ᖁᕐᓗᖅᑐᖅ ᒪᐃᔭᖓ ᑎᑎᕋᖅᐳᖅ ᑎᑎᖅᑲᒥᒃ ᐊᑲᖅᓴᙱᓐᓂᐅᔪᒥ ᑲᓇᐃᑎᐊᓐ ᓄᐊᑦᑯᑦ ᐱᔨᑦᑎᕋᕐᓂᖓᓂ ᓄᓇᓕᖕᓂ

For an English version of this story, please see: Kugluktuk mayor pens letter decrying Canadian North service in community.

ᑲᓇᐃᑎᐊᓐ ᓄᐊᑦ ᓱᓕᓂᕋᐃᕗᖅ ᐅᓄᕐᓂᖅᓴᐅᔪᓂ ᖃᖓᑕᓲᖃᕐᓂᐅᔪᒥ ᖁᕐᓗᖅᑑᒃᑯᑦ ᓄᓇᓕᖕᓂ ᒪᐃᔭᖓ ᑎᑎᕋᓚᐅᖅᑎᓪᓗᒍ ᒪᑐᐃᖓᔪᒥ ᑎᑎᖅᑲᒥᒃ ᐊᑲᒃᓴᙱᖦᖢᓂ ᖃᖓᑕᓲᖅᑎᐅᔪᑦ ᐱᔨᑦᑎᕋᕐᓂᖓᓂ.

ᔪᓚᐃ 19−ᒥ, ᒪᐃᔭ ᓴᐃᒪᓐ ᑯᓕᒃᑖᓇ ᑎᑎᕋᓚᐅᖅᐳᖅ ᒪᐃᑯᓪ ᕌᑎᓂᐅᒃᒧᑦ, ᖃᖓᑕᓲᖅᑎᐅᔪᑦ ᐊᐅᓚᑦᑎᔨᒻᒪᕆᖓᓄᑦ, ᐱᔪᒪᓪᓗᓂ ᐅᓄᕐᓂᖅᓴᐅᔪᓂ ᖃᖓᑕᓲᖃᖅᑎᑕᐅᓂᐅᔪᒥ.

ᑯᓕᒃᑖᓇ ᐅᖃᓚᐅᖅᐳᖅ ᓄᓇᓕᐅᔫᑉ ᐋᓐᓂᐊᕕᓕᐊᖅᑐᓄᑦ ᐊᐅᓪᓛᖅᑎᐅᔪᓂ ᐊᔪᖅᓯᓯᒪᒐᔪᒃᐳᑦ ᔭᓗᓇᐃᕝᒥ ᐅᑎᕐᓂᕐᒧᑦ ᖃᖓᑕᓂᐅᔪᓂ ᐃᓂᓕᐅᖅᑕᐅᓯᒪᑦᑎᐊᖅᑎᓪᓗᒋᑦ.

ᒫᓐᓇᐅᔪᒥ, ᖁᕐᓗᖅᑑᑉ ᔭᓗᓇᐃᕝᒧᑦ ᐊᒻᒪ ᐃᐊᑦᒪᓐᑕᓐᒧᙵᐅᔪᓂ ᖃᖓᑕᓲᑦ ᖃᔅᓯᒐᓚᖕᓂ−ᓄᖅᑲᕐᓂᖃᖅᐳᑦ ᐃᖏᕐᕋᓂᐅᔪᓂ ᐊᐅᓪᓚᖅᐸᒃᑐᓂ ᐃᖃᓗᒃᑑᑦᑎᐊᕐᒥ ᐅᕝᕙᓘᓐᓃᑦ ᐅᓗᒃᕼᐊᒃᑑᖅ, ᓄᓇᑦᓯᐊᕐᒥ. ᖁᕐᓗᖅᑐᖅ ᓄᖅᑲᕐᓂᐅᒐᔪᒃᑭᕗᖅ ᐅᐊᖕᓇᓕᐊᖅᐸᓪᓕᐊᔪᓄᑦ ᖃᖓᑕᔪᓂ ᑖᒃᑯᓄᖓ ᓄᓇᓕᐅᔪᓄᑦ.

“ᐃᓄᒋᐊᖕᓂᕗᑦ ᐊᔾᔨᐸᓗᒋᕙᖓ ᐃᑲᓗᒃᑑᑦᑎᐊᕐᒧᑦ ᐊᒻᒪ 12−ᓂ ᑐᕌᖓᔪᓂ ᖃᖓᑕᓲᖅᑕᐅᖃᑦᑕᖅᐳᑦ, ᑕᐅᑐᒃᖢᒍ ᖁᕐᓗᖅᑑᒥ ᐱᑐᐃᓐᓇᖅᐸᒃᖢᑕ 6−ᓂ,” ᑯᓕᒃᑖᓇ ᐅᖃᓚᐅᖅᐳᖅ ᔪᓚᐃ 27−ᒥ ᐊᐱᖅᓱᖅᑕᐅᓂᐅᔪᒥ.

ᐃᖃᓗᒃᑑᑦᑎᐊᖅ ᐃᓄᒋᐊᖕᓂᖃᖅᐳᖅ 1,760−ᓂ, ᐅᖃᐅᓯᐅᓪᓗᓂ ᑭᓪᓕᓯᓂᐊᕐᓂᕐᒧᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ, ᖁᕐᓗᖅᑐᖅ ᐃᓄᒋᐊᖕᓂᖃᖅᑎᓪᓗᒍ 1,400−ᐸᓗᖕᓂ.

ᐅᓄᕐᓂᐅᔪᓂ ᖃᖓᑕᓲᖃᖃᑦᑕᕐᓂᖓᓂ ᐅᖃᐅᓯᐅᓪᓗᓂ ᑯᓕᒃᑖᓇᒧᑦ ᑐᑭᓕᐊᕐᓂᖃᖅᐳᖅ ᓴᓕᒐᒃᓴᐅᔪᒥ ᑲᓇᐃᑎᐊᓐ ᓄᐊᑦ ᑐᓂᓯᕙᖕᓂᖓᓂ ᐃᑭᐊᖅᑭᕕᖓᓂ. ᑯᓕᒃᑖᓇ ᐅᖃᓚᐅᖅᐳᖅ ᐊᔾᔨᒋᙱᓐᓂᖓ ᐊᒃᑐᐃᓂᖃᖅᐳᖅ ᐋᓐᓂᐊᕕᓕᐊᖅᓯᒪᔪᓄᑦ ᐊᐅᓪᓛᖅᑎᐅᔪᓂ ᖁᕐᓗᖅᑐᕐᒥ ᔭᓗᓇᐃᕝᕕᒧᑦ ᐃᐊᑦᒪᓐᑕᓐᒧᐊᕆᐊᖃᖅᑐᓄᑦ ᐱᓂᕐᒥ ᐸᖅᑭᔭᐅᓂᕐᒥ.

“ᐊᒥᓱᓂ ᐋᓐᓂᐊᕕᓕᐊᖅᑐᓄᑦ ᐅᐸᒃᑕᐅᕕᒃᓴᓂ ᓗᖅᑲᖅᑎᑕᐅᒐᔪᒃᐳᑦ ᐱᔾᔪᑎᖃᖅᑐᒥ ᐃᒃᓯᕙᐅᑕᒃᓴᖃᙱᓗᐊᕐᓂᖓᓄᑦ,” ᐅᖃᓚᐅᖅᐳᖅ.

“ᑕᐃᒪᐃᓐᓂᐅᒐᔪᒃᐳᖅ ᐋᓐᓂᐊᕐᕕᓕᐊᕋᓱᐊᖅᑐᖅ ᐅᖃᓗᒡᕕᐅᓗᓂ ᐃᑲᕐᕋᒥ ᒪᕐᕉᖕᓂᓪᓘᓐᓃᑦ ᖃᖓᑕᓲᖅ ᐊᐅᓚᕐᕕᒃᓴᖓᓂ, ᐊᒻᒪ ᑕᒪᓐᓴ ᓈᒻᒪᙱᓚᖅ.”

ᐋᓐᓂᐊᕕᓕᐊᖅᓯᒪᔪᓄᑦ ᐊᐅᓪᓛᖅᑎᐅᔪᓂ ᐊᔪᕈᑎᖃᑐᐃᓐᓇᙱᓚᑦ ᐊᐅᓪᓚᕐᓂᕐᒥ ᓄᓇᓕᖕᒥ, ᑯᓕᒃᑖᓇ ᐅᖃᓚᐅᖅᐳᖅ, ᐊᔪᕈᑎᖃᖃᑦᑕᕆᕗᑦ ᐅᑎᕐᓂᕐᒧᑦ.

ᐅᖃᓚᐅᖅᐳᖅ ᐊᑕᐅᓯᕐᒥ ᓄᓇᖃᖅᑎᐅᔪᒥ ᒫᓐᓇᓕᓴᐅᔪᒥ ᐊᔪᖅᓯᓯᒪᓚᐅᖅᐳᖅ ᔭᓗᓇᐃᕝᒥ ᐱᓇᓱᐊᕈᓯᕐᓄᑦ ᒪᕐᕉᖕᓄᑦ ᐅᑕᖅᑭᓪᓗᓂ ᖃᖓᑦᑕᐅᑎᒃᓴᒥ ᐊᖏᕐᕋᒧᑦ.

“ᐅᓇ ᐊᑭᖃᖅᑎᑦᑎᕗᖅ ᑕᐅᓯᓐ−ᖏᓐᓂ ᑮᓇᐅᔭᓂ ᓂᕆᔾᔪᑎᒃᓴᓂ ᐊᒻᒪ ᑐᔪᕐᒥᕕᐅᔪᓂ ᐅᕘᓇ (ᓄᓇᕗᒻᒥ) ᒐᕙᒪᒃᑯᑦ ᐋᓐᓂᐊᕕᓕᐊᖅᓯᒪᔪᓄᑦ ᐊᐅᓪᓛᕐᓂᕐᒧᑦ ᐱᓕᕆᕝᕕᖓᓄᑦ, ᐃᓱᒪᒋᔭᓐᓂ, ᐊᒻᒪ ᐅᓇ ᑭᖑᕙᕆᐊᕐᓂᐅᔪᖅ ᐊᒃᑐᐃᓂᖃᓲᖑᕗᖅ ᐃᓄᖕᒥ ᓇᖕᒥᓂᖅ ᐃᖅᑲᓇᐃᔮᖃᕈᑎᒃ,” ᑯᓕᒃᑖᓇ ᐅᖃᓚᐅᖅᐳᖅ.

“ᐊᐅᓚᑦᑎᔨᐅᔪᑦ ᑲᓇᐃᑎᐊᓐ ᓄᐊᑦᒥ ᖃᐅᔨᒪᓗᐊᙱᓚᑦ ᓱᓕᓂᐅᔪᒥ ᓵᙵᓂᑦᑎᓐᓂ ᐅᓪᓗᒥᒥ, ᐊᒻᒪ ᐱᓕᕆᑦᑎᐊᒃᑲᓐᓂᕆᐊᖃᖅᐳᑦ.”

ᐅᖃᐅᓯᒃᓴᓕᐊᖑᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ, ᕌᑎᓂᐅᒃ ᑭᐅᓚᐅᖅᐳᖅ ᑯᓕᒃᑖᓇᐅᑉ ᐅᖃᐱᓗᖕᓂᖓᓄᑦ, ᐅᖃᖅᖢᓂ ᖃᖓᑕᓲᖅᑎᐅᔪᑦ ᐸᕐᓇᐃᕗᑦ ᖄᒃᑲᓐᓂᐊᒍᑦ ᖃᖓᑕᓲᖃᖅᑎᑕᐅᓂᕐᒥ ᖁᕐᓗᖅᑐᒧᑦ ᓈᑦᑎᖑᔭᕐᒥ, ᐱᒋᐊᕐᓗᓂ ᓯᑎᐱᕆ 10−ᒥ.

“ᐱᓕᕆᓂᖃᖅᐳᖅ ᐱᔪᒪᓂᐅᔪᒥ ᕿᒥᕐᕈᔭᐅᓪᓗᓂ ᖃᐅᑕᒫᒥ ᐊᒻᒪ ᐱᔭᕆᐊᖃᖅᐸᑦ ᖄᒃᑲᓐᓂᐊᒍᑦ ᐃᓐᓄᒍᓐᓇᕐᓂᖓᓂ ᐃᓚᔭᐅᕙᒃᐳᖅ ᓂᐅᕕᐊᒃᓴᖃᕐᓂᐅᔪᓄᑦ ᓇᓗᓇᐃᖅᓯᓂᕐᒥ ᐋᓐᓂᐊᕕᓕᐊᖅᓯᒪᔪᓄᑦ ᐊᐅᓪᓛᕐᓂᐅᔪᒥ ᑭᐅᔭᐅᕙᖕᓂᖏᓐᓂ,” ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᖃᐅᔨᒋᐊᖅᑕᐅᒃᑲᓐᓂᕐᓂᕐᒥ ᐋᒍᔅᑎ 1−ᒥ, ᑯᓕᒃᑖᓇ ᐅᖃᓚᐅᖅᐳᖅ ᓱᓕ ᐱᓚᐅᙱᓚᖅ ᑭᐅᓂᓪᓚᕆᐅᔪᒥ ᕌᑎᓂᐅᒃᒥ.

ᐱᔾᔪᑎᖃᖅᑐᒥ ᕌᑎᓂᐅᒃ ᐅᖃᐅᓯᒃᓴᓕᐊᖓᓐᓂ, ᑯᓕᒃᑖᓇ ᐅᖃᓚᐅᖅᐳᖅ ᐅᒃᐱᕈᓱᒃᐳᖅ ᖄᒃᑲᓐᓂᐊᒍᑦ ᖃᖓᑕᓲᖃᕐᓂᐅᔪᒥ ᐊᑐᐃᓐᓴᐅᑎᑕᐅᓪᓚᕆᖕᓂᐊᖅᐳᖅ ᑭᐅᓂᕐᒥ ᓯᕗᓂᐊᓂ ᐱᔪᒪᓂᐅᔪᒥ ᓴᓇᓚᐅᖅᑕᖓᓂ ᐊᕐᕌᓂᐅᔪᒥ, ᐃᓚᖃᖅᑐᒥ ᕼᐋᒻᓚᒃᑯᓐᓂ ᐅᓗᒃᕼᐊᒃᑑᕐᒥ, ᑐᓂᓯᓂᕐᒥ ᐅᓄᕐᓂᖅᓴᐅᔪᒥ ᖃᖓᑕᓲᖃᕐᓂᐅᔪᒥ ᐱᔨᑦᑎᕋᕐᓂᕐᒧᑦ ᒪᕐᕉᔪᓂ ᓄᓇᓕᐅᔪᓂ.

“ᐃᓱᒪᕗᖓ ᐅᕙᙶᕐᓂᖓᓂ ᓯᕗᓂᐊᓂ ᐃᓚᐅᖃᑕᐅᓂᐅᔪᓂ ᑲᓇᐃᑎᐊᓐ ᓄᐊᑦᒥ,” ᐅᖃᓚᐅᖅᐳᖅ.

“ᓇᓗᓇᐃᖅᑕᐅᓯᒪᙱᓚᖓ ᓱᓕ ᐅᕙᙶᕐᓂᖓᓂ ᑎᑎᕋᓚᐅᖅᑕᓐᓂ, ᑕᐃᒫᒃ ᐅᕙᓐᓄᑦ ᐊᔪᕐᓇᖅᐳᖅ ᐅᖃᐅᓯᒃᓴᓕᐅᕐᓂᕐᒥ ᑭᓯᐊᓂ ᓱᓕᔪᓂ ᐅᖃᐅᓯᒃᓴᖅᑖᕈᒪ.”

ᖃᖓᑕᓲᖅᑎᐅᔪᒥ ᐅᖃᖅᑎᐅᔪᒥ ᐅᖃᓚᐅᖅᐳᖅ ᕌᑎᓂᐅᒃ ᐊᑐᐃᓐᓇᐅᙱᓐᓂᖓᓂ ᐅᖃᐅᓯᒃᓴᓕᐅᕐᓂᕐᒧᑦ.

ᑕᒪᓐᓇ ᐅᖃᖅᖢᒍ, ᑯᓕᒃᑖᓇ ᐅᖃᓚᐅᖅᐳᖅ ᑐᙵᓱᒃᑎᑦᑎᕗᖅ ᖄᒃᑲᓐᓂᐊᒍᑦ ᖃᖓᑕᓲᖃᕐᓂᐅᔪᒥ, ᐱᓗᐊᖅᑐᒥ ᑐᑭᖃᖅᐸᑦ ᐃᓚᒌᖑᔪᓂ ᖁᕐᓗᖅᑐᕐᒥ ᐊᒻᒪ ᐅᓗᒃᕼᐊᖅᑑᒥ ᓂᕈᐊᒐᒃᓴᖃᕐᓂᖅᓴᐅᓂᐊᕐᓂᖏᓐᓂ ᐊᐅᓪᓛᕐᓂᕐᒧᑦ.

ᑭᓯᐊᓂ, ᐅᖃᓚᐅᖅᐳᖅ ᑐᓴᒐᒃᓴᖅᑖᒃᑲᓐᓂᕈᒪᕗᖅ ᖃᖓᑕᓲᖅᑎᐅᔪᓂ ᐅᖓᑖᓂ ᐅᖃᐅᓯᒃᓴᓕᐊᖑᔪᒥ ᑐᓂᔭᐅᔪᓄᑦ ᓯᐊᒻᒪᖅᑎᑦᑎᔨᐅᔪᓄᑦ.

“ᒫᓐᓇᒧᑦ ᑎᑭᖦᖢᒍ, ᐱᓚᐅᖅᓯᒪᙱᓚᖓ ᑭᐅᓂᐅᔪᒥ ᑕᐃᑲᙵᑦ,” ᐅᖃᓚᐅᖅᐳᖅ.

“ᐅᓇ ᑭᐅᓂᐅᒍᓂ ᐅᕙᓐᓄᑦ ᑐᓂᔭᐅᔪᒥ, ᑕᐃᒫᒃ ᐱᕕᒃᓴᖃᕐᓂᐅᔪᒥ ᑭᖑᕙᖅᐳᑎᑦ, ᐃᓱᒪᒋᔭᓐᓂ.”