ᓇᐃᓴᐃᒃᑲᓐᓂᐅᔪᑦ ᓇᓗᓇᐃᕐᓯᔾᔪᑎᐅᓚᐅᕐᑐᑦ ᓴᓂᕋᔭᒃᒥ ᒪᐃᔭᐅᓕᕐᑐᖅ ᓵᓚᕐᓴᓚᐅᕐᓂᖓᓂᒃ ᐊᑕᐅᓯᕐᒧᑦ ᓂᕈᐊᕈᑎᒧᑦ

For English version, see Recount determines Sanirajak mayor wins by one vote

ᓴᓂᕋᔭᒃ ᒪᐃᔭᑖᖤᑕᐃᓐᓇᖅᐳᖅ.

ᕕᓕᑉ ᐊᖑᒑᑦᓯᐊᖅ ᕼᐋᒻᒪᓚᒃᑯᓐᓄᑦ ᒪᐃᔭᐅᓕᕐᑐᖅ ᓇᐃᓴᐃᒃᑲᓐᓂᓚᐅᕐᓯᒪᑎᓪᓗᒋᑦ ᓂᕈᐊᕈᑎᓂᒃ ᓄᕕᐱᕆ 3-ᖑᑎᓪᓗᒍ ᖃᐅᔨᑦᑎᐊᕋᓱᒃᖢᑎᒃ ᐊᑕᐅᓯᕐᒥ ᓵᓚᖃᕈᑎᖃᕐᓂᖓᓂᒃ ᐆᒥᖓ ᐋᒥ ᑭᑉᓯᒐᖅᒥ, ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ ᑐᓴᖅᑎᑦᑎᓚᐅᖅᓯᒪᔪᑦ.

“ᐅᐊᑲᓪᓚᖔ ᓲᕐᓗ ᓯᓐᓇᒃᑐᖅᑐᖓ,” ᐊᖑᒑᑦᓯᐊᖅ ᐅᖃᓚᐅᕐᑐᖅ ᕙᐃᔅᐳᒃ ᑎᑎᕋᕐᕕᐊᒍᑦ ᓂᕈᐊᖅᑕᐅᓂᖓ ᓇᓗᓇᐃᖅᑕᐅᓚᐅᖅᑎᓪᓗᒍ — ᐅᓪᓗᑦ 11 ᐊᓂᒍᖅᑎᓪᓗᒋᑦ ᓂᕈᐊᕐᓇᐅᓚᐅᖅᖢᓂ.

ᓇᐃᓴᐃᒃᑲᓐᓂᕈᑎᐅᓚᐅᕐᑐᖅ ᓇᓗᓇᐃᕐᓯᔾᔪᑎᐅᓚᐅᕐᑐᖅ ᐊᖑᒑᑦᓯᐊᖅ ᓂᕈᐊᖅᑕᐅᓚᐅᕐᓂᖓᓂᒃ 57-ᓄ ᐊᒻᒪ ᑭᑉᓯᒐᖅ, ᒪᐃᔭᐅᓚᐅᕐᓯᒪᔪᖅ 2009-ᒥ 2011-ᒧ ᓂᕈᐊᖅᑕᐅᓪᓗᓂ 56-ᓄ.

“ᐃᓱᒪᐃᓐᓇᕋᓱᓚᐅᕐᑐᖓ ᓂᕈᐊᖅᑕᐅᔪᓐᓴᕐᓂᓐᓂ ᑕᐃᒪᓕ ᐅᑕᕿᑐᐃᓐᓇᓚᐅᖅᑐᖓ,” ᐊᖑᒑᑦᓯᐊᖅ ᐅᖃᕐᑐᖅ.

ᓇᐃᓴᐃᒃᑲᓐᓂᕐᓂᖅ, ᐱᓕᕆᐊᖑᓪᓗᓂ ᐃᖅᑲᖅᑐᐃᔨᕋᓛᒧᑦ, ᐱᓕᕆᓂᐅᔭᕆᐊᖃᓚᐅᕐᑐᖅ ᓲᖃᐃᒻᒪ ᐅᒃᑑᐱᕆ 23-ᒥ ᓂᕈᐊᕐᓇᒥ ᓄᓇᓕᖕᓂ ᐊᖑᒑᑦᓯᐊᖅ ᐊᒻᒪ ᑭᑉᓯᒐᖅ ᓂᕈᐊᖅᑕᐅᓚᐅᕐᒪᑎ ᐊᑐᓂ 57-ᓄᑦ ᑎᓴᒪᐅᑎᓪᓗᒋ ᓂᕈᐊᒐᒃᓴᐃᑦ ᒪᐃᔭᒃᓴᒧᑦ.

ᓇᓕᒧᒌᖕᓂᖅ ᓂᕈᐊᖅᑕᐅᓂᖅ ᓇᐃᓴᐃᔾᔪᑎᐅᒃᑲᓐᓂᕆᐊᖃᓕᓚᐅᕐᑐᖅ ᐊᐅᓚᑕᐅᓪᓗᓂ ᐃᖅᑲᖅᑐᐃᔨᕋᓛᒧᑦ ᓵᓚᒃᓴᖅᑐᒥ ᖃᐅᔨᓇᓱᒃᑎᓪᓗᒋᑦ. ᐅᓇ ᐊᑐᖅᑕᐅᔪᓐᓇᖅᑐᓂᒃ ᐃᓚᒋᔭᐅᖕᒪᑦ ᐅᕘᓇ ᓄᓇᕗᒥᑦ ᓂᕈᐊᖅᓂᕐᒧᑦ ᒪᓕᒐᖅᑎᒍᑦ.

ᓇᐃᓴᐃᒃᑲᓐᓂᕐᓂᖅ ᐋᖅᑭᒃᑕᐅᓯᒪᓚᐅᖅᑑᒐᓗᐊᖅ ᐅᒃᑑᐱᕆ 27-ᒧᑦ ᑭᓯᐊᓂᓕ ᑭᖑᕙᕆᐊᖅᑕᐅᔭᕆᐊᖃᓕᓚᐅᕐᒪᑦ ᖃᖓᑕᓲᖃᕈᓐᓇᓚᐅᙱᓐᓂᖓᓄᑦ ᐊᒻᒪᓗ ᐃᖅᑲᖅᑐᐃᔨᕋᓛᖅ ᓄᓇᓕᖕᓄᐊᕈᓐᓇᓚᐅᙱᖢᓂ ᓂᕈᐊᕐᓇᐅᓕᖅᑎᓪᓗᒍ.

ᐅᒃᑑᐱᕆ 23-ᒥ, ᓄᓇᖃᖅᑐᑦ ᓴᓂᕋᔭᒃᒥᑦ 171 ᓂᕈᐊᓚᐅᕐᓯᒪᔪᑦ ᒪᐃᔭᒧᑦ. ᓂᕈᐊᕈᓐᓇᖅᑐᑦ 43.2 ᐳᓴᓐᑎᖏᑦ ᐅᐸᓚᐅᕐᓯᒪᔪᖅ ᐅᕘᓇ ᑎᑎᕋᖅᓯᒪᓪᓗᓂ ᓂᕈᐊᖅᑐᓕᕆᔨᒃᑯᑦ ᓄᓇᕗᒥᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ. ᔭᐃᓴ ᖃᐃᕐᓂᖅ ᐱᖓᔪᒋᔭᐅᓚᐅᕐᑐᖅ ᓂᕈᐊᖅᑕᐅᓪᓗᓂ 33-ᓄᑦ, ᐅᓇᓕ ᑕᐃᕕᑎ ᑰᓕ ᓂᕈᐊᖅᑕᐅᓪᓗᓂ 24-ᓄᑦ.

ᒪᐃᔭᐅᓕᕐᖢᓂ ᐊᖑᒑᑦᓯᐊᖅ ᐃᓇᖐᔪᖅ ᔭᐃᐱᑎ ᐊᐅᓪᓚᕿᐊᖅᒥ, ᑖᓐᓇᓗ ᓂᕈᐊᒐᒃᓴᐅᓚᐅᙱᖢᓂ.