ᖃᓄᖅ ᓄᓇᕗᑦ ᒪᑐᑎᑦᑎᓚᐅᙱᓚᑦ ᐋᓐᓂᐊᕕᖕᓂ

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕ ᐃᓱᒪᓚᐅᕐᓯᒪᔪᖅ ᔫᓂᒥ ᒫᓂ 11ᖏᓐᓃᑦᑐᑦ ᐋᓐᓂᐊᕖᑦ ᒪᑐᔭᐅᓚᐅᑲᖕᓂᐊᕋᓱᒋᓪᓗᓂᒋᑦ ᐊᐅᔭᐅᔪᖅ ᑭᓯᐊᓂᓕ ᒪᕐᕈᑐᐊᒃ ᒪᑐᓚᐅᕐᓯᒪᔫᒃ

ᒪᕐᕉᒃ ᐋᓐᓂᐊᕖᒃ ᓄᓇᕗᒥᑦ ᒪᑐᓚᐅᑲᓚᐅᖅᑑᒃ ᐊᐅᔭᖅ ᐅᑯᓇᓂ ᑭᖓᐃᑦ ᐊᒻᒪ ᐸᖕᓂᕐᑑ. (ᐊᔾᔨᓕᐅᕆᔨ ᒥᓚᓂ ᐅᕆᑦᓴᑦ)

By ᑕᐃᕕᑦ ᓛᕼᐄᑦ L

For English version, see Health minister explains how Nunavut avoided health centre closures across territory

ᐃᓱᒪᒐᓗᐊᖅᑎᓪᓗᒍ 11 ᓄᓇᕗᒥᑦ 25ᓂ ᐋᓐᓂᐊᕕᖕᓂ ᒪᑐᓛᕋᓱᒋᔭᐅᓪᓗᑎᒃ ᐊᐅᔭᖅ, ᒪᕐᕈᑐᐊᒃ ᒪᑐᔭᕆᐊᖃᓚᐅᕐᓯᒪᔫᒃ.

ᐋᓐᓂᐊᕖᑦ ᐅᕙᓂ ᑭᙵᐃᑦ ᐊᒻᒪ ᐸᖕᓂᕐᑑᖅ ᒪᑐᓚᐅᕐᒪᑕ ᐋᒐᓯᒥ, ᐅᓇ ᐸᖕᓂᕐᑑᕐᒦᑦᑐᒻ ᐱᓇᓱᐊᕈᓯᕐᒥ ᒪᑐᓯᒪᓪᓗᓂ ᐊᒻᒪ ᑭᙵᐃᑦ ᐋᓐᓂᐊᕕᖓ ᑕᖅᑭᓪᓗᐊᒥ ᒪᑐᓯᒪᓪᓗᓂ. ᑭᙵᐃᑦ ᐋᓐᓂᐊᕕᖓ ᒪᑐᐃᕐᓂᐊᓚᐅᕐᑐᖅ ᓯᑎᐱᕆ 7ᒥ, ᐱᓇᓱᐊᕈᓯᕐᓂ ᐱᖓᓱᓂ ᑐᖓᐅᑦᑎᓪᓗᓂ ᒪᑐᐃᕐᕕᐅᓂᐊᕋᓱᒋᔭᐅᓚᐅᕐᑐᒥᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᐱᓕᕆᔨᖏᓐᓂᒃ ᐋᓐᓂᐊᖃᕐᓇᙱᑦᑐᓕᕆᔨᓄᑦ ᖁᔭᓕᓚᐅᕐᑐᖅ ᐅᓄᕐᓂᕐᓴᐃᑦ ᐋᓐᓂᐊᕖᑦ ᐱᔨᑦᑎᕋᐅᑎᖏᓐᓂᒃ ᐱᓕᕆᐊᖃᕈᓐᓇᓚᐅᕐᓂᖏᓐᓂᒃ ᓄᓇᕗᒥᑦ.

ᐅᖃᒪᐅᕐᑐᖅ ᐃᓚᖏᑦ ᐃᖅᑲᓇᐃᔭᖅᑎᒋᔭᐅᔪᑦ ᕿᑲᕐᕕᒃᓴᖏᓐᓂᒃ ᐋᖅᑭᒃᓱᐃᒃᑲᓐᓂᓚᐅᕐᒪᑕ ᐊᒻᒪᓗ ᐊᖏᖅᖢᑎᒃ ᓴᓇᒃᑲᓐᓂᕈᓐᓇᕐᓂᕋᖅᖢᑎᒃ ᑖᒃᑯᓇᓂ ᐋᓐᓂᐊᕕᖕᓂ ᐅᐸᒃᓯᒪᔭᖏᓐᓂᒃ.

“ᐃᖅᑲᓇᐃᔭᖅᑏᑦ ᑖᒃᑯᓂᖓ ᒪᑐᑎᑦᑎᑦᑕᐃᓕᓂᖏᑦ ᐱᒃᑯᓇᓚᐅᕐᑐᖅ ᐊᒃᓱᐊᓗᒃ,” ᒪᐃᓐ ᐅᖃᕐᑐᖅ.

“ᑖᒃᑯᐊ ᐃᓱᒪᒋᔭᕆᐊᖃᒻᒪᕆᒃᑐᑦ.”

ᐋᓐᓂᐊᓯᐅᕐᑎᓂᒃ ᓄᓇᕗᒻᒦᑎᑦᑎᓇᓱᓚᐅᕐᒪᑕ ᐊᕐᕌᓂ ᐋᓐᓂᐊᓯᐅᖅᑏᑦ ᐃᓚᖏᓐᓂ ᓇᒡᓴᕈᓐᓇᖅᖢᑎᒃ ᓄᓇᓕᖕᓃᖃᑎᒋᓂᐊᖅᑕᖏᓐᓂᒃ, ᑖᒃᑯᐊᓗ ᓄᓇᕗᒥᑦ ᒐᕙᒪᒃᑯᓐᓄᑦ ᖃᖓᑦᑕᐅᑎᖏᑦ ᐊᑭᓕᖅᐸᒃᖢᒋᑦ. ᑕᒪᑐᒪᓂ ᐊᕐᕌᒍᒥ ᑕᐃᒪᐃᓕᐅᒃᑲᓐᓂᕈᒪᔪᐃᑦ.

“ᐱᒻᒪᕆᐊᓘᖕᒪᑦ ᐋᓐᓂᐊᓯᐅᖅᑏᑦ ᓄᓇᓕᖕᓂ ᖁᕕᐊᒋᔭᖃᕐᓗᑎᒃ ᐅᐸᒃᓯᒪᔭᖏᓐᓂᒃ,” ᒪᐃᓐ ᐅᖃᕐᑐᖅ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑕᒪᑐᒨᖓ ᐃᑲᔪᖅᑕᐅᑦᑎᐊᒻᒪᕆᓚᐅᕐᒥᔪᑦ.

ᐅᑯᐊ ᑲᓃᑎᐊᓐ ᐅᕆᐊᑦ ᑯᕌᔅ (Canadian Red Cross) 8ᓂ ᐋᓐᓂᐊᓯᐅᖅᑎᖃᖅᑎᑦᑎᓪᓗᑎᒃ ᓄᓇᕗᒥᑦ ᐋᓐᓂᐊᕕᖕᓂ ᐃᓇᖏᕐᓯᖃᑦᑕᕐᓂᐊᖅᑐᓂᒃ ᐊᒻᒪᓗ ᐋᓐᓂᐊᖅᑐᓂᒃ ᑲᒪᒋᔭᖃᖅᐸᒃᑐᑦ ᐃᑲᔪᕆᐊᖅᑎᑕᐅᓚᐅᕐᒥᔪᑦ. ᑕᒪᒃᑯᐊᓕ ᐋᓐᓂᐊᖅᑐᓂᒃ ᑲᒪᒋᔭᖃᖅᐸᒃᑐᑦ ᐋᓐᓂᐊᓯᐅᖅᑎᐅᑉ ᐱᓕᕆᐊᖏᓐᓂ ᐱᓕᕆᐊᖃᖃᑦᑕᙱᒃᑲᓗᐊᖅᖢᑎᒃ ᐃᑲᔪᕈᑎᖃᓚᐅᕐᑐᑦ ᓄᓇᓕᖕᓃᑦᑐᓂᒃ ᐋᓐᓂᐊᓯᐅᖅᑎᓂᒃ, ᐅᖃᕐᑐᖅ ᒪᐃᓐ.

ᐋᓐᓂᐊᕖᑦ ᓄᓇᕗᒦᑦᑐᑦ ᒪᑐᑦᑎᐊᒻᒪᕆᓚᐅᙱᑦᑐᑦ ᐱᔨᑦᑎᕋᐅᑎᓕᕆᓂᖏᑦ ᓇᐃᒡᓕᒋᐊᖅᑕᐅᖔᖅᖢᑎᒃ. ᐋᓐᓂᐊᓯᐅᖅᑏᑦ ᐃᑲᕐᕋᓕᐅᙱᓐᓂᕐᓴᐅᓕᕐᑎᓪᓗᒋ ᓴᓇᕝᕕᖏᓐᓃᑲᑕᐃᓐᓇᓚᐅᕐᑐᑦ ᐊᒻᒪᓗ ᑐᐊᕕᕐᓇᖅᑐᓕᕆᑐᐃᓐᓇᖅᖢᑎᒃ.

ᐊᕐᕌᓂᓕ, 8 ᐋᓐᓂᐊᕖᑦ ᒪᑐᓚᐅᕐᒪᑕ ᐅᕝᕙᓘᓐᓃᑦ ᒪᑐᐃᖓᓂᖏᑦ ᓇᐃᒡᓕᒋᐊᖅᑕᐅᓪᓗᑎᒃ ᐊᐅᔭᐅᑉ ᐃᓚᖓᓂ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᕐᑎᒋᔭᐅᔪᖅ ᑯᕆᔅ ᐸᔅᓕᐊ ᐅᖃᓚᐅᕐᑐᖅ ᐱᔨᑦᑎᕋᐅᑎᓂᒃ ᐱᓕᕆᐊᖃᙱᓐᓂᕐᓴᐅᑎᑕᐅᓪᓗᑎᒃ ᐊᐅᓚᑦᑎᓂᕐᒧᑦ ᐃᓚᒋᔭᐅᓂᕋᖅᖢᓂᐅᒃ ᐊᒻᒪᓗ ᑕᒪᕐᒥᒃ ᓄᓇᕗᒥᑦ ᐋᓐᓂᐊᕖᑦ ᐃᓚᖓᒍᑦ ᒪᑐᐃᖓᓂᖏᑦ ᓇᐃᒡᓕᒋᐊᕐᓯᒪᖃᑦᑕᓚᐅᕐᑐᑦ ᐊᐅᔭᖅ. ᑕᐃᒪᐃᔾᔪᑎᖃᓗᐊᓚᐅᙱᑦᑐᑦ ᐃᖅᑲᓇᐃᔭᖅᑎᖃᙱᓗᐊᕐᓂᒨᙱᑦᑐᖅ, ᐅᖃᕐᑐᖅ.

ᒪᐃᓐ ᐅᖃᓚᐅᕐᑐᖅ ᐋᓐᓂᐊᕕᓕᕆᓂᖅ ᖃᕋᓴᐅᔭᒃᑯᑦ ᐊᑐᐃᓐᓇᐅᓚᐅᕐᓂᕋᖅᖢᓂᐅᒃ ᓄᓇᓕᖕᓂ ᒪᑐᑐᐃᓐᓇᕆᐊᓕᖕᓂᒃ ᐊᒻᒪᓗ ᐱᔨᑦᑎᕋᐅᑎᖏᓐᓂᒃ ᓇᐃᒡᓕᒋᐊᕐᓯᒪᔪᓄᑦ.

ᓄᓇᕗᒥᑦ ᒐᕙᒪᒃᑯᑦ ᒪᑐᔪᖃᔾᔮᕋᓱᒋᙱᖢᓂᔾᔪᒃ ᐊᐅᔭᐅᑉ ᐃᓚᖓᓂᒃ.

Share This Story

(0) Comments

Join the Conversation

Your email address will not be published. Required fields are marked *

*