ᓄᓇᕗᒧᑦ ᐳᓛᓚᐅᕐᑐᑦ 34,000 ᐅᖓᑖᓂᑦ ᐅᓄᕐᓂᕐᓴᐅᓚᐅᕐᐳᑦ 2018-ᒥᑦ 2015-ᒥᓪᓕ

ᐅᓇ ᑕᐃᒪᐃᓐᓂᕋᖅᑕᐅᓯᒪᔪᖅ ᓄᓇᕗᒥᑦ ᐊᕐᕋᒍᒧᑦ ᐳᓚᕋᖅᑐᓕᕆᓂᕐᒥᑦ ᐅᓂᒃᑳᓂᒃ 2018/19-ᒧᑦ ᐅᑯᓇᙶᖅᑐᓂᒃ ᐱᕙᓪᓕᐊᔪᓕᕆᔨᒃᑯᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᓐᓂᑦ, ᓴᖅᑭᑕᐅᓚᐅᕐᓯᒪᔪᑦ ᒪᓕᒐᓕᕆᕕᒡᔪᐊᒥᑦ ᑕᖅᑭᖅ ᐱᒋᐊᓕᓵᖅᓯᒪᑎᓪᓗᒍ.

ᑖᒃᑯᐊᑦᑕᐃᓐᓇᖅ ᐃᓄᐃᑦ ᑕᒪᐅᙵᖅᑐᑦ ᐊᑐᓚᐅᕐᓯᒪᔪᑦ ᑲᑎᖢᑎᒃ $271,383,000 ᐃᓚᐅᖃᑕᐅᓂᕐᒧᑦ ᐊᒻᒪ ᐃᖏᕐᕋᓂᕐᒧᑦ ᐊᑭᓕᐅᑎᓄᑦ. ᐅᓂᒃᑳᑦ ᐅᖃᐅᓯᖃᙱᑦᑐᑦ ᖃᔅᓯᓪᓚᕆᖕᓂᒃ ᐊᑐᕐᓯᒪᔭᕆᐊᒃᓴᖏᓐᓂᒃ ᐃᖏᕐᕋᖃᑕᐅᓂᐅᑉ ᐊᓯᐊᒍᑦ.

ᓇᓕᒧᒌᒃᓯᓂᒃᑯᓪᓕ, ᒫᓃᐸᓗᓚᐅᕐᑐᑦ 16,750 ᐳᓛᖅᑐᑦ ᓄᓇᕗᒥᑦ ᓄᓇᖃᙱᑦᑐᑦ ᒪᐃᒥᑦ ᐅᒃᑑᐱᕆᒧᑦ 2015-ᒥᑦ, ᐅᑯᓂᖓ ᒪᓕᒃᖢᑎᒃ ᑕᐃᔅᓱᒪᓂ ᐊᕐᕌᒍᒥᑦ ᓄᓇᕗᒧᑦ ᐳᓛᖅᑐᑦ ᐊᓂᕙᓪᓕᐊᔪᓂᒃ ᖃᐅᔨᓴᕈᑎᒃᑯᑦ.

ᕿᑭᖅᑖᓗᒃ ᐊᒻᒪ ᑭᕙᓪᓕᕐᒥᐅᑕᑦ ᐳᓛᖅᑕᐅᓯᒪᓛᖑᕗᑦ ᔪᓚᐃᒥᑦ ᓯᑎᐱᕆᒧᑦ, 2018. ᕿᑭᖅᑕᓗᒃ ᐳᓛᖅᑕᐅᓚᐅᕐᑐᖅ 95,600, ᑖᒃᑯᓇᙵᓪᓗ ᓇᑉᐸᖓᑕ ᐅᖓᑎᑦᑎᐊᖓᓃᑦᑐᑦ (53.2 ᐳᓴᓐᑎ) ᐃᖃᓗᖕᓄᐊᓚᐅᕐᑐᑦ ᑮᓇᐅᔭᑎᒍᑦ ᐊᑐᕐᖢᑎᒃ $75.1 ᒥᓕᐊᓐ ᑖᓚᓂᒃ. ᒥᑦᑎᒪᑕᓕᒃ ᐊᒻᒪ ᐸᖕᓂᕐᑑ ᐊᐃᑉᐸᕆᔭᐅᓪᓗᑎᒃ ᐊᒻᒪ ᐱᖓᔪᒋᔭᐅᓪᓗᑎᒃ ᓄᓇᓕᖕᓂᑦ ᐳᓛᖅᑕᐅᔪᓂᒃ ᑕᒫᓂᑦ ᕿᑭᖅᑖᓗᒃᒥᑦ.

ᑭᕙᓪᓕᕐᒥ, ᑲᖏᖅᖠᓂᖅ 33,600-ᓄᑦ ᐳᓛᖅᑕᐅᓚᐅᕐᑐᑦ ᐊᒻᒪ $68 ᒥᓕᐊᓐ ᑖᓚᓂ ᐊᑐᖅᖢᑎᒃ, ᑭᖑᓂᑦᑎᐊᖓᓂᓪᓕ ᖃᒪᓂᑦᑐᐊᖅ ᐊᒻᒪ ᐊᕐᕕᐊᑦ.

ᐃᖃᓗᒃᑑᑦᑎᐊᖅ ᕿᑎᕐᒥᐅᓂᒃ ᐳᓛᖅᑕᐅᓛᖑᓚᐅᕐᑐᖅ.

ᐃᒥᒪᔪᑦ ᐆᒧᖓ ᐅᐊᓐ ᐆᓴᓐ ᖃᐅᔨᓴᖅᐸᓪᓕᐊᓂᕐᒧᑦ ᐅᒥᐊᒃᑰᕐᑐᑦ ᔫᑎᐊᒃᒥᑦ ᑭᒻᒥᕈᒻᒧᑦ ᐋᒐᓯ 2019-ᒥ.

ᐊᒻᒪᓗ 2018-ᒥᑦ, 3,404 ᐅᒥᐊᕐᔪᐊᒃᑰᖅᑐᓂᒃ ᐳᓚᕋᖅᑎᓂᒃ ᓄᓇᕗᒻᒧᐊᖅᑐᖃᓚᐅᖅᖢᓂ ᐊᖅᑮᒃ ᒪᕐᕉᒃ ᓇᑉᐸᐅᓪᓗ ᐃᓗᖓᒍᑦ. ᐅᒥᐊᕐᔪᐊᓂᒃ ᐃᓄᖕᓂ ᐅᓯᕙᒃᑐᓂᒃ ᐊᐅᓚᑦᑎᔨᐅᔪᑦ ᐊᑐᓚᐅᕐᑐᑦ $388,351-ᓂ ᓄᓇᓕᖕᓂᑦ ᐱᔨᑦᑎᕋᖅᑕᐅᔪᒪᓂᕐᒧᑦ, ᐅᓂᒃᑳᑦ ᐅᖃᕐᓯᒪᖕᒥᔪᑦ.

ᑭᓯᐊᓂᓕ ᓯᓚᒧᑦ ᐊᒻᒪ ᓯᑯᖃᕐᓂᖅ ᓇᑉᐸᓪᓗᐊᖏᓐᓂᒃ ᐅᒥᐊᕐᔪᐊᓂᒃ ᐊᒃᑐᐃᒍᑎᖃᓚᐅᕐᑐᑦ ᓄᓇᕗᒻᒧᑦ ᐳᓛᕈᒪᔪᓂᒃ.

ᐱᓕᕆᕝᕕᐅᔪᑦ ᑐᓂᔭᐅᓚᐅᕐᑐᑦ ᖃᓄᐃᓕᖓᓂᐅᔪᓂᒃ 8-ᓂ ᐃᓄᖕᓂ ᐅᓯᔪᓂᒃ ᐊᐅᓚᑦᑎᔨᓂᒃ 23-ᓂ ᐃᖏᕐᕋᓪᓗᑎᒃ ᓄᓇᕗᒥᑦ ᓄᖃᖃᑦᑕᖅᖢᑎᒃ ᔪᓚᐃᒥᑦ ᓯᑎᐱᕆᒧᑦ, 2018-ᒥᑦ. ᑖᒃᑯᐊ ᐅᒥᐊᕐᔪᐊᑦ 3,404-ᓂ ᐃᓄᖕᓂ ᐅᓯᓚᐅᕐᑐᑦ ᑲᑎᖢᑎᒃ.

ᓇᑉᐸᖓᑕ ᐅᖓᑎᑦᑎᐊᖓᓂᒃ, ᒪᓂᓘᓐᓃᑦ 59 ᐳᓴᓐᑎᖏᑦ ᐅᓯᔭᐅᔪᑦ ᐃᓄᐃᑦ ᒥᑦᑎᒪᑕᓕᖕᒧᑦ ᓂᐅᓚᐅᕐᓯᒪᔪᑦ ᓄᓇᕗᒥᑦ. ᐃᖃᓗᐃᑦ ᐊᐃᑉᐸᕆᔭᐅᓪᓗᓂ ᐳᓛᖅᑕᐅᔪᓂᒃ ᐅᒥᐊᕐᔪᐊᕐᑰᖅᑐᓂᒃ 8.3 ᐳᓴᓐᑎᐅᓪᓗᑎᒃ, ᑭᖑᓂᑦᑎᐊᖓᒍᑦ ᕿᑭᖅᑕᖅᔪᐊᖅ, ᑖᓐᓇᓕ 6.1 ᐳᓴᓐᑎᒥ ᐳᓛᖅᑕᐅᓪᓗᓂ ᐊᒻᒪ ᐊᐅᓱᐃᑦᑐᖅ 5.9 ᐳᓴᓐᑎᓄᑦ.

ᐅᒥᐊᕐᔪᐊᒃᑯᑦ ᐳᓛᖅᑐᑦ ᒥᑦᑎᒪᑕᓕᒃᒧᑦ ᐊᑐᑐᐃᓐᓇᓚᐅᙱᓚᑦ ᑲᑎᑦᑐᓂᒃ $245,565-ᓂᒃ, ᑭᓯᐊᓂᓕ ᑖᒃᑯᐊ ᐳᓛᖅᑐᑦ ᐳᓛᕐᓯᒪᓛᖑᓚᐅᕐᑐᑦ ᐃᑲᕐᕋᓂᒃ 100-ᓂᒃ ᐅᑯᓇᙵᑦ 189.5 ᐃᑲᕐᕋᐃᑦ ᐅᒥᐊᕐᔪᐊᒃᑰᖅᑐᓄᑦ ᐳᓛᕐᓂᕆᓯᒪᔭᖏᓐᓂᒃ ᓄᓇᕗᒥᑦ, ᐅᓂᒃᑳᑎᒍᓪᓕ.

ᐃᖃᓗᒃᑑᑦᑎᐊᖅ, ᐅᖅᓱᖅᑑᖅ, ᑭᒻᒥᕈᑦ ᐊᒻᒪ ᖁᒡᓗᖅᑑᖅ ᐳᓛᖅᑕᐅᓚᐅᙱᑦᑐᑦ ᐅᒥᐊᕐᔪᐊᒃᑰᖅᑐᓂᒃ   2018-ᒥᑦ. ᐅᓂᒃᑳᑎᒍᓪᓕ, ᑕᒪᕐᒥᒃ ᐃᖃᓗᒃᑑᑦᑎᐊᖅ ᐊᒻᒪ ᐅᖅᓱᖅᑑᖅ ᓂᕆᐅᓚᐅᕐᑐᑦ 7-ᓄᑦ ᐳᓛᖅᑕᐅᓂᐊᕐᓗᑎᒃ, ᑭᓯᐊᓂᓕ ᑕᒪᕐᒥᒃ ᓄᖅᑲᖅᑎᑕᐅᓚᐅᕐᑐᑦ ᓯᓚᒧᑦ.

ᐅᓂᒃᑳᓂᒃ ᑎᑎᕋᕐᓯᒪᓚᐅᕐᑐᖅ ᐃᖃᓗᒃᑑᑦᑎᐊᖅ ᐊᒻᒪ ᐅᖅᓱᖅᑑᖅ ᐊᒃᑐᐃᓂᖃᓚᐅᕐᑐᖅ ᓄᖅᑲᖅᑎᑕᐅᔪᓄᑦ ᐅᒥᐊᕐᔪᐊᒃᑯᑦ ᐳᓛᕋᔭᖅᑐᓂᒃ ᐃᒪᓐᓇ ᑲᑎᖢᑎᒃ ᐊᓯᐅᔨᓪᓗᑎᒃ ᒫᓂ $25,000-ᓂᒃ.

ᑐᓴᖅᑕᐅᓯᒪᔪᑦ ᐅᓂᒃᑳᓂᑦ ᐅᖃᐅᓯᐅᓂᑯᑦ ᐅᑯᓇᙶᕐᓯᒪᔪᑦ ᐳᓛᖅᑐᓂᒃ ᐊᓂᕙᓪᓕᐊᔪᓂᒃ ᖃᐅᔨᓴᖅᐸᓪᓕᐊᓂᕐᒧᑦ 2018-ᒥᑦ, ᖃᐅᔨᓴᕈᑎᖃᓚᐅᕐᑐᑦ ᐅᒥᐊᕐᔪᐊᓂᒃ ᐊᐅᓚᑦᑎᔨᓂᒃ ᐊᒻᒪ ᐊᓯᖏᓐᓂᒃ ᐳᓛᖅᑐᓂᒃ ᓄᓇᕗᒧᑦ ᐊᕐᕌᓂᐅᓚᐅᕐᑐᖅ.

2018-ᒥᑦ, ᓄᓇᕗᑦ ᒐᕙᒪᒃᑯᑦ ᓄᓇᓕᖕᓄᑦ ᐃᓱᒫᓘᑎᓂ ᑭᐅᔭᕆᐊᖃᓚᐅᕐᑐᑦ ᐅᑯᓇᙵᑦ ᒥᑦᑎᒪᑕᓕᒃᒥᑦ ᐊᒻᒪ ᑲᖏᖅᑐᒑᕕᒃᒥᑦ ᑕᒪᒃᑯᐊ ᐅᒥᐊᕐᔪᐊᑦ ᐊᖑᓇᓱᒡᕕᒃᑰᑲᑕᖕᓂᖏᓐᓄᑦ. ᐅᓂᒃᑳᑎᒍᓪᓕ, ᓄᓇᕗᑦ ᒐᕙᒪᒃᑯᑦ ᐅᖃᖃᑎᖃᓚᐅᕐᑐᑦ ᑲᑐᔾᔨᖃᑎᒌᓂ ᐅᑭᐅᕐᑕᖅᑐᕐᒥᑦ ᖃᐅᔨᓴᖅᐸᓪᓕᐊᓂᕐᒧᑦ ᐅᒥᐊᕐᔪᐊᒃᑯᑦ ᐊᐅᓚᑦᑎᔨᓄᑦ ᐊᒻᒪᓗ ᑕᒪᕐᒥᒃ ᐅᒥᐊᕐᔪᐊᓂᒃ ᐃᓄᖕᓂ ᐅᓯᔪᓂᒃ ᐊᐅᓚᑦᑎᔨᐅᔪᑦ ᑕᒪᐅᓈᖅᑕᐃᓕᒪᓪᓗᑎᒃ.

ᐅᖃᕐᓯᒪᓚᐅᕐᒥᔪᖅ ᑕᒪᓐᓇ ᐳᓚᕋᖅᑐᓕᕆᓂᖅ ᐃᒻᒥᒃᑰᖓᓂᒃᑯᑦ ᐱᕙᓪᓕᐊᓂᐅᓂᖓᓂᒃ, ᒐᕙᒪᒃᑯᓐᓂᒃ ᐃᑲᔪᖅᑕᐅᔭᕆᐊᖃᕐᓂᖏᓐᓂᒃ ᐱᕙᓪᓕᐊᓂᕐᒧᑦ. ᓄᓇᕗᒥᓪᓕ, ᑕᒪᓐᓇ ᑐᑭᖃᖅᑐᖅ ᐊᔪᕈᓐᓃᕐᓴᖅᑎᑦᑎᓂᕐᒥᒃ ᐊᒻᒪ ᐃᖅᑲᓇᐃᔭᖅᑎᑦᑎᓂᕐᒥᑦ ᓄᓇᕗᒻᒥᐅᓂᒃ ᐳᓚᕋᖅᑐᓕᕆᓂᕐᒥᒃ ᐱᓕᕆᐊᖃᕐᓂᕐᒥᒃ.

“ᐱᑕᖃᐃᓐᓇᐅᔭᕐᑐᕐᓕ ᐱᓕᕆᐊᖃᕋᓱᖕᓂᕐᒧᑦ ᐱᓕᕆᔪᒪᔪᓂᒃ ᐱᑕᖃᙱᓐᓂᖓ ᐊᒻᒪᓗ ᐊᔪᕈᓐᓃᕐᓴᕐᓯᒪᔪᓂᒃ ᐊᔾᔨᒌᙱᑦᑐᓂᒃ ᐳᓚᕋᖅᑐᓕᕆᓂᕐᒧᑦ ᐱᓕᕆᓂᐊᓂᒃ. ᐱᑕᖃᙱᑎᓪᓗᒍ ᐊᔪᕈᓐᓃᕐᓴᕐᓯᒪᔪᓂᒃ ᐱᓕᕆᔨᔪᓐᓇᖅᑐᓂᒃ, ᐳᓚᕋᖅᑐᓕᕆᓂᖅ ᖃᐅᔨᔭᐅᕌᓂᒃᓯᒪᙱᓚᖅᑯ ᐱᔪᓐᓇᕈᑎᒋᔪᓐᓇᖅᑕᖏᓐᓂᒃ. ᐊᔪᕈᓐᓃᕐᓴᕐᓂᖅ ᖃᐅᔨᒪᔭᐅᓯᒪᖕᒪᑦ ᐳᓚᕋᖅᑐᓕᕆᓂᕐᒥ ᐱᓕᕆᐊᖃᕐᓂᐊᕐᓗᓂ ᓄᓇᕗᒥᑦ,” ᐅᓂᒃᑳᑦ ᐅᖃᕐᓯᒪᔪᑦ.

ᓇᓗᓇᐃᕐᓯᔩᑦ, ᓄᓇᕗᑦ ᖓᕙᒪᒃᑯᑦ ᐃᓄᖕᓂᑦ ᐅᒥᐊᕐᔪᐊᒃᑰᖅᑐᓄᑦ ᐊᔪᕈᓐᓃᕐᓴᕈᑎᒃᓴᖏᑦ, ᐊᔪᕈᓐᓃᕐᓴᖅᑎᑦᑎᒍᑎᐅᕙᒃᑐᖅ 12-ᓂ ᐃᓄᖕᓂᒃ ᐊᕐᕌᒍᒥ ᐃᖅᑲᓇᐃᔭᕋᔭᖅᑐᓂᒃ ᐃᓄᖕᓂ ᐅᓯᔪᓂᒃ ᐅᒥᐊᕐᔪᐊᓂᒃ ᖃᐅᔨᓴᖅᐸᓪᓕᐊᓂᕐᒧᑦ ᐃᓚᒋᔭᐅᓂᐊᕐᓗᑎᒃ, ᐅᓂᒃᑳᑦ ᐅᖃᕐᑐᑦ.

ᐅᓂᒃᑳᑎᒍᓪᓕ, ᑕᒪᕐᒥᒃ ᓄᓇᕗᑦ ᒐᕙᒪᒃᑯᑦ ᐳᓚᕋᖅᑐᓕᕆᓂᕐᒧᑦ ᖃᐅᔨᓴᖅᑎᐅᔪᑦ ᐃᓄᐃᓐᓇᐅᔪᑦ.

“ᐃᒪᓐᓇᐅᖃᑦᑕᕐᓯᒪᖕᒪᑦ, ᐳᓚᕋᖅᑐᓕᕆᓂᕐᒨᖓᔪᑦ ᑲᑎᕐᓱᖅᑕᐅᕙᓪᓕᐊᔪᑦ ᐱᑕᖃᓗᐊᖅᐸᙱᒻᒪᑕ, ᑕᐃᒪᓐᓇᓗ ᓇᓗᓇᕈᔪᒍᑎᒋᓕᖅᐸᒃᖢᓂᐅᒃ ᑮᓇᐅᔭᓕᐅᕈᑎᒃᓴᖅ ᐊᖏᓂᖓᓂᒃ ᐊᒻᒪ ᐃᑲᔪᕈᓐᓇᕐᓂᖓ ᓄᓇᕗᑦ ᑮᓇᐅᔭᓕᐅᕈᑎᖓᒍᑦ,” ᐅᓂᒃᑳᑦ ᐅᖃᖅᓯᒪᔪᑦ.

ᐱᓕᕆᕝᕕᐅᔪᖅ ᐃᑲᔫᑎᑎᒍᑦ ᐃᑲᔪᕐᓯᒪᔪᑦ 115-ᓂᒃ ᐱᓕᕆᐊᖑᔪᓂᒃ ᐳᓚᕋᖅᑐᓕᕆᓂᕐᒧᑦ ᐊᒃᑐᐊᔪᓂᒃ 2018-ᒥᑦ, ᑲᑎᖢᑎᒃ ᐊᑭᖃᖅᑐᓂᒃ $1,272,822-ᒥᑦ.

ᐅᑯᐊ ᐱᓕᕆᐊᒃᓴᑦ ᐃᓚᖃᖅᑐᑦ ᐅᑯᓂᖓ:

• ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᒃ, ᓂᐱᓄᑦ ᓄᓇᕗᒥᑦ ᓴᖅᑭᔮᑎᑦᑎᓂᕐᒧᑦ: $50,100
• ᐸᐃ ᒐᓚᖃᐅᑎᑦ ᐳᓚᕋᕐᓂᖏᓐᓄᑦ: $48,383
• ᐃᒡᓗᓕᒃ ᕼᐋᒻᒪᓚᖓᓄᑦ, ᐱᒋᐊᖅᑎᑦᑎᓂᕐᒥᒃ ᐃᒡᓗᓕᒃᒥᑦ ᓴᓇᐅᒐᓂᒃ: $81,785
• ᐋᑦᓲ (Artcirq), ᐅᓂᒃᑳᖅᑐᐊᑦ ᓴᖅᑭᑕᐅᓂᖏᓐᓄᑦ: $99,872
• ᓄᓇᕗᒥᑦ ᐱᕙᓪᓕᐊᔪᓕᕆᔨᒃᑯ ᑯᐊᐳᕇᓴᓐ ᐊᒻᒪ ᐅᐃᓂᐱᒡᒥᑦ ᓴᓇᙳᐊᒐᖃᕐᕕᖕᒥᑦ ᓂᐅᕕᕐᕕᒃᒧᑦ ᓄᑖᒧᑦ: $225,000 ᐊᕐᕌᒍᓄᑦ ᐱᖓᓱᓄᑦ