ᓄᓇᕗᒥᑦ ᒪᓕᒐᓕᐅᕐᑎᑦ ᐊᖏᖅᑐᑦ ᐋᖅᑭᒋᐊᕈᑎᒃᓴᓂᒃ ᐃᓐᑲᒻ ᑖᒃᓯᒧᑦ ᒪᓕᒐᕐᔪᐊᓂ

“ᒐᕙᒪᕗᑦ ᐱᓕᕆᐊᖃᕋᓱᒻᒪᕆᒃᑐᑦ ᒪᑯᐊ ᑳᐸᓐᒧᑦ ᐊᑭᓕᐅᑎᕕᓃᑦ ᐅᑎᖅᑎᑕᐅᓇᓱᖕᓂᖏᓐᓄᑦ ᑮᓇᐅᔭᓕᐅᕈᑎᒋᖔᓕᕐᓗᒍ”

ᒪᓕᒐᓕᐅᕐᑎ ᐋᑕᒻ ᒪᐃᑦᓯᑑᓐ ᐊᐱᕐᓱᓚᐅᕐᑐᖅ ᑮᓇᐅᔭᓕᕆᓂᕐᒧᑦ ᒥᓂᔅᑕ ᔪᐊᔾ ᕼᐃᒃᔅ ᐆᒥᖓ ᒪᓕᒐᖅ 26-ᒥᑦ, ᒪᓕᒐᕐᔪᐊᖅ ᐋᖅᑭᒃᓯᒋᐊᕈᑎᒥᑦ ᐃᓐᑲᒻ ᑖᒃᓯᒧᑦ ᒪᓕᖅᔪᐊᕐᒥᑦ, ᒪᓕᒐᓕᕆᔨᒃᑯᑦ ᑲᑎᒪᑎᓪᓗᒋᑦ ᐱᖓᑦᓯᖅ, ᓄᕕᐱᕆ 6-ᒥᑦ. (ᐊᔾᔨᓕᐅᕆᔨ ᑕᔅᑎᓐ ᐸᑖᕐ)

By ᑕᔅᑎᓐ ᐸᑖᕐ

For an English version of this story, see Nunavut MLAs approve amendments to Income Tax Act

ᓄᓇᕗᒥᑦ ᒪᓕᒐᓕᐅᕐᑎᑦ ᓄᑖᙳᕆᐊᖅᑎᑦᑎᓚᐅᕐᒪᑕ ᓄᓇᕗᑦ ᐃᓐᑲᒻ ᑖᒃᓯᒧᑦ ᒪᓕᒐᕐᔪᐊᕐᒥ ᐋᖅᑭᒋᐊᕈᑎᐅᓇᓱᒃᖢᓂ ᑳᐸᓐ ᑕᒃᓯᒧᑦ ᐊᑭᓕᕐᓱᐃᒍᑎᓄᑦ.

ᐊᓯᙳᖅᑎᑕᐅᒍᑏᑦ, ᐱᖓᔪᖓᓐᓂᒃ ᐅᖃᓕᒫᖅᑕᐅᓚᐅᕐᑐᑦ ᐱᖓᑦᓯᖅ, ᓄᕕᐱᕆ 6-ᒥ, ᐃᓚᖃᓚᐅᕐᑐᑦ ᐊᖏᒡᓕᒋᐊᖅᐹᓪᓕᕈᑎᓂᒃ ᓇᖕᒥᓂᕐᒧᑦ ᐊᑭᓕᕐᓱᐃᒋᐊᖃᓕᕐᓂᕐᒧᑦ $13,325-ᒥᑦ $$16,000-ᒧᑦ. ᑕᒪᓐᓇ ᑐᕿᖃᖅᑐᖅ ᑖᒃᓯᓄᑦ ᐊᑭᓕᖅᓱᐃᔨᐅᕙᒃᑐᑦ ᑮᓇᐅᔭᓕᐅᕐᓂᕐᓴᐅᓕᕋᔭᕐᓂᖏᓐᓂᒃ $3,000 ᖃᓂᒋᔭᖓᓂᒃ ᐊᕐᕌᒍᒥᑦ ᐊᑭᓖᒋᐊᖃᓚᐅᖅᑎᓐᓇᒋ ᓄᓇᕗᒥᑦ ᐃᓐᑲᒻ ᑖᒃᓯᒧᑦ.

ᐊᓯᒃᑲᓐᓂᖓᓕ ᐊᓯᙳᖅᑎᑕᐅᔪᖅ ᐅᓇ ᐊᖏᒡᓕᒋᐊᖅᑎᑦᑎᓂᐅᔪᖅ ᐃᓅᓇᓱᖕᓂᕐᒧᑦ ᑖᒃᓯᒧᑦ ᐊᑭᓕᕆᐊᖃᓕᕐᓂᒃ ᒫᙵᑦ $1,200-ᒥ $1,500-ᒧ. ᑖᓐᓇ ᑐᑭᖃᖅᑐᖅ ᑖᒃᓯᒧᑦ ᐊᑭᓕᕐᓱᐃᕙᒃᑐᑦ ᑮᓇᐅᔭᓕᐅᖃᑦᑕᕈᑎᒃ $60,000 ᐅᖓᑖᓂ ᐃᖅᑲᓇᐃᔮᒥᓄᑦ ᐅᑎᖅᑎᕝᕕᐅᒃᑲᓐᓂᕋᔭᖅᑐᑦ $300-ᑲᓐᓂᕐᒥᑦ ᐃᓐᑲᒻ ᑖᒃᓯᓕᕆᓂᒃᑯᑦ.

ᐊᒻᒪᓗ ᓄᓇᕗᒥᑦ ᐱᓕᕆᐊᖃᖅᑐᓄᑦ ᑖᒃᓯᓄᑦ ᐊᑭᓕᐅᑎᐅᕙᒃᑐᑦ ᒥᑭᑦᑐᓄᑦ ᓇᖕᒥᓂᕆᔭᐅᔪᓄᑦ ᐊᑦᑎᒃᓯᕚᓪᓕᖅᑐᖅ 4 ᐳᓴᓐᑎᒥᑦ 3 ᐳᓴᓐᑎᒧᑦ.

“ᒐᕙᒪᕗᑦ ᐱᓕᕆᐊᖃᒻᒪᕆᒐᓱᒃᑐᑦ ᒪᑯᐊ ᑳᐸᓐᒧᑦ ᐊᑭᓕᐅᑎᕕᓃᑦ ᐅᑎᖅᑎᑕᐅᓇᓱᖕᓂᖏᓐᓄᑦ ᑮᓇᐅᔭᓕᐅᕈᑎᒋᖔᓕᕐᓗᒍ”, ᐅᖃᖅᑐᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᑦ ᔪᐊᔾ ᕼᐃᒃᔅ.

ᒐᕙᒪᑐᖃᒃᑯᑦ ᐋᖅᑭᒃᓯᒪᔭᖓᑦ ᑳᐸᓐ ᑖᒃᓯᒧᑦ ᐊᑭᓕᐅᑎᒃᓴᑦ ᐊᑐᖅᑎᑕᐅᓕᓚᐅᕐᑐᖅ ᓄᓇᕗᒥᑦ ᔪᓚᐃ 1-ᒥ, ᐅᕐᓱᐊᓗᒃ ᐊᑭᒃᑐᕆᐊᕐᓂᖓᓄᑦ ᓈᒻᒪᖕᓂᕐᓴᐅᓕᕋᓱᒃᖢᒍ—ᐊᑭᑦᑐᕆᐊᕈᑎᐅᓇᔭᓚᐅᕐᒪᑦ 5 ᓴᓐᔅ ᐊᑕᐅᓯᖅ ᓖᑕᒧᑦ—ᓄᓇᕗᑦ ᒐᕙᒪᖓᑦ ᓴᖅᑭᑎᑦᑎᓚᐅᕐᑐᑦ ᑳᐸᓐᒧᑦ ᐊᑭᓕᐅᑎᓂᒃ ᐅᑎᖅᑎᒍᑎᐅᔪᓐᓇᖅᑐᓄᑦ ᐱᓕᕆᐊᒃᓴᒥᑦ. ᑖᓐᓇᓗ ᐊᑭᒃᖠᕚᓪᓕᕈᑎᐅᓪᓗᓂ ᐅᕐᓱᐊᓘᑉ ᐊᑭᑦᑐᖅᐹᓪᓕᕈᑎᖓᑕ ᓇᑉᐸᓪᓗᐊᖓᓄᑦ.

ᐅᖃᓪᓚᑲᑕᒃᑎᓪᓗᒋ ᐃᓐᑲᒻ ᑖᒃᓯᒧᑦ ᐋᖅᑭᒋᐊᕈᑎᐅᓂᐊᖅᑐᓂᒃ, ᓄᓇᕗᒥᑦ ᒪᓕᒐᓕᐅᕐᑎᐅᔪᑦ ᐊᖏᓚᐅᕐᑐᑦ ᑳᐸᓐ ᑖᒃᓯᒧᑦ ᑮᓇᐅᔭᓕᐅᕈᑎᐅᕙᓪᓕᐊᔪᑦ ᐅᑎᖅᑎᑕᐅᔭᕆᐊᖃᕐᓂᖏᓐᓂᒃ ᓄᓇᕗᒻᒥᐅᓄᑦ. ᑭᓯᐊᓂᓕ ᐊᖏᖃᑎᒌᒍᓐᓇᓚᐅᙱᑦᑐᑦ ᖃᓄᖅ ᐱᐅᓂᖅᐹᖑᓇᔭᕐᒪᖓᑦ ᑕᐃᒪᐃᓕᐅᕐᓂᐊᕐᓗᑎᒃ.

ᐋᑕᒻ ᓚᐃᑦᓯᑑᓐ, ᒪᓕᒐᓕᐅᕐᑎ ᐅᕗᖓ ᐃᖃᓗᐃᑦ-ᒪᓂᕋᔭᒃ, ᐃᓱᒫᓘᑎᖃᓚᐅᕐᑐᖅ ᐃᒪᓐᓇ, ᒪᑯᐊ ᐃᓐᑲᒻ ᑖᒃᓯᒧᑦ ᐊᑭᓕᐅᑏᑦ ᒥᒃᖠᒋᐊᖅᑕᐅᑎᓪᓗᒋᑦ, ᒐᕙᒪᒃᑯᑦ ᑳᐸᓐ ᑖᒃᓯᒧᑦ ᐊᑭᓕᐅᑎᐅᔪᓂᒃ ᐊᑐᖃᑦᑕᕆᐊᖃᕋᔭᕐᓂᖏᓐᓂᒃ ᒐᕙᒪᒃᑯᑦ ᐊᐅᓚᑕᖏᓐᓄᑦ.

“ᑐᑭᓯᐅᒪᒐᒪᓕ ᒫᓐᓇ ᒐᕙᒪᒃᑐᖃᒃᑯᓐᓂᑦ ᐃᑲᔫᑎᒃᓴᓂᒃ ᐊᑐᕆᐊᖃᒻᒪᕆᖕᓂᑦᑎᓐᓂᒃ ᐊᒻᒪᓗ ᓇᖕᒥᓂᖅ ᑮᓇᐅᔭᓕᐅᕈᑎᕗᑦ 10 ᐳᓴᓐᑎᒥᑦ 15-ᐳᓴᓐᑎᒧᑦ ᑎᑭᐅᑎᓯᒪᑐᐃᓐᓇᕐᓂᖏᓐᓂᒃ ᐃᑲᔫᑎᒋᕙᒃᑕᑦᑎᓐᓂ. ᐊᑐᖃᑦᑕᕆᐊᖃᓪᓚᕆᒃᑲᑕ ᓇᖕᒥᓂᖅ ᑮᓇᐅᔭᓕᐅᕈᑎᒋᕙᓪᓕᐊᔭᑦᑎᓐᓂᒃ ᐊᐅᓚᑦᑕᕆᐊᖃᖅᑕᑦᑎᓐᓄᑦ,” ᐅᖃᖅᑐᖅ ᓚᐃᑦᓯᑑᓐ.

“ᖃᓄᐃᒻᒪᓪᓕ ᒐᕙᒪᒃᑯᑦ ᐊᑐᕋᓱᒃᐸᑦ ᑳᐸᓐ ᑖᒃᓯᒧᑦ ᐊᑭᓕᐅᑎᐅᕙᓪᓕᐊᔪᓂᒃ ᐃᑲᔫᑎᐅᓂᐊᕐᓗᑎᒃ ᒐᕙᒪᒃᑯᑦ ᐊᐅᓚᑕᖏᓐᓄᑦ?”

“ᑳᐸᓐ ᑖᒃᓯᒧᑦ ᐊᑭᓕᐅᑎᐅᕙᓪᓕᐊᔪᑦ ᐱᕙᓪᓕᐊᔭᑦᕗᑦ ᐃᓚᐃᓐᓇᓪᓚᑯᓗᖓ ᓄᓇᕗᑦ ᒐᕙᒪᒃᑯᓃᓐᓇᔭᖅᑐᖅ ᐊᒻᒪᓗ ᑳᐸᓐ ᓈᒻᒪᒃᑎᒐᓱᒃᓯᒪᓪᓗᓂ ᓇᖕᒥᓂᖅ ᑳᐸᓐᑎᓐᓄᑦ,” ᑭᐅᔪᖅ ᕼᐃᒃᔅ, ᐅᖃᒃᑲᓐᓂᖅᖢᓂ, “ᐃᓱᒪᔪᖓᓕ ᓈᒻᒪᒋᔭᐅᓗᐊᕋᔭᙱᓐᓂᑦᑎᓐᓂ ᑕᒪᒃᑯᐊ ᑳᐸᓐᒧᑦ ᐊᑭᓕᐅᑎᐅᕙᓪᓕᐊᔪᑦ ᐋᖅᑭᑐᐃᓐᓇᕈᑦᑎᒍᑦ ᐊᓯᖏᓐᓄᑦ ᑮᓇᐅᔭᖅᑖᕈᑎᐅᕙᓪᓕᐊᔪᓄᑦ ᐊᒻᒪᓗ ᑕᒪᒃᑯᐊ ᑮᓇᐅᔭᐃᑦ ᐊᑭᓕᕐᓱᐃᔨᒧᑦ ᐅᑎᕐᑎᑕᐅᙱᓪᓗᑎᒃ.”

ᓚᐃᑦᓯᑑᓐ ᐅᖃᓚᐅᕐᒥᔪᖅ ᐅᓇ ᐋᖅᑭᒋᐊᖅᑎᑦᑎᒃᑲᓐᓂᕐᓂᖅ ᐃᓐᑲᒻ ᑖᒃᓯᒧᑦ ᒪᓕᒐᕐᒥᒃ ᓈᒻᒪᓛᖑᓇᔭᕆᐊᒃᓴᖓᓂᒃ ᐅᑎᖅᑎᑦᑎᓂᒃᑯᑦ ᓄᓇᕗᒻᒥᐅᓄᑦ.

ᐅᖃᓚᐅᕐᒥᔪᑦ ᐅᑯᐊ ᑳᐸᓐ ᑖᒃᓯᒧᑦ ᐃᑲᔫᑎᑦ ᓄᓇᕗᑦ ᒐᕙᒪᒃᑯᓐᓄᐊᕐᓂᐊᖅᑐᑦ ᐊᑐᖅᑕᐅᒐᓗᐊᕆᐊᒃᓴᖓᓂᒃ ᐊᑑᑎᒋᓂᐊᓚᐅᕐᑕᖓᓂᒃ, ᒥᒃᖠᕚᓪᓕᖅᑎᑦᑎᓂᕐᒥᒃ ᓄᓇᕗᒥᑦ ᑳᐸᓐᖃᕐᓂᐅᔪᒥᒃ.

“ᓯᓚᐅᑉ ᐊᓯᙳᖅᐸᓪᓕᐊᓂᖓ ᐃᓱᒫᓘᑎᒻᒪᕆᒋᒐᒃᑯ ᐊᒻᒪᓗ ᐱᓕᕆᐊᕆᔭᐅᔭᕆᐊᖃᒻᒪᕆᒃᖢᓂ ᒫᓐᓇ ᐊᒻᒪ ᓯᕗᕚᒃᓴᑦᑎᓐᓄᑦ. ᑖᓐᓇ ᐅᖄᓪᓚᓚᐅᖅᖢᒍ, ᓴᖅᑭᑎᑦᑎᓯᒪᒐᒪ ᐃᓱᒪᒃᓴᖅᓯᐅᕈᑎᒃᓴᐅᓇᔭᖅᑐᓂᒃ ᒐᕙᒪᑦᑎᓐᓄᑦ ᖃᓄᖅ ᐋᖅᑭᒃᓱᐃᒍᑎᐅᔪᓐᓇᕋᔭᖅᑐᓂᒃ ᐅᕝᕙᓘᓐᓃᑦ ᖃᓄᐃᓕᐅᕈᑎᒃᓴᐅᓇᔭᖅᑐᓂᒃ ᓄᓇᕗᒻᒥᐅᑕᑦ ᐆᒻᒪᖅᑯᑎᒥᒃ ᐊᑐᓗᐊᙱᔾᔪᑎᐅᔪᓐᓇᕋᔭᖅᑐᓂᒃ,” ᐅᖃᖅᑐᖅ ᓚᐃᑦᓯᑑᓐ.

“ᖃᓄᐃᒻᒪᓪᓕ ᑖᒃᑯᐊ ᐃᓱᒪᒋᔭᐅᓯᒪᔪᑦ ᐃᓱᒪᒃᓴᖅᓯᐅᕈᑎᐅᓯᒪᙱᓚᑦ ᐊᒻᒪ ᐱᔭᐅᔪᒪᓯᒪᓪᓗᑎᒃ ᐊᑐᖅᑕᐅᓂᐊᕐᓗᑎᒃ ᑳᐸᓐ ᑖᒃᓯᒧᑦ ᐊᑭᓕᐅᑎᐅᕙᓪᓕᐊᔪᓂᒃ?”

ᕼᐃᒃᔅ ᑭᐅᓚᐅᕐᑐᖅ ᐅᖃᖅᖢᓂ ᐊᑐᓂᑦ ᐱᓕᕆᕝᕕᐅᔪᑦ—ᑲᒪᒋᔭᖃᖅᑐᑦ ᓇᓗᓇᐃᕐᓯᒪᔪᓂᒃ ᐱᓕᕆᐊᒃᓴᓂᒃ—ᑐᓵᓂᖏᓐᓂᒃ.

ᐃᓚᖏᑦ ᐱᓕᕆᕝᕕᐅᔪᑦ ᐱᓕᕆᐊᖃᕐᓯᒪᓕᕐᑐᑦ ᐱᓕᕆᕝᕕᐅᔪᓂᒃ, ᐃᓚᒋᔭᐅᓪᓗᓂ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ, ᑖᒃᑯᐊ ᐱᓕᕆᐊᓴᖃᖅᖢᑎᒃ ᐋᖅᑭᒃᓱᐃᓂᕐᒥᒃ ᐊᑐᓗᐊᔭᓇᙱᑦᑐᓂᒃ ᐆᒻᒪᖅᑯᑎᒧᑦ LED ᖃᖅᐅᒻᒪᖅᑯᑎᓂᒃ ᐊᖅᑯᑎᓄᑦ ᖃᐅᒻᒪᖅᑯᑎᓕᒫᓄᑦ ᓄᓇᕗᒥᑦ ᑖᓐᓇᓗ ᐊᖏᖅᑕᐅᓚᐅᖅᖢᓂ ᑲᑎᒪᑎᓪᓗᒋᑦ ᓯᕗᓂᑦᑎᐊᖓᓂᒃ.

2019/20-ᒥ, ᓄᓇᕗᑦ ᒐᕙᒪᒃᑯᑦ ᐃᓱᒪᔪᑦ ᑮᓇᐅᔭᓕᐅᕐᓂᐊᕆᐊᒃᓴᖏᓐᓂᒃ 12 ᒥᓕᐊᓐ ᑖᓚᓂ ᑳᐸᓐ ᑖᒃᓯᒧᑦ ᐊᑭᓕᐅᑎᓄᑦ. ᐃᒪᓐᓇ ᐊᕕᒃᑐᖅᑕᐅᓯᒪᓇᔭᕐᑐᖅ:

  • 2 ᒥᓕᐊᓐ ᑖᓚᐃᑦ ᒐᕙᒪᒃᑯᑦ ᐊᑭᑐᓂᕐᓴᓄᑦ ᐅᖅᑰᓴᐅᑎᓄᑦ ᐃᒡᓗᓕᕆᔨᒃᑯᑦ ᐃᒡᓗᖏᓐᓄᑦ ᐊᒻᒪ ᒐᕙᒪᒃᑯᑦ ᐃᒡᓗᖏᓐᓄᑦ ᒪᑯᓄᖓ ᐃᓕᓐᓂᐊᕐᕕᖕᓄᑦ ᐊᒻᒪ ᐋᓐᓂᐊᕕᖕᓄᑦ.
  • 3.6 ᒥᓕᐊᓐ ᑖᓚᐃᑦ ᓄᑖᒧᑦ ᓄᓇᕗᒥᑦ ᑳᐸᓐᒧᑦ ᐅᑎᖅᑎᕙᓪᓕᐅᒍᑎᓄᑦ.
  • 6.2 ᒥᓕᐊᓐ ᑖᓚᐃᑦ ᐅᑎᖅᑎᑕᐅᓗᑎᒃ ᓄᓇᕗᒻᒥᐅᓄᑦ ᐊᒻᒪ ᓄᓇᕗᒥᑦ ᐃᖅᑲᓇᐃᔮᕆᔭᐅᔪᓄᑦ ᑕᒪᑐᒪᓂ ᐊᕐᕌᒍᒥᑦ ᐋᖅᑭᒃᑕᐅᓂᖓᓄᑦ ᐋᖅᑭᒋᐊᕈᑎᑎᒍᑦ ᐃᓐᑲᒻ ᑖᒃᓯᒧᑦ ᒪᓕᒐᖅᔪᐊᖅ.

ᑭᓯᐊᓂᓕ ᓚᐃᑦᓯᑑᓐᒧᑦ ᐅᓇ ᓇᐃᓴᐅᓯᕆᓂᒃᑯᑦ ᑲᑎᓯᒪᑦᑎᐊᙱᓐᓂᕋᖅᑕᖓ.

“ᑕᐅᑐᒃᖢᒍ 50 ᐳᓴᓐᑎᒥ ᐅᑎᖅᑎᕝᕕᐅᓇᔭᕐᓂᖅ ᐅᕐᓱᐊᓗᒃᑖᕐᕕᒃᒥᑦ ᐊᒻᒪᑲᓐᓂ 50 ᐳᓴᓐᑎ ᐊᑐᕈᑎᒃᓴᖅ ᑳᐸᓐ ᑖᒃᓯᒧᑦ ᐊᑭᓕᐅᑎᓂᒃ, ᖃᓄᐃᒻᒪᓪᓕ ᐃᓂᑭᑦᑐᓪᓚᑯᓘᕙ ᐆᒻᒪᖁᑎᓂᒃ ᐊᑐᓗᐊᖅᑕᐃᓕᓂᕐᒨᕈᑎᓄᑦ ᖃᓄᐃᓕᐅᕈᑎᐅᓇᔭᖅᑐᓄ?”

ᕼᐃᒃᔅ ᑭᐅᓚᐅᕐᑐᖅ ᐅᓇ ᒐᕙᒪᑐᖃᒃᑯᑦ ᐋᖅᑭᒃᓯᒪᔭᖓ ᑳᐸᓐ ᑖᒃᓯ ᐅᓄᕐᓯᒋᐊᖅᐸᖕᓂᖓᓂ ᐊᕐᕌᒍᑕᒫᑦ ᐊᕐᕌᒍ ᑕᓪᓕᒪᓂ ᐊᒡᒋᖅᑐᓂᒃ, ᐊᒻᒪᓗ ᐅᓇ 50 ᐳᓴᓐᑎᒥ ᐲᕐᓯᕕᐅᖃᑦᑕᕐᓂᖅ ᐅᕐᓱᖅᑖᕐᕕᖕᓂ ᑲᔪᓯᓂᐊᕋᓗᐊᖅᑎᓪᓗᒍ, ᐊᕐᕌᒍᒥ ᐊᖏᒡᓕᒋᐊᖅᑎᑦᑎᓂᖅ ᑖᒃᓯᑎᒍᑦ ᐊᑭᓕᐅᑎᒃᓴᓂᒃ ᑮᓇᐅᔭᓕᐅᒃᑲᓂᕈᑎᐅᓇᔭᖅᑐᖅ ᐊᓯᖏᓐᓄᑦ ᐱᓕᕆᐊᒃᓴᒃᑲᓐᓂᕐᓄᑦ.

ᒪᓕᒐᖅ ᐊᐃᑉᐸᖓᓂ ᐅᖄᓕᒫᖅᑕᐅᓂᖓ ᐊᓂᒍᖅᑎᑕᐅᓚᐅᕐᓯᒪᔪᖅ ᓄᕕᐱᕆ 6-ᒥᑦ ᐊᒻᒪ ᐱᖓᔪᙵᓐᓂᒃ ᐅᖃᓕᒫᖅᑕᐅᓪᓗᓂ ᐅᓐᓄᖓᓂᒃ. ᑖᓐᓇᐅᓕᕋᓗᐊᖅᑎᓪᓗᒍ, ᓚᐃᑦᓯᑑᓐ, ᐃᒃᐸᒃᓴᖓᓂᒃ ᐃᕐᓂᖅᑖᓵᕐᓂᖑ ᐅᖃᓚᐅᕐᑐᖅ ᒪᓕᒐᓕᕆᕝᕕᒃᒧᑦ ᓯᓂᒃᓯᒪᑐᐃᓐᓇᕐᓂᖓᓂ ᐃᑲᕐᕋᓂᒃ ᐱᖓᓱᓂᒃ ᐊᓂᓪᓗᓂᓗ.

ᑭᖑᓂᑦᑎᐊᖓᒍᑦ ᖃᕋᓴᐅᔭᒃᑯᑦ ᑎᑎᕋᖅᑕᐅᔪᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᓚᐃᑦᓯᑑᓐ ᐅᖃᓚᐅᕐᑐᖅ ᓈᒻᒪᒋᙱᓐᓂᕋᕐᓗᓂᐅᒃ ᓂᕈᐊᕐᓂᐊᓚᐅᕐᓂᖓᓂᒃ ᒪᓕᒐᕐᒥᒃ.

“ᐊᖏᖃᑎᒋᙱᓐᓇᒃᑭᑦ ᖃᓄᐃᓕᖓᓂᐅᔪᑦ ᒪᓕᒐᖅ 26-ᒥ, ᐃᓱᒪᒐᒪᓕ ᐋᖅᑭᒃᓯᒪᑦᑎᐊᕋᓱᒋᙱᖢᒍ ᐊᕐᕌᒍᒧᑦ ᐊᑐᐊᒐᖅ,” ᑎᑎᕋᖅᑐᖅ ᓚᐃᑦᓯᑑᓐ ᑖᐃᒪᓐᓇᓗ ᐅᖃᕐᓂᐊᓚᐅᕋᓗᐊᖅᖢᓂ ᒪᓕᒐᓕᕆᕝᕕᒃᒥᑦ.

“ᐱᔾᔪᑎᒋᔭᐅᔪᕐᓕ ᑳᐸᓐ ᑖᒃᓯᒧᑦ ᒥᒃᖠᕚᓪᓕᖅᑎᑦᑎᒐᓱᖕᓂᕐᒧᑦ ᐅᕐᓱᐊᓗᖕᒥᖔᖅᑐᓂᒃ ᐊᒻᒪ ᐳᒧᕐᓂᒃ ᓴᓇᕝᕕᖕᓂᖔᖅᐸᒃᑐᓂ ᐊᒻᒪ ᓯᓚᐅᑉ ᐊᓯᙳᖅᐸᓪᓕᐊᓂᖓᓂᒃ ᐅᖃᐅᓯᖃᕐᓂᕐᒧᑦ. ᐅᓇ ᒪᓕᒐᖅ ᐃᓚᖃᖅᐸᑦ ᐆᒻᒪᖁᑎᓄᑦ ᑐᕌᖓᔪᓂᒃ ᑖᒃᓯᓄᑦ ᐅᑎᖅᑎᑦᑎᕕᐅᒍᑎᓂᒃ ᑭᒃᑯᑐᐃᓐᓇᕐᓄᑦ ᓇᖕᒥᕆᔭᐅᔪᓄᓪᓗ ᐊᑐᓗᖅᑕᐃᓕᓂᕐᒧᑦ ᐃᑲᔪᕈᒪᔪᓂᒃ, ᐅᕝᕙᓘᓐᓃᑦ ᐅᑯᐊ ᓄᓇᕗ ᒐᕙᒪᒃᑯᑦ ᐋᖅᑭᒃᓯᓚᐅᕐᐸᑕ ᖃᓄᐃᓕᐅᕈᑎᐅᓇᔭᖅᑐᓂᒃ ᐃᓄᖕᓂᒃ ᐃᑲᔪᕈᑎᐅᓇᔭᖅᑐᓂᒃ ᓂᐅᕕᕈᓐᓇᕐᓂᕐᒧᑦ ᐊᒻᒪ ᐋᖅᑭᒃᓱᐃᓂᕐᒧᑦ ᐆᒻᒪᖁᑎᓂᒃ ᐊᑐᓗᐊᖅᑕᐃᓕᓂᕐᒨᖓᔪᓂᒃ ᑕᐃᒪᓕ ᖁᕕᐊᓱᒻᒪᕆᒐᔭᓚᐅᕐᐳᖓ ᐊᖏᖃᑕᐅᓂᕐᒥ ᒪᓕᒐᖅᒥᑦ.”

ᓚᐃᑦᓯᑑᓐ ᓈᒻᒪᒃᓴᙱᒃᑲᓗᐊᖅᑎᓪᓗᒍ ᑖᓐᓇ ᒪᓕᒐᖅ ᐊᓂᒍᖅᑎᑕᐅᓚᐅᕐᑐᖅ.

ᕼᐃᒃᔅ ᐅᖃᓚᐅᕐᑐᖅ ᑐᓵᔪᓐᓇᑦᑎᐊᕐᓂᖓᓂᒃ ᐃᓱᒪᒋᔭᐅᔪᓂᒃ ᖃᓄᖅ ᐊᑐᖅᑕᐅᔪᓐᓇᕆᐊᒃᓴᖏᓐᓂᒃ ᑳᐸᓐ ᑖᒃᓯᒧᑦ ᑮᓇᐅᔭᖅᑖᕆᔭᐅᕙᓪᓕᐊᔪᑦ ᒪᐅᖓ ᓄᓇᕗᒥᑦ ᑳᐸᓐᒥ ᒥᒃᖠᕚᓪᓕᕈᑎᐅᓇᔭᖅᑐᓂᒃ.

“ᐱᖁᔨᑦᑎᐊᖅᑐᖓ ᑭᒃᑯᑐᐃᓐᓇᕐᓂᒃ ᑎᑎᕋᖁᔨᓪᓗᖓ ᒪᓕᒐᓕᐅᖅᑎᖏᓐᓄᑦ ᒐᕙᒪᒃᑯᓐᓄᓪᓘᓐᓃᑦ ᐃᓱᒪᒋᔭᖃᖅᑐᓂᒃ ᖃᓄᐃᓕᐅᕈᑎᐅᔪᓐᓇᕋᔭᖅᑐᓂᒃ ᑕᒪᐅᖓ.”

Share This Story

(0) Comments

Join the Conversation

Your email address will not be published. Required fields are marked *

*


Protected with IP Blacklist CloudIP Blacklist Cloud