ᓄᓇᕗᒻᒥ ᐃᓕᓐᓂᐊᕐᓂᓕᕆᔨᒃᑯᑦ ᐊᒃᓱᕈᕐᓇᖅᑐᒃᑰᕈᑎᖃᕐᐳᑦ ᐃᓄᓐᓂ ᓈᒻᒪᒍᖕᓃᖅᓯᒪᓂᐅᔪᓂᑦ

ᐊᔪᓕᕈᑎᖃᖅᓯᒪᓂᖓᑦ ᒪᓕᒐᖁᑎᓄᑦ ᑐᕌᖓᖖᒋᒻᒪᑕ

ᒪᑐᐃᖅᑕᐅᑎᓪᓗᒍ ᐊᖅᓴᕐᓃᑦ ᖁᑦᓯᖕᓂᖅᓴᓄᑦ ᐃᓕᓐᓂᐊᕐᕕᖓᑕ ᐃᖃᓗᓐᓂ ᐅᑭᐅᑦ ᖁᓕᑦ ᓈᓯᒪᓕᖅᑐᑦ. ᑕᕝᕙᓂ ᐱᓇᓱᐊᕈᓯᕐᒥ ᓄᓇᕗᑦ ᒐᕙᒪᖓᑦ ᓴᖅᑮᓯᒪᑐᐃᓐᓇᕆᐊᓖᑦ ᓄᑕᓂᖅᐸᐅᓪᓗᑎᒃ ᐋᖅᑮᒋᐊᕈᑎᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖁᑎᓄᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᒥᐊᓂᕆᔭᐅᓂᖓᓄᑦ ᒪᓕᒐᕐᓄᑦ. (ᐊᔾᔨᑦ ᑐᖅᑯᐊᓃᑦᑐᖅ)

By ᔨᒻ ᐱᐊᓪ

For an English version of this story, see Nunavut’s Education Department suffers from a people problem

ᓄᓇᕗᑦ ᒐᕙᒪᖓᑦ ᓴᖅᑮᓯᒪᓕᑐᐃᓐᓇᕆᐊᓖᑦ ᒪᓕᒐᒃᓴᖅ 25-ᒥᒃ ᒪᓕᒐᓕᐅᖅᑎᓄᑦ ᑲᑎᒪᓂᖃᖅᑎᓪᓗᒋᑦ ᑕᕝᕙᓂ ᐱᓇᓱᐊᕈᓯᕐᒥ.

ᑖᓐᓇ ᒪᓕᒐᒃᓴᖅ ᐋᖅᑭᒋᐊᕈᑎᐅᑐᐃᓐᓇᕆᐊᖃᕐᒪᑦ ᓄᓇᕗᑦ ᒐᕙᒪᖓᑕ ᑭᖑᓪᓕᖅᐹᒥᒃ ᐊᓯᔾᔩᓯᒪᓕᕋᓱᓐᓂᖓᓐᓄᑦ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖁᑎᐅᔪᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᒥᐊᓂᕆᔭᐅᓂᖓᓄᑦ ᒪᓕᒐᖁᑎᐅᔪᒥᒃ. ᓄᖅᑲᕈᑎᐅᓯᒪᓕᓚᐅᕐᒪᑦ ᐅᐱᕐᖔᖓᓂ 2017, ᑕᐃᒪ, ᐊᒥᓱᑲᓪᓚᐅᓗᐊᖅᑐᓂᒃ ᐃᑲᕐᕋᓄᑦ, ᐱᓕᕆᓂᕐᓄᑦ ᐊᒻᒪᓗ ᑮᓇᐅᔭᓂᒃ ᐊᑐᖅᓯᒪᓕᕐᓂᖏᓐᓄᑦ, ᒪᓕᒐᓕᐅᖅᑎᐅᔪᑦ ᐊᖏᖃᑎᒌᒐᓱᐊᕈᒪᖖᒋᓕᓚᐅᕐᒪᑕ ᓄᓇᕗᑦ ᒐᕙᒪᖓᑕ ᐃᓱᒪᓕᐅᕈᑎᒋᓯᒪᔭᖏᓂᒃ.

ᑐᒡᓕᕆᓪᓗᒍ ᐱᓕᕆᓂᐅᓇᓱᒃᑐᑦ ᐃᖏᕐᕋᓂᖃᕈᓐᓇᕐᓂᐊᖅᐸᑦ? ᐃᒻᒪᖄ ᐄ, ᐃᒻᒪᖄᓗ ᐋᒃᑲ. ᑭᓯᐊᓂᓗ ᖃᐅᔨᒪᕕᓰ? ᑐᕌᖓᑎᓪᓗᒋᑦ ᐊᖏᓂᖅᐸᐅᓪᓗᑎᒃ ᐱᕙᓪᓕᐊᔪᓕᕆᓂᐅᔪᓄᑦ ᓄᓇᕗᑦ ᒐᕙᒪᖓᓐᓂ ᐃᓕᓐᓂᐊᕐᓂᓕᕆᓂᕐᒥᓐᓂ, ᖃᓄᖅ ᐱᓕᕆᓂᖃᕐᕕᐅᓂᐊᕐᓂᖓ ᐃᓱᒪᓇᓗᐊᖖᒋᑐᐃᓐᓇᕆᐊᓕᒃ.

ᐱᔾᔪᑎᒋᓪᓗᒍ “ᐃᓕᓐᓂᐊᕐᓂᓕᕆᔨᒃᑯᑦ ᐊᖏᓂᖅᐸᐅᓪᓗᓂ ᐊᔪᓕᕈᑎᖃᖅᓯᒪᓂᖓᑦ ᒪᓕᒐᖁᑎᓄᑦ ᑐᕌᖓᖖᒋᒻᒪᑕ. ᐊᔪᓕᕈᑎᖃᖅᓯᒪᒻᒪᑕᓕ ᐃᖅᑲᓇᐃᔭᕐᑐᓕᕆᓂᕐᒧᑦ ᐱᔾᔪᑎᖃᖅᑐᓂᒃ ᐊᒻᒪᓗ ᐱᓕᒻᒪᒃᓴᐃᕙᓐᓂᕐᓄᑦ ᐱᔾᔪᑎᖃᖅᑐᓂᒃ. ᐃᓚᖓᒍᑦ, ᑮᓇᐅᔭᖁᑎᖃᕐᑎᑕᐅᓂᒃᓴᖏᑦᑕᐅᑦ ᐱᔾᔪᑎᐅᒋᕗᑦ.

ᑖᒃᑯᐊ ᐊᑯᓂᐊᓗᒃ ᐊᒥᒐᖅᓯᓗᐊᕈᑎᐅᓕᕐᒪᑦ ᐃᓄᒃᑎᑐᑦ ᐃᓕᓐᓂᐊᕐᑎᑦᓯᔨᓂᒃ ᐃᖅᑲᓇᐃᔭᖅᑎᑖᕈᓐᓇᖅᐸᓐᓂᖏᓐᓄᑦ ᓄᓇᕗᒻᒥ, ᐱᖃᓯᐅᑎᓪᓗᒍ ᑲᔪᓰᓐᓇᖅᓱᓂ ᖃᐅᔨᒪᓇᑦᓯᐊᖖᒋᓐᓂᐅᔪᑦ ᐱᓕᕆᐊᖃᖅᑎᐅᔪᓐᓇᖅᑑᓂᖏᓐᓄᑦ ᐱᔾᔪᑎᖃᖅᑐᓂᒃ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᐅᑉ ᐱᓕᕆᐊᖓᓐᓂ ᐱᓕᒻᒪᒃᓴᐃᔨᐅᕙᒋᐊᖃᕋᓗᐊᕐᒪᑕ ᐃᓕᓐᓂᐊᖅᑎᑦᓯᔨᐅᓕᕐᓂᐊᖅᑐᓂᒃ: ᓄᓇᕗᒻᒥ ᐃᓕᓐᓂᐊᖅᑎᐅᓂᕐᒧᑦ ᐃᓕᓐᓂᐊᖅᑎᑦᓯᕙᓐᓂᕐᒥ ᐱᓕᕆᐊᒥᒃ.)

ᑐᑭᓯᓇᖅᓯᑦᓯᐊᕆᐊᕐᓗᒍ, ᐃᓄᓐᓄᑦ ᑐᕌᖓᓪᓗᓂ ᓈᒻᒪᖖᒋᓕᕈᑎᐅᒻᒪ. ᐊᒻᒪᓗ ᑕᒪᓐᓇ ᐃᓄᓐᓄᑦ ᑐᕌᖓᓪᓗᓂ ᓈᒻᒪᖖᒋᓕᕐᓂᐅᔪᖅ ᐱᓕᕆᐊᖑᓚᐅᖅᑳᖅᑎᓐᓇᒍ, ᐃᓱᒪᓇᓗᐊᕐᓂᐊᖖᒋᒻᒪᑦ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖁᑎᐅᔪᖅ ᐅᕝᕙᓘᓐᓃᑦ ᐃᓄᐃᑦ ᐅᖃᐅᓯᖓᑕ ᒥᐊᓂᕆᔭᐅᓂᖓᓄᑦ ᒪᓕᒐᖁᑎᐅᔪᖅ ᖃᓄᖅ ᐅᖃᖅᑕᐅᓯᒪᓕᖅᑎᑕᐅᓂᐊᕐᒪᖔᑕ ᐃᓕᓐᓂᐊᕐᓂᓕᕆᓂᕐᒧᑦ ᐃᓄᒃᑎᑐᑦ ᐱᔾᔪᑎᖃᖅᑐᓄᑦ.

ᒫᓐᓇᐅᔪᒥ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖁᑎᐅᔪᖅ, ᐊᑐᓕᖅᑎᑕᐅᓯᒪᓕᓚᐅᕐᓱᓂ 2008-ᒥ, ᐃᓗᓕᖃᕐᒪᑦ ᖃᖓ ᓴᖅᑮᓯᒪᓕᕆᐊᖃᕐᓂᕐᒥᒃ ᖃᓪᓗᓈᑎᑐᑦ–ᐃᓄᒃᑎᑐᑦ ᐃᓕᓐᓂᐊᖅᑎᑦᓯᕙᓕᕆᐊᖃᕐᓂᕐᒥᒃ 2019 ᐅᑭᐅᖓᓄᑦ ᑎᑭᓪᓗᒍ, ᐃᓕᓐᓂᐊᓕᓵᖅᑐᓂᑦ ᒍᕇᑦ 12-ᒧᑦ ᐃᓕᓐᓂᐊᕈᑎᓕᓐᓄᑦ, ᑎᑭᓪᓗᒍ 2019, ᑕᒪᐃᓐᓂ ᓄᓇᕗᒻᒥ ᐃᓕᓐᓂᐊᕐᕕᐅᔪᓂ.

ᑕᐃᒃᑯᐊ ᐅᖃᐅᓯᕐᓂᒃ ᓇᓪᓕᐊᓂᒃ ᐊᑐᕐᓗᑎᒃ ᐃᓕᓐᓂᐊᖅᑎᑦᓯᔭᕆᐊᖃᕐᓂᐅᔪᑦ ᐊᑐᕈᖕᓃᖅᑎᑕᐅᓯᒪᑲᐅᑎᒋᓚᐅᕐᒪᑕ ᓴᖅᑭᑕᐅᑐᐊᕋᒥᒃ. ᑕᐃᒃᑯᓄᖓ ᑕᒪᑐᒥᖓ ᑐᑭᓯᐅᒪᓕᖖᒋᑦᑐᓄᑦ ᓇᖕᒥᓂᖅ, ᑲᓇᑕᒥ ᑮᓇᐅᔭᓕᕆᔨᕐᔪᐊᑉ ᐊᓪᓚᕝᕕᖓ 2013-ᒥ ᐅᓂᒃᑳᓕᐊᕆᓯᒪᔭᖏᑦ ᐅᖃᖅᓯᒪᓚᐅᕐᒪᑕ ᐊᑐᕈᖕᓃᖅᑎᑦᓯᖁᔨᓪᓗᑎᒃ ᓇᓗᓇᐃᖅᑕᐅᓯᒪᓕᕈᒪᔭᐅᔪᓂᒃ.

ᐃᖏᕐᕋᑦᓯᐊᓕᕈᓐᓇᓚᐅᖖᒋᒻᒪᑕ ᐱᔾᔪᑎᒋᓗᐊᖅᓱᒋᑦ, ᓲᖃᐃᒻᒪ, ᐃᓕᓐᓂᐊᕐᓂᓕᕆᔨᒃᑯᑦ ᓱᓕᓘᓐᓃᑦ ᐊᒥᓲᓂᖏᑦ ᓈᒻᒪᒃᑐᓂᒃ ᐃᓄᒃᑎᑐᑦ ᐃᓕᓐᓂᐊᖅᑎᑦᓯᔨᐅᓕᕋᔭᖅᑐᓂᒃ ᐃᖅᑲᓇᐃᔭᖅᑎᑖᕐᓯᒪᓕᕐᕕᒃᓴᖓᑦ ᖃᓂᒃᓕᓯᒪᖖᒋᓐᓂᖓᑕ. ᓯᕗᓕᕈᑎᐅᓪᓗᓂ ᑲᑕᒃᐸᓪᓕᐊᑎᑕᐅᓯᒪᓂᖓᓄᑦ.

“ᒪᕐᕈᐃᓐᓂᒃ ᑐᑭᓯᐊᓪᓗᑎᒃ ᐃᓕᓐᓂᐊᖅᑎᑦᓯᔨᑕᖃᖖᒋᓐᓂᖓ ᐊᒃᑐᐃᓯᒪᓕᕐᓂᐊᕐᒪᑦ ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᓂᖃᖅᓯᒪᔪᓐᓇᕐᓂᖏᓂᒃ ᒪᕐᕈᐃᓐᓂᒃ ᐅᖃᐅᓰᓐᓂᒃ ᑐᑭᓯᐊᓪᓗᑎᒃ ᐃᓕᓐᓂᐊᕌᓂᒃᓯᒪᓪᓗᑎᒃ ᐃᓕᓐᓂᐊᖅᑎᑦᓯᔨᑖᕈᓐᓇᕐᓂᕐᒧᑦ ᑲᔪᓯᒋᐊᖅᑎᑦᓯᔪᓐᓇᕋᔭᖅᑐᓂᒃ ᐃᓕᓐᓂᐊᕈᑎᒋᔭᒥᓐᓂᒃ ᐊᒻᒪᓗ ᒪᕐᕈᐃᓐᓂᒃ ᐅᖃᐅᓰᓐᓂᒃ ᑐᑭᓯᐊᓪᓗᑎᒃ ᐃᓕᓐᓂᐊᖅᑎᑦᓯᔨᐅᓕᕋᔭᖅᑐᓂ,” ᑲᓇᑕᒥ ᑮᓇᐅᔭᓕᕆᔨᕐᔪᐊᖅ ᐅᖃᕐᓱᓂ.

ᑖᒃᑯᓄᖓ ᐱᔾᔪᑎᐅᖃᑕᐅᕗᖅ, ᓲᖃᐃᒻᒪ, ᓄᓇᕗᒻᒥ ᐃᓕᓐᓂᐊᖅᑎᒃᓴᓂᒃ ᐃᓕᓐᓂᐊᖅᑎᑦᓯᕙᓐᓂᕐᒧᑦ ᐱᓕᕆᐊᖑᔪᒃᑯᑦ ᐊᒥᓲᓂᖏᑦ ᓈᒻᒪᒃᑐᓂᒃ ᖃᓪᓗᓈᑎᑐᓪᓗ ᐃᓄᒃᑎᑐᓪᓗ ᐃᓕᓐᓂᐊᕌᓂᒃᓯᒪᐅᑎᖃᖅᑐᓂᒃ ᐱᑕᖃᓕᖅᑎᑦᓯᕙᖖᒋᓐᓂᖏᑕ ᐱᔭᐅᓯᒪᓕᕆᐊᖃᖅᑐᓂᒃ ᐃᓕᓐᓂᐊᕐᓂᓕᕆᔨᒃᑯᓐᓂᑦ.

NTEP-ᑯᑦ ᐱᓕᕆᓂᖃᓕᕈᓐᓇᖖᒋᓐᓂᖏᑦ ᖃᐅᔨᒪᔭᐅᑦᓯᐊᕐᒪᑕ. ᓲᕐᓗᐊᒃᓛᑦ 2012-ᖑᑎᓪᓗᒍ, ᐃᓚᖏᑦ ᒪᓕᒐᓕᐅᖅᑎᖏᑦ ᐊᒻᒪᓗ ᒪᐃᔪᕐᒋᔭᐅᔪᑦ ᓈᒻᒪᒃᓴᖖᒋᓐᓂᖃᓚᐅᕐᒪᑕ ᐃᒪᓐᓇ ᐃᓚᖏᑦ ᐃᓕᓐᓂᐊᕌᓂᒃᓯᐅᒪᑎᖃᖅᑐᑦ ᐃᓕᓐᓂᐊᖅᑎᑦᓯᔨᐅᓕᕈᓐᓇᕐᓂᕐᒥᒃ ᐊᔪᖅᑑᓂᖏᑕ, ᐃᓚᖏᓪᓗ ᑕᐃᒃᑯᐊ ᐊᔪᖖᒋᓐᓂᖃᖅᑑᒐᓗᐊᑦ ᓄᖅᑲᐅᔾᔨᑐᐃᓐᓇᖃᑦᑕᖅᓯᒪᓪᓗᑎᒃ ᐅᕝᕙᓘᓐᓃᑦ ᐊᕕᑕᐅᖃᑦᑕᖅᓯᒪᓪᓗᑎᒃ.

ᓇᐅᒋᒃᑯᐊ NTEP-ᑯᑦ ᕿᒥᕐᕈᔭᐅᔾᔪᑎᒋᓚᐅᒐᐃ?

ᐅᑭᐅᑦ ᐊᒥᓲᖖᒋᑦᑐᑦ ᓈᓯᒪᓕᖅᑎᓪᓗᒋᑦ, ᐊᑐᓕᓵᖅᑎᓪᓗᒍ 2017, ᐹᓪ ᖁᐊᓴ, ᑕᐃᒪᐅᑎᓪᓗᒍ ᐃᓕᓐᓂᐊᕐᓂᓕᕆᔨᓄᑦ ᒥᓂᔅᑕᕆᔭᐅᓚᐅᕐᑐᖅ, ᐅᖃᓚᐅᕐᒪᑦ ᐃᓚᖏᑦ NTEP-ᑯᓐᓂ ᐃᓕᓐᓂᐊᕌᓂᒃᓯᒪᔾᔪᑎᖃᖅᑐᑦ ᐃᓕᓐᓂᐊᖅᑎᑦᓯᖔᕈᒪᕙᓐᓂᖏᓂᒃ ᖃᓪᓗᓈᑎᑐᑦ. ᑖᓐᓇ ᐱᔾᔪᑎᒋᓪᓗᓂᐅᒃ, ᐊᓯᖏᓪᓗ ᐱᔾᔪᑎᒋᓪᓗᓂᒋᑦ, ᓇᓗᓇᐃᖅᓯᓕᓚᐅᕐᒪᑦ ᓄᓇᕗᑦ ᒐᕙᒪᖓᑦ “ᕿᒥᕐᕈᓂᖃᕐᓂᐊᕐᓂᖏᑕ” NTEP-ᑯᓐᓂᒃ.

ᑕᐃᒪᓕ ᖃᓄᖅ ᕿᒥᕐᕈᔭᐅᓂᖓᑦ ᐅᖃᐅᓯᐅᓕᓚᐅᕐᓂᖅᐸ? ᖃᐅᔨᒪᖖᒋᑦᑐᒍᑦ. ᒫᔾᔨ 2017-ᒥ, ᓄᓇᕗᑦ ᒐᕙᒪᖓᑦ ᐃᖅᑲᓇᐃᔭᖅᑎᑖᕐᓯᒪᓕᓚᐅᖅᑐᑦ ᖃᐅᔨᒋᐊᖅᑎᐅᓂᐊᖅᑐᓂᒃ NTEP-ᑯᓐᓂᒃ. ᖁᐊᓴ, ᓱᓕ ᒥᓂᔅᑕᐅᓪᓗᓂ ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᓇᓗᓇᐃᖅᓯᓕᓚᐅᕐᒥᔪᖅ ᐱᓕᕆᐊᕆᔭᐅᕌᓂᒃᓯᒪᓕᕐᓂᐊᕐᓂᖏᑕ ᔫᓐ ᐊᑐᓕᓚᐅᖅᑎᓐᓇᒍ ᑖᔅᓱᒪᓂᑦᓴᐃᓐᓇᖅ ᐅᑭᐅᒥ.

ᑭᓯᐊᓂᓗ NTEP-ᑯᓐᓂᒃ ᕿᒥᕐᕈᔭᐅᓂᖏᓐᓄᑦ ᐅᓂᒃᑳᓕᐊᖑᓯᒪᔪᑦ ᐱᔭᕇᖅᑕᐅᓯᒪᓪᓚᕆᒃᐸᑕ, ᓄᓇᕗᑦ ᒐᕙᒪᖓᓐᓂᑦ ᓴᖅᑭᑕᐅᓯᒪᓕᓚᐅᖖᒋᒻᒪᑕ. ᓱᓕ ᐅᑕᖅᑭᕋᑦᑎᒍ. ᓇᓗᓇᐃᑦᑐᒥᒃ, ᐊᒥᓲᖖᒋᑦᑐ, ᐱᑕᖃᕐᓂᕈᓂ ᒪᓕᒐᓕᐅᕐᑎᕐᔪᐊᒃᑯᑦ ᐅᖃᐅᔾᔪᐃᓯᒪᓕᓚᐅᕐᐳᑦ ᑕᑯᑎᑕᐅᓯᒪᓕᕈᒪᓪᓗᑎᒃ NTEP-ᑯᑦ ᕿᒥᕐᕈᔭᐅᓯᒪᓂᖏᓐᓄᑦ ᐅᓂᒃᑳᓕᐊᖑᓯᒪᓕᖅᑐᓂᒃ.

ᑕᐃᒪᓐᓇᐃᑎᓪᓗᒍ, ᐅᓪᓗᒥ ᐃᓕᓐᓂᐊᕐᓂᓕᕆᓂᕐᒧᑦ ᒥᓂᔅᑕᕆᔭᐅᓕᕐᑐᖅ, ᑕᐃᕕᑦ ᔪᐊᓇᓯ, ᓴᕆᒪᒋᔭᖃᓚᐅᕐᒪᑦ ᓄᕕᐱᕆᐅᑎᓪᓗᒍ ᐊᒥᓲᓂᖅᐸᐅᔪᑦ ᐃᓄᐃᑦ ᐃᓚᒋᔭᐅᖃᑕᐅᓂᐊᕐᓂᖏᑕ ᐊᕝᕙᓂ ᐅᑭᐅᒥ ᐃᓕᓐᓂᐊᕈᑎᖃᕐᓂᐊᖅᑐᓄᑦ NTEPᑯᑦ ᐱᓕᕆᐊᖓᓂ: 93 ᐃᓄᐃᑦ, 90-ᖏᑦ ᓄᓇᕗᒻᒥ ᐃᓄᒋᔭᐅᓪᓗᑎᒃ. ᓯᐊᒻᒪᒃᑎᖅᓯᒪᒻᒪᑕ 9-ᖑᔪᓂ ᓄᓇᓕᒋᔭᐅᔪᓂ ᐊᒻᒪᓗ ᐃᓕᓐᓂᐊᕈᑎᖃᖅᓱᑎᒃ ᐊᔾᔨᒌᖖᒋᐅᖅᑐᓂ ᖁᑦᓯᖕᓂᕆᔭᐅᔪᓄᑦ, 23-ᖑᔪᑦ ᓂᕆᐅᒋᔭᐅᓪᓗᑎᒃ ᐃᓕᓐᓂᐊᕌᓂᒃᓯᒪᓕᕐᓂᐊᕐᓂᖏᑕ ᑕᕝᕙᓂ ᐅᑭᐅᒥ.

ᑕᑯᒃᓴᐅᓂᖓᒍᑦ ᖄᖓᓂ ᑕᒪᓐᓇ ᐃᑲᔪᖅᑐᐃᓂᖃᕐᓂᕐᒥᒃ ᓴᖅᑮᓯᒪᓐᓂᖃᕐᑐᖅ. ᑭᓯᐊᓂᓗ ᖃᐅᔨᒪᔪᖃᖖᒋᒻᒪᑦ ᖃᔅᓯᐅᔪᑦ ᐃᓚᒋᔭᐅᖃᑕᐅᔪᑦ ᐱᓕᕆᐊᖑᔪᒧᑦ ᐃᓱᐊᓄᑦ ᑎᑭᓯᒪᓕᕐᓂᐊᕐᒪᖔᑕ.

ᐊᒻᒪᓗ ᑖᒃᑯᓇᖖᒐᑦ ᐃᓕᓐᓂᐊᕌᓂᒍᑎᖃᖅᓯᒪᔪᑦ, ᖃᐅᔨᒪᔪᖃᕋᓂ ᖃᔅᓯᐅᔪᑦ ᐃᓕᓐᓂᐊᖅᑎᑦᓯᔨᐅᓗᑎᒃ ᐱᓕᕆᓂᖃᓕᕐᓂᐊᕐᒪᖔᑕ. ᐃᖅᑲᓇᐃᔭᖅᑎᑖᕐᐸᓐᓂᖏᑦ ᐊᒥᓱᑲᓪᓚᓐᓂᑦ ᐃᓄᐃᑦ ᑲᑐᔾᔨᖃᑎᒌᖏᑕ ᐊᒻᒪᓗ ᒐᕙᒪᒃᑯᓐᓂ ᐃᖅᑲᓇᐃᔭᕐᕕᐅᔪᐃᑦ ᐃᓂᑖᕆᔭᐅᕙᒻᒪᑕ ᐃᓄᓐᓂᑦ ᐃᓕᓐᓂᐊᖅᑎᑦᓯᔨᐅᓚᐅᖅᑐᓂᑦ.

ᒪᓕᒃᓗᒋᑦ ᓇᓗᓇᐃᔭᐃᔾᔪᑎᐅᓪᓗᑎᒃ ᑎᑎᕋᖅᑕᐅᓯᒪᔪᑦ ᓄᓇᕗᑦ ᑐᖖᒐᕕᒃᑯᑦ ᑎᒥᖁᑎᖓᓐᓂ ᐃᑲᔪᕈᑎᖃᑦᓯᐊᕐᓱᑎᒃ ᐃᓕᓯᖃᑕᐅᓯᒪᓚᐅᕐᒪᑕ ᓄᑖᓂᒃ ᖃᐅᔨᓴᐃᓂᕐᒧᑦ ᑎᑎᕋᖅᑕᐅᓯᒪᔪᖁᑎᒥᓐᓂᒃ, ᑕᐃᔭᐅᓪᓗᑎᒃ “ᓄᓇᕗᒻᒥ ᐃᓕᓐᓂᐊᕐᓂᓕᕆᓂᖅ ᐱᖁᔭᑎᒍᑦ ᓯᖁᒥᑦᓯᓯᒪᓂᕐᒧᑦ ᓈᒻᒪᖖᒋᔾᔪᑎᖃᓕᖅᓯᒪᕙ?” ᓵᓐᓇᐅᔪᒥ ᖃᔅᓯᐅᓂᖏᑦ ᐃᑲᔪᕈᑎᐅᓗᐊᖖᒋᓚᑦ.

ᑎᑭᑦᓱᒍ ᓅᕕᐱᕆᐅᓚᐅᖅᑐᒧᑦ, ᐃᓕᓐᓂᐊᕐᓂᓕᕆᔨᒃᑯᑦ ᐃᖅᑲᓇᐃᔭᖅᑎᑖᕐᓯᒪᓕᓚᐅᕐᒪᑕ 610-ᓂᒃ ᐃᓕᓐᓂᐊᖅᑎᑦᓯᔨᓂᒃ. ᑖᒃᑯᓇᖖᒐᑦ, 420-ᖏᑦ ᐃᓅᖖᒋᑦᓱᑎᒃ ᐊᒻᒪᓗ 181-ᖏᑦ ᐃᓅᓪᓗᑎᒃ. ᑕᐃᒃᑯᓇᓂ ᐃᖅᑲᓇᐃᔮᖃᖅᑐᓂ ᐱᔪᓐᓇᐅᑎᖃᖅᑑᓪᓗᑎᒃ, ᖃᔅᓯᐅᓂᖏᑦ ᐊᒥᓲᖖᒋᓪᓚᕆᓚᐅᕐᒪᑕ. ᑲᑎᑦᓱᒋᑦ 36-ᖑᔪᑦ ᐃᓕᓐᓂᐊᕐᕕᓐᓂ ᐃᓱᒪᑕᕆᔭᐅᔪᑦ ᐃᓅᖖᒋᓚᐅᕐᒪᑕ ᐊᒻᒪᓗ 7-ᑐᐃᓐᓇᐃᑦ ᐃᓅᓪᓗᑎᒃ, ᐊᒻᒪᓗ 28-ᖑᔪᑦ ᐃᓕᓐᓂᐊᕐᕕᓐᓂ ᐃᓱᒪᑕᐅᔪᒧᑦ ᑐᒡᓕᕆᔭᐅᔪᑦ ᐃᓅᖖᒋᑎᓪᓗᒋᑦ ᐊᒻᒪᓗ ᓯᑕᒪᑐᐃᓐᓇᐃᑦ ᐃᓅᓚᐅᖅᓱᑎᒃ.

ᐳᐃᒍᖅᑕᐃᓕᓗᒍ: NTEP-ᑯᑦ ᐱᓕᕆᐊᖅ ᐋᖅᑭᒃᓱᐊᖑᓯᒪᒻᒪᑦ ᐱᓕᒻᒪᒃᓴᐃᓂᐅᕙᓐᓂᐊᖅᑎᓪᓗᒋᑦ ᐃᓄᓐᓂᒃ ᐃᓕᓐᓂᐊᖅᑎᑦᓯᔨᐅᕙᒍᓐᓇᓕᕐᓂᐊᖅᑐᓂᒃ ᑎᑭᓪᓗᒋᑦ ᒍᕇᑦ 6-ᒧᑦ ᑭᓯᐊᓂ. ᒍᕇ 7-ᒥᑦ ᒍᕇᑦ 12-ᒧᑦ, ᓇᓗᓇᐃᖅᑕᐅᓯᒪᔪᖃᖖᒋᒻᒪᑦ ᐱᓕᕆᐊᕐᒥᒃ ᐅᕝᕙᓘᓐᓃᑦ ᐸᕐᓇᒃᓯᒪᔾᔪᑕᐅᓯᒪᔪᒥᒃ ᐱᓕᒻᒪᒃᓴᐃᓂᐅᕙᓐᓂᐊᖅᑐᓄᑦ ᐃᓄᓐᓂᒃ ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓗᑎᒃ ᐃᓕᓐᓂᐊᕐᑎᑦᓯᕙᓐᓂᕐᒥᓐᓂ ᑖᒃᑯᓄᖓ ᐃᓕᓐᓂᐊᕈᑎᓕᓐᓄᑦ ᖁᑦᓯᖕᓂᖃᖅᑐᓄᑦ.

ᐱᑕᖃᓕᕈᓐᓇᖖᒋᑦᑐᓂᒃ ᐱᑕᖃᓕᖅᑎᑦᓯᓯᒪᓃᑦ

2008-ᖑᑎᓪᓗᒍ ᑕᐃᒪᓐᓇᐃᑦᑐᓂᒃ ᐱᓕᕆᐊᓂᒃ ᐱᑕᖃᓚᐅᖖᒋᒻᒪᑦ, ᑕᐃᒪ ᒪᓕᒐᓕᐅᕐᑎᕐᔪᐊᒃᑯᑦ ᑲᔪᓯᑎᑦᓯᓯᒪᓕᕐᒪᑕ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᖁᑎᓂᒃ ᐅᖃᖅᓯᒪᔪᓂᒃ “ᖃᓪᓗᓈᑎᑐᓪᓗ ᐃᓄᒃᑎᑐᓪᓗ ᐃᓕᓐᓂᐊᕈᑎᖃᕐᓂᖏᓐᓂᒃ” ᑕᐃᒃᑯᓄᖓ ᑕᐃᒪᓐᓇ ᖁᑦᓯᖕᓂᖃᖅᑐᓄᑦ ᐃᓕᓐᓂᐊᕈᑎᒥᓐᓂ ᐃᓕᔭᐅᕙᓪᓕᐊᓯᒪᓕᕐᓱᑎᒃ 2016-17 ᐅᑭᐅᖓᓂᑦ 2019-20 ᐅᑭᐅᖓᓄᑦ. ᑕᐃᒃᑯᐊ ᑕᐃᒪᓐᓇ ᐱᓕᕆᓂᐅᔪᓐᓇᕐᓂᐊᕐᓂᖓᓄᑦ ᐅᒃᐱᕈᓱᓚᐅᖅᑐᑦ ᐃᒻᒥᓐᓂᒃ ᓴᒡᓗᕿᑕᓚᐅᕐᒪᑕ ᐊᒻᒪᓗ ᐃᓄᓐᓄᑦ, ᐅᕝᕙᓘᓐᓃᑦ ᓱᓕᖖᒋᑦᑐᒥᒃ ᐅᒃᐱᕈᓱᓐᓂᖃᓚᐅᕐᒪᑕ, ᐅᕝᕙᓘᓐᓃᑦ ᐃᒃᐱᒍᓱᖖᒋᑦᓯᐊᒻᒪᕆᒃᓱᑎᒃ ᑕᒪᑐᒥᖓ.

ᑕᒪᓐᓇᓗ ᐱᔾᔪᑎᒋᓪᓗᒍ ᐅᖃᓚᐅᕋᑦᑕ 2008-ᒥ ᒪᓕᒐᖅ ᐊᑐᕈᓐᓃᖅᑎᑕᐅᓚᐅᖅᓯᒪᒻᒪᑦ ᓴᖅᑭᑕᐅᓯᒪᓕᕋᒥ. ᐃᓗᓕᖃᓚᐅᕐᒪᑦ ᐱᑕᖃᖅᑎᑦᓯᓂᐊᕈᑎᓂᒃ ᐱᖖᒍᖅᑎᑕᐅᔪᓐᓇᕐᓂᐊᖖᒋᑦᑐᓂᒃ ᐊᑐᓕᖅᑎᑕᐅᔪᓐᓇᕐᓂᐊᕋᑎᒃ.

ᑕᐃᒪᓕ ᑐᑭᓯᓇᕐᐳᖅ ᓯᕗᓕᖅᑎᒋᔭᐅᔪᐃᑦ ᑲᑐᔾᔨᖃᑎᒌᖑᔪᓂᑦ ᓄᓇᕗᑦ ᑐᖖᒐᕕᒃᑯᑦ ᑎᒥᖓᓂ, ᐊᒻᒪᓗ ᐊᒥᓱᑦ ᑐᓵᓂᖃᖅᓯᒪᔪᑦ, ᖁᕕᐊᒋᖖᒋᑕᖃᕐᓚᕆᓐᓂᖏᑕ ᓄᓇᕗᑦ ᒐᕙᒪᖓᑕ ᐱᓕᕆᐊᒃᓴᒥᓐᓂᒃ ᐃᖏᕐᕋᓂᖃᑦᓯᐊᖅᑎᑦᓯᔪᓐᓇᖖᒋᓐᓂᖏᓂᒃ.

“ᓱᕈᓯᖏᑦ ᐃᓄᐃᑦ ᐊᖏᓂᖅᐸᐅᔪᒥᒃ ᐃᓕᓐᓂᐊᕈᑎᖃᖅᐸᒻᒪᑕ ᐅᖃᐅᓯᕐᑎᒍᑦ ᐊᑐᖅᑕᐅᕙᒃᑐᑎᒍ ᐃᓕᓐᓂᐊᕐᑎᑕᐅᓯᒪᕙᖔᕋᑎᒃ ᐃᓄᒃᑎᑐᑦ. ᑕᒪᓐᓇ ᓲᕐᓗ ᓄᖑᕋᐃᔾᔪᑎᐅᒻᒪᑦ ᐱᐅᓯᑐᖃᕆᔭᐅᔪᒧᑦ ᐃᓄᓐᓄᑦ,” ᐊᓗᑭ ᑰᑦᑎᖅ, ᐊᖏᔪᖅᑳᖑᔪᖅ ᓄᓇᕗᑦ ᑐᖖᒐᕝᕕᒃᑯᑦ ᑎᒥᖓᓐᓄᑦ, ᑕᖅᑭᐅᓚᐅᕐᑐᒥ ᐅᖃᓚᐅᕐᐳᖅ ᐅᖃᐅᓯᒃᓴᒥᓂᒃ ᓴᖅᑮᓂᖃᕋᒥ.

ᑕᐃᒪᓗ ᐊᑕᐅᑦᓯᒃᑰᖃᑕᐅᓪᓗᓂ ᑖᔅᓱᒧᖓ, ᐃᓚᒋᔭᐅᔪᑦ ᓄᓇᕗᒻᒥ ᒪᓕᒐᓕᐅᖅᑎᓄᑦ ᐱᕕᒃᓴᖃᕈᓐᓇᕐᓂᐊᖖᒋᒻᒪᑕ ᐊᓯᒃᑲᓐᓂᖏᓂᒃ ᐱᓕᕆᓂᖃᕋᓱᓐᓂᐊᕐᓗᑎᒃ ᐱᑕᖃᓕᖅᑎᑕᐅᔾᔮᖖᒋᒻᒥᔪᓂᒃ. ᐊᒻᒪᓗᒃᑲᓐᓂᖅ, ᓴᖅᑮᕝᕕᐅᓯᒪᓕᕐᓂᐊᕐᒥᔪᑦ ᒪᓕᒐᖁᑎᒃᓴᒥᒃ ᐱᓕᕆᓂᖃᕐᕕᓂᐊᕐᓗᓂ ᓴᖅᑮᓯᒪᓕᕐᓂᕐᒥ ᐃᓄᒃᑎᑐᑦ ᐃᓕᓐᓂᐊᖅᑎᑦᓯᓂᖃᕐᓂᐊᕐᓂᕐᒧᑦ ᐊᑕᕝᕕᖃᖅᑎᑕᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓕᕆᔪᓐᓇᕐᓂᕐᒥᑎᒍᑦ ᓴᖅᑭᓯᒪᓕᖅᑎᑦᓱᓐᓇᖅᑕᖓᓐᓂᑦ.

“ᐱᓕᕆᓂᖃᕐᕕᐅᔭᕆᐊᖃᕐᓂᖏᑦ ᐊᑐᓕᖅᑎᑦᓯᕙᓪᓕᐊᓂᕐᓄᑦ ᐊᑕᑎᑕᐅᓇᔭᕐᒪᑕ ᑐᕌᕐᕕᐅᔪᓄᑦ ᓇᓗᓇᐃᖅᑕᐅᓯᒪᓪᓗᑎᒃ ᐃᓕᓐᓂᐊᕐᓂᓕᕆᔨᒃᑯᑦ ᐃᓄᓐᓂᒃ ᐃᖅᑲᓇᐃᔭᖅᑎᑖᕐᐸᓐᓂᕐᒧᑦ ᐸᕐᓇᐅᑎᖏᓐᓄᑦ,” ᓄᓇᕗᑦ ᒐᕙᒪᖓ ᐅᖃᓚᐅᖅᐳᑦ ᑐᓴᒐᔅᓴᓕᐊᖑᓵᖅᓯᒪᓪᓗᑎᒃ ᐅᖃᓕᒫᒐᕋᓛᓂ.

ᐊᓯᐊᒍᑦ ᐅᖃᕐᓗᒍ, ᑕᐃᒪᓐᓇᐃᓕᕐᓂᐊᕐᒪᑕ ᐃᓕᓐᓂᐊᕐᓂᓕᕆᔨᒃᑯᑦ ᐃᓄᓐᓄᑦ ᑐᕌᖓᓪᓗᓂ ᓈᒻᒪᖖᒋᓕᕈᑎᐅᔪᓂᒃ ᐋᖅᑮᓯᒪᓕᖅᐸᑕ. ᑖᓐᓇ ᐊᔪᕐᓇᖅᑐᒻᒪᕆᐅᒻᒪᑦ, ᐊᒥᓱᐃᓕᖓᔫᓪᓗᓂᓗ ᐱᔾᔪᑕᐅᓕᖅᓯᒪᔪᖅ ᐊᒻᒪᓗ ᑖᒃᑯᐊ 1,000-ᓂᒃ ᐅᖃᐅᓯᕐᓂᒃ ᐅᖃᖅᓯᒪᓪᓗᑎᒃ ᐋᖅᑭᒃᓱᐃᔨᐅᑉ ᐅᖃᐅᓯᒃᓴᖏᓂ ᓴᖅᑮᕌᕐᔪᒃᓯᒪᓂᑐᐃᓐᓇᐅᒻᒪᑕ. ᑭᓯᐊᓂᓗ ᑕᕝᕙᐅᑎᓪᓗᒍᓕ, ᒪᓕᒐᓕᐅᕐᑎᕐᔪᐊᒃᑯᑦ ᑐᓴᐅᒪᑦᓯᐊᖅᐸᒌᕐᓗᑎᒃ ᓂᕈᐊᖅᖠᓂᖃᕈᓐᓇᕐᓂᐊᓕᕐᒪᑕ ᐃᑲᔪᕐᑐᐃᓂᕐᒥᓐᓄᑦ ᒪᓕᒐᒃᓴᖅ 25-ᒥᒃ.

ᐊᒻᒪᓗ ᑕᐃᒪᓐᓇ ᐱᓕᕆᓂᖃᖅᑎᓪᓗᒋᑦ, ᐃᒻᒪᖄᓕ ᐃᓱᒪᒃᓴᖅᓯᐅᕈᑎᖃᕈᓐᓇᖅᑐᑦ ᐊᐱᖅᑯᓯᖃᕆᐊᒥᓐᓄᑦ ᐊᑕᐅᓯᕐᒥᒃ ᒪᕐᕉᓐᓂᒃᓘᓐᓃᑦ NTEP-ᑯᑦ ᐱᓕᕆᐊᖓᑕ ᕿᒥᕐᕈᔭᐅᓯᒪᓂᖓᓄᑦ.

Share This Story

(0) Comments

Join the Conversation

Your email address will not be published. Required fields are marked *

*