ᓇᐅᔮᒥ ᓯᕗᓕᐅᕐᑎᐅᔪᑦ ᑕᑯᔪᒪᔪᑦ ᐆᒥᖓ ᓄᑕᐅᙱᑦᑐᒥᒃ ᐋᓐᓂᐊᕕᕕᓂᕐᒥᒃ ᓄᑖᒍᕆᐊᖅᑎᑕᐅᔪᒥᒃ ᐃᓐᓇᑐᖃᕐᓄᑦ ᐊᖏᕐᕋᕆᔭᐅᓕᕐᓗᓂ

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᐃᒡᓗᒥ ᐸᕐᓇᐅᑎᖃᙱᓐᓂᕋᖅᖢᑎᒃ; ᒪᓕᒐᓕᐅᖅᑎ ᐅᖃᕐᑐᖅ ᑐᒃᓯᕋᕈᑎᐅᔪᖅ ᐃᑲᔪᖅᑐᐃᖏᓐᓇᕐᓂᐊᕐᓂᕋᖅᖢᓂᐅᒃ

ᓄᑕᐅᙱᑦᑐᖅ ᓇᐅᔮᓂᒃ ᐋᓐᓂᐊᕕᕕᓂᖅ ᓄᑖᙳᕆᐊᖅᑕᐅᔭᕆᐊᓕᒃ ᐊᖏᕐᕋᕆᔭᐅᔪᓐᓇᕐᓂᐊᕐᒪᑦ ᓇᐅᔮᒥ ᐃᓐᓇᑐᖃᕐᓄᑦ, ᐅᖃᕐᑐᐃᑦ ᓄᓇᓕᖕᓂ ᒪᓕᒐᓕᕆᔭᐅᒧᑦ. (ᐊᔾᔨᓕᐅᕆᔨ ᑕᐃᕕᑦ ᕕᐊᓐ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For the English version of this story, please see Naujaat elders want to see old health centre get new life as home for elders.

ᓄᓇᓕᖕᓂ ᓯᕗᓕᐅᕐᑎᒐᓚᐃᑦ ᓇᐅᔮᓂ ᑕᑯᔪᒪᔪᑦ ᐅᓇ ᓄᑕᐅᙱᑦᑐᖅ ᓇᐅᔮᓂ ᐋᓐᓂᐊᕕᕕᓂᖅ ᓄᑖᙳᕆᐊᖅᑕᐅᓗᓂ ᐊᒻᒪ ᐃᓐᓇᑐᖃᕐᓄᑦ ᐊᖏᕐᕆᔭᐅᓕᕐᓗᓂ.

ᐅᓇ ᐅᒡᓗ, ᑳᑐᓕᒃ ᑐᒃᓯᐊᕐᕕᐅᑉ ᐅᖓᑖᓃᑦᑐᖅ ᐊᒻᒪᓗ ᓴᓂᑦᑎᐊᖓᓂ ᓄᑖᒥ ᐋᓐᓂᐊᕕᒃᑕᖃᖅᖢᓂ, ᐊᒻᒪᓗ ᓈᒻᒪᑦᑎᐊᕋᔭᖅᖢᓂ ᐃᓐᓇᑐᖃᕐᓂ ᐊᖏᕐᕋᕆᔭᐅᓗᓂ ᐊᒻᒪ ᓄᓇᓕᖕᓄᑦ ᑲᒪᒋᔭᐅᓗᑎᒃ, ᐅᖃᕐᑐᖅ ᒪᐃᔭ ᐋᓚᓐ ᕌᐱᓐᓴᓐ.

ᐃᓄᖃᙱᖢᓂ, ᓱᕋᕐᓯᒪᓪᓗᓂ ᐊᒻᒪ ᐅᖂᓪᓗᓂ, ᐅᖃᕐᑐᖅ, ᑭᓯᐊᓂᓕ ᐃᓗᐊ ᓄᑖᙳᕆᐊᒐᒃᓴᐅᓪᓗᓂ ᐊᒻᒪ ᓴᓇᔭᒃᑲᓐᓂᕐᓗᑎᒃ 8 ᐃᒡᓗᕈᓯᖏᑦ ᐊᒻᒪ ᐃᑭᒪᕝᕕᖃᕐᓗᓂ ᖁᓪᓕᕐᓄᑦ ᓇᑎᕐᓄᐊᕈᑎᒃᓴᒥᒃ.

“”ᐅᓇ ᐃᒡᓗ ᐃᒍᑦᑎᕋᔭᕋᒃᑯ ᑭᓯᐊᓂ ᓴᐅᓂᖏᓐᓄᐊᕐᐸᑦ,” ᐊᐱᕐᓱᖅᑕᐅᑎᓪᓗᒍ ᐅᖃᓚᐅᕐᑐᖅ. ᓯᓚᑎᖓ ᐊᒃᑐᕋᔭᙱᑕᕋ, ᑭᓯᐊᓂᓕ ᐃᓗᐊ ᑕᒪᕐᒥᑦᑎᐊᖅ ᐲᔭᕋᔭᖅᖢᒍ.

“ᒫᓐᓇ ᐋᖅᑭᒃᓯᒪᓂᖓᒍ, ᑖᓐᓇ ᐃᒡᓗ ᓱᕋᒃᑎᖅᑕᐅᔭᕆᐊᓕᒃ, ᐊᒻᒪᓗ ᐃᑭᑎᑐᐃᓐᓇᕆᐊᓕᒃ. ᐊᐃᑦᑖᖑᒐᓗᐊᖅ ᑕᐃᒪᐃᒻᒪᑦ.”

ᐅᓇ ᐃᒡᓗ — ᑐᖑᔪᕈᔪᒃᖢᓂ, ᑲᔫᓪᓗᓂ ᐊᒻᒪ ᐊᐅᐸᖅᖢᓂ ᐊᒻᒪᓗ ᐃᒐᓛᖏᑦ ᓱᕋᒃᑎᕐᓯᒪᓪᓗᑎᒃ — ᐊᒻᒪᓗ ᐊᐃᕕᓕᒃᒧᑦ ᒪᓕᒐᓕᐅᖅᑎᐅᑉ ᓵᓚᒪᓐ ᒪᓕᑭᐅᑉ ᐃᒡᓗᖓᑕ ᐊᑭᑦᑎᐊᖓᓃᖢᓂ.

“ᑕᐃᑲᓃᑐᐃᓐᓇᕐᒪᑦ, ᐃᓄᖃᙱᖢᓂ,” ᒪᓕᑭ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ. “ᑭᓱᓕᕆᙱᑦᑐᖅ ᐊᒻᒪ ᓱᕋᒃᐸᓪᓕᐊᔪᖅ ᐊᐳᑎᒧᑦ ᐃᒪᕐᒧᓪᓘᓐᓃᑦ.”

ᐅᓇ ᐃᒡᓗ ᐅᓄᓗᐊᙱᑦᑐᓂᒃ ᐃᒡᓗᖃᕐᕕᖃᐅᕐᑐᖅ ᖁᓪᓕᕐᒥ ᓇᑎᕐᒥ ᐊᒻᒪ ᐊᑖᓂ 6ᓂ 7ᓂᓪᓘᓐᓃᑦ ᑎᑎᕋᕐᕕᖃᖅᖢᓂ, ᒪᓕᑭ ᐅᖃᓚᐅᕐᑐᖅ, ᐅᖃᒃᑲᓐᓂᖅᖢᓂ ᓈᒻᒪᑦᑎᐊᕐᓂᕋᖅᖢᓂᐅᑦ ᐃᓐᓇᑯᕕᐅᓂᐊᕐᓗᓂ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᖅᑎᒋᔭᐅᔪᖅ ᑏᓇᕇ ᓴᒧᕕᐊᓪ ᐅᖃᓚᐅᕐᑐᖅ ᒫᓐᓇ ᖃᓄᐃᓕᐅᕈᑎᒃᓴᓂᒃ ᐋᓐᓂᐊᕕᕕᓂᕐᒧᑦ ᐸᕐᓇᐅᑎᖃᙱᓐᓂᕋᐃᔪᖅ ᓲᕐᓗ ᐃᓐᓇᑐᖃᒃᑯᕕᐅᓂᐊᕐᓗᓂ, ᑭᓯᐊᓂᓕ “ᐃᓐᓇᕈᕐᓂᖅ ᓈᒻᒪᒃᑐᒃᑯᑦ” ᐃᓚᒋᔭᐅᓂᖓᓂᒃ ᓄᓇᕗᒥᑦ ᒐᕙᒪᒃᑯᑦ ᐱᓇᓱᐊᒐᖏᓐᓂᒃ.

ᐅᓇ ᐃᓚᖃᕐᑐᖅ ᐃᑲᔪᖅᑐᐃᓂᕐᒥᒃ ᐃᒻᒥᒃᑰᖓᔪᓂᒃ ᐅᕝᕙᓘᓐᓃᑦ ᐃᑲᔪᖅᑕᐅᔭᕆᐊᓕᖕᓂ ᐃᓐᓇᑐᖃᕐᓂ ᑖᒃᑯᐊ ᓄᓇᖏᓐᓃᖏᓐᓇᕈᓐᓇᖅᑎᑕᐅᓂᕐᒥᒃ, ᐅᖃᕐᑐᖅ.

ᒪᓕᑭ ᐃᓱᒪᔪᖅ ᒫᓂ 6 ᐃᓐᓇᑐᖃᐃᑦ ᐃᓐᓇᒃᑯᕕᖕᒥ ᑲᒪᒋᔭᐅᔭᕆᐊᖃᕐᓂᖏᓐᓂᒃ ᐱᑕᖃᕐᓂᕐᐸᑦ.

ᐅᖃᓚᐅᕐᑐᖅ ᑕᒪᓐᓇ ᐅᖃᐅᓯᕆᖃᑦᑕᐃᓐᓇᕐᓂᐊᕐᓂᕋᖅᖢᓂᐅᒃ ᒐᕙᒪᒃᑯᑦ ᐱᓕᕆᔨᒻᒪᕆᖏᓐᓄᑦ ᐊᒻᒪᓗ ᒪᓕᒐᓕᕆᕝᕕᒃᒥ.

“ᐃᓱᒪᒐᒪᓕ ᐃᓐᓇᑐᖃᐃᑦ ᓄᓇᖏᓐᓃᖏᓐᓇᖅᐸᒡᓗᑎᒃ, ᐊᓯᐊᓂ ᓄᓇᓕᐊᓗᖕᓂᐅᙱᑦᑐᖅ. ᐱᐅᓂᕐᓴᐅᒻᒪᕆᖕᒪ ᐃᓐᓇᑐᖃᕐᓄᑦ ᐊᒻᒪ ᐃᓚᒌᓄᑦ ᑲᑎᕐᖓᖃᑦᑕᕐᓗᑎᒃ ᖃᖓᑐᐃᓐᓇᒃᑯᑦ,” ᒪᓕᒋ ᐅᖃᕐᑐᖅ.

ᐊᓯᓇ ᐊᖑᑎᙳᐊᖅ, ᕼᐋᒻᒪᓚᒃᑯᓐᓄᑦ ᑲᑎᒪᔨᐅᖃᑕᐅᔪᖅ, ᐅᖃᓚᐅᕐᑐᖅ ᓄᑖᒥᓪᓕ ᐃᒡᓗᒥ ᓴᓇᖁᔨᓇᔭᕐᓂᖓᓂᒃ ᐃᓐᓇᑐᖃᒃᑯᕕᒃᓴᒥᒃ, ᑭᓯᐊᓂᓕ ᐃᓱᒪᖕᒥᔪᖅ ᐅᓇ ᓄᑕᐅᙱᑦᑐᖅ ᐋᓐᓂᐊᕕᕕᓂᖅ ᐊᑐᖅᑕᐅᔪᓐᓇᕋᔭᕐᓂᖓᓂᒃᑕᐅᖅ.

“ᐊᒃᓱᕈᕐᓇᖅᑐᐊᓘᖕᒪᓐ ᐃᓐᓇᑐᖃᕐᓂ ᐊᐅᓪᓚᖅᑎᑦᑎᓂᐊᕐᓗᓂ ᐊᓯᐊᓄᑦ ᐃᓐᓇᒃᑯᕕᖃᖅᑐᓄᑦ. ᐊᔪᕐᓇᖃᑦᑕᕐᒪᑦ ᐅᖃᖃᑎᒋᖃᑦᑕᕆᐊᒃᓴᖏᓐᓂᒃ ᐊᒻᒪᓗ ᐃᓚᒋᔭᐅᔪᓄᑦ ᐊᒃᓱᕈᕐᓇᖅᖢᓂ ᐊᐅᓪᓚᖅᑎᑦᑎᑎᓪᓗᒋᑦ,” ᐊᖑᑎᙳᐊᖅ ᐅᖃᓚᐅᕐᑐᖅ.

“ᐋᓐᓂᕈᑎᐅᖃᑦᑕᕐᒪᑦ ᐃᓚᒋᔭᐅᔪᓄᑦ.”

Share This Story

(0) Comments

Join the Conversation

Your email address will not be published. Required fields are marked *

*