᐊᕐᓂᕆᓂᐊᖅᑕᖏᓐᓂᒃ ᑖᔅᓱᒪ ᐊᒻᒪ ᔭᐃᓴᓐ ᐊᕿᐊᕉᑉ, ᑖᓐᓇ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔩᑦ ᐊᐅᓚᑦᑎᔨᖓᑦ, ᐅᐸᒍᑎᔪᒪᔭᖏᓐᓂᒃ.

ᐊᕿᐊᕈᖅ ᐅᖃᓚᐅᕐᑐᖅ ᓇᓄᕐᓄᑦ ᐊᐅᓚᑦᑎᓂᕐᒥ ᐸᕐᓇᐅᑎ “ᐱᓕᕆᓂᒻᒪᕆᐅᓚᐅᕐᒪᑦ.”

“ᐱᓕᕆᓂᐊᕋᑦᑕ ᐊᔪᙱᑕᑦᑎᓐᓂᒃ ᑕᒪᓐᓇ ᑕᐃᒪᐃᓕᖓᓕᖁᓗᒍ ᓇᓐᓄᒐᓱᖕᓇᓚᐅᙱᓐᓂᖓᓂᒃ,” ᐅᖃᖅᑐᖅ.

ᐅᓇ ᐸᕐᓇᐅᑎ ᐃᓱᒪᒃᓴᖅᓯᐅᕈᑎᐅᓯᒪᔪᑦ ᐊᕐᕌᒍᓂᒃ ᑕᓪᓕᒪᑲᓴᖕᓂᒃ, ᐅᖃᐅᓯᐅᓪᓗᓂᓗ ᐸᕐᓇᐅᑎᒃᓴᓂ ᐋᕿᒃᓱᐃᓂᐊᕈᒪᓪᓗᑎᒃ ᒫᑦᓯᐅᓚᐅᕐᑐᒥ ᐃᖃᓗᖕᓂ ᓄᓇᕗᑦᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔩᑦ ᑲᑎᒪᑎᓪᓗᒋᑦ.

ᐸᕐᓇᐅᑎ ᐊᑐᕐᓂᐊᖅᑐᖅ ᑎᑭᓪᓗᒍ 2029.

ᐅᓇ ᐊᕐᓇᕐᓗᒃ ᓇᓄᖅ ᐃᒫᓄᑦ ᒥᓯᒃᑐᖅ ᐃᒃᐱᐊᕐᔫᑉ ᖃᓂᒋᔭᖓᓂ ᑎᓴᒪᑦ ᓇᑎᖅᑕᓛᖏᑦ ᑕᐅᑐᒃᑎᓪᓗᒋ. ᐅᕘᓇᓕ ᓄᑖᒥᑦ ᓇᓄᕐᓂ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ, ᓇᓄᕐᒥ ᐅᓗᕆᐊᕐᓇᕐᓂᖓᓄᑦ ᑐᖂᑦᑎᓂᖅ ᐱᖓᓱᓂᒃ ᓄᓇᓕᖕᓂᑦ ᓂᐱᙵᑕᖃᕈᓐᓃᕈᑕᐅᓇᔭᖅᑐᖅ. (ᐊᔾᔨᙳᐊᖁᑎ ᐊᔾᔨᓕᐅᕆᔨᐅᓪᓗᓂ ᓂᐅᕆ ᐃᖃᓗᒃᔪᐊᒃ)

ᐅᑭᐅᕐᑕᖅᑐᕐᒥᐅᑕᓕᒫᓂᒃ ᓄᓇᕐᔪᐊᒥ 19-ᓂ ᐊᕕᒃᑐᕐᓯᒪᓂᖏᑦᑎᒍᑦ ᓇᓄᐃᑦ, 12 ᓄᓇᕗᒦᓐᓂᕐᓴᐅᕙᒃᑐᑦ.

ᓇᓄᐃᑦ ᐱᔭᐅᔪᓐᓇᖅᑐᑦ ᐋᖅᑭᒃᑕᐅᓯᒪᓕᖅᑐᑦ ᐊᕕᒃᑐᕐᓯᒪᓂᖏᑦᑎᒍᑦ (ᓲᕐᓗ ᐊᖑᓴᓪᓗᑐᐊᑦ) ᑖᒃᑯᓇᙵᑦ ᓇᓄᕐᓂᒃ—ᐊᒻᒪ ᑐᖂᑦᑎᓂᖅ ᓇᓄᕐᓂ ᓴᐳᑎᓯᒪᓂᕐᒧᑦ ᐃᓚᐅᑎᑕᐅᔪᑦ ᐊᕐᕌᒍᒥᑦ ᓇᓐᓄᒃᑕᐅᔪᓐᓇᖅᑐᓄᑦ ᓄᓇᓕᖕᓄᑦ ᐋᕿᒃᑕᐅᓯᒪᔪᓄᑦ.

ᑖᓐᓇ ᓄᑖᖅ ᐸᕐᓇᐅᑎ ᐅᓄᕐᓯᒋᐊᖅᑎᑦᑎᔾᔮᙱᒃᑲᓗᐊᖅᖢᓂ ᓇᓐᓄᒃᑕᐅᔪᓐᓇᖅᑐᓂᒃ ᒫᓐᓇᐅᔪᖅ, ᓄᑖᓂᒃ ᑲᑎᓗᑎᒃ ᓇᓐᓄᒃᑕᐅᔪᓐᓇᖅᑐᓂᒃ ᐃᓱᒪᒋᔭᖃᓕᑐᐃᓐᓇᕆᐊᖃᖅᑐᑦ ᓄᑖᓂᒃ ᓄᐊᑕᐅᓯᒪᔪᓂᒃ ᐱᒍᑎᒃ.

ᐸᕐᓇᐅᑎᐅᓚᐅᕐᓯᒪᔪᑎᒍᓪᓕ, ᓄᓇᕗᒥᑦ ᓄᓇᓖᑦ ᓇᓐᓄᒍᓐᓇᖅᑎᑕᐅᓚᐅᕐᓯᒪᔪᑦ ᐊᑕᐅᓯᕐᒥ ᐊᕐᓇᕐᓗᖕᒥᑦ ᐱᔪᓐᓇᖅᖢᑎ ᒪᕐᕉᖕᓂ ᐊᖑᓴᓪᓘᖕᓂ ᐱᔭᐅᔪᓂᒃ ᒪᑯᑎᒎᓇᖅ ᐊᕐᕌᒍᑕᒫᑦ ᓄᓇᓕᖕᓂ ᓇᓄᕐᓄᑦ ᓂᕕᙵᑕᖅᑖᕆᔭᐅᕙᖕᓂᒃᑯᑦ.

ᑕᒪᓐᓇ ᑕᐃᒪᐃᑎᑕᐅᓚᐅᕐᓯᒪᔪᖅ ᑭᓯᐊᓂ ᐅᕙᓃᑦᑐᓂᒃ ᓴᓐᓂᕈᑎᐅᑉ ᐃᒪᖓᓂ ᓇᓄᕐᓄᑦ, ᑕᒫᓂᓕ ᓇᓕᒧᒌᒃᑐᒥᑦ ᐊᕐᓇᕐᓗᐃᑦᓗ ᐊᖑᓴᓪᓗᐃᓪᓗ ᐱᔭᐅᔪᓐᓇᖅᖢᑎᒃ.

ᐅᕘᓇᓕ ᓄᑖᒃᑯᑦ ᐸᕐᓇᐅᑎᑎᒍᑦ, ᓱᖁᑕᐅᔾᔮᙱᑦᑐᕐᓕ ᓇᓐᓄᒃᑕᐅᔪᖅ ᓄᓇᕗᒥᑦ ᐊᖑᓴᓪᓘᒐᓗᐊᖅᐸᑦ ᐊᕐᓇᕐᓘᒐᓗᐊᖅᐸᓪᓘᓐᓃᑦ ᑭᓯᐊᓂ ᓇᓕᒧᒌᒃᑎᑕᐅᓯᒪᔭᕆᐊᖃᖅᖢᑎᒃ. ᐊᑎᕐᑕᓛᓪᓕ ᓇᑉᐸᕐᒥ ᓂᕕᙵᑕᖃᖅᑎᑕᐅᓇᔭᖅᑐᑦ.

ᐅᓇ ᓄᑖᖅ ᓇᓕᒧᒌᖕᓂ ᐊᖑᓴᓪᓗᖕᓂ/ᐊᕐᓇᕐᓗᖕᓂ ᓇᓐᓄᒍᓐᓇᕐᓂᖅ ᓄᓇᓕᖕᓂᑦ ᓇᓐᓄᒍᑎᓂᒃ ᓴᐳᑎᓯᒪᓂᕐᒧᑦ ᑲᔪᓯᑎᑕᐅᔪᓐᓇᕐᓗᓂ ᑕᐃᒪᐃᑦᑕᕆᐊᖃᕈᑎᒃ.

ᓇᓄᕐᓂ ᑎᑭᑕᐅᑲᑕᖕᓂᕐᓴᐅᓕᕐᓂᖏᑦ ᓄᓇᓕᐅᔪᑦ ᐃᓱᒫᓗᒍᑎᐅᓯᒪᕗᖅ ᓄᓇᕗᒥᑦ ᐃᓅᔪᓐᓃᖅᑐᖃᓚᐅᖅᑎᓪᓗᒍ ᒪᕐᕉᖕᓂᒃ ᓇᓄᕐᒧᑦ ᐅᑭᐊᖅᑕᐅᔫᖕᓂ ᑭᕙᓪᓕᕐᒥ ᐊᕐᕌᓂ—ᑭᓯᐊᓂᓕ, ᒫᓐᓇ ᐊᐅᓚᑦᑎᓂᕐᒧᑦ ᐸᕐᓇᐅᑎᑎᒍᑦ, ᓴᐳᑎᓯᒪᓂᕐᒧᑦ ᑐᖂᑦᑎᓂᖅ ᓇᓄᕐᒥᑦ ᑖᓐᓇᓗ ᐊᕐᓇᕐᓘᒍᓂ, ᑕᐃᒪᓕ ᒪᕐᕉᖕᓂ ᓂᕕᙵᑖᖕᓂ ᐊᑐᖅᑕᐅᒍᑎᐅᓇᔭᖅᐳᖅ. ᑕᐃᒪᐃᓐᓂᖓᓄᓪᓗ ᐃᓚᖏᑦ ᓄᓇᓖᑦ ᓂᕕᙵᑕᖃᕈᓐᓃᔭᑦᑐᑦ ᓴᐳᑎᓯᒪᓂᕐᒧᑦ ᓇᓐᓄᒃᑕᐅᔪᓄᑦ.

ᐅᓇ ᓄᑖᖅ ᐸᕐᓇᐅᑎ ᓄᓇᓕᖕᓂᑦ ᓇᓄᕐᓂᒃ ᑎᑭᑎᑦᑎᑦᑕᐃᓕᒪᑎᑦᑎᓂᕐᓴᐅᓕᕈᓐᓇᖅᑐᖅ, ᓲᓴᒃ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᓯᐊᓂᓕ ᓯᕗᓂᐊᓂ ᐅᖃᓚᐅᕐᓯᒪᔪᖅ ᓇᓄᐃᑦ ᐅᐸᒍᑎᔭᑦᑐᑦ ᖁᐊᖅᓵᕐᓇᕐᓂᖏᓐᓂᒃ ᐃᓄᐃᑦ ᐃᓕᖁᓯᖓᓄᑦ ᐊᒻᒪ ᐃᓅᓯᖏᓐᓄᑦ, ᓲᖃᐃᒻᒪ ᓱᕋᒃᑎᕆᕙᖕᓂᖏᓐᓂᒃ ᐃᒡᓗᕋᓛᕆᔭᐅᔪᓂᒃ, ᑎᖕᒥᐊᑦ ᐃᓂᖏᓐᓂᒃ ᐊᒻᒪ ᓇᑦᑎᕐᓂᒃ.

ᐅᐸᒍᑎᓯᒪᓚᐅᕐᑐᑦ ᑲᑎᒪᓂᕐᒥᒃ ᐃᖃᓗᒃᑑᑦᑎᐊᕐᒥ ᑐᙵᓱᒃᑎᑦᑎᓚᐅᕐᑐᑦ ᐊᓯᙳᖅᑕᐅᔪᓂᒃ ᓇᓄᕐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᓂᒃ.

ᖁᕕᐊᓱᓚᐅᕐᒥᔪᑦ ᕿᒥᕐᒥᐅᑦ ᑕᓪᓕᒪᒃᑲᓐᓂᕐᓂᒃ ᓂᕕᙵᑕᖃᕐᓂᐊᓕᕐᓂᖏᓐᓂᒃ ᐊᒃᖤᒃᓄᑦ. ᐊᖏᔪᐊᓗᒥ ᐊᒃᓛᒃᒥ ᑕᑯᔪᖃᓚᐅᕐᒪᑦ ᐊᒻᒪ ᖁᑭᖅᑕᐅᓪᓗᓂ ᑖᓐᓇ ᐃᒡᓗᒐᓛᒐᓚᖕᓄᑦ ᖃᓂᒡᓕᓗᐊᕐᒪᑦ ᐅᕙᓂ ᒪᐅᓐᑦ ᐸᓕᒥ.

ᐊᓯᐊᓃᑦᑐᓄᓪᓕ, ᐆᒧᖓ ᓄᑖᒧᑦ ᓇᓄᕐᓄᑦ ᐊᐅᓚᑦᑎᓂᕐᒥᒃ ᐸᕐᓇᐅᑎᓂᒃ ᐊᓯᐊᓂ ᐃᓱᒪᒋᔭᖃᑐᐃᓐᓇᕆᐊᓖᑦ.

ᓇᓄᐃᑦ ᓯᕗᓂᒃᓴᖏᑦ ᓇᓗᓇᕐᒪᑕ ᐅᓇ ᐱᔾᔪᑎᒋᓪᓗᒍ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ, ᐅᑯᑎᒎᓇᕐᓕ 2018-ᒥᑦ ᖃᐅᔨᓴᕈᑎᕕᓂᕐᓂᒃ ᑲᑎᒪᔨᕋᓛᓄᑦ ᐅᑯᓄᖓ ᖃᓄᐃᑦᑑᓂᖏᑦ ᐆᒪᔪᐃᑦ ᐊᓯᐅᑐᐃᓐᓇᕆᐊᖃᖅᑐᑦ ᑲᓇᑕᒥ (COSEWIC).

ᐅᑯᐊ ᑲᑎᒪᔨᕋᓛᑦ, ᖃᓄᐃᑦᑑᓂᖏᑦ ᐆᒪᔪᐃᑦ ᐊᓯᐅᑐᐃᓐᓇᕆᐊᖃᖅᑐᑦ ᑲᓇᑕᒥ (COSEWIC), ᖃᐅᔨᓴᒃᑲᓐᓂᓚᐅᕐᒪᑕ ᓇᓄᕐᓂᑦ “ᐃᓱᒫᓘᑎᒻᒪᕆᐅᒋᐊᖃᕐᓂᖏᓐᓂᒃ.” ᑐᑭᖃᖅᑐᕐᓕ ᑕᒪᒃᑯᐊ ᓇᓄᐃᑦ ᖁᐊᕐᓵᕐᓇᖅᑐᒦᓐᓂᖏᓐᓂᒃ ᐊᓯᐅᑐᐃᓐᓇᕆᐊᖃᕐᓂᖏᓐᓂᒡᓘᓐᓃᑦ ᒪᑯᓄᖓ ᑲᑎᓯᒪᔪᓄᑦ ᐆᒪᔾᔪᑎᒋᕙᒃᑕᖏᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᖁᐊᕐᓵᕐᓇᕈᑏᑦ.

Share This Story

(0) Comments