ᕙᐃᔅᐳᒃ ᐊᑐᐃᓐᓇᐅᓕᕐᑐᖅ ᐃᓄᒃᑎᑐᑦ

For English version, see Facebook now available in Inuktitut

ᕙᐃᔅᐳᒃ ᐃᓄᒃᑎᑐᑦ ᐊᑐᐃᓐᓇᐅᓕᕐᑐᖅ.

ᑐᓴᒐᒃᓴᑎᒍᑦ ᔪᓚᐃ 8-ᖑᑎᓪᓗᒍ ᕿᑭᖅᑖᓘᑉ ᓂᒋᐊᓂ ᐃᓄᐃᑦ ᐅᖃᐅᓯᖓ ᐅᖃᐅᓯᐅᓕᖅᑐᖅ ᕙᐃᔅᐳᒃᑯᑦ ᐋᖅᑭᒃᑕᐅᓯᒪᓪᓗᓂ ᓴᖅᑭᔮᒐᖃᕐᕕᖕᒥᑦ, ᐅᖃᓚᐅᕐᑐᑦ ᒦᑕᑯᑦ, ᑲᒻᐸᓃᐅᔪᑦ ᓇᖕᒥᓂᖃᖅᑏᑦ ᕙᐃᔅᐳᒃᒥ

ᑐᑭᓕᐅᕆᔭᐅᓯᒪᔪᑦ ᐋᖅᑭᒃᑕᐅᓯᒪᔪᑦ ᐊᕐᕌᒍᓂ ᑎᓴᒪᓂᒃ ᐱᓕᕆᖃᑎᒌᖕᓂᖏᑦᑎᒍᑦ ᐅᑯᐊ ᒦᑕ ᐊᒻᒪ ᓄᓇᕗᑦ ᑐᙵᕕᒃᑯᑦ ᐅᓇ ᐃᓄᐃᑦ ᐅᖃᐅᓯᖓ ᐊᑐᖅᑎᑕᐅᒃᑲᓐᓂᕋᓱᒃᖢᓂ ᓄᓇᕗᒥᑦ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᕐᑐᖅ ᐃᓱᒪᒋᔭᖃᖃᑎᖃᓚᐅᕐᓂᖓᓂᒃ ᒦᑕᒃᑯᑦ ᑐᑭᒧᐊᖅᑎᑦᑎᔨᖓᓂᒃ ᑭᐊᕕᓐ ᓵᓐᒥ, 2017-ᖑᑎᓪᓗᒍ.

ᐅᖃᓚᐅᕐᑐᖅ ᑐᓴᐅᒪᔾᔪᑎᓕᕆᓂᒃᑯᑦ ᐃᓂᖃᕈᑎ ᐆᑯᓇᖅ ᕙᐃᔅᐳᒃᑎᑐᑦ ᑐᑭᓕᐅᕆᔭᐅᓯᒪᓪᓗᓂ ᐃᓄᒃᑎᑐᑦ “ᓇᓗᓇᐃᖅᓯᔾᔪᑎᐅᔪᖅ ᐅᖃᐅᓯᕗᑦ ᐱᒻᒪᕆᐊᓘᓂᖓᓂᒃ.”

“ᐆᒥᖓ ᒫᓐᓇᓕᓴᐅᓕᖅᑐᒥᒃ ᑐᓴᐅᒪᔾᔪᑎᓕᕆᓂᖅᒥ ᐊᑐᐃᓐᓇᐅᑎᑕᐅᓂᖓ ᐃᓄᒃᑎᑐᑦ ᓇᓗᓇᐃᖅᓯᔾᔪᑎᐅᔪᖅ ᐅᖃᐅᓯᕗᑦ ᑭᓲᙱᓐᓂᕐᓴᐅᙱᓐᓂᖓᓂᒃ ᖃᓪᓗᓈᑦ ᐅᖃᐅᓯᖓᓂᒃ, ᑭᓲᙱᓐᓂᕐᓴᐅᙱᑦᑐᖅ ᐅᐃᕖᑐᑦ ᐅᖃᐅᓯᕐᒥ ᐊᒻᒪᓗ ᐅᖃᐅᓯᖅ ᐊᑐᖅᑕᐅᔪᓐᓇᑦᑎᐊᕐᓂᖓᓂᒃ ᒫᓐᓇᓕᓇᐅᓕᖅᑐᒥᒃ ᓄᓇᕐᔪᐊᒥᓐ.”

ᑐᑭᓕᐅᕆᓂᖅ ᐊᐅᓚᑕᐅᓚᐅᕐᑐᖅ ᐱᕈᕐᕕᒃᒥ ᐃᖃᓗᖕᓂ, ᒫᓂ 4,500 ᐅᖃᐅᓰᑦ ᐃᓄᒃᑎᑑᓕᖅᑕᐅᓯᒪᓪᓗᑎᒃ.

ᐃᓚᖏᓐᓂ, ᐱᕈᕐᕕᒃ ᓄᑖᓂ ᐅᖃᐅᓯᕐᓂ ᐋᖅᑭᒃᓯᖃᑦᑕᓚᐅᕐᑐᖅ ᓲᖃᐃᒻᒪ ᐃᓄᒃᑐᑦ ᑐᑭᓕᐅᕆᔭᒃᓴᐅᖃᑦᑕᓚᐅᙱᒻᒪᑕ. ᐃᓚᖃᓚᐅᖅᑐᑦ ᐆᒥᖓ ᐅᖃᐅᓯᕐᒥ “Facebook page.,” ᐃᒪᓐᓇ ᖃᐅᔨᒪᔭᐅᓂᐊᓕᕐᑐᖅ “ᕙᐃᔅᐳᒃ ᒪᒃᐱᒐᖅ.”

ᑎᐊᐱ ᕈᐄᑦ, ᒦᑕᑯᓐᓄᑦ ᓄᓇᖃᖅᑳᖅᑐᓄᑦ ᐊᑐᐊᒐᓕᕆᓂᕐᒧᑦ ᐊᐅᓚᑦᑎᔨ, ᐅᖃᓚᐅᕐᑐᖅ ᐱᓕᕆᐊᖑᔪᖅ ᓴᖅᑭᑎᑦᑎᓯᒪᓂᖓᓂᒃ ᖃᓄᖅ ᐃᓄᒃᑎᑐᑦ ᐅᖃᐅᓯᖅ ᐊᒻᒪ ᕙᐃᔅᐳᒃ ᓴᖅᑭᔮᒐᖃᕐᕕᖓ ᐱᕈᖅᐸᓪᓕᐊᔪᓐᓇᕐᓂᖓᓂᒃ ᐊᒻᒪ ᐋᖅᑭᖃᑦᑕᐅᑎᓕᕈᓐᓇᕐᓂᖏᖕᓂᒃ.

“ᐅᕙᓐᓄᓪ ᐅᖃᐅᓯᐅᖕᒪ ᐊᑐᒻᒪᕆᒃᖢᓂ ᐊᒻᒪᓗ ᖃᐅᔨᕙᓪᓕᐊᔾᔪᑎᐅᓪᓗᓂ ᓄᑖᓂ ᐊᑐᖅᑕᐅᔾᔪᑎᒃᓴᓂᒃ ᐅᖃᐅᓯᕐᒧᑦ ᒫᓐᓇ ᐱᓕᕆᔾᔪᑎᓄᑦ ᐊᑐᖅᑕᐅᔾᔪᓄᑦ.”

ᕙᐃᔅᐳᒃ ᐊᑐᖅᑕᐅᓛᖑᔪᖅ ᑐᓴᐅᒪᖃᑦᑕᐅᑎᔾᔪᑎᒋᔭᐅᓪᓗᓂ ᓄᓇᕗᒥᑦ, ᔫᑳᓐᒥ ᐊᒻᒪ ᓄᓇᑦᓯᐊᕐᒥ, ᐅᑯᐊ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᔾᔪᑎᓂᒃ ᖃᐅᔨᓴᖅᑎᑦ (Media Technology Monitor) ᐅᓂᒃᑳᖏ ᐅᖃᕐᓯᒪᔪᑦ ᑐᓴᐅᒪᔾᔪᑎᓕᕆᓂᕐᒧᑦ ᐊᑐᖅᑕᐅᕙᖕᓂᖏᓐᓄᓪᓗ.

ᕈᐄᑦ ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᕙᐃᔅᐳᒃ ᐊᑐᐃᓐᓇᐅᑎᑕᐅᓂᖓ ᐃᓄᒃᑎᑐᑦ ᐃᑲᔪᕋᕐᓕᖓᓕᒃ ᓗᑲᒃᖠᕐᓂᒃ ᐃᓄᖕᓂ ᐃᓕᓐᓂᐊᕈᒪᔪᓂᒃ ᐅᖃᐅᓯᖏᓐᓂᒃ.

“ᕙᐃᔅᐳᒃ ᑐᓴᐅᒪᔾᔪᑎᓕᕆᔾᔪᑎᑦᑎᐊᕙᐅᖕᒪᓐ, ᑭᓯᐊᓂᑦᑕᐅᖅ ᐃᓱᒪᔪᖓ ᐊᔪᕈᓐᓃᖅᓴᕈᑎᐅᓇᔭᕐᓂᖓᓂᒃ,” ᐅᖃᕐᑐᖅ.

“ᑲᒪᓇᐃᓐᓇᐅᔭᕐᒪ ᐅᕙᓐᓄ ᐅᖃᐅᓯᕐᓂ ᐊᓯᐅᔨᑦᑕᐃᓕᒪᓂᐅᔪᓂᒃ ᓄᑖᓂᒃ, ᐅᖃᐅᓯᖃᖃᑎᒌᖕᓂᕐᒥᒃ, ᐊᒻᒪ ᐅᑎᖅᑎᑕᐅᓯᒪᓂᖓᓂᒃ ᓄᑖᒃᑯᑦ ᐅᖃᐅᓯᐅᕙᓪᓕᐊᔪᑎᒍᑦ ᐊᒻᒪᓗ ᖃᓄᖅ ᐅᖃᓕᒫᕈᓐᓇᕈᓐᓇᕐᓂᕐᒥᒃ.”

ᕙᐃᔅᐳᒃ ᐱᒋᐊᖅᑎᑦᑎᓂᖓ ᐃᓄᒃᑎᑐᑦ ᒪᓕᒃᓯᒪᔪᖅ ᓄᓇᕐᔪᐊᕐᒥ ᑲᑐᔾᔨᖃᑎᒌᓄᑦ ᐊᕐᕌᒍᒥ ᖁᓕᓂᒃ ᓄᓇᖃᖅᑳᖅᑐᑦ ᐅᖃᐅᓯᖏᓐᓄᑦ, ᐱᒋᐊᖅᑕᐅᓚᐅᕐᑐᖅ ᐅᔾᔨᕈᓱᓕᖅᑎᑦᑎᓂᕐᒥᒃ ᓄᓇᖃᖅᑳᖅᑐᑦ ᐅᖃᐅᓯᖏ ᓄᖑᑉᐸᓪᓕᐊᓗᐊᕐᓂᖏᓐᓂᒃ ᓄᓇᕐᔪᐊᒥ, ᑐᓴᒐᓴᓕᐊᕆᔭᐅᔪᖅ ᐅᖃᕐᓯᒪᔪᖅ.