ᓕᐳᕈᓪ ᒫᓐᑎ ᒑᓪ-ᒫᔅᑎ ᓵᓚᒃᓴᖅᑐᖅ ᓄᓇᕕᒃᒧᑦ ᓂᕈᐊᒐᒃᓴᐅᕝᕕᒋᔭᖓᓂᒃ

For the English version of this story, please see Mandy Gull-Masty wins Nunavik riding.

ᓕᐳᕈᓪ ᒫᓐᑎ ᒑᓪ-ᒫᔅᑎ ᓵᓚᒃᓴᓚᐅᕐᑐᖅ ᐅᑯᓄᖓ ᐊᐱᑎᐱ—ᔭᐃᒻᔅ ᐸᐃ—ᓄᓇᕕᒃ—ᐄᔭᐃ ᓂᕈᐊᒐᒃᓴᐅᕝᕕᒋᔭᖏᓐᓂᒃ ᖃᓂᒌᖏᓐᓇᓚᐅᖅᖢᑎᒃ ᓂᕈᐊᒐᒃᓴᐅᒃᑲᓐᓂᖅᑐᖅ ᓯᐊᕕ ᐸᕉᐱᒃᑯᑦ ᐊᒻᒪᓗ ᐊᐃᑉᐹᓂ ᐅᓪᓛᒃᑯᑦ ᓇᓗᓇᐃᖅᑕᐅᑦᑎᐊᒻᒪᕆᖅᖢᓂ.

ᒑᓪ-ᒫᔅᑎ ᓂᕈᐊᖅᑕᐅᓚᐅᖅᑐᑦ 12,256-ᓄᑦ, ᐅᕝᕙᓘᓐᓃᑦ 40.8 ᐳᓴᓐᑦᓄᑦ ᓂᕆᐊᕆᐊᖅᑐᓄᑦ ᓄᓇᕕᒃᒥ ᑖᓐᓇᓗ ᖃᐅᔨᔭᐅᑦᑎᐊᖅᖢᓂ ᐊᐃᑉᐹᓂ ᐅᓪᓗᒃᑯᑦ, 213 ᐅᑯᓇᙵᑦ 214-ᓂ ᓂᕈᐊᖅᕕᐅᑲᑕᒃᑐᓂᒃ. ᑐᒡᓕᕆᔭᐅᓚᐅᕐᑐᖅ ᓂᕈᐊᒐᒃᓴᐅᒃᑲᓐᓂᖅᑐᖅ ᓯᐊᕕ ᐸᕈᐱ ᑖᓐᓇᓕ ᓂᕈᐊᖅᑕᐅᓪᓗᓂ 10,296-ᓄᑦ ᐅᕝᕙᓘᓐᓃᑦ 34.2 ᐳᓴᓐᑎᖏᓐᓂᒃ ᓂᕈᐊᕆᐊᖅᑐᓂᒃ.

ᓯᑏᕝ ᑯᕆᕗ ᑲᓐᓲᕕᑎᕝᑯᓐᓄᑦ ᓂᕈᐊᒐᒃᓴᐅᓚᐅᕐᑐᖅ ᐱᖓᔪᒋᔭᐅᓚᐅᖅᑐᖅ ᓂᕈᐊᖅᑕᐅᓪᓗᓂ 6,788-ᓄᑦ ᐅᕝᕙᓘᓐᓃᑦ 22.6 ᐳᓴᓐᑎᓄᑦ ᓂᕈᐊᕆᐊᖅᑐᓄᑦ ᐊᒻᒪᓗ ᐅᓇ ᐊᓐᑏᐲᒃᑯᓐᓄᑦ ᓂᕈᐊᒐᒃᓴᖅ ᑕᐃ ᑎᓕᓐ ᕼᐃᒐᓱᕼᕋ 726-ᓄᑦ ᓂᕈᐊᖅᑕᐅᓪᓗᓂ ᐅᕝᕙᓘ*ᓃᑦ 2.4 ᐳᓴᓐᑎᓄᑦ.

“ᓱᓕᓕ ᐅᒃᐱᕈᓱᑦᑎᐊᓗᐊᙱᑦᑐᖓ,” ᒑᓪ-ᒫᔅᑎ ᐅᖃᕐᑐᖅ ᐅᖄᓚᐅᑎᒃᑯᑦ ᐊᐱᖅᓱᖅᑕᐅᓪᓗᓂ ᓯᐳᒐᒫᐅᒥᒃ ᐅᑯᓇᙵᑦ Maitre Renard Microbrewerie, ᑕᐃᑲᓂᓕ ᓂᕈᐊᕈᑎᓂᒃ ᑐᓵᕆᐊᖅᑐᕐᓯᒪᓪᓗᓂ ᐃᓚᖏᓪᓗ, ᓴᓇᖃᑎᖏᓪᓗᑦ ᐊᒻᒪ ᓄᓇᖃᑎᖏᓐᓂᒃ ᖁᕕᐊᓲᑎᖃᑎᖃᖅᖢᓂ.

ᐅᓄᖓᓄᑦ ᑎᑭᖢᓂ ᐅᑯᐊ ᒑᓪ-ᒫᔅᑎ ᐊᒻᒪ ᐸᕉᐱ ᓂᕈᐊᖅᑕᐅᔾᔪᑎᖏᑦ ᓂᑭᑦᑖᑲᑕᐃᓐᓇᓚᐅᖅᑑᒃ ᓯᕗᓪᓕᐅᓇᓱᖕᓂᕐᒧᑦ. ᐅᓐᓄᐊᒃᑯᑦ 1:30-ᖑᖅᑎᓪᓗᒍ ᒑᓪ-ᒫᔅᑎ ᓴᓚᖃᒻᒪᕆᖕᓂᖓᓂ ᐸᕉᐱᒥ ᓇᓗᓇᕈᓐᓃᓚᐅᕐᑐᖅ ᑖᓐᓇᓗ ᑲᑎᒪᔨᕐᔪᐊᙳᕐᓯᒪᓪᓗᓂ ᐱᒋᐊᖅᖢᓂ 2019-ᒥᑦ.

“ᐊᒃᓱᕈᕐᓇᕈᓘᔭᓚᐅᕐᑐᖅ,” ᒑᓪ-ᒫᔅᑎ ᐅᖃᕐᑐᖅ, ᐅᖃᖅᖢᓂ ᑖᒃᑯᓄᖓ ᓂᕈᐊᒐᒃᓴᐅᕝᕕᒋᔭᖏᑦ ᒫᓂ 50-ᐳᓴᓐᑎᖓᓃᓚᐅᕐᑐᖅ ᑕᒪᐃᓐᓂ ᑯᐸᐃᒃ ᑕᐅᑐᒃᖢᒍ.

“ᑕᐃᒪᐃᓕᐅᖅᖢᓂ ᐊᖏᓂᖅᐹᖑᔪᒃᓴᐅᔪᖅ ᐱᓕᕆᐊᕆᔭᐅᓇᓱᒡᓗᓂ.”

ᐅᖃᓚᐅᕐᑐᖅ, “ᓇᒧᙵᐅᕈᓘᔭᑲᑕᓚᐅᕐᑐᖓ; ᑕᒪᐃᓐᓂ ᐅᐸᑲᑕᒐᓱᒃᖢᖓ,” ᐊᒻᒪᓗ ᐅᖃᖅᖢᓂ ᓂᕈᐊᒐᒃᓴᓂ ᐅᐸᒍᑎᑲᑕᓚᐅᕐᑐᖅ ᑕᒪᐃᓐᓄᑦ ᓂᕈᐊᒐᒃᓴᐅᕝᕕᒋᔭᖏᓐᓄᑦ.

ᓈᒻᒪᙱᓕᐅᕈᑎᑕᖃᓚᐅᕐᒥᔪᖅ ᓄᓇᕕᒃᒥᑦ ᓂᕈᐊᕐᓇᐅ ᐅᓪᓗᖓᓂᒃ. ᐊᑯᓕᕕᒃᒥᑦ ᐊᒻᒪ ᐃᕗᔨᕕᒃᒥ ᓂᕈᐊᕐᕕᒃᓴᐃᑦ ᒪᑐᐃᓚᐅᙱᑦᑐᑦ, ᐊᓯᖏᓪᓗ ᓄᓇᓖᑦ ᓂᕈᐊᕐᓇᐅᑉ ᐃᑲᕋᖏᓐᓂᒃ ᓇᐃᒡᓕᒋᐊᖅᑎᑦᑎᓯᒪᓚᐅᕐᑐᑦ.

ᓂᕈᐊᕐᓇᖅᑐᓕᕆᔨᒃᑯᑦ ᑲᓇᑕᒥ ᑭᒡᒐᖅᑐᐃᔨᖓ ᐅᖃᓚᐅᕐᑐᖅ ᓯᓚ ᓈᒻᒪᙱᓗᐊᕐᓂᖓᓄᑦ ᐊᒻᒪ ᓈᒻᒪᙱᓕᐅᕈᑎᖃᖅᖢᑎᒃ ᐱᓕᕆᔨᒋᔭᐅᓂᐊᖅᑐᓂᒃ ᐱᓇᓱᒃᑎᓪᓗᒋᑦ.

ᑐᓴᖅᑎᑕᐅᒃᑲᓐᓂᓚᐅᙱᑦᑐᑦ ᓇᒡᒐᔾᔭᐅᒥ ᐅᖃᐅᓯᐅᓂᑯᑦ ᐊᓯᖏᓐᓂᒃ ᓂᕈᐊᕐᓂᓕᕆᓂᕐᒥᒃ ᓄᓇᕕᒃᒥᑦ, ᐊᒻᒪᓗ ᑖᓐᓇ ᖃᓄᐃᔾᔪᑎᐅᓂᐊᕐᒪᖔᑦ ᐃᓄᖕᓄᑦ ᓂᕈᐊᕈᓐᓇᓚᐅᙱᑦᑐᓄᑦ.

ᒑᓪ-ᒫᔅᑎ ᐅᖃᓚᐅᕐᑐᖅ ᓈᒻᒪᙱᓕᐅᕈᑎᒋᔭᐅᔪᓂᒃ ᐅᑯᓄᖓ ᓂᕈᐊᖅᑐᓕᕆᔨᒃᑯᓐᓄᑦ ᑲᓇᑕᒥ. “ᐅᓂᒃᑳᖅᑕᖃᕐᓂᐊᖅᑐᑦ ᐊᒻᒪᓗ ᑕᒪᓐᓇ ᖃᐅᔨᓴᖅᑕᐅᑦᑎᐊᕐᓗᓂ,” ᐅᖃᕐᑐᖅ. “ᒫᓐᓇᓕ ᓂᕈᐊᖅᑕᐅᓯᒪᓕᕋᒪ ᑕᒪᓐᓇᓗ ᐃᓱᒫᓘᑎᓄᑦ ᐃᓚᒋᔭᐅᓪᓗᓂ.”

ᐅᖃᖅᖢᓂ ᐅᔾᔨᕈᓱᒃᓯᒪᓂᖓᓂᒃ ᖃᓄᐃᑉᐸᓪᓕᐊᓯᒪᔪᓂᒃ ᐅᑭᐅᕐᑕᖅᑐᕐᒥ ᐊᒻᒪᓗ ᓄᓇᕕᒻᒥᐅᓄᑦ ᐱᔭᐅᔭᕆᐊᓕᖕᓂᒃ. “ᐱᓕᕆᐊᒃᓴᖅᑕᖃᒃᑲᓐᓂᕆᐊᖃᒻᒪᕆᖕᒪᑦ ᒪᑯᓂᖓ ᐊᑐᖅᑕᐅᓪᓚᕆᒃᑐᑦ ᒥᒃᓵᒍᑦ ᐊᒻᒪᓗ ᓄᓇᕕᒃ ᐊᕕᑕᐅᓯᒪᓗᐊᖅᖢᓂ,” ᐅᖃᕐᑐᖅ.

“ᐊᑯᓂᓗᐊᕌᓗᒃ ᓄᓇᕕᒻᒥᐅᑦ ᓱᖁᑎᒋᔭᐅᙱᓗᐊᕐᒪᑕ, ᒫᓐᓇᓕ ᑕᐃᒪᐃᔾᔮᔪᓐᓃᖅᑐᖅ.”