ᓘᒃᑖᖅ ᓵᓐᑎ ᒪᒃᑖᓄᑦ ᐊᕐᕌᒍᑲᓴᖕᓂᒃ 18-ᓂᒃ ᓘᒃᑖᖑᓚᐅᕐᑐᖅ ᓄᓇᕗᒥᑦ ᐊᒻᒪ ᖃᖓᑦᑎᐊᓵᖅ ᐃᑲᔫᑎᒃᓴᓂᒃ ᐃᓕᓐᓂᐊᕈᑎᒃᓴᓄᑦ ᒪᒨᕆᐅᓪ ᔫᓂᕘᓯᑎᒥ ᑐᕌᖓᓗᐊᖅᖢᓂ ᓄᓇᖃᖅᑳᖅᑐᓄᑦ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᑎᒃᓴᓄᑦ. (ᐊᔾᔨᓕᐅᕆᔨ ᓵᓐᑎ ᒪᒃᑖᓄᑦ)
ᓄᓇᕗᒥᑦ ᓘᒃᑖᖑᓚᐅᕐᓯᒪᔪᖅ ᐱᒋᐊᖅᑎᑦᑎᕗᖅ ᐃᑲᔪᕈᑎᒃᓴᓂᒃ ᐃᓄᖕᓂᒃ ᐃᓕᓐᓂᐊᕈᑎᒃᓴᓄᑦ ᐋᓐᓂᐊᖅᑐᓕᕆᓂᕐᒥᒃ
“ᐃᓄᐃᑦ ᓄᓇᕗᒥᐅᑕ ᓄᓇᕗᒥᐅᓂᒃ ᐋᓐᓂᐊᓯᐅᖅᑎᖃᖁᒐᑦᑎᒍᑦ,” ᐅᖃᖅᑐᖅ ᓘᒃᑖᖅ ᓵᓐᑎ ᒪᒃᑖᓄᑦ
For an English version of this story, see Former Nunavut doctor creates bursary to encourage Inuit medical students
ᐊᕐᕌᒎᑲᓴᖕᓂᒃ 18-ᓂᒃ ᓘᒃᑖᖑᓪᓗᓂ ᓄᓇᕗᒥ, ᓘᒃᑖᖅ ᓵᓐᑎ ᒪᒃᑖᓄᑦ ᐅᖃᓚᐅᕐᑐᖅ ᑐᓂᓯᔪᒪᓂᕋᖅᖢᓂ ᓄᓇᕗᒧᑦ ᐃᑲᔪᕐᓗᓂ ᓄᓇᕗᒻᒥᐅᓂ ᐋᓐᓂᐊᖅᑐᓕᕆᓂᕐᒥᒃ ᐃᓕᓐᓂᐊᕈᒪᔪᓂᒃ. ᐃᖅᑲᓇᐃᔮᒥᓂᒃ ᐃᓱᓕᑦᑎᓕᖅᑎᓪᓗᒍ, ᐃᓱᒪᓕᐅᕆᓚᐅᕐᓯᒪᖕᒪᓐ ᐃᑲᔪᕈᑎᒃᓴᓕᐅᕈᒪᓪᓗᓂ ᐅᕙᓂ ᒪᒨᕆᐅᓪ ᓯᓚᑦᑐᖅᓴᕐᕕᒡᔪᐊᒥ (Memorial University) ᐃᓕᓐᓂᐊᕐᕕᒋᓚᐅᕐᓯᒪᔭᖓᓂ.
ᒪᒃᑖᓄᑦ ᐅᖃᓚᐅᕐᑐᖅ ᐃᑲᔪᕈᑎᒃᓴᓕᐅᕐᓂᕋᓚᐅᕐᓂᕋᖅᖢᓂ ᐅᓄᒃᑲᓐᓂᖅᑐᓂᒃ ᐃᓄᖕᓂᒃ ᓄᓇᖃᖅᑳᖅᑐᓂᒡᓗ ᐃᓅᓱᒃᑐᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐱᓕᕆᐊᖃᕐᓂᖅᓴᐅᖁᔨᓪᓗᓂ. ᐊᒻᒪᓗ ᐅᖃᖅᖢᓂ ᐃᓄᖕᓂ ᓘᒃᑖᖅᑕᖃᕐᓗᓂ ᓄᓇᕗᒥᑦ ᐃᑲᔪᕈᑎᐅᓇᔭᕐᓂᖓᓂᒃ ᓄᓇᕗᒻᒧᖓᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐱᓕᕆᐊᑎᒍᑦ.
“ᐃᓄᐃᑦ ᓄᓇᕗᒥᐅᑕᑦ ᓄᓇᕗᒥᐅᑕᓂᒃ ᐋᓐᓂᐊᖅᓯᐅᖅᑎᖃᖁᒐᑦᑎᒍᑦ,” ᒪᒃᑖᓄᑦ ᐅᖃᖅᑐᖅ.
ᒪᒃᑖᓄᑦ ᐱᒋᐊᖅᑎᑦᑎᓚᐅᕐᒪᑦ ᐆᒥᖓ Dr. W. Alexander (Sandy) MacDonald Bursary for Indigenous Learners (ᓘᒃᑖᖅ ᐊᓕᒃᓵᓐᑐ ᒪᒃᑖᓄᑦ ᐃᑲᔫᑎᒃᓴᖓ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ) ᐅᕙᓂ ᒪᒨᕆᐅᓪ ᔫᓂᕘᓯᑎᒥ. ᐅᓇ ᐃᓄᖕᓄᑦ ᐊᒻᒪ ᓄᓇᖃᖅᑳᖅᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐃᓕᓐᓂᐊᖅᑎᓄᑦ ᐅᕙᓂ ᒪᒨᕆᐅᓪ ᔫᓂᕘᓯᑎᓯ ᐊᓂᒍᐃᓂᑯᓂᒃ ᐃᓕᓐᓂᐊᕐᕕᐊᓗᖕᒥᑦ ᓄᓇᕗᒥᑦ ᓛᐸᑐᐊᒥᓪᓘᓐᓃᑦ. ᑖᒃᑯᓄᖓᓕ ᓂᕈᐊᕆᔭᐅᓂᕐᓴᐅᓇᔭᖅᑐᑦ ᐃᑲᔫᑎᖃᕆᐊᖃᖅᑐᑦ ᒫᓃᓐᓇᔭᖅᖢᓂ $1,500 ᖃᓂᒋᔭᖓᓂ ᐊᕐᕌᒍᒧᑦ, ᒪᒃᑖᓄᑦ ᐅᖃᖅᑐᖅ.
ᒪᒃᑖᓄᑦ, ᐅᕙᙶᕐᓯᒪᓂᑯ ᑲᐃᑉ ᐳᕆᑕᓐ, ᓅᕙ ᓯᑰᓯᐊᒥ, ᓄᓇᕗᒻᒧᐊᓚᐅᕐᓯᒪᔪᖅ 2001-ᒥᑦ ᑕᒪᐅᖓ ᐃᖅᑲᓇᐃᔭᕆᐊᓚᐅᑲᒃᓯᒫᓪᓚᓚᐅᖅᖢᓂ ᐃᓚᒌᓄᑦ ᓘᒃᑖᖑᓪᓗᓂ ᐊᒻᒪᓗ ᐃᒃᐱᖕᓇᐃᔪᓐᓃᖅᑎᑦᑎᔨᓕᕆᔨᐅᕐᓗᓂ ᓯᕗᓂᐊᒍᑦ. ᑕᐃᔅᓱᒪᓂᓕ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᑭᒧᐊᖅᑎᑦᑎᔨᐅᓚᐅᕐᓯᒪᔪᖅ, ᐃᖅᑲᓇᐃᔭᖅᑎᓄᑦ ᐊᖓᔪᖅᑳᖑᓪᓗᓂ, ᐊᒻᒪᓗ ᐋᓐᓂᐊᖅᑐᓂᒃ ᑲᒪᒋᔭᖃᖅᐸᒃᖢᓂ ᐃᓚᒌᓂᒡᓗ. 2018-ᒥᑦ ᓄᓇᕗᒦᑦᑐᓐᓃᓚᐅᕐᓯᒪᔪᖅ ᐊᒻᒪᓗ ᒫᓐᓇ ᑳᓕᖕᕗ, ᐋᓐᑎᐅᕆᐅᒥ ᐊᒻᒪᓗ ᐋᓐᓂᐊᓯᐅᖅᑎᐅᕙᒃᖢᓂ ᐅᓪᓘ ᐃᓚᐃᓐᓇᖓᓂᒃ.
85 ᐳᓴᓐᑎᖏᑦ ᓄᓇᕗᒥᑦ ᐃᓅᑎᓪᓗᒋ, ᑕᒪᓐᓇ ᐃᓕᖅᑯᓯᑎᒍᑦ ᐊᒃᓱᕈᕈᓘᔭᕈᑎᐅᓕᔭᒻᒪᑦ ᐋᓐᓂᐊᓯᐅᖅᑎᓄᑦ ᑕᒫᓂᕐᒥᐅᑕᑐᖃᐅᙱᑦᑐᓄᑦ, ᒪᒃᑖᓄᑦ ᐅᖃᖅᑐᖅ. ᐅᑯᓂᖓ ᐃᓚᖃᖅᖢᓂ ᐃᓄᒃᑎᑐᑦ ᐅᖃᓪᓚᒍᓐᓇᙱᖢᑎᒃ ᐊᒻᒪᓗ ᑐᓵᔨᖃᕆᐊᖃᖅᐸᖕᓂᖅ, ᐅᕝᕙᓘᓐᓃᑦ ᑐᑭᓯᐅᒪᙱᓗᐊᕐᓂᖅ ᐃᓄᐃᑦ ᐃᓅᓯᖏᓐᓂᒃ ᒥᑭᓐᓂᖅᓴᓂᒃ ᓄᓇᖃᖅᑐᓂᒃ, ᐅᖃᖅᑐᖅ.
ᐅᓄᕐᓂᕐᓴᓂᒃ ᐃᓄᖕᓂᒃ ᓘᒃᑖᖅᑕᖃᕈᓂᒃ ᓄᓇᕗᒧᑦ ᓈᒻᒪᖕᓂᖅᓴᒻᒪᕆᐅᒐᔭᖅᑐᖅ ᒪᑯᓄᖓ ᓘᒃᑖᓄᑦ ᐃᓅᙱᑦᑐᓄ ᑕᒫᓂᕐᒥᐅᑕᐅᙱᑦᑐᓄᑦ ᓄᓇᕗᒥᑦ, ᐆᑐᓇᖅ ᒪᒃᑖᓄᑦᑎᑐᑦ ᑕᒫᓂ ᓴᓇᑎᓪᓗᒍ.
“ᐃᓱᒪᒐᒪ ᐃᑲᔪᒻᒪᕆᓚᐅᕐᓯᒪᓂᖓᓂᒃ ᐊᒻᒪᓗ ᑐᑭᓯᔪᓐᓇᕐᓂᕐᓴᐅᓪᓗᑕ,” ᒪᒃᑖᓄᖅ ᐅᖃᖅᑐᖅ ᐅᖃᐅᓯᖃᖅᖢᓂ ᐃᓄᖕᓂ ᐋᓐᓂᐊᓯᐅᖅᑎᓂᒃ ᐱᓕᕆᖃᑎᖃᖃᑦᑕᖅᑐᓂᒃ ᑕᒫᓂᕐᒥᐅᑕᑐᖃᐅᙱᑦᑐᓂᒃ.
“ᐅᓄᕐᓂᖅᓴᐅᒃᑲᐸᑕ ᐃᓄᐃᑦ ᓘᒃᑖᑦ, ᐋᓐᓂᐊᓯᐅᖅᑏᑦ ᐅᕝᕙᓘᓐᓃᑦ ᐋᓐᓂᐊᖅᑐᓕᕆᓂᕐᒧᑦ ᐱᓕᕆᔩᑦ ᑕᐃᒪᓕ ᑭᒃᑯᓕᒫᓄᑦ ᐱᐅᓂᕐᓴᐅᓇᔭᖅᑐᖅ,” ᐅᖃᖅᑐᖅ.
ᐃᓚᖓᓪᓕ ᐊᒃᓱᕈᕐᓇᓚᐅᖅᐸᒃᑐᖅ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᓄᓇᕗᒥᑦ ᐅᓇ ᐊᔪᖅᓴᖃᑦᑕᓗᐊᕐᓂᖅ, ᐆᒧᖓᓕ ᒪᒃᑖᓄᑦᒧᑦ. ᐅᕙᓂ 2018-ᒥᑦ ᓇᐃᓴᐃᔨᒃᑯᑦ ᑲᓇᑕᒥ ᐅᓂᒃᑳᖏᓐᓂᒃ, ᐊᑕᐅᓯᖅ ᑕᓪᓕᒪᓂᒃ ᓄᓇᕗᒥᐅᑕᓂᒃ ᐊᔪᖅᓴᖅᑐᖃᖅᑐᖅ, ᑖᓐᓇᓗ ᑲᓇᑕᓕᒫᒥᒃ ᒪᕐᕈᐃᓪᓗᐊᖅᖢᓂ ᐱᓂᖅᓴᐅᓯᒪᓪᓗᓂ.
“ᐋᓐᓂᐊᖃᕈᑎᒋᕙᒃᑕᖏᓪᓕ ᒪᑯᓄᖓ ᑭᓱᖃᕈᓐᓇᙱᓗᐊᕐᓂᕐᒧᑦ,” ᒪᒃᑖᓄᑦ ᐅᖃᖅᑐᖅ.
ᐅᖃᐅᓯᖃᖅᖢᓂᓗ ᐳᕙᒡᓗᖕᓇᕐᒥ ᓇᓗᓇᐃᒃᑯᑎᒋᓪᓗᓂᐅᒃ. ᓄᓇᕗᑦ ᐅᓄᓛᓂᒃ ᐳᕙᒡᓗᒃᑐᓂᒃ ᐃᓄᖃᕐᒪᑦ ᑲᓇᑕᓕᒫᒥᓪᓕ, ᑕᒪᒃᑯᐊ ᐃᓄᐃᑦ 290-ᖏᖅᓱᖅᖢᑎᒃ ᐋᓐᓂᐊᖅᑖᑐᐃᓐᓇᕆᐊᖃᕐᓂᕐᓴᐅᓪᓗᑎᒃ ᒪᑯᓇᙵᓪᓕ ᓄᓇᖃᖅᑳᖅᓯᒪᙱᑦᑐᓂᒃ ᑲᓇᑕᒥᐅᑕᓂᒃ, ᐅᓇ 2019-ᒥᑦ ᐅᓂᒃᑳᓕᐊᕕᓂᖅ ᐅᖃᖅᓯᒪᓚᐅᕐᑐᖅ ᐅᑯᓇᙵ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐱᓕᕆᔨᓂ ᑲᓇᑕᒥ.
ᐊᒃᓱᕈᕈᑎᐅᖃᑦᑕᕐᒥᔪᕐᓕ ᐅᓇ ᓇᓃᓐᓂᖏᑦ ᓄᓇᕗᒥᐅᑕᑦ. ᒪᒃᑖᓄᑦ ᐅᖃᕋᓗᐊᖅᑎᓪᓗᒍ ᐋᓐᓂᐊᖅᑐᓕᕆᓂᕐᒧᑦ ᐱᖁᑎᑦ ᓄᓇᕗᒦᑦᑐᑦ ᓇᓂᑐᐃᓐᓇᖅ ᑲᓇᑕᒥ ᐊᔾᔨᒋᔭᐅᒐᓗᐊᖅᖢᑎᒃ, ᓱᓕ ᐅᓇ ᐊᒃᓱᕈᕈᑎᐅᖃᑦᑕᕐᒪᑦ ᓄᓇᓕᖕᓂ ᒥᑭᑦᑐᓂᒃ ᐅᐸᑲᐅᖅᑐᕋᓱᒋᐊᒃᓴᖅ.
ᓲᕐᓗ ᒪᑯᓄᖓ ᓄᓇᓯᐅᑎᒧᑦ ᑐᓗᖅᑕᐅᔪᖃᕐᓂᖅᐸᑦ ᒥᑦᑎᒪᑕᓕᒃᒥᑦ ᑕᐅᑐᒃᖢᒍᓕ ᑕᐃᒪᓐᓇᑦᑕᐃᓐᓇ ᐋᑐᕚᒥ ᐊᑐᖅᑐᖃᕋᔭᕐᓂᖓ. ᐋᑐᕚᒥᓪᓕ ᑖᓐᓇ ᐋᓐᓂᖅᑐᖅ ᐋᓐᓂᐊᕕᖕᒦᓕᕋᔭᕐᒪᑦ 20 ᒥᓂᑦᔅᓂᒃ ᐃᑲᕐᕋᒧᑦ, ᒪᒃᑖᓄᑦ ᐅᖃᖅᑐᖅ, ᑕᐃᒪᐃᑦᑕᕆᐊᒃᓴᕐᓕ ᓄᓇᓕᖕᓂᑦ ᐊᔪᕐᓇᖅᑎᐊᖅᑎᓪᓗᒍ.
ᓄᓇᕗᒥᑦ ᐃᓄᖏᑦ ᒫᓃᒻᒪᑕ 38,000, ᒪᒃᑖᓄᑦ ᐅᖃᖅᑐᖅ ᐊᒻᒪ ᖃᐅᔨᒪᓂᕋᖅᖢᓂ ᐃᓄᖕᓂᒃ ᓄᓇᕗᒻᒥᐅᓂᒡᓗ ᓘᑖᖃᑲᐅᖅᑐᔾᔮᙱᓐᓂᖓᓂᒃ. ᑭᓯᐊᓂᓕ ᒪᒃᑖᓄᑦ ᐅᖃᓚᐅᕐᑐᖅ ᓄᓇᕗᒻᒥᐅᑦ ᐊᔪᙱᑦᑐᐊᓘᖕᒪᑕ, ᐊᒻᒪᓗ ᐱᓕᕆᐊᖃᕈᓐᓇᖅᖢᑎᒃ ᐊᑐᖅᓯᒪᓂᒃᑰᖓᓂᖅᓴᒃᑯᑦ ᐊᒻᒪᓗ ᐱᓕᕆᐊᖃᕈᓐᓇᑦᑎᐊᕋᔭᖅᖢᑎᒃ ᐊᒻᒪ ᐃᓱᒪᓪᓗᓂ ᑖᓐᓇ ᐃᑲᔫᑎᒃᓴᖅ ᓄᓇᕗᑦᒥ ᐃᑲᔪᕈᑎᐅᔪᓐᓇᖁᓪᓗᓂᐅᒃ ᖁᕝᕙᖅᐸᓪᓕᐊᔪᓐᓇᕐᓂᒃᑯᑦ.
“ᓄᓇᕗᒥᑦ ᐅᒃᐱᕈᓱᒍᑎᖃᕋᒪ.”
(0) Comments