ᓄᓇᕗᒧᑦ ᒪᓕᒐᓕᐅᕐᑎ ᕼᐊᓐᑐ ᓄᖅᑲᕐᓂᐊᓯᕗᖅ ᐅᑭᐊᒃᓵᖅ
ᓕᐳᕈᑯᓐᓄᑦ ᒪᓕᒐᓕᐅᕐᑎᕕᓂᖅ ᐅᖃᖅᑐᖅ ᒪᓕᒐᓕᕆᓂᖅ ᕿᒪᖕᓂᐊᕐᓂᕋᓕᖅᖢᓂᐅᒃ
ᐃᒻᒥᒃᑰᕐᑐᖅ ᓄᓇᕗᒧᑦ ᒪᓕᒐᓕᐅᖅᑎ ᕼᐊᓐᑐ ᑐᑐ ᑐᓴᒐᒃᓴᓕᐅᕐᓇᒥᑦ ᐃᖃᓗᖕᓂᑦ ᔪᓚᐃ 2016-ᖑᑎᓪᓗᒍ, ᐅᑎᕋᑖᖅᑎᓪᓗᒍ ᒪᒥᓴᕐᕕᖕᒥᑦ ᐋᓐᑎᐅᕆᐅᒥᑦ. ᑐᓴᖅᑎᑦᑎᓚᐅᕐᑐᖅ ᐊᐃᑉᐹᖑᓚᐅᕐᑐᒥᑦ ᓂᕈᐊᒐᒃᓴᐅᔾᔮᙱᓐᓂᖓᓂᒃ ᑲᓇᑕᒧᑦ ᒪᓕᒐᓕᕆᕕᒡᔪᐊᒧᑦ ᐅᑭᐊᒃᓵᖅ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Nunavut MP Hunter Tootoo to call it quits this fall
ᓄᓇᕗᒥᑦ ᐃᒻᒥᒃᑰᖓᔪᖅ ᒪᓕᒐᓕᐅᕐᑎ, ᕼᐊᓐᑐ ᑐᑐ, ᐅᒃᑑᐱᕆ 21-ᒥ ᓂᕈᐊᕐᓇᒥ ᐃᓚᐅᔾᔮᙱᑦᑐᖅ ᐊᒻᒪᓗ ᒪᓕᒐᓕᕆᓂᖅ ᕿᒪᖕᓂᐊᓕᕐᖢᓂᐅᒃ, ᑎᑎᕋᕐᕕᖓᓃᑦᑐᑦ ᑐᓴᖅᑎᑦᑎᓚᐅᕐᑐᑦ ᐅᖃᐅᓯᒃᑯᑦ ᐊᐃᑉᐹᓂᑦ, ᔪᓚᐃ 30-ᒥᑦ.
“ᖁᔭᓕᓯᒪᕗᖓ ᐊᒃᓱᐊᓗᒃ ᐃᑲᔪᖅᑐᐃᓯᒪᔪᓂᒃ ᓄᓇᕗᒻᒥᐅᑕᓕᒫᓂᒃ ᑕᖅᑭᐅᕋᑖᖅᑐᓂᒃ ᐊᑐᖅᑕᑦᑎᓐᓂᒃ. ᐃᓱᒪᒃᓴᖅᓯᐅᒻᒪᕆᓚᐅᕐᖢᖓ, ᐃᓱᒪᓕᓚᐅᕋᒪ ᒪᓕᒐᓕᕆᓂᖅ ᕿᒪᖕᓂᐊᕈᒪᓕᖅᖢᒍ,” ᑐᑐ ᐅᖃᓚᐅᕐᑐᖅ.
ᓯᕗᓕᖅᐹᒥᑦ ᑲᓇᑕᒧᑦ ᒪᓕᒐᓕᕆᕕᒡᔪᐊᒧᑦ ᓂᕈᐊᕐᑕᐅᓚᐅᕐᓯᒪᓪᓗᓂ ᐅᒃᑑᐱᕆ 19, 2015-ᒥ, ᓕᐳᕉᓪᓗᓂ, ᑐᑐ ᑎᒃᑯᐊᖅᑕᐅᓚᐅᕐᓯᒪᔪᖅ ᐃᒪᕐᒥᐅᑕᓕᕆᓂᕐᒧᑦ ᒥᓂᔅᑕᐅᓂᕐᒧᑦ ᑲᓇᑕᐅᑉ ᐊᖓᔪᖅᑳᖓᓄᑦ ᔭᔅᑎᓐ ᑐᕉᑑᒧᑦ.
ᒥᓂᔅᑕᐅᓚᐅᕐᓯᒪᔪᖅ ᑎᑭᖢᒍ ᒪᐃ 2016, ᓄᖅᑲᖅᑎᓪᓗᒍ, ᐅᖃᖅᖢᓂ ᒪᒥᓴᖅᑕᐅᔭᖅᑐᕐᓂᐊᕐᓂᕋᖅᖢᓂ ᐃᒥᐊᓗᓗᐊᖃᑦᑕᕐᓂᕐᒧᑦ. ᐃᖅᑲᓇᐃᔮᒥᓄᑦ ᐅᑎᓚᐅᕐᓯᒪᔪᖅ ᔪᓚᐃ 2016-ᒥᑦ, ᑭᓯᐊᓂᓕ ᓕᐳᕈᑯᓐᓂᒃ ᕿᒪᐃᓪᓗᓂ ᐃᒻᒥᒃᑰᖔᓕᖅᖢᓂ.
ᓕᐳᕈᑯᓐᓂᒃ ᕿᒪᐃᓚᐅᕐᑎᓪᓗᒍ, ᑐᑐ ᐅᖃᓕᓚᐅᕐᓯᒪᔪᖅ ᑕᐃᔭᖓᓂᒃ “ᐊᖏᖃᑎᒌᖕᓂᒃᑯᑦ ᑭᓯᐊᓂ ᓈᒻᒪᙱᖢᓂ” ᐱᖃᑎᖃᕐᓂᖓ ᐊᕐᓇᒥ ᐃᖅᑲᓇᐃᔭᓕᓵᕐᓂᑯᒥᑦ.
ᑕᒪᓐᓇᓗ ᐃᓚᖏᓐᓄᑦ ᓄᓇᕗᒥᐅᑕᓄᑦ ᓄᖅᑲᖁᔨᒍᑎᐅᓕᓚᐅᕐᑐᖅ ᑐᑐᒥ. ᑭᓯᐊᓂᓕ ᐊᑕᐃᓐᓇᓚᐅᕐᑐᖅ.
ᑐᑐ ᑭᒡᒐᖅᑐᐃᓚᐅᕐᒥᔪᖅ ᐃᖃᓗᐃᑦ ᓴᓐᑕᒥ ᐃᓚᒋᔭᐅᓪᓗᓂ ᐅᑯᓇᙵᑦ ᓄᓇᕗᒥᑦ ᒪᓕᒐᓕᕆᔨᒃᑯᓐᓂᑦ 1993-ᒥᑦ 2013-ᒧᑦ.
ᐅᖃᐅᓯᖏᑦᑎᒍᑦ, ᑐᑐ ᖁᔭᓕᓚᐅᕐᑐᖅ ᐃᓚᖏᓐᓂᒃ, ᐱᖃᓐᓇᕆᔭᖏᓐᓂᒃ ᐊᒻᒪ ᒪᓕᒐᓕᕆᕝᕕᒃᒥᑦ ᐱᓕᕆᖃᑎᒋᓯᒪᔭᖏᑦ ᐃᑲᔪᖅᑐᐃᓯᒪᓂᖏᓐᓄᑦ “ᐊᒃᓱᕈᕐᓇᖅᑐᒦᑎᓪᓗᒍ ᐃᓅᓯᕋ.”
“ᐃᑲᔪᖅᑐᐃᓂᖏᓐᓄᑦ ᐱᕈᖅᐹᓪᓕᖅᐳᖓ ᐊᒻᒪ ᒪᒥᖢᖓ, ᐊᒻᒪᓗ ᐅᒃᐱᕈᓱᒃᖢᖓ ᐃᓄᑦᑎᐊᕙᐅᓕᖅᐹᓪᓕᕐᓂᓐᓂᑦ. ᐃᓱᒪᖁᕙᒃᑲᓗ ᑭᓇᑐᐃᓐᓇᖅ ᐊᑐᓗᐊᕐᓂᕐᒧᑦ, ᐃᓱᒪᒃᑯᑦ ᐋᓐᓂᐊᓕᒃ, ᐅᕝᕙᓘᓐᓃᑦ ᖁᕕᐊᓇᙱᑦᑐᒦᓗᐊᖅᑐᑦ ᐃᑲᔪᖅᑕᐅᓇᓱᖁᓪᓗᒋᑦ ᒪᒥᓴᕈᓐᓇᕐᓂᐊᕐᒪᑕ,” ᐅᖃᐅᓯᖏᑦ ᐅᖃᕐᓯᒪᔪᑦ.
ᑐᑐ ᐅᐱᒍᓱᓚᐅᕐᒥᔪᖅ ᓄᓇᕗᑦ ᒐᕙᒪᓕᕆᔾᔪᓯᖓᓂᒃ, ᐱᓕᕆᓂᖓᒍᑦ ᖃᐅᔨᒍᑎᒋᓪᓗᓂᐅᑦ “ᐃᓚᒋᔭᐅᔪᓂᒃ ᖃᓄᐃᑦᑐᑐᐃᓐᓇᓂᒃ” ᒪᓕᒐᓕᕆᕕᒡᔪᐊᖅᒦᑎᓪᓗᒍ.
“ᓄᓇᕗᒻᒥᐅᑕᓕᒫᓄᑦ, ᖃᐅᔨᒪᖂᖅᑐᓯ ᓄᓇᕗᒥᑦ ᐱᒻᒪᕆᒋᔭᖃᕐᓂᓐᓂᑦ. ᓄᓇᕗᒥᑦ ᐱᓇᓱᒍᑎᒐ ᓄᖃᖅᓚᐅᕐᓯᒪᔾᔮᙱᑦᑐᖅ. ᐃᓅᓯᒃᑯᑦ ᖃᓄᐃᓕᐅᓕᕋᓗᐊᕈᒪ, ᑲᔪᓰᓐᓇᕐᓂᐊᖅᑐᓂ ᑮᓇᐅᔭᓕᐅᕈᑎᐅᔪᓐᓇᐃᓐᓇᐅᔭᖅᑐᓂᒃ ᓄᓇᕗᒥᐅᑕᑦ ᑭᓱᖃᑦᑎᐊᕈᓐᓇᖁᓪᓗᒋᑦ ᓯᕗᓂᒃᓴᑦᑎᓐᓂᑦ.”
ᓕᐅᓇ ᐊᒡᓘᒃᑲᖅ, ᑲᓐᓲᕕᑎᕝᑯᓐᓄᑦ ᒪᓕᒐᓕᐅᕐᑎᐅᓂᑯ, ᐅᖃᓚᐅᕐᑐᖅ ᓄᓇᕗᒧᑦ ᐃᒃᓯᕙᐅᑕᖅᑖᕋᓱᖕᓂᐊᕐᓂᕋᖅᖢᓂ ᐅᒃᑑᐱᕆ 21-ᒥ ᑲᓐᓲᕕᑎᕝᑯᓐᓄᑦ.
ᒦᒐᓐ ᐱᔪ ᓚᐃᐅᓪ, ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔨᐅᓂᑯ ᐊᒻᒪᓗ ᐃᖅᑲᓇᐃᔭᖅᖢᓂ ᐊᑐᖅᑐᐊᕐᕕᒃ ᑯᐊᐳᕇᓴᓐᑯᓐᓄᑦ ᑲᖏᖅᖠᓂᕐᒥᓐ, ᓕᐳᕈᑯᓐᓄᑦ ᓂᕈᐊᒐᒃᓴᐅᔪᖅ ᑲᓇᑕᒥ ᒐᕙᒪᑐᖃᒃᑯᓐᓄᑦ ᓂᕈᐊᕐᓇᐅᓕᕐᐸᑦ ᐅᒃᑑᐱᕆ 21-ᒥᑦ.
ᓂᕈᐊᖅᑐᓕᕆᔨᑦ ᑲᓇᑕᒥ ᓂᕈᐊᒐᒃᓴᓕᐅᕐᓂᕐᒧᑦ ᐱᓇᓱᒃᑐᐃᑦ ᓄᐊᑕᐅᕙᓪᓕᐊᕝᕕᖓ ᐅᖃᕐᓯᒪᔪᑦ ᐲᑕ ᓲᑦᔾ ᐊᕐᕕᐊᕐᒥᐅᑕᖅ ᓂᕈᐊᕆᔭᐅᓚᐅᕐᓂᖓᓂᒃ ᓂᕈᐊᒐᒃᓴᐅᓗᓂ ᐅᑯᓄᖓ ᐲᐳᔅ ᐹᑎᒧᑦ ᓄᓇᕗᒥᑦ ᓂᕈᐊᒐᒃᓴᐃᑦ ᐱᒡᒍᓴᐅᑎᑎᓪᓗᒋᑦ ᔫᓂ 6-ᖑᓚᐅᕐᓯᒪᔪᒥᑦ, ᑭᓯᐊᓂᓕ PPC ᖃᕋᓴᐅᔭᒃᑯᑦ ᓴᕿᔮᒐᖓ ᐅᖃᕐᓯᒪᓕᕐᑐᑦ “ᑐᓴᖅᑎᑦᑎᓂᐊᕐᓂᖅ ᐅᑕᕿᔪᖅ ᐃᖅᑲᓇᐃᔭᕐᕕᖓᓄᑦ ᐊᖏᖅᑕᐅᓂᖓᓂᒃ.”
ᑭᓯᐊᓂᓕ, ᓲᑦᔾ, ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓚᐅᕐᑐᖅ, “ᓂᕈᐊᒐᒃᓴᐅᙱᑦᑐᖓ ᐊᒻᒪᓗ ᓂᕈᐊᒐᒃᓴᐅᙱᓐᓂᕋᖅᑕᐅᓚᐅᙱᖢᖓ.” ᐅᑯᐊᓕ ᓴᕿᓐᓂᐊᓵᖅᑎᓪᓗᒋᑦ, ᑐᑭᓯᒋᐊᖅᑎᑦᑎᓚᐅᙱᑦᑐᖅ ᖃᓄᐃᒻᒪ ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᓱᓕ ᐊᑎᓕᐅᖅᑕᐅᑎᓯᒪᓂᖓᓂᒃ ᓂᕈᐊᒐᒃᓴᐅᓂᕐᒧᑦ ᓄᓇᕗᒧᑦ.
ᓄᓇᕗᑦ ᓂᐅ ᑎᒧᑯᕌᑎᒃ ᐹᑎᒃᑯᑦ ᓂᕈᐊᖅᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᓱᓕ ᑐᓴᖅᑎᑦᑎᓚᐅᙱᑦᑐᑦ ᓂᕈᐊᒐᒃᓴᒥᑦ.
(0) Comments