ᖁᑦᑎᖕᓂᖅᓴᒧᑦ ᐃᓕᓐᓂᐊᕐᕕᐅᔪᑦ ᓵᙵᔭᕆᐊᖃᖅᐳᑦ ᑭᓴᐅᓂᖏᓐᓂ ᐸᓯᒃᓯᔾᔪᑕᐅᔪᓂ, ᐃᓕᓴᐃᔨᐅᔪᖅ ᐅᖃᖅᐳᖅ

ᐃᓅᓪᓗᓂ ᓯᓚᑦᑐᖅᓴᕐᕕᒡᔪᐊᒥ ᐃᓕᓴᐃᔨᐅᔪᖅ ᐅᖃᖅᐳᖅ ᖁᑦᑎᖕᓂᖅᓴᒧᑦ ᐃᓕᓐᓂᐊᕐᕕᑦ ᓇᓂᓯᔭᕆᐊᖃᖅᐳᑦ ᐱᓕᕆᓂᐅᔪᓂ ᑲᒪᒋᔭᖃᕐᓂᕐᒥ ᐸᓯᒃᓯᔾᔪᑕᐅᔪᓂ ᐃᓄᖕᓂ ᓴᒡᓗᓪᓗᑎᒃ ᓄᓇᖃᖅᑳᖅᓯᒪᔪᓂᙶᖅᓯᒪᓂᖏᓐᓂ ᑮᓇᐅᔭᒥᒃ ᐱᓂᕐᒧᑦ.

ᐅᖃᐅᓯᒃᓴᓕᐅᓚᐅᖅᐳᖅ ᑐᓴᓚᐅᖅᑎᓪᓗᒍ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᓂ ᐅᖃᐅᓯᒃᓴᓕᐊᖑᔪᒥ ᖃᐅᔨᓴᕐᓂᖓᓐᓂ ᑕᐃᓯᓚᐅᖅᑐᒥ “ᐱᕋᔭᒃᑐᕕᓂᐅᔪᖃᑐᐃᓐᓇᕆᐊᖃᕐᓂᖓᓂ ᐊᑎᓕᐅᖅᑕᐅᖃᑕᐅᓯᒪᓂᕐᒧᑦ” ᒪᕐᕉᖕᓂ ᐊᕐᓇᓂ ᐃᓄᖕᓂ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ.

ᐊᒥᐅᕋ ᒋᐅᓪ, ᓴᐅᒥᖕᒥ, ᐊᒻᒪ ᒪᕐᕈᓕᐊᖑᖃᑎᖓ ᓄᑲᖓ ᓇᑦᔭ ᑕᑯᒃᓴᐅᕗᑦ ᐊᔾᔨᓕᐅᖅᑕᐅᓂᑯᓂ ᔫᓂ 2021−ᒥ CTV ᑐᓴᒐᒃᓴᓕᐊᖑᔪᒥ ᐅᓂᒃᑳᓕᐊᖑᔪᒥ. (CTV ᐋᑐᕚᒥ ᐊᔾᔨᖁᑎᖓ)

ᑳᓚ ᔭᓯᓐ ᐅᐃᓕᐊᒻᓴᓐ, ᐃᓄᒃ ᑲᓛᖦᖡᑦ ᓄᓈᓐᓂ, ᐃᓕᓴᐃᔨᐅᕗᖅ ᓴᔅᑳᑦᓱᐊᓐ ᓯᓚᑦᑐᖅᓴᕐᕕᒡᔪᐊᖓᓂ ᐊᒻᒪ ᑐᓂᓯᓯᒪᕗᖅ ᐊᕐᕌᒍᒐᓵᓗᖕᓂ ᐃᓕᓐᓂᐊᕐᓂᕐᒧᑦ ᖃᐅᔨᓴᕐᓂᐅᔪᒥ ᐊᔾᔨᒌᙱᑦᑐᓂ ᐃᓄᖕᓄᑦ ᐅᖃᐅᓯᒃᓴᐅᔪᓂ.

ᐃᓕᓐᓂᐊᕌᓂᒃᓯᒪᓂᖓᓂ ᖃᐅᔨᓴᕐᓂᕐᒥ ᐃᓅᖃᑎᒌᖕᓂᐅᔪᒥ ᐊᒻᒪ ᐅᖃᖅᐳᖅ ᓯᕗᓪᓕᖅᐸᐅᓪᓗᓂ ᐃᓅᓪᓗᓂ ᐃᓂᖃᐃᓐᓇᕐᓂᐊᖅᑐᒥ ᐃᓕᓴᐃᔨᐅᓂᖓᓂ ᑲᓇᑕᒥ ᓯᓚᑦᑐᖅᓴᕐᕕᒡᔪᐊᖑᔪᒥ.

ᔭᓯᓐ ᐅᐃᓕᐊᒻᓴᓐ ᐅᖃᓚᐅᖅᐳᖅ ᖁᐊᖅᓵᓚᐅᕐᓂᖓᓂ ᐅᖃᓕᒫᕐᓂᕐᒧᑦ ᑐᓴᒐᒃᓴᐅᔪᒥ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᒥ, ᑲᑐᔾᔨᖃᑎᒌᖑᔪᖅ ᑲᒪᒋᔭᖃᖅᑐᒥ ᐊᑎᓕᐅᖅᑕᐅᓯᒪᓂᖏᓐᓂ ᐃᓄᖕᓂ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᓄᓇᕗᒻᒥ ᐊᖏᕈᑕᐅᔪᒥ, ᕿᓂᖅᐳᑦ ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂ ᐃᓱᓕᑦᑎᓂᑯᑦ ᐊᒥᐅᕋ ᐊᒻᒪ ᓇᑦᔭ ᒋᐅᓪ ᐱᕋᔭᒃᑐᕕᓂᐅᔪᖃᑐᐃᓐᓇᕆᐊᖃᕐᓂᖓᓂ ᐊᑎᓕᐅᖅᑕᐅᓯᒪᓂᖏᓐᓂ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᐊᓈᓇᖓᑕ, ᑲᕆᒪ ᒪᓐᔨᒧᑦ.

ᒋᐅᓪ ᐊᖓᔪᒌᒃ ᐱᓚᐅᖅᐳᑦ ᐃᓕᓴᕆᔭᐅᓂᖏᓐᓂ ᑯᐃᓐᑯᓐᓂ ᑮᓇᐅᔭᓂ ᐃᑲᔪᖅᑕᐅᓪᓗᑎᒃ Indspire−ᑯᓐᓂ, ᑲᓇᑕᒥ ᐊᔪᖅᓴᖅᑐᓄᑦ ᑐᓂᓯᕙᒃᑐᓂ ᑮᓇᐅᔭᓕᐅᕋᓱᐊᖅᑎᐅᙱᑦᑐᓂ ᑐᓂᓯᕙᒃᑐᓂ ᐃᑲᔪᖅᓱᐃᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᖁᑦᑎᖕᓂᖅᓴᒧᑦ ᐃᓕᓐᓂᐊᕐᕕᖕᒧᑦ ᐃᓕᓐᓂᐊᖅᑎᐅᔪᓄᑦ.

ᔭᓯᓐ ᐅᐃᓕᐊᒻᓴᓐ ᐅᓂᒃᑳᕆᕗᖅ ᓯᕗᓂᐊᓂ ᐃᓕᓐᓂᐊᕐᓂᕆᓚᐅᖅᑕᖓᓂ ᐊᔭᐅᖅᑕᐅᓪᓗᓂ ᐃᓕᖅᑯᓯᒥᒃ ᐊᖅᓵᖅᑕᐅᓂᕐᒥ ᐊᔾᔨᒌᓕᖅᑎᑕᐅᓇᓱᐊᕐᓂᕐᒥ ᑕᐃᓂᔅ ᐃᓕᖅᑯᓯᖓᓐᓄᑦ, ᐊᐅᓪᓚᖅᑎᑕᐅᓪᓗᓂ ᐃᓄᖕᓂ ᓄᓇᓕᖓᓐᓂ. ᖁᑦᑎᖕᓂᖅᓴᒧᑦ ᐃᓕᓐᓂᐊᕐᕕᖕᒧᑦ ᐃᖅᑲᓇᐃᔮᕆᔪᒪᔭᖓᓐᓂ, ᐅᕙᓂᐅᖏᓐᓇᒐᓚᓚᐅᖅᑐᒥ ᓴᒡᑳᑦᓱᐊᓐ ᓯᓚᑦᑐᖅᓴᕐᕕᒡᔪᐊᒥ, ᐅᖃᓚᐅᖅᐳᖅ ᑮᓇᐅᔭᑎᒍᑦ ᐃᑲᔪᖅᓯᖅᑕᐅᓚᐅᙱᓚᖅ.

“ᖃᐅᔨᒪᙱᑦᑎᐊᖅᐳᑦ ᐊᒃᓱᕈᕐᔪᐊᖅᓯᒪᓂᑦᑎᓐᓂ … [ᐅᓇ] ᐊᒃᓱᒻᒪᕆᐊᓗᒃ ᕿᐊᓱᙳᓇᖅᐳᖅ ᐊᖏᖅᑕᐅᓯᒪᓚᐅᙱᓐᓇᑦᑕ ᐃᓅᓂᕐᒥ,” ᐅᖃᓚᐅᖅᐳᖅ.

“ᑕᐃᒃᑯᓄᖓ ᒪᕐᕉᔪᓄᑦ ᐃᓄᖕᓄᑦ ᑐᓂᔭᐅᓂᖏᓐᓂ ᑮᓇᐅᔭᖃᖅᑎᑕᐅᓂᕐᒥ, ᐱᓚᐅᙱᑎᓪᓗᖓ ᑮᓇᐅᔭᖃᖅᑎᑕᐅᓂᕐᒥ ᑐᕌᖓᔪᒧᑦ ᑕᒪᒃᑭᓂ ᐱᓕᕆᓂᖃᕐᓂᕐᓂᑦ ᓯᓚᑦᑐᖅᓴᕐᕕᒡᔪᐊᒥ … ᐅᐊᑲᓪᓚᖔ ᑕᐃᒪᐃᓕᐅᕈᓐᓇᖅᐸᑦ?”

ᐅᓂᒃᑳᖅᑐᐊᓂ ᐃᓄᖕᓂ ᓴᒡᓗᓪᓗᑎᒃ ᓄᓇᖃᖅᑳᖅᓯᒪᓂᕋᐃᓪᓗᑎᒃ ᑐᓴᓕᓵᙱᑉᐸᖓ ᔭᓯᓐ ᐅᐃᓕᐊᒻᓴᓐᒧᑦ.

ᓇᖕᒥᓂᖅ ᓯᓚᑦᑐᖅᓴᕐᕕᒡᔪᐊᖓᓂ, ᐃᓅᓕᓴᐃᓂᕐᒧᑦ ᐃᓕᓴᐃᔨᐅᔪᖅ. ᑭᐊᕆ ᐳᕌᓴ, ᓄᖅᑲᓚᐅᖅᐳᖅ ᐊᕐᕌᓂ ᐊᐱᖅᑯᑕᐅᔪᓄᑦ ᓇᖕᒥᓂᖅ−ᐅᖃᐅᓯᖃᕐᓂᖓᓂ ᐊᓪᓚᖓᔫᓂᕋᐃᓪᓗᓂ. ᑕᐃᔅᓱᒪᓂ, ᐳᕌᓴ ᐅᖃᓚᐅᖅᐳᖅ ᑕᑯᒃᓴᐅᓂᖃᙱᓐᓂᖓᓂ ᐊᓪᓚᖓᔫᓂᖓᓂ ᑭᓯᐊᓂ ᐱᓕᕆᕙᓪᓕᐊᓚᐅᖅᐳᖅ ᑲᑎᖅᓱᐃᓂᖓᓂ ᓯᕗᕚᖏᓐᓂᑦ.

ᑕᐃᓐᓇ ᐱᓂᕐᓗᖕᓂᐅᔪᒥ, ᐅᓂᒃᑳᕆᔭᐅᓚᐅᖅᑐᒥ ᑲᓇᑕᒥ ᑐᓴᒐᒃᓴᓕᐊᖑᔪᓂ, ᑐᕌᖅᑎᑦᑎᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᒥ ᐱᒋᐊᖅᑎᑦᑎᓂᖏᓐᓂ ᐱᓕᕆᐊᒃᓴᓄᑦ ᑲᑎᙵᓂᐅᔪᒥ ᓇᓗᓇᐃᖅᓯᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᑭᓇᐅᓂᕋᐃᔪᓂ ᑕᒪᒃᑭᓄᑦ ᐃᖅᑲᓇᐃᔭᖅᑎᖏᓐᓄᑦ ᐊᒻᒪ ᐃᓕᓐᓂᐊᖅᑎᐅᔪᓂ.

ᔭᓯᓐ ᐅᐃᓕᐊᒻᓴᓐ ᐅᖃᓚᐅᖅᐳᖅ ᕿᒥᕐᕈᔭᐅᕐᔪᐊᕐᓂᖏᓐᓂ ᐃᓄᐃᑦ ᑭᓇᐅᓂᖏᓐᓂ ᐃᑲᔪᕋᔭᖅᐳᖅ ᓇᓗᓇᐃᖅᓯᓂᕐᒥ ᑭᓇᑐᐃᓐᓇᖅ ᓄᓇᖃᖅᑳᖅᓯᒪᔫᙱᑦᑐᒥ ᐃᓂᒃᓴᒥ ᐊᖅᓵᖅᓯᓯᒪᙱᓐᓂᖏᓐᓂ ᐊᒻᒪ ᑮᓇᐅᔭᖃᖅᑎᑕᐅᓂᐅᔪᒥ ᐊᑐᖅᑕᐅᓪᓗᐊᖅᑐᒥ ᐃᑲᔪᖅᓱᐃᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᐅᔪᓂ ᐃᓕᓐᓂᐊᕐᓂᖏᓐᓂ.

“ᐃᓕᓐᓂᐊᕐᕕᐅᔪᓄᑦ ᑐᓂᓯᓯᒪᔪᓂ [ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐊᖏᓐᓄᑦ ᐊᔪᙱᓛᖑᓂᐊᒍᑦ ᐱᓪᓗᒍ] ᑕᐃᒃᑯᓄᖓ, ᐊᒻᒪ ᐊᒥᓱᐊᓗᖕᓂ ᐱᓕᕆᓂᐅᔪᓂ, ᒪᑐᐃᖅᓯᔫᔮᖅᐳᖅ ᖃᑦᑕᕐᒥ ᖁᐱᕐᕈᓂ ᑕᐃᒪᐃᓐᓂᕐᒧᑦ: ᐊᑐᓂ ᐃᓕᓐᓂᐊᕐᕕᐅᔪᓂ ᓇᓗᓇᐃᖅᓯᓪᓗᑎᒃ ᐱᓕᕆᕙᖕᓂᖏᓐᓂ ᑕᒻᒪᙱᑦᑐᒥ” ᐅᖃᓚᐅᖅᐳᖅ.

“ᖃᐅᔨᒪᕗᖓ ᐊᑐᖅᓯᒪᓂᓐᓂ ᐊᒃᓱᕈᕐᓇᖅᑐᒃᑯᑦ, ᐅᕘᓇ ᐅᑯᓇᓂ ᐊᔾᔨᒌᙱᑦᑐᓂ ᐃᓕᓐᓂᐊᕐᕕᐅᔪᓂ ᐅᖃᕈᓐᓇᕐᓂᓐᓂ ᑭᓇᐅᓂᓐᓂ, ᐊᒻᒪ ᐱᓕᕆᓂᕐᒥ ᖃᐅᔨᒪᓂᐅᔪᒥ ᐱᓯᒪᔭᓐᓂ ᓯᕗᕚᓐᓂ.”

ᐊᒥᐅᕋ ᒋᐅᓪ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐃᓅᓂᖓ ᐅᕙᙶᕐᓂᖓᓂ ᓄᐊ ᐊᒻᒪ ᕼᐃᐅᔅ ᐃᓚᒌᖑᔪᓂ ᐃᖃᓗᖕᓂ.

ᑭᓯᐊᓂ ᓄᐊ ᓄᐊ, ᐊᓈᓇᖓ ᑭᑎ ᓄᐊᖑᔪᖅ ᐊᒻᒪ ᐊᑖᑕᒋᓚᐅᖅᑕᖓ ᕼᐃᐊᕆᐅᓚᐅᖅᐳᖅ “ᐸᑦ” ᕼᐃᐅᔅ, ᐅᖃᓚᐅᖅᐳᖅ ᒋᐅᓪᔅ−ᖑᔪᑦ ᐃᓚᖃᙱᑦᑎᐊᖅᐳᑦ ᐃᓚᖏᓐᓄᑦ.

ᐊᐱᖅᑯᑕᐅᔪᓂ ᒋᐅᓪ ᐊᖓᔪᒌᖕᓂ ᐃᓅᓂᕋᐃᓐᓂᖏᓐᓂ ᓴᖅᑭᕐᔪᐊᓚᐅᖅᐳᖅ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᖄᖏᖅᓯᒪᓕᖅᑐᓂ ᐱᓇᓱᐊᕈᓯᐸᓗᖕᓂ ᐱᖓᓱᓂ.

ᐊᐃᕙᔾᔪᑕᐅᓂᐅᔪᖅ ᐱᖏᐊᓚᐅᖅᑎᓪᓗᒍ ᑭᓯᐊᓂ ᓯᕗᓂᐊᓂ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᑦ ᐅᖃᐅᓯᖃᓚᐅᖅᑳᕐᓇᑎᒃ ᖃᐅᔨᓴᖅᑕᐅᓂᖓᓂ, ᐊᒥᐅᕋ ᒋᐅᓪ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᑦ ᐊᑎᓕᐅᖅᑕᐅᖃᑕᐅᓯᒪᓂᕐᒧᑦ ᐊᐅᒃᑕᔫᑦ ᐃᒻᒥᓂᒃ ᐊᒻᒪ ᓄᑲᖓᑕ ᑐᓂᔭᐅᓚᐅᕐᓂᖏᓐᓂ “ᓱᕈᓯᐅᑎᓪᓗᒋᑦ” ᐊᒻᒪ “ᖃᐅᔨᒪᓂᖃᙱᓐᓂᖏᓐᓂ ᐊᑎᓕᐅᖅᑕᐅᖃᑕᐅᓯᒪᓂᕐᒧᑦ ᐱᓕᕆᓂᐅᔪᒥ.”

ᐅᖃᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᓴᖅᑭᑎᑦᑎᓯᒪᙱᓚᑦ ᑭᓇᐅᓂᖏᓐᓂ ᐃᓄᖕᓂ ᐸᓯᒃᓯᔾᔪᑕᐅᔪᓕᐅᖅᑐᓂ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ, ᖃᐅᔨᓴᖅᓯᒪᓇᑎᒡᓗ ᐅᒃᐱᕐᓇᕐᓂᖏᓐᓂ.

ᐊᒥᐅᕋ ᒋᐅᓪ ᑭᐅᓯᒪᙱᓚᖅ ᖃᔅᓯᒐᓚᖕᓄᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᑐᒃᓯᕋᖅᑐᓂ ᐅᖃᐅᓯᒃᓴᓕᐅᕐᓂᕐᒧᑦ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᑦ ᖃᐅᔨᓴᖅᑕᐅᓂᖓᓄᑦ. ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᕈᓐᓇᖅᓯᒪᙱᑦᑎᐊᖅᐳᑦ ᓇᑦᔭ ᒋᐅᓪ ᐅᕝᕙᓘᓐᓃᑦ ᑲᕆᒪ ᒪᓐᔨᒥ.

ᑯᐃᓐᑯᑦ ᓯᓚᑦᑐᖅᓴᕐᕕᒡᔪᐊᒥ ᐅᖃᖅᑎᐅᔪᖅ ᔫᓕ ᐳᕋᐅᓐ ᐅᖃᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᖅ ᐱᓕᕆᕙᓪᓕᐊᕗᑦ ᐱᕙᓪᓕᐊᑎᑦᑎᓂᕐᒥ ᐱᐅᓯᒋᐊᖅᑎᑦᑎᓂᕐᒥ ᓄᓇᖃᖅᑳᖅᓯᒪᔪᓄᑦ-ᑐᕌᖓᔪᓄᑦ ᐃᓯᖅᑎᑕᐅᓂᖏᓐᓂ ᐊᒻᒪ ᓇᓗᓇᐃᖅᑕᐅᓂᖏᓐᓂ ᐱᓕᕆᓂᐅᔪᒥ.

ᐃᓕᓐᓂᐊᕐᕕᒃ ᐅᖃᐅᓯᒃᓴᓕᐅᓲᖑᙱᓚᑦ ᒫᓐᓇᐅᔪᒥ ᐃᓕᓐᓂᐊᖅᑎᐅᔪᓂ, ᐃᖅᑲᓇᐃᔭᖅᑎᓂ, ᐅᕝᕙᓘᓐᓃᑦ ᐃᓕᓴᐃᔨᐅᔪᓂ, ᐃᓚᒋᐊᖅᓯᓚᐅᖅᐳᖅ.

ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᑐᕖᑦᑰᓚᐅᖅᐳᖅ ᐃᑲᔪᖅᓱᐃᓪᓗᓂ ᑭᑎ ᓄᐊ ᐃᕐᓂᖓᓂ ᐅᖃᓪᓚᓚᐅᖅᑎᓪᓗᒍ ᐸᓯᒃᓯᔾᔪᑕᐅᔪᓂ ᐊᓈᓇᐅᔪᒥ ᐊᒥᐅᕋ ᐊᒻᒪ ᓇᑦᔭ ᒋᐅᓪᒥ ᐊᑐᓚᐅᕐᓂᖓᓂ ᐃᓚᖏᓐᓂ ᐱᓂᕐᒧᑦ ᐃᓄᖕᓂ ᐱᔪᓐᓇᕐᓂᖅᑖᖅᑎᑕᐅᓯᒪᔪᓄᑦ ᖃᓄᐃᓕᖓᓂᐅᔪᒥ. (ᓗᐊᕆ ᐃᓪᓚᐅᑦ ᐊᔾᔨᖁᑎᖓ/Twitter)

ᖃᔅᓯᒐᓚᖕᓂ ᐃᓄᖕᓂ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᐊᑐᓲᖑᔪᓂ ᐅᖃᕐᓂᕆᕙᒃᑕᖏᓐᓂ ᑕᑯᒃᓴᐅᑎᑦᑎᓂᕐᒥ ᑕᐃᔭᐅᔪᓂ “pretendians” (ᐅᖃᐅᓯᒃᑯᑦ ᐅᖃᐅᓯᐅᔪᒥ ᐃᓄᖕᓄᑦ ᐸᓯᔭᐅᔪᓄᑦ ᓄᓇᖃᖅᑳᖅᓯᒪᔪᙳᐊᖑᓂᖏᓐᓂ) ᓴᖅᑭᑎᑦᑎᓚᐅᖅᐳᑦ ᐊᐱᖅᑯᑕᐅᔪᓂ ᒋᐅᓪᔅᓂ.

ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐅᕗᙵᓚᐅᖅᐳᖅ ᑐᕕᑐᒧᑦ ᐃᑲᔪᖅᓱᐃᓂᕐᒥ ᐅᖃᐅᓯᒃᓴᓕᐊᖑᔪᒥ ᓄᐊ ᐃᓚᒌᖑᔪᓄᑦ.

“ᖁᔭᓐᓇᒦᒃ ᓴᙱᓂᖃᕐᓂᕐᓄᑦ [ᓴᖅᑭᑎᑦᑎᓂᕐᒥ] ᒋᐅᓪ ᒪᕐᕈᓕᐊᖑᔪᓂ,” ᐃᓪᓚᐅᑦ, NDP−ᑯᓐᓂ ᑲᑎᒪᔨᕐᔪᐊᖑᔪᒥ, ᐅᖃᓚᐅᖅᐳᖅ.

“ᐃᓚᒌᓯᒍᑦ ᐅᖃᐅᓯᒃᓴᓕᐊᖓ ᐃᑲᒧᕐᓂᖃᖅᐳᖅ ᓇᓗᓇᐃᖅᓯᓂᕐᒥ ᑭᑎᐅᑉ ᓴᐳᔾᔭᐅᓯᒪᓂᖓᓂ ᓇᓗᓇᐃᖅᓯᐅᔮᕐᔪᒃᑎᓪᓗᒍ ᐱᕋᔭᒃᑐᕕᓂᐅᓂᖓᓂ ᓴᖅᑭᑎᑕᐅᓂᖓᓂ.”

ᐃᙱᖅᑎ ᑖᓐᔭ ᑕᒑᖅ ᑎᑎᕋᓚᐅᖅᐳᖅ ᖃᔅᓯᒐᓚᖕᓂ ᑐᕖᑦᓂ ᒋᐅᓪ ᒪᕐᕈᓕᐊᖑᔪᓄᑦ, ᐊᒻᒪ ᖃᐃᖁᔨᓂᖃᖅᐳᖅ Indspire−ᑯᓐᓂ ᑭᐅᓂᕐᒧᑦ.

“ᖃᓪᓗᓈᑦ ᐃᓅᙱᑎᓪᓗᒋᑦ ᐃᓕᖅᑯᓯᖃᑦᑎᐊᕋᓱᐊᙱᓐᓂᐅᔪᒥ ᐅᖃᕈᑎᒃ ᐅᑯᐊ ᐃᑲᔪᖅᓱᐃᓂᐅᔪᑦ ᐊᒻᒪ ᐃᑲᔪᕈᑎᒃᓴᐃᑦ ᐊᖅᓵᖅᓯᕗᑦ ᐱᕕᒃᓴᖃᕐᓂᐅᔪᓂ ᐃᓄᖕᓂ,” ᑕᒑᖅ ᐅᖃᓚᐅᖅᐳᖅ ᑐᕖᑦᒥ ᐊᐃᑉᕆᓕ 4−ᒥ.

“ᖃᐅᔨᒪᕗᖓ ᐃᓚᖏᓐᓂ ᐃᓄᖕᓂ ᐱᓇᓱᐊᔾᔮᙱᓚᑦ ᐅᒃᐱᕈᓱᖕᒪᑕ ᐊᓯᐊᓂ ᐱᔭᕆᐊᖃᕐᓂᖅᓴᐅᓂᖏᓐᓂ ᐃᒻᒥᓂᒃ.”

ᐳᕌᓐᑎᓐ ᒦᐅᐊᓰᔾ, Indspire−ᑯᑦ ᐋᔩᖃᑎᒌᒃᑎᐅᔪᓂ ᖃᕋᓴᐅᔭᑎᒍᑦ ᑎᑎᕋᓚᐅᖅᐳᑦ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᒫᔾᔨ 30−ᒥ ⎯ ᓯᕗᓂᐊᓂ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᑦ ᐅᖃᐅᓯᖃᓚᐅᕐᓇᑎᒃ ᖃᐅᔨᓴᖅᑕᐅᓂᖓᓂ ⎯ ᑭᓯᐊᓂ ᓱᓕ ᑭᐅᓯᒪᙱᓚᑦ ᒪᓕᒃᑐᓂ ᑐᒃᓯᕋᕐᓂᐅᔪᓂ ᐅᖃᐅᓯᒃᓴᓄᑦ ᖃᐅᔨᓴᕋᔭᕐᒪᖔᑕ ᑮᓇᐅᔭᖃᖅᑎᑕᐅᓂᐅᔪᒥ ᑐᓂᔭᐅᓚᐅᖅᑐᓂ ᒋᐅᓪ ᐊᖓᔪᒌᖑᔪᓄᑦ ᐅᕝᕙᓘᓐᓃᑦ ᖃᔅᓯᓂ ᑮᓇᐅᔭᓂ ᐱᓚᐅᕐᓂᖏᓐᓂ.

ᒋᐅᓪ−ᖑᔪᑦ ᐱᔪᓐᓇᓚᐅᖅᐳᑦ Indspire ᑮᓇᐅᔭᖃᖅᑎᑕᐅᓂᐅᔪᓂ ᑐᓂᓯᓚᐅᕐᒪᑕ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᒥ ᐊᑎᓕᐅᖅᑕᐅᖃᑕᐅᓯᒪᓂᕐᒧᑦ, ᐅᖃᓚᐅᖅᐳᖅ. Indspire ᐱᔭᕆᐊᖃᖅᑎᑦᑎᕗᖅ ᐃᓕᓐᓂᐊᖅᑎᓂ ᑕᑯᒃᓴᐅᑎᑦᑎᓂᕐᒥ ᐃᓚᒋᔭᐅᓂᖏᓐᓂ ᐃᓕᓴᕆᔭᐅᓯᒪᔪᒥ ᓄᓇᖃᖅᑳᖅᓯᒪᔪᓄᑦ ᑲᑎᙵᓂᐅᔪᒥ, ᓄᓇᓕᖕᒥ ᐅᕝᕙᓘᓐᓃᑦ ᑲᑐᔾᔨᖃᑎᒌᖑᔪᒥ.

ᑭᖑᓂᐊᒍᑦ ᓄᓇᕗᒻᒥ ᑐᙵᕕᒃᑯᑦ ᑎᒥᖁᑕᐅᔪᑦ ᐅᖃᐅᓯᖃᓚᐅᖅᑎᓪᓗᒋᑦ ᑕᐃᔭᐅᔪᒥ “ᐱᕋᔭᒃᑐᕕᓂᐅᔪᖃᑐᐃᓐᓇᕆᐊᖃᕐᓂᖓᓂ ᐊᑎᓕᐅᖅᑕᐅᖃᑕᐅᓯᒪᓂᕐᒧᑦ,” ᐅᖃᖅᑎᐅᔪᖅ ᑲᕙᓐ ᖃᑉᓗᑦᓯᐊᖅ ᐅᖃᓚᐅᖅᐳᖅ ᑲᑐᔾᔨᖃᑎᒌᖑᔪᑦ ᐅᖃᐅᓯᒃᓴᓕᐅᒃᑲᓐᓂᔾᔮᙱᓚᑦ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᐊᐱᕆᓯᒪᕗᑦ ᑲᓇᑕᒥ ᐸᓖᓯᒃᑯᑦ ᐃᓚᒋᔭᐅᓂᖓᓂ ᖃᐅᔨᓴᖅᑕᐅᓂᐅᔪᒥ, ᑭᓯᐊᓂ ᓄᓇᕘᑉ ᐅᖃᖅᑎᖓ ᓱᓕ ᐅᖃᖅᓯᒪᙱᓚᖅ ᖃᐅᔨᓴᖅᑕᐅᓂᐊᕈᓂ ᐋᒃᑲᓘᓐᓃᑦ.